1. NAFARROAKO FORU KOMUNITATEA
1.1. XEDAPEN OROKORRAK
1.1.3. Foru Aginduak
155E/2018 FORU AGINDUA, apirilaren 20koa, Osasuneko kontseilariak emana, Elikadura Atalaren eginkizunak eta egitura aldatzen dituena.
Osasunbidea-Nafarroako Osasun Zerbitzuaren Estatutuetan, zeinak irailaren 3ko 171/2015 Foru Dekretuaren bidez onetsi baitziren, ezartzen da, 19.2 artikuluan, ezen zerbitzu asistentzialak, atalak eta unitateak Osasun Departamentuko titularraren foru aginduen bidez ezarriko direla, Osasunbidea-Nafarroako Osasun Zerbitzuko Kudeaketa Zuzendaritzak proposaturik.
Osasuneko kontseilariaren ekainaren 30eko 54/2016 Foru Aginduak ezartzen du Nafarroako Ospitaleguneko egitura organikoa osasun laguntzaz kanpoko atalen eta osasun laguntzaz kanpoko unitateen mailan.
Nafarroako Ospitaleguneko Zuzendaritzak txostena egin du eskatuz Elikadura Atalaren eginkizunak aldatzeko, atal horretako bi unitateren izena eta eginkizunak aldatzeko, eta Elikaduraren Kontrol eta Kalitaterako Unitatea sortzeko, zeina Elikadura Atalaren mendekoa izanen baita.
Horrenbestez, Osasunbidea-Nafarroako Osasun Zerbitzuko zuzendari kudeatzaileak proposaturik, eta Osasunbidea-Nafarroako Osasun Zerbitzuaren Estatutuak onesten dituen irailaren 3ko 171/2015 Foru Dekretuak eta Nafarroako Gobernuari eta Lehendakariari buruzko abenduaren 3ko 14/2004 Foru Legeak ematen dizkidan ahalmenak erabiliz,
AGINDU DUT:
Artikulu bakarra. Aldatzea Osasuneko kontseilariaren ekainaren 30eko 54/2016 Foru Agindua, zeinaren bidez ezartzen baita Nafarroako Ospitaleguneko egitura organikoa osasun laguntzaz kanpoko atalen eta osasun laguntzaz kanpoko unitateen mailan.
Bat.–45. artikulua aldatzen da, eta honela idatzita geldituko da:
45. artikulua. Elikadura Atalaren eginkizunak.
Elikadura Atalak eginkizun hauek beteko ditu:
a) Nafarroako Ospitaleguneko pazienteen elikadura prozesua koordinatzea.
b) Menuak egiteko beharrezko elikagaien eta bestelako janarien erosketa planifikatzea.
c) Nafarroako Ospitaleguneko pazienteen gosariak, bazkariak, askariak eta afariak koordinatzea, horiek prestatzeari, platerean jartzeari, banatzeari, ontziak biltzeari eta ontziak garbitzeari dagokionez.
d) Pazienteei zerbitzatutako jakien kalitatearen eta higienearen gaineko kontrola gainbegiratzea.
e) Ataleko langileen kudeaketa planifikatzea eta koordinatzea.
f) Bere jarduera eremuko aldizkako informazioa prestatzea aginte-koadroarentzat.
Bi.–46. artikulua aldatzen da, eta honela idatzita geldituko da:
46. artikulua. Elikadura Atalaren egitura.
Elikadura Atalak osasun laguntzaz kanpoko unitate hauek ditu bere egituran:
a) Sukaldeko eta Elikadura Azpiegituretako Unitatea.
b) Elikaduraren Kudeaketa eta Informaziorako Unitatea.
c) Elikaduraren Kontrol eta Kalitaterako Unitatea.
Hiru.–46. bis artikulua erantsi da. Hona hemen:
46. bis artikulua. Sukaldeko eta Elikadura Azpiegituretako Unitatearen eginkizunak.
Sukaldeko eta Elikadura Azpiegituretako Unitateak eginkizun hauek beteko ditu:
a) Kalkuluak egitea behar diren janariak erosteko eskaera egiteko.
b) Lana antolatzea sukaldeko ekoizpen instalazioetan.
c) Kontrolatzea behar bezala funtzionatzen dutela ekoizpen, banaketa eta garbiketa azpiegitura guztiek Elikadura lokaletan.
d) Aipatutako eginkizunekin zerikusia izanik, Nafarroako Ospitaleguneko Elikadura Ataleko buruak berariaz agintzen dizkionak.
Lau.–46. ter artikulua erantsi da. Hona hemen:
46. ter artikulua. Elikaduraren Kudeaketa eta Informaziorako Unitatearen eginkizunak.
Elikaduraren Kudeaketa eta Informaziorako Unitateak eginkizun hauek beteko ditu:
a) Behar diren janariak erostea, jasotzea, biltegiratzea eta igortzea.
b) Biltegiratutako produktuen stock-a kontrolatzea.
c) Elikadura instalazioetako lana antolatzea prozesu orokorrei dagokienez.
d) Elikadura prozesuen kontrolerako behar diren programa informatikoak kudeatzea eta adierazleak jasotzea aginte-koadroarentzat.
e) Aipatutako eginkizunekin zerikusia izanik, Nafarroako Ospitaleguneko Elikadura Ataleko buruak berariaz agintzen dizkionak.
Bost.–46. quater artikulua erantsi da. Hona hemen:
46. quater artikulua. Elikaduraren Kontrol eta Kalitaterako Unitatearen eginkizunak.
Elikaduraren Kontrol eta Kalitaterako Unitateak eginkizun hauek beteko ditu:
a) Elikadura Ataleko kolektiboen txandak, presentziak, estaltzeak, oporrak eta absentziak kudeatzea.
b) Elikadura zerbitzuaren AAKGK (arriskuen azterketaren eta kontrol gune kritikoak) sistemaren kontrol adierazleak jasotzea eta artxibatzea.
c) Elikadura prozesuan jasotako laginen emaitza analitikoak jakinaraztea eta artxibatzea Medikuntza Prebentiboarekin eta Nafarroako Osasun Publikoaren eta Lan Osasunaren Institutuarekin batera.
d) Aipatutako eginkizunekin zerikusia izanik, Nafarroako Ospitaleguneko Elikadura Ataleko buruak berariaz agintzen dizkionak.
Xedapen gehigarri bakarra.–Izendapenak.
Berretsi egiten da, Elikadura Unitateko burua izendatu zen baldintza beretan, Sukaldeko eta Elikadura Azpiegituretako Unitateko buru gisa.
Azken xedapena.–Indarra hartzea.
Foru agindu honek Nafarroako Aldizkari Ofizialean argitaratu eta biharamunean hartuko du indarra.
Iruñean, 2018ko apirilaren 20an.–Osasuneko kontseilaria, Fernando Domínguez Cunchillos.
Iragarkiaren kodea: F1805431