1. NAFARROAKO FORU KOMUNITATEA
1.7. BESTELAKOAK
220E/2019 EBAZPENA, uztailaren 4koa, Ekonomia Zirkularraren eta Uraren Zerbitzuko zuzendariak emana, Tuterako udal-mugartean dagoen hegaztien hiltegi industrialaren ingurumen baimen integratuan ezarritako funtzionamendu baldintzetan eskatutako aldaketak ukatzen dituena. Instalazioaren titularra Uve SA da.
Instalazio horrek badu ingurumen baimen integratua, Ingurumen eta Lurraldearen Antolamenduko kontseilariak ekainaren 15eko 324/2007 Foru Aginduaren bidez emana, gero eguneratu zena Ingurumenaren eta Uraren zuzendari nagusiaren uztailaren 2ko 276E/2014 Ebazpenaren bidez.
2018ko urriaren 1ean, titularrak ingurumen baimen integratuko baldintzak aldatzeko eskatu du, zehatz esateko, emari espezifikoaren balioaren muga handitzea (zenbat esan gabe), eta ur eta gas kontsumoaren balioak handitzea.
Ekonomia Zirkularraren eta Uraren Zerbitzuak aurkeztu den eskaera aztertu du, eta uste du gaur egun indarrean dagoen isuriaren emari espezifikoaren balioa egoki zaiela sektorearen BREFean zehazten diren balioei; halaber, uste du ur eta gas kontsumorako ezarritako balioak ezin direla aldatu, ingurumen baimen integratuan ezartzen diren erreferentziazko balioak baitira, instalazioan etorkizunean aldaketa funtsezkorik egin nahi izanez gero. Hala ere, zilegi da baimenean sartzea instalazioaren gaur egungo funtzionamendu-mailari dagozkion ur eta gas kontsumoak.
Aldi berean, titularrak jakinarazi du teknika erabilgarri onenak ezartzeari buruzko azterketa bat egitea eskatu duela, instalazioko ur-erabilera optimizatzeko, murriztu ahal izateko bai ur-kontsumoa, baita isuriaren emari espezifikoa ere. Hori horrela, ez da bidezkoa isuriaren emari espezifikoaren balioa aldatzea une honetan, baizik eta aipatu azterketaren emaitzak eta instalazioaren titularrak uraren erabilera optimizatzeko egiten dituen proposamenak ezagutu eta gero berraztertzea.
Horregatik guztiagatik, ezin da onartu ingurumen baimen integratuan ezarritako funtzionamendu baldintzak aldatzeko eskaera.
Ebazpenaren proposamena instalazioaren titularrari entzunaldia emateko tramitean egon da hogeita hamar egunez, eta ez du proposamenaren aurkako alegaziorik aurkeztu.
Adierazitakoarekin bat, eta Ingurumeneko eta Lurraldearen Antolamenduko zuzendari nagusiak urriaren 4an emandako 760/2016 Ebazpenaren bidez eskuordetuak ditudan eskumenak erabiliz,
EBATZI DUT:
Lehenbizikoa.–Tuterako udal-mugartean dagoen hegaztien hiltegi industrialaren ingurumen baimen integratuan ezarritako funtzionamendu baldintzetan eskatutako aldaketak ukatzea. Instalazioaren titularra Uve SA da.
Bigarrena.–Ingurumen baimen integratuaren I. eranskina aldatzea, ebazpen honen I. eranskinean ezartzen dena kontuan hartuz.
Hirugarrena.–Ebazpen hau Nafarroako Aldizkari Ofizialean argitaratzea.
Laugarrena.–Ebazpen honek ez du administrazio bidea amaitzen, eta interesa dutenek, administrazio publikoek izan ezik, gora jotzeko errekurtsoa jar dezakete, Landa Garapeneko, Ingurumeneko eta Toki Administrazioko kontseilariari zuzendua, hilabeteko epean. Administrazio publikoek zilegi dute administrazioarekiko auzi-errekurtsoa jartzea, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean. Horrek ez du galarazten Nafarroako Gobernuari aurretiazko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean. Epeak ebazpen hau jakinarazi eta biharamunetik aurrera kontatuko dira.
Bosgarrena.–Ebazpen hau Uve SAra eta Tuterako Udalera igortzea, behar diren ondorioak izan ditzan.
Iruñean, 2019ko uztailaren 4an.–Ekonomia Zirkularraren eta Uraren Zerbitzuko zuzendaria, César Pérez Martín.
Oharra: ebazpen honetan aipatzen diren eranskinak interesdunen eskura egonen dira Ingurumeneko eta Lurraldearen Antolamenduko Zuzendaritza Nagusiaren bulegoetan (González Tablas kalea 9, behea, Iruña), Ekonomia Zirkularraren eta Uraren Zerbitzuan, eta Nafarroako Gobernuaren webgune honetan: http://www.navarra.es/home_es/Temas/Medio+Ambiente/Evaluacion+ambiental/Autorizaciones+ambientales/.
Iragarkiaren kodea: F1909425
