1. NAFARROAKO FORU KOMUNITATEA
1.7. BESTELAKOAK
181/2018 EBAZPENA, apirilaren 24koa, Hezkuntzako zuzendari nagusiak emana, jarraibideak onesten dituena 2018-2019 ikasturtean Nafarroako Foru Komunitateko hezkuntza sistemaren Lanbide Heziketako ikasketak eta Arte Plastikoetako eta Diseinuko lanbide ikasketak ematen dituzten ikastetxeei dagozkien eskola egutegia eta ordutegi orokorra prestatzeko.
Ikusirik Lanbide Heziketaren Zerbitzuko zuzendariak emandako aldeko txostena, zeinean proposatzen baita 2018-2019 ikasturtean Nafarroako Foru Komunitateko Lanbide Heziketako ikasketei eta Arte Plastikoetako eta Diseinuko lanbide ikasketei dagokien eskola egutegia prestatzeko jarraibideak onestea.
Nafarroako Foru Komunitateko Administrazioari buruzko abenduaren 3ko 15/2004 Foru Legearen 22.1 d) artikuluak ematen dizkidan ahalmenak erabiliz,
EBATZI DUT:
1. Jarraibideak onestea Nafarroako Foru Komunitateko Lanbide Heziketako ikasketak eta Arte Plastikoetako eta Diseinuko lanbide ikasketak ematen dituzten ikastetxe publikoetan, ikastetxe pribatu itunduetan eta erakundeetan 2018-2019 ikasturtean izanen dituzten eskola egutegia eta ordutegi orokorra prestatzeko. Eranskinean zehaztu dira.
2. Ebazpen honen aurka gora jotzeko errekurtsoa jartzen ahalko da, Hezkuntzako kontseilariari zuzendua, hilabeteko epean, Nafarroako Aldizkari Ofizialean argitaratu eta biharamunetik hasita.
3. Ebazpen hau eta eranskina igortzea Lanbide Heziketaren Zerbitzuari, Hezkuntzako Ikuskapen Zerbitzuari, Antolamenduaren, Orientazioaren eta Aukera Berdintasunaren Zerbitzuari, Unibertsitateen eta Hezkuntzako Teknologien eta Informazio Sistemen Zerbitzuari, Giza Baliabideen Zerbitzuari, Eleaniztasunaren eta Arte Ikasketen Zerbitzuari, Lanbide Heziketaren Plangintza, Antolamendu eta Garapenerako Atalari, Ikastetxeetako Informazioa Kudeatzeko Bulegoari eta Eskolatze Bulegoari, behar diren ondorioak izan ditzaten.
4. Ebazpen hau eta eranskina Nafarroako Aldizkari Ofizialean argitaratzea.
Iruñean, 2018ko apirilaren 24an.–Hezkuntzako zuzendari nagusia, Roberto Pérez Elorza.
ERANSKINA
Jarraibideak Nafarroako Foru Komunitatean hezkuntza sistemako lanbide heziketako ikasketek eta arte plastikoetako eta diseinuko lanbide ikasketek izanen dituzten eskola-egutegia eta ordutegi
orokorra prestatzeko, 2018-2019 ikasturterako
1.–Egutegia.
Nafarroako eskola egutegiak klausula hauek beteko ditu:
1. Ikastetxeetan, hezkuntza sistemako Lanbide Heziketako ikasketetarako eta Arte Plastikoetako eta Diseinuko lanbide ikasketetarako, 2018-2019 ikasturtea 2018ko irailaren 3an hasiko da, eta 2019ko ekainaren 28an bukatuko.
Enplegurako Lanbide Heziketako ikastaroen eta langabe eta langileentzako ikastaroen prestakuntzaldia urte guztian zehar egin daiteke, Hezkuntzako zuzendari nagusiaren ebazpen batean garatuko den egutegi eta ordutegi orokor berariazko batekin.
2. Ikastetxeek egutegirako berariazko proposamen bat egin beharko dute, hezkuntza sistemako Lanbide Heziketako ikasketetarako eta Arte Plastikoetako eta Diseinuko lanbide ikasketetarako. Hauek dira baldintzak:
a) Eguberrietako oporrak: abenduaren 22tik urtarrilaren 7ra arte, biak barne.
b) Aste Santuko oporrak: apirilaren 18tik 28ra arte, biak barne.
c) Jaiegunak, Nafarroako lan egutegi arruntaren arabera: urriaren 12a, azaroaren 1a, abenduaren 3a, abenduaren 6a eta maiatzaren 1a. 2019ko lan egutegi arruntean eskolako egutegiari eragiten dion jaiegunen bat egonez gero, ikastetxeek eskolako egutegia egokitu beharko dute, Lanbide Heziketaren Zerbitzuak emanen dituen jarraibideekin bat betiere.
d) Hezkuntzako zaindariaren jaieguna: urtarrilaren 31 hezkuntza sistemaren Lanbide Heziketako ikasketetarako, eta urriaren 22a Arte Plastikoetako eta Diseinuko lanbide ikasketetarako. Ikastetxeek zilegi izanen dute beste egun batera pasatzea horren ospakizuna.
e) Herriko jaieguna, Nafarroako Foru Komunitateko herrietako jaiegunak zehazten dituen arauan ezarri bezala. Data hori eskola-egun ez den egun batean tokatzen bada, ikastetxeak beste egun bat hautatzen ahalko du.
f) Eguberrietako eta Aste Santuko oporraldiak ezin dira inola ere luzatu.
g) Jarri diren eskola-egunez gainetikoak, aurreko ataletan jaieguntzat finkatu ez badira, eskola gabeko laneguntzat joko dira.
h) Bertaratzeko modalitate orokorreko eskola-egunen kopurua:
Prestakuntza modulua lantokietan ez duten prestakuntza zikloetan, edo prestakuntzaldi praktikoa enpresa, estudio eta tailerretan ez duten zikloetan: 175 egun.
Ikasturte guztian zehar prestakuntza modulua lantokietan duten prestakuntza zikloetan, edo prestakuntzaldi praktikoa enpresa, estudio eta tailerretan duten zikloetan: 175 egun.
–Ikasturtearen azken hiruhilekoan lantokietako prestakuntza modulua lantokietan duten edo prestakuntzaldia enpresa, estudio eta tailerretan duten prestakuntza ziloetarako: eskola-egunen kopurua zatiketa honetatik ateratzen dena izanen da: ikastetxeko prestakuntzarako curriculumak ezarritako orduak eguneko 5,5 eskola orduz zatituta ateratakoa. Lantokietan egiten den prestakuntza, oro har, ekainaren 14an bukatuko da.
i) Eskola-egunen kopurua, modalitate dualeko ikastetxean: ikastetxeek ziklo, talde eta ikasle mota bakoitzarentzako eskola-egunen kopurua egokituko dute, kontuan harturik, horretarako, bai aipatu modalitatea garatzeko enpresa laguntzaileekin sinatutako hitzarmenak, bai prestakuntza planean xedatutakoa. Betiere, Lanbide Heziketaren Zerbitzuaren oniritzia beharko dute horretarako.
j) Ikastetxean ematen diren heziketa zikloetako moduluen azken ebaluazioaren deialdiei dagozkien probak egiteko erabiltzen diren ikasturteko egunak eskola-eguntzat joko dira, baita eskolak bukatu ondoko egunak ere: ekainaren 17a, 18a, 19a eta 20a. Azken ebaluazioan bigarrenez egiteko erabiltzen ahalko dira.
Lanbide Heziketako zikloak eta Arte Plastikoetako eta Diseinukoak ez ezik, Batxilergoa eta Derrigorrezko Bigarren Hezkuntza ere irakasten dituzten ikastetxeetan, eskolak bukatu ondoko hiru egunak joko dira eskola eguntzat ikasketa horietarako. Egun horietan, 2018-2019 ikasturteko deialdi bereziko azterketak eginen dira.
k) Lehenbiziko eskola-eguna 2018ko irailaren 7a izanen da, eta azkena, berriz, 2019ko ekainaren 14a.
l) Ikasketa mota bat baino gehiago irakasten dituzten ikastetxeek lehenbiziko eta azken eskola-egunak alda ditzakete, ebazpen honetan xedatutakoarekin bat edo DBHko eta Batxilergoko egutegia eta ordutegi orokorra arautzen dituen ebazpenean xedatutakoarekin bat.
m) Hezkuntza sistemako Lanbide Heziketako irakaskuntzen eta Arte Plastikoetako eta Diseinuko lanbide irakaskuntzen bertaratzeko modalitate orokorra: lantokietan prestakuntza modulurik ez duen edo enpresetan, estudioetan eta lantegietan prestakuntzaldi praktikoa egiteko faserik ez duen kurtsoa:
–Lehenbiziko azken ebaluazioari dagozkion ebaluazio probak zer egunetan egiten diren ezartzeko, kontuan hartu behar da azken ebaluazioaren lehen saioa ekainean egin behar dela eta ekainaren 6a dela azken eguna ikasleei lehenbiziko azken ebaluazio horri dagozkion kalifikazioak emateko.
–Ikastetxeak azken ebaluazioko lehenbiziko deialdiaren kalifikazioak emateko zehaztutako mugaegunaren biharamunetik klaseak bukatzeko zehaztutako egunera arte doan aldia antolatu beharko du, azken ebaluazioko bigarren deialdiari dagozkion probak egin behar dituzten ikasleak behar bezala prestatzeko. Ikastetxeak, halaber, curriculumeko errefortzurako jarduerak antolatuko ditu egun horietan Oinarrizko Lanbide Heziketako zikloetako ikasleentzat.
Aldi hori antolatzeko, hezkuntza sistemaren Lanbide Heziketako ikasketak eta Arte Plastikoetako eta Diseinuko lanbide ikasketak irakasten dituzten ikastetxeen antolaketa eta funtzionamendua arautzen dituzten jarraibideak onesteko Hezkuntzako zuzendari nagusiak ematen duen ebazpenean ezarritakoa bete beharko da.
–Bigarren azken ebaluazioari dagozkion ebaluazio probak ekainean egin behar dira, kontuan izanda ekainaren 20a azken eguna dela ikasleei bigarren azken ebaluazio horri dagozkion kalifikazioak emateko.
n) Hezkuntza sistemako Lanbide Heziketako irakaskuntzen eta Arte Plastikoetako eta Diseinuko lanbide irakaskuntzen bertaratzeko modalitate orokorra: lantokietan prestakuntza modulua duen kurtsoa, edo enpresetan, estudioetan eta lantegietan prestakuntzaldi praktikoa egiteko fasea duena, hirugarren hiruhilekoan garatua:
–Lehenbiziko azken ebaluazioko probak zer egunetan eginen diren ezartzeko, kontuan hartu beharko da azken ebaluazioko lehen saioa –hartan erabakitzen baita ikaslea Lantokiko Prestakuntza modulura edo enpresetan, estudioetan eta lantegietan prestakuntzaldi praktikora pasatzen den ala ez–, modulu edo aldi hori hasi baino lehen egin behar dela.
–Ikastetxeak, bai mailaz igotzen ez diren ikasleentzat bai zenbait modulu gainditu gabe mailaz igotzen diren ikasleentzat, azken ebaluazioko lehen deialdiko kalifikazioak eman eta biharamunetik eskolak bukatzeko zehaztutako egunera arte doan aldia antolatu behar du, ikasleak behar bezala presta daitezen azken ebaluazioko bigarren deialdiari dagozkion ebaluazio probak egiteko.
Aldi hori antolatzeko, hezkuntza sistemaren Lanbide Heziketako ikasketak eta Arte Plastikoetako eta Diseinuko lanbide ikasketak irakasten dituzten ikastetxeen antolaketa eta funtzionamendua arautzen dituzten jarraibideak onesteko Hezkuntzako zuzendari nagusiak ematen duen ebazpenean ezarritakoa bete beharko da.
–Oro har, bigarren azken ebaluazioari dagozkion ebaluazio probak ekainean egin behar dira, kontuan izanda ekainaren 20a dela azken eguna ikasleei bigarren azken ebaluazio horri dagozkion kalifikazioak emateko. Salbuespen bat dago, ordea: Lantokiko Prestakuntzaren modulura edo enpresa, estudio eta lantegietako prestakuntzaldi praktikora pasatu diren goi mailako zikloetako ikasleek, unibertsitatean sartzeko ebaluazio proba egin nahi badute, maiatzaren 17a dute azken eguna bigarren azken ebaluazioari dagozkion kalifikazioak jasotzeko, salbu eta Lantokiko Prestakuntzaren moduluarena eta proiektuarena edo edo enpresetan, estudioetan eta lantegietan prestakuntzaldi praktikoa egiteko fasearena.
o) Lanbide Heziketa Dualaren modalitatea: enpresaren prestakuntza jarduerara joaten ez den kurtsoan, bertaratzeko modalitate orokorrerako m) apartatuan xedatutakoari lotuko zaio.
p) Lanbide Heziketa Dualaren modalitatea: enpresaren prestakuntza jarduerara joaten ez den kurtsoan:
–Lehenbiziko azken ebaluazioaren probak egiteko egunak egokituko dira, ziklo, talde eta ikasle bakoitzerako, modalitate hori gauzatzeko enpresa laguntzaileekin izenpetutako hitzarmenetan xedatutakora eta kasuan kasuko prestakuntza planean xedatutakora.
–Ikastetxeak, Lantokiko Prestakuntzaren modulura edo enpresa, estudio eta lantegietako prestakuntzaldi praktikora pasatzen ez diren ikasleentzat nahiz zenbait modulu gainditu gabe igotzen diren ikasleentzat, azken ebaluazioko lehen deialdiko kalifikazioak eman eta biharamunetik eskolak bukatzeko zehaztutako egunera arte doan aldia antolatu behar du, ikasleak behar bezala presta daitezen azken ebaluazioko bigarren deialdiari dagozkion ebaluazio probak egiteko.
Aldi hori antolatzeko, hezkuntza sistemaren Lanbide Heziketako ikasketak eta Arte Plastikoetako eta Diseinuko lanbide ikasketak irakasten dituzten ikastetxeen antolaketa eta funtzionamendua arautzen dituzten jarraibideak onesteko Hezkuntzako zuzendari nagusiak ematen duen ebazpenean ezarritakoa bete beharko da.
–Oro har, bigarren azken ebaluazioari dagozkion ebaluazio probak ekainean egin behar dira, kontuan izanda ekainaren 20a dela azken eguna ikasleei bigarren azken ebaluazio horri dagozkion kalifikazioak emateko. Salbuespen bat dago, ordea: Lantokiko Prestakuntzaren modulura edo enpresa, estudio eta lantegietako prestakuntzaldi praktikora pasatu diren goi mailako zikloetako ikasleek, unibertsitatean sartzeko ebaluazio proba egin nahi badute, maiatzaren 17a dute azken eguna bigarren azken ebaluazioari dagozkion kalifikazioak jasotzeko, salbu eta Lantokiko Prestakuntzaren moduluarena eta proiektuarena edo edo enpresetan, estudioetan eta lantegietan prestakuntzaldi praktikoa egiteko fasearena.
3. Irakaskuntza mota bat baino gehiago ematen duten ikastetxeek egun bakar batean bateratzen ahalko dituzte irakaskuntza mota desberdinei dagozkien zaindarien jaiegunak, baina ez dituzte inolaz ere ezarriko zaindarien jaiegun guztiak ikasle guztientzat.
4. Irailaren 3tik eskolak hasi bitarteko egunetan ikasturtearen antolaketarekin zerikusia duten jarduerak eginen dituzte irakasleek.
5. Eskolak bukatu eta ekainaren 28a arte, bidezkoa bada, honako hauek eginen dira: azken ebaluazioei dagozkien probak, ikasturtearen berrikusketa eta ebaluazio lanak, modulu bakoitzaren memoria didaktikoak, departamentuen memoriak, amaierako memoria, orientazioa, erreklamazioak, ikasleak eta familiak hartzea eta beharrezkoak diren administrazio egintza eta egintza akademiko guztiak, baita hurrengo ikasturtea antolatzearekin lotutako jarduerak ere.
6. Eskola-egunetan eskolak eteten ahalko dira, bai ebaluazio jarduerak egiteko, bai eta Hezkuntza Departamentuak lehentasunezkotzat hartzen dituenak egiteko ere.
7. Oro har, ebaluazio bilkurak eta klaustroak ezin izanen dira egin eskola-orduetan.
8. Ikastetxean egindako moduluen azken ebaluazioaren ondoren emanen zaie hasiera bai hezkuntza sistemako Lanbide Heziketako zikloetan egin beharreko lantokiko prestakuntzaren moduluari, bai Arte Plastikoetako eta Diseinuko heziketa zikloen kasuan enpresa, estudio edo lantegietan egin beharreko praktikaldiaren faseari; salbuespen dira, horri dagokionez, tenporalizazio desberdina egiteko baimena duten modalitate edo heziketa zikloak.
Nolanahi ere, prestakuntza eta segimendu jarduerak programatuko dira Lantokiko Prestakuntzaren modulura edo enpresa, estudio edo lantegietako prestakuntzaldi praktikora pasatu ez diren ikasleentzat eta zenbait modulu gainditu gabe igo diren ikasleentzat, ezarritako mugaegunera arte. Aldi hori antolatzeko, Lanbide Heziketako ikasketak eta Arte Plastikoetako eta Diseinuko lanbide ikasketak irakasten dituzten ikastetxeen antolaketa eta funtzionamendua arautzen dituzten jarraibideak onesteko zuzendari nagusiak ematen duen ebazpenean ezarritakoa bete beharko da.
Orobat, Lanbide Heziketako zikloetan, proiektuaren lanbide modulua lantokiko prestakuntzaren modulua egiten den aldian eginen da, oro har, eta hori bukatu ondoren ebaluatuko da.
Azkenik, ikastetxean egindako moduluen azken ebaluazioaren ondoren emanen zaio hasiera Arte Plastikoetako eta Diseinuko erdi eta goi mailako heziketa zikloen amaierako obra eta amaierako proiektuaren moduluari.
2.–Ordutegi orokorra.
Nafarroako Foru Komunitateko ikastetxeetako ordutegiak baldintza hauek beteko ditu:
1. Eskolak, oro har, goizeko eta/edo arratsaldeko eskolaldietan emanen dira, astelehenetik ostiralera. Astean 30 eskolaldi emanen dira. Nolanahi ere, eskolak bai goizean arratsaldean ematen badira, bien artean, oro har, ordu eta erdiko atsedenaldia utzi beharko da gutxienez. Eskola saioak 55 minutukoak izanen dira gutxienez.
Lanbide Heziketa Dualaren modalitatean, modalitate hori garatzeko enpresa laguntzaileekin sinatutako hitzarmenetan xedatutakora eta kasuan kasuko prestakuntza programetan xedatutakora egokituko da eskolaldia.
2. Bizpahiru eskolaldiren ondoren, gutxienez ere 20 minutuko atsedenaldia programatuko da, uztailaren 16ko 258/1998 Foru Aginduaren 2.1.b) artikuluan ezartzen den moduan, ikastetxearen antolamenduzko beharren arabera.
3. Ikastetxeek eskola ordutegia handitzeko eskatzen ahalko dute, zenbatean luzatu nahi duten proposatuta, ordubete gehienez ere egunean. Luzapen horrek ez du behin ere ekarriko ituna handitzea ikastetxe pribatu itunduetan, ez eta plantilla ere ikastetxe publikoetan. Hezkuntzako Ikuskapen Zerbitzuak onetsi edo ukatuko du, bideragarritasunaren arabera.
4. Lanbide Heziketa, Arte Plastikoetako eta Diseinuko lanbide ikasketak, Batxilergoa eta Derrigorrezko Bigarren Hezkuntza ematen duten ikastetxeak herrigune berean edo eskola garraioaren ibilbide berean baldin badaude, eta gurasoen elkarteen eta Nafarroako Gobernuaren artean partekaturiko garraioaz baliatu ohi badira, beren artean koordinatuko dituzte sarrera-irteerako ordutegiak.
Gainera, eskola garraioaren zerbitzu horrekin bateragarria diren egutegia eta ordutegia aurkeztu beharko dituzte.
5. Egutegia eta ordutegi orokorra, onetsi ondoren, nahitaez bete beharko dituzte Nafarroako Foru Komunitateko ikastetxe publiko eta pribatu guztiek. Ikastetxeko zuzendariaren erantzukizuna izanen da horiek betearaztea. Egutegien ezarpenaren gainbegiratzea eta kontrola, aldiz, Hezkuntzako Ikuskapen Zerbitzuaren gain egonen da.
6. Ikastetxe bakoitzaren egutegi eta ordutegi orokorra ikastetxeko iragarki oholean jarri beharko da ikusgai, eta aldaezina izanen da, non eta Hezkuntzako Ikuskapen Zerbitzuak ez duen horretarako baimena ematen.
3.–Salbuespenak.
Aurreko edozein atalen gaineko salbuespenak Hezkuntzako Ikuskapen Zerbitzuari eskatu beharko zaizkio, azter ditzan.
4.–Tramitazioa.
Tramitazioa egiteko, honela jokatuko da:
1. Ikastetxe bateratuetako zuzendariek, klaustroaren iritzia adituta, eta, BHIen kasuan, Eskola Kontseiluak onetsi ondoren, egutegi eta eskolaldi proposamenak bidaliko dituzte Hezkuntzako Ikuskapen Zerbitzura, 2018ko ekainaren 25a mugaguna izanik, “EDUCA” kudeaketa programa erabiliz.
2. Hezkuntzako Ikuskapen Zerbitzuak egutegiak eta ordutegiak onetsi edo ukatuko ditu, aztertu ondoren. “EDUCA” kudeaketa programak ematen duen informatikako euskarriaren bidez iritsiko zaie ikastetxeei Hezkuntzako Ikuskapen Zerbitzuaren jakinarazpena. 2018ko ekainaren 8rako inolako jakinarazpenik hartzen ez duten ikastetxeetako egutegiak eta ordutegiak onetsitzat joko dira.
3. Ikastetxeren batek bere egutegiaren proposamena aipatu epean bidaltzen ez badu, Hezkuntzako Ikuskapen Zerbitzuak ofizioz esleituko dio eranskinaren 1. atalean (Egutegia) ezarritako baldintzak betetzen dituen egutegi bat.
4. Ikastetxeetako zuzendariek, baldin eta Lanbide heziketa dualeko proiektuak garatzeko hitzarmena egutegia onetsi eta gero sinatu badute enpresekin, egutegi eta eskolaldien proposamen berria bidaliko dute Hezkuntzako Ikuskapen Zerbitzura, sinatu baino lehenago betiere, hitzarmen horren ondoriozko aldaketen berri emateko. Hezkuntzako Ikuskapen Zerbitzuak, proposatutako aldaketak aztertu ondoren, aldaketa horiek onartzearen aldeko edo kontrako txostena emanen du.
5.–2018-2019 ikasturteko egutegia. Asteko lanaldia.
Deskargatu 2018-2019 ikasturteko egutegia (astekoa), eranskinetik(PDFa).
6.–2018-2019 ikasturteko egutegia. Ikasturtea.
Deskargatu 2018-2019 ikasturteko egutegia (ikasturtea), eranskinetik (PDFa).
Iragarkiaren kodea: F1805542
