2. NAFARROAKO TOKI ADMINISTRAZIOA
2.2. XEDAPEN ETA IRAGARKIAK, HERRIEN ARABERA ANTOLATUAK
BARAÑAIN
Eskumenak Tokiko Gobernu Batzarrari eskuordetzea
Alkatetzak uztailaren 1ean eman 775/2019 Ebazpenaren bidez, Barañaingo Udaleko alkate udalburuak, Tokiko Gobernu Batzarraren esku utzi zituen legeak Alkatetzari ematen dizkion zenbait eskumen. Hona hemen testu osoa:
Ikusirik Alkatetza honek esleituak dituen eskumenak, Toki Araubidearen Oinarriak arautzen dituen apirilaren 2ko 7/1985 Legearen 21. artikuluak emanak, eta Toki Entitateen kontrataziorako arau bereziak, bilduak baitaude Sektore Publikoko kontratuei buruzko azaroaren 8ko 9/2017 Legearen bigarren xedapen gehigarrian, Espainiako antolamendu juridikora ekarri du Europako Parlamentuaren eta Kontseiluaren 2014ko otsailaren 26ko 2014/23/EE eta 2014/24/EE Zuzentarauak, aplikatzen ahal baitzaizkie Nafarroako Toki Entitateei; Nafarroako Toki Administrazioari buruzko uztailaren 2ko 6/1990 Foru Legearen 8.1 artikuluan xedatutakoari jarraikiz.
Kontuan hartuz ezen, Toki Entitateen Antolamenduaren eta Funtzionamenduaren gaineko Erregelamendua onesten duen azaroaren 28ko 2568/1986 Errege Dekretuaren 43.1 artikuluari jarraikiz, alkate udalburuak bere eskudantziak eskuordetzen ahal dituela, baina ez guztiak: apirilaren 2ko 7/1985 Legearen 21.3 eta 71. artikuluetan aipatutakoak ez.
Kontuan izanik erregelamendu horren 43.3 artikuluko xedapenen arabera, alkateak, eskuordetzaren bidez, Gobernu Batzarraren eskuetan uzten ahal dituela eskumenak, eta organo kolegiatu horrek eskuordetutako gaietan hartzen dituen erabakiek, alkateak eskuordetu ez dituen gaietan hartutako ebazpenen balioa izango dutela.
Antolamenduaren eta Funtzionamenduaren gaineko Erregelamenduaren 44.1 artikuluak eskatzen du eskuordetza guztiak alkatearen dekretu baten bidez egingo direla, eta horrek zehaztuko dituela eskuordetzaren esparrua, eskuordetzen diren ahalmenak eta jarduteko baldintza bereziak.
Interes publikoaren alde eta udalkideek Udalaren gobernuan parte hartzea bultzatzeko, komenigarria da eskumen batzuk Tokiko Gobernu Batzarraren eskuetan uztea.
Horren ondorioz eta ikusirik, besteak beste, Sektore Publikoaren Araubide Juridikoari buruzko urriaren 1eko 40/2015 Legearen 8. artikulua, Toki Araubidearen Oinarriak arautzen dituen apirilaren 2ko 7/1985 Legearen 21. artikulua, Sektore Publikoko kontratuei buruzko urriaren 30eko 30/2007 Legearen bigarren xedapen gehigarria eta Toki Entitateen Antolaketaren, Funtzionamenduaren eta Araubide Juridikoaren gaineko Erregelamendua onesten duen azaroaren 28ko 2568/1986 Errege Dekretuaren 43, 44, 52 eta 114. artikuluak, eta egungo legediak Alkatetza honi ematen dizkion eskumenak erabiliz,
EBAZTEN DUT:
Lehena.–Barañaingo Udalaren Tokiko Gobernu Batzarren esku uztea honako eskudantzia hauek:
1. Kudeaketa ekonomikoa garatzea, onesten den aurrekontuari jarraikiz; gastuak xedatzea bere eskumenen esparruan, eta ordainketak agindu eta kontuak ematea; hori dena Toki Ogasunak arautzen dituen Legean xedatuarekin bat.
2. Lan publikoaren eskaintza onestea, Osoko Bilkurak onetsitako aurrekontuari eta plantilla organikoari jarraikiz, langileak hautatzeko probetarako eta lanpostuak betetzeko deialdietarako oinarriak onestea eta finko eta aldizkakoak ez diren ordainsari osagarriak partitzea.
3. Udaltzaingoan buru egitea.
4. Planeamendu orokorra garatzeko tresnen onespenak, espresuki Osoko Bilkuraren eskuetan utzi ez direnean, baita hirigintza kudeatzeko tresnena eta urbanizazio proiektuena ere.
5. Kontratazio organoa izateagatik dituen eskumenak, hala nola, obra kontratuetarako, hornidurarako, zerbitzuetarako, zerbitzu publikoen kudeaketarako, administrazio kontratu berezietarako, eta kontratu pribatuetarako, haien zenbatekoa aurrekontuko baliabide arrunten %10 baino gehiago ez bada, ezta 6 milioi euro baino gehiagokoak direnean ere, horien artean urte anitzetakoak ere sartzen baitira, lau urte baino gehiago iraun behar ez badute, baldin eta urteko guztien zenbateko metatuak aipatu portzentajea gainditzen ez badu, lehen ekitaldiko aurrekontuko baliabide arrunten gainean, ezta aipatu zenbatekoa ere.
6. Obren proiektuak eta zerbitzuak onestea, kontratazioa egin edo emateko eskumena duenean eta aurrekontuan sartuta daudenean.
7. Udalaren ondasunen gaineko emakidak adjudikatzea eta ondasun higiezinak eta eskubideak erostea, horiek ondareari buruzko legediaren mendean badaude eta haien balioa ez bada aurrekontuko baliabide arrunten %10 baino handiagoa edota hiru milioi euroko balioa gainditzen ez bada.
Bigarrena.–Xedatzea Alkatetzak erabiliko dituela, eskuordetu ezinak direlako, TAOLen 21.3 artikuluan aipatutakoak eta, kudeaketaren eraginkortasuna dela-eta, lege horren 21.1.b), d), n), q) eta r) artikuluan ezarritako eskumena.
Hirugarrena.–Aurreko lerroaldeko eskuordetzak bere baitan biltzen ditu bai zuzendaritza eta kudeaketako ahalmenak, bai eta hirugarrenengan eragina duten egintza administratiboen bitartez ebazteko ahalmena ere.
Laugarrena.–Toki Entitateen Antolaketaren eta Funtzionamenduaren gaineko Erregelamenduaren 115.c) artikuluaren arabera, Tokiko Gobernu Batzarraren egintzen aurka aurkeztutako errekurtsoak ebazteko ahalmena ere kide anitzeko organo horren esku uzten da.
Bosgarrena.–Antolaketaren eta Funtzionamenduaren gaineko Erregelamenduaren 114.1 artikuluaren arabera, emandako eskuordetzak indarra hartzeko, Tokiko Gobernu Batzarrak onartu egin beharko du. Eskuordetza hori onartutzat joko da, baldin eta hiru egun balioduneko epean, ebazpen hau jakinarazten denetik, eskuordetza ematen dion organoari Gobernu Batzarrak ez badio berariaz adierazten ezen ez duela eskuordetza onartzen. Orobat, espresuki onartzen ahalko da, ebazpen hau Gobernu Batzordeari jakinarazteko bilkuran berean.
Seigarrena.–Antolaketaren eta Funtzionamenduaren gaineko Erregelamenduaren 44.2 artikuluari jarraikiz, eskuordetza hau Nafarroako Aldizkari Ofizialean argitaratuko da, eta horren berri emango zaie Tokiko Gobernu Batzarrari eta Osoko Bilkurari, organo kolegiatu horiek duten hurrengo bilkuran eman ere.
Zazpigarrena.–Ebazpen honetan xedatu ez den orotan, honako arau hauetan eskuordetza hauei buruz esandakoak aginduko du zer egin: Toki Araubidearen Oinarriak arautzen dituen apirilaren 2ko 7/1985 Legea, Toki Entitateen Antolaketaren, Funtzionamenduaren eta Araubide Juridikoaren gaineko Erregelamendua eta Sektore Publikoaren Araubide Juridikoari buruzko urriaren 1eko 40/2015 Legea.
Ebazpen honen aurka honako hauek aurkez daitezke:
1. Aukerako berraztertzeko errekurtsoa, ebazpen hau eman duen udal organo berari zuzendua, hilabeteko epean, ebazpenaren jakinarazpenaren biharamunetik zenbatzen hasita, Administrazio Publikoen Administrazio Prozedura Erkideari buruzko urriaren 1eko 39/2015 Foru Legearen 123. eta 124. artikuluetan xedatuari jarraikiz.
2. Administrazioarekiko auzi-errekurtsoa, zuzenean, arlo bereko epaitegiari edo salari zuzendua, bi hilabeteko epean, ebazpen hau jakinarazi eta biharamunetik zenbatzen hasita, Administrazioarekiko Auzien Jurisdikzioa arautzen duen uztailaren 13ko 29/1998 Legeak 8.1 artikuluan agintzen duenari jarraikiz.
3. Eta, hautara, gora jotzeko errekurtsoa, zuzenean Nafarroako Administrazio Auzitegiari zuzendua, hilabeteko epean, ebazpen hau jakinarazi eta biharamunetik zenbatzen hasita.
Argitara ematen da behar diren ondorioak izan ditzan.
Barañainen, 2019ko abuztuaren 2an.–Alkate udalburua, María Lecumberri Bonilla.
Iragarkiaren kodea: L1910587
