Iragarkia

183. ALDIZKARIA - 2019ko irailaren 17a

1. NAFARROAKO FORU KOMUNITATEA

1.4. DIRU-LAGUNTZAK, LAGUNTZAK ETA BEKAK

221/2019 EBAZPENA, abuztuaren 21ekoa, Barneko zuzendari nagusiak emana, zeinaren bidez Nafarroako udalentzako dirulaguntzen deialdi bat onesten baita beren eraikin sakabanatuak lokalizatzeko eta seinaleztatzeko jarduketak egin ditzaten 2019an. DDBN identifikazioa: 471258.

Nafarroako Lurraldeari buruzko Informazio Sistemaren (SITNA) 2016-2019 eperako Plan Estrategikoak ezarri zuen, bere ildo estrategikoen artean, “Helpbidea” izeneko web aplikazioa sortzea, hots, web bisore geografiko bat, SITNA APIan oinarritua, ahalbidetzen duena Nafarroako posta helbide bat aurkitzea, hainbat irizpide konbinatuz: udalerria, entitate bakana, bidea, ataria, etxearen izena edo Helpbideako IDa (helbidearen identifikadore unibokoa).

Hura ezartzearen ondorioz, eta Nafarroako Foru Komunitatean hainbeste eraikin sakabanatu izanik, beharrezkoa da udalak bultzatzea beren eraikin sakabanatuak lokalizatzeko eta seinaleztatzeko jarduketak egin ditzaten, azkeneko helburua izanik horiek errazago aurkitu ahal izatea, bereziki larrialdi zerbitzuek.

Horretarako, 2019rako Nafarroako Aurrekontu Orokorrek honako partida hau jaso dute: 050007 02500 4609 134102, “Babes zibilerako seinaleztapena finantzatzea”. Haren xedea da finantzatzea udalek beren eraikin sakabanatuak lokalizatzeko eta seinaleztatzeko egiten dituzten jarduketak, betiere 2019an gauzatzen badituzte.

Irailaren 9ko 198/2015 Foru Dekretuan xedatutakoaren arabera, Barne Zuzendaritza Nagusiari dagokio Nafarroako Foru Komunitateko Administrazioak babes zibilaren eta larrialdien arloetan dituen zerbitzuak kudeatzea.

Nafarroako Aurrekontu Orokorren kargura ematen diren dirulaguntzen araubide juridiko orokorra Dirulaguntzei buruzko azaroaren 9ko 11/2005 Foru Legearen 17.1 artikuluan ezarrita dago. Artikulu horrek xedatzen du ezen, dirulaguntzak eman baino lehen, organo eskudunak haien oinarri arautzaileak ezarri eta argitaratu beharko dituela. Horrela, dirulaguntza jasotzeko moduan daudenek eskuragai izanen dituzte, eta segurtatuko dira publizitatearen, gardentasunaren, konkurrentziaren, objektibotasunaren, berdintasunaren, bereizkeriarik ezaren eta kontrolaren printzipioak.

Horrenbestez, ikusirik espedientean dauden txostenak, eta Ogasun Departamentuaren kontu-hartzaile delegatuak egindako aldeko txostena dagoenez, Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikuluak eta Lehendakaritzako, Funtzio Publikoko, Barneko eta Justiziako Departamentuaren egitura organikoa ezartzen duen irailaren 9ko 198/2015 Foru Dekretuak ematen dizkidaten eskudantziak erabiliz,

EBAZTEN DUT:

1. Onestea Nafarroako udalentzako dirulaguntzen deialdi bat beren eraikin sakabanatuak lokalizatzeko eta seinaleztatzeko jarduketak egin ditzaten 2019an. Deialdiaren oinarriak ebazpen honen eranskinean ageri dira.

2. 30.000 euroko gastua baimentzea, guztira, 2019rako Nafarroako Aurrekontu Orokorren honako partida honen kargura: 050007 02500 4609 134102, “Babes zibilerako seinaleztapena finantzatzea”.

3. Deialdi hau Nafarroako Aldizkari Ofizialean argitaratzea, behar diren ondorioak izan ditzan.

4. Deialdi honen eta bere oinarrien eta egintzen kontra administrazioarekiko auzi-errekurtsoa jartzen ahal dute interesdun diren administrazio publikoek, Nafarroako Justizia Auzitegi Nagusiko Administrazioarekiko Auzien Salari zuzendua, argitaratu eta biharamunetik hasita bi hilabeteko epean, deusetan galarazi gabe aurretik errekerimendua egin ahal izatea Nafarroako Gobernuari zuzendua, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean.

Administrazio publiko ez diren interesdunek gora jotzeko errekurtsoa jartzen ahalko dute, Lehendakaritzako, Berdintasuneko, Funtzio Publikoko eta Barneko Departamentuko kontseilariari zuzendua, argitaratu eta biharamunetik hasita hilabeteko epean, Administrazio Publikoen Administrazio Prozedura Erkideari buruzko urriaren 1eko 39/2015 Legearen 121. eta 122. artikuluekin eta Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearekin bat.

5. Ebazpen hau igortzea Babes Zibilerako Zerbitzura, Suhiltzaileen eta Babes Zibilaren arloetako Ekonomiaren eta Kontabilitatearen Kudeaketa Bulegora eta Nafarroako Aldizkari Ofizialera.

Iruñean, 2019ko abuztuaren 21ean.–Barneko zuzendari nagusia, María Amparo López Antelo.

OINARRI ARAUTZAILEAK

1.–Deialdiaren xedea eta helburua.

Oinarri arautzaile hauen xedea da deialdi honi aplikatu beharreko araudia ezartzea: Nafarroako udalei dirulaguntzak ematekoa, beren eraikin sakabanatuak lokalizatzen eta seinaleztatzen laguntzeko jarduketak egin ditzaten, betiere jarduketa horiek 2019. urtean gauzatzen badira.

Deialdi honen ondorioetarako, eraikin sakabanatutzat jotzen dira katastroko hiri-lurzatietan kokaturik ez dauden eraikin habitatuak edo habitagarriak.

Diruz lagundutako jardueraren helburuak honako hau du oinarri: dudarik gabeko garrantzia du, pertsonen eta beren ondasunen segurtasunaren ikuspuntutik, eraikin sakabanatuak aurkitzen eta horietara iristen laguntzea, bereziki larrialdi zerbitzuentzat.

2.–Aurrekontuko zuzkidura.

Deialdi honen bidez ematen diren dirulaguntzak honako honen kargura finantzatuko dira: Nafarroako Gobernuaren 2019ko ekitaldirako Gastuen Aurrekontuko “Babes zibilerako seinaleztapena finantzatzea” izeneko 050007 02500 4609 134102 partida, 30.000 euro egiten duena.

3.–Onuradunak eta betebeharrak.

Nafarroako udalak izan daitezke dirulaguntza hauen onuradun, baldin Nafarroako Gobernuaren Posta Helbideen Kudeatzailean sartuta badituzte beren eraikin sakabanatuen helbideak.

Orobat, Dirulaguntzei buruzko azaroaren 9ko 11/2005 Foru Legearen 13. artikuluan ezarritako baldintza orokorrak bete beharko dituzte.

4.–Gastu diruz lagungarriak eta egin beharreko jarduketen baldintzak.

Gastuak diruz lagungarriak izateko, nahitaezkoa izanen da ondoren zehazten diren jarduketetakoak izatea, eta jarduketa horiek 2019ko urtarrilaren 1etik urriaren 31ra bitarte egitea, biak barne, justifikatzeko epea bukatu aurretik ordaindu direnak. Horren ondorioetarako, fakturazioaren eguna zein den, horixe hartuko da gastua egin den eguntzat.

Honako hauek dira jarduketa diruz lagungarriak:

a) Eraikin sakabanatu bakoitzaren identifikaziorako plakak egitea. Gutxienez ere 200 mm x 120 mm-ko neurria izanen dute. Handiagoa izanez gero, 5en multiploa izanen da tamaina. Aire zabalean eusteko moduko materiala izanen da (euriari, eguzkiari, izotzari eusteko modukoa), gutxienez ere dibond aluminioak duen kalitatea daukana. Honako hauek izanen ditu gutxienez: Helpbideako logotipoa, gorriz eta grisez, goiko aldean, ezkerreko izkinan, eta eraikin sakabanatu bakoitzaren Helpbideako identifikadorea, beltzez, Liberation Sans Bold letra motarekin. IV. eranskineko adibidearekin bat etorriko da.

Diruz lagungarri diren identifikazio plaken kopuruak ezin izanen du gainditu kasuko udalak Nafarroako Gobernuaren Helbideen Kudeatzailean sartuak dituen eraikin sakabanatuen kopurua, deialdi hau Nafarroako Aldizkari Ofizialean argitaratzen denekoa alegia.

Aurreko deialdietan kontzeptu honengatik onuradun izan diren udalen kasuan, deialdi horietan diruz lagundutako plaken kopurua hartuko da aintzat, eta diruz lagundutako plaken guztirako kopuruak ezin izanen du gainditu Nafarroako Gobernuaren Helbideen Kudeatzailean sartuak dauden eraikin sakabanatuen kopurua.

b) Metrobaserria diseinatzea. Deialdi honen ondorioetarako, metrobaserria mapa topologiko bat da, zeinak metroko planoen itxura erabiliz ahalbidetzen baitu azkar eta aise aurkitzea udal baten eraikin sakabanatuak, baita horietara iristea ere. Gutxienez ere adieraziko ditu eraikin sakabanatu bakoitzaren ibilbidea eta Helpbideako identifikadorea. Planoak gutxienez ere PDF formatua izanen du.

Betiere, deialdi honetatik kanpo gelditzen dira mapa hori inprimatzeko edo banatzeko gastuak.

Aurreko deialdietan diruz lagundutako metrobaserria duten udalek ezin izanen dituzte laguntzak berriro jaso kontzeptu honengatik, ez eta egindako metrobaserria eguneratzeagatik.

c) Bidegurutzeetan seinale horizontalak jartzea, eraikin sakabanatuen kokapena agertzeko. Seinale horiek gutxienez ere honako hauek jasoko dituzte: eraikin sakabanatuen izena eta horren Helpbideako identifikadorea. Jada halako seinalerik baldin badago, diruz lagungarritzat joko da, orobat, hura egokitzea, hots, Helpbideako identifikadorea eranstea.

Betiere, deialdi honetatik kanpo gelditzen dira elementu horietako edozein ezartzeko edo paratzeko gastuak.

Nafarroako Gobernuaren Lurraldeko Informazio Sistemen Atalari eskatuko zaizkio Helpbideako logotipoa eta kodeak, mezu elektroniko bat bidaliz sitna@navarra.es helbidera.

5.–Prozedura antolatu, instruitu eta ebazteko eskumena duten organoak.

Deialdi honetan aurreikusitakoaren ondorioetarako, dirulaguntzak emateko prozeduraren gaineko ordenamendu eta instrukzio eginkizunak Babes Zibilerako Zerbitzuari esleitu zaizkio. Oinarri arautzaileotan “instrukzio organoa” aipatzen delarik, ulertzen da zerbitzu hori aipatzen dela.

Laguntzak emateko prozedura ebazteko eskumena Barne Zuzendaritza Nagusiari dagokio.

6.–Eskaeren aurkezpena, eskatzen diren agiriak, eta betebeharrak betetzeari buruzko ziurtagiriak.

6.1. Epea.

Eskaerak aurkezteko epea 20 egun naturalekoa izanen da, deialdi hau Nafarroako Aldizkari Ofizialean argitaratu eta biharamunetik hasita.

6.2. Aurkezteko modua.

Eskaerak telematika bidez aurkeztuko dira nahitaez, Nafarroako Foru Komunitateko Administrazioaren Erregistro Orokor Elektronikoaren bitartez, zuzenean helbide honetan eskura baitago: http://www.navarra.es/home_eu/Servicios/ficha/4537/Registro-General-Electronico1. Edo, bestela, Nafarroako Gobernuaren Atariko Tramiteen Katalogoan deialdi honen fitxan dagoen estekatik abiatuta.

Betiere, Barne Zuzendaritza Nagusiko Babes Zibilerako Zerbitzura zuzenduko dira.

Interesdunen batek bertaratuta aurkezten badu eskaera, modu telematikoan aurkeztuz zuzen dezala eskatuko zaio. Ondorio horietarako, eskaeraren aurkezpen eguna zuzenketaren eguna dela ulertuko da.

6.3. Aurkeztu beharreko dokumentazioa.

Laguntza eskabideak oinarri hauetako I. eranskinean ageri den ereduaren arabera aurkeztuko dira, bertan aipatzen diren agiriak nahitaez erantsita.

Dirulaguntza eskatzeak berekin dakar deialdi hau arautzen duten oinarriak onartzea.

6.4. Zuzenketa.

Dirulaguntza eskaerak identifikazio datuak jasotzen ez baditu, hala eskatutako laguntzarenak nola entitate eskatzailearenak, nahitaezko dokumentazioa aurkezten ez bada edo Administrazio Publikoen Administrazio Prozedura Erkideari buruzko urriaren 1eko 39/2015 Legearen 66. artikuluan ezarritako baldintzetakoren bat betetzen ez bada, interesdunari errekerimendua eginen zaio, errekerimendu-jakinarazpena egin eta hamar egun balioduneko epean okerra zuzentzeko, eta adieraziko zaio hala egiten ez badu eskaerari uko egiten diola ulertuko dela, eta espedientea artxibatzeko ebazpena emanen dela.

7.–Dirulaguntzak emateko prozedura eta eskaerak baloratzeko irizpideak.

7.1. Dirulaguntzak emateko prozedura.

Dirulaguntza hauek prozedura arruntaren bidez emanen dira, norgehiagokako araubideari jarraikiz, aurkezten diren eskaerak konparatuz, guztiekin lehentasun-zerrenda bat prestatzeko asmoz, hurrengo puntuan ezarritako balorazio-irizpideen arabera. Prozedura Dirulaguntzei buruzko azaroaren 9ko 11/2005 Foru Legearen 17.1 artikuluan xedatutakoaren araberakoa izanen da.

7.2. Eskaerak baloratzeko irizpideak.

Puntuazio altuenetik txikienera arteko lehentasun hurrenkera bat ezartzearen ondorioetarako, eskaerak irizpide hauen arabera baloratuko dira:

1.–Nafarroako Gobernuaren Helbideen Kudeatzailean sartutako eraikin sakabanatuen portzentajea, kontuan harturik udal bakoitzak kudeatzaile horretan sartutako eraikin guztiak. Udal bakoitzari dagokion puntuazioa emanen zaio, taula honekin bat:

2.–Nafarroako Gobernuaren Helbideen Kudeatzailean sartutako eraikin sakabanatuen kopurua. Udal bakoitzari dagokion puntuazioa emanen zaio, taula honekin bat:

Balorazio irizpide guztiak aplikatu ondoren, eskatzaile batzuk (bi edo gehiago) berdindurik badaude, lehenetsiko da Nafarroako Gobernuaren Helbideen Kudeatzailean eraikin sakabanatu gehien dituena. Hala eta guztiz ere berdinketak badirau, 2018ko urtarrilaren 1ean biztanle gehien dituen eskatzailearen alde eginen da, Estatistikako Institutu Nazionalak 2018rako argitaratutako populazio ofizialarekin bat. Aurreko irizpideak aplikatu ondoren ere berdinketak badirau, zozketa bidez ebatziko da.

8.–Dirulaguntzaren zenbatekoa.

Eskaeren ordena ezarrita, kalkulatuko da zer zenbateko dagokion onuradun bakoitzari 4. oinarrian azaldutako jarduketengatik, jarraian ematen den ordenari jarraikiz eta aurrekontu-kontsignazioaren gehieneko mugara iritsi arte.

–Identifikazio plakak egiteak ekarritako gastuen %80 lagunduko da diruz, gehienez ere 4,50 euro identifikazio plaka bakoitzeko.

–Metrobaserria diseinatzeak ekarritako gastuen %80 lagunduko da diruz, gehienez ere 9 euro deialdi hau Nafarroako Aldizkari Ofizialean argitaratzen denean kasuko udalak Nafarroako Gobernuaren Helbideen Kudeatzailean sarturik dituen eraikin sakabanatu bakoitzeko.

–Bidegurutzeetako seinaleak egiteak ekarritako gastuak proportzioan finantzatuko dira, aurreko bi kontzeptu horiengatiko esleipenaren ondoriozko kredituaren eta aipatu kontzeptuarengatik eskatutako zenbatekoaren arabera. Kontzeptu honetarako aurreikusitakoaren %80 izanen da diruz lagungarria, gehienez ere.

9.–Dirulaguntza ematea.

Eskaerak ebaluatu ondoren, eta instrukzio organoak egindako ebazpen proposamena ikusita, Barne Zuzendaritza Nagusiak ebatziko du dirulaguntzak ematea aurreko oinarrian xedatutakoaren arabera, aurrekontu-kontsignazioaren gehieneko mugara arte.

Ebazpen arrazoituan dirulaguntza hartuko dituzten eskatzaileen zerrenda jasoko da, adierazita helburua eta emandako zenbatekoa, baita ezesten diren gainerako eskaerak ere, halakorik bada, Dirulaguntzei buruzko azaroaren 9ko 11/2005 Foru Legearen 21. artikuluan xedatu bezala.

Laguntzak emateko ebazpena 3 hilabeteko epean eman eta jakinaraziko da gehienez ere, eskaerak aurkezteko epea bukatzen denetik hasita. Epe hori bukatuta, eskaera ezetsi dela ulertzen ahalko dute interesdunek. Hala ere, Administrazioa beharturik dago ebazpena ematera.

Ebazpena Nafarroako Aldizkari Ofizialean eta Nafarroako Gobernuaren web-orrian argitaratuko da, www.nafarroa.eus helbideko zerbitzuen katalogoan dagokion fitxan.

Berariazko edo presuntziozko ebazpenaren aurka, administrazioarekiko auzi-errekurtsoa jartzen ahalko dute interesdun diren administrazio publikoek; horrek ez du galarazten Nafarroako Gobernuan aldez aurreko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epeetan.

10.–Epeak, justifikatzeko modua eta ordainketa.

10.1. Oro har, laguntzak aldi bakar batean ordainduko dira. Jarraian aipatzen diren agiriak igorri behar zaizkio Barne Zuzendaritza Nagusiko Babes Zibilerako Zerbitzuari, 2019ko azaroaren 4ra bitartean, hori barne. Telematika bidez eginen da hori, nahitaez, Nafarroako Foru Komunitateko Administrazioaren Erregistro Orokor Elektronikoaren bitartez.

1.–Egindako jarduketen memoria, non zehaztuko baitira deialdi honen kargura egindako jarduerak.

2.–Fakturak eta horiek ordaindu izanaren ziurtagiriak.

3.–Diruz lagundutako jarduerak finantzatzeko lortutako beste dirulaguntza, laguntza, diru-sarrera edo baliabideei buruzko erantzukizunpeko adierazpena, II. eranskinaren arabera.

10.2. Diruz lagundutako gastuaren zenbatekoa baino txikiagoa baldin bada diruz lagundutako gastutik egin eta justifikatzen dena, laguntzaren zenbatekoa benetan egindako gastura egokituko da. Laguntzaren zenbatekoa ez da inoiz izanen egindako jardueraren kostua baino handiagoa.

11.–Onuradunek bete beharrekoak.

Dirulaguntzen onuradun gertatzen diren udalek betebehar hauek izanen dituzte:

a) Dirulaguntzei buruzko azaroaren 9ko 11/2005 Foru Legearen 9. artikuluan ezarritako betebehar orokorrak betetzea.

b) Dirulaguntza ematea eragin duen xederako bakarrik erabiltzea laguntza.

c) Babes Zibilerako Zerbitzuaren aurrean justifikatzea betebehar eta baldintzak bete direla.

d) Diruz lagundutako jarduera bera finantzatzen duten beste laguntza, diru-sarrera edo baliabide batzuk lortu izanaren berri ematea Barne Zuzendaritza Nagusiko Babes Zibilerako Zerbitzuari. Egoera hori jakin bezain laster emanen da haren berri, eta, betiere, jasotako dirua zertan erabili den justifikatu baino lehen.

e) Dirulaguntzak ematen dituen ebazpenaren proposamena egiten denean, Gizarte Segurantzarekiko betebeharrak eta zergen gainekoak eguneratuak izatea.

f) Babes Zibilerako Zerbitzuari ematea dirulaguntzaren xedeko jarduerari buruz behar duen informazio guztia.

g) Nafarroako Gobernuak diruz lagundutako jarduketa nola betetzen ari den egiaztatzeko lanak onartzea uneoro.

h) Dirulaguntza eman dela jakinarazi eta handik hilabeteko epean, dirulaguntzen entitate onuradunek gardentasunari buruz duten betebeharraren aitorpena aurkeztea, III. eranskineko ereduaren araberakoa, irailaren 11ko 59/2013 Foru Dekretua betetzearren, dekretu horrek arautzen baititu Nafarroako Aurrekontu Orokorren kargurako dirulaguntzen onuradunek dituzten gardentasun betebeharrak. Izan litezkeen zehapenak galarazi gabe, informazioa emateko duen betebeharra urratuz gero, ez zaio emandako dirulaguntza ordainduko, eta, zerbait aurreratu bazaio, itzuli egin beharko du.

i) Diruz lagundutako jarduerak Nafarroako Gobernuaren laguntzarekin egin direla aipatzea egiten diren edozein eratako iragarkietan edo publizitatean.

12.–Dirulaguntzaren bateragarritasuna.

Deialdi honen xedeko dirulaguntzak bateragarriak dira beste edozein dirulaguntzarekin, beste administrazio publiko batzuenak izan, beste erakunde publiko edo pribatu batzuenak edo partikularrenak, Espainiakoak nahiz nazioartekoak.

Deialdi honetako dirulaguntzen xedeko jarduerak egiteko ematen diren dirulaguntzen zenbateko osoa ezin da inola ere izan, bakarrik edo jarduera horietarako beste dirulaguntza, diru-sarrera edo baliabide propio batzuekin batuta, entitate onuradunak egin beharreko jardueraren kostua baino handiagoa.

13.–Onuradunaren betebeharrak ez betetzea eta itzulketa.

Hartutako zenbatekoa itzuli beharko da osorik, diruz lagundutako jarduketa gauzatzen ez bada, dirulaguntza emateko ezarritako baldintzak betetzen ez badira, Dirulaguntzei buruzko Foru Legearen 35. artikuluan aipatzen diren zergatikoak gertatzen badira edo deialdi honetan berariaz aipatzen diren betebeharrak betetzen ez badira.

Legez ezarritako kasuetan, gainera, bidezkoa izanen da dirulaguntza ordaindu zenetik itzuli beharraren gaineko ebazpena ematen den arte sortutako berandutze-interesak ordaintzeko eskatzea.

Laguntza emateko ebazpenean ezarritako gastua justifikatu ezean, dirulaguntza kobratzeko eskubidea galduko da.

Dirulaguntza erabiltzen baldin bada eman zen helburuetarako ez beste batzuetarako, Barne Zuzendaritza Nagusiak ebazpena emanen du dirulaguntza osorik itzuli behar dela erabakitzeko, berandutze-interesak barne.

14.–Erantzukizuna eta zehapen araubidea.

Entitate onuradunak Dirulaguntzei buruzko azaroaren 9ko 11/2005 Foru Legearen 42. artikuluan eta hurrengoetan ezarrita dagoen dirulaguntzen arloko administrazio arau-hausteentzako zehapen araubidearen mende egonen dira eta han ezarritako erantzukizunak izanen dituzte.

Dirulaguntzen arloko zehapenak erregelamendu bidez finkatzen den prozeduraren arabera ezarriko dira, edo, halakorik izan ezean, Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legean xedatutakoari jarraikiz.

15.–Errekurtsoak.

Dirulaguntzaren oinarri arautzaileen eta haien aplikazioan ematen diren egintzen kontra, interesdun diren administrazio publikoek administrazioarekiko auzi-errekurtsoa jartzen ahalko dute, Nafarroako Justizia Auzitegi Nagusiko Administrazioarekiko Auzien Salari zuzendua, argitaratu eta biharamunetik hasita bi hilabeteko epean, alde batera utzi gabe Nafarroako Gobernuan aurretiazko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean.

Administrazio publiko ez diren interesdunek gora jotzeko errekurtsoa jartzen ahalko dute, Lehendakaritzako, Berdintasuneko, Funtzio Publikoko eta Barneko Departamentuaren kontseilariari zuzendua, argitaratu eta biharamunetik hasita hilabeteko epean, Administrazio Publikoen Administrazio Prozedura Erkideari buruzko urriaren 1eko 39/2015 Legean eta Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legean ezarritakoarekin bat.

16.–Aplikatu beharreko araudia.

Oinarri arautzaile hauetan espresuki ezarrita ez dagoen orotan, Dirulaguntzei buruzko azaroaren 9ko 11/2005 Foru Legeak xedatutakoa aplikatuko da, bai eta aplikatu beharreko gainerako arauak ere.

I. ERANSKINA

Dirulaguntza eskabidea, Nafarroako udalek beren eraikin sakabanatuak lokalizatzeko eta seinaleztatzeko jarduketak egin ditzaten (PDFa).

II. ERANSKINA

Diruz lagundutako jarduerak finantzatzeko lortutako beste dirulaguntza, laguntza, sarrera edo baliabideei buruzko adierazpen eredua (PDFa).

III. ERANSKINA

Gardentasun betebeharrari buruzko adierazpena (PDFa).

IV. ERANSKINA

Eraikin sakabanatu bakoitzaren identifikazio plakaren diseinua eta gutxieneko edukia

Iragarkiaren kodea: F1911218