167. ALDIZKARIA - 2019ko abuztuaren 26a

1. NAFARROAKO FORU KOMUNITATEA

1.3. LURRALDEAREN ANTOLAMENDUA ETA HIRIGINTZA

ERABAKIA, Nafarroako Gobernuak 2019ko maiatzaren 22an hartua, behin betiko onesten duena “Cordovillako (Galar) suhiltzaile parkearen eta heliportuaren Udalez gaindiko Proiektu Sektoriala” aldatzeko espedientea. Aldaketa heliportuaren kokapenari buruzkoa da, eta Lehendakaritzako, Funtzio Publikoko, Barneko eta Justiziako Departamentuak sustatu du.

Nafarroako Gobernuaren 2018ko urtarrilaren 24ko Erabakiaren bidez (2018ko 34. Nafarroako Aldizkari Ofiziala, otsailaren 16koa) hasiera eman zitzaion “Cordovillako (Galar) suhiltzaile parkearen eta heliportuaren Udalez gaindiko Proiektu Sektoriala” aldatzeko espedientearen tramitazioari. Aldaketa heliportuaren kokapenari eta diseinuari buruzkoa zen. Espedientea jendaurrean jarri zen berrogeita bost egunez, eta, aldi berean, entzunaldia eman zitzaien ukitutako udalei, Lurraldearen Antolamenduari eta Hirigintzari buruzko Foru Legearen testu bateginean eta Ingurumen Ebaluazioari buruzko abenduaren 9ko 21/2013 Legean ezarritako ondorioetarako.

Aldaketaren xedea da heliportuaren funtzionaltasuna hobetzea, haren kokapena eta diseinua aldatuz, jarduteko denborak hobetzea lortuko baita horrela.

Tramitera aurkeztutako dokumentuan, aldaketa egiteko beharra justifikatzen da arrazoi hauekin:

–Egungo harri-lubetak ez du bermatzen heliportuaren zelaigunea segurua denik egitura aldetik.

–Nafarroako Gobernuak heliportuaren instalazioen antolaketa aldatu nahi du.

–Garitongo ordokiaren antolamendu aurreikuspena.

Premia horien ondorioz, akordio bat sinatu zuten departamentu sustatzaileak (Barne Zuzendaritza Nagusiak) eta Nasuvinsak, Udalez gaindiko Proiektu Sektoriala aldatzeko, zenbait helbururekin, baina betiere suhiltzaileen parkearekin fisikoki lotuta jarraituz, horrek ezinbestean hala izan behar baitu. Hona hemen helburu horiek:

–Esparrua berregokitzea, helikopteroentzako plataformaren oinarria gune egonkorrago batera mugitu ahal izateko, ezpondatik urrunago.

–Barne antolaketa aldatzea espazioak hobeki aprobetxatzeko eta heliportuak behar dituen laguntza-eraikuntzak handitu ahal izateko.

–Berrantolatzea, koherentzia izan dezan ordokiaren inguruari dagokionez egin nahi den hirigintza berrantolamenduarekin.

Dokumentazioaren arabera, gainera, bermatu nahi da heliportua modu independentean egin ahal izanen dela heliportuaren mugakide den Zaragozako etorbideko lurzatia eta ordokiaren gainerako zatia antolatzen dituen eta izapidetzen ari den Udalez gaindiko Plan Sektorialarekiko.

Testuinguru horretan, 3 kokapen posible aztertzen dira Garitongo ordokiaren barnean:

–Gaur egungo heliportuaren gainean.

–Suhiltzaileen parkeko instalazioen atzean.

–Ezpondatik urrun, egungo heliportutik kanpo.

Aukeratutako esparrua Garitongo ordokian kokatzen da, Zaragozako etorbidearekiko 23 bat metrotik gora dagoen zelaigune batean, zeinetan suhiltzaileen parkea kokatzen baita. Esparru horrek 31.706 m² ditu guztira eta bi udal-mugarteri dagokie: Galar Zendeari (30.012 m²), zehazki Cordovillako Kontzejuari, eta Iruñeari (1.694 m²).

Deskribatutako esparruan “heliportua kokatzeko balizko eremu bat” mugatzen da, aireko zortasunak zehaztu gabe, eta zortasun aeronautikorako eremu bat ezartzen da, heliportuaren plataformaren (lurreratzeko eta aireratzeko azalera) kokapenaren arabera alda daitekeena, “heliportua kokatzeko balizko eremuaren” barruan. Eremu horretan, halaber, 3 helikoptero aparkatzeko tokia aurreikusten da, 25 bat ibilgailurentzako aparkalekuak, hangarrak, garajea, biltokiak, langileentzako instalazioak, eta beharrezko beste gune eta eraikuntza batzuk. Heliportuarekin lotutako eraikuntzak gutxi gora-behera irudikatu dira eta gehieneko lerrokadura bat ezarri da, eraikuntza horiek ezpondatik urruntzera behartzen dituena.

Proposatutako esparrua izapidetzen ari den Udalez gaindiko Plan Sektorialaren antolamenduak baldintzatzen du, heliportuaren mugakide den Zaragozako etorbideko lurzatia eta ordokiaren gainerako zatia antolatzen baititu (Nafarroako Unibertsitate Publikoko teknologia-parkearen, Administrazio Zerbitzuen Arloaren eta Superser-en instalazio zaharrak berreskuratzearen UPSa). Bereziki, aipatutako UPSean aurreikusitako bide-sistemak baldintzatzen du esparrua, gutxienez 10 metroko beste ezponda bertikal bat sortuko lukeelako esparruaren ipar-mendebaldeko mugan.

I.–Alegazioak.

Espedientea jendaurrean egon den bitartean ez du inork aurkako alegazio idazkirik aurkeztu.

II.–Nafarroako Gobernuak 2018ko urtarrilaren 24an hartutako Erabakia.

Espediente honi hasiera eman zion Nafarroako Gobernuaren 2018ko urtarrilaren 24ko Erabakian adierazitakoa aztertzen hasi aurretik, hau aipatu behar dugu:

–Suhiltzaileen parkea eta, bereziki, heliportua Foru Komunitatearen intereseko sistema orokor bat da, larrialdien kudeaketa operatiborako beharrezko larrialdi-sarearen parte den azpiegitura bat. Horregatik dago UPS baten baitan azpiegitura hori ezartzea.

Testuinguru horretan, heliportuaren funtzionaltasunak lehentasuna izan behar du proposatzen den hirigintza antolamenduan. Hirigintza antolamendu hori irizpide tekniko eta objektiboen bidez justifikatu behar da, eta ezin dio mugarik jarri heliportuaren funtzionamenduari, ezta larrialdietako arreta sistemari eta etorkizunean instalazioak handitzeko aukerari ere.

–Garitongo ordokiak, duen altitudea eta kokapenagatik, area metropolitanoaren barruan, behatoki edo parke funtzioa beteko luke Iruñean. LAP 3 planak ekipamendu gisa erabiltzea aurreikusten du, eta indargabetutako Eskualdeko Hirigintza Arauek aurreko guztia indartzen zuten, aukera eremu gisa jasotzen baitzuten, handiegiak ez diren zuzkidurak jartzeko egokia, kontuan hartuta leku altua eta agerikoa dela.

Jarraian, aurreko premisak oinarritzat hartuta, Nafarroako Gobernuaren 2018ko urtarrilaren 24ko erabakiari erantzuteko aurkeztutako dokumentazioaren azterketa bat eginen da. Agiri horiek 2019ko maiatzaren 2an aurkeztu zituen aldaketa idatzi duen enpresak.

II.1. Kokapen alternatiboa.

Aipatutako erabakian aipatzen da alternatiben azterketa berriz egin behar dela erabakian adierazitakoaren eta espedientearen izapidetzean zehar egindako txostenetan ezarritakoaren arabera, eta, hala badagokio, heliportuaren behin-betiko kokapena aldatu egin beharko dela. Testuinguru horretan, hau ezartzen du:

–Heliportuarentzat alternatiba onena aukeratzeagatik ezin dira alde batera utzi aldaketaren hasierako helburuak; beraz, horiei erantzunez, beste kokapen bat aztertu behar da, heliportuaren plataforma ordokiaren ertzetik urrunduko duena gune egonkorrago batera (gaur egungo harri-lubetetatik eta ezpondetatik urrun, zeinek heliportuaren plataforma erabiltzea eragotzi baitute), eta bermatuko duena jarraitutasuna eta funtzionaltasuna izatea suhiltzaile parkearekin (esparrukoak ez diren tarteko espazioak utzi behar izan gabe, 3. alternatiban bezala), eta ordokiaren amaierako antolamendua eta paisaia-inpaktua ahalik eta txikiena izaten lagunduko duena. Gainera, ahal den neurrian, balioetsitako alderdi guztiak objektibatu (kuantifikatu) behar dira.

–Aldaketa koherentea izan behar da bere edukiarekin, eta heliportuaren behar guztiei erantzuna eman behar die, NUPen teknologia-parkearen UPSarekiko modu independentean egin ahal izateko moduan, eta bere helburu propioak kontuan hartuta. Gainera, aintzat hartu behar ditu NUPen teknologia-parkearen UPSa onetsiz gero aukeratutako kokalekuan sortuko liratekeen eragozpenak; zehazki, ezpondak eraikitzeagatik sortutakoak.

Horri guztiari erantzuna emateko, heliportuaren alternatibei buruzko txosten bat aurkeztu da, balizko lau kokapen alternatiborekin.

Txosten horretan, balorazio onena duen alternatiba 1b da, balorazio-matrize baten arabera.

Aurrez azaldutako gogoetak eta espedienteari hasiera emateko Nafarroako Gobernuaren erabakian jasotakoak aintzat hartuta, adierazleei dagokienez aipatu beharra dago:

–Egungo kokapenarekin kointziditzea. Aurkeztutako balorazioan adierazle nagusitzat hartzen da, kokapen egokiena dela irizten zaiolako; izan ere, behar bezala gainditu zituen administrazio izapide guztiak, erakunde eskudunek behin-betiko onetsi zuten arte. Adierazle hori, justifikatzen den bezala, ezin da hirigintzako justifikaziotzat hartu. Horrez gain, esan beharra dago altuera jakin bateko ezponda bertikal ezegonkor batetik metro gutxitara dagoen edozein eraikuntzak, obrak eta mantentze-lanak garestitzea izan ezik, frogatuta dago arazo funtzionalak eta egonkortasun arazoak ere eragiten dituela, besteak beste. Horregatik proposatzen da aldaketa hau, eta, ondorioz, heliportua ez da guztiz gauzatu oraindik.

–Aurkeztutako balorazioan nagusitzen den beste adierazle bat da lehendik dauden hiri garapen eta etorkizunekoetan ukipenik ez izatea. Harrigarria da adierazle honen arabera balorazio onena duen alternatiba lehendik dauden hiri garapenetan ukipen handiena duena izatea (NUPeko UPSa). Lehendik dauden hiri garapenei eta etorkizunekoei eragindako ukipenak bereiz balioetsi beharko lirateke, eta ez lirateke aintzat hartu beharko adierazle berean. Hasierako onespenik ere ez duten etorkizuneko hiri garapenen gaineko ukipenak balioestea zalantzan jarri gabe ere, azpiegituraren izaera dela eta, hura birkokatzea garrantzitsuagoa izan behar da Foru Komunitatearen interesekoa ez den etorkizuneko edozein garapen baino. Lehendik dauden hiri garapenei eragindako ukipenei buruzko adierazle bat soilik hartuz gero aintzat, 3. eta 4. alternatibek izanen lukete puntuaziorik altuena.

–Ez da ulertzen lurzorua okupatzearen adierazlea. Azpiegitura honek behar adina lurzoru okupatzen ahalko du, baita etorkizunean handituz gero beharko duena ere.

Aurrekoaren arabera, eta ez baditugu aintzat hartzen azpiegitura honen funtzionamenduan eraginik ez duten adierazleak, balorazio onena 4. alternatibak du.

Halaber, 1. alternatibari dagokionez, aipatzekoa da mugatuagoa edo baldintzatuagoa dagoela, arrazoi hauek direla eta:

–Egonkortasun arazoak. Eratzen duten bi ezpondek (iparraldeko eta mendebaldeko mugak) egonkortasun arazoak eta bide-komunikazioekin zerikusia duten arazoak konponduko dituzten neurriak hartzera behartzen gaituzte. Arazo horiek konpontzeko eragin handiko konponbide artifizialak beharko genituzke, egiteko eta mantentzeko garestiak direnak.

–Irisgarritasuna. Ez du aukerarik ematen parkearen eta heliportuaren arteko irisgarritasuna hobetzeko. Ez du aukerarik ematen igogailurik jartzeko, eta, eraikinarekin, ezpondaren egungo egonkortasun eta integrazio arazoak konpontzeko. Ez du aukerarik ematen malda gutxiagoko komunikazio-bide bat egiteko.

–Alternatiba hau, izkinan dagoenez, ordokiaren etorkizuneko antolamendu baten eragina gehien jasango lukeena da.

1. alternatibaren esparrua bat dator izapidetzen ari den UPSak (heliportuaren mugakide den Zaragozako etorbideko lurzatia eta ordokiaren gainerako zatia antolatzen duenak) proposatutako antolamenduarekin eta, hura onetsiko ez balitz, esparru hori ez zen koherentea izanen, ezpondatik hurbilegi dagoelako, txikia delako eta ia ez duelako jarraitutasunik suhiltzaileen parkearekin.

Lurraldearen ikuspegitik, 1. alternatibak inpaktu handiagoa izanen luke paisaian. Bestalde, 4. alternatibak mugak jartzen dizkio ordokiaren balizko presio urbanistikoari eta, ondorioz, aukera ematen du Gariton ordokia antolatzeko, eremu horrek area metropolitanoan dituen balioak edo bokazioa sustatzea errazteko moduan.

Horregatik guztiagatik, lurralde antolamenduaren eta azpiegituraren funtzionaltasunaren ikuspegitik, egokiena 4. alternatiba dela deritzogu.

II.2. Esparrua.

Aldaketaren esparruaren definizio grafiko argia aurkeztea eskatzen zuen erabakiak.

Aurkeztutako dokumentuak adierazten du atzetik sartzeko bidea ez dela sartzen UPSaren esparruan eta ez dela aldatuko jarduketaren bidez. Hala eta guztiz ere, bide hori ere UPSak arautu behar du.

Dokumentu horrek, halaber, aipatzen du indarrean dagoen UPSaren gabezia bat zuzentzen duela eta esparruaren mugaketa argi bat egiten du; ez aldatutako eremuarena soilik, UPS osoarena baizik. Mugatutako esparrua O-1 planoan ikusten ahal da. Udalez gaindiko Plan Sektorialaren esparruaren mugaketa aldaketaren amaierako dokumentazioan sartu beharko da, erabaki honen II.5 atalean ezarritakoari jarraikiz, eta lursailaren kotak zehazteko prozesua bukatu.

Mugatutako esparruan ez da sartu aldaketaren dokumentuak nekazaritzako lurzatien sarbidea ordezkatzeko proposatzen duen bide berria. Aurkeztutako agiriek argitzen duten bezala, bidea egitearen ardura heliportuaren plataformaren sustatzaileari dagokio. Aldaketaren esparruak barne hartu behar du bide hori, baita kanpoko azpiegituren eragina jasanen duten lurrak ere, desjabetu beharrekoak (ikus erabaki honen II.5 atala).

UPSaren esparrutik kanpo gelditzen diren eremuetan Galarko Udal Plana aplikatu behar izateari buruz erabaki honetan adierazitakoari dagokionez, aurkeztutako dokumentuetan adierazi bezala, aldaketaren amaierako dokumentazioan sartu beharko da.

II.3. Lurraldearen antolamendurako tresnekiko egokitasuna.

Aurkeztutako dokumentazioan adierazten da aldaketaren garrantzia ikusita ez zela beharrezkotzat jo lurraldearen antolamendurako tresnekiko egokia den justifikatzea. Horri dagokionez aipatzekoa da lurraldean eta lurzoruaren erabileran eragina duten proiektu guztiek justifikatu behar dutela hori, proiektuaren helburua edo garrantzia zein diren ere (HLAFATBaren 29.3 artikulua). Beraz, amaierako dokumentazioan sartu beharko da.

Unibertsitate Publikoa ezartzeko UPSari dagokionez, erabakiak esaten duen bezala, aurkeztutako dokumentuak adierazten du aldaketaren erreferentzia sartuko dela, eta ukitutako azalera zehaztu, baita esparruari eta azalerari buruzko determinazioak ere.

Hori guztia aldaketaren amaierako dokumentazioan sartu beharko da.

II.4. Hirigintzako udal planeamenduari buruzko aipamena.

Aurkeztutako dokumentuan adierazten da erabakian ezarritakoaren arabera zuzenduko dela dokumentazioa. Aldaketaren amaierako dokumentazioan sartu beharko da.

II.5. Kanpoko ukipenak.

Erabakiak adierazten du argitu egin behar dela zein diren dokumentazioaren arabera desjabetzeen bidez gauzatuko diren kanpoko azpiegiturak.

Aurkeztutako dokumentazioan ez da zehazten zein diren, baina adierazten da agian beste batzuk ere beharko direla, nekazaritza-bidea lehengoratzeaz gain.

Plangintza egiteko unean zehaztu behar dira beharrezko azpiegiturak, haiek lortzeko eta gauzatzeko beharrezkoak diren determinazioak planifikatu eta ezarri ahal izateko, eta tresnaren ukipen-esparruan sartzeko (Lurraldearen Antolamenduari eta Hirigintzari buruzko Foru Legearen testu bateginaren 44.2.a) eta 44.5 artikuluak); alderdi horiek ezinen dira zehaztu gabe utzi, sustatzaileak aurkeztutako dokumentazioan proposatzen duen bezala.

Kontu hori aldaketaren amaierako dokumentazioan sartu beharko da.

II.6. Proposatutako araudia.

Aurkeztutako dokumentuaren arabera, egituratzailetzat joko dira erabakian adierazitako determinazioak: esparrua, ezponden gehieneko maldak eta euskarrien mugak.

Partzelaren ordenamendurako beste hirigintza-determinazio batzuk definitzea eskatzen duenez erabakiak, hala nola lerrokadurak edo gehieneko altuerak, dokumentu horrek eraikitzeko gehieneko lerrokadurak ezartzen ditu. Ondorioz, ezpondatik urruntzera behartzen ditu eraikinak (heliportuaren plataforma ez). Ez du altuera mugatzen, “egungo nahiz etorkizuneko funtzionaltasuna ez baldintzatzeko”. Dena dela, araudian aipatu beharra dago, ordokiaren berezitasuna eta lurralde-bokazioa kontuan hartuta, obrak egiteko baimena lortzeko nahitaezkoa izanen dela txostena eskatzea paisaiaren arloan eskuduna den Nafarroako Gobernuko unitateari.

Bestalde, adierazten da, erabakiak jasotakoaren arabera, heliportuko zortasunen muga aldatu eta baldintza orokorrago bat ezarriko dela; horrenbestez, ez da jasoko etorkizuneko hiri garapenen gaineko ukipenetarako debekurik, eta lehendik dauden hiri lurzatien gaineko ukipenak ahal den neurrian gutxitzea eskatuko da.

Halaber, heliportuaren funtzionaltasunak lehentasuna badu ere, heliportua bateragarria izan behar da Gariton ordokiak Iruñeko behatoki edo parke gisa betetzen duen funtzioarekin. Horregatik, eta ordokiak bere funtzioa betetzen jarrai dezan, araudiak ezarri behar du eraikitzen diren hesiak Galarrera sartzeko bidetik 50 metrotara atzera eman beharko direla.

Araudiak, era berean, ezarri behar du amaierako ordenamenduak suhiltzaileen eta heliportuaren plataformaren arteko konexioa aurreikusi beharko lukeela, oinezkoena nahiz ibilgailuena. Ibilgailu bidezko konexioak gehienez ere %12ko maldak izan beharko lituzke (eraikinetako arrapalei buruzko Eraikingintzaren Kode Teknikoaren erregulazioa), eta oinezkoak %6koak (irisgarritasunari buruzko EKTren erregulazioa), nahiz eta noizean behin EKTk malda handiagoak onartzen dituen.

Kontu horiek guztiak aldaketaren amaierako dokumentazioan jaso beharko dira.

II.7. Programazioa.

Aurkeztutako dokumentuan programazio eguneratu bat proposatzen da. Epe batzuk aldaketaren behin betiko onespenaren araberakoak dira, eta erreferentzia hori aldaketa indarrean jartzen den egunarekin (NAOn argitaratzen den egunarekin) ordeztu behar da. Programazio hau aldaketaren amaierako dokumentazioan jaso beharko da.

II.8. Bestelako gaiak.

Erabakiak adierazten zuen aldaketaren dokumentazioak argi utzi behar zuela indarrean dagoen UPSaren eta Unibertsitate Publikoa ezartzeko UPSaren zein determinazio aldatzen, ezabatzen edo ordezten diren.

Unibertsitate Publikoa ezartzeko UPSari dagokionez, atal honetako c) puntuan adierazitakoari eusten diogu.

Suhiltzaileen parkearen eta heliportuaren indarreko UPSa aldatzeari dagokionez, aurkeztutako dokumentuan ezartzen da aldaketa hori UPSa ordezten duen dokumentu oso bezala egin dela. Hala bada, aldaketaren amaierako dokumentazioak horretarako beharrezkoak diren determinazio guztiak jaso beharko ditu, baita suhiltzaileen parkearen eta heliportuaren UPSaren berriki onetsitako aldaketan ezarritakoak ere; izan ere, suhiltzaileen parkearen premia berriei lekua egiteko determinazio xehatuak definitzen dira bertan (2018ko 174. Nafarroako Aldizkari Ofiziala, irailaren 7koa). Ez bada proposatzen dokumentu horrek indarreko UPSa ordeztea, amaierako dokumentazioak argi utzi beharko du indarreko UPSaren zein determinazio aldatzen, ezabatzen edo ordezten dituen.

Suhiltzaileen parkearen eta heliportuaren UPSaren jarduketen izaera dela eta, Nafarroako Gobernuak interes orokorrekotzat jotzea proposatzen da, uztailaren 26ko 1/2017 Legegintzako Foru Dekretuak onetsitako Lurraldearen Antolamenduari eta Hirigintzari buruzko Foru Legearen testu bateginaren 47. artikuluan ezarritako ondorioetarako.

III.–Txosten sektorialak.

Espedientearen tramitazioan zehar, ondoko erakunde edo entitate hauen txostenak jaso dira:

–Suhiltzaileen Zerbitzua (2017ko maiatzaren 15a).

–Nafarroako Unibertsitate Publikoa (2017ko apirilaren 10a).

–Abiazio Zibileko Zuzendaritza Nagusia. Garraioetako Estatu Idazkaritza (2017ko otsailaren 17a eta 2018ko maiatzaren 25a).

–Herri Lan Zuzendaritza Nagusia (2017ko otsailaren 16a).

–Iruñerriko Mankomunitatea (2016ko abenduaren 23a, Uraren Ziklo Integralari buruzko txostena, eta 2017ko otsailaren 17a, hondakinei buruzko txostena).

–Erregistroaren, Ondasun Higigarrien eta Arkeologiaren Atala. Ondare Historikoaren Zerbitzua (2017ko otsailaren 15a).

–Telekomunikazioen eta Informazioaren Teknologien Zuzendaritza Nagusia. Telekomunikazioetako Estatu Idazkaritza (2017ko urtarrilaren 11).

–NASERTIC (2017ko otsailaren 16a).

–Ogasuneko eta Finantza Politikako Departamentuko Ondare Zerbitzua (2018ko martxoaren 8a).

–Babes Zibilerako Zerbitzua (2019ko maiatzaren 14a).

Espedienteari hasiera emateko erabakian, ordura arte jasotako txosten guztien aipamen bat jasotzen zen. Jarraian, erabaki horren ondoren jasotako txostenak aztertzen dira, baita argitu gabeko kontuak zituztenak ere.

III.1. Abiazio Zibilaren Zuzendaritza Nagusia. Garraioetako Estatu Idazkaritza.

Beharrezkoa eta loteslea den txostena igorri zuen aplikatzekoa den legeria sektorialaren arabera (2017ko otsailaren 17an); han, honako hau zehazten da:

1) Nahiz eta ez diren eraikuntzen altuerak zehazten, kontuan hartuz lurzoruaren kota 460 m baino beherago dagoela eta zortasun aeronautikoen kotak, berriz, 499 m-tik gora, pentsatzekoa da eraikuntzak eta haien elementu guztiak beherago geratuko direla.

2) Estatuari dagozkio zortasun aeronautikoen araubidea eta antolamendua. Gai hori plangintza dokumentu honetan argi utzi behar dela aipatzen da.

3) Autonomia erkidegoen eskumenei dagokienez, beste mugapen batzuk ezartzen ahalko dira. Hori dela eta, uste dute, ezartzera, “zortasun aeronautiko” terminoa ordeztu egin behar dela eta egokiago bat jarri, Foru Komunitatearen hirigintzaren eta lurralde antolamenduaren arloko eskumenekin bat datorrena.

Terminologia aldaketa horren aldeko txostena egin da.

Hala eta guztiz ere, adierazten da UPSaren aldaketaren gainean egindako txostenak ez dakarrela berekin heliportua instalatuko dela onartzea, legeria aplikagarriak ezartzen dituen beharrezko baimenak behar baitira horretarako.

Zuzendaritza nagusi honek berriz jakinarazten du 2018ko maiatzaren 25ean:

“Egiaztatu da proposamena ez dela aldatu 2017ko otsailaren 17an bidalitako txostenean adierazi bezala; beraz, bertan azaldutako ondorioak baliozkoak dira oraindik ere. Horrenbestez, zuzendaritza-zentro honek errepikatzen du, Iruña eta Galarreko udal-mugarteetako “Cordovillako (Galar) suhiltzaile parkearen eta heliportuaren Udalez gaindiko Proiektu Sektorialaren aldaketari” dagokionez, eduki eta izaera egokiak dituela, baldin eta zuzendaritza-zentro honi ziurtatzen bazaio planeamendu hori zortasun aeronautikoen arloko eskumen-banaketaren esparru konstituzionalarekin bat etorriko dela.

Horrekin lotuta, Nafarroako Gobernua premiatzen du berriz ez dezala “zortasun aeronautiko” terminoa erabili planeamenduaren dokumentuan Cordovillako heliportuari dagokionez, Nafarroako Foru Komunitatearen eskumenekin bat datorren hitz bat baizik.

Azkenik, gogorarazten da Abiazio Zibilaren Zuzendaritza Nagusiak planteamenduaren aldeko txostena igortzeak ez duela esan nahi instalazio aeronautiko berriak ezartzea onartzen denik, bereziki heliportuak; izan ere, organo eskudunei dagozkien baimenak beharko dituzte.

Aipatutako txostenari jarraikiz, aurkeztutako dokumentazioak adierazten du heliportuaren “zortasun aeronautikoen” erreferentzia guztiak “heliportu-mugak” izenarekin ordeztuko direla.

Aldaketa hori aldaketaren amaierako dokumentazioan jaso beharko da.

Bestalde, Abiazio Zibilaren Zuzendaritza Nagusiari ziurtatu behar zaio aldaketa hau zortasun aeronautikoen arloko eskumenen banaketa-esparru konstituzionalarekin bat datorrela.

III.2. NASERTIC.

Txostena egin du “NUPeko Parke Teknologikoa, Administrazio Zerbitzuen Arloa eta Superser-en instalazio izandakoak berreskuratzea” UPSaz, esparrutik igarotzen diren telekomunikazio sareen berri emateko. Txostenean adierazten da sustatzaileak sare horiek desbideratu eta lehengoratu beharko dituela, behar izanez gero, eta urbanizazio proiektuei buruzko txostena eman behar duela Nasertic-ek.

Sustatzaileak erantzuten du, behar izanez gero, NASERTICek kudeatutako zerbitzu eta azpiegiturak desbideratu eta lehengoratuko dituela, eta NASERTIC-ek txostena eman beharko duelako aldez aurretik kasuko urbanizazio proiektuei buruz. Determinazio hori aldaketaren amaierako dokumentazioaren araudian sartu beharko da.

III.3. Herri Lan Zuzendaritza Nagusia eta Ondare Zerbitzua.

Herri Lan Zuzendaritza Nagusiak nahiz Ogasuneko eta Finantza Politikako Departamentuko Ondare Zerbitzuak eutsi egiten diete Nafarroako Unibertsitate Publikoko teknologia-parkearen, Administrazio Zerbitzuen Arloaren eta Superser-en instalazio zaharrak berreskuratzearen UPSaren inguruan igorritako txostenetan adierazitakoari. Txosten horietan zalantzan jartzen da UPSrako proposatzen den ordenamendua; izan ere, dagoeneko aipatu bezala, aldaketa honen proposamena baldintzatzen du esparruari dagokionez, eta agerian jartzen du heliporturako proposatutako esparrua ez dela bere horretan justifikatuta geratzen.

III.4. Babes Zibilerako Zerbitzua.

Azkenik, 2019ko maiatzaren 14an, Babes Zibilerako Zerbitzuak jakinarazi zuen babes zibilaren arloan eta arriskuei dagokienez ez dagoela desberdintasun nabarmenik gaur egun onetsita dagoen UPSarekiko. Beraz, jakinarazten du ez duela eragozpenik ikusten proposatutako aldaketa egiteko.

IV.–Lurraldearen Antolamenduko Batzordearen txostena.

Lurraldearen Antolamenduko Batzordeak 2019ko maiatzaren 16an egindako osoko bilkurara eraman zen gaia, eta Barne Zuzendaritza Nagusiaren ordezkariek adierazi zuten, proposatutako gainerako alternatibei egindako balorazioak aintzat hartuta ere, aukera egokiena 1b alternatiba dela defendatzen dutela oraindik ere, aukera bideragarria, funtzionala eta garatzeko azkarra delako. Gaineratzen dutenez, ordokiaren hiri garapenarekin zerikusia duten kontuetan sartu gabe, proposamen honen helburua heliportuaren kokapena nabarmenki aldatzea da, eta hori hobekuntza handia izanen da indarreko UPSarekin alderatuta.

Lurraldearen Antolamenduko Batzordeak bozketa egin zuen gaiaren inguruan, eta aho batez erabaki zen 1b alternatiba onestea, hau da, aldaketa idatzi zuen taldeak aurkeztutako heliportuaren alternatibei buruzko txostenean balorazio onena duena.

Horrenbestez, Lurraldearen Antolamenduko Batzordearen 2019ko maiatzaren 16ko txostenarekin bat, eta uztailaren 26ko 1/2017 Legegintzako Errege Dekretuak onetsitako Lurraldearen Antolamenduari eta Hirigintzari buruzko Legearen testu bateginean xedatutakoari eta aplikatu beharreko gainerako arauei jarraikiz, Nafarroako Gobernuak, Landa Garapeneko, Ingurumeneko eta Toki Administrazioko kontseilariak proposaturik,

ERABAKITZEN DU:

1. Behin betiko onestea “Cordovillako (Galar) suhiltzaile parkearen eta heliportuaren Udalez gaindiko Proiektu Sektoriala” aldatzeko espedientea, erabaki honetan azaldutako baldintzetan. Aldaketa heliportuaren kokapenari buruzkoa da, eta Lehendakaritzako, Funtzio Publikoko, Barneko eta Justiziako Departamentuak sustatu du.

2. Sustatzaileari eskatzea aldaketaren amaierako dokumentu bat igortzeko, paperean eta formatu digitalean, erabaki honetan aipatutako kontu guztiak jasotzen dituena eta Sustapen Ministerioko Abiazio Zibilaren Zuzendaritza Nagusiak 2017ko otsailaren 17ko eta 2019ko maiatzaren 23ko txostenetan eskatzen duen ziurtagiria barne hartzen duena, zuzendaritza-zentro horri helarazteko.

3. Erabakia Nafarroako Aldizkari Ofizialean argitaratzeko eta, ondorioz, aldaketa honen determinazioak indarrean sartzeko, dokumentu hori aurkeztu beharko da.

4. Espedientearen izapidetzean emandako txosten sektorialetan xedatutakoaren arabera garatu eta gauzatuko da aldaketa.

5. Nolanahi ere, obrak gauzatzean ukituta gelditzen ahal diren beste azpiegitura eta zortasun batzuei dagokienez, edo gauzatzea baldintzatzen ahal dutenei dagokienez, sustatzaileak behar diren baimen guztiak lortuko ditu kasuan kasuko gaian eskudun diren organoetatik.

6. Interes orokorreko deklaratzea “Cordovillako (Galar) suhiltzaile parkearen eta heliportuaren Udalez gaindiko Proiektu Sektoriala”, uztailaren 26ko 1/2017 Legegintzako Foru Dekretuaren bidez onetsitako Lurraldearen Antolamenduari eta Hirigintzari buruzko Foru Legearen testu bateginaren 47. artikuluan ezarritako ondorioetarako.

7. Erabaki hau Nafarroako Aldizkari Ofizialean argitaratzea, orok jakin dezan, eta erakunde hauei bidaltzea: Informatikaren, Telekomunikazioen eta Berrikuntza Publikoaren Zuzendaritza Nagusiari, Herri Lan Zuzendaritza Nagusiari, Ondare Historikoaren Zerbitzuari, Babes Zibilerako Zerbitzuari, Ondare Zerbitzuari, Hezkuntzako Azpiegituren Zerbitzuari eta Lurralde eta Paisaia Zerbitzuari.

8. Erabaki honen berri ematea Sustapen Ministerioko Abiazio Zibilaren Zuzendaritza Nagusiari, Iruñeko Mankomunitateari, Nafarroako Unibertsitate Publikoari, NASERTICi, Galar Zendeako eta Iruñeko udalei eta NASUVINSAri, behar diren ondorioak izan ditzan, eta adieraztea, halaber, ebazpen honek administrazio bidea amaitzen duela eta haren kontra administrazioarekiko auzi-errekurtsoa aurkezten ahal dela, Nafarroako Justizia Auzitegi Nagusiko Administrazioarekiko Auzien Salari zuzendua, erabakiaren araudia argitaratu eta biharamunetik bi hilabeteko epean.

Dena den, administrazio publikoek aurretiko errekerimendua egiten ahalko dute, Nafarroako Gobernuan, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epeetan.

Iruñean, 2019ko maiatzaren 22an.–Nafarroako Gobernuko kontseilari idazkaria, María José Beaumont Aristu.

Iragarkiaren kodea: F1910110