110. ALDIZKARIA - 2019ko ekainaren 7a

1. NAFARROAKO FORU KOMUNITATEA

1.7. BESTELAKOAK

291/2019 EBAZPENA, maiatzaren 22koa, Hezkuntzako zuzendari nagusiak emana, jarraibideak onesten dituena 2019-2020 ikasturtean Nafarroako Foru Komunitateko hezkuntza sistemaren lanbide heziketako ikasketak eta arte plastikoetako eta diseinuko lanbide ikasketak ematen dituzten ikastetxeei dagozkien eskola egutegia eta ordutegi orokorra prestatzeko.

Ikusirik Lanbide Heziketaren Zerbitzuko zuzendariak emandako aldeko txostena, zeinean proposatzen baita 2019-2020 ikasturtean Nafarroako Foru Komunitateko lanbide heziketako ikasketei eta arte plastikoetako eta diseinuko lanbide ikasketei dagokien eskola egutegia prestatzeko jarraibideak onestea.

Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32.1.d) artikuluak ematen dizkidan ahalmenak erabiliz,

EBATZI DUT:

1. Jarraibideak onestea Nafarroako Foru Komunitateko hezkuntza sistemaren lanbide heziketako ikasketak eta arte plastikoetako eta diseinuko lanbide ikasketak ematen dituzten ikastetxe publikoetan, ikastetxe pribatu itunduetan eta erakundeetan 2019-2020 ikasturtean izanen dituzten eskola egutegia eta ordutegi orokorra prestatzeko. Eranskinean zehaztu dira.

2. Ebazpen honen aurka gora jotzeko errekurtsoa jartzen ahalko da, Hezkuntzako kontseilariari zuzendua, hilabeteko epean, Nafarroako Aldizkari Ofizialean argitaratu eta biharamunetik hasita.

3. Ebazpen hau eta eranskina igortzea Lanbide Heziketaren Zerbitzura, Hezkuntzako Ikuskapen Zerbitzura, Antolamenduaren, Orientazioaren eta Aukera Berdintasunaren Zerbitzura, Unibertsitateen Zerbitzura, Hezkuntzako Teknologien eta Informazio Sistemen Zerbitzura, Giza Baliabideen Zerbitzura, Eleaniztasunaren eta Arte Ikasketen Zerbitzura, Lanbide Heziketaren Plangintza, Antolamendu eta Garapenerako Atalera, Ikastetxeetako Informazioa Kudeatzeko Bulegora eta Eskolatze Bulegora, behar diren ondorioak izan ditzaten.

4. Ebazpen hau eta eranskina Nafarroako Aldizkari Ofizialean argitaratzea.

Iruñean, 2019ko maiatzaren 22an.–Hezkuntzako zuzendari nagusia, Roberto Pérez Elorza.

ERANSKINA

Jarraibideak Nafarroako Foru Komunitatean hezkuntza sistemako lanbide heziketako ikasketek eta arte plastikoetako eta diseinuko lanbide ikasketek izanen dituzten eskola-egutegia eta ordutegi
orokorra prestatzeko, 2019-2020 ikasturterako

1. Egutegia.

Nafarroako eskola egutegiak klausula hauek beteko ditu:

1. Ikastetxeetan, hezkuntza sistemako lanbide heziketako ikasketetarako eta arte plastikoetako eta diseinuko lanbide ikasketetarako, 2019-2020 ikasturtea 2019ko irailaren 2an hasiko da, eta 2020ko ekainaren 30ean bukatuko.

Enplegurako lanbide heziketako ikastaroen eta langabe eta langileentzako ikastaroen prestakuntzaldia urte guztian zehar egin daiteke, Hezkuntzako zuzendari nagusiaren ebazpen batean garatuko den egutegi eta ordutegi orokor berariazko batekin.

2. Ikastetxeek egutegirako berariazko proposamen bat egin beharko dute hezkuntza sistemako lanbide heziketako ikasketetarako eta arte plastikoetako eta diseinuko lanbide ikasketetarako. Hauek dira baldintzak:

a) Eguberrietako oporrak: abenduaren 21etik urtarrilaren 7ra arte, biak barne.

b) Aste Santuko oporrak: apirilaren 9tik 19ra arte, biak barne.

c) Jaiegunak, Nafarroako lan egutegi arruntaren arabera: urriaren 12a, azaroaren 1a, abenduaren 3a, abenduaren 6a, martxoaren 19a eta maiatzaren 1a. 2020ko lan egutegi arruntean eskola egutegiari eragiten dion beste jaiegunen bat egonez gero, ikastetxeek eskola egutegia egokituko dute, Antolamenduaren, Orientazioaren eta Aukera Berdintasunaren Zerbitzuak emanen dituen jarraibideekin bat.

d) Hezkuntzako zaindariaren jaieguna: urtarrilaren 31 hezkuntza sistemaren lanbide heziketako ikasketetarako, eta urriaren 22a arte plastikoetako eta diseinuko lanbide ikasketetarako. Ikastetxeek zilegi izanen dute beste egun batera pasatzea horren ospakizuna.

e) Herriko jaieguna: Nafarroako Foru Komunitateko herrietako jaiegunak zehazten dituen arauan ezarri bezala. Data hori eskola-egun ez den egun batean tokatzen bada, ikastetxeak beste egun bat hautatzen ahalko du.

f) Jarri diren eskola-egunez gainetikoak, aurreko ataletan jaiegun gisa finkatu ez direnak, eskola gabeko laneguntzat joko dira.

g) Ezin izanen dira erabili d), e) eta f) apartatuek aipatzen dituzten egunak Eguberrietako eta Aste Santuko oporraldiak luzatzeko.

h) Modalitate presentzial orokorreko eskola-egunen kopurua:

–Lantokiko prestakuntza modulua ez duten prestakuntza zikloetan, edo prestakuntzaldi praktikoa enpresa, estudio eta tailerretan ez duten zikloetan: 175 egun.

–Ikasturte guztian zehar prestakuntza modulua lantokietan duten prestakuntza zikloetan, edo prestakuntzaldi praktikoa enpresa, estudio eta tailerretan duten zikloetan: 175 egun.

–Ikasturtearen azken hiruhilekoan lantokiko prestakuntza modulua duten edo prestakuntzaldi praktikoa enpresa, estudio eta tailerretan duten prestakuntza zikloetarako, eskola-egunen kopurua zatiketa honetatik ateratzen dena izanen da: ikastetxeko prestakuntzarako curriculumak ezarritako orduak eguneko 5,5 eskola orduz zatituta ateratakoa. Lantokietan egiten den prestakuntza, oro har, ekainaren 15ean bukatuko da.

i) Eskola-egunen kopurua, modalitate dualeko ikastetxean: ikastetxeek ziklo, talde eta ikasle mota bakoitzarentzako eskola-egunen kopurua egokituko dute, kontuan harturik, horretarako, bai aipatu modalitatea garatzeko enpresa laguntzaileekin sinatutako hitzarmenak, bai prestakuntza planean xedatutakoa. Betiere, Lanbide Heziketaren Zerbitzuaren oniritzia beharko dute horretarako.

j) Ikastetxean ematen diren moduluen amaierako ebaluazioaren deialdiei dagozkien probak egiteko erabiltzen diren ikasturteko egunak eskola-eguntzat joko dira, baita eskolak bukatu ondoko egunak ere: ekainaren 16a, 17a, 18a eta 19a. Ikasturtearen amaierako ebaluazioa egiteko erabiltzen ahalko dira.

Lanbide heziketako zikloak eta arte plastikoetako eta diseinukoak ez ezik, Batxilergoa eta Derrigorrezko Bigarren Hezkuntza ere irakasten dituzten ikastetxeetan, azken hiru eskola-egunak joko dira eskola-eguntzat ikasketa horietarako. Egun horietan, 2019-2020 ikasturteko deialdi bereziko azterketak eginen dira.

k) Lehenbiziko eskola-eguna 2019ko irailaren 6a izanen da, eta azkena, berriz, 2020ko ekainaren 15a.

l) Ikasketa mota bat baino gehiago irakasten dituzten ikastetxeek lehenbiziko eta azken eskola-egunak alda ditzakete, ebazpen honetan xedatutakoarekin bat edo DBHko eta Batxilergoko egutegia eta ordutegi orokorra arautzen dituen ebazpenean xedatutakoarekin bat.

m) Hezkuntza sistemako lanbide heziketako ikasketen eta arte plastikoetako eta diseinuko lanbide irakaskuntzen modalitate presentzial orokorra: lantokiko prestakuntza modulurik ez duen edo enpresetan, estudioetan eta lantegietan prestakuntzaldi praktikoa egiteko faserik ez duen ikasturtea:

–Ebaluazio partzialeko azken saioko ebaluazio probak ebaluazio partzialeko azken saioa ekainean egin ahal izateko egunetan eginen dira, kontuan hartuta ekainaren 5a dela azken eguna ikasleei jakinarazteko ebaluazio partzialeko azken saioan gainditu diren moduluen edo gainditu gabe gelditu diren moduluen berri.

–Ikastetxeak antolatuko du denboraldi bat (azken ebaluazio partzialean gainditu diren eta gainditu ez diren moduluen berri emateko azken egunaren biharamunetik eskolak amaitzeko finkatu den azken egunera artekoa), berreskurapen programa garatzeko eta moduluaren programazioan ezarritako jarduerak aurrera eramateko, ikasleei aukera emateko dagokion modulua “gainditu gabe” kalifikazioarekin gelditzeko izan zituzten zailtasunak gainditzeko, eta amaierako ebaluazioa modu egokiagoan prestatzeko.

Ikastetxeak, halaber, curriculumeko errefortzurako jarduerak antolatuko ditu egun horietan Oinarrizko Lanbide Heziketako zikloetako ikasleentzat.

Aldi hori antolatzeko orduan, lanbide heziketako ikasketak eta arte plastikoetako eta diseinuko lanbide ikasketak irakasten dituzten ikastetxeen antolaketa eta funtzionamendua arautzen dituzten jarraibideak onesteko Hezkuntzako zuzendari nagusiak ematen duen ebazpenean ezarritakoa bete beharko da.

–Amaierako ebaluazioari dagozkion ebaluazio probak ekainean eginen dira, kontuan izanda ekainaren 19a azken eguna dela ikasleei amaierako ebaluazio horri dagozkion kalifikazioak emateko.

n) Hezkuntza sistemako lanbide heziketako irakaskuntzen eta arte plastikoetako eta diseinuko lanbide irakaskuntzen modalitate presentzial orokorra: lantokiko prestakuntza modulua duen ikasturtea, edo enpresetan, estudioetan eta lantegietan prestakuntzaldi praktikoa egiteko fasea duena, ikasturtearen hirugarren hiruhilekoan garatua:

–Prestakuntza modulua edo prestakuntzaldi praktikoa egin baino lehenagoko ebaluazio partzialaren probak prestakuntza modulu hori edo prestakuntzaldia hasi baino lehenago eginen dira. Ebaluazio partzialeko saio horretan erabakiko da moduluak gaindituta edo gainditzeko dauden, eta horretaz gain, prestakuntza modulua edo prestakuntzaldi praktikoa egitera pasatzen den edo ez erabakiko da, baita ere.

–Ikastetxeak antolatuko du denboraldi bat (prestakuntza modulua edo prestakuntzaldi praktikoa egin baino lehenagoko ebaluazio partzialaren emaitzen berri emateko azken egunaren biharamunetik eskolak amaitzeko finkatu den azken egunera artekoa), prestakuntza modulura edo prestakuntzaldi praktikora pasatzen ez diren ikasleentzat, edo gainditu gabeko moduluekin pasatzen diren ikasleentzat, berreskurapen programa garatzeko eta moduluen programazioan ezarritako jarduerak aurrera eramateko, ikasleei aukera emateko dagokion modulua “gainditu gabe” kalifikazioarekin gelditzeko izan zituzten zailtasunak gainditzeko, eta amaierako ebaluazioa modu egokiagoan prestatzeko.

Aldi hori antolatzeko orduan, lanbide heziketako ikasketak eta arte plastikoetako eta diseinuko lanbide ikasketak irakasten dituzten ikastetxeen antolaketa eta funtzionamendua arautzen dituzten jarraibideak onesteko Hezkuntzako zuzendari nagusiak ematen duen ebazpenean ezarritakoa bete beharko da.

–Amaierako ebaluazioari dagozkion ebaluazio probak ekainean eginen dira, kontuan izanda ekainaren 19a azken eguna dela ikasleei amaierako ebaluazio horri dagozkion kalifikazioak emateko.

Aipatu datek badute salbuespen bat: prestakuntza modulura edo prestakuntzaldira pasatu den goi mailako heziketa zikloetako ikasleentzat, unibertsitatean sartzeko ebaluazio probakegin nahi badute, amaierako ebaluazioaren kalifikazioak emateko azken eguna izanen da kalifikazio horiek unibertsitatean sartzeko ebaluazio probaren lehen deialdirako aurkezteko ezartzen den muga-eguna.

o) Lanbide heziketa dualaren modalitatea: enpresaren prestakuntza jarduerara joaten ez den kurtsoan, modalitate presentzial orokorrerako m) apartatuan xedatutakoari lotuko zaio.

p) Lanbide heziketa dualaren modalitatea: enpresaren prestakuntza jarduerara joaten den kurtsoan:

–Ebaluazio partzialeko azken saioko probak egiteko egunak egokituko dira, ziklo, talde eta ikasle bakoitzerako, modalitate hori gauzatzeko enpresa laguntzaileekin izenpetutako hitzarmenetan xedatutakora eta kasuan kasuko prestakuntza planean xedatutakora.

–Ikastetxeak antolatuko du denboraldi bat (ebaluazio partzialaren azken saioaren emaitzen berri emateko azken egunaren biharamunetik eskolak amaitzeko finkatu den azken egunera artekoa), prestakuntza modulura edo prestakuntzaldi praktikora pasatzen ez diren ikasleentzat, edo gainditu gabeko moduluekin pasatzen diren ikasleentzat, berreskurapen programa garatzeko eta moduluaren programazioan ezarritako jarduerak aurrera eramateko, ikasleei aukera emateko dagokion modulua “gainditu gabe” kalifikazioarekin gelditzeko izan zituzten zailtasunak gainditzeko, eta amaierako ebaluazioa modu egokiagoan prestatzeko.

Aldi hori antolatzeko orduan, hezkuntza sistemako lanbide heziketako ikasketak eta arte plastikoetako eta diseinuko lanbide ikasketak irakasten dituzten ikastetxeen antolaketa eta funtzionamendua arautzen dituzten jarraibideak onesteko Hezkuntzako zuzendari nagusiak ematen duen ebazpenean ezarritakoa bete beharko da.

–Amaierako ebaluazioari dagozkion ebaluazio probak ekainean eginen dira, kontuan izanda ekainaren 19a azken eguna dela ikasleei amaierako ebaluazio horri dagozkion kalifikazioak emateko.

Aipatu datek badute salbuespen bat: goi mailako heziketa zikloetako ikasleentzat, unibertsitatean sartzeko ebaluazio proba egin nahi badute, amaierako ebaluazioaren kalifikazioak emateko azken eguna izanen da kalifikazio horiek unibertsitatean sartzeko probaren lehen deialdirako aurkezteko ezartzen den muga-eguna.

3. Irakaskuntza mota bat baino gehiago ematen duten ikastetxeek egun bakar batean bateratzen ahalko dituzte irakaskuntza mota desberdinei dagozkien zaindarien jaiegunak, baina ez dituzte inolaz ere ezarriko zaindarien jaiegun guztiak ikasle guztientzat.

4. Irailaren 2tik eskolak hasi bitarteko egunetan, irakasleek ikasturtearen antolaketarekin zerikusia duten jarduerak eginen dituzte.

5. Eskolak bukatzen direnetik ekainaren 30a arte, bidezkoa bada, honako hauek eginen dira: amaierako ebaluazioei dagozkien probak, ikasturtearen berrikusketa eta ebaluazio lan berariazkoak, modulu bakoitzaren memoria didaktikoak, departamentuen memoriak, azken memoria, orientazioa, erreklamazioak, familien eta ikasleen arreta, baita beharrezkoak diren administrazio egintza guztiak eta hurrengo ikasturtearen antolamenduarekin lotutako jarduerak ere.

6. Eskola-egunetan eskolak eteten ahalko dira bai ebaluazio jarduerak egiteko, bai Hezkuntza Departamentuak lehentasunezkotzat jotzen dituen beste batzuk egiteko.

7. Oro har, ebaluazio bilkurak eta klaustroak ezin izanen dira eskola-orduetan egin.

8. Ikastetxean egindako prestakuntza modulua, hezkuntza sistemako lanbide heziketako zikloetan, eta prestakuntzaldia bai arte plastikoetako eta diseinuko heziketa zikloen kasuan, ikastetxean egiten diren modulua edo moduluen fasea baino lehen egiten den aldez aurretiko ebaluazio partziala egin eta gero hasiko da; salbuespen dira, horri dagokionez, tenporalizazio desberdina egiteko baimena duten modalitate edo heziketa zikloak.

Orobat, lanbide heziketako zikloetan, proiektuaren lanbide modulua lantokiko prestakuntzaren modulua egiten den aldian eginen da, oro har, eta hori bukatu ondoren ebaluatuko da.

Azkenik, arte plastikoetako eta diseinuko erdi eta goi mailako heziketa zikloen amaierako obra eta amaierako proiektuaren modulua hasiko da egiten ikastetxean egindako moduluen prestakuntzaldia egin baino lehenagoko ebaluazio partziala egin eta gero.

2. Ordutegi orokorra.

Nafarroako Foru Komunitateko ikastetxeetako ordutegiak baldintza hauek beteko ditu:

1. Eskolak, oro har, goizeko eta/edo arratsaldeko eskolaldietan emanen dira, astelehenetik ostiralera. Astean 30 eskolaldi emanen dira. Nolanahi ere, eskolak bai goizean bai arratsaldean ematen badira, bien artean, oro har, ordu eta erdiko atsedenaldia utzi beharko da gutxienez. Eskola saioak 55 minutukoak izanen dira gutxienez.

Lanbide heziketa dualaren modalitatean, modalitate hori garatzeko enpresa laguntzaileekin sinatutako hitzarmenetan xedatutakora eta kasuan kasuko prestakuntza programetan xedatutakora egokituko da eskolaldia.

Ikasketa metodologia berriak aplikatzen dituzten ziklo eta moduluetan, irakastaldiak metatzen ahalko dira, edo azpi-irakastaldietan zatitu, modu koherentean egokitu ahal izateko proiektu metodologikoak ezartzen duena ikasketaren inguru berriarekin. Metatze eta zatitze hauek egiten ahalko dira 258/1998 Foru Aginduaren 2.1.b) artikuluak ezartzen duena aplikatuz, egun bakoitzeko moduluak irizpide pedagogikoen arabera banatuz.

2. Bizpahiru irakastaldiren ondoren, gutxienez ere 20 minutuko atsedenaldia programatuko da, uztailaren 16ko 258/1998 Foru Aginduaren 2.1.b) artikuluan ezartzen den moduan, ikastetxearen antolamendu beharren arabera.

3. Ikastetxeek eskola ordutegia handitzeko eskatzen ahalko dute, zenbatean luzatu nahi duten proposatuta, ordubete gehienez ere egunean. Luzapen horrek ez du behin ere ekarriko ituna handitzea ikastetxe pribatu itunduetan, ez eta plantilla ere ikastetxe publikoetan. Hezkuntzako Ikuskapen Zerbitzuak onetsi edo ukatuko du, bideragarritasunaren arabera.

4. Lanbide Heziketa, Arte Plastikoetako eta Diseinuko lanbide ikasketak, Batxilergoa eta Derrigorrezko Bigarren Hezkuntza ematen duten ikastetxeak herrigune berean edo eskola garraioaren ibilbide berean baldin badaude, eta gurasoen elkarteen eta Nafarroako Gobernuaren artean partekaturiko garraioaz baliatu ohi badira, beren artean koordinatuko dituzte sarrera-irteerako ordutegiak.

Gainera, eskola garraioaren zerbitzu horrekin bateragarria diren egutegia eta ordutegia aurkeztu beharko dituzte.

5. Egutegia eta ordutegi orokorra, onetsi ondoren, nahitaez bete beharko dituzte Nafarroako Foru Komunitateko ikastetxe publiko eta pribatu itundu guztiek. Ikastetxeko zuzendariaren erantzukizuna izanen da horiek betearaztea. Egutegien ezarpenaren gainbegiratzea eta kontrola, aldiz, Hezkuntzako Ikuskapen Zerbitzuaren gain egonen da.

6. Ikastetxe bakoitzaren egutegia eta ordutegi orokorra ikastetxeko iragarki oholean eta web-orrian jarri beharko dira, eta aldaezinak izanen dira, non eta Hezkuntzako Ikuskapen Zerbitzuak ez duen horretarako baimena ematen.

3. Salbuespenerako arrazoiak.

Aurreko edozein atalen gaineko salbuespenak Hezkuntzako Ikuskapen Zerbitzuari eskatu beharko zaizkio, hark aztertu eta onar edo bazter ditzan.

4. Tramitazioa.

Tramitazioa egiteko, honela jokatuko da:

1. Ikastetxe bateratuetako zuzendariek, klaustroaren iritzia adituta, eta, BHIen kasuan, Eskola Kontseiluak onetsi ondoren, egutegi eta eskolaldi proposamenak bidaliko dituzte Hezkuntzako Ikuskapen Zerbitzura, 2019ko ekainaren 10a mugaguna izanik, EDUCA kudeaketa programa erabiliz.

2. Hezkuntzako Ikuskapen Zerbitzuak egutegiak eta ordutegiak onetsi edo ukatuko ditu, aztertu ondoren. EDUCA kudeaketa programak ematen duen informatikako euskarriaren bidez iritsiko zaie ikastetxeei Hezkuntzako Ikuskapen Zerbitzuaren jakinarazpena. 2019ko ekainaren 14rako inolako jakinarazpenik hartzen ez duten ikastetxeetako egutegiak eta ordutegiak onetsitzat joko dira.

3. Ikastetxeren batek bere egutegiaren proposamena aipatu epean bidaltzen ez badu, Hezkuntzako Ikuskapen Zerbitzuak ofizioz esleituko dio eranskinaren 1. atalean (Egutegia) ezarritako baldintzak betetzen dituen egutegi bat.

4. Ikastetxeetako zuzendariek, baldin eta lanbide heziketa dualeko proiektuak garatzeko hitzarmena egutegia onetsi eta gero sinatu badute enpresekin, egutegi eta eskolaldien proposamen berria bidaliko dute Hezkuntzako Ikuskapen Zerbitzura, hitzarmena sinatu baino lehenago betiere, hitzarmen horren ondoriozko aldaketen berri emateko. Hezkuntzako Ikuskapen Zerbitzuak, proposatutako aldaketak aztertu ondoren, aldaketa horiek onartzearen aldeko txostena egin edo onartu ahal izateko oharrak eginen ditu.

5. Ikastetxeren batean onartu bada metodologia aktiboko proiektuak erabiltzea egutegia onartu eta gero, beren zuzendariek egutegiaren eta eskolaldiaren proposamen berria bidaliko diote Hezkuntzako Ikuskapen Zerbitzuari, garatu beharreko proiektu metodologikoaren ondoriozko aldaketak sartuz. Hezkuntzako Ikuskapen Zerbitzuak, proposatutako aldaketak aztertu ondoren, aldaketa horiek onartzearen aldeko txostena egin edo onartu ahal izateko oharrak eginen ditu.

Iragarkiaren kodea: F1907037