1. NAFARROAKO FORU KOMUNITATEA
1.4. DIRU-LAGUNTZAK, LAGUNTZAK ETA BEKAK
1595/2018 EBAZPENA, abenduaren 31koa, Osasunbidea-Nafarroako Osasun Zerbitzuko zuzendari kudeatzaileak emana, 2018ko urritik 2019ko irailera bitarte laguntzak emateko deialdiaren oinarri arautzaileak onesten dituena, finantzaketa publikoari lotuta dauden eta Osasunbidea-Nafarroako Osasun Zerbitzuko langileek agintzen dituzten tratamendu medikoei atxikitzen laguntzeko. DDBN identifikazioa: 426017.
Dirulaguntzei buruzko azaroaren 9ko 11/2005 Foru Legeak araubide juridiko orokorra ezarri zuen Nafarroako Aurrekontu Orokorren kargura ematen diren dirulaguntzetarako. Dirulaguntzak eman baino lehen, organo eskudunak oinarri arautzaileak ezarriko ditu, eta horiek argitaratu beharko dira, dirulaguntza jasotzeko moduan daudenek haiek eskuratzeko aukera izan dezaten.
Finantzaketa publikoari lotuta dauden eta Osasunbidea-Nafarroako Osasun Zerbitzuko langileek agintzen dituzten tratamendu medikoei atxikitzen laguntzeko diren laguntzak Osasuneko kontseilariaren ekainaren 22ko 498E/2017 Foru Aginduaren bidez arautzen dira. Foru agindu horretan ezartzen dira laguntzen xedea eta helburua, zenbatekoa, onuradunak eta horien betebeharrak, eskaeren baldintzak, laguntzak emateko eta ordaintzeko modua, laguntzen errekurtsoen eta publizitatearen araubidea, helburu bererako diren beste batzuekiko bateragarritasuna, itzultzeko betebeharrak, eta ez-betetzeetarako arau-hausteen eta zehapenen araubidea. Halaber, adierazten da Osasunbidea-Nafarroako Osasun Zerbitzuko zuzendari kudeatzailearen deialdiaren bidez arautuko direla laguntzak kudeatzeko eta ebazteko behar diren kontu zehatz batzuk.
Aipatu 11/2005 Foru Legean ezarritakoarekin bat, ebazpen honen bidez onesten den deialdiaren xedea da laguntzak ematea finantzaketa publikoari lotuta dauden eta Osasunbidea-Nafarroako Osasun Zerbitzuko langileek agintzen dituzten tratamendu medikoei atxikitzen laguntzeko, 2018ko urritik 2019ko irailera.
Aipatutako foru legeak aukera ematen du deialdiak aurrekontu ekitaldia hasi baino lehen onesteko, betiere baldintza gisa ezartzen bada, dirulaguntzak emateko, kreditu nahikoa egon behar dela kasuan kasuko ekitaldian.
Deialdi honek 426017 zenbakia du Dirulaguntzen Base Nazionalean.
Hori horrela, Nafarroako Foru Komunitateko Administrazioari buruzko abenduaren 3ko 15/2004 Foru Legearen 22.1 artikuluak eman dizkidan eskudantziak erabiliz,
EBATZI DUT:
1. Onestea 2018ko urritik 2019ko irailera bitarte laguntzak emateko deialdiaren oinarri arautzaileak (I. eranskina), finantzaketa publikoari lotuta dauden eta Osasunbidea-Nafarroako Osasun Zerbitzuko langileek agintzen dituzten tratamendu medikoei atxikitzen laguntzeko.
2. 950.000 euroko gastua baimentzea, egotziko zaiona 2018ko aurrekontuko “Farmazia-prestazioak - koordainketa arautzea” izeneko 540005 52831 4809 313103 partidaren baliokidea denari 2019ko aurrekontuan.
3. Ebazpen hau eta eranskinak Nafarroako Aldizkari Ofizialean argitara daitezela agintzea.
4. Ebazpen hau eta bere eranskinak hauei guztiei helaraztea: Osasun Departamentuko Interbentzio delegatuari; Farmaziako Prestazioaren Kudeaketarako Zerbitzuari; Farmazia Zuzendariordetzari; Osasunbidea-Nafarroako Osasun Zerbitzuaren Aurrekontuen eta Kontabilitatearen Zerbitzuari eta Osasun Departamentuko Idazkaritza Tekniko Nagusiari.
Iruñean, 2018ko abenduaren 31n.–Osasunbidea-Nafarroako Osasun Zerbitzuko zuzendari kudeatzailea, Óscar Moracho del Río.
I. ERANSKINA
Oinarri arautzaileak, finantzaketa publikoari lotuta dauden eta Osasunbidea-Nafarroako Osasun Zerbitzuko langileek agintzen dituzten tratamendu medikoei atxikitzen laguntzeko 2018ko urritik 2019ko irailera bitarte laguntzak emateko deialdiarenak
1. Laguntzen xedea eta helburua.
Laguntzen xedea eta helburua dira Osasuneko kontseilariaren ekainaren 22ko 498E/2017 Foru Aginduaren 1. artikuluan ezarritakoak. Foru agindu horren bidez, finantzaketa publikoari lotuta dauden eta Osasunbidea-Nafarroako Osasun Zerbitzuko langileek agintzen dituzten tratamendu medikoei atxikitzen laguntzeko diren laguntzak arautzen dira, lehen eta bigarren xedapen gehigarrietan ezarritakoa ere kontuan hartuta.
2. Onuradunek bete beharreko baldintzak.
2.1. Osasuneko kontseilariaren aipatu ekainaren 22ko 498E/2017 Foru Aginduaren 2. a) artikuluan aipatzen diren pertsonak onuradunak izaten ahalko dira, baita otsailaren 25eko 8/2018 Foru Legearen aplikazio-eremu subjektiboan sartuta zeuden eta 2. b) artikuluan aipatzen direnak ere, gaur egun osasunerako sarbidea Osasun Sistema Nazionalerako sarbide unibertsala arautzen duen 7/2018 ELDren bidez daukatenak, baldin eta 2. artikuluan aipatzen diren baldintza ekonomikoak betetzen badituzte, eta ez badaude sartuta Dirulaguntzei buruzko azaroaren 9ko 11/2005 Foru Legearen 13.2 artikuluak ezartzen dituen debekuetako batean. Deialdi honetarako kontuan hartuko den pertsona fisikoen errentaren gaineko zergaren adierazpena gehiegizko ekarpenak itzultzeko aplikatzen dena izanen da.
2.2. Halaber, onuradunak izaten ahalko dira MUFACE, MUGEJU eta ISFAS mutualista aktiboak diren eta gainerako baldintzak betetzen dituzten pertsonak, baldin eta, 2.1 ataleko onuradunen espedienteak ebatzi ondoren, aurrekontuan diru nahikoa badago haien eskaerei erantzuteko.
Laguntza emateko proposamena egiten den unean Nafarroako Foru Komunitateko Administrazioaren edo haren erakunde autonomoen aldeko zerga arloko betebeharrak eta zorrak itzultzekoak egunean izan beharra betetzen dela frogatu ahal izateko, eskaera aurkezteak berarekin dakar baimena ematea Osasunbidea-Nafarroako Osasun Zerbitzuak betebehar horien betetze-maila egiaztatzeari buruzko informazioa bil dezan.
3. Eskaerak nola, non eta noiz aurkeztu.
3.1. Laguntzen eskaera II. eranskinean ezarritako ereduaren arabera eginen da, Osasuneko kontseilariaren ekainaren 22ko 498E/2017 Foru Aginduaren 5.2 eta 5.3 artikuluetan ezarritako agiriak erantsita. Eredu hori Nafarroako osasun-etxeetan eta Nafarroako Gobernuaren web-orrian (http://www.navarra.es/home_eu/) eskuratzen ahalko da.
3.2. Eskaerak aurkezteko epea 2018ko abenduaren 15ean hasi, eta 2019ko irailaren 30ean bukatuko da.
3.3. Administrazio Publikoen Administrazio Prozedura Erkideari buruzko urriaren 1eko 39/2015 Legearen 16.4 artikuluan ezarritakoa ezertan galarazi gabe, dirulaguntzaren eskaerak aurkeztuko dira Osasunbidea-Nafarroako Osasun Zerbitzuko osasun-etxeetan, edo Osasunbidea-Nafarroako Osasun Zerbitzuko Farmaziako Prestazioaren Kudeaketarako Zerbitzuan, ahal dela.
Postetxeetan aurkezten diren eskaerei dagokienez, gutun-azal ireki batean aurkeztuko dira, lehen orrialdearen idazpuruan adieraz daitezen bulegoaren izena, data eta tokia. Datu horiek eskaera igorri dela frogatzen duen gordekinean ere adierazi beharko dira.
Eskaerak adierazten diren baldintzak betetzen ez baditu, instrukzio organoak interesdunari eskatuko dio hori zuzendu dezan, Osasuneko kontseilariaren ekainaren 22ko 498E/2017 Foru Aginduaren 6. artikuluan ezarritakoaren arabera.
3.4. Laguntza eskatzeak berekin dakar deialdi hau arautzen duten oinarriak onartzea.
4. Prozedura instruitu eta ebazteko organo eskudunak eta ebazpena emateko gehieneko epea.
4.1. Dirulaguntzak emateko prozeduraren instrukzioa Osasunbidea-Nafarroako Osasun Zerbitzuko Farmazia Zuzendariordetzak eginen du.
4.2. Osasuneko kontseilariaren ekainaren 22ko 498E/2017 Foru Aginduaren 7.1 artikuluan adierazten den bezala, Osasunbidea-Nafarroako Osasun Zerbitzuko zuzendari kudeatzailea ebazteko organo eskuduna da, eta hiru hilean behin laguntzak emateko eta ordaintzeko edo ukatzeko ebazpena emanen du eta espedienteak ebatziko ditu sarrera hurrenkerari jarraikiz.
Aurrekoa gorabehera, MUFACE, MUGEJU eta ISFAS mutualisten laguntzen eskaerak gainerako onuradunen eskaera guztiak ebatzi ondoren ebatziko dira.
4.3. Foru agindu horren 7.2 artikuluan ezarritakoaren arabera, laguntzen eskaerak tramitatzeko eskumena duen organoaren erregistroan eskaera sartzen denetik hura ebazteko dagoen hiru hilabeteko gehieneko epea igaro ondoren, interesdunek ezetsitzat jotzen ahalko dituzte beren eskaerak, ezertan galarazi gabe administrazioak berariaz ebatzi beharra izatea.
5. Laguntzen zenbatekoa.
Eman beharreko laguntzen zenbatekoa Osasuneko kontseilariaren ekainaren 22ko 498E/2017 Foru Aginduaren 3. artikuluan ezarritakoa izanen da.
1. 6.000 eurotik gorako urteko errenta mugak gainditzen ez dituzten onuradunek laguntzak jasoko dituzte, hil bakoitzean ordaindutako zenbatekoaren eta 2,6 euroren arteko aldea bezalakoak, Nafarroako Foru Komunitateko farmazia bulegoetan erosten dituzten sendagai eta osasun-produktuak ordaintzeko, zeinak Osasunbidea-Nafarroako Osasun Zerbitzuko langileek agintzen dituzten eta finantzaketa publikoari lotuta dauden.
2. 6.001 eurotik 18.000 eurora arteko errentak dituzten gainerako onuradunek laguntzak jasoko dituzte, hil bakoitzean ordaindutako zenbatekoaren eta 8,23 euroren arteko aldea bezalakoak, Nafarroako Foru Komunitateko farmazia bulegoetan erosten dituzten sendagai eta osasun-produktuak ordaintzeko, Osasunbidea-Nafarroako Osasun Zerbitzuko langileek agindutakoak eta finantzaketa publikoari lotuak.
6. Onuradunen eginbeharrak.
Onuradunek Dirulaguntzei buruzko azaroaren 9ko 11/2005 Foru Legean eta Osasuneko kontseilariaren ekainaren 22ko 498E/2017 Foru Aginduaren 11. artikuluan ezarritako betebeharrak bete beharko dituzte.
Halaber, laguntzak beste dirulaguntza, laguntza, sarrera edo baliabide ekonomiko batzuekin bateragarriak diren egiaztatu ahal izateko, horiek dirulaguntza honen ondoren lortzen badira, onuradunek horien berri eman beharko diote Farmazia Zuzendariordetzari ahalik eta epe laburrenean, horiek lortu direla jakiten denetik eta, nolanahi ere, 2019ko irailaren 30a baino lehen.
7. Dirulaguntza ematea.
Foru agindu honetan ezarritako laguntzen emate edo ukapena hiru hilean behin eginen da, Osasunbidea-Nafarroako Osasun Zerbitzuko zuzendari kudeatzailearen ebazpenaren bidez, eta espedienteak sarrera-ordenari jarraikiz ebatziko dira.
8. Dirulaguntzaren ordainketa.
Ordainketa bakarrean eginen da hiruhileko ordainketa, kontzesioaren ebazpenarekin batera.
9. Laguntza itzuli beharra.
Osasuneko kontseilariaren ekainaren 22ko 498E/2017 Foru Aginduaren 12. artikuluan xedatutakoaren arabera, dirulaguntza ematearekin batera ezarritako baldintzak ez betetzeak eta Dirulaguntzei buruzko azaroaren 9ko 11/2005 Foru Legearen 35. artikuluan ezarritako gainerako arrazoiak gertatzeak edo deialdi honetan edo dirulaguntza emateko deialdian berariaz adierazten diren betebeharrak ez betetzeak kobratu gabe dauden diru kopuruak jasotzeko eskubidea galtzea ekarriko du, eta, hala denean, jasotako diru kopurua osorik edo zati batean itzuli beharra ere bai, gehi legezko interesak, laguntza ordaindu den egunetik itzulketari buruzko ebazpena ematen den egunera arte sortutakoak.
10. Arau-hausteak eta zehapenak.
Laguntzen hartzaileak Dirulaguntzei buruzko Foru Legearen 42. artikuluan eta hurrengoetan dirulaguntzen arloko arau-hauste administratiboei buruz ezarritako zehapen araubidearen mende egonen dira, eta hartan ezarritako erantzukizunak izanen dituzte, Osasuneko kontseilariaren ekainaren 22ko 498E/2017 Foru Aginduaren 13. artikuluan xedatzen denaren arabera.
Dirulaguntzen arloko zehapenak erregelamendu bidez finkatzen den prozeduraren arabera ezarriko dira, edo, halakorik izan ezean, Nafarroako Foru Komunitateko Administrazioari buruzko abenduaren 3ko 15/2004 Foru Legearen V. tituluan xedatuari jarraikiz.
11. Publizitatea.
Laguntzen publizitate araubideak Osasuneko kontseilariaren ekainaren 22ko 498E/2017 Foru Aginduaren 7.4 artikuluan xedatuari jarraikiko dio.
12. Errekurtsoak.
Deialdiaren kontra eta garatzeko egintzen kontra bidezkoa da gora jotzeko errekurtsoa aurkeztea, Nafarroako Gobernuaren Osasuneko kontseilariari zuzendua, argitaratu edo jakinarazi eta biharamunetik hilabeteko epean, Administrazio Publikoen Administrazio Prozedura Erkideari buruzko urriaren 1eko 39/2015 Legean eta Nafarroako Foru Komunitateko Administrazioari buruzko abenduaren 3ko 15/2004 Foru Legean xedatuarekin bat.
II. ERANSKINA
Finantzatutako tratamendu medikoei atxikitzen laguntzeko diren laguntzen eskaera (PDFa).
Iragarkiaren kodea: F1900210
