Iragarkia

151. ALDIZKARIA - 2019ko abuztuaren 5a

1. NAFARROAKO FORU KOMUNITATEA

1.7. BESTELAKOAK

1131/2019 EBAZPENA, ekainaren 17koa, Nafarroako Unibertsitate Publikoko errektoreak emana, Nafarroako Unibertsitate Publikoaren Batxilergoko X. Eztabaida Lehiaketa egiteko deialdia onetsi eta dagokion gastua baimentzen duena.

Nafarroako Unibertsitate Publikoak kultura sustatzeko eta bultzatzeko garatutako politikaren barnean, eta Nafarroako Unibertsitate Publikoak eta Nafarroako Parlamentuak sinatutako lankidetza-hitzarmenaren emaitza gisa, Unibertsitate Proiekzioko, Kulturako eta Dibulgazioko Errektoreordetzak Nafarroako Unibertsitate Publikoaren Batxilergoko X. Eztabaida Lehiaketarako deialdia egitea proposatu du. Nafarroako Foru Komunitatean Batxilergoko ikasketak ematen dituzten ikastetxeek hartuko dute parte lehiaketan.

Unibertsitatearen Aholkularitza Juridikoak egindako txostena ikusirik.

Ekonomia Gaietarako Zerbitzuko Zuzendariak egindako txostena ikusirik.

Kontu-hartzailetzak aldeko fiskalizazioa eginda.

Unibertsitate Proiekzioko, Kulturako eta Dibulgazioko errektoreordeak proposaturik.

Nafarroako Unibertsitate Publikoko Estatutuetako 40. artikuluaren babesean eman zaizkidan eskumenak erabiliz,

EBATZI DUT:

Lehenbizikoa.–Ebazpen honek sortzen duen 2.750 euroko gastua baimentzea. 2019ko gastuen aurrekontuaren 30.5200.3065/0610/141.00 partidatik hartuko dira, epaimahaikideei ordaintzeko.

Bigarrena.–Batxilergoko X. Eztabaida Lehiaketa egiteko deialdia onestea, baita I. eranskinean jaso diren oinarriak ere.

Hirugarrena.–Ebazpen hau aditzera ematea Unibertsitate Proiekzioko, Kulturako eta Dibulgazioko errektoreordeari, kontu-hartzaileari eta Kontabilitate Atalari.

Laugarrena.–Deialdia Nafarroako Unibertsitate Publikoaren baliabide elektronikoetan eta Nafarroako Aldizkari Ofizialean argitaratzea.

Bosgarrena.–Ebazpen honen aurka zilegi da berraztertzeko errekurtsoa aurkeztea Nafarroako Unibertsitate Publikoko errektorearen aurrean, hilabeteko epean, edo, bestela, administrazioarekiko auzi-errekurtsoa maila bereko Nafarroako Auzitegietan, bi hilabeteko epean, hau argitaratu edo jakinarazi eta biharamunetik kontatzen hasita.

Iruñean, 2019ko ekainaren 17an.–Errektorea, Ramón Gonzalo.

I. ERANSKINA

Batxilergoko X. Eztabaida Lehiaketaren Deialdiaren Oinarriak (2019-2020 ikasturtea)

Lehena.–Deialdiaren xedea.

Deialdi honen helburua da Batxilergoko X. Eztabaida Lehiaketako (BET) sariak emateko prozedura arautzea, publizitate, objektibotasun eta lehiakortasun printzipioen arabera.

Bigarrena.–Gaia eta noiz egingo den.

1. Antolatzaileek 2019ko urriaren 4an emango dute jakitera zein gai izango duen Batxilergoko X. Eztabaida Lehiaketa. Webgune honetan adieraziko da: http://www.unavarra.es/cultura/unibertsitateko-eztabaida/batxilergoko-lehiaketa?languageId=100001.

2. Batxilergoko X. Eztabaida Lehiaketa Nafarroako Unibertsitate Publikoan egingo da 2019ko urriaren 25ean eta 26an. Nolanahi ere, Unibertsitate Proiekzioko, Kulturako eta Dibulgazioko errektoreordeak aukera du eztabaidak egiteko beste toki batzuk hautatzeko.

3. 2019ko urriaren 18an eta 19an, prestakuntza-saio bat edo batzuk egingo dira parte hartuko duten taldeetako kideekin, lehiaketari buruzko zalantzak argitzeko.

Hirugarrena.–Izena ematea eta hizkuntza.

1. Lehiaketan parte hartu nahi duten ikastetxeek webgune honetan dagoen inprimakia bete behar dute 2019ko irailaren 26ko 14:30 baino lehen: http://www.unavarra.es/cultura/unibertsitateko-eztabaida/batxilergoko-lehiaketa?languageId=100001.

2. NUPek 16 ikastetxe onartuko ditu gehienez gaztelaniazko taldean, eta 4 euskarazkoan. Izena emandako ordenaren arabera hautatuko dira ikastetxeak. Izena ematen duten ikastetxeetako 4rekin gehienez ere, talde bat osatuko da lehiaketa osoa euskaraz egiteko. Euskaraz lehiatzeko 3 edo 4 ikastetxek izena ematen ez badute eta euskarazko talde bat osatzeko modurik ez badago, postu horiek gaztelaniazko lehiaketari gehituko zaizkio.

3. Izena emanez gero, parte-hartzaileek espresuki onartzen dute Batxilergoko X. Eztabaida Lehiaketan egiten diren argazkien eta bideoen irudi eskubide guztiak NUPi lagatzea.

Laugarrena.–Konfidentzialtasuna.

Parte-hartzaileen datuak fitxategi automatizatu batean sartuko dira, eta aurtengo deialdia kudeatzeko baino ez da erabiliko fitxategi hori.

Bosgarrena.–Oinarriak onartzea.

Batxilergoko X. Eztabaida Lehiaketan parte hartuz gero, oinarri hauek ezagutzen direla eta ontzat ematen direla ulertuko da.

Seigarrena.–Araudia.

Batxilergoko X. Eztabaida Lehiaketaren Araudian ezarritakoaren arabera egingo da eztabaida lehiaketa hau, eta araudi horrek, era berean, G-9 Taldearen Unibertsitateko Eztabaida Ligaren Araudia izango du oinarri. Azken hori 2014ko azaroaren 10ean onetsi eta 2017ko abenduaren 20an aldatu zen, eta hemen dago kontsultatzeko: http://www.unavarra.es/cultura/unibertsitateko-eztabaida/batxilergoko-lehiaketa?languageId=100001.

Zazpigarrena.–Epaimahaia.

Unibertsitate Proiekzioko, Kulturako eta Dibulgazioko errektoreordeak izendatuko ditu epaimahaiko kideak.

Zortzigarrena.–Argitaratzeko modua.

Oinarri hauek Nafarroako Aldizkari Ofizialean eta Nafarroako Unibertsitate Publikoaren baliabide elektronikoetan argitaratuko dira.

Bederatzigarrena.–Errekurtsoak.

Deialdi honen oinarrien aurka, eta deialdi honen ondorioz sariak behin betikoz emateari buruzko ebazpenaren aurka, zilegi da aukerako berraztertze-errekurtsoa jartzea, Nafarroako Unibertsitate Publikoko errektorearen aurrean, hilabeteko epean, edo administrazioarekiko auzi-errekurtsoa maila bereko Nafarroako Auzitegietan, bi hilabeteko epean. Epeok dagokion argitalpena egin eta biharamunetik aurrera hasiko dira kontatzen.

BATXILERGOKO X. EZTABAIDA LEHIAKETAREN ARAUDIA

I. TITULUA

Aplikazio eremua

1. artikulua.

Nafarroako Unibertsitate Publikoko Batxilergoko X. Eztabaida Lehiaketan aplikatuko da araudi hau.

2. artikulua.

Araudi honek zehatz-mehatz arautu gabeko alderdiak Batxilergoko X. Eztabaida Lehiaketako deialdiaren oinarriak izeneko dokumentuan jasoko dira idatziz.

3. artikulua.

Nafarroako Unibertsitate Publikoko Batxilergoko X. Eztabaida Lehiaketan parte hartuz gero, oinarri hauek ontzat ematen direla eta haiei men egiten zaiela joko da.

II. TITULUA

Parte hartzeko baldintzak

4. artikulua.

Batxilergoa euskaraz edo gaztelaniaz ematen duten Nafarroako ikastetxeek dute aukera Batxilergoko X. Eztabaida Lehiaketako 2019-2020ko deialdian parte hartzeko. Ikastetxe bakoitzak talde bakar batekin hartuko du parte, eta talde hori 2019-2020 ikasturtean Batxilergoko 2. mailan dauden ikasleek osatuko dute.

III. TITULUA

Gaia eta data

5. artikulua.

Antolatzaileek 2019ko urriaren 4an emango dute jakitera zein gai izango duen Batxilergoko X. Eztabaida Lehiaketak; webgune honetan adieraziko da: http://www.unavarra.es/cultura/unibertsitateko-eztabaida/batxilergoko-lehiaketa?languageId=100001.

6. artikulua

2019ko urriaren 25ean eta 26an egingo da Nafarroako Unibertsitate Publikoko Batxilergoko VII. Eztabaida Lehiaketa.

IV. TITULUA

Antolamendua

7. artikulua. Lehiaketaren Zuzendaritza.

1. Osaera: pertsona bakarreko organoa da, eta Unibertsitateko komunitateko kide bat izan behar da nahitaez.

2. Eginkizunak: batetik, araudi hau behar bezala betetzen dela zaintzea; bestetik, arauak ez betetzeagatik edo jokabide desegokiak izateagatik ezar daitezkeen zigorren berri ematea parte-hartzaileei; eta, azkenik, araudi honetan jasotzen diren zigorrak aplikatzea.

3. Funtzionamendu araudia: lehiaketaren zuzendariak bere eskumeneko erabakiak hartuko ditu Lehiaketa Batzordeari txostenik eskatu beharrik gabe. Azken horrek ebatziko ditu zuzendariaren erabakien kontra aurkezten diren erreklamazioak, halakorik aurkeztu bada.

8. artikulua. Lehiaketa Batzordea.

1. Osaera: lehiaketaren epaileek osatuko dute batzordea, eta lehiaketaren zuzendaria izango da batzordeburua, zeinak kalitateko botoa izango baitu berdinketa izanez gero.

2. Eginkizunak: batetik, araudi hau behar bezala betetzen dela zaintzea; bestetik, aurkezten zaizkien erreklamazioak ebaztea, aretoko arbitroak ezartzen dituen zigorren aplikazioari buruzko auziak eta lehiaketako gorabeherei buruzko erreklamazioak ebaztea; eta, azkenik, araudi hau interpretatzea eta araudi honetan arautu gabeko gorabeherak konpontzea.

3. Funtzionamendu araudia: batzordeko kideen botoen gehiengoz hartuko dira erabakiak, horien berri eman gabe betiere, eta akta batean jasoko dira, zeina Lehiaketa Batzordeko kide guztiek sinatuko baitute. Erabakien aurka ez da zilegi apelazioa.

9. artikulua. Epaimahaia.

1. Osaera: gutxienez bi epaile eta epaile nagusi bat izango dira epaimahaiko kideak, eta bakoitia izango da kasu guztietan kide kopurua. Antolatzaileek gonbidatutako pertsonak eta Unibertsitateko komunitateko kideak izan daitezke epaimahaikide. Epaimahai bat egongo da areto bakoitzean. Epaimahaiak elkarren artean independenteak izango dira. Epaimahaikideek ez dute loturarik eduki behar baloratzen dituzten taldeekin. Aurtengo eta iazko Batxilergoko Eztabaida Lehiaketako prestatzaileak ezin dira epaile izan prestatu dituzten taldeak lehiatzen direnean.

2. Eginkizunak: oro har, eztabaidak baloratzea eta, bereziki, parte-hartzeak eta interpelazioak, bai eta puntualtasuna eta araudi honetan jasotako gainerako alderdiak ere. Aretoko arbitroak jakitera eman behar du talderen batek edo talde bateko kideren batek arauren bat urratu badu, eta epaimahaikideak ohartu gabe aretoan irregulartasunen bat gertatu bada.

3. Funtzionamendu araudia: Epaimahaiko kideen botoen gehiengoz hartuko dira erabakiak, eta bakoitia izango da kasu guztietan boto kopurua. Epaimahaikide bakoitzak epailearen aktan adierazi behar du bere erabakia, eta eztabaidaren aktan, berriz, organoaren erabakia. Epaile bakoitzaren akta bere izenik gabe argitaratuko da.

10. artikulua. Aretoko arbitrajea.

1. Osaera: eztabaidak egiteko aretoetan arbitro lanetan aritzen direnek osatuko dute.

2. Eginkizunak: taldeetako kideak etorri diren edo ez eta puntual iritsi diren edo ez kontrolatzea, aretoan denak ongi funtzionatzen duela egiaztatzea, hizketaldietan kronometroarekin denbora neurtzea, eztabaidetan arauak betetzen ez badira epaimahaikideei zigorrak proposatzea eta jakinaraztea, eta talderen batek edo taldeetako kideren batek arauak betetzen ez baditu edo epaimahaikideak ohartu gabe aretoan irregulartasunen bat gertatzen bada horren berri ematea.

3. Funtzionamendu araudia: aretoko arbitroak bere kabuz hartuko ditu erabakiak, eta zigortzeko modukotzat jotzen duen jokabideaz ohartarazi eta berehala jakinaraziko die epaimahaikideei, ozenki, behar den publizitatea emateko. Berehala jakinaraztea ezinezkoa bada, eztabaida bukatu eta gero ematen ahalko die epaimahaikideei gertatukoaren berri. Bere erabakien aurka zilegi dira errekurtsoak, Lehiaketa Batzordearen aurrean.

V. TITULUA

Dokumentazio ofiziala

11. artikulua.

Epailearen akta: epaimahaikide bakoitzak taldeei ematen dizkien kalifikazioak jasoko dira dokumentu honetan. Araudi honen 1. eranskineko ereduari segitu behar dio, eta akta egiten duen epaileak sinatu behar du.

12. artikulua.

Eztabaidaren akta: epaimahaiaren azken erabakia jasoko da dokumentu honetan, bai eta taldeei aplikatu zaizkien zigorrak eta erantsi beharreko oharrak ere. Epaile nagusiak eta aretoko arbitroak sinatu behar dute. Araudi honen 2. eranskineko ereduari segitu behar dio.

13. artikulua.

Lehiaketaren akta: sailkapena jasoko da dokumentu honetan. Lehiaketa Zuzendaritzak egin behar du, eta organo horren izenpea edukiko du. Araudi honen 3. eranskineko ereduari segitu behar dio.

14. artikulua.

Lehiaketa Batzordearen akta: Lehiaketa Batzordeari aurkeztu zaizkion erreklamazioei buruz zer erabaki hartu dituen jasoko da dokumentu honetan. Batzordekideek egin eta sinatuko dute, eta erreklamazioa daukan orria erantsiko zaio. Araudi honen 4. eranskineko ereduari segitu behar dio.

15. artikulua.

Lehiaketa-koadroa: zozketa egingo da zein talde lehiatuko diren, zer egunetan, zer ordutan eta non zehazteko. Beraz, datu horiek eta sailkapen-etapei eta finalei dagozkienak jasoko dira lehiaketa-koadroan. Argitaratu egingo da, eta, beharrezkoa izanez gero, espresuki jakinaraziko da.

VI. TITULUA

Taldeak

16. artikulua.

Gutxienez hiru kide eta gehienez bost edukiko ditu talde bakoitzak. Kideetako bat kapitaina izango da. Bere taldea ordezkatuko du arbitroen eta epaimahaiaren aurrean, eta aukera izango du mintzatzeko txandetan hitz egiteko eta epaimahaiari kexak aurkezteko. Inor ezin da talde bat baino gehiagotakoa izan.

17. artikulua.

Talde bakoitzak 2 hizlari izendatuko ditu gutxienez ere, eta zozketan suertatu zaien jarreraren alde mintzatuko dira, txanda eskemaren arabera. Eztabaidak irauten duen bitartean, taldeko kideak ezingo dira komunikatu, ez hitzez ez keinuz; oharrak erabiliko dituzte horretarako. Aipatu beharra dago taldeko kideek dagokien eginkizuna alda dezaketela eztabaida batetik bestera.

VII. TITULUA

Eztabaidaren garapena

18. artikulua.

Eztabaida hasi baino minutu batzuk lehenago, zozketa egingo da lehiaketa-koadroa zehazteko. Hona hemen zer fase izango dituen lehiaketak eta nolako ordenan egingo diren:

1. Aurkezpena taldeen aretoan: eztabaidatu behar duten taldeak erabaki diren orduetan azaldu beharko dira eztabaida egiteko aretoan, eta bertaratu direla jakinaraziko diote aretoko arbitroari. Lehiaketa-koadroan argitaratuko dira norgehiagoka bakoitza hasteko orduak. Eztabaida hasteko orduan, bi taldeak aurkeztu direla eta puntual iritsi direla baieztatuko da.

2. Eztabaidaren aurkezpena: epaile nagusiak labur-labur aurkeztuko ditu gaia, epaimahaikideak eta taldeak zein taldekideak; gero, lehiaketaren zuzendariak adierazi dizkion gauzen berri emango du; eta, azkenik, taldeetako kapitainei deituko die zozketa egiteko eta, hala, eztabaidetan aldeko edo kontrako jarrera izan behar duten zehazteko.

3. Jarreren zozketa: taldeetako kapitainek jarreren zozketan hartuko dute parte. Aldeko edo kontrako jarrera ausaz esleitzen dela ziurtatuko duen sistema bat erabiliko da zozketa egiteko. Zozketaren emaitzaren arabera zehaztuko da taldeak aretoan non kokatuko diren: aldeko taldea epaimahaiaren ezkerrean eseriko da beti; kontrakoa, aldiz, eskuinean.

4. Eztabaidaren prestakuntza: zozketa egin eta gero, taldeek 4 minutu edukiko dituzte eztabaida prestatzeko.

5. Mintzaldien jakinarazpena: talde bakoitzak idatziz jakinaraziko dio aretoko arbitroari, horretarako ematen den euskarrian, taldeko zein kidek parte hartuko duten eztabaidan, mintzatzeko txandetan. Taldekideen esleipenean profil hauek zehaztu behar dira: kapitaina, hizlariak eta ikertzaileak. Zilegi izango da eginkizun guztiak aldatzea eztabaida bakoitzean; ez, ordea, eztabaidatzen ari direnean.

6. Kronometroa eztabaidak irauten duen bitartean: aretoko arbitroa kronometratzen hasiko da taldeko kapitaina edo hizlaria mintzatzen hasten diren unean, eta ez du kronometroa geldituko hark bere hitzaldia bukatu arte. Txanda bakoitzak aldez aurretik finkatuta dagoen iraupen jarraitu hau izango du:

a. Sarrera: 4 minutu.

b. Lehen gezurtatzea: 5 minutu.

c. Bigarren gezurtatzea: 5 minutu.

d. Ondorioa: 3 minutu.

7. Materialak eta zerbitzuak: taldeek beharrezkoa jotzen duten materiala erabili ahal izango dute beren jarrera defendatzeko, baldin eta lehiaketaren funtzionamendu egokiari traba egiten ez badio, eta dauden instalazioekin bateragarria bada. Hertsiki debekatuta dago komunikazio-sistema elektroniko edo telematikoak erabiltzea eztabaidan.

8. Mintzaldiak: Txanda bakoitzean taldekide batek baino ez du izango hitz egiteko aukera: kapitaina, hizlaria. Mintzaldia txanda koadro honen arabera egingo dute:

a. Sarrera. Aldeko taldea.

b. Sarrera. Aurkako taldea.

c. Lehen gezurtatzea. Aldeko taldea.

d. Lehen gezurtatzea. Aurkako taldea.

e. Bigarren gezurtatzea. Aldeko taldea.

f. Bigarren gezurtatzea. Aurkako taldea.

g. Ondorioa. Aurkako taldea.

h. Ondorioa. Aldeko taldea.

9. Interpelazioak: ezin da interpelaziorik egin ez sarreretan, ez ondorioetan, ezta gezurtatzeen lehenbiziko minutuan eta azkenekoan ere, etenik gabeko aldi babestutzat hartzen baitira. Mintzatzen ari ez diren taldeko kideek eskua altxatzeko aukera izango dute aurkako taldeko kapitainari edo hizlariari hitza eskatzeko eta galdera bat edo baieztapen bat egiteko. Gehienez ere 15 segundo izango ditu interperlazio bakoitzeko, eta denbora tarte hori txandaren iraupenari dagokio. Aldi babesturen batean norbaitek eskua altxatzen badu, zigor bat jarriko zaio automatikoki. Hizketan ari ez den taldekide batek galdera bat egiteko zain dagoenean ikusiko balu denbora azkeneko minutuan sartzen dela, eskua jaitsi beharko du azkeneko minutu babestuan, eta ez zaio zigorrik jarriko. Hizlari batek azkeneko minutu babestua hasi baino segundo batzuk lehenago erabakitzen badu hitza ematea, galdera egin nahi duenak 15 segundo izango ditu gehienez galdera egiteko, eta ez zaio zigorrik jarriko.

10. Erreklamazioak: epaimahaiak, interpelazio zuzenean, edo taldeko kapitainak, eskua altxatuz, aretoko arbitroari hitza eskatu nahi badiote, aukera izango dute parte-hartzaileei eskatzeko egiazta ditzala beren mintzatzeko txandetan eta interpelazioetan emandako datuak. Datua aipatu den txanda amaitu eta gero aurkeztuko da erreklamazio hori, edo, bestela, eztabaida bukatu eta ondorengo 10 minutuetan. Erreklamazioa egin eta gero, erantzun behar duen taldeak 10 minutu edukiko ditu datua egiazkoa dela frogatzeko epaimahaiaren aurrean.

11. Epaimahaiaren aparteko bilera, deliberatzeko: epaimahaiak aparteko bilera batean deliberatuko du, eztabaida bukatu eta gero, horretarako ezarria den denboran. Epaimahaiko kide bakoitzak bere kabuz eta besteen iritzia jakin gabe beteko du deliberazio akta. Gero, arbitroari emango dizkiote epaimahaikideek deliberazio aktak, eta arbitroak honako lan hauek egingo ditu: puntuazio guztiak batu, batezbestekoa egin epaimahaikide kopuruaren arabera, zigorrak erantsi, halakorik badago. Azkenik, lehiaketa antolatu duen talde teknikoari azken emaitza jakinaraziko dio, datuak euskarri informatikoan sar ditzan. Aktak eta emaitzen sailkapena jendaurrean jarriko dira. Kontsultatzeko moduan jartzen diren aktetan ez da agertuko zein epailek bete dituen, eta artxibatu egingo dira, behar izanez gero kontsultatzeko.

Epaimahaiko kideen botoen gehiengoa lortzen duen taldeak irabaziko du eztabaida-lehiaketa. Irabazitako eztabaida kopuruari dagokionez berdinketarik badago, lehenbiziko eta bigarren errondetako sailkapena erabakitzeko, erronda bakoitzean egindako eztabaidetan puntu gehien zein taldek lortu dituen hartuko da kontuan.

12. Emaitzen jakinarazpena: epaimahaiak deliberatu eta gero, epaimahaiaren emaitza orokorra argitaratuko da eztabaidaren aktan.

VIII. TITULUA

Zigorrak

19. artikulua. Abisuak.

1. Abisu batek 0,5 puntu kenduko dizkio taldeari eztabaida horretan izan duen batez besteko azken kalifikaziotik. Honako ekintza hauek dira abisuak jasotzeko arrazoi:

a. Mintzatzeko ezarri den denbora baino geroago bukatzea mintzaldia: 5etik gora segundo geroago.

b. Mintzatzeko ezarri den denbora baino lehenago bukatzea mintzaldia: 15 eta 30 segundo bitarte lehenago.

c. Babestutako denboran interpelazioak egitea, edo interpelazioek 16 segundo baino gehiago eta gehienez ere 25 segundo irautea.

d. Taldeko kideek beren artean hitz egitea.

2. Aretoko arbitro aritzen den pertsonari dagokio zigorraren aplikazioa zehaztea, baita zigorra eta hura eragin duen ekintza eztabaidaren aktan jasotzea ere.

20. artikulua. Hutsegite arinak.

1. Hutsegite arin batek 1,5 puntu kenduko dizkio taldeari eztabaida horretan izan duen batez besteko azken kalifikaziotik. Honako ekintza hauek dira hutsegite arinak:

a. Gehienez ere 5 minutuko atzerapenez agertzea, dela talde osoa, dela ezarritako gutxieneko taldekide kopurua.

b. Interpelazioak eginez hizlariari moztea, hitz egiteko txandan egon ez arren.

c. Interpelazioak 25 segundotik gora luzatzea, eta gehienez 45 segundo.

d. Mintzatzeko ezarri den denbora baino lehenago bukatzea: 31 segundo eta minutu bat bitarte lehenago.

2. Aretoko arbitro aritzen den pertsonari dagokio zigorraren aplikazioa zehaztea, baita zigorra eta hura eragin duen ekintza eztabaidaren aktan jasotzea ere.

21. artikulua. Hutsegite larriak.

1. Hutsegite larri batek 3 puntu kenduko dizkio taldeari eztabaida horretan izan duen batez besteko azken kalifikaziotik. Honako ekintza hauek dira hutsegite larriak:

a. 5 minututik 15 minutura bitarteko atzerapenez agertzea, dela talde osoa, dela ezarritako gutxieneko taldekide kopurua.

b. Talde baten izenean hizlari bakar batek hartzea hitza.

c. Mintzatzeko ezarri den denbora baino minutu bat lehenago bukatzea.

d. Interpelazioak 45 segundotik gora luzatzea.

e. Eztabaidan jarrera desegokia izatea aurkako taldearekin, epaimahaiarekin, ikus-entzuleekin edo antolatzaileekin. Hitz iraingarriak erabiltzea mintzaldian edo interpelazioan, edozeini zuzentzen zaizkiola ere.

2. Aretoko arbitro aritzen den pertsonari eta lehiaketaren zuzendaritzari dagokie zigorraren aplikazioa zehaztea, zigorraren aplikazioa zehaztea, baita zigorra eta hura eragin duen ekintza eztabaidaren aktan jasotzea ere.

22. artikulua. Lehiaketatik kanpo uzteko arrazoiak.

1. Parte hartzen ari den talde bat kanporatzen bada, taldea eztabaidatik behin betiko kanporatua geratuko da. Honako ekintza hauek dira taldea kanporatzeko arrazoi:

a. 15 minutu baino gehiagoko atzerapenez agertzea, dela talde osoa, dela ezarritako gutxieneko taldekide kopurua. Kasu honetan, aurkeztu den taldea izango da eztabaidaren irabazlea, aurkako taldea ez agertzeagatik.

b. Txapelketan behin eta berriz jarrera desegokiak izatea edo hitz eta keinu oldarkorrak erabiltzea, edozeini zuzentzen zaizkiola ere.

2. Aretoko arbitroari dagokio zigorra behin-behinean ezartzea eta lehiaketaren zuzendariari jakinaraztea, zigor hori berrets edo ezets dezan, zuzendariak baitauka kanporatzea betearazteko eskumena.

3. Lehiaketaren zuzendariak zigorrei buruzko erabakien berri emango die kaltetuei, bai eta haiek ordezkatzen duten taldeari ere, bere arduradunen edo ordezkarien bidez, idatziz nahiz ahoz, egokien jotzen duen moduan.

4. Ezarritako zigorrak eztabaidaren aktan jasoko dira.

IX. TITULUA

Erreklamazioak

23. artikulua.

Erreklamazioak idatziz nahiz ahoz helaraziko zaizkio erabakia hartu duen organoaren nagusi hierarkikoari, eta, beharrezkoa bada, idatzizko berrespena emango da. Lehiaketa Batzordeari zuzentzen zaizkion erreklamazioak idatziz egin beharko dira, eta araudi honen 5. eranskinean ezartzen den ereduaren arabera aurkeztuko dira.

24. artikulua.

Lehiaketaren gai orokorren bati buruzko erreklamazioak lehiaketaren zuzendariari bidaliko zaizkio, eta hark, beharrezkoa bada, Lehiaketa Batzordeko bilerarako deia egingo du.

X. TITULUA

Puntuazio sistema eta berdinketa hausteko sistema

25. artikulua.

Jarraitu beharreko puntuazio sistemak honako zerrenda honetan jaso diren itemak hartuko ditu kontuan. Item bakoitzak ponderazio jakin bat izango du, baloratzen duenak eztabaidan duen garrantziaren arabera. Hau izango da puntuazio sistema:

1. Zure ustez, nor da eztabaidaren irabazlea?: 10 puntu.

2. Sarrerarik onena: 3 puntu.

3. Lehenbiziko gezurtatzerik onena: 3 puntu.

4. Bigarren gezurtatzerik onena: 3 puntu.

5. Ondoriorik onena: 3 puntu.

6. Inprobisazioa, argumentuaren kalitatea eta ebidentzien erabilgarritasuna eta zorroztasuna: 3 puntu.

7. Ideiak modu ordenatu, argi, interesgarri eta errazean adierazteko gaitasuna: 2 puntu.

8. Talde jarrera: 2 puntu.

9. Adierazkortasuna, ikus-kontaktua eta naturaltasuna: 2 puntu.

10. Tokian, kanpo baliabideekin eta aurkakoaren aurrean moldatzeko gaitasuna: 2 puntu.

11. Hitzaldiari egokitutako hizkera, arintasuna eta ematen diren erantzunak: 2 puntu.

26. artikulua.

Epaimahaikideak emandako puntuazio orokorra kalkulatzeko, taldeak item bakoitzean ateratzen dituen puntuak batuko dira. Balioespenaren ondoren puntuaziorik altuena lortu duen taldea joko du irabazletzat epaimahaikide bakoitzak.

27. artikulua.

Jarraian adierazten den kalkulua egin eta gero puntuaziorik handiena lortzen duen taldea izango da irabazlea: lehenik, epaimahaikideek talde bakoitzari eman dizkioten puntuak batu behar dira; gero, emaitza zati epaimahaiak dituen kideen kopurua egingo da, eta, azkenik, taldeei ezarri zaizkien zigorrei dagozkien puntuak kenduko zaizkio lortzen den zenbakiari.

28. artikulua.

Talderen batek aurkaririk ez badu, dela beste taldea bertaratu ez delako, dela kanporatu dutelako, aurkeztu den taldea izango da eztabaida horren irabazlea.

29. artikulua.

Sailkapenerako, honako irizpide hauek hartuko dira kontuan, ordena honetan:

1. Eztabaida erlatibo gehien irabazi duena.

2. Puntu erlatibo gehien erdietsi duena.

3. Epaimahaikideen eskutik aldeko boto erlatibo gehien jaso duena.

4. Puntu gutxien galdu duena (abisuak + arinak + larriak).

5. Bi talderen arteko aurrez aurreko eztabaida irabazi duena.

6. Lehiaketa Batzordearen erabaki arrazoitua.

III. ERANSKINA

Epailearen akta.

IV. ERANSKINA

Eztabaidaren akta.