1. NAFARROAKO FORU KOMUNITATEA
1.7. BESTELAKOAK
249E/2019 EBAZPENA, abuztuaren 16koa, Ekonomia Zirkularraren eta Uraren Zerbitzuko zuzendariak emana, aldatzen dituena Oltza Zendeako udal-mugartean motelgailuak fabrikatzen dituen instalazio baten ingurumen baimen integratuan ezarritako funtzionamendu baldintzak. Jardueraren titularra KYB Suspensions Europe SA da.
Instalazio horrek badu ingurumen baimen integratua, Ingurumenaren eta Uraren zuzendari nagusiak azaroaren 8ko 2243/2007 Ebazpenaren bidez emana, gero Ingurumenaren eta Uraren zuzendari nagusiaren uztailaren 24ko 334E/2014 Ebazpenaren bidez eguneratu zena.
Ekonomia Zirkularraren eta Uraren Zerbitzuko zuzendariaren apirilaren 10eko 84E/2017 Ebazpenaren eta, ondoren, azaroaren 27ko 398 E2018 Ebazpenaren bidez aldatu ziren zarata immisioaren gehienezko balioak, instalazioa egokitzeko Zaratari buruzko azaroaren 17ko 37/2003 Legea garatzen duen urriaren 19ko 1367/2007 Errege Dekretuak xedaturikora, zonifikazio akustikoari, kalitate helburuei eta emisio akustikoei dagokienez.
Aldaketa horiek zarata immisioaren gehienezko balioak ezarri zituzten. Balio horiek instalazioak iragankorki bete beharrekoak ziren 2019ko ekainaren 30era arte, titularrak instalazioaren akustika hobetzeko ondoz ondoko planak egiten zituen bitartean, hain zuzen ere, zarata immisioaren gehienezko balioak betetzeko, Zaratari buruzko azaroaren 17ko 37/2003 Legea garatzen duen urriaren 19ko 1367/2007 Errege Dekretuak III. eranskinean xedaturikoak, zonifikazio akustikoari, kalitate helburuei eta emisio akustikoei dagokienez.
Era berean, titularrak 2019ko martxoaren 31 baino lehenago aurkeztu beharko luke azterketa akustikoa, egiaztatzeko akustika hobetzeko ondoz ondoko planak garatzearen ondorioz zenbateko eraginkortasuna erdietsi den, ebaluatuz zarata inmisioaren gehienezko balioen betetze-maila, hori baita epe ertain/luzean erdietsi beharreko helburua, urriaren 19ko 1367/2007 Errege Dekretuaren III. eranskinean ezarrita dagoen gisan. Halaber, beharrezkoa bada, emisio akustikoaren mailaren murrizketa gehigarri baterako teknika erabilgarri onenen balizko aplikazioaren gaineko ebaluazioa egin beharko du.
2019ko martxoaren 28an, titularrak aipaturiko azterketa akustikoa aurkeztu du, eta bertan zehazten da inplementaturiko hobekuntza akustikoek ahalbidetu dutela betetzea urriaren 19ko 1367/2007 Errege Dekretuaren III. eranskinean ezarritako zarata inmisioaren gehienezko mugak, salbu eta gaueko gehienezko balioari dagokionean, bizitegi-erabilerako gunean kokaturiko bi puntutan.
Gainera, azterketa akustikotik ondorioztatzen da ezin direla aplikatu teknika berri erabilgarri onenak, teknikoki zein ekonomikoki hobeak eta, beraz, ez da bidezkoa hobekuntza akustikoko plan berri bat prestatzea.
Horregatik, instalazioaren titularrak eskatu du alda daitezela ingurumen baimen integratuan ezarritako zarata inmisioaren gehienezko balioak, azterketa akustikoaren emaitzen eta ondorioen arabera ezar daitezen.
Ekonomia Zirkularraren eta Uraren Zerbitzuak berrikusi egin du aurkezturiko dokumentazioa, azterketa akustikoaren ondorioak onartuz eta, beraz, abenduaren 16ko 1/2016 Legegintzako errege-dekretuak onetsitako Kutsaduraren Prebentzio eta Kontrol Integratuaren Legearen testu bateginaren 7. artikuluan xedaturikoa aintzat hartuz, bidezko da aldatzea instalazio honen ingurumen baimen integratuan ezarritako zarata inmisioaren gehienezko balioak.
Zehazki, instalazioak bete beharko ditu Zaratari buruzko 37/2003 Legea garatzen duen urriaren 19ko 1367/2007 Errege Dekretuaren III. eranskinean ezarritako zarata immisioaren gehienezko balioak, zonifikazio akustikoari, kalitate helburuei eta emisio akustikoei dagokienez, salbu eta gaueko gehienezko balioa eta bizitegi-erabilerako guneko balioa, 5 dBA areagotuko baita.
Kasu honetan, Ingurumena Babesteko Esku-hartzeari buruzko martxoaren 22ko 4/2005 Foru Legea garatzen duen Erregelamenduaren 27. artikuluko d) letran aurreikusitako inguruabarrak gertatzen direla ikusi da, eta, horrenbestez, bidezko da ingurumen baimen integratuan ezarritako baldintzak ofizioz aldatzea, Ingurumena Babesteko Esku-hartzeari buruzko martxoaren 22ko 4/2005 Foru Legea garatzen duen Erregelamenduaren 28. artikuluan aurreikusitako administrazio prozedurarekin bat, aldaketa-espediente hau ez dela jendaurrean jarri behar iritzita.
Ebazpenaren proposamena instalazioaren titularrari entzunaldia emateko tramitean egon da hogeita hamar egunez, eta ez du proposamenaren aurkako alegaziorik aurkeztu.
Adierazitakoarekin bat, eta Ingurumeneko eta Lurraldearen Antolamenduko zuzendari nagusiak urriaren 4an emandako 760/2016 Ebazpenaren bidez eskuordetuak ditudan eskumenak erabiliz,
EBAZTEN DUT:
Lehendabizikoa.–Onartzea motelgailuak fabrikatzeko instalazio baten ingurumen baimen integratuan ezarritako funtzionamendu baldintzei dagokienez eskatutako aldaketa. Hortaz, instalazioak eta jarduerak berak instalazioari ingurumen baimen integratua emateko tramitatutako administrazio espedienteetan ezarritako baldintzak bete beharko dituzte, eta, horiez gainera, ebazpen honen eranskinetan adierazitako baldintzak. Instalazioa Oltza Zendeako udal-mugartean dago eta haren titularra Kyb Suspensions Europe SAU da.
Bigarrena.–Ebazpen honetan jasotzen diren baldintzak ez betetzeak berekin dakar ingurumeneko diziplina-neurriak hartzea, hain zuzen ere, Kutsaduraren Prebentzio eta Kontrol Integratuari buruzko Legearen testu bateginaren (abenduaren 16ko 1/2016 Legegintzako Errege Dekretuaren bidez onetsia) IV. tituluan jasotakoak, ezertan galarazi gabe sektoreko legerian ezarritakoa, aplikagarri izaten segituko baitu, eta, horren osagarri, Ingurumena Babesteko Esku-hartzeari buruzko martxoaren 22ko 4/2005 Foru Legearen VI. tituluan ezarritako zehapen-araubidean jasotakoak.
Hirugarrena.–Ebazpen hau Nafarroako Aldizkari Ofizialean argitaratzea.
Laugarrena.–Ebazpen honek ez du administrazio bidea amaitzen, eta interesa dutenek, administrazio publikoek izan ezik, gora jotzeko errekurtsoa paratzen ahalko dute, Landa Garapeneko eta Ingurumeneko Departamentuko kontseilariari zuzendua, hilabeteko epean. Administrazio publikoek zilegi dute administrazioarekiko auzi-errekurtsoa paratzea, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean. Horrek ez du galarazten Nafarroako Gobernuari aurretiazko errekerimendua egin ahal izatea Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean. Epeak ebazpen hau jakinarazi eta biharamunetik hasita kontatuko dira.
Bosgarrena.–Ebazpen hau KYB Suspensions Europe SAUri eta Oltza Zendeako Udalari igortzea, behar diren ondorioak izan ditzan.
Iruñean, 2019ko abuztuaren 16an.–Ekonomia Zirkularraren eta Uraren Zerbitzuko zuzendaria, César Pérez Martín.
Oharra: Ebazpen honetan aipatzen diren eranskinak interesdunen eskura egonen dira Ingurumeneko Zuzendaritza Nagusiaren bulegoetan (González Tablas kalea 9, behea, Iruña), Ekonomia Zirkularraren eta Uraren Zerbitzuan, eta Nafarroako Gobernuaren webgune honetan: http://www.navarra.es/home_es/Temas/Medio+Ambiente/Evaluacion+ambiental/Autorizaciones+ambientales/.
Iragarkiaren kodea: F1910853
