1. NAFARROAKO FORU KOMUNITATEA
1.1. XEDAPEN OROKORRAK
1.1.2. Foru Dekretuak
78/2019 FORU DEKRETUA, uztailaren 3koa, Nafarroako Foru Komunitateko Administrazioaren eta haren erakunde autonomoen plantilla organikoa aldatzen duena.
Ogasuneko eta Finantza Politikako Departamentuak proposatu du departamentu horri atxikitako zazpi lanposturi euskaraz jakin beharra esleitzea, azaroaren 15eko 103/2017 Foru Dekretuaren 6. artikuluan ezarritakoa oinarri hartuta. Foru dekretu horren bidez arautu zen euskararen erabilera Nafarroako Administrazio Publikoetan, haien erakunde publikoetan eta menpeko dituzten zuzenbide publikoko entitateetan.
Ogasuneko eta Finantza Politikako kontseilariaren otsailaren 21eko 21/2019 Foru Aginduaren bidez, Ogasuneko eta Finantza Politikako Departamentuaren 2019-2021eko Hizkuntza Plana onetsi zen.
Lehendakaritzako, Funtzio Publikoko, Barneko eta Justiziako kontseilariaren maiatzaren 23ko 69/2019 Foru Aginduaren bidez, publizitatea eman zitzaion norberaren lanpostuaren hizkuntza-eskakizuna aldatzeak (euskaraz nahitaez jakin beharra eskatzeagatik) ukitzen ahal dituen langileei dagokienez jarraitu beharreko prozedurari, Euskararen erabilera Nafarroako Administrazio Publikoetan, haien erakunde publikoetan eta menpeko dituzten zuzenbide publikoko entitateetan arautzen duen azaroaren 15eko 103/2017 Foru Dekretuan ezarritakoari jarraikiz.
Euskarabidea-Euskararen Nafar Institutuak jakinarazi du zer lanposturi esleitu behar zaien euskaraz jakin beharra Ogasuneko eta Finantza Politikako Departamentuan, herritarrei arreta elebiduna emateko plan horretan zehazten diren lehentasunezko unitateak oinarri hartuta. Halaber, departamentu horri atxikirik egonda, identifikatzen diren lanpostuei euskaraz jakin beharra ezarri zaiela jakinarazi du, bai eta horietako bakoitzean eskatuko den euskara maila ere.
Era berean, Ogasuneko eta Finantza Politikako Departamentuak hizkuntza-eskakizuna esleitzen zaien lanpostuak hautatzeko irizpideak aplikatzeko moduaren berri eman du, Lehendakaritzako, Funtzio Publikoko, Barneko eta Justiziako kontseilariaren maiatzaren 23ko 69/2019 Foru Aginduari jarraikiz.
Ogasuneko eta Finantza Politikako Departamentuko lanpostu elebidun horiek zehazteko, negoziazioa egon da Nafarroako Foru Komunitateko Administrazioaren eta haren erakunde autonomoen zerbitzuko langile funtzionarioen eta estatutupekoen negoziazio mahaian, 103/2017 Foru Dekretuaren zazpigarren xedapen gehigarrian xedatutakoarekin bat.
Horrenbestez, Lehendakaritzako, Funtzio Publikoko, Barneko eta Justiziako kontseilariak proposaturik, eta Nafarroako Gobernuak 2019ko uztailaren 3ko bilkuran hartutako Erabakiarekin bat,
DEKRETATZEN DUT:
Artikulu bakarra.–Nafarroako Foru Komunitateko Administrazioko Ogasuneko eta Finantza Politikako Departamentuan dauden lanpostu elebidunak eta haiei dagokien euskarazko jakite-maila zehaztea.
1. Nafarroako Foru Komunitateko eta haren erakunde autonomoetako plantilla organikoa aldatzen da, honako lanpostu hauek elebidun bihurtuz:
OGASUNEKO ETA FINANTZA POLITIKAKO DEPARTAMENTUA
Idazkaritza Tekniko Nagusia
–Administrarien lanpostu bat elebidun bihurtzen da, euskarazko C1 jakite-maila duela. Plantilla organikoan 6931 zenbakia du.
–Zerbitzu orokorretako langileen bi lanpostu elebidun bihurtzen dira, euskarazko B1 jakite-maila dutela. Plantilla organikoan 90 eta 1320 zenbakiak dituzte.
Nafarroako Estatistika Institutua
–Administrari laguntzaileen lanpostu bat elebidun bihurtzen da, euskarazko C1 jakite-maila duela. Plantilla organikoan 7466 zenbakia du.
Nafarroako Zerga Ogasuna
–Ogasuneko kudeatzaile eta ikertzaile laguntzaileen lanpostu bat elebidun bihurtzen da, euskarazko C1 jakite-maila duela. Plantilla organikoan 1097 zenbakia du, eta Doneztebeko Laguntza Teknikoaren Unitate Administratiboari atxikita dago.
–Administrarien lanpostu bat elebidun bihurtzen da, euskarazko C1 jakite-maila duela. Plantilla organikoan 4300 zenbakia du.
–Administrari laguntzaileen lanpostu bat elebidun bihurtzen da, euskarazko C1 jakite-maila duela. Plantilla organikoan 4259 zenbakia du.
2. Nafarroako Foru Komunitateko Administrazioaren plantilla organikoko lanpostuei elebitasuna esleitzeak Lehendakaritzako, Funtzio Publikoko, Barneko eta Justiziako kontseilariaren maiatzaren 23ko 69/2019 Foru Aginduan aurreikusten diren ondorioak izanen ditu. Foru agindu horren bidez, publizitatea ematen zitzaion norberaren lanpostuaren hizkuntza-eskakizuna aldatzeak (euskaraz nahitaez jakin beharra eskatzeagatik) ukitzen ahal dituen langileei dagokienez jarraitu beharreko prozedurari, Euskararen erabilera Nafarroako Administrazio Publikoetan, beren erakunde publikoetan eta menpeko dituzten zuzenbide publikoko entitateetan arautzen duen azaroaren 15eko 103/2017 Foru Dekretuan ezarritakoari jarraikiz.
3. Foru dekretu honetan aldatzen diren lanpostuei hizkuntza-eskakizuna esleitzeak ez die eraginen lanpostuetan sartzeko hautapen prozeduren deialdiei, baldin eta foru dekretu honek indarra hartzen duenerako deituak badaude.
AZKEN XEDAPENAK
Azken xedapenetako lehena.–Foru dekretu hau garatu eta betearazteko gaikuntza.
Ahalmena ematen zaio Lehendakaritzako, Funtzio Publikoko, Barneko eta Justiziako kontseilariari foru dekretu hau garatu eta betearazteko behar diren xedapenak eman ditzan.
Azken xedapenetako bigarrena.–Indarra hartzea.
Foru dekretu honek Nafarroako Aldizkari Ofizialean argitaratu eta biharamunean hartuko du indarra.
Iruñean, 2019ko uztailaren 3an.–Nafarroako Gobernuko lehendakaria, Uxue Barkos Berruezo.–Lehendakaritzako, Funtzio Publikoko, Barneko eta Justiziako kontseilaria, María José Beaumont Aristu.
Iragarkiaren kodea: F1909222
