Iragarkia

26. ALDIZKARIA - 2018ko otsailaren 6a

1. NAFARROAKO FORU KOMUNITATEA

1.7. BESTELAKOAK

441/2017 EBAZPENA, abenduaren 28koa, Vianako Printzea Erakundea-Kulturako zuzendari nagusiak emana, proiektuak, kultur jarduerak eta ereduko programak interes sozialeko deklaratzen dituena Nafarroako Foru Komunitatean kultur mezenasgoa eta bere zerga-pizgarriak arautzen dituen maiatzaren 16ko 8/2014 Foru Legean xedatutakoari jarraikiz.

2017ko urriaren 1etik 31ra arte, besteak beste, honako pertsona eta entitate hauek eskaera aurkeztu zuten proiektuak, kultur jarduerak edo ereduko programak interes sozialeko deklaratzeko.

Kulturako, Turismoko eta Erakunde Harremanetako kontseilariaren irailaren 16ko 77/2014 Foru Aginduaren 12. artikuluan aurreikusitako jarduketak burutu ondoren, Mezenasgo Batzordeak eskaerak eta dagokien dokumentazioa igorri zizkion Nafarroako Kulturaren Kontseiluari, ebaluazioa egin zezan.

Eskaerak aztertu ondoren, Nafarroako Kultura Kontseiluak, 2017ko abenduaren 20an, proposamen bat igorri dio Vianako Printzea Erakundea-Kulturako zuzendari nagusiari, kulturazkoak diren proiektu eta jarduerak interes sozialeko deklara ditzan, Nafarroako Foru Komunitatean kultur mezenasgoa eta bere zerga-pizgarriak arautzen dituen maiatzaren 16ko 8/2014 Foru Legearen 2.2 artikuluan ezarritakoaren arabera, legezko testu horren 6.2 artikuluan aurreikusitako irizpideak aplikatuz, hala hartuak izatea merezi dutenez.

Bestalde, zenbait elkartek aurkeztutako ereduko programak interes sozialeko deklaratzeko egindako proposamenei buruz –Nafarroako Almadiazainen Kultur Elkartea, Radio Cierzo irrati elkartea, Pitillasko Peñen kultur elkartea, FESTA-Los de Bronce elkartea, Tomás Urzainqui Mina fundazioa, Teresa Ramos Rabasa andrea, eta “Irurtzungo Aizpea” elkartea eta “Pikuxar” Euskal Txokoa kultur, aisialdi eta gastonomi elkartea–, ikusirik zeinen informazio urria eman duten hurrengo urteetan egin gogo dituzten jarduerei buruz eta 2018tik aurrerako urteetan izan lituzteken diru-sarrera eta gastuei buruz, ezin dira ereduko programa deklaratu. Dena dela, interes sozialeko deklaratu daitezke 2018ko abenduaren 31ko bukaerarekin aurkeztutako proiektutzat.

Irurtzungo Aizpea elkarteak eta “Euskal Txokoa Pikuxar” kultur, aisialdi eta gastronomi elkarteak aurkeztutako “Irurtzun Euskara eta Kultura” proiektua ezin da interes sozialeko deklaratu, izaera kulturalik ez izateagatik edo “Herri agenda eta gizarte zerbitzua” ataldean aurkeztutako proiektuko jarduera hauek ez egokitzeagatik 8/2014 Foru Legearen 6.2 artikuluan ezarritako irizpideei. “Euskararen agendatik”, “Kirola Euskaraz” eta “Udan Euskaraz Blai” jarduerak atera dira; eta “Kultur Agendatik”, “Bertako Aziendaren Feria” izeneko jarduera.

Horrenbestez, Nafarroako Foru Komunitatean kultur mezenasgoa eta bere zerga-pizgarriak arautzen dituen maiatzaren 16ko 8/2014 Foru Legean eta Kulturako, Turismoko eta Erakunde Harremanetako kontseilariaren irailaren 16ko 77/2014 Foru Aginduan xedatutakoari jarraituz,

EBATZI DUT:

1. Ebazpen honen I. eranskinean ageri diren kultur jarduerak eta proiektuak interes sozialeko deklaratzea.

2. Ebazpen honen II. eranskinean ageri diren kultur jarduerak eta proiektuak interes sozialeko deklaratzea, 2018ko abenduaren 31ko bukaera datarekin betiere, eta hartzea ereduko programatzat.

3. Proiektuak eta jarduerak gauzatzen diren bitartean bakarrik izanen du indarra interes sozialeko deklarazioak.

4. Proiektuak eta jarduerak interes sozialeko deklaratuak dituzten pertsona edo entitateak Kulturako, Turismoko eta Erakunde Harremanetako kontseilariaren irailaren 16ko 77/2014 Foru Aginduaren 22. artikuluak ezartzen dituen betebeharrei daude loturik, bai proiektuari, kultur jarduerari edo ereduko programari dagokionez, bai zerga administrazioari dagokionez.

5. Proiektua edo kultur jarduera interes sozialeko deklaratuagatik, onuradunek berdin-berdin eskuratu beharko dituzte hura gauzatzeko lizentzia, baimen edo komunikazioak, horiek ematea, zeinek bere eskumenen esparruan, beste erakunde batzuei dagokienean.

6. Interes sozialeko deklaratzen diren proiektuak eta kultur jarduerak Nafarroako Gobernuaren Atarian argitaratuko dira, Kulturako, Turismoko eta Erakunde Harremanetako kontseilariaren irailaren 16ko 77/2014 Foru Aginduaren 25. artikuluan ezarritakoari jarraituz.

7. Pertsona eta entitate onuradunek “Sello Mecna” anagrama erabiltzen ahalko dute beren komunikazio, aurkezpen, argitalpen eta dokumentuetan; betiere, zerikusia izan beharko dute interes sozialeko deklaraturik dauden proiektuekin, kultur jarduerekin edo ereduko programekin.

8. Ebazpen hau Idazkaritza Tekniko Nagusira, Nafarroako Zerga Ogasunera eta Kultur Mezenasgoaren Batzordera igortzea, behar diren ondorioak izan ditzan.

9. Ebazpen hau Nafarroako Aldizkari Ofizialean argitaratzea.

Iruñean, 2017ko abenduaren 28an.–Vianako Printzea Erakundea-Kulturako zuzendari nagusia, Fernando Pérez Gómez.

Iragarkiaren kodea: F1800019