Iragarkia

75. ALDIZKARIA - 2018ko apirilaren 19a

1. NAFARROAKO FORU KOMUNITATEA

1.7. BESTELAKOAK

82/2018 EBAZPENA, otsailaren 9koa, Ingurune Naturalaren Zerbitzuko zuzendariak emana, prozedura onesten duena Urbasa eta Andia ondare mendietan larre azalerak eskatu eta eskaera onartzeko eta Urbasa eta Andia ondare mendietako larreen erabiltzaileei emandako azalerak onesten dituena 2018ko kanpainarako.

Uztailaren 1eko 267/1996 Foru Dekretuaren bidez onetsi zen Urbasa eta Andia mendietako natur baliabideen antolamendu plana, eta otsailaren 27ko 3/1997 Foru Legearen bidez deklaratu zen Urbasa eta Andia mendietako Parke Naturala. Gero, Natur Baliabideen Antolamendu Plana aldatu zen irailaren 7ko 198/2011 Foru Dekretuaren bidez.

Abenduaren 4ko 340/2001 Foru Dekretuaren bidez onetsi zen Urbasa parke naturala erabili eta kudeatzeko plan zuzentzailea. Plan horren 4.1 artikuluaren arabera, eskubide tradizionalen erabilera, besteak beste larratzekoa, Ingurumen Zuzendaritza Nagusiak ezarri prozedurari jarraikiz eginen da.

Bestalde, Ingurumenaren eta Uraren zuzendari nagusiaren abuztuaren 12ko 1259/2011 Ebazpenaren bidez, Urbasa eta Andia mendietako larre eta oihanak antolatzeko proiektua onetsi zen.

Nekazaritza Zerbitzuak eta Eskualde Atlantikoa Kudeatzeko Atalak emandako txostenak ikusirik.

Horrenbestez, eta Nafarroako Foru Komunitateko Administrazioari buruzko abenduaren 3ko 15/2004 Foru Legearen 35. artikuluak eta Ingurumeneko eta Lurraldearen Antolamenduko zuzendari nagusiaren urriaren 4ko 760/2016 Ebazpenak ematen dizkidaten eskumenak erabiliz (ebazpen horren bidez, besteak beste Ingurune Naturalaren Zerbitzuari eskuordetu zitzaizkion indarreko araudiak Ingurumeneko eta Lurraldearen Antolamenduko zuzendari nagusiari esleitzen dizkion zenbait eskumen administratibo),

EBATZI DUT:

1. Urbasa eta Andia ondare mendietan erabilera erkideko larre azalerak eskatu eta eskaera onartzeko prozedura onestea. I. eranskinean zehazten da.

2. Eskabidearen eredua onestea. Ebazpen honen II. eranskinean agertzen da.

3. Urbasa eta Andia ondare mendietako larreen onuradunei/erabiltzaileei emandako azalerak onestea, ebazpen honen III. eranskinean ageri den bezala.

4. Ebazpen hau Eskualde Atlantikoa Kudeatzeko Atalari, Ingurumena Zaintzeko Atalari eta Nekazaritza Zerbitzuari jakinaraztea, behar diren ondorioak izan ditzan.

5. Ebazpen hau Nafarroako Aldizkari Ofizialean argitaratzea.

6. Ebazpen honek ez du administrazio bidea amaitzen, eta espedientean interesa dutenek, administrazio publikoek izan ezik, gora jotzeko errekurtsoa jar dezakete, Landa Garapeneko, Ingurumeneko eta Toki Administrazioko kontseilariari zuzendua, hilabeteko epean.

Administrazio Publikoek zilegi dute administrazioarekiko auzi-errekurtsoa jartzea, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean. Horrek ez du galarazten Nafarroako Gobernuan aurretiazko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean.

Iruñean, 2018ko otsailaren 9an.–Ingurune Naturalaren Zerbitzuko zuzendaria, Fermín Olave Velasco.

I. ERANSKINA

Urbasa eta Andia ondare mendietan erabilera erkideko larreak eskatu eta eskaera onartzeko prozedura

Lehena.–Xedea.

Ebazpen honen xedea da Urbasa eta Andia ondare mendietan erabilera erkideko larreak eskatu eta eskaera onartzeko prozedura ezartzea 2018ko kanpainarako.

Bigarrena.–Onuradunak.

Urbasa eta Andia ondare mendietako erabilera erkideko larreen onuradun izaten ahalko dira nafar auzotasun forala duten eta beren jabetzako azienda mendi horietara larratzera eramaten duten eskatzaileak.

Hirugarrena.–Adjudikazioa.

Oraingo eskaera bakarra egin aurreko kanpainan Urbasa-Andiako larreak erabili dituzten abeltzainen kasuan, igotako AzLUen arabera eginen zaie adjudikazioa, bosgarren oinarrian deskribatzen den bezala. Adjudikazio hori abeltzainari jakinaraziko zaio, jakinaren gainean egon dadin.

Jakinarazpen horretan aurreko urtean igotako AzLUak agertuko dira, bai eta aurtengo kanpainarako adjudikatutako azalera ere.

Adjudikazioa eraginkorra izan dadin, derrigorrez igo beharko dute mendilerrora aurtengo kanpainan.

Laugarrena.–Adjudikazio eskaera.

1. Urbasa-Andiako larreak adjudikatzeko eskaera lehen aldiz egiten duten abeltzainek edo uko egiten diotenek edo ezinbesteko arrazoiengatik aurreko kanpainan igotzerik izan ez dutenek idatziz eskatu beharko dute, ebazpen hau argitaratu eta 10 eguneko epean, Urbasa eta Andia ondare mendietako erabilera erkideko larreen adjudikazioa. Horretarako, ebazpen honen II. eranskineko eskaera erabil dezakete.

2. Abeltzainak adierazi beharko du bere jabetzako zer azienda sartu nahi duen Urbasa-Andian 2018ko kanpainan, azienda kopurua espezieka eta adin tarteak zehaztuta, bai eta Urbasa eta Andia mendietan adjudikatzea eskatzen duen larre azalera garbi maximoa ere, hektareatan emana. Ez dira deklarazio horretan sartuko sei hilabetetik gorako behi-aziendako arrak, debekatua baitute mendi horietan larratzea sexu bidezko gaixotasunen transmisioagatik, Nekazaritza eta Abeltzaintzako zuzendari nagusiaren 1391/2015 Ebazpena aplikatuz.

3. Adjudikazio eskaera Landa Garapeneko, Ingurumeneko eta Toki Administrazioko Departamentuko Nekazaritza Zerbitzuari zuzenduko zaio, eta aipatu departamentuaren edozein erregistro ofizialetan aurkezten ahalko da edo Administrazio Publikoen Administrazio Prozedura Erkideari buruzko urriaren 1eko 39/2015 Legearen 16. artikuluan ezarritako edozein bide erabiliz.

4. Ebazpen hau Nafarroako Aldizkari Ofizialean argitaratu baino lehen aurkeztu diren adjudikazio eskaerak onartuko dira.

Bosgarrena.–Adjudikatzeko prozedura.

Eskatzaile bakoitzak azienda larriko zenbat unitate erabili zituen mendilerroan aurreko kanpainan, horren arabera adjudikatuko zaizkio larreak.

Adjudikazio ratioa honakoa izanen da: SIGPACaren arabera kanpainan Urbasak duen azalera garbia zati aurreko urtean benetan igotako azienda larriko unitateen batura.

Ingurune Naturalaren Zerbitzuak jakinaraziko ditu aurreko urtean benetan igotako aziendaren datuak, behar besteko aurrerapenaz, halako moduz non kanpaina bakoitzaren otsailaren 1a baino lehen egiten ahalko diren adjudikazioaren kalkuluak.

Nolanahi ere, Urbasa eta Andia mendietako larre eta oihanak antolatzeko proiektuan xedatutakoarekin bat izanen da.

Hona hemen jarraitu beharreko prozedura:

1. Nekazaritzako Informazio Sistemen Bulegoari kontsulta eginez ezagutuko dira Urbasa-Andia mendilerroetako larreen azalera garbiak.

2. Ingurune Naturalaren Zerbitzuari kontsulta eginez ezagutuko da guztira zenbat AzLU igo ziren benetan Urbasa-Andia mendilerroetara aurreko kanpainan.

3. Adjudikazio ratioa kalkulatzeko, Urbasa-Andiaren azalera garbia zatituko da, 300 hektarea baztertuz inkorporazio berrietarako. Adjudikazioa kalkulatzeko aplikatuko da.

4. Ingurune Naturalaren Zerbitzuak aurreko kanpainan Urbasa-Andia mendilerroetara benetan igotako abeltzainen zerrenda komunikatzean balioztatuko da aurreko kanpaina horretarako adjudikatutako azalera. Igoerarik ez badago, azalera hori deuseztatuko da laguntza eskaerei dagokienez.

Urbasa-Andia mendilerroetako larreen azalerak adjudikatzeko eskaerak Ingurune Naturalaren Zerbitzuko zuzendariak ebatziko ditu, gaiari buruz eskumenak dituzten administrazio unitateen txostenetan oinarriturik.

Seigarrena.–Onuradunaren betebeharrak.

Abeltzain adjudikaziodunek Urbasa eta Andia Erabili eta Kudeatzeko Plan Zuzentzailean biltzen diren abeltzaintzarako jarraibideak bete beharko dituzte.

II. ERANSKINA

Urbasa eta Andia ondare mendietan erabilera erkideko larreak adjudikatzeko eskaera (titular berrientzat bakarrik [2017an igo ez direnak] edo adjudikazioari uko egitea eskatzen duten titularrentzat) (PDFa).

III. ERANSKINA

Urbasa eta Andia ondare mendietako erabilera erkideko larreen adjudikaziodunen zerrenda

Iragarkiaren kodea: F1802421