131. ALDIZKARIA - 2019ko uztailaren 8a

1. NAFARROAKO FORU KOMUNITATEA

1.7. BESTELAKOAK

296E/2019 EBAZPENA, maiatzaren 27koa, Ingurumeneko eta Lurralde Antolamenduko zuzendari nagusiarena, Iruñerriko hiri-aglomerazioko zaratari buruzko mapa estrategikoko lurralde eremuak barnean hartzen dituen eremu akustikoetako mugaketa eta hiri-garapen berrietan aplikatzekoak diren mugaketa akustikoak eguneratzen dituena. Aipatutako mapa estrategikoa Inguruneko zarataren ebaluazioari eta kudeaketari buruzko 2002ko ekainaren 25eko 2002/49/EE Zuzentarauaren hirugarren fasearen aplikazioari dagokio.

Zaratari buruzko azaroaren 17ko 37/2003 Legearen 4. artikuluak ezartzen duenez, autonomia erkidegoko administrazioak du, besteak beste, zaratari buruzko mapak egiteko, zaratari buruzko mapa batek barnean hartzen dituen eremu akustikoak mugatzeko eta mapa bakoitzari dagokion hots kutsaduraren inguruko ekintza plana egiteko eskumena, lurralde eremu horrek udal mugapetik kanpo dagoen azalera hartzen badu.

Horrela, Ingurumeneko eta Lurralde Antolamenduko zuzendari nagusiak ekainaren 29an emandako 533E/2018 Ebazpenaren bidez, Iruñerriko hiri-aglomerazioko zaratari buruzko mapa estrategikoa onetsi da, Inguruneko zarataren ebaluazioari eta kudeaketari buruzko 2002ko ekainaren 25eko 2002/49/EE Zuzentarauaren hirugarren fasearen aplikazioari dagokiona.

Lehendik, Ingurumenaren eta Uraren zuzendari nagusiak irailaren 3an emandako 1328/2010 Ebazpenaren bidez, Iruñerriko hiri-aglomerazioko zaratari buruzko mapa estrategikoko lurralde eremuak barnean hartzen dituen eremu akustikoetako hasierako mugaketa eta hiri-garapen berrietan aplikatzekoak diren mugaketa akustikoak onetsi ziren.

Zarataren aurkako ekintza plana lantzeari ekin aurretik, beharrezkoa da Iruñerriko hiri-aglomerazioko zaratari buruzko mapa estrategikoko lurralde eremuak barnean hartzen dituen eremu akustikoetako mugaketa eguneratzea.

Hori dela eta, Landa Garapeneko, Ingurumeneko eta Toki Administrazioko Departamentuak, beren udal mugapea zaratari buruzko mapen lurralde eremuaren barnean duten (osorik edo zati bat) udalekin elkarlanean, aipatutako zonakatze akustikoa eguneratzeko beharrezko lanak burutu ditu.

Lurraldeko azalera ezberdinetako zonakatze akustikoa, eremu akustikoetan, urriaren 19ko 1367/2007 Errege Dekretuaren 5. artikuluan ezarritako irizpideei jarraikiz, eta lurzoruaren erabilera nagusia (egungoa edo etorkizunerako aurreikusitakoa) kontuan hartuta egin da. Dekretu horrek Zaratari buruzko azaroaren 17ko 37/2003 Legea garatzen du, zonakatze akustikoari, kalitate helburuei eta zarata emisioei dagokienez. Hortaz, zonakatzeak ukitzen ditu bai eremu urbanizatuak bai hiri planeamenduak aurreikusten dituen hiri-garapen berriak, baina, beharrezko iritziz gero, hots kutsaduratik berariaz babestu beharreko naturguneak ere zonatan zatitzen ahal dira, bai eta eremu lasaiak ere, bai aglomerazioetan bai zelaian.

Aintzat hartu diren eremu akustiko motak aipatutako urriaren 19ko 1367/2007 Errege Dekretuaren 5. artikuluan zehaztutakoak dira: bizitegi-erabilera, erabilera industriala, jolas- eta ikuskizun-erabilera, bestelako hirugarren sektoreko erabilera, osasun-, irakaskuntza- eta kultura-erabilera, garraiorako eta naturaguneetarako azpiegitura-sistema orokorrak.

Eremu akustiko bakoitzari aplikagarri zaizkio hots kalitateko helburu jakin batzuk, zehazki, urriaren 19ko 1367/2007 Errege Dekretuaren 14. artikuluan ezarritakoak.

Hala, egun lehendik dauden eremu urbanizatuetarako (2007ko urriaren 24 baino lehenago urbanizatu zirenetarako) ezarritako hots kalitateko helburuak jarraian ageri den taulako zarata mugek osatzen dituzte; 2007ko urriaren 23aren ondoren urbanizatutako eremuetarako eta hiri-garapen berrietarako, berriz, hots kalitateko helburua balio horiek ez gainditzea izanen da, baina 5 dezibel murriztuta.

EREMU AKUSTIKO MOTA

ZARATAREN INDIZEAK (3)

Ld

Le

Ln

e

Bereziki osasunerako, irakaskuntzarako eta kulturarako erabiltzen den eta hots kutsaduraren kontrako babes berezia eskatzen duen lurzorua duten lurraldeko sektoreak

60

60

50

a

Bereziki bizitegirako erabiltzen den lurzorua duten lurraldeko sektoreak

65

65

55

d

Bereziki c) atalean aipatutako erabileraz besteko hirugarren sektorerako erabilera duen lurzorua duten lurraldeko sektoreak

70

70

65

c

Bereziki jostetarako eta ikuskizunetarako erabiltzen den lurzorua duten lurraldeko sektoreak

73

73

63

b

Bereziki industriarako erabiltzen den lurzorua duten lurraldeko sektoreak

75

75

65

f

Garraio azpiegituretako sistema orokorrei edo horien beharra duten bestelako ekipamendu publikoei atxikitako lurraldeko sektoreak (1)

(2)

(2)

(2)

(1) Lurraldeko sektore horietan hots kutsadurari aurrea hartzeko neurri egokiak baliatuko dira; bereziki, eskura dauden teknika hoberenetakoen artetik eragin akustiko txikieneko teknologiak aplikatuko dira, azaroaren 17ko 37/2003 Legearen 18.2 artikuluaren a) letrari jarraikiz.

(2) Lurraldeko sektore hauen perimetroko mugan ez dira gaindituko gainerako eremu akustiko mugakideetan aplikatu beharreko kalitate akustikoaren helburuak.

(3) Kalitate helburuak 4 metroko altueran neurtu dira; eta Ld, Le eta Ln indizeak epe luzerako batez besteko hots mailari dagozkio (A ponderatua, ISO 1996-2:1987 arauan jasoa), urtebetez egunean zehar, goizean, arratsaldean edo gauean, hurrenez hurren, zehaztua.

Lehendik dagoen eremu urbanizatu batean muga akustikoren bat (dagokion eremu akustikorako helburutzat ezarritakoak) gainditzen bada, kasuko administrazioak eremu bakoitzerako plan berariazko bat (ekintza planak) gauzatu beharko du, ingurumenaren pixkanakako hots hobekuntza lortzeko, zehaztutako kalitate helburua erdietsi arte.

Bestalde, errege dekretu horren 5. artikuluak ezartzen duenez, zonakatze akustikoak mantendu beharko du, hots kalitatea hobetze aldera, eremu akustikoen arteko bateragarritasuna, bai eta horien eta zortasun akustikoko eremuen eta berezko jatorriko hots erreserben artekoa ere; horretarako, bateragarritasun hori lortzeko beharrezko ekintzak gauzatuko dira, behar izatera.

Horretarako, hiri-garapen berrien kasuan beharrezkoa izan da muga akustikoak aplikatzea bi egoera motatan: zaratari buruzko mapa estrategikoan zehaztutako hots mailen arabera hots kalitatearen helburuak gainditzen badira; eta beharrezkoa denean eremu akustiko mugakideen arteko trantsizioa ikertzea, horietako bakoitzean aplikatu beharreko kalitate akustikoaren helburuen arteko desberdintasuna 5 dB (A) baino handiagoa delako.

Behin eguneratze lanak amaituta, zonakatze akustikoko proposamen berriari (kasuko muga akustikoak barne) hamabost egun balioduneko epea eman zaio, ukitutako udal bakoitzean entzunaldia egiteko.

Azkenik, udalek aurkeztutako alegazioak kontuan hartuta, Ekonomia Zirkularraren eta Uraren Zerbitzuak txostena igorri du; bertan biltzen dira behin betiko zonakatze akustiko berria eta hiri-garapen berrietan aplikatu beharreko muga akustikoak, udal bakoitzean indarra duen hiri planeamenduaren araberakoak. Udal horien zerrenda, bakoitzaren erantzunarekin bat, ebazpen honen eranskinean ageri da.

Zonakatze akustikoa ebazpen honen bidez eguneratuta, eta urriaren 19ko 1367/2007 Errege Dekretuaren 13.2 artikuluan xedatutakoari jarraikiz, lurzoruaren erabilera aldatzea dakarten planeamendu orokorreko aldaketek, azterketek eta egokitzeek kasuko lurralde eremuko zonakatze akustikoa aztertzeko beharra eraginen dute.

Iruñerriko hiri-aglomerazioko zaratari buruzko mapa estrategikoaren lurralde eremuaren barruan lurzoruaren erabilera aldatzen duten hiri planeamenduaren aldaketen kasuan, ingurumen-ebaluazio estrategikoaren izapidean zehar eta Landa Garapeneko, Ingurumeneko eta Toki Administrazioko Departamentuak igorritako ingurumen ondorioen adierazpenaren bidez berrikusiko da zonakatze akustikoa, eta beharrezkoak diren aldaketak onetsiko dira.

Adierazitakoarekin bat, Nafarroako Foru Komunitateko Administrazioari eta Foru Sektore Publiko Instituzionalari buruzko martxoaren 11ko 11/2019 Foru Legearen 32. artikuluak eta Landa Garapeneko, Ingurumeneko eta Toki Administrazioko Sailaren oinarrizko egitura organikoa onesten duen irailaren 21eko 78/2016 Foru Dekretuak ematen dizkidaten eskudantziak erabiliz,

EBAZTEN DUT:

1. Iruñerriko hiri-aglomerazioko zaratari buruzko mapa estrategikoko lurralde eremuak barnean hartzen dituen eremu akustikoetako mugaketa eguneratzea. Aipatutako mapa estrategikoa Inguruneko zarataren ebaluazioari eta kudeaketari buruzko 2002ko ekainaren 25eko 2002/49/EE Zuzentarauaren hirugarren fasearen aplikazioari dagokio.

2. Onestea hiri-garapen berrietan aplikatzekoak diren mugaketa akustikoak, bai eremu horietarako hots kalitateko helburuak gainditzeagatik –lehendik dauden zaratari buruzko mapa estrategikoan zehaztutako hots mailen ondorioz– beharrezkoa delako eremu akustiko mugakideen arteko trantsizioa ikertzea, horietako bakoitzean aplikatu beharreko kalitate akustikoaren helburuen arteko desberdintasuna 5 dB (A) baino handiagoa delako.

3. Eremu akustikoen mugaketa zehaztea, bai eta aurreikusitako hiri-garapen berriei aplikagarri zaien mugaketa akustiko mota ere, “shape” formatuko bi fitxategi digitalen bidezko informazio georreferentziatua emanez; interesdunen eskura egonen dira Landa Garapeneko, Ingurumeneko eta Toki Administrazioko Departamentuko bulegoetan, eta Nafarroako Gobernuaren webgunean (www.nafarroa.eus).

4. Ezartzea ingurumen-ebaluazio estrategikoaren prozeduran zehar berrikusiko dela zonakatze akustikoa eta, Landa Garapeneko, Ingurumeneko eta Toki Administrazioko Departamentuak igorritako dagokion ingurumen ondorioen adierazpenaren bidez, beharrezko aldaketak onetsiko direla, Iruñerriko hiri-aglomerazioko zaratari buruzko mapa estrategikoaren lurralde eremuaren barruan lurzoruaren erabilera aldatzen duten hiri planeamenduan aldaketak, berrikuspenak edo egokitzapenak egiten badira.

5. Ebazpen hau Nafarroako Aldizkari Ofizialean argitaratzea, orok jakin dezan.

6. Ebazpen honek ez du administrazio bidea akitzen, eta interesa dutenek, Administrazio Publikoek izan ezik, gora jotzeko errekurtsoa aurkezten ahal dute, Landa Garapeneko, Ingurumeneko eta Toki Administrazioko kontseilariari zuzendua, hilabeteko epean. Administrazio publikoek zilegi dute administrazioarekiko auzi-errekurtsoa jartzea, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean. Horrek ez du galarazten Nafarroako Gobernuari aurretiazko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean. Epeak ebazpen hau jakinarazi eta biharamunetik aurrera kontatuko dira.

7. Ebazpen hau jakinaraztea Ingurumenaren eta Lurraldearen Antolamenduaren Zerbitzu Juridikoari; Landa Garapeneko, Ingurumeneko eta Toki Administrazioko Departamentuko Lurralde eta Paisaia Zerbitzuari eta Ekonomia Zirkularraren eta Uraren Zerbitzuari; eta Antsoaingo, Aranguren Ibarreko, Barañaingo, Beriaingo, Berriobeitiko, Berriozarko, Burlatako, Zizurko, Eguesibarko, Esteribarko, Ezkabarteko, Galarko, Uharteko, Noain Elortzibarko, Oltza Zendeako, Orkoiengo, Iruñeko, Atarrabiako eta Zizur Nagusiko udalei, behar diren ondorioak izan ditzan.

Iruñean, 2019ko maiatzaren 27an.–Ingurumeneko eta Lurralde Antolamenduko zuzendari nagusia, Eva García Balaguer.

ERANSKINA

Aurkeztutako alegazioak eta haiei emandako erantzunak

A) Aranguren Ibarreko Udaleko alkateak udal hori ordezkatuz 2018ko azaroaren 27 eta 30eko eta 2019ko apirilaren 25eko entzunaldietan aurkeztutako alegazioak:

–Lehen alegazioa:

Zonakatze-proposamenak modu desegokian sailkatzen du hiri-lurzoru finkatuko eta lurzoru urbanizagarriko eremu bat, Mutiloaren parean kokatuta dagoena, PA-30 “Iruña ingurubidea” errepidearen ekialdean, x=613.503 y=4.738.349 koordenadetan eta inguruetan (Beloaran ingurua).

Izapidetzen ari zen Udal Plan Orokorrak, hasieran onetsitako dokumentuan, lehendik zeuden bizitegietarako eta zuzkidurarako hiri-garapeneko lurzoruez gain, berriak ere barne hartzen zituen. Zonakatze-proposamenean ez dira agertzen aurreikusitako bizitegi-garapenak. Zonakatzea egun sailkatuta dauden lurzoruetara soilik mugatzen da; alegia, UPO berri hau idatzi aurretik sailkatuta zeudenetara.

Eremu horren zonakatzea aldatzea eskatzen da, erantsitako proposamenaren arabera; izan ere, proposamen hori bat baitator urtea amaitu aurretik udalak behin-behinean onetsiko duen UPO berriarekin.

Erantzuna:

Alegazioan baieztatzen den bezala, Hirigintzako Udal Plan berria ez da onetsi oraindik, eta izapidetzen ari da (hirigintza- eta ingurune-izapideak). Eta, Beloaran inguruko eremu jakin horren kasuan, beharrezkoa da proposatutako erabilerak aztertzea eta hots kalitatearen helburuak betetzen dituztela ziurtatzea. Hirigintzako Udal Planaren ingurumen-ebaluazio estrategikoaren prozeduraren bidez eta beharrezko azterketaren arabera eguneratuko da Beloaran inguruko eremu akustikoen mugaketa. Hortaz, ez da egokia Udalak aurkeztutako iradokizuna baiestea une honetan.

–Bigarren alegazioa:

Eremu akustikoen sailkapenean garapen berrietarako mugaketa akustikoak egiten dira, arrazoi hauengatik:

1.–Helburu akustikoak gainditzen direlako, PA-30 errepideko ibilgailuen trafikoak eragindako zarataren ondorioz.

2.–Trantsizio guneak behar direlako, PA-30 errepidea azpiegitura klaseko poligonotzat jotzen baita.

Bi kasuetan, PA-30 errepidearen eragina dago. Ondorioz, hiri-garapen berrien kasuan beharrezkoa da sortzen ahal diren bateraezintasunak zuzentzeko neurriak hartzea.

Bestalde, Aranguren Ibarrean PA-30 errepideko trafikoa pixkanaka areagotu egin da azken urteotan. Nafarroako Gobernuaren Trafikoaren Aforo Planaren datuen arabera, Arangurenen parean, ekialdeko ingurabidearen Batez besteko Eguneko Intentsitatea 45.063 urtean zen 2013an; 2017an, aldiz, 50.391 urtean. Ekialdeko ingurabideak geroz eta trafiko gehiago du, eta kalte akustikoa geroz eta handiagoa da.

Iruñerriko hiri-aglomeraziorako ekintza planak aintzat hartuko ditu ekialdeko ingurabidearen kalteak eta aldaketak. Aranguren Ibarreko Udalak bere eskumeneko ekintza planak garatuko ditu. Egin beharreko jarduketak egin ondoren, ez du haren gain hartuko ezarritako neurrien eraginkortasunaren ardura, hirugarrenek egindako zarataren ondorioz zaratari buruzko mapak aldatzen badira. Hirugarrenek hartutako neurrien eraginkortasuna ere ez da haren ardura izanen. Halaber, Nafarroako Gobernuak bere gain hartu beharko du ekialdeko ingurabidearen azpiegiturak eragindako zarata-kalteak ekiditeko neurriak hartzeko dagokion ardura.

Erantzuna:

Ekintza planak dagoeneko urbanizatuta dauden guneetan lantzen eta aplikatzen dira; mugaketa akustikoak, berriz, etorkizuneko hiri-garapen berrietarako ezartzen dira. Bi gai horiek zerikusia dute, baina desberdinak dira. Ukitutako udal bakoitzean entzunaldia egin zaion zonakatze akustikoaren eguneratzeak mugapen akustikoen aplikazioa soilik hartzen du barne; beraz, ez da egokia ekintza planak aplikatzeko eskumenak aipatzea.

Egia da PA-30 errepideko trafikoa dela Arangureneko etorkizuneko hiri-garapenen mugapen akustikoak zehaztuko dituen zarataren iturri nagusia. Horregatik, Nafarroako Gobernuaren eskumena izanen da dagoeneko urbanizatuta dauden guneetan zarata-iturri horrek sortutako bateraezintasun akustikoak ezabatzeko helburuarekin ekintza planek zehazten dituzten neurriak aplikatzea.

Baina Arangureneko Udala arduratuko da, une bakoitzean dauden hots mailen arabera, mugapen akustikoak dituzten hirigune berriak garatzeko aukera ematen duten neurri egokiak aztertzeaz eta hartzeaz, berriz ere bateraezintasun akustikoak sortzea ekiditeko.

–Hirugarren alegazioa:

Zonakatze-proposamenak 1. poligonoko 563., 696., 871., 899. eta 900. lurzatiak hirugarren sektoreko eremu akustiko (TER-AUE) gisa sailkatzea aurreikusten du, baina eremuaren azalera txikiegia da eta egun ematen zaizkion erabileretako batzuk industrialak dira. Horregatik, egokia iruditzen zaigu eremu hori aldameneko eremu akustiko industrial (IND-AUE) handian sartzea, hirugarren sektoreko eremu akustiko bat bereiz eraiki beharrean.

Erantzuna:

Onesten dira Udalak adierazitako arrazoiak eta, beraz, lurzati horiek Mutiloako hirigunean kokatutako eremu akustiko industrial (IND-AUE) handian sartuko dira.

–Laugarren alegazioa:

Zonakatze-proposamenak 1. poligonoko 631. eta 957. lurzatiak hirugarren sektoreko eremu akustiko (TER-AUE) gisa sailkatzea aurreikusten du, baina bi lurzati horiek inguru horretan dagoen industrialdearen parte dira. Horregatik, egokia iruditzen zaigu eremu hori aldameneko eremu akustiko industrial (IND-AUE) handian sartzea, hirugarren sektoreko eremu akustiko bat bereiz eraiki beharrean.

Erantzuna:

Onesten dira Udalak adierazitako arrazoiak eta, beraz, lurzatia horiek Mutiloako hirigunean kokatutako eremu akustiko industrial (IND-AUE) handian sartuko dira.

–Bosgarren alegazioa:

Zonakatze-proposamenak 1. poligonoko 960., 959., 958., 416., 1038. eta 1042. lurzatiak eta 2. poligonoko 1351. lurzatia hirugarren sektoreko eremu akustiko (TER-AUE) gisa sailkatzea aurreikusten du. Baina lurzati horiek guztiak bizitegi-erabilerako sektoreetan daude sartuta, nahiz eta gaur egun bulego, taberna, supermerkatu eta kirol-zentro gisa ere erabiltzen diren.

Partzela horiek bizitegi-erabilerako sektoreak eta ingurabidea bereizten dituzte; estetikoki, ingurabidetik etxebizitzak ikustea ekiditen dute eta, bestalde, pantaila akustiko gisa balio dute. Hiri planeamendurako tresnak zaratak eragindako eragozpenak ekiditen saiatu dira ahal den neurrian, eta Aranguren Ibarreko Udalak urteak daramatza lanean helburu hori lortzeko eta eremu horretako industrialdeari konponbide bideragarri bat emateko.

Hirugarren sektoreko eremu akustiko gisa sailkatuz gero, zarataren aurka babesteko indarrean dagoen araudiaren arabera, trantsizio gune bat egin beharko litzateke eremu akustiko horren eta etorkizunean industrialdearen ordez eraikiko den bizitegi-erabilerako eremuaren artean, eta, beraz, industrialdea kentzeko konponbidea ez litzateke bideragarria izanen. Ondorioz, ingurabidearen mugan bulegoak eta zerbitzuak izateak industrialdea kentzea oztopatuko du, nahiz eta, onetsi diren zaratari buruzko mapen arabera, industrialde hori bera den inguru horretan hots gehien igortzen duena, ibilgailuen trafikoarekin batera.

Bestalde, Aranguren Ibarreko Udalak 2014ko martxoaren 26an osoko bilkuran onetsitako Lurraldea Okupatzeko Estrategia eta Ereduaren (LOEE) dokumentuan, Udalaren eta Nafarroako Gobernuaren artean 2014ko maiatzaren 14an sinatutako Aurretiko Kontzertuan, eta 2016ko abenduaren 27ko osoko bilkuran hasiera batean onetsitako Aranguren Ibarreko Udal Plan Orokorrean (2017ko 41. Nafarroako Aldizkari Ofiziala, otsailaren 28koa), Mutiloagoiti zaharreko industrialdeko eremuari bizitegi-erabilera emateko asmoa adierazten da, pixkanaka eraikin industrialak ordeztuz etxebizitzekin eta/edo beharrezkoak eta bizitegi-erabilerarekin bateragarriak diren zerbitzuekin.

Hori dela eta, uste dugu lurzati horiek bizitegi motako eremu akustikoan (RES-AUE) sartu behar direla, aipatutako eta onetsitako dokumentuetan ezartzen den bezala Mutiloagoiti zaharreko industrialdea bizitegi-area bihurtzeko prozesua ez oztopatzeko.

Erantzuna:

Urriaren 19ko 1367/2007 Errege Dekretuak, zonakatze akustikoari, kalitate helburuei eta zarata emisioei dagokienez Zaratari buruzko azaroaren 17ko 37/2003 Legea garatzen duenak, ezartzen du eremu akustikoak lurzoruaren erabilera nagusiaren arabera sailkatu behar direla. Halaber, adierazten du d), hirugarren sektoreko jarduerak, motako eremu akustikoek barne hartuko dituztela nagusiki jarduera komertzial eta administratiboetara bideratutako guneak, publikoak nahiz pribatuak; ostalaritzara, ostatura, sukaldaritzara eta bestelakoetara bideratutako guneak; teknologia-parkeak, masako produkzioko jarduerak dituztenak izan ezik; baita gune horiek ibilgailuak aparkatzeko dituzten eremuak ere.

Horregatik, argi dago aipatutako lurzatietan gaur egun egiten diren jarduerak bat datozela lurraldearen sektore hori hirugarren sektoreko eremu akustiko gisa sailkatzearekin.

Egia da, Mutiloako hirigunean kokatutako industrialdea bizitegi-area batekin ordezten denean, lurraldearen sektore hori bizitegi motako eremu akustiko gisa sailkatu ahal izateko, eremu akustiko berriaren eta alegazio honen xede den hirugarren sektoreko eremu akustikoaren arteko trantsizioa ikertu beharko dela, eremu bakoitzean aplikatu beharreko hots kalitateko helburuen arteko desberdintasuna 5 dB (A) baino gehiago baita.

Baina bi eremu akustiko horien arteko trantsizioa ikertzeak ez du oztopatuko Mutiloagoiti zaharreko industrialdea bizitegi-erabilerako sektore bihurtzeko prozesua. Bi eremu akustiko mugakide horien arteko trantsizioa ikertzeko, bien arteko trantsizio-eremuko zaratari buruzko mapa egin beharko da.

Zaratari buruzko mapa horrek bi eremu akustikoen arteko trantsizio-eremuko hots mailaren ebaluazio orokor bat egiteko aukera eman beharko du, zarata-iturri guztiak kontuan hartuta. Lortutako emaitzen arabera, edozein motatako neurriak hartu beharko dira bizitegi motako eremu akustiko berrian urriaren 19ko 1367/2007 Errege Dekretuaren II. Eranskinean ezarritako hots kalitateko helburuak betetzen direla bermatzeko.

Trantsizioa ikertzeak ez du esan nahi lurraldearen zati bat erabilerarik gabe utzi behar denik bi eremu akustikoen artean. Izan ere, hirugarren sektoreko eremu akustiko horretan egun egiten diren jarduerak eragin akustiko txikikoak dira eta ez dute zarata asko igortzen; ondorioz, ziur aski, ez dute baldintzatuko aurreikusitako bizitegi-sektorearen hiri-garapena.

Areago, alegazioak adierazten duen bezala, lurzati horietan hirugarren sektoreko erabilera duten eraikinak pantaila akustikoaren funtzioa betetzen dutenez, PA-30 errepideko trafikoaren zaratatik babestuko dute etorkizuneko bizitegi-garapena, eta horrek eremuaren bateragarritasun akustikoa lortzen lagunduko du.

Horiek horrela, ezetsi egin da alegazioa.

B) Zizur Nagusiko Udaleko alkateak 2018ko azaroaren 27ko entzunaldian aurkeztutako alegazioak:

–Lehen alegazioa:

Zonakatze-proposamenak ez ditu barne hartzen Zizur Nagusiko udalak zonakatzearen eguneratze-lanen prozesuan zehar proposatutako aldaketak; hain zuzen ere, 2. poligonoko lurzati hauei buruzkoak: 1, 11, 13, 18, 25, 44, 82, 96, 122, 151, 171, 176, 268, 432, 577, 797, 1088, 1123, 1353, 1758, 1760, 1898, 2110, 2111 eta 2118. 797. lurzatia irakaskuntzako erabilerako lurzoru urbanizagarri gisa dago sailkatuta; 2110. lurzatiak hirugarren sektoreko erabilera du, berriki Hiri-jarduketarako Plan Berezi bat onetsi izanaren ondorioz; beste lurzati guztiek erabilera anitza dute. Zonakatze akustikoaren proposamena aldatzea eskatzen da lurzati hauei dagokienez, aipatutako erabileren arabera.

Erantzuna:

Egiaztatu da uneko udal planeamenduak landa-lurzoru gisa sailkatzen duela 2. poligonoko 797. lurzatia; beraz, ez da egokia zonakatze akustikoaren proposamena aldatzea, eta Ez sailkagarri (ES) gisa mantenduko da.

Halaber, egiaztatu da 2018ko urriaren 25ean udaleko osoko bilkurak behin betiko onetsi zuela Hiri-jarduketarako Plan Berezia (HJPB) eta haren bidez 2. poligonoko 2110. katastro-lurzatiaren erabilera aldatu zela. Ondorioz, aurreko planeamenduan aurreikusitako zuzkidura-erabilera anitza hirugarren sektorekoa izatera pasatu da, eta egokia da zonakatze-proposamena aldatzea, lurzati hori TER-AUE gisa sailkatzeko.

Bestalde, egiaztatu da 2. poligonoko 151. lurzatian etxebizitza-eraikin bat eraikitzen ari direla, etxabe komertzialekin; beraz, ez da egokia zonakatze-proposamena aldatzea, eta lurzati hori RES-AUE gisa mantenduko da.

Azkenik, alegazioan aipatutako gainerako lurzatiei dagokienez, haien tamaina bereiz sailkatu ahal izateko ezarritako gutxieneko azalera (5.000 m²) baino txikiagoa da; beraz, egokia da zonakatze-proposamenean jasotako sailkapena mantentzea eta guztiak RES-AUE eremuan sartzea.

–Bigarren alegazioa:

Berriki, Hiri-jarduketarako Plan Berezi (HJPB) bat onetsi da, eta bertan 2. poligonoko 2110. katastro-lurzatiaren erabilera aldatu da. Aurreko planeamenduan aurreikusitako zuzkidura-erabilera anitza hirugarren sektorekoa izatera pasatu da orain.

Erantzuna:

Egiaztatu da 2018ko urriaren 25ean udaleko osoko bilkurak behin betiko onetsi zuela Hiri-jarduketarako Plan Berezia (HJPB) eta haren bidez 2. poligonoko 2110. katastro-lurzatiaren erabilera aldatu zela. Ondorioz, aurreko planeamenduan aurreikusitako zuzkidura-erabilera anitza hirugarren sektorekoa izatera pasatu da, eta egokia da zonakatze-proposamena aldatzea, lurzati hori TER-AUE gisa sailkatzeko.

C) Esteribarko Udaleko alkateak 2018ko azaroaren 28ko entzunaldian aurkeztutako alegazioa, udaleko teknikari aholkulariak igorritako txostenaren bidez:

–Lehen alegazioa:

1/31, 1/32, 1/35, 1/36 eta 1/80 lurzatiak, zonakatze-proposamenean bizitegi- eta zuzkidura-eremu gisa sailkatuta daudenak, ez lirateke sailkatu beharko, indarrean dagoen udal planeamenduaren arabera lurzoru urbanizaezin babestua baitira. Edo, hala badagokio, 1/32 eta 1/80 lurzatiak IND-AUE gisa sailkatu beharko lirateke, baimendutako jarduera industrialak egiten direlako bertan.

Erantzuna:

Udalak arrazoi duela egiaztatu ondoren, 1/32 eta 1/80 lurzatiak IND-AUE gisa sailkatu dira, eta aipatutako gainerako lurzatien sailkapena Ez sailkagarria (ES) izatera pasatu da.

–Bigarren alegazioa:

Zonakatze-proposamenean aisialdirako eremu gisa sailkatutako 1/1023 lurzatia SDC-AUE gisa sailkatu beharko litzateke, indarrean dagoen udal planeamenduak kultura-, irakaskuntza-, kirol-, joko- eta merkataritza-erabilera eta erabilera anitza baimentzen baititu. Egun kirol-ekipamendu bat dago eta erabilera anitzeko ekipamendu bat eraikitzen ari da, jarduera soziokulturaletarako eta irakaskuntzarako erabiliko dena.

Erantzuna:

Udalak adierazitakoa egiaztatu da eta, horregatik, lurzati horren sailkapena bi eremu desberdinetan banatu da. Iparraldeko eremua, dagoeneko pilotalekua eraikita duena, REC-AUE gisa sailkatuta mantentzen da; hegoaldeko zatia, jarduera soziokulturaletarako eta irakaskuntzarako erabiliko den erabilera anitzeko ekipamendua izanen duena SDC-AUE gisa sailkatu da, eta sailkapen bera duen 1/1064 lurzatiari dagokion eremu akustikoarekin bateratu da.

–Hirugarren alegazioa:

Bide-azpiegitura berriarekin lotutako INF-ANU eremu akustikoak barne hartu beharko lituzke Ollokira sartzeko biribilgunera arteko lurrak, biribilgunea Udalez gaindiko Proiektu Sektorialera atxikita baitago, Esteribar eta Uharterako ingurabidearen irteera-lotunearen parte delako.

Erantzuna:

Udalak alegatutako kontua egiaztatu ondoren, egokia da zonakatze-proposamena aldatzea, lur horiek INF-ANU eremuan sartzeko.

D) Oltza Zendeako Udaleko alkateak 2018ko azaroaren 30eko entzunaldian aurkeztutako alegazioak:

–Alegazioa:

Zonakatze-proposamenean, Volkswagen faktoriari dagokion industria-gunearen zati bat, Lurralde Antolamenduaren eta Etxebizitzaren zuzendari nagusiak abenduaren 23ko 1521/1997 Ebazpenaren bidez onetsitako Arazuri-Orkoien Poligonoaren industria-gunearen (II. zona) UGPSak araututakoa, IND-ANU gisa dago sailkatuta. Aipatutako UGPSan agertzen den Bigarren Mailako Industria-gunea da, zehazki.

UGPS horretan, planeamenduaren zehaztapenek xedatzen dute Bigarren Mailako Gunearen garapena lerrokatzeak ezartzeko xehetasun-azterketaren bidez egiten ahal dela, urbanizazio-proiekturik egin beharrik gabe; ondorioz, industria-lur finkatutzat hartzen da. Horregatik, zonakatze akustikoan Lehendik Dagoen Hirialde (AUE) gisa agertu beharko litzateke, oraindik ezer eraiki ez bada ere.

Gauza bera gertatzen da lurzati bereko zerrenda batekin, IND-AUR gisa sailkatuta dagoena, nahiz eta Industria-gune Nagusiaren parte izan, eta industria-gune horren garapena exekuzio-proiektuaren bidez egiten den.

Horregatik, Volkswagen faktoriaren Industria-guneko zonakatze akustikoa zuzentzeko eskatzen dugu, gune osoa IND-AUE izatera pasa dadin.

Erantzuna:

Oltza Zendeako Udalak arrazoia duela egiaztatu ondoren, aipatutako eremuak IND-AUE gisa sailkatu dira.

Iragarkiaren kodea: F1907368