95. ALDIZKARIA - 2018ko maiatzaren 18a

1. NAFARROAKO FORU KOMUNITATEA

1.4. DIRU-LAGUNTZAK, LAGUNTZAK ETA BEKAK

32E/2018 EBAZPENA, apirilaren 25ekoa, Politika Ekonomiko eta Enpresarialaren eta Lanaren zuzendari nagusiak emana, sindikatuei beren jarduera arruntak gauzatzeko ematen zaien diru-laguntzaren deialdia onesten duena, Nafarroan lortutako ordezkari kopuruaren arabera, 2018. urteari dagokionez.

Garapen Ekonomikorako kontseilariak ekainaren 26an emandako 26E/2017 Foru Aginduaren bitartez, sindikatuei beren jarduera arruntak gauzatzeko ematen zaien diru-laguntzaren araubidea ezarri da, Nafarroan lortutako ordezkari kopuruaren arabera.

Foru Agindu horretako lehen xedapen gehigarriaren arabera, mota horretako diru-laguntzetarako deialdia urtero onetsiko da lanaren alorrean eskumena duen Zuzendaritza Nagusiaren ebazpen bidez.

Adierazitakoarekin bat, eta Nafarroako Foru Komunitateko Administrazioari buruzko abenduaren 3ko 15/2004 Foru Legearen 22. artikuluak ematen dizkidan eskudantziak erabiliz,

EBATZI DUT:

1. Sindikatuei beren jarduera arruntak gauzatzeko ematen zaien diru-laguntzaren deialdia (2018. urteari dagokiona) onestea, Nafarroan lortutako ordezkari kopuruaren arabera.

2. 856.418 euroko gastua baimentzea deialdiaren ondoriozko konpromisoei aurre egiteko, 2018ko gastuen aurrekontuko “Sindikatuei ordezkari kopuruaren arabera egindako transferentziak” izeneko 810012 81500 4819 494108 partidaren kargura.

3. Eskaerak aurkezteko epea hilabetekoa izanen da, deialdi hau Nafarroako Aldizkari Ofizialean argitaratu eta biharamunetik hasita. Eskaerak telematikoki aurkeztu beharko dira nahitaez, Nafarroako Gobernuak Interneten duen Atariaren (www.navarra.es) izapideen katalogoko fitxa erabiliz. Eskaeran adierazi beharko da jakinarazpenak baliabide telematikoen bidez jaso nahi direla. Horretarako, eskatzaileek gaitutako helbide elektroniko bat izan beharko dute, esteka honetan adierazitako jarraibideei jarraikiz eskuratzen ahal dena:

http://www.navarra.es/home_es/Temas/Administracion+electronica/Como+tramitar+los+servicios/Resuelve+tus+dudas/Guias+y+documentacion/Videos+de+ayuda/#punto3

Eskatzaileek gaitutako helbide elektronikorik ez badute, Administrazioak ofizioz sortuko die bat eta han jasoko dituzte jakinarazpen guztiak.

4. Diruz laguntzen ahal diren gastuak egiteko aldia 2017ko abenduaren 1etik 2018ko azaroaren 30era bitartekoa izanen da. Egindako gastutzat hartuko da aldi horretan fakturatzen eta pagatzen dena.

5. Nafarroako enpresetan eta administrazio publikoetan ordezkarien %10 edo gehiago lortu duten sindikatuek diru-laguntzaren konturako ordainketa eskatzen ahal dute 2018ko ekainaren 30a baino lehen, 2017ko abenduaren 1etik 2018ko maiatzaren 30a arte egindako jarduera sindikalagatik. Horretarako, aldi horretan egindako jarduera baloratzen duen memoria aurkeztu beharko dute eskaerarekin batera.

6. Aurreko ataletan arautu ez diren gaietarako, Garapen Ekonomikorako kontseilariak ekainaren 26an emandako 26E/2017 Foru Aginduan xedatutako oinarri arautzaileek arautuko dute deialdia.

7. Ebazpen hau Nafarroako Aldizkari Ofizialean argitaratzea.

8. Ebazpen honek ez du administrazio bidea bukatzen, eta honen aurka gora jotzeko errekurtsoa jartzen ahal da, Garapen Ekonomikorako kontseilariari zuzendua, hilabeteko epean, argitaratu eta biharamunetik hasita.

Iruñean, 2018ko apirilaren 25ean.–Politika Ekonomiko eta Enpresarialaren eta Lanaren zuzendari nagusia, Izaskun Goñi Razquin.

Iragarkiaren kodea: F1805620