188. ALDIZKARIA - 2019ko irailaren 24a

1. NAFARROAKO FORU KOMUNITATEA

1.7. BESTELAKOAK

1817/2019 EBAZPENA, irailaren 10ekoa, Nafarroako Unibertsitate Publikoko errektoreak emana. Haren bidez agintzen da argitaratzeko “Nafarroako Unibertsitate Publikoko Graduko Ikasketa Ofizialetan onartua izateko Araudia aldatzen duena”, 2019ko irailaren 10eko Gobernu Kontseiluak onetsia.

2003ko maiatzaren 12ko 110/2003 Foru Dekretuak onetsitako Unibertsitateko Estatutuetako 40. artikuluak ematen dizkidan eskumenak erabiliz, agintzen dut argitaratzeko 2019ko irailaren 10eko Gobernu Kontseiluak hartutako erabakia, zeinaren bidez onetsi baitzen “Nafarroako Unibertsitate Publikoko Graduko Ikasketa Ofizialetan onartua izateko Araudia aldatzen duena”.

“Erabakia, Nafarroako Unibertsitate Publikoko graduko ikasketa ofizialetan onartua izateko araudia aldatzen duena.

Gobernu Kontseiluaren 2017ko maiatzaren 3ko Erabakiaren bidez, Nafarroako Unibertsitate Publikoko Graduko Ikasketa Ofizialetan onartua izateko Araudia onetsi zen.

Honako arau hauetan ezarritakoaren arabera onetsi zen araudi hau: Hezkuntzari buruzko 2006ko maiatzaren 3ko 2/2006 Lege Organikoaren 38. artikulua, Hezkuntzako Kalitatea Hobetzeko 2013ko abenduaren 9ko 8/2013 Lege Organikoak emandako idazketarekin; graduko ikasketa ofizialetan onartua izateko prozeduren oinarrizko araudia ezartzen duen 2014ko ekainaren 6ko 412/2014 Errege Dekretua; eta 2013ko abenduaren 9ko 8/2013 Lege Organikoa -Hezkuntzaren kalitatea hobetzekoa- ezartzeko egutegia luzatzeko presako neurriei buruzko 2019ko abenduaren 9ko 5/2016 Errege Lege Dekretua.

Gobernu Kontseiluak 2019ko urtarrilaren 31n hartutako Erabakiaren bidez, araudi hori aldatzea onetsi zen, eta honako alderdi hauek gehitu ziren:

–USEaren borondatezko faseko hizkuntza probak barematzeko aukera, ECD/42/2018 Aginduan aurreikusitakoarekin bat.

–USEa egin duten Espainiako hezkuntza sistemako ikasleen baldintza berdinetan onartzea atzerriko hezkuntza sistemetatik datozen eta UHUNen gaitasun espezifikoen probak egin dituzten ikasleak.

–Onarpen-eskaera bat baino gehiago aurkezteko aukera arautzeko bidea.

–Onartua izateko epeak malgutzea ikasleari egozteko modukoak ez diren aparteko egoeretan.

Araudian beste aldaketa bat egitea proposatu da, Espainiako eta atzerriko ikasketak aldatzeko prozeduretan eskaerak ordenatzeko irizpide eta betekizun berriak sartzeko.

Era berean, erabaki da onartuen zerrendak Unibertsitatearen iragarki-ohol elektronikoan argitaratuko direla, eta paperean argitaratzeari utziko zaiola.

Azkenik, zehatzago ezarri dira ikaspostuak esleitzeko irizpideak ikaspostua kupo baten baino gehiagoren bidez eska dezaketen ikasleen eskaerak onartzeko prozedura orokorrean.

Hau da, Ikasleen Gaietarako, Enpleguko eta Ekintzailetzako errektoreordeak proposaturik, Nafarroako Unibertsitate Publikoko Gobernu Kontseiluak 2019ko irailaren 10ean egindako bileran hartu duen

ERABAKIA

Lehena.–Nafarroako Unibertsitate Publikoko Graduko Ikasketa Ofizialetan onartua izateko Araudiaren aldaketa onestea, eranskinean ezarritako moduan. Gobernu Kontseiluak 2017ko maiatzaren 3an egindako bileran onetsi zen araudia, eta 2019ko urtarrilaren 31ko Erabakiaren bidez aldatu zen.

Bigarrena.–Araudi hau 2020-2021 ikasturtetik aurrera aplikatuko zaie Nafarroako Unibertsitate Publikoan onartua izateko prozedurei.

Hirugarrena.–Erabaki hau aditzera ematea Ikasleen Gaietarako, Enpleguko eta Ekintzailetzako Errektoreordetzari, Irakaskuntzako Errektoreordetzari, Dekanotzei eta Fakultate, Eskola eta Sailetako Zuzendaritzei, Irakaskuntza Zerbitzuari eta Sarbidearen, Beken eta Tituluen Atalari.

Laugarrena.–Erabaki hau Nafarroako Aldizkari Ofizialean argitaratzeko agindua ematea.”

Iruñean, 2019ko irailaren 10ean.–Errektorea, Ramón Gonzalo García.

ERANSKINA

NAFARROAKO UNIBERTSITATE PUBLIKOKO GRADUKO IKASKETA OFIZIALETAN ONARTUA IZATEKO ARAUDIAREN ALDAKETA

Bat.–6. artikuluak, hots, “Onartua izateko eta ikaspostuak eskaintzeko prozedurak” izenekoak, duen 6. apartatua kentzen da. Haren edukia 10. artikuluan jaso da.

Bi.–9. artikulua aldatzen da, hots, “Eskaeren tramiteak” izenekoa. Honela geldituko da:

9. artikulua. Eskaeren tramiteak eta sarbide kupoen lehentasuna.

1. Ezarritako epeetan eta Nafarroako Unibertsitate Publikoak urtero argitaratuko duen prozeduraren arabera egin behar dira graduko ikasketa ofizialetan onartua izateko eskaerak.

2. Interesdunek eskaera aurkezteko aukera dute, eta hobespen ordenan zerrendatu behar dituzte nahi dituzten ikasketak.

3. Gobernu Kontseiluak urtero ezarriko du eskaeran zenbat titulazio jartzeko aukera dagoen gehienez ere.

4. 8. artikuluko salbuespenak baztertu gabe, onarpena kupo bat baino gehiagoren bidez eskatzeko baldintzak betetzen dituzten ikasleak aukera horretaz baliatzen ahalko dira. Ikaspostua kupo bat baino gehiagoren bidez lor dezaketenak kupo batean bakarrik izango dute onartuak izateko aukera. Kasu horietan, sarbide kupoen lehentasun ordena honi jarraituko zaio ikaspostuak esleitzeko: 1.a) Kupo orokorra; 2.a) 25 urtetik gorakoentzako kupoa; 3.a) 45 urtetik gorakoentzako kupoa; 4.a) 40 urtetik gorakoentzako kupoa; 5.a) Tituludunentzako kupoa; 6.) Goi mailako edo errendimendu handiko kirolariak; 7.) Desgaitasunen bat dutenentzako kupoa. Nolanahi ere,kupo bakoitzean ikasposturik guztiak esleitzeko ahalegina egingo da lehentasun ordena aplikatzean.

5. Beren kupo orokorrean edo erreserba kupoan ikaspostua lortu ez duten eta goi mailako edo errendimendu handiko ikasle kirolarien edo desgaitasunen bat duten ikasleen kupoetara aurkezteko aukera duten ikasleen eskaerak azken kupo horien barnean ordenatuko dira aurreko apartatuko lehentasun ordena bera errespetatuz.

6. Onartze aldi bakoitzeko eskaerak aurkezteko epeak bukatu eta gero, ez da aldaketarik onartuko eskaeran adierazitako graduko ikasketen hautaketan, ez eta haien lehentasun-ordenan ere.

Hiru.–2. apartatu berri bat eransten zaio 10. artikuluari, hots, “Ikaspostuen esleipena” izenekoari, hurrengo apartatuei zenbaki berriak jartzen zaizkie, eta 4. apartatua ere aldatzen da. Artikulua honela geldituko da:

10. artikulua. Ikaspostuen esleipena.

1. Eskaerak aurkezteko epea bukatu ondoren, araudi honetan ezarritako balioespen-irizpideen eta lehentasun-ordenaren arabera ordenatuko dira, eta, gero, ikaspostuak esleituko dira.

2. Kupo orokorrera bideratuko dira aurreko apartatuetan ezarritakoaren arabera bete gabe geratzen diren erreserba ikaspostuak.

3. Ikasle bakoitzak ikaspostu bakar bat lortzeko aukera izanen du.

4. Eskaera egin duten baina matrikula formalizatuko ez duten ikasleak konpentsatzeko, zilegi da eskainitako ikaspostu kopurua baino ikasle gehiago sartzea onartutako ikasleen zerrendan. Onartutako ikasleen kopuru handiago hori gradu eta kupo bakoitzerako aurreikusitako ehuneko batek zehaztuko du. Ehuneko edo indize hori ikasleen gaien eskumena duen errektoreordetzak finkatuko du.

5. Kupo baten bidez titulazio jakin batean onartu diren ikasleek onartu zituztenean adierazitako egunean eta orduan formalizatu behar dute matrikula. Hala egiten ez badute, galdu eginen dute ikasposturako eskubidea, eta ezin izango dira titulazio berean onartuak izan geroagoko zerrendetan beste kupo batzuen bidez.

6. Ikasturteko irakaskuntza aldia hasten denetik 15 egun natural pasatzen diren arte sortzen diren ikaspostu hutsak, dela ikasleek matrikula gauzatu ez dutelako dela baliogabetu egin dutelako, dagozkien itxarote zerrendetako eskatzaileek beteko dituzte, haietan ezarritako ordenari zorrotz segituz. Nafarroako Unibertsitate Publikoak urtero argitaratuko du itxarote zerrendetan daudenei deialdi publikoak egiteko prozedura.

7. Ikasleak onartzeko prozesua ebatzi eta gero, ikasketaren batean ikaspostu hutsik gelditzen bada eta itxarote zerrendan eskatzailerik ez badago, aukera egonen da ikasketetan onartua izateko eskaera gehiago aurkezteko, ikasturteko irakaskuntza aldia hasten denetik 15 egun natural pasatzen diren arte. Unibertsitateko Erregistro Orokorrean eskaerak aurkeztu diren ordenari zorrotz segituz ebatziko dira eskaera horiek.

8. Aldez aurretik eskainitako ikaspostuak ezin izanen dira hutsik utzi, baldintzak betetzen dituen eskaerarik baldin badago eta haiek behar diren epeetan formalizatu badira.

Lau.–11. artikulua aldatzen da, hots, “Ikaspostuen esleipena argitaratzea” izenekoa. Honela geldituko da:

11. artikulua. Ikaspostuen esleipena argitaratzea.

1. Gradu bakoitzean onartutako ikasleen zerrendak eta, bestela, itxarote zerrendetan gelditzen direnenak Unibertsitateko iragarki-oholean argitaratuko dira. Gradu bakoitzean onartutako ikasleen zerrenden argitalpena interesdunei egindako jakinarazpen ofizialtzat hartuko da, baina ez du sortuko inondik ere haien aldeko ondorio behin betikorik, baldin eta unibertsitateak akatsen bat aurkitzen badu. Kasu horretan, aldatu egingo litzateke.

2. Graduko ikasketa bakoitzeko, onartutako ikasleen zerrenda bat argitaratuko da, ikaspostua lortu duten eskatzaileen lehentasunen arabera ordenatua, eta ikasketetan onartua izateko zer nota duten eta zer kuporen bidez onartu duten adieraziko da.

3. Ikaspostuak esleitzeko prozesuan, Nafarroako Unibertsitate Publikoak zilegi du ezartzea ikasposturik lortu ez duten ikasleek espresuki eskatu behar dutela Nafarroako Unibertsitate Publikoak ezarritako epeetan itxarote zerrendetan egon nahi dutela, hartara, hurrengo onartze zerrendetara dei ditzaten matrikula ez formalizatzeagatik edo baliogabetzeagatik sor litezkeen ikaspostu hutsak betetzeko.

4. Ikasposturik lortu ez duten eskatzaileen lehentasunaren arabera ordenatuta argitaratuko dira itxarote zerrendak, baita unibertsitateko beste Graduko ikasketa batean onartuak izan badira ere, eta ikasketetan onartua izateko zer nota duten eta zer kuporen bidez parte hartu duten adieraziko da. Zerrenda horretan ez dira azalduko lehentasun-ordenan lehenago dagoen ikasketa batean ikaspostua lortu duten ikasleak.

Bost.–V. kapitulua aldatzen da, hots, “Espainiako unibertsitate-ikasketa partzialez aldatzeagatik onartua izatea” izenekoa, eta honela geldituko da:

V. KAPITULUA

Espainiako unibertsitate-ikasketa partzialez aldatzeagatik onartua izatea

13. artikulua. Nork duen onar dezatela eskatzeko aukera, ikasketaz aldatzeagatik.

1. Hauek dute aukera ikasketetan onar ditzatela eskatzeko:

a) Espainiako beste unibertsitate batzuetako ikasketa ofizialak bukatu gabe dituzten eta Nafarroako Unibertsitate Publikoan Graduko ikasketa ofizialetan onartuak izan nahi duten pertsonek, baldin eta 30 kreditu bederen aitortu badakizkieke.

b) Nafarroako Unibertsitate Publikoan ikasketa ofizialak bukatu gabe dituzten eta NUPeko bertako beste Graduko ikasketa batzuetara aldatu nahi duten pertsonek, baldin eta 30 kreditu bederen aitortu badakizkieke.

2. Horrez gainera, jatorrizko ikasketetan hasteko unean onarpen nota bat egiaztatu beharko du Nafarroako Unibertsitate Publikoan onartua izan nahi duen ikasketetan aurreko ikasturteko onartua izateko kupo orokorreko atalase-notaren %85aren berdina edo handiagoa. Gradu bakoitzean eskainitako ikaspostuekin batera argitaratuko dira urtero nota horiek.

Formula honen arabera kalkulatuko da araudi honetako 4. artikuluko j, k, l, m edo n apartatuetan ezarritako sarbideetako batetik sartu ziren ikasleen onarpen nota:

Honako hau da NotAdm: ikaslearen onarpen nota unibertsitateko tituludunen, 25, 40 edo 45 urtetik gorakoen bidetik egindako ikasketetan.

3. Aurreko apartatuetan adierazitako baldintzak betetzen ez dituztenek zilegi izanen dute araudi honen IV. kapituluan ezarritako onartze prozesu orokorrean parte hartzea.

4. Ez da ikasketaz aldatzea onartuko baldin eta ikasketa plana iraungi delako dagoeneko irakasten ez diren irakasgaiak egin behar badira.

14. artikulua. Eskaeren tramiteak.

1. Ezarritako epeetan eta Nafarroako Unibertsitate Publikoak urtero argitaratuko duen prozeduraren arabera egin behar dira ikasketaz aldatzeagatik onartua izateko eskaerak.

2. Ikasleek titulazio bakar bat adierazi behar dute, hau da, ikasketaz aldatzeagatik zein titulaziotan nahi duten onartuak izan.

3. Eskaerak aurkezteko onartze aldi bakoitzerako ezarritako epea bukatzen den egunean eskatzaileek egiaztatutako baldintza akademikoak hartuko dira kontuan, ez besterik.

4. Ikaspostuak esleitzeko prozeduratik kanpo geldituko dira baldintzak betetzen ez dituzten eskaerak edo eskatutako dokumentazioa erantsita ez dutenak.

15. artikulua. Ikaspostuen esleipena.

1. Baliozko eskaeren kopurua eskainitako ikaspostuen kopurua baino handiagoa bada, lehentasun irizpide hauek kontuan hartuta ordenatuko dira eskaerak esleipenean:

a) Espainian araututako lanbide jardueretarako gaitzen duten Graduko ikasketa ofizialetarako, Espainian araututako jarduera horietarako gaitzen duten ikasketetatik datozen ikasleen eskaerek izanen dute lehentasuna, eta, gero, jakintza adar berekoak diren ikasleen eskaerek.

b) Graduko gainerako ikasketa ofizialetarako, jakintza adar bereko ikasketetatik datozen ikasleen eskaerek izanen dute lehentasuna.

2. Lehentasun bakoitzaren barruan, onarpen notaren baturaren eta egindako unibertsitateko ikasketen batez besteko notaren arabera ordenatuko dira eskaerak. Onarpen nota 13.2 artikuluan ezarritakoaren arabera kalkulatzen da, eta unibertsitateko ikasketen batez besteko nota 1125/2003 Errege Dekretuaren 5. artikuluan ezarritakoaren arabera.

Batez besteko nota kalkulatzeko, eskaerak aurkezteko azken epea bukatu bitartean lortutako kalifikazioak hartuko dira kontuan. Ikasketa ziurtagirian, irakasgai batean edo guztietan, 1125/2003 Errege Dekretuaren 5.4 artikuluko baremoan adierazten den zenbakizko kalifikazioa azaltzen ez bada, kalifikazio kualitatiboa zenbakizko bihurtu behar da baremo honekin:

Ohorezko matrikula [10 puntu].

Bikain [9 puntu].

Oso ongi [7,5 puntu].

Nahiko [5,5 puntu].

3. Aldez aurretik eskainitako ikaspostuak ezin izanen dira hutsik utzi, baldintzak betetzen dituen eskaerarik baldin badago eta aldi bakoitzerako ezarritako epeetan formalizatu badira.

16. artikulua. Dokumentazioa.

1. Ikasketaz aldatzeko eskaerarekin batera, kreditu aitorpena balioesteko eta ikaspostuak esleitzeko irizpideak aplikatzeko beharrezko den dokumentazioa aurkeztu behar du eskatzaileak; besteak beste, nahitaezkoa da, aldaketa zein ikasketatatik eskatzen duen, ikasketa horietan hasteko unean unibertsitatean onartua izateko nota egiaztatzen duen dokumentazioa, baita egindako ikasketen ziurtagiri pertsonal osatu bat ere. Bertan, gainditutako irakasgai guztiak eta aitortu nahi diren irakasgaien programak azalduko dira.

2. Ikaslea Nafarroako Unibertsitate Publikotik badator, ez da beharrezkoa izanen aurreko apartatuetan eskatzen den dokumentazioa edo ziurtagiria aurkeztea.

17. artikulua. Ikaspostuen esleipena argitaratzea.

Gradu bakoitzean ikasketaz aldatzeagatik onartutako ikasleen zerrendak eta, bestela, itxarote zerrendetan gelditzen direnenak Unibertsitateko iragarki-oholean argitaratuko dira. Gradu bakoitzean onartutako ikasleen zerrenden argitalpena interesdunei egindako jakinarazpen ofizialtzat hartuko da, baina ez du sortuko inondik ere haien aldeko ondorio behin betikorik baldin eta unibertsitateak akatsen bat aurkitzen badu. Kasu horretan, aldatu egingo litzateke.

18. artikulua. Erreklamazioak.

Ikaspostuen esleipena argitaratu ondoren onartze edo itxarote zerrendetan akatsen bat aurkitzen duenak zilegi du hiru laneguneko epean ikasleen gaien eskumena duen errektoreordeari erreklamazioa aurkeztea. Dokumentuen bidez justifikatu behar da erreklamazioen arrazoia.

Sei.–VI. kapitulua aldatzen da, hots, “Atzerriko unibertsitate-ikasketaz aldatzeagatik onartua izatea” izenekoa, eta honela geratuko da:

VI. KAPITULUA

Atzerriko unibertsitate-ikasketaz aldatzeagatik onartua izatea

19. artikulua. Nork eska dezakeen onar dezatela atzerriko unibertsitate-ikasketaz aldatzeagatik.

1. Atzerriko unibertsitate-ikasketa partzialak dituzten eta Nafarroako Unibertsitate Publikoan Graduko ikasketa ofizialetan onartuak izan nahi duten pertsonek, baldin eta 30 kreditu bederen aitortu badakizkieke.

2. Atzerriko unibertsitate-ikasketak bukatuta dituzten eta Nafarroako Unibertsitate Publikoan Graduko ikasketa ofizialetan onartuak izan nahi duten pertsonek, baldin eta 30 kreditu bederen aitortu badakizkieke. Ikasleak lortutako tituluak Espainian lanbide erregulatu baterako sarbidea ematen badu, titulua homologatzeko tramitea hasi ez bada bakarrik onartuko da, edo tramite hori hasita ere ministerio eskudunak ezezkoa eman badio.

3. Horrez gainera, jatorrizko ikasketetan hasteko unean onarpen nota bat egiaztatu beharko du Nafarroako Unibertsitate Publikoan onartua izan nahi duen ikasketetan aurreko ikasturteko onartua izateko kupo orokorreko atalase-notaren %85aren berdina edo handiagoa. Gradu bakoitzean eskainitako ikaspostuekin batera argitaratuko dira urtero nota horiek.

Unibertsitatean sartzeko ikasketak atzerriko hezkuntza sistemetan egin zituzten ikasleek betekizun hori betetzen dutela egiaztatu beharko dute UHUNek emandako egiaztagiriaren bidez araudi honetako 4. artikuluko d, e, f, g, h eta i apartatuetan ezarritako moduan.

Atzerriko unibertsitate-ikasketak bukatuta dituzten ikasleek beren unibertsitate-espedientearen batez besteko notaren bidez ere egiazta dezakete betekizun hori betetzen dutela. Batez besteko nota 13. artikuluko 2. apartatuan ezarritako formularen bidez kalkulatzen da.

4. Inolaz ere ez dira onartuko 2014ko azaroaren 21eko 967/2014 Errege Dekretuaren 3. artikuluak ezarritako baztertzeko arrazoiren bat daukatenak. Dekretu horren bidez ezartzen dira betebeharrak eta prozedura homologatzeko eta baliokidetza aitortzeko, unibertsitateko titulu ofiziala eta maila akademiko ofiziala izan daitezen, eta unibertsitateko atzerriko ikasketak baliokidetzeko, bai eta prozedura ere zehazteko zein den titulu ofizial hauen egokitasuna kualifikazioen Espainiako esparruen mailekin: arkitektoa, ingeniaria, lizentziaduna, arkitekto teknikoa, ingeniari teknikoa eta diplomaduna.

5. Aurreko apartatuetan adierazitako gutxieneko 30 kredituak aitortuta ez dituztenek zilegi izanen dute araudi honen I. kapituluan ezarritako onartze prozesu orokorrean parte hartzea.

6. Ez da ikasketaz aldatzea onartuko baldin eta ikasketa plana iraungi delako dagoeneko irakasten ez diren irakasgaiak egin behar badira.

20. artikulua. Eskaeren tramiteak.

1. Atzerriko unibertsitate-ikasketaz aldatzeagatik onartua izateko eskaerak ezarritako epeetan eta Nafarroako Unibertsitate Publikoak urtero argitaratuko duen prozeduraren arabera egin behar dira.

2. Ikasleek titulazio bakar bat adierazi behar dute, hau da, ikasketaz aldatzeagatik zein titulaziotan nahi duten onartuak izan.

3. Eskaerak aurkezteko onartze aldi bakoitzerako ezarritako epea bukatzen den egunean eskatzaileek egiaztatutako baldintza akademikoak hartuko dira kontuan, ez besterik.

4. Ikaspostuak esleitzeko prozeduratik kanpo geldituko dira baldintzak betetzen ez dituzten eskaerak edo eskatutako dokumentazioa erantsita ez dutenak.

21. artikulua. Ikaspostuen esleipena.

1. Baliozko eskaeren kopurua eskainitako ikaspostuena baino handiagoa bada, onarpen notaren baturaren eta egindako unibertsitateko ikasketen batez besteko notaren arabera ordenatuko dira eskaerak. Onarpen nota 13.2 artikuluan ezarritakoaren arabera kalkulatzen da, eta unibertsitateko ikasketen batez besteko nota 1125/2003 Errege Dekretuaren 5. artikuluan ezarritakoaren arabera, gaian eskumena duen Ministerioak ezarritako baliokidetza taulekin bat etorriz.

2. Aldez aurretik eskainitako ikaspostuak ezin izanen dira hutsik utzi, baldintzak betetzen dituen eskaerarik baldin badago eta aldi bakoitzerako ezarritako epeetan formalizatu badira.

22. artikulua. Dokumentazioa.

Ikasketaz aldatzeko eskaerarekin batera, kreditu aitorpena balioesteko eta ikaspostuak esleitzeko irizpideak aplikatzeko beharrezko den dokumentazioa aurkeztu behar du eskatzaileak; besteak beste, nahitaezkoa da, aldaketa zein ikasketatatik eskatzen duen, ikasketa horietan hasteko unean unibertsitatean onartua izateko nota egiaztatzen duen dokumentazioa, egindako ikasketen ziurtagiri pertsonal osatu bat ere. Bertan, gainditutako irakasgai guztiak eta aitortu nahi diren irakasgaien programak azalduko dira.

23. artikulua. Ikaspostuen esleipena argitaratzea.

Gradu bakoitzean ikasketaz aldatzeagatik onartutako ikasleen zerrendak eta, bestela, itxarote zerrendetan gelditzen direnenak Nafarroako Unibertsitate Publikoko iragarki-oholean argitaratuko dira. Gradu bakoitzean onartutako ikasleen zerrenden argitalpena interesdunei egindako jakinarazpen ofizialtzat hartuko da, baina ez du sortuko inondik ere haien aldeko ondorio behin betikorik, baldin eta unibertsitateak akatsen bat aurkitzen badu. Kasu horretan, aldatu egingo litzateke.

24. artikulua. Erreklamazioak.

Ikaspostuen esleipena argitaratu ondoren onartze edo itxarote zerrendetan akatsen bat aurkitzen duenak zilegi du hiru laneguneko epean ikasleen gaien eskumena duen errektoreordeari erreklamazioa aurkeztea. Dokumentuen bidez justifikatu behar da erreklamazioen arrazoia.

Zazpi.–25. artikulua aldatzen da, hots, “Tituluaren beste aipamen bat egiteko onartua izatea” izenekoa, bere 3. apartatuan. Honela geldituko da:

3. Tituluari aipamen berri bat egiteko onartutako ikasleen zerrendak eta, bestela, itxarote zerrendetan gelditzen direnenak Unibertsitateko iragarki-oholean argitaratuko dira. Gradu bakoitzean onartutako ikasleen zerrenden argitalpena interesdunei egindako jakinarazpen ofizialtzat hartuko da, baina ez du sortuko inondik ere haien aldeko ondorio behin betikorik baldin eta unibertsitateak akatsen bat aurkitzen badu. Kasu horretan, aldatu egingo litzateke.

Zortzi.–26. artikulua aldatzen da, hots, “Zenbait egoera berezitan onartua izateko eskaeren tramiteak” izenekoa, bere 2. apartatuan. Honela geldituko da:

2. Aurreko apartatuan adierazten diren ikasleek zilegi dute epez kanpo aurkeztea –araudi honen 14. eta 20. artikuluetan ezarritako epetik kanpo– Espainiako edo atzerriko unibertsitate-ikasketaz aldatzeagatiko prozeduraren bidez onartuak izateko eskaera. Haien eskaera aintzat hartzeko baldintza hau da: eskaera epe barnean eskatu izan balute, titulazioan onartzeko aukera izatea, 13. eta 19. artikuluetan ezarritako betekizunak betetzen direla egiaztatu eta gero eta 15. eta 21. artikuluetan ezarritako ikaspostuak esleitzeko irizpideak aplikatu eta gero.

Iragarkiaren kodea: F1911892