1. NAFARROAKO FORU KOMUNITATEA
1.1. XEDAPEN OROKORRAK
1.1.3. Foru Aginduak
85/2017 FORU AGINDUA, abenduaren 26koa, Kultura, Kirol eta Gazteriako kontseilariak emana, Kultura, Kirol eta Gazteriako kontseilariak azaroaren 23an emandako 38/2015 Foru Agindua aldatzen duena. Haren bidez, Kultura, Kirol eta Gazteria Departamentuaren eta Nafarroako Kirolaren eta Gazteriaren Institutua erakunde autonomoaren egitura organikoa garatu zen bulego mailan.
Kultura, Kirol eta Gazteriako kontseilariak azaroaren 23an emandako 38/2015 Foru Aginduaren bidez, Kultura, Kirol eta Gazteria Departamentuaren eta Nafarroako Kirolaren eta Gazteriaren Institutua erakunde autonomoaren bulego mailako egitura organikoa garatu zen.
Foru agindu honek Kirol Zuzendariordetzaren bulego mailako egitura aldatzea du helburu, Nafarroako Kirolaren eta Gazteriaren Institutuaren esparruan, funtzionamenduaren eraginkortasuna eta efizientzia hobetzeko.
Nafarroako Foru Komunitateko Administrazioari buruzko abenduaren 3ko 15/2004 Foru Legeak 24.4 artikuluan ezartzen du ezen, bulegoak eta ataletatik beherako unitateak sortu, aldatu eta kentzeko, unitate horiek zein departamentutan sartuko diren, hango kontseilari titularraren foru agindua beharko dela.
Horrenbestez, Nafarroako Foru Komunitateko Administrazioari buruzko abenduaren 3ko 15/2004 Foru Legeak ematen dizkidan ahalmenak erabiliz,
AGINDU DUT:
Artikulu bakarra.–Kultura, Kirol eta Gazteriako kontseilariak azaroaren 23an emandako 38/2015 Foru Aginduaren aldaketa. Haren bidez, Kultura, Kirol eta Gazteria Departamentuaren eta Nafarroako Kirolaren eta Gazteriaren Institutua erakunde autonomoaren egitura organikoa garatu zen bulego mailan.
Bat.–4. artikulua aldatzen da, eta honela idatzita geldituko da:
“4. artikulua. Nafarroako Kirolaren eta Gazteriaren Institutuaren egitura.
Nafarroako Kirolaren eta Gazteriaren Institutuak bulego hauek ditu bere egituran:
a) Kirolaren Zuzendariordetzaren menpe:
–Kirola Sustatzeko Bulegoa.
–Kirol Jokoen Bulegoa.
–Kirol Federazioen Bulegoa.
–Kluben eta Kirol-errendimenduaren Bulegoa.
–Kirolaren Azterlan, Ikerketa eta Medikuntzako Zentroak bulego maila duten administrazio unitate hauek ditu bere egituran:
–Laguntzako Unitate Teknikoa
–Ikerkuntzako Unitate Teknikoa
–Prestakuntzako Unitate Teknikoa
b) Gazteriaren Zuzendariordetzaren menpe:
–Argibide eta Prestakuntza Bulegoa.
–Gazte Mugikortasunerako Bulegoa.
–Gazteen Sormenaren eta Beste Zerbitzu Batzuen Bulegoa.
–Toki Entitateen eta Gazte Elkarteen Bulegoa.
c) Garapen Estrategikoaren, Azpiegituren eta Baliabide Kudeaketaren Zuzendariordetzaren menpe:
–Gai Ekonomiko-Administratiboak eta Prozedurak Kudeatzeko Bulegoa.
–Barne Kudeaketaren, Logistikaren eta Langileriaren Bulegoa.
–Gazteriaren Etxeen Bulegoa.”
Bi.–19. artikulua aldatzen da, eta honela idatzita geldituko da:
“19. artikulua. Kirol Federazioen Bulegoa.
Kirol Federazioen Bulegoak, Entitateen eta Kirol Errendimenduaren Atalari atxikita, eginkizun hauek izanen ditu:
–Kirol babesletza sustatzea, interes sozialeko espedienteen tramitazioa kudeatzea eta horiei buruzko informazioa ematea.
b) Kirol federazioentzako laguntzak koordinatzea eta haien jarraipena egitea, kirol eta kudeaketa arloetan osorik garatzea eta hedatzea sustatuz, bereziki eskuordetutako eginkizunak.
–Kirolaren Etxearen eta hango zerbitzu orokor eta komunen kudeaketa koordinatzea.
d) Nafarroako Kirol Entitateen Erregistroaz arduratzea eta haren jarraipena egitea.
e) Federazioen estatutuen, erregelamenduen eta hauteskunde prozesuen proposamenen jarraipena egitea, baita kirol modalitateak aitortzeko prozesuena eta beste baimen batzuena ere.
f) Kirola antolatzeko hitzarmenak sustatzea, Nafarroako kirol federazioen bitartez.
g) Nafarroako, Espainiako edo nazioarteko kirol federazioen arteko lankidetza sustatzea, koordinatzea eta laguntzea.
h) Nafarroan kirol federaziorik ez duten kirol modalitateak sustatzea eta haiek garatzen laguntzea.
i) Nafarroako kirol federazioen bitartez, parte-hartze instituzionalaren kudeaketa lanetan laguntzea.
j) Bere eskumenen esparruko espedienteak erregistratzea, haien jarraipena egitea eta artxibatzea.
k) Errendimenduko programetako baldintzak sustatzea (goi mailakoentzat, errendimendu handikoentzat, hobekuntzakoentzat eta oinarrizko errendimendukoentzat), eta, orobat, haiek diseinatu, abian jarri eta jarraipena egitea, eta horretarako, laguntzen eta, kasua bada, lankidetza hitzarmenen proposamenak egitea.
l) Nafarroan errendimendu handiko kirolak dituen beharrak koordinatzea kirol federazioekin eta Nafarroako edo Estatuko beste entitate batzuekin lankidetzan.
m) Kirolarien arteko trukeak sustatzea, kirol errendimendua eta nafar selekzioak garatzeko tresna gisa.
n) Kirol jarduera eta norberaren ikasketak, bizitza pertsonala eta lana bateragarriak izateko neurriak proposatzea.
ñ) Behar diren zentroekin koordinazio lana egitea, goi mailako kirolari nafarren entrenamenduen baldintzak hobetzeko.
o) Erabilerei buruzko hitzarmenak koordinatzea eta haien jarraipena egitea, Garapen Estrategikoaren, Azpiegituren eta Baliabide Kudeaketaren Zuzendariordetzarekin koordinatuz, bai Nafarroako Kirolaren eta Gazteriaren Institutuarekiko hitzarmenen bidez diruz lagundutako instalazioetarako, bai instalazio orokorretarako.
p) Aurrekoen antzekoa edo osagarria den beste edozein eginkizun, baita Entitateen eta Kirol Errendimenduaren Atalak agintzen dizkionak ere.”
Hiru.–20. artikulua aldatzen da, eta honela idatzita geldituko da:
“20. artikulua. Kluben eta Kirol-errendimenduaren Bulegoa.
Kluben eta Kirol-errendimenduaren Bulegoak, Entitateen eta Kirol Errendimenduaren Atalari atxikita, eginkizun hauek izanen ditu:
a) Espainiako eta atzerriko kirol jarduera eta txapelketetan parte hartzeko, deialdi eta hitzarmenen bidez klubei eta kirolariei ematen zaizkien laguntzak koordinatzea eta haien jarraipena egitea, haien kirol garapen osoa eta errendimendua sustatzea helburu.
b) Goi mailakotzat hartzen diren eta gizarte eta kirol errentagarritasun eta oihartzun handia duten ikuskizunei, jarduerei edo taldeei kirol babesa emateko espedienteak erregistratu eta haien jarraipena egitea.
c) Gizartean oihartzuna duten Espainiako eta atzerriko kirol gertakari, ikuskizun eta lehiaketak eta interes bereziko kirol jarduerak antolatzeko, deialdi eta hitzarmenen bidez klubei eta kirolariei ematen zaizkien laguntzak koordinatzea eta haien jarraipena egitea, haien kirol garapen osoa eta errendimendua sustatzeko.
d) Interes berezia duten gaietarako, kirol klub eta fundazioekin lankidetza hitzarmenak sustatu eta kudeatzea, haien kirol mailaren arabera.
e) Egiten diren goi mailako kirol jardueretan eta kirol taldeen kirol jardueran, irudi korporatiboaren eta/edo erabakitzen den beste irudi baten euskarri bereizgarriak tramitatzea eta haien jarraipena egitea, komunikabideetan eta gizartean oihartzuna dutenean.
f) Nafarroan kokaturik dauden unibertsitateen kirol jarduera eta lehiaketak koordinatzea eta haiek garatzeko lanetan laguntzea.
g) Kirol Sariak eta Kirolaren Goresmen Sariak emateko prozesua koordinatzea eta haren jarraipena egitea.
h) Bere eskumenen esparruko espedienteen jarraipena egitea eta artxibatzea.
i) Nafarroako errendimendu handiko kirola antolatzeko esparruaren inbentarioa eta jarraipena egitea, Nafarroako Kirolaren eta Gazteriaren Institutuaren helburuetan finkatutako jarraibideekin bat.
j) Kirolari talentudunak detektatzeko programak sustatu, sistematizatu eta koordinatzea.
k) Kirol arloko fundazioei aholkularitza ematea eta haiekin koordinatzea, Nafarroan errendimendu handiko kirola hobetzeko programak garatzeko.
l) Nafarroako Selekzioen marka korporatiboaren elementu bereizgarriak tramitatzea eta haien erabileraren jarraipena egitea.
m) Aurrekoen antzekoa edo osagarria den beste edozein eginkizun, baita Entitateen eta Kirol Errendimenduaren Atalak agintzen dizkionak ere.”
Lau.–21. artikulua kentzen da. Kirol Teknifikazioaren Bulegoa.
Azken xedapen bakarra. Indarra hartzea.
Foru agindu honek Nafarroako Aldizkari Ofizialean argitaratzen den egunean hartuko du indarra.
Iruñean, 2017ko abenduaren 26an.–Kultura, Kirol eta Gazteriako kontseilaria, Ana Herrera Isasi.
Iragarkiaren kodea: F1715132
