1. NAFARROAKO FORU KOMUNITATEA
1.7. BESTELAKOAK
453/2019 EBAZPENA, uztailaren 24koa, Lehendakaritzako eta Gobernu Irekiko zuzendari nagusiak emana, zeinaren bidez xedatzen baita Nafarroako Aldizkari Ofizialean argitaratzea Estatuko Administrazio Orokorraren eta Nafarroako Foru Komunitatearen arteko Lankidetza Batzordearen Erabakia, Nafarroako Memoria Historikoaren Tokiei buruzko abenduaren 26ko 29/2018 Foru Legearen gainekoa.
Aintzat hartuz Konstituzio Auzitegiari buruzko urriaren 3ko 2/1979 Lege Organikoaren 33. artikulua, urtarrilaren 7ko 1/2000 Lege Organikoak aldatu zuena,
EBAZTEN DUT:
Estatuko Administrazio Orokorraren eta Nafarroako Foru Komunitatearen arteko Lankidetza Batzordearen 2019ko uztailaren 17ko Erabakia, ebazpen honi eranskin gisa gehitua, Nafarroako Aldizkari Ofizialean argitara dadila xedatzea.
Iruñean, 2019ko uztailaren 24an.–Lehendakaritzako eta Gobernu Irekiko zuzendari nagusia, Edurne Eginoa Antxo.
ERABAKIA, ESTATUKO ADMINISTRAZIO OROKORRAREN ETA NAFARROAKO FORU KOMUNITATEAREN ARTEKO LANKIDETZA BATZORDEARENA, NAFARROAKO MEMORIA HISTORIKOAREN TOKIEI BURUZKO ABENDUAREN 26KO 29/2018 FORU LEGEAREN GAINEKOA
Estatuko Administrazio Orokorraren eta Nafarroako Foru Komunitatearen arteko Lankidetza Batzordeak erabaki hau hartu du:
1. Estatuko Administrazio Orokorraren eta Nafarroako Foru Komunitatearen arteko Lankidetza Batzordearen 2019ko martxoaren 22ko Erabakian ezarritakoa betez eratutako, lantaldeak egin dituen aldez aurreko negoziazioen ondorioz, (negoziazioak Nafarroako Memoria Historikoaren Tokiei buruzko abenduaren 26ko 29/2018 Foru Legearen 9., 10., 11., 12., 13. eta 15. artikuluen gainean eskumenak direla-eta sortutako desadostasunak aztertzeko eta konponbideak proposatzeko egin ziren), bi alderdien iritziz konponduta daude desadostasun horiek, konpromiso hauetan oinarrituta:
a) Bi aldeek adostasuna erakutsi dute puntu honetan: Foru Komunitateak begirunez erabili behar dituela dauzkan eskumenak Nafarroako memoria historikoaren tokiei dagokienez, eta errespetatu behar dituela Estatuak horietako toki batzuen gainean dauzkan eskumenak, bereziki defentsa nazionalaren eta indar armatuen alorrean, biak baitira Estatuaren eskumen esklusiboak, Espainiako Konstituzioaren 149.1.4.a artikuluaren arabera. Hori dela-eta, bi aldeak ados daude administrazioen arteko harremanetan beharrezkoa dela instituzioen arteko lankidetzaren printzipioan oinarritzea, legearen 3.b) artikuluan ezartzen den moduan, hauxe baitio: “Nafarroako Foru Komunitateko Administrazioa lankidetzan arituko da Estatuko Administrazio Orokorrarekin Nafarroako memoria historikoaren tokiak deklaratu, babestu, zaindu eta zabaltzeko”. Horretarako, administrazioen arteko hitzarmenak eginen dira, defentsa nazionalarekin eta indar armatuekin lotutako jarduerak eta eskumenak zain daitezen, eta aldi berean, autonomiaren interesak berma daitezen, interes hauek defentsaren interes orokorrarekin bateragarriak diren neurrian.
b) Hori horrela, Foru Legearen 9., 10., 11., 12., 13. eta 15. artikuluei dagokienez, bi aldeek aitortzen dute administrazioen arteko lankidetza instituzionalaren ondorioz, Foru Komunitateak jarduketa administratibo bat egiten badu, eta jarduketa horrek ukitzen baditu militarren jabetzak, lurrak, instalazioak, baseak, kasernak defentsa nazionalerako interesekoak aldarrikatutako eremuak edo instalazio militarren segurtasuneko eremuak, jarduketa horren nolakoa Defentsa Ministerioarekin adostu beharko dela.
c) Horretarako, Nafarroako Gobernuak konpromisoa hartu du administrazioen arteko lankidetzaren berariazko aipamena egiteko eta aitortzeko hitzarmenak edo bestelako lankidetza mekanismoak jarri behar direla AGErekin eta bereziki Defentsa Ministerioarekin, 29/2018 Foru Legearen erregelamendu-garapenean, lankidetzaren bidez bi administrazioen eskumenak bateragarri bihurtzeko.
2. Bi alderdiak ados jarri direnez, bat datoz adieraztean konpondutzat jotzen dituztela 29/2018 Foru Legearen gainean agertutako desadostasunak eta, beraz, amaitutzat ematen dute eztabaida.
3. Erabaki hau Konstituzio Auzitegiari jakinaraztea, Konstituzio Auzitegiari buruzko urriaren 3ko 2/1979 Lege Organikoaren 33.2 artikuluan aurreikusitako ondorioetarako, eta Erabaki hau Estatuko Aldizkari Ofizialean eta Nafarroako Aldizkari Ofizialean argitaratzea.
Iragarkiaren kodea: F1910508
