Iragarkia

143. ALDIZKARIA - 2019ko uztailaren 24a

1. NAFARROAKO FORU KOMUNITATEA

1.4. DIRU-LAGUNTZAK, LAGUNTZAK ETA BEKAK

49/2019 FORU AGINDUA, uztailaren 5ekoa, Kultura, Kirol eta Gazteriako kontseilariak emana, ondare historikoaren kudeaketan aritzeko prestakuntza beka baten deialdia egiten duena Vianako Printzea Erakundea-Kultura Zuzendaritza Nagusiaren Erregistroaren, Ondasun Higigarrien eta Arkeologiaren Atalean jarduteko. DDBN identifikazioa: 465064.

Erregistroaren, Ondasun Higigarrien eta Arkeologiaren Atalak interesa du ondare historikoaren kudeaketan aritzeko prestakuntza beka baten deialdia egiteko.

Beka honen deialdi eta kontzesioarekin, Erregistroaren, Ondasun Higigarrien eta Arkeologiaren Atalak unibertsitateko tituludunen prestakuntza sustatu nahi du, halako moduz non zuzeneko ezagutza hobea eskuratuko duten, bai teorikoa bai praktikoa, jakiteko nola kudeatzen den Nafarroako ondare kulturala Nafarroako Foru Komunitateko Administrazioan, Vianako Printzea Erakundea-Kultura Zuzendaritza Nagusiaren bidez.

Bekaren deialdiari eta kontzesioari buruz oinarri arautzaileetan aurreikusita ez dagoen orotan, arau hauetan xedatutakoari jarraituko zaio: Nafarroako Foru Komunitateko Administrazioan eta haren erakunde autonomoetan prestakuntzarako bekak emateko araubide orokorra ezartzen duen apirilaren 19ko 172/2004 Foru Dekretua eta Dirulaguntzei buruzko azaroaren 9ko 11/2005 Foru Legea.

Horrenbestez, Kultura, Kirol eta Gazteria Departamentuaren egitura organikoa ezartzen duen irailaren 9ko 199/2015 Foru Dekretuaren bidez esleitu dizkidaten eskumenak erabiliz,

AGINTZEN DUT:

1. Ondare historikoaren kudeaketan aritzeko prestakuntza beka baten deialdia onestea, Vianako Printzea Erakundea-Kultura Zuzendaritza Nagusiaren Erregistroaren, Ondasun Higigarrien eta Arkeologiaren Atalean jarduteko.

2. Beka emateko oinarri arautzaileak onestea. Ebazpen honen eranskinean ageri dira.

3. Guztira, 5.492,05 euroko gastua baimentzea, guztira, honelaxe banaturik:

–5.443,64 euro 2019rako Nafarroako Aurrekontu Orokorretako “Bekak” izeneko A20001 A2100 4800 337100 partidaren kargura egotziko dira.

–48,41 euro 2020rako Nafarroako Aurrekontu Orokorretan horretarako gaitzen den partidaren kargura. Gizarte Segurantzaren 2019ko abenduko enpresa kuotarako da, zeina 2020ko urtarrilean ordaindu behar baita.

4. Foru agindu hau Nafarroako Aldizkari Ofizialean argitaratzea, behar diren ondorioak izan ditzan.

5. Foru agindu honen aurka, gora jotzeko errekurtsoa aurkezten ahalko da, Nafarroako Gobernuari zuzendua, hilabeteko epean, argitaratu eta biharamunetik hasita.

6. Foru agindu hau igortzea Vianako Printzea Erakundea-Kultura Zuzendaritza Nagusira, Baliabideen eta Garapen Estrategikoaren Atalera eta Idazkaritza Tekniko Nagusira, behar diren ondorioak izan ditzan.

Iruñean, 2019ko uztailaren 5ean.–Kultura, Kirol eta Gazteriako kontseilaria, Ana Herrera Isasi.

UNIBERTSITATEKO TITULUDUNENTZAKO PRESTAKUNTZA BEKA BATEN DEIALDIAREN OINARRIAK, VIANAKO PRINTZEA ERAKUNDEA-KULTURA ZUZENDARITZA NAGUSIAREN ONDARE HISTORIKOAREN ZERBITZUAN ARITZEKO

1.–Xedea.

1.1. Deialdi honen xedea da oinarriak ezartzea prestakuntza beka bat norgehiagokako araubidean emateko, unibertsitate tituludunentzat (Artearen Historia, Historia eta Ondarea edo horien edozein espezialitate edo adar, agintaritza eskudunak onartzen dituenak), Ondare Historikoaren Zerbitzuko Erregistroaren, Ondasun Higigarrien eta Arkeologiaren Atalean aritzeko, Vianako Printzea Erakundea-Kultura Zuzendaritza Nagusiari atxikia baitago.

Bekaren helburua da unibertsitate tituludunen prestakuntza bultzatzea, halako moduz non zuzeneko ezagutza hobea eskuratuko duten, jakiteko nola kudeatzen den Nafarroako Foru Komunitateko ondare historikoa Nafarroako Foru Komunitateko Administrazioan, Vianako Printzea Erakundea-Kultura Zuzendaritza Nagusiaren bidez.

2.–Aurrekontuko diru erabilgarria.

Bekaren gastu osoa, hau da, 5.492,05 euro; honako aurrekontu-kredituei aplikatuko zaie:

–5.443,64 euro 2019rako Nafarroako Aurrekontu Orokorretako “Bekak” izeneko A20001 A2100 4800 337100 partidaren kargura egotziko dira.

–48,41 euro 2020rako Nafarroako Aurrekontu Orokorretan horretarako gaitzen den partidaren kargura. Gizarte Segurantzaren 2019ko abenduko enpresa kuotarako da, zeina 2020ko urtarrilean ordaindu behar baita.

3.–Iraupena.

Bekaldia esleipenaren ebazpenean adieraziko den egunean hasiko da (2019ko abuztuaren 1a baino lehenago ez, betiere), eta 2019ko abenduaren 31n bukatuko. Bekaldi hori ezin da luzatu.

4.–Bekaren zenbatekoa eta ordainketa.

Bekak 1.050 euroko zenbateko gordina izanen du hilean, edo dagokion zati proportzionala, hala behar bada. Bekadunari dagokion Gizarte Segurantzaren kuota deskontatuko da. Diru kopuru horri pertsona fisikoen errentaren gaineko zergari dagokion atxikipena eginen zaio, indarra duten arauei jarraikiz hala egin behar baldin bada.

Beka hilero ordainduko da, hila bukaturik.

Bekaren onuradunari ordaintzen zaion dirua ez da inolaz ere soldata edo lansaritzat hartuko, laguntza ekonomiko publikotzat baizik.

5.–Bateraezintasunak.

Prestakuntza beka hau ez da bateragarria izanen Nafarroako Foru Komunitateko Administrazioak, beste administrazio batzuek edo beste entitate publiko edo pribatuek edo partikularrek ematen dituzten beste batzuekin.

6.–Eskatzaileak.

Beka hartzen ahalko dute, bakar-bakarrik, jarraian azaltzen diren betebehar guztiak betetzen dituzten pertsona fisikoek:

a) 1. oinarrian azaldu den unibertsitateko titulu ofiziala izatea, Espainiako agintariek emana edo homologatua, eta deialdi hau argitaratu aurre-aurreko hiru urtean lortu izana.

b) Espainiarra izatea edo Europar Batasuneko estaturen batekoa, edo, Europako Erkidegoak sinatu eta Espainiako Estatuak berretsitako nazioarteko tratatuen arabera, langileen joan-etorri askea aplikatzen duen estaturen batekoa. Nolanahi ere, Espainiako nazionalitatea ez duenak gaztelaniaz behar adina badakiela frogatu beharko du.

c) Bizitokia Nafarroan izatea, deialdiaren eguna baino urte bat lehenagotik gutxienez.

d) Adinez nagusia izatea.

e) Jarduteko gaitasun osoa izatea eta Nafarroako Foru Komunitateko Administrazioaren eta haren erakunde autonomoen laguntza eta dirulaguntza publikoak jasotzeko ezgaitua ez egotea, Dirulaguntzei buruzko azaroaren 9ko 11/2005 Foru Aginduaren 13.2 artikuluarekin bat.

f) Bekaren xedeko prestakuntzan aritzea galaraz diezaiokeen ezintasun fisikorik edo gaixotasunik ez izatea.

7.–Eskaerak.

7.1. Eskaerak oinarri hauetako 1. eranskinean ageri den ereduaren araberakoak izanen dira, eta Kultura, Kirol eta Gazteria Departamentuaren Erregistroan aurkeztuko dira (Iruñeko Navarrería kaleko 39an, 31001), edo Administrazio Publikoen Administrazio Prozedura Erkideari buruzko urriaren 1eko 39/2015 Legearen 16. artikuluan aipatzen diren tokietako edozeinetan eta Erregistro Orokor Elektronikoan.

Eskaerak telematika bidez aurkezten ahalko dira, Nafarroako Gobernuak Interneten duen Atariko zerbitzuen katalogoko berariazko fitxaren bidez (http://www.navarra.es/home_eu/Servicios/). Fitxa horretan, Nafarroako Foru Komunitateko Administrazioaren Erregistro Orokor Elektronikoan sartzeko esteka bat izanen da. Identifikatzeko, ziurtagiri digitala eduki behar da.

Kultura, Kirol eta Gazteria Departamentuko Vianako Printzea Erakundea-Kultura Zuzendaritza Nagusiko Ondasun Historikoaren Zerbitzuari zuzendu behar zaio eskaera, honako hau adierazita: “Unibertsitate tituludunentzako prestakuntza beka baterako deialdia, Vianako Printzea Erakundea-Kultura Zuzendaritza Nagusiko Ondare Historikoaren Zerbitzuan aritzeko”.

7.2. Eskaerak aurkezteko epea hamar egun naturalekoa izanen da, deialdia Nafarroako Aldizkari Ofizialean argitaratu eta biharamunetik hasita.

7.3. Honako agiri hauek aurkeztuko dira eskabide orokorrarekin batera:

a) Eskabide-orria (deialdiaren 1. eranskinaren arabera).

b) Ikasketa espedientearen ziurtagiria, ikasmaila bakoitzeko irakasgai guztien kalifikazioekin, batez besteko nota barne, zein deialditan gainditu zituen espresuki aipatuta.

c) Eskatzailearen curriculum vitae-a, non jasoko baitira, zehatz-mehatz, merezimendu hauek, eta dagozkien ziurtagiriak:

• a.–Ondarea katalogatzeko edo ondarea kudeatzeko lanetan parte hartu izana.
• b.–Ondarea katalogatzeko edo ondarea kudeatzeko prestakuntza ikastaroetara eta/edo kongresu-bileretara joan izana.
• c.–Ondare katalogazioarekin eta ondare kudeaketarekin lotutako argitalpenak, egile edo egilekide gisa.
• d.–Prestakuntza masterra Historiaren Artean, Ondarean, Ondare Kudeaketan eta Ondare Katalogazioan edo antzekoa, ofizialki aitortutako erakundeek emana.
• e.–Beste titulu ofizial batzuk: beka eskuratzeko eskatzen denaz eta horretarako aurkeztu denaz bestelako gradu, diploma edo lizentziaturak.
• f.–Hizkuntzak jakiteari buruzko frogagiriak, 9.g) oinarrian aipatuak.

d) Lehenbiziko oinarrian aipatzen den titulu ofizialaren fotokopia.

e) Nortasun agiri nazionalaren edo pasaportearen fotokopia.

f) Eskatzailearen erantzukizunpeko adierazpena, Dirulaguntzei buruzko azaroaren 9ko 11/2005 Foru Legearen 13.2 artikuluari jarraikiz, adierazten duena ez dagoela onuradun izatea galarazten dioten egoeretako bakar batean ere (deialdi honen 2. eranskina).

7.4. Organo eskudunak epearen barrenean aurkezten diren eskaerak aztertuko ditu. Eskaeraren batek deialdi honetan eskatutako baldintzak betetzen ez baditu, organo eskudunak interesdunari eskatuko dio bost egun balioduneko epean zuzendu dezala, eta adieraziko dio ezen, zuzendu ezean, eskaerari uko egiten diola ondorioztatuko dela eta espedientea artxibatzeko ebazpena emanen dela; ebazpen hori jakinaraziko zaio.

Eskatzaileek beka jasotzeko baldintza guztiak betetzen dituzten ala ez adieraziko duen txostena prestatuko du Erregistroaren, Ondasun Higigarrien eta Arkeologiaren Atalak. 6. oinarrian ezarritako baldintzak betetzen ez dituzten eskaerak ez dira baloratuko.

8.–Ebaluazio Batzordearen osaera eta beka emateko prozedura.

8.1. Ebaluazio Batzordea arduratuko da betebeharrak egiaztatzeaz, bekak eskatzen dituztenek alegatutako merezimenduak ebaluatzeaz eta ebazpen proposamena prestatzeaz, non izangai onartu bakoitzari guztira emandako puntuak adieraziko baitira.

Ebaluazio Batzordeko kideak hauek izanen dira.

Batzordeburua: Carlos Martínez Álava jauna. Ondare Historikoaren Zerbitzuko zuzendaria.

Ordezkoa: Alicia Ancho Villanueva andrea. Erregistroaren, Ondasun Higigarrien eta Arkeologiaren Ataleko burua.

Batzordekidea: Berta Balduz Azcárate andrea. Erregistroaren, Ondasun Higigarrien eta Arkeologiaren Ataleko goi mailako teknikari zaharberritzailea.

Ordezkoa: Jesús Sesma Sesma jauna. Erregistroaren, Ondasun Higigarrien eta Arkeologiaren Ataleko teknikari arkeologoa.

Idazkaria: Ana Elena Redín Armañanzas andrea. Erregistroaren, Ondasun Higigarrien eta Arkeologiaren Ataleko goi mailako teknikaria.

Ordezkoa: Jesús García Gazólaz jauna. Erregistroaren, Ondasun Higigarrien eta Arkeologiaren Ataleko teknikari arkeologoa.

8.2. Ebaluazio batzordea instrukzio organoa da, eta ofizioz ebaluatuko ditu eskaerak, deialdi honetan ezarritako irizpideen arabera.

8.3. Ebaluazio batzordeak aurkezten diren eskaerak aztertu eta baloratuko ditu; gero, beka emateko proposamena eginen du, lortutako puntuazioaren araberako ordenari jarraikiz.

9.–Balorazio baremoa.

a) Ikasketa-espedientea. Gehienez ere: 4 puntu.

Ikasketa-espedientearen batez besteko nota baloratuko da, azaroaren 27ko 1497/87 Errege Dekretuaren arabera (errege dekretu hori abuztuaren 1eko 1044/2003 Errege Dekretuaren bidez aldatu zen), eta puntuazio hau emanen da:

Nahiko: puntu bat.

Oso ongi: 2 puntu.

Bikain: 3 puntu.

Ohorezko matrikula: 4 puntu.

b) Ondarea katalogatzeko edo ondarea kudeatzeko lanetan parte hartu izana. Gutxienez 14 egun iraun dutenak bakarrik hartuko dira kontuan; jarduketa bakoitzeko 0,2 puntu emanen dira. Puntu 1 arte.

c) Ondarea katalogatzeko edo ondarea kudeatzeko prestakuntza ikastaroetara eta/edo kongresu-bileretara joan izana. Ordu bakoitza 0,02 punturekin baloratuko da. Puntu 1 arte.

d) Ondare katalogazioarekin eta ondare kudeaketarekin lotutako argitalpenak, egile edo egilekide gisa. Argitalpen bakoitza 0,05 punturekin baloratuko da. Puntu 1 arte.

e) Prestakuntza masterra Historiaren Artean, Ondarean, Ondare Kudeaketan eta Ondare Katalogazioan edo antzekoa, ofizialki aitortutako erakundeek emana. Master bakoitza 0,5 punturekin baloratuko da. Puntu 1 arte.

f) Beste titulu akademiko batzuk. 0,5 puntu emanen dira prestakuntza beka eskuratzeko eskatzen denaz eta horretarako aurkeztu denaz bestelako gradu, diploma edo lizentziatura bakoitzeko. Puntu 1 arte.

g) Hizkuntzak jakitea: euskara, ingelesa, frantsesa, alemana eta italiera.

Hizkuntza eskola ofizial batek emandako gaitasun agiria edo C1 titulua edo ofizialki baliokidea den titulua edukiz gero, 0,50 puntu emanen dira hizkuntza bakoitzarengatik. B2 tituluak edo ofizialki horien baliokideak diren tituluak 0,25 punturekin baloratuko dira. Puntu 1 arte.

10.–Beka ematea.

10.1. Vianako Printzea Erakundea-Kulturako Zuzendaritza Nagusiaren ebazpenaren bidez emanen da beka, instrukzio organoaren proposamena ikusita. Ebazpen hori eta hautagaien zerrenda, merezimenduen baremazioan lortutako puntuazioaren arabera ordenatua, Kultura, Kirol eta Gazteria Departamentuaren iragarki-taulan jarriko dira jendaurrean (Navarrería kalea 39, behea, Iruña).

Ebazpena interesdunari jakinaraziko zaio apirilaren 19ko 172/2004 Foru Dekretuaren 11. artikuluan ezarritako moduan. Foru dekretu horren bidez ezarri zen Nafarroako Foru Komunitateko Administrazioan eta haren erakunde autonomoetan prestakuntzarako bekak emateko araubide orokorra.

Eskaerak aurkezteko epea bukatu eta hiru hilabeteko epean berariazko ebazpenik jakinarazten edo argitaratzen ez bada, ukatu egin direla ulertuko da.

10.2. Hautapen prozesua bukatu ondoren, beka jasotzeko hautatzen den pertsonak prestakuntza beka eskatzerakoan alegatu zituen merezimendu guztien jatorrizko egiaztagiriak edo haien kopia konpultsatuak aurkeztu beharko ditu. Dokumentazioa aurkezteko epea 5 egun naturalekoa izanen da, jakinarazi eta biharamunetik hasita. Behar diren frogagiriak aurkezten ez badira, puntuazio-ordenan hurrengoa den eskatzaileari esleituko zaio beka, eta horrela hurrengoekin ere.

11.–Prestakuntza jardueraren hasiera eta ukoak.

Onuradunak beka emateko ebazpenean adierazten den egunean hasi beharko du lanean. Horrela egiten ez badu, bekari behin betiko uko egiten diola ulertuko da, non eta organo eskudunak ezinbesteko arrazoiak edo behar bezala justifikatutako beste edozein gorabehera ikusten ez dituen.

Bekari uko eginez gero, Vianako Printzea Erakundea-Kultura Zuzendaritza Nagusiari horren berri eman beharko zaio, gutxienez 15 egun natural lehenago.

Emandako bekari edozein arrazoirengatik uko eginez gero, zilegi izanen da beka instrukzio organoak ezarritako zerrendan hurrengoa denari ematea. Hori dena, deusetan galarazi gabe onuradunak uko egin arte zituen betebeharrak.

12.–Onuradunaren betebeharrak.

Bekaren onuradunak apirilaren 19ko 172/2004 Foru Dekretuaren 19. artikuluan adierazitako betebehar orokorrak bete beharko ditu, foru dekretu horren bidez ezarri baitzen Nafarroako Foru Komunitateko Administrazioan eta haren erakunde autonomoetan prestakuntza bekak emateko araubide orokorra.

Besteak beste, betebehar hauek izanen ditu:

a) Bekaren xedeko prestakuntza jarduera betetzea.

b) Organo emaileari frogatzea betebeharrak eta baldintzak betetzen dituela eta, orobat, beka jasotzeko arrazoi izan diren jarduerak egin dituela eta helburuak bete direla.

c) Eskumena duten organoek eman den bekaren gainean egin ditzaketen egiaztapen lan guztiak onartzea.

d) Xede berarekin eskatu edo jaso dituen bestelako beka edo dirulaguntzen berri ematea beka eman duen organoari.

e) Nafarroako Ogasun Publikoarekiko zerga arloko betebeharrak egunean dituela egiaztatzea. Dena dela, eskabide-orrian hala adieraziz, baimena ematen ahalko dio Vianako Printzea Erakundea-Kultura Zuzendaritza Nagusiari jarduerak hasten direnean bere zerga betebeharrak egunean dituela egiaztatzeko behar diren datuak kontsulta ditzan. Horrekin batera, zinpeko aitorpen edo hitzemate idazki bat aurkeztu beharko du, adierazteko ez duela kobratzen Nafarroako Foru Komunitateko Administrazioaren beste departamentu batetik edo beste administrazio edo entitate publiko edo pribatu batetik helburu bera duen beste edozein laguntza publiko bateraezin.

f) Bere gain hartzea Gizarte Segurantzaren araubidean sartzeagatik dagozkion betebeharrak.

g) Organo eskudunari jakinaraztea emandako bekari espresuki uko egiten zaiola, jarduerak utzi baino 15 egun natural lehenago gutxienez.

h) Bekaren zuzeneko ondorio diren jarduera eta argitalpen guztietan bekadun gisa aritu dela adieraztea.

i) Prestakuntza jarduera gauzatu bitartean ezagutzen duen isilpeko informazio tekniko edo administratiboaren gainean sekretua eta konfidentzialtasuna gordetzea.

j) Zein organotan jarduten duen, bertako barne edo funtzionamendu araudia betetzea.

13.–Tutoretzak.

13.1. Erregistroaren, Ondasun Higigarrien eta Arkeologiaren Ataleko teknikari batek zuzendu eta ikuskatuko ditu bekaren onuradunak egin beharreko jarduerak.

13.2. Tutoreak aginduko dio bekadunari zein diren hark egin beharreko prestakuntza lanak, eta begiratuko du bekadunak eginbehar orokor eta berariazkoak betetzen dituela.

14.–Prestakuntza jarduera egitea.

Bekadunaren jarduerak Ondare Historikoaren Zerbitzuko instalazioetan eginen dira, astean 30 orduz, oro har 09:00etatik 15:00etara bitarte, astelehenetik ostiralera. Halaber, prestakuntzarako behar diren joan-etorriak egin beharko ditu bekadunak.

Bekaldiaren hilabete bakoitzeko 2,5 egun naturaleko atsedenaldia emanen zaio onuradunari.

15.–Jabetza intelektuala.

Bekadunak jabetza intelektualaren gainean dituen eskubideak, bekaldian egindako jardueraren ondorioz eskuratzen dituenak, eskubide horiek erregulatzen dituzten arauetan ezarritakoari jarraikiz arautuko dira. Horri dagokionez, Administrazio Publikoak ez dio uko egiten agirien, azterlanen, ikerlanen, lanen, eskubideen, emaitza zientifikoen eta izan litezkeen asmakuntzen gainean legokiokeen jabetzari.

16.–Lan edo administrazio harremanik eza.

16.1. Bekak erabiltzea eta bekaduna izatea ez da zerbitzuak ematea, eta egoera horrek ez dakar berekin lan harremanik, administratiborik edo estatutupekorik sortzea Nafarroako Foru Komunitateko Administrazioarekin edo haren erakunde autonomoekin, ez eta antzeko eskubiderik lortzea ere. Administrazioak ez du konpromisorik hartuko beka bukatutakoan bekaduna bere plantillan sartzeko.

16.2. Prestakuntzako bekadunari agintzen zaizkion lan edo jarduerak kasuan kasuko departamentuko funtzionario edo kontratudunek gainbegiratuko dituzte eta haiek izanen dira lan horien erantzuleak. Bekadunak ezin izanen ditu funtzionario publikoen eginkizunak bete edo berarentzat hartu, ez eta hirugarrenen aurrean administrazio publikoaren kide, ordezkari edo agente gisa agertu ere.

16.3. Bekaren onuradunak besteren konturako langileen parekoa izanen da Gizarte Segurantzako Araubide Orokorrean sartzearen ondorioetarako, urriaren 24ko 1493/2011 Errege Dekretuan ezarri bezala; dekretu horrek prestakuntza programetan parte hartzen dutenak Gizarte Segurantzako Araubide Orokorrean nola eta zein baldintzatan sartzen diren arautzen du, Gizarte Segurantzaren sistema eguneratu, egokitu eta modernizatzeari buruzko abuztuaren 1eko 27/2011 Legearen hirugarren xedapen gehigarrian aurreikusitakoa garatuz.

Gizarte Segurantzako Araubide Orokorrean sartzeko, bertan kidetzeko eta/edo alta hartzeko, eta araubide horretatik ateratzeko ere, kontuan hartuko da onuraduna noiz hasten den beka programan eta noiz uzten duen, enpresak Gizarte Segurantzan inskribatzeko eta langileak kidetzeko, alta eta bajak hartzeko eta haien datuak aldatzeko Erregelamendu Orokorrean ezarritako modu, epe eta ondorioekin. Urtarrilaren 26ko 84/1996 Errege Dekretuaren bidez onetsi zen erregelamendu hori.

17.–Kalte-ordainak jasotzeko eskubidea.

Bekadunak, prestakuntza egiten ari deneko Administrazio Publikoarekin duen harreman juridikoa ezertan aldatu gabe, eskubidea izanen du zerbitzuagatik eta bidaiengatik izaten dituen gastuengatik funtzionarioei dagozkien ordain berberak jasotzeko.

18.–Baldintzak ez betetzea.

Bekadunak bere gain hartutako betebehar eta eginkizunak betetzen ez baditu, haiek egitean ardurarik jartzen ez badu, errendimendu eta aprobetxamendu eskasa badu edo lanak kalitate gabekoak badira, beka aldi baterako edo betiko kentzea erabakiko du organo eskudunak, dagokion administrazio unitateak proposaturik eta interesdunari entzunaldia eman ondoren; horrekin batera zuzkidura ekonomikoaren zati proportzionala ere galduko du, Dirulaguntzei buruzko azaroaren 9ko 11/2005 Foru Legearen 35. artikuluaren arabera eska daitezkeen diru-itzulketak, berandutze-interesak eta ezar litezkeen zehapenak galarazi gabe.

19.–Errekurtsoak.

Deialdi honen eta bere oinarrien kontra gora jotzeko errekurtsoa jar daiteke, Nafarroako Gobernuari zuzendua, hilabeteko epean, Nafarroako Aldizkari Ofizialean argitaratu eta biharamunetik hasita, Administrazio Publikoen Administrazio Prozedura Erkideari buruzko urriaren 1eko 39/2015 Legearen 121. eta 122. artikuluei jarraikiz.

Deialdi honen aplikazio egintzen kontra zilegi da gora jotzeko errekurtsoa jartzea, Kultura, Kirol eta Gazteriako kontseilariari zuzendua, hilabeteko epean, jakinarazi eta biharamunetik hasita, Administrazio Publikoen Administrazio Prozedura Erkideari buruzko urriaren 1eko 39/2015 Legean eta Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legean xedatutakoarekin bat.

20.–Aplikatu beharreko legeria.

Oinarri hauetan ezarrita ez dagoen orotan, Nafarroako Foru Komunitateko Administrazioan eta haren erakunde autonomoetan prestakuntzarako bekak emateko araubide orokorra ezartzen duen apirilaren 19ko 172/2004 Foru Dekretuan eta Dirulaguntzei buruzko azaroaren 9ko 11/2005 Foru Legean xedatutakoari jarraituko zaio.

1. ERANSKINA

Eskaera (PDFa).

2. ERANSKINA

Erantzukizunpeko adierazpena (PDFa).

Iragarkiaren kodea: F1909342