2. NAFARROAKO TOKI ADMINISTRAZIOA
2.2. XEDAPEN ETA IRAGARKIAK, HERRIEN ARABERA ANTOLATUAK
ALLIN
Zubielki, Aramendia, Muneta, Arbeitza eta Amillaoko kontzejuek Allingo Udalari administrazio izapideen eta kontabilitate espedienteen kudeaketa eta derrigorrezko lege aholkularitza esleitzeko hitzarmena. Onespena
Allingo Udalaren Udalbatzak 2017ko azaroaren 6an egindako bilkuran, borondatez onartzen duten kontzejuek administrazio-kontabilitate zerbitzuen eta espedienteen kudeaketa Allingo Udalari esleitzeko hitzarmena onetsi zen.
Zubielkiko, Aramendiko, Munetako, Arbeitzako eta Amillaoko kontzejuek, 2017/07/19, 2017/12/29, 2017/11/17, 2017/11/29 eta 2017/11/29ko biltzar edo batzarretan, hurrenez hurren, onartu zuten aipatutako kudeaketa esleitzen duen hitzarmena.
Sektore Publikoaren Araubide Juridikoari buruzko urriaren 1eko 40/2015 Legearen 11.3.a) artikuluan xedatutakoarekin bat, kudeaketa esleitzeko tresna argitaratzen da.
Amillaon, 2018ko otsailaren 15ean.–Alkate udalburua, Eduardo Martinicorena Mortal.
KONTZEJUEK ADMINISTRAZIO IZAPIDEEN ETA KONTABILITATE ESPEDIENTEEN KUDEAKETA ETA DERRIGORREZKO LEGE AHOLKULARITZA UDALARI ESLEITZEKO HITZARMENA
Hitzaurrea
Allingo Udalak osaera konplexua du, hamar kontzejuz eratuta baitago. Aski ezaguna da toki entitateek baliabide ekonomiko eta tekniko eta langile baliabide eskasak dituztela bete beharreko hainbat beharri erantzuteko eta, bereziki, eskatzen zaizkien lege eskakizunak betetzeko, zeinak derrigor bete behar dituzten.
Aplikatu beharreko legeria
Sektore Publikoaren Araubide Juridikoari buruzko urriaren 1eko 40/2015 Legearen 11. artikuluak honako hau ezartzen du: Administrazio organoen edo zuzenbide publikoko entitateen eskumeneko jarduera materialak edo teknikoak administrazio bereko edo bertze bateko organo edo zuzenbide publikoko entitate bati esleitzen ahal zaizkio, jarduera horiek haien eskumenen barruan badaude, efikaziari begira komeni bada, edo jarduera horiek gauzatzeko baliabide tekniko egokirik ez badago.
Kudeaketa esleitzeak ez dakar ez eskumenaren titulartasuna ez eskumen horretaz baliatzeko funtsezko elementuak lagatzea; horrelakoetan, kudeatzeko esleipena ematen duen organoaren ardura izanen da esleipenean emandako jarduera material zehatzari oinarria emanen dioten edo hura barne hartuko duten egintza edo erabaki juridiko guztiak hartzea.
Nolanahi ere, esleipena jasotzen duen entitate edo organoa izanen da kudeaketa esleipena egikaritu bitartean eskuratzen dituen datu pertsonalen tratamenduaren arduraduna, eta datu pertsonalen babeserako araudian xedatuta dagoena aplikatuko zaio.
Toki Araubidearen Oinarriei buruzko apirilaren 2ko 7/1985 Legearen 57. artikulua.
Hitzarmenaren xedea
Udalak, egoera horren jakitun izanik, borondatez onartzen duten kontzejuekin hitzarmen hau sinatzea proposatu du. Hitzarmen honen bitartez, Allingo Udalari esleitzen zaizkio administrazio-kontabilitate zerbitzuak eta espedienteen kudeaketa, zeinak kontzejuek derrigor bete behar dituzten. Jarduera horien artean daude, bertzeak bertze:
1.–Kontzejuen aurrekontuak egiten eta legez izapidetzen laguntzea, baita Nafarroako Aldizkari Ofizialean argitaratzea ere.
2.–Kontabilitatearen kudeaketa eta Nafarroako Gobernuari (IDECAL) eta Espainiako Gobernuari (Autoriza) espedienteak bidaltzea, dagozkion txostenekin batera.
3.–Dokumentuak eta aktak idazten laguntzea, eta Toki Administrazioari eta Nafarroako Gobernuaren Ordezkaritzari bidaltzea.
4.–Kontratazio espedienteak eta legezkotasuna betetzeko beharrezkoak diren bertzelako espedienteak (herri lurretako aprobetxamendua, higiezinen salmenta...) izapidetzea.
5.–Diru-laguntzen berri ematea eta horien espedienteak izapidetzea, Nafarroako Gobernuaren egungo TIPa barne.
6.–Kontzejuen dokumentuen sarrerak eta irteerak elektronikoki erregistratzeko zerbitzua.
Langileak
Hitzarmen hau bete ahal izateko, Udalak B mailako titulazioa duen pertsona bat kontratatuko du (EAZ edo Zuzenbide gradua, ekonomia zientziak edo antzekoak), eta haren lanaldia kontratu hau sinatzen duten kontzejuen kopuruaren araberakoa izanen da.
Finantzaketa
Kontratatutako pertsonari ordaintzeko, hitzarmen hau sinatzen duten kontzejuetako bakoitzak 1.000 euroko kuota finkoa emanen du, eta kontzejuko biztanle kopuruaren araberako bertze kuota bat; 10 eurokoa izanen da biztanleko.
Allingo Udalak bere gain hartuko du hitzarmen hau sinatzen duten kontzejuen ekarpenarekin estaltzen ez diren langile kostuak.
Kontzejuen konpromisoak
Hitzarmen hau sinatzen duten kontzejuek konpromisoa hartzen dute Udalak eskatutako dokumentazio eta laguntza guztia emateko, kontzejuaren funtzionamendu eta kudeaketa egokirako. Udalburuaren eta kontratatutako pertsonaren arteko harremana arina izanen da, eta elkarrenganako konfiantzan oinarrituko da.
Hitzarmenaren indarraldia
Hitzarmen honen indarraldia urtekoa izanen da, eta bi alderdien (Udala eta kontzejuak) adostasunarekin luzatuko da. Nolanahi ere, hitzarmena eten eginen da, Toki Erreforma onartzen bada eta hitzarmen honen xedea kasuan kasu eratzen den Eskualdeak kudeatzen badu, baldin eta hitzarmen hau sinatzen duten kontzejuak horri atxikitzen bazaizkio.
Indarrean sartzea
Hitzarmen honek 2018ko urtarrilaren 1ean hartuko du indarra.
Iragarkiaren kodea: L1802288
