2. NAFARROAKO TOKI ADMINISTRAZIOA
2.1. OPOSIZIOAK ETA LEHIAKETAK. LAN PUBLIKOAREN ESKAINTZA
LIZARRA
Deialdia, zerbitzu anitzetako enplegatua izateko hiru lanpostu huts lekualdatze lehiaketa bidez betetzeko
OINARRIAK
1.–Xedea.
1.1. Deialdia iragartzen da Lizarrako Udaleko zerbitzu anitzetako enplegatua izateko hiru lanpostu huts lekualdatze lehiaketa bidez betetzeko.
Plantilla organikoan 6.3, 6.5 eta 6.9 kodeei dagozkie, M6-B1 hizkuntza eskakizuna dute, eta Zerbitzu, Obra eta Lorategien Alorrari atxikita daude.
1.2. Izendatzen direnek honako eginkizun hauek bete beharko dituzte:
–Obra eta lorategietako lan taldearen berezko jarduketekin ikusteko duten zerbitzu anitzak; hona hemen horietariko batzuk, aipamen hutsez eta bertzelakoak baztertu gabe.
a) Berariazko eginkizunak:
Igeltserotza lanak, orokorrean.
Karrika eta plazetako lorategi eta zuhaitzetan aritzea, eta beraz erein, landatu, ureztatu, inausi, lurra lantzea eta abar, parke eta lorategietako mantentze-lanen barnean.
Soldadura lanak.
Elektrizitate lanak.
b) Eginkizun orokorrak:
Udal bulego, instalazio eta biltegietako mantentze-lanak.
Zer zerbitzutan atxikitzen diren, harexek berezko dituen makina, erreminta eta lanabesak erabiltzea eta haiek mantendu eta konpontzeko lanak egitea.
Hiri altzariak paratzea eta haiei dagozkien mantentze-lanak egitea: zutoinak, seinaleak, kale-argiak, bankuak, iturriak, etab.
Altzariak eta tresnak lekuz aldatu eta paratzea.
Agertokiak, hesiak eta gainerakoak muntatzea eta desmuntatzea, besta eta ekitaldi publikoetan.
Hala behar denean, ibilgailuak eta makinak gidatzea.
Bere maila eta kategoriaren barnean manatzen zaizkion gainerako guztiak.
2.–Lanpostu hutsen kopurua handitzea.
2.1. Deialdi honetako lanpostuen kopurua handitu ahalko da, epaimahaiak deialdia egin duen organoari lehiakideen zerrenda, lortutako puntuen hurrenkeraren araberakoa, igortzen dion egunean hutsik dauden lanpostuak gehituz.
2.2. Lehiaketan beteko diren lanpostuak hauek izanen dira: deialdian bertan hasieratik eskainiak eta, hala badagokio, aurreko lerroaldeak aipatzen duen kopurua handitzearen ondoriozkoak, baita lehiaketan beste lanpostu bat lortzen dutenek hutsik uzten dituztenak ere.
2.3. Izangairen batek lehiaketa honetan lanpostua lortu eta bere lanpostuaren izena deialdiko lanpostuarena ez bezalakoa baldin bada, eskuratutako lanpostuaren izena hartuko du lanpostu berriaz jabetzen den unetik. Orobat, dagokionean, lehiaketaren ondorioz hutsik gelditu eta berriz lehiakideei eskaintzen zaizkien lanpostuen izena aldatu eginen da.
3.–Aplikatu beharreko araudia.
Lekualdatze lehiaketa hau ondoko arauei jarraikiz gauzatuko da: Nafarroako Administrazio Publikoen zerbitzuko langileen estatutuaren testu bategina onesten duen abuztuaren 30eko 251/1993 Legegintzako Foru Dekretua aplikatzeko arauak, hura garatu eta betearazteko asmoz lanpostuak betetzeari buruzko azaroaren 6ko 215/1985 Foru Dekretuaren bidez onetsitako Erregelamendua, eta deialdiaren oinarriak.
4.–Betebeharrak.
4.1. Indarra duen araudian xedatutakoaren arabera, lekualdatze lehiaketa honetan parte hartu ahal izateko, ondoko betebeharrak bete beharko dira, eskabideak aurkezteko epearen azken egunean eta esleitutako lanpostuaz jabetzeko orduan:
a) Lizarrako Udalaren edo haren erakunde autonomoen langile finko izatea, egoera administratiboa edozein dela ere.
b) D maila edo taldekoa izatea.
4.2. Nahitaezko eszedentzian edo lanpostu erreserbarik gabe borondatezko eszedentzian dauden funtzionarioek zilegi izanen dute, halaber, lehiaketan parte hartzea, baldin eta deialdiak eskatzen dituen betebeharrak betetzen badituzte; horrela, berriz sartuko dira jarduneko zerbitzuan eta lanpostu bat behin betiko esleituko zaie.
4.3. Lehiaketa honetan parte hartzeak ez du inolaz ere ekarriko parte hartu aurretik lehiakideek zuten araubide juridikoa aldatzea.
5.–Ordainsariak.
Lekualdatze lehiaketa honen bidez lanpostua betetzen duenak indarrean dauden xedapenek eta plantilla organikoak esleitzen dizkioten lansariak jasoko ditu.
6.–Eskabideak aurkezteko epea eta tokia.
6.1. Deialdian parte hartzeko, eskabidea aurkeztu beharko da Lizarrako Udaleko erregistro orokorrean, edo Administrazio Publikoen Administrazio Prozedura Erkideari buruzko urriaren 1eko 39/2015 Legearen 16.4 artikuluan aurreikusitako edozein baliabideren bidez, hamabost egun naturaleko epean, deialdi hau Nafarroako Aldizkari Ofizialean argitaratu eta biharamunetik hasita.
6.2. Eskabideak deialdi honetako eranskinean argitaratutako ereduari jarraikiz aurkeztuko dira eta horietan izangaiek adierazi beharko dute eskatutako baldintza guztiak betetzen dituztela eskabideak aurkezteko epea bururatzen den egunerako.
6.3. Eskabideak aurkezteko epea ezin izanen da luzatu.
6.4. Eskabidearekin batera, deialdian ezarritako baremoaren arabera alegatzen diren merezimenduen egiaztagiriak aurkeztu behar dira, behar bezala kautoturik.
7.–Onartuen behin-behineko zerrenda eta erreklamazioak.
7.1. Eskabideak aurkezteko epea buruturik, Lizarrako Udaleko alkateak onartuen eta baztertuen behin-behineko zerrenda onetsiko eta Nafarroako Aldizkari Ofizialean argitaratzeko aginduko du. Bertan ohartaraziko da baztertuek erreklamazioak egin ahal izanen dituztela hurrengo bost egun naturaleko epean, baita akatsak zuzendu ere, halakorik denean.
7.2. Erreklamazioak egiteko epea burutu eta haiek ebatzi ondoren, alkateak onartuen eta baztertuen behin betiko zerrenda onetsiko du, eta Nafarroako Aldizkari Ofizialean argitaratzeko aginduko du.
7.3. Ezarritako epean eskabiderik aurkeztu ezean, alkateak lehiaketa bete gabe gelditu dela deklaratzen duen ebazpena emanen du. Ebazpen hori Nafarroako Aldizkari Ofizialean argitaratu beharko da.
7.4. Izangai bazterturik ez bada, zuzenean onetsiko da behin betiko zerrenda, eta Nafarroako Aldizkari Ofizialean argitaratuko.
8.–Epaimahaiko kideak.
8.1. Hauek izanen dira lehiaketa kalifikatzeko epaimahaian:
Epaimahaiburua: Koldo Leoz Garciandia, Lizarrako Udaleko alkatea.
Ordezkoa: Emma Ruiz Sanz, Lizarrako Udaleko hirigintzako zinegotzia.
Epaimahaikideak:
1. Alfredo Martinez de Carlos, Lizarrako Udaleko Zerbitzuetako burua.
Ordezkoa: Lizarrako Udaleko arkitektoa.
2. Lizarrako Udaleko langileen ordezkari bat.
Ordezkoa: Lizarrako Udaleko langileen ordezkari bat.
Idazkaria: Lizarrako Udalekoa, José Luis Navarro Resano.
8.2. Onartuen eta baztertuen behin betiko zerrenda argitaratu ondoko bost eguneko epean eratuko da epaimahaia.
8.3. Epaimahaia ezin izanen da eratu, ezta jardun ere, kideen gehiengo osoa gutxienez bildu gabe.
8.4. Epaimahaiak gehiengoz ebatziko ditu deialdi honen arauen interpretazio eta aplikazioaren inguruko arazoak.
8.5. Epaimahaiak aholkulari espezialistak ekarri ahalko ditu lehiaketako atal guztietan edo batzuetan lagundu dezaten. Aholkulari horiek beren espezialitate teknikoetan aritzera mugatuko dira eta horietan baino ez diote laguntzarik emanen epaimahaiari.
8.6. Administrazio prozeduraren arauetan esku ez hartzeko aurreikusitako arrazoiren bat gertatzen denean, epaimahaiko kideek parte hartzeari uko egin beharko diote, eta hori jakinarazi deialdia egin duen organoari. Izangaiek, halaber, zilegi dute mahaikideak errefusatzea, egoera horietako bat gertatzen denean.
9.–Lekualdatze lehiaketa nola eginen den.
Lekualdatze lehiaketan honako hauek baloratuko dira:
a) Administrazio publikoetan egindako zerbitzuak: 35 puntu gehienez.
b) Prestakuntza: 9 puntu gehienez.
c) Euskaraz jakitea: 6 puntu gehienez.
d) Lanpostuko edukiari eta eginkizunei buruzko proba praktikoa: 50 puntu gehienez.
Onartu eta baztertuen behin betiko zerrenda onesten duen ebazpenean zehaztuko dira proba praktikoa hasteko tokia, eguna eta ordua.
Proba praktikoa egin aurretik, epaimahaiak oinarri honetako a), b) eta c) ataletan aipatzen diren elementuak baloratuko ditu. Atal horien puntuazioa ez da kanporatzailea izanen. Epaimahaiak edozein unetan eskatu ahalko ditu haiei buruzko azalpenak eta datu osagarriak.
Oinarri honetako a), b) eta c) ataletan aipatzen direnak (merezimenduak) alegatu eta justifikatuz gero, epaimahaiak dagozkien kalifikazioa eta puntuazioa emanen ditu, eransten den baremoaren arabera.
Merezimendu guztiak agiri bidez alegatu eta frogatuko ditu izangai bakoitzak, lekualdatze lehiaketa honetan parte hartzeko eskaera aurkeztean.
Epaimahaiak ezin izanen du inolaz ere kontuan hartu alegatu gabeko eta agirien bidez frogatu gabeko merezimendurik, ezta atal bakoitzean aipatutako gehieneko puntuazioa baino altuagorik eman ere.
Oinarri honetako a), b) eta c) ataletan aipatzen direnen kalifikazioa bukatu ondoren, lortutako puntuazioak argitaratuko ditu epaimahaiak Lizarrako Udalaren iragarki-taulan, eta bost eguneko epea ezarriko du interesdunek haien balorazioaren gainean zuzenbidekotzat jotzen duten guztia alega dezaten.
Proba praktikoan, bete beharreko eginkizunei buruzko kasu bat edo gehiago garatu beharko dira, gehienez ordubetean. Proba praktikoa kanporatzailea izanen da, eta gutxienez 10 puntu lortu behar dira hura gainditzeko. Dei bakarrean eginen da, eta izangaiek Nortasun Agiri Nazionala eraman beharko dute edo, bestela, epaimahaiaren iritziz onargarria den identifikazio beste agiriren bat. Kanpo geldituko dira agertzen ez direnak.
Epaimahaiak iragarki-taulan argitaratuko ditu emaitzak.
Puntuazioetan berdinketarik gertatuz gero, proba praktikoan puntuaziorik altuena lortu dutenen alde ebatziko da. Berdinketak bere hartan jarraituz gero, administrazio publikoen zerbitzuan antzinatasun handiena duenaren alde ebatziko da; horretan ere berdinduta badaude, lehiakide zaharrenaren alde.
10.–Izangaien zerrenda, lortutako puntuazioaren araberakoa.
Aurkeztutako erreklamazioak ebatzi ondoren, epaimahaiak parte-hartzaile guztien behin betiko puntuazioak emanen ditu argitara Lizarrako Udaleko iragarki-taulan. Halaber, alkateari igorriko dio izangaien zerrenda, espediente osoarekin batera, lortutako puntuazioaren arabera ordenaturik, alkateak behar den ebazpena eman dezan hasieran deitutako lanpostuen kopurua handitzeari dagokionez.
11.–Lanpostu hutsak aukeratzea.
Lehiakideek lortutako puntuazioaren arabera hautatzen ahalko dituzte lanpostu hutsak, alkateak hartarako deituko duen ekitaldian.
Behar bezala arrazoitutako ezinbestekoetan salbu, lanpostua hautatzen ez duten lehiakideek eskubide guztiak galduko dituzte lehiaketaren xedeko lanpostu hutsak betetzeko.
12.–Esleipena eta lanpostuaz jabetzea.
Alkateak, ebazpen baten bidez, dagozkien lanpostuak esleituko dizkie lehiakideei, eta esleipen hori Nafarroako Aldizkari Ofizialean argitara dadila aginduko du.
Lehiakideek esleipenari buruzko ebazpena jakinarazi eta hamar egun naturaleko epean jabetu beharko dute lanpostuaz, deialdia egin duen organoak ez badu bertan jabetzeko data finko bat ezartzen.
13.–Errekurtsoak.
Deialdi honen, oinarrien eta aplikatzeko egintzen aurka errekurtso hauetako bat aurkez daiteke, hautara:
a) Berraztertzeko errekurtsoa, egintza burutu duen organo berari zuzendua, hilabeteko epean, hura jakinarazi edo argitaratu eta biharamunetik hasita.
b) Administrazioarekiko auzi-errekurtsoa, Administrazioarekiko Auzien Iruñeko Epaitegiari zuzendua, bi hilabeteko epean, errekurritutako egintza edo erabakia jakinarazi edo argitaratu eta biharamunetik hasita.
c) Gora jotzeko errekurtsoa, Nafarroako Administrazio Auzitegiari zuzendua, hilabeteko epean, errekurritutako egintza edo erabakia argitaratu edo jakinarazten denetik hasita.
Epaimahaiaren egintzen aurka, gora jotzeko errekurtsoa paratu ahalko da, Lizarrako alkateari zuzendua, errekurtsoa paratzen zaion egintza edo erabakia jakinarazi ondoko hilabetean.
Lizarran, 2018ko martxoaren 22an.–Alkatea, Koldo Leoz Garciandia.
1. ERANSKINA
Eskabide-orria (PDFa).
2. ERANSKINA
Merezimenduak baloratzeko baremoa
a) Administrazio publikoetan egindako zerbitzuak (35 puntu gehienez).
1.–Edozein administrazio publikotan, deialdian eskaintzen den lanpostu berdinean edo gisako batean (zerbitzu anitzeko enplegatua) egindako zerbitzuak: 2 puntu urte bakoitzeko (20 puntu gehienez).
2.–Edozein administrazio publikotan, deialdikoa ez beste lanpostuetan egindako zerbitzuak: puntu bat urtebeteko (15 puntu gehienez).
Oharrak:
a.3.1) Urteen kopurua osoa ez bada, zerbitzuan egindako aldiari proportzioan dagokion puntuazioa emanen da.
a.3.2) Lanaldi partzialean egindako zerbitzuen kasuan, behar den zatia kenduko da.
a.3.3) Deialdia argitaratu ondoren egindako zerbitzuak ez dira baloratuko.
a.3.4) Funtzionarioa zerbitzu berezietan edo eszedentzia berezian egon bada, edo unitate organiko bateko buru edo zuzendari lanetan aritu bada, aldi horietako zerbitzuak kontatzeari begira, egoera horietan sartzean zeukan lanpostuan egin izan balitu bezala kontatuko dira.
b) Prestakuntza (9 puntu gehienez).
Erakunde edo zentro publiko edo pribatuek antolatutako prestakuntza jardueretan, lanpostuaren eginkizunekin zerikusia dutenetan, parte hartzea: puntu bat emanen da kreditu akademiko edo horren baliokide bakoitzeko (10 ikastordu), eta gehienez ere 9 puntu.
Oharrak:
b.1) Baloratu beharreko ikastaroetan, eskola orduen zatikiak hainbanatuko dira.
b.2) Ikastorduen kopurua agertzen ez duten ziurtagiriei kreditu bateko balorazioa emanen zaie.
b.3) Ikasturte akademiko bateko iraupena agertzen duten ziurtagiriei 12 kredituko balorazioa emanen zaie.
b.4) Atal honetan aipatutako merezimenduak baloratuko dira soilik deialdiko lanpostuarekin zerikusia baldin badute.
c) Euskaraz jakitea (6 puntu bitarte).
Plantilla organikoan lanpostu honetarako onetsitako hizkuntza eskakizuna M6-B1 izanik, zentro ofizialetako B1tik gorako tituluak hartuko dira kontuan.
B1: 3 puntu, B2: 4,5 puntu; C1: 6 puntu.
Iragarkiaren kodea: L1804080