2. NAFARROAKO TOKI ADMINISTRAZIOA
2.1. OPOSIZIOAK ETA LEHIAKETAK. LAN PUBLIKOAREN ESKAINTZA
NOAIN (ELORTZIBAR)
Deialdia, Julián Gayarre Musika Eskolan irakasten diren zenbait espezialitatetako irakasle izateko lanpostuan, aldi baterako kontratuarekin aritzeko
Noain Elortzibarko Udaleko Julián Gayarre Musika Eskolako Patronatuko lehendakari ordezkariaren 2018ko urtarrilaren 31ko Ebazpena, deialdia onesten duena, Noaingo Udaleko Julián Gayarre Musika Eskolan irakasten diren zenbait espezialitatetako irakasle izateko lanpostuan, aldi baterako kontratuarekin aritzeko izangaien zerrenda bat hautaproben bidez eratzeko, sortzen diren beharrei erantzutearren.
Beharrezko jotzen da Noaingo Julián Gayarre Musika Eskolan irakasten diren zenbait espezialitatetako musika irakasle izateko lanpostuan aldi baterako kontratuarekin aritzeko izangaien zerrenda bat eratzea, sortzen diren beharrei erantzutearren.
Aplikatzekoak diren xedapenek legez ematen dizkidaten eskudantziak erabiliz eta ekainaren 5eko 113/1985 Foru Dekretua kontuan hartuz.
EBATZI DUT:
1.–Onestea hautaproben bidez izangaien zerrenda bat osatzeko deialdia, aldi baterako kontratazioaren bidez ondoko espezialitate hauetako irakasle lanpostuan aritzeko:
Txistua, perkusioa, akordeoia, gitarra klasikoa, baxu elektrikoa, kantua, abesbatza, gitarra elektrikoa, musika hastapena, zeharkako flauta, saxofoia, tronpeta, tronboia, biolina; betiere Noaingo Udalaren Julián Gayarre Musika Eskolan aritzeko, sortzen diren beharren arabera.
2.–Hautapen proben deialdia arautuko duten oinarriak onestea. Ebazpen honen I. eranskinean daude.
3.–Ebazpen hau Nafarroako Aldizkari Ofizialean argitara dadila agintzea.
Ebazpen honen kontra, errekurtso hauetako bat aurkez daiteke, hautara:
a) Administrazioarekiko auzi-errekurtsoa, Nafarroako Administrazioarekiko Auzien Jurisdikzioko organo eskudunari zuzendua, bi hilabeteko epean, ebazpen hau jakinarazi eta biharamunetik hasita.
b) Gora jotzeko errekurtsoa, Nafarroako Administrazio Auzitegiari zuzendua, hilabeteko epean, jakinarazten denetik hasita.
c) Berraztertzeko errekurtsoa, ebazpen hau eman duen organoari zuzendua, hilabeteko epean, ebazpena jakinarazi eta biharamunetik hasita.
Noain Elortzibarren, 2018ko urtarrilaren 31n.–Lehendakari ordezkaria, María Cecilia Antolín Astigarraga.
I. ERANSKINA
Oinarriak
1. oinarria.–Deialdiaren xedea eta arau orokorrak.
1.1. Deialdi honen xedea da hautaproben bidez izangaien zerrendak eratzea, Noaingo Udalaren “Julián Gayarre” Musika Eskolan idazpuruan adierazitako espezialitateetako irakasle lanpostuetan aldi baterako kontratuarekin aritzeko, sortzen diren beharrei erantzutearren.
1.2. Deialdi hau Nafarroako Aldizkari Ofizialean argitaratuko da eta oinarriak interesdunen eskura egonen dira Udalaren www.noain.es web-orrian.
1.3. Deialdi honi, bere oinarriei edo betearazteko ematen diren egintzei buruzko edozein gorabehera, egintza edo errekurtso jakinaraziko zaie izangaiei, Noaingo Udalaren www.noain.es/es/ web-orrian argitaratuta.
1.4. Lanaldiaren araubidea zerbitzuaren beharretara egokituko da.
1.5. Lanpostuak B mailari dagokion ordainsaria izanen du, Nafarroako Administrazio Publikoen zerbitzuko Langileen Estatutuaren arabera, bai eta, dagokion moduan, plantilla organikoan eta araudi indardunean agertzen diren ordainsari kontzeptuak ere.
1.6. Deialdi honen bidez egiten diren kontratazioetarako bi hilabeteko probaldia ezarri da, eta epe horretan edozein aldek deuseztatzen ahalko du kontratua.
2. oinarria.–Parte-hartzaileek bete beharreko baldintzak.
Izangaiek, eskabideak aurkezteko epea bukatzen den egunean, baldintza hauek bete beharko dituzte:
a) Espainiako nazionalitatea izatea, edo Europar Batasuneko beste estatu batekoa, edo, Europar Batasunak izenpetu eta Espainiak berretsitako nazioarteko itunak direla medio, langileen zirkulazio librea aplikatzen den eremuko estatu batekoa. Espainiarren eta Europar Batasuneko beste estatu bateko edo aipatu nazioarteko itunek ukitutako estatuetako herritarren ezkontideek ere parte har dezakete; betiere, zuzenbidez bereizita ez badaude. Orobat, haien ondorengoek eta ezkontidearenek, legez bananduta ez badaude, hogeita bat urtetik beherakoak badira, edo gorakoak, haien kontura biziz gero.
b) Hamasei urte beteak izatea eta nahitaezko erretiroa hartzeko gehieneko adina ez gainditzea.
c) Musikako titulua izatea, erdi mailakoa edo profesionala, aukeratutako instrumentu espezialitatean, eta musika hastapeneko espezialitatearen kasuan, Musikako titulua, erdi mailakoa edo profesionala, izateaz gain, Maisu-maistraren titulazioa ere izatea, edo hura eskuratzeko moduan egotea eskabideak aurkezteko epea bukatzen den egunean.
d) Bete behar dituen eginkizunetan aritzeko behar den gaitasun fisiko eta psikikoa izatea.
e) Eginkizun publikoetan aritzeko ezgaitu edo gabetua ez egotea eta administrazio publikoren baten zerbitzutik bereizia ez izatea.
f) Ez izatea inoiz kondenatua sexu-askatasun eta sexu-ukigabetasunaren aurkako delituagatik, epai irmoaren bidez. Eskaerak aurkezteko epea bukatzen den egunerako bete beharko dira aurreko baldintzak, eta hautapen-prozedurak eta kontratazioak iraun bitartean beharko dira bete.
3. oinarria.–Eskabideak eta horiek aurkezteko epea.
Hautapen prozesuan parte hartu nahi dutenek oinarri hauen eranskinean ageri den ereduaren araberako eskabidea aurkeztu beharko dute Noain Elortzibarko Musika Patronatuaren erregistroetako ezeinetan (Udal Musika Eskolan, San Migel kalea 2, 31110 Noain). Eskabideak aurkezteko epea hamar egun naturalekoa izanen da, deialdi hau Nafarroako Aldizkari Ofizialean argitaratu eta biharamunetik hasita.
Eskabidearekin batera, izangaiek honako agiri hauek aurkeztu beharko dituzte, betiere ezertan galarazi gabe kontratatuak izateko deitzen zaienean jatorrizko dokumentuak edo fotokopia konpultsatuak edo autentifikatuak aurkeztu behar izatea, indarreko araudiak ezarri moduan:
–Nortasun Agiri Nazionalaren edo nortasuna eta nazionalitatea eta, hala bada, deialdiko 2.a) arauan nazionalitateaz edo ahaidetasunaz eskatzen diren betebeharrak frogatzen dituen agiriaren fotokopia.
–Deialdiaren 2.c) oinarrian eskatutako tituluaren fotokopia.
–Izangaiek aurkeztu nahi dituzten merezimenduak, agirien bidez aurkeztu eta egiaztatu beharko direnak eskabidea aurkeztearekin batera, hari atxikirik geldituko baitira. Lan esperientziaren kasuan, lan bizitza aurkeztuta frogatuko da.
4. oinarria.–Behin-behineko zerrenda eta behin betikoa.
Eskaerak aurkezteko epea bukaturik, Noaingo Udaleko Musika Eskolako Patronatuko lehendakariak izangai onartuen eta baztertuen behin-behineko zerrenda onetsiko du, eta Udalaren www.noain.es web-orrian jendaurrean jarriko.
Egun horretatik aitzina, izangaiek bost egun naturaleko epea izanen dute erreklamazioak aurkezteko eta eskabidean egindako akatsak zuzentzeko.
Erreklamazioak aurkezteko epea bukatu eta haiek ebatzi ondoan, Musika Patronatuko lehendakariak izangai onartu eta baztertuen behin betiko zerrenda onetsiko du eta Udalaren webgunean argitaratzeko aginduko, deialdiko hautaprobak egiteko eguna eta tokia adierazita, betiere goian adierazitako zerrendako lehen espezialitatetik hasita. Gainerako proben egunak eta orduak Noaingo Udalaren webgunean argitaratuko dira www.noain.es helbidean.
Izangai bazterturik ez bada, zuzenean onetsiko da izangaien behin betiko zerrenda, eta Udalaren webgunean argitaratuko da, deialdi honetan aipatzen diren hautapen probak egiteko egunarekin, orduarekin eta tokiarekin batera, betiere goian adierazitako zerrendako lehen espezialitatetik hasita. Gainerako proben egunak eta orduak Noaingo Udalaren webgunean argitaratuko dira www.noain.es helbidean.
5. oinarria.–Kalifikazio epaimahaia.
5.1. Honako kide hauek osatuko dute espezialitate bakoitzeko epaimahaia, baina izangai onartuen behin betiko zerrenda onesten duen ebazpenean zehazten ahalko da behin betiko osaera:
Epaimahaiburua: María Cecilia Antolín Astigarraga, Noain Elortzibarko Udaleko Musika Patronatuko lehendakari ordezkaria.
–Ordezko epaimahaiburua: Garbiñe Sertutxa Azkarate, Noain Elortzibarko Udalaren Musika Eskolako zuzendaria.
–Lehen mahaikidea: aukeratutako espezialitateko irakaslea.
–Lehen mahaikidearen ordezkoa: titularrak hautatzen duena.
–Bigarren mahaikidea: Noaingo Musika Eskolako edozein musika espezialitateko irakaslea.
–Bigarren mahaikidearen ordezkoa: titularrak izendatzen duena.
–Mahaikide idazkaria: Isabel Álvarez Berango.
–Mahaikide-idazkariaren ordezkoa: titularrak hautatzen duena.
5.2. Epaimahaiko kideek parte hartzeari uko egin beharko diote eta Patronatuko buruari hala jakinarazi, baldin indarreko legerian horretarako aurreikusiak dauden arrazoiak gertatzen badira.
Izangaiek, halaber, zilegi dute epaimahaikideak errefusatzea, inguruabar horietako bat gertatzen denean.
Epaimahaia aldatzen bada, epaimahaikideek beraiek uko egiteko edo haiek errefusatzeko legez ezarritako kasuak direla-eta, aditzera emanen da, izangai onartu eta baztertuen zerrendekin batera.
5.3. Hautaprobak hasi baino lehen eratuko da epaimahaia.
Epaimahaia ezin izanen da eratu, ezta jardun ere, kideen gehiengo osoa gutxienez bildu gabe. Halaber, epaimahaiaren eraketak balio izateko, mahaiburuak eta idazkariak bertan egon beharko dute.
5.4. Epaimahaiak gehiengoz ebatziko ditu deialdiko oinarrien interpretazio eta aplikazioaren inguruan sortzen diren arazoak.
5.5. Epaimahaiak aholkulari adituen laguntza eska dezake probarako. Aipatu aholkulariak beren espezialitate teknikoetan baizik ez dira ariko eta haietan oinarriturik bakarrik emanen diote laguntza epaimahaiari.
6. oinarria.–Hautapen prozesuaren nondik norakoa eta balorazioa.
6.1. Hautapen prozesuak, zerrenda eratzeko, bi zati izanen ditu:
6.1.1.–Merezimenduen balorazioa (30 puntu gehienez).
Epaimahaiak izangaiek aurkezturiko merezimenduak baloratuko ditu, ondoko baremoaren arabera. Izangaiek merezimenduak agirien bidez aurkeztu eta egiaztatu beharko dituzte eskabidea aurkeztearekin batera eta hari atxikirik geratuko dira.
A) Laneko esperientzia (20 puntu gehienez):
A.1.–Lortu nahi den lanpostuaren espezialitateko irakasle gisa, administrazio publikoen musika eskoletan edo kontserbatorioetan egindako zerbitzuak; ikasturte oso bakoitzeko eta lanaldiaren proportzioan: 1,50 puntu.
Ikasturtearen zatiki bakoitzeko eta lanaldiaren proportzioan. Eskatutako lanpostuetan egindako hilabete bakoitzeko: 0,125 puntu.
A.2.–Eskatzen den espezialitateko irakasle gisa zentro pribatuetan egindako zerbitzuak, ikasturte oso bakoitzeko eta lanaldiaren proportzioan (5 puntu gehienez): 0,75 puntu.
Ikasturtearen zatiki bakoitzeko eta lanaldiaren proportzioan. Eskatutako lanpostuetan egindakok hilabete bakoitzeko: 0,06 puntu.
B) Prestakuntza (4 puntu gehienez).
–Instrumentuen espezialitateetarako:
B.1.–Aukeratutako instrumentu espezialitatean goi mailako titulua izatea: 3 puntu.
B.2.–Aukeratutako espezialitatekoa ez den musika arloko goi mailako edo erdi mailako beste titulu bat izateagatik: 0,50 puntu.
B.3.–Pedagogiaren arloko titulua izateagatik, goi mailakoa edo erdi mailakoa: 0,50 puntu.
–Musika hastapeneko espezialitaterako:
B.1.–Edozein instrumentu espezialitatean goi mailako titulua izatea: 3 puntu.
B.2.–B.1ean adierazitako espezialitatekoa ez den musika arloko goi mailako edo erdi mailako beste titulu bat izateagatik: 0,50 puntu.
B.3.–Pedagogiaren arloko goi mailako titulua izateagatik: 0,50 puntu.
C) Beste merezimendu batzuk (6 puntu gehienez).
C.1.–Aurkeztu nahi diren beste merezimendu batzuk, aukeratutako espezialitatearekin harremana dutenak eta izangaiak behar bezala egiaztatu baditu, betiere aurreko apartatuetan baloratu ez badira.
- Kontzertua, bakarlari gisa: 0,5 puntu.
- Kontzertua, taldean: 0.25 puntu.
- Prestakuntza ikastaroetan parte hartzea: 0,25 puntu.
- Argitalpenak: 0.5 puntu.
Izangaiek aurkeztutako merezimenduen gaineko argibideak eta datu osagarriak eskatzen ahalko ditu epaimahaiak, edozein unetan.
6.1.2.–Ariketa praktikoa: gehienez 70 puntu.
Bi proba egin beharko dira:
A) Proba praktikoa, musikala (35 puntu):
Instrumentu espezialitateak: bakarlari gisa norberak aukeratutako bi tema edo gehiago interpretatzea, gehienez ere hogei minutuko iraupenarekin. Perkusioaren kasuan: gutxienez tema bat interpretatzea laminetan eta beste bat bateriarekin edo perkusio anitzak erabiliz. Gehienez ere hogei minutu iraunen du. Eskolak badu perkusio klasikoko eta bateriako gela osoa.
Abesbatza: proba honetan Musika Eskolako 9-12 urte bitarteko haurren entsegu bat zuzendu beharko da, gehienez ere hogei minutuz. Aldez aurretik denbora izanen da proba egiteko emandako obra aztertzeko.
Musika Hastapena: proba honetan klase praktikoa eman beharko zaie 3-6 urte bitarteko haurrei, epaimahaiak aukeratutako gai baten inguruan, gehienez ere hamabost minutuz. Aldez aurretik denbora izanen da klasea prestatzeko.
B) Idatzizko proba (35 puntu):
Idatzizko proba bat eginen da, aukeratutako espezialitatearen gainean epaimahaiak proposatzen dituen galderen inguruan.
6.2. Probetarako deialdi bakarra eginen da; hartara, izangaiak nortasun agiri nazionala aldean dutela azaldu beharko dira.
Agertzen ez diren izangaiak bazterturik geldituko dira.
7. oinarria.–Hautaprobak gainditzen dituztenen zerrenda eta lanean hasteko deia.
7.1. Proben kalifikazioa amaiturik, epaimahaiak jendaurrean jarriko ditu Musika Eskolako iragarki oholean eta Noain Elortzibarko Udalaren www.noain.es webgunean, probak gainditzen dituzten izangaien zerrendak (espezialitate bakoitzekoak), lortu duten puntuazio osoaren hurrenkeran, eta alegazioetarako bost egun naturaleko epea irekiko da.
Epea amaituta eta, hala dagokionean, alegazioak ebatzita, epaimahaiak Patronatuko lehendakariari gainditu dutenen behin betiko zerrenda bidaliko dio onetsi dezan. Zerrendan izena, abizenak, identifikazio agiria eta puntuazioa agertuko dira eta Musika Eskolako iragarki oholean eta Udalaren www.noain.es webgunean jarriko da jendaurrean.
7.2. Gainditu duten izangaiei Noain Elortzibarko Udalaren Musika Eskolan gertatzen diren premien arabera eginen zaie dei, deialdi honetako oinarrietan ezarritakoari eta aplikatzekoak diren gainerako arauei jarraituz.
8. oinarria.–Zerrendaren kudeaketa.
8.1. Deialdi honetan jasotako lanpostuetan langile beharren bat sortzen den bakoitzean, Noain Elortzibar Udaleko Musika Patronatuak amaierako puntuazio osoaren ordenaren arabera (handienetik txikienera) deituko ditu izangaiak.
Izangaiak lan eskaintza egiten zaion egunean bertan onartu edo uko egin beharko dio, ezintasuna justifikatua denean, eta edozein kasutan, izangaiak bere zerbitzu laboralak eskaintzen hasteko egun eta ordutik behar bezain besteko tartearekin.
Izangaiak ez badu lan eskaintza onartzen edo ez badio uko egiten, harreman laboralari eta zerbitzu laboralen eskaintzari hasiera emateko behar besteko tartearekin, automatikoki hurrengo izangaiari deituko zaio.
Lan eskaintza onartu eta zerbitzu laboralak eskaintzeko agertu ezean, edo harreman laborala formalizatzeko beharrezko dokumentazioa formalizatzeko agertu ezean, izangaia automatikoki baztertua izanen da zerrendatik langileak behar diren hurrengo aldietarako.
Lan eskaintzari uko egitea ez da izanen zerrendatik baztertzeko arrazoi eta ez da inolako zigorrik ezarriko, baldin eta justifikatua bada, motibatua eta arrazoizkoa.
8.2. Deialdi honetako lanpostuetarako langile beharrak asetzeko izangaien zerrendak iraupen mugagabea izanen du. Indarrean egonen da Noain Elortzibarko Udaleko Musika Patronatuak deitzen duen hurrengo hautapen prozesu berria amaitzen den egunera arte. Orduan, automatikoki indargabetuko da.
9. oinarria.–Errekurtsoak.
Deialdi honen, oinarrien eta aplikatzeko egintzen aurka ondoko errekurtsoetako bat aurkez daiteke, hautara:
a) Berraztertzeko errekurtsoa, egintza burutu duen organo berari zuzendua, hilabeteko epean, hura jakinarazi edo argitaratu eta biharamunetik hasita.
b) Administrazioarekiko auzi-errekurtsoa, Administrazioarekiko Auzien Iruñeko Epaitegiari zuzendua, bi hilabeteko epean, errekurtsoaren xedeko egintza edo erabakia jakinarazi edo argitaratu eta biharamunetik hasita.
c) Gora jotzeko errekurtsoa, Nafarroako Administrazio Auzitegiari zuzendua, hilabeteko epean, errekurritutako egintza edo erabakia argitaratu edo jakinarazten denetik hasita. Epaimahaiaren egintzen aurka gora jotzeko errekurtsoa aurkez daiteke, deialdia egin duen udal organoari zuzendua, hilabeteko epean, errekurritutako egintza edo erabakia jakinarazten denetik hasita.
II. ERANSKINA
Inskripzio fitxa (PDFa).
Iragarkiaren kodea: L1802066
