Iragarkia
27. ALDIZKARIA - 2007ko martxoaren 2a
II. NAFARROAKO TOKI ADMINISTRAZIOA
2.2. AGINTARIAK ETA LANGILEAK
2.2.2. Plantilla Organikoa, Lan Eskaintza Publikoa, oposizioak eta lehiaketak
ZIZUR NAGUSIA
Deialdia, Tokiko Gobernu Batzarrak 2007ko otsailaren 2an onetsia, Zizur Nagusiko Udalaren zerbitzuko lorezaintzako behargin izateko bi lanpostu, funtzionarioen araubidekoak eta D mailakoak, oposizio bidez betetzeko
Tokiko Gobernu Batzarrak 2007ko otsailaren 2an hartu erabakiaren bidez, Zizur Nagusiko Udalaren zerbitzuko lorezaintzako behargin izateko bi lanpostu oposizio bidez betetzeko deialdia onetsi da.
Hautapen prozesua ondoko hauetan xedatutakoari jarraikiz eginen da: Nafarroako Administrazio Publikoen zerbitzuko Langileen Estatutuaren Testu Bategina, abuztuaren 30eko 251/1993 Legegintzako Foru Dekretuaren bidez onetsi zena, aipatu estatutua garatu eta burutzeko Sarrera Erregelamendua, gainerako aplikazio arauak eta deialdi honetako arauak.
1._Deialdiaren xedea.
1.1. Deialdi honen xedea da lorezaintzako behargin izateko bi lanpostu oposizio bidez betetzea. Lanpostuak funtzionarioen araubidekoak eta D mailakoak dira, txanda hauetan banatuak:
_Lanpostu 1, txanda irekian.
_Lanpostu 1, igoera txandan.
1.2. Igoera txandako lanpostuak hutsik geldituz gero, izangaiek hautapen probak gainditzeko behar den gutxieneko puntuazioa atera ez dutelako, txanda irekikoei gehituko zaizkie.
Bestaldetik, igoera txandan hutsik dauden lanpostuak baino izangai gehiagok probak gainditzen badituzte, txanda horretan lanpostuak eskuratzen ez dituztenek aukera izanen dute txanda irekiko lanpostu hutsak eskuratzeko, txanda horretako izangaiekin lehia garbian eta eskuratutako azken puntuazioaren arabera.
Era berean, txanda irekiko lanpostuak eskuratzeko aukera izanen dute, aurreko lerroaldean adierazitako moduan, 7.2 atalean agiriak aurkezteko ezartzen den epea bukatzen denean deialdiko 2.1.2 arauko eskakizun berariazkoak betetzen ez dituzten igoera txandako izangaiek.
1.3. Hautaprobak gainditu ondoan, deialdi honetako lanpostuak betetzeko izendatzen diren langileak D maila edo taldean sartuko dira, eta uztailaren 4ko 158/1984 Foru Dekretuaren bidez onetsiriko Lansarien Behin-behineko Erregelamenduan eta Zizur Nagusiko Udalean aplikatzeko diren gainerako xedapenetan ezarritako lansariak jasoko dituzte.
1.4. Lanpostua lortzen duten izangaiak funtzionario bilakatuko dira, Zizur Nagusiko Udaleko langileendako egungo xedapenetan zehazten diren eskubide eta betebehar guztiekin.
1.5. Halaber, deialdi honen bidez hautaprobak gainditu bai baina lanposturik lortzen ez duten izangaiekin aldi baterako kontratatuak izateko izangaien zerrenda bat osatuko da, deialdi honetako 9. arauan xedaturikoarekin bat.
1.6. Izangaiak, hautaprobak gainditu eta deialdi honetako lanpostuetan aritzeko izendatu ondoren, Zizur Nagusiko Udalean sartuko dira eta Gizarte Segurantzaren Araubide Orokorrean afiliatuko, eta alta emanen zaie, araubide horretan aurreikusitako babesean.
Deialdi honetako lanpostuetarako izendatu eta lehendik eskubide pasiboen eta osasun eta gizarte laguntzaren araubidean, hots, Nafarroako Administrazio Publikoen zerbitzuko Langileen Estatutuan eta gainerako xedapen osagarrietan aipatzen den hartan, afiliatuta daudenek bertan segitzea aukeratzen ahal dute edo Gizarte Segurantzan afiliatzea.
1.7. Lanpostua eskuratzen duten izangaiek lanlekua duten herrian bizi beharra dute, eta hori betetzeko Zizur Nagusiko udalerrian finkatuko dute beren bizilekua.
2._Izangaiek bete beharreko baldintzak.
2.1. Oposizio honetan onartuak izateko, izangaiek, eskabideak aurkezteko epea amaitzen den egunean eta agiriak aurkezteko epea amaitzen denetik (deialdiaren 7.2 atalean adierazia) lanpostuaren jabetza hartu arte, baldintza hauek bete beharko dituzte:
2.1.1. Izangai guztiek bete beharreko baldintzak.
a) Espainiarra izatea, edo Europar Batasuneko beste estatu batekoa, edo, Europar Batasunak izenpetu eta Espainiak berretsitako nazioarteko itunak direla medio, langileen zirkulazio librea aplikatzen den eremuko estatu batekoa.
Orobat, espainiarren eta Europar Batasuneko beste estatuetako edo aipatu nazioarteko itunek ukitutako estatuetako herritarren ezkontideek parte hartzen ahal dute, zuzenbidez bereizita ez badaude; halaber, haien ondorengoek eta ezkontidearenek, zuzenbidez bereizita ez badaude, 21 urtetik beherakoak badira, edo gorakoak, haien kontura biziz gero.
b) Adin nagusikoa izatea eta erretiroko adina ez izatea.
c) Eskola Graduatuko titulua, Lanbide Heziketako Lehen Mailako titulua edo horien baliokidea izatea, edo eskaerak aurkezteko epea bukatzen den egunean titulu hori eskuratzeko moduan egotea.
Atzerrian lorturiko tituluak badira, homologazioaren egiaztagiria eduki beharko da.
d) Bete behar dituen eginkizunetan aritzeko adinako gaitasun fisiko eta psikikoa izatea.
e) Eginkizun publikoetan aritzeko desgaitu edo gabetua ez egotea eta administrazio publikoren baten zerbitzutik bereizia ez izatea.
Espainiako nazionalitatea ez duten izangaiek frogatu beharko dute beren estatuko funtzio publikoan sartzea eragozten dien diziplina zehapenik edo zigor penalik ez dutela.
f) B motako ibilgailuak gidatzeko baimena izatea.
2.1.2. Igoera txandako izangaiek bete beharreko baldintza berariazkoak.
Igoera txandako izangaiek, aurreko atalean adierazitako betebeharrez gain, hauek bete beharko dituzte:
a) Nafarroako edozein Administrazio Publikotako langile finkoa izatea, eta jatorrizko lanpostuan borondatezko edo nahitaezko eszedentzian ez egotea.
b) Deialdiko lanpostu hutsen maila berekoa edo apalagokoa izatea.
c) Administrazio Publikoetan bost urteko antzinatasun onartua izatea.
2.2. Deialdiko 3.4 arauaren bigarren puntuan aipatzen den salbuespena salbuespen, izendatuak izateko proposatzen diren izangaiek deialdiko 7.2 atalean ezarritako epean eta moduan frogatu beharko dituzte betebehar horiek.
3._Eskabideak.
3.1. Deialdian parte hartzeko eskabideak aurkeztu beharko dira Zizur Nagusiko Udaleko erregistro orokorrean (Erreniega parkea, zk.g., Zizur Nagusia) edo Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 38.4 artikuluan ezarritako bideetako bat erabiliz. Horretarako, hogeita hamar egun naturaleko epea izanen da, deialdi hau Nafarroako ALDIZKARI OFIZIALean argitaratu eta biharamunetik hasita.
Eskabideak deialdi honen I. eranskinean dagoen ereduari lotu behar zaizkio eta, haietan, izangaiek adierazi beharko dute eskatutako baldintza guztiak betetzen dituztela. Eskabide eredua Zizur Nagusiko Udalaren idazkaritzan hartuko dira, edo, bestela, Infolocal 012 telefonoaren bidez, Nafarroa barrutik deituz gero, edo 948 217 012 telefonoa markatuz, Nafarroaz kanpotik deituz gero; Internet bidez ere eskuratzen ahal da, www.zizurmayor.es helbidean, baita deialdia argitaratzen den Nafarroako ALDIZKARI OFIZIALean ere.
3.2. Ezgaitasun aitortua duten lehiatzaileek, ariketak egin ahal izateko denbora edo baliabideetan egokitzapenik behar badute, zilegi izanen dute eskabidean eskatzea, eta hartarako, aparteko orri batean adierazi beharko dute nolako ezgaitasuna duten eta zer egokitzapen eskatzen duten. Horrekin batera, legeen arabera ezgaitasunen bat dutela frogatzeko agiriaren kopia konpultsatua ere aurkeztu beharko dute, organo eskudunak emana.
3.3. Hautapen prozesuko ariketa guztiak gainditzen ez dituzten hautagaiekin zerrenda batzuk osatuko dira, ondoren aldi baterako kontratazioak egiteko. Horretarako, parte hartzaileek deialdiko eskabidean berean adierazi beharko dute aldi baterako kontrataziorako aukera onesten dutela.
3.4. Eskabideari, behar bezala bete ondoren, agiri hauek erantsiko zaizkio:
Bat._Espedientea formalizatzeko eta azterketa eskubideetarako 15 euro ordaindu izanaren ziurtagiria. Azterketa eskubideen tasa ordaintzen ez bada, izangaia baztertu eginen da.
Honako hauek ez dute tasarik ordaindu beharko:
a) %33ko edo gehiagoko ezgaitasun aitortua dutela frogatzen duten pertsonek, organo eskudunak luzaturiko jatorrizko agiriaren edo behar bezala konpultsaturiko fotokopiaren bidez.
b) Hautaproben deialdia egin aurretik hilabete batez edo luzaroago lan-eskatzaile gisa inskribaturik egon diren pertsonak. Salbuespen hori aplikatzeko baldintza izanen da inskribaturik egon diren bitartean eskainitako inolako lan egokiri uko egin ez izana eta lanbide sustapen, prestakuntza edo aldaketarako ekintzetan parte hartzeari uko egin ez izana, justifikaturiko kasuetan izan ezik, eta, horrez gainera, lanbide arteko gutxieneko soldatatik gorakoa den dirusarrerarik ez izatea hilabetero.
Lan-eskatzailea dela frogatzeko, Enplegu Bulegoak emandako agiria aurkeztu beharko da. Bertan, lan-eskatzaile gisa inskribatu zeneko data agertuko da eta, orobat, adieraziko da inskribaturik egon den bitartean ez diola uko egin handik eskainitako inolako lan egokiri, ez eta lanbide sustapen, prestakuntza edo aldaketarako ekintzetan parte hartzeari ere, justifikaturiko kasuetan izan ezik.
Hilabetero lanbide arteko gutxieneko soldatatik gorako dirusarrerarik ez duela interesatuaren adierazpenaren bidez frogatuko da.
Bi._Deialdian igoera txandan parte hartzea eskatzen duten izangaiek, Zizur Nagusiko Udaleko Administrazioa ez den beste Nafarroako Administrazio Publiko bateko langile finkoak badira, lehengoaz gainera, 2.1.2 idatz-zatian jasotzen diren eskakizunak betetzen direla frogatzen duen agiria gehitu beharko diote eskabideari.
3.5. Eskabideak aurkezteko epea ezin izanen da luzatu.
3.6. Eskabidean atzematen diren akats materialak edo egitezkoak ofizioz edo interesatuak eskaturik zuzentzen ahalko dira, noiznahi ere.
4._Izangaien onarpena eta erreklamazioak.
4.1. Eskabideak aurkezteko epea buruturik, alkate udalburuak onartu eta baztertuen behin-behineko zerrenda onesten duen ebazpena emanen du, eta Nafarroako ALDIZKARI OFIZIALean argitaratzeko aginduko.
4.2. Izangai baztertuek hamar egun balioduneko epea izanen dute, behin-behineko zerrenda Nafarroako ALDIZKARI OFIZIALean argitaratzen denetik, erreklamazioak aurkezteko eta, akatsik egin badute, zuzentzeko.
4.3. Erreklamazioetarako epea bukatutakoan eta horiek ebatzi ondoren, alkate udalburuak ebazpena emanen du onartu eta baztertuen behin betiko zerrenda onesteko, eta Nafarroako ALDIZKARI OFIZIALean argitaratzeko aginduko du.
4.4. Izangaiei egotziriko arrazoiengatik baztertzen direnei ez zaizkie azterketa egiteko eskubideak itzuliko.
5._Epaimahaia.
5.1. Epaimahaiak kide hauek izanen ditu:
Batzordeburua: Luis María Iriarte Larumbe, Zizur Nagusiko Udaleko alkatea.
Ordezkoa: José Manuel Vizcay Vilella, Zizur Nagusiko Udaleko lehen alkateordea.
Mahaikide idazkaria: Jesús Javier Múgica Martinena, Zizur Nagusiko Udaleko idazkaria.
Ordezkoa: María Isabel Abadía Sanz, Zizur Nagusiko Udaleko Giza Baliabideen zuzendaria.
Mahaikidea: Eduardo Senar Senar, Zizur Nagusiko Udaleko Hirigintza Zerbitzuetako burua.
Ordezkoa: Juan José Crespo, Zizur Nagusiko Udalaren lorezaintzako kapataza.
Mahaikidea: Eraikuntzako Lan Fundazioak izendatu beharreko teknikaria.
Ordezkoa: Eraikuntzako Lan Fundazioak izendatu beharreko teknikaria.
Mahaikidea: Zizur Nagusiko Udaleko langileen ordezkariek izendatu beharrekoa.
Ordezkoa: Zizur Nagusiko Udaleko langileen ordezkariek izendatu beharrekoa.
Epaimahaia hautaprobak hasi baino lehen eratuko da.
5.2. Epaimahaia ezin izanen da eratu, ezta aritu ere, kideen gehiengo osoa bertan izan gabe.
Organo kolegiatuaren eraketak eta jardunak balio izateko, mahaiburuak eta mahaikide idazkariak edo haien ordezkoek bertan egon beharko dute.
5.3. Epaimahaiko kideek parte hartzeari uko egin beharko diote eta deialdia egin duen organoari hala jakinarazi, Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Foru Legean horretarako aurreikusiak dauden egoerak gertatzen direnean.
Izangaiek, halaber, zilegi dute mahaikideak errefusatzea, egoera horietako bat gertatzen denean.
5.4. Epaimahaiak gehiengoz erabakiko ditu deialdiaren oinarriak ulertu eta aplikatzeko moduaren inguruan sortzen diren arazo guztiak.
5.5. Epaimahaiak aholkulari adituen laguntza izan dezake proba batzuetan nahiz guztietan. Aholkulari horiek beren espezialitate teknikoetan baizik ez dira ariko eta horietan bakarrik emanen diote laguntza epaimahaiari.
6._Oposizioa nola eginen den.
6.1. Oposizioa 2007ko apirilean hasiko da, gutxi gorabehera. Onartu eta baztertuen behin betiko zerrenda onesten duen ebazpenean berean zehaztuko da ariketak non, noiz eta zer ordutan hasiko diren.
Ondoren, epaimahaiak gainerako probak egiteko iragarkiak jakinaraziko ditu, arauz egin behar den moduan.
6.2. Oposizioak ariketa hauek izanen ditu:
Lehen ariketa: bi proba izanen ditu.
Lehenbizikoa: Idatzizko proba honetan, galdera sorta bati erantzun beharko zaio: erantzuteko zenbait aukera emanen dira, baina horietariko bakarra izanen da zuzena. II. eranskineko gaiei buruzko galderak izanen dira: gaitasun linguistikoa, matematikoa, burokratiko-administratiboa eta ortografia. Hutsak zehatu eginen dira.
Proba honetan izangaiek ezin dute ez hiztegirik ez kalkulagailurik erabili.
Bigarrena: Idatzizko proba hau deialdiko III. eranskinari buruzkoa izanen da. Galdera sorta bati erantzun beharko zaio: erantzuteko zenbait aukera emanen dira, baina horietariko bakarra izanen da zuzena. Gainera, eranskin horretako gaiei buruzko galdera batzuei erantzun beharko zaie, labur edo erantzuna garatuz. Galdera sortan, hutsak zehatu eginen dira.
Epaimahaiak, probak hasi baino lehen, bi proba horien gehieneko iraupena finkatuko du. Biak egun berean egiten ahal dira, epaimahaiak erabakitzen duen bezala egin ere.
Bigarren ariketa: proba teoriko-praktiko bat edo batzuk egin beharko dira, epaimahaiak zehaztuko dituenak, deitutako lanpostuaren gaineko eginkizunez izangaiek dituzten ezagupen praktikoak neurtzeko izanen direnak, III. eranskineko gaietako materiarekin lotuak.
Epaimahaiak, proba hasi baino lehen, haren gehieneko iraupena finkatuko du.
6.3. Oposizioko ariketen balorazioa:
Lehen ariketa:
Lehenbiziko proba: 0tik 15 puntu bitarte emanen dira. Gainditzeko gutxienez 8 puntu beharko dira.
Bigarren proba: 0tik 35 puntu bitarte emanen dira. Gainditzeko gutxienez 18 puntu beharko dira.
Bigarren ariketa: 0tik 50 puntu bitarte emanen dira. Gainditzeko gutxienez 25 puntu beharko dira.
Zati bakoitzean huts egindako erantzunak modu negatiboan balioetsiko dira, probak hasi baino lehenago epaimahaiak erabakiko duen proportzioan.
6.4. Oposizioko ariketak baztergarriak izanen dira. Gutxienez ere 11,25 puntu eskuratzen ez dituzten izangaiak bazterturik geldituko dira.
Izangaiak ariketa bakoitzeko lehen proban epaimahaiak eskatutako gutxieneko puntuazioa eskuratzen ez badu, epaimahaiak ez du bigarrena kalifikatuko.
6.5. Ariketak zuzendu ondoren, epaimahaiak jendaurrean jarriko du, Nafarroako Gobernuaren iragarki oholean eta ariketa egin den tokian, gainditu duten izangaien zerrenda, lortutako kalifikazioekin eta, halaber, oposizioaren hurrengo proba edo ariketa egiteko tokia, eguna eta ordua, gutxienez 48 ordu lehenago.
6.6. Ariketa bakoitzerako dei bakarra eginen da. Izangaiek nortasun agiri nazionala, pasaportea edo gida-baimena eraman beharko dute. Azterketara agertzen ez direnak edo arestian aipatutako agirietako baten bidez beren nortasuna egiaztatzen ez dutenak oposiziotik baztertuko dira.
6.7. Hautaprobak egiteko, ezgaitasun aitorturen bat dutenentzat bidezkoak diren denbora eta baliabide egokitzapenak eginen dira, eskabidean azaldutakoaren arabera.
7._Probak gainditu dituztenen zerrenda, izendapen proposamena eta agirien aurkezpena.
7.1. Hauta-probak amaiturik, epaimahaiak jendaurrean jarriko du probak gainditu dituztenen zerrenda, oposizioan lortutako kalifikazioekin, Nafarroako Gobernuaren iragarki oholean. Gero, zerrenda hori Funtzio Publikoaren zuzendari nagusiari igorriko dio, deialdiko lanpostuen kopuruaren barruan sartzen diren eta probak puntuazio altuenekin gainditu dituzten izangaiak izendatzeko proposamenarekin eta espediente osoarekin batera. Proposamen hori Nafarroako ALDIZKARI OFIZIALean argitaratuko da.
Hautaproben azken emaitzan berdinketarik izanez gero, bigarren ariketan puntu gehien lortu dituztenen alde ebatziko da; eta, berdinketak segitzen badu, proben ordenari jarraituz beste probetan izandako puntuazioak hartuko dira kontuan.
Irizpide horiek erabili ondotik, oraindik ere berdinketak segitzen badu, probetan, egin diren ordenean, akatsik gutxien dituenaren alde joko da.
7.2. Izendapen proposamena Nafarroako ALDIZKARI OFIZIALean argitaratu ondoko 30 egun naturaleko epean, proposatutako izangaiek inprimaki berariazko batzuk jaso eta honako agiri hauek aurkeztu behar dituzte Funtzio Publikoaren Zuzendaritza Nagusian:
7.2.1. Zizur Nagusiko Udaleko Administrazioaren zerbitzuko langile finkoak ez diren izangaiak:
a) Nortasun Agiri Nazionalaren bi fotokopia konpultsatu, edo izangaiaren nazionalitatea eta nortasuna frogatzen dituen beste agiri baliokideren batenak.
b) Deialdiko 2. arauan eskatzen den tituluaren fotokopia konpultsatua, lortzeko eskubideak pagatu direla frogatzen duen gordekinarena edo, hala bada, eskabideak aurkezteko epean titulua eskuratzeko moduan dagoela frogatzen duen ziurtagiria.
c) Laneko Arriskuei Aurrea hartzeko Atalak emandako txostena, interesatuak karguan aritzea eragotziko liokeen eritasun edo akats fisiko edo psikikorik ez duela frogatzeko.
Ezgaitasunen bat alegatu duten izangaiek, gainera, ezgaitasuna deialdiko lanpostuarekin bateragarria dela dioen frogagiria aurkeztu beharko dute, balorazio eta orientazio talde eskudunek emana.
d) Eginkizun publikoetarako ezgaitua edo gabetua ez izatearen eta inongo administrazio publikoren zerbitzutik bereizia ez izanaren zinpeko aitorpena.
Izangaiek Espainiako nazionalitatea ez badute, agiria aurkeztu beharko dute, beren Estatuko Funtzio Publikoan sartzea eragozten dien diziplina zehapenik edo zigor penalik ez dutela adierazteko.
e) Zin egin edo hitz ematea, Nafarroako Foru Eraentza errespetatu, Konstituzioari eta legeei men egin eta karguari dagozkion eginkizunak zuzen beteko dituela.
f) B motako ibilgailuak gidatzeko baimenaren fotokopia konpultsatua, betebehar hori duten lanpostua eskuratu nahi denean.
g) Lehendakaritzako Alorrak eskatzen dituen gainerako agiriak.
Deialdi hau egin ez duen Nafarroako administrazio publikoren bateko langile finkoek, gainera, aurreko administrazioko espediente pertsonalean guztiak frogatzen dituen ziurtagiria, hots, sarrerari, antzinatasunari, mailari, egoera administratiboari eta abarrei buruzkoa.
7.2.2. Zizur Nagusiko Udalaren zerbitzuko langile finkoak diren izangaiak:
a) Deialdiko 2. arauan eskatzen den tituluaren fotokopia konpultsatua, lortzeko eskubideak pagatu direla frogatzen duen gordekinarena edo, hala bada, eskabideak aurkezteko epean titulua eskuratzeko moduan dagoela frogatzen duen ziurtagiria.
b) B motako ibilgailuak gidatzeko baimenaren fotokopia konpultsatua.
c) Lehendakaritzako Alorrak eskatzen dituen gainerako agiriak.
Ezgaitasunen bat alegatu duten izangaiek, gainera, ezgaitasuna deialdiko lanpostuarekin bateragarria dela dioen frogagiria aurkeztu beharko dute, balorazio eta orientazio talde eskudunek emana.
7.3. Aipatu epearen barrenean, eta aski justifikaturik dauden ezinbesteko kasuak salbuetsiz, arestiko agiriak aurkezten ez dituztenak ezin izanen dira izendatu, eta ordura arteko egintza guztiak baliorik gabe geldituko dira, euren eskabidearen faltsukeria dela eta, legokiekeen erantzunbeharra galarazi gabe.
7.4. Aurreko lerroaldean aurreikusitako kasuan, alkateak puntuazioen zerrendan, 7.1 idatz-zatian aipatzen den horretan, hurrengoa den izangaiarekin beteko du lanpostua, eta honekin aurreko idatz-zatietan adierazitako prozedura bera erabiliko da.
8._Izendapena, lanpostuen esleipena eta jabetza hartzea.
8.1. Funtzio Publikoaren zuzendari nagusiak, ebazpen baten bitartez, aurreko oinarrietan ezarritakoa betetzen duten izangaiak Nafarroako Foru Komunitatearen Administrazioko funtzionario izendatuko ditu, Ogasuneko teknikari lanetan aritzeko. Ebazpen horren bidez lanpostuen esleipena ere eginen da.
8.2. Izendapenak eta lanpostuaren jabetza hartzeak nomina eta plantillako funtzionario bilakatuko dituzte izendatuak, indarra duten xedapenek ezartzen dituzten eskubide eta betebehar guztiak dituztela. Gizarte Segurantzako araubide orokorrean inskribatu eta kidetuko dira, araubide horretan aurreikusitakoaren babesean.
Aurrekoa gorabehera, Nafarroako Administrazio Publikoen Zerbitzuko Langileen Estatutua onetsi zuen abuztuaren 30eko 251/1993 Legegintzako Foru Dekretuaren bederatzigarren xedapen gehigarriaren 3. puntuan xedatutakoa aplikatzearen ondorioz, Nafarroako administrazio publikoen edozein mutualitatetako eskubide pasiboen araubidekoak direnen kasuan, bi aukera izanen dituzte: Nafarroako Foru Komunitateko Administrazioko mutualitatean segitzea, martxoaren 5eko 10/2003 Foru Legearen bidez arauturiko eskubide pasiboen araubideak babesturik, edo Gizarte Segurantzaren Araubide Orokorrean sartzea.
8.3. Izendatzen diren izangaiek destinoko herrian bizi beharra dute eta, horretarako, udalerri horretan finkatuko dute bizilekua.
8.4. Izendapena Nafarroako ALDIZKARI OFIZIALean argitaratuko da eta izangai izendatuak hilabeteko epean jabetu beharko du bere lanpostuaz, izendapenaren jakinarazpenetik kontatzen hasita.
Epe horretan eta ezinbertzeko kasuetan salbu, jabetza hartzen ez badute, Valtierrako Udaleko funtzionario izateko eskubide guztiak galduko dituzte. Hala bada, 7.4 atalean ezarritakoari jarraikiko zaio.
8.5. Izangai bat funtzionario bihurtu eta lanpostuan batere aritu gabe zuzenean eta berak eskatuta borondatezko eszedentzia ematen bazaio jabetza hartzearen egunetik bertatik, data horretan beste Administrazio Publiko batean ari delako, kasuko lanpostu hutsa ere beteko da deialdiko 7.4 atalak agintzen duen moduan.
9._Aldi baterako kontratuetarako izangaien zerrenda.
9.1. Nafarroako Administrazio Publikoetan sartzeko Erregelamenduaren 42. artikuluan ezarritakoari jarraikiz, aldi baterako kontrataziorako izangaien zerrenda hauek sortuko dira:
_Probak gainditu bai baina lanposturik lortu ez duten izangaien zerrenda.
_Hautapen prozesuaren ariketa guztiak gainditu ez dituzten izangaien zerrenda.
9.2. Probak gainditu bai baina lanposturik lortu ez duten izangaien zerrendak.
Probak gainditu arren lanposturik lortu ez duten izangaiekin Funtzio Publikoaren Zuzendaritza Nagusiak zerrenda bat osatuko du, ondoren aldi baterako kontratazioak egiteko, deialdi honetako 10. arauan ezarritako prozedurari jarraikiz. Lehendakaritza, Justizia eta Barne kontseilariaren azaroaren 14ko 146/2005 Foru Aginduan xedatutako arauen arabera kudeatuko du.
9.3. Hautapen prozesuko ariketa guztiak gainditzen ez dituzten izangaiak.
Deialdiko hamaikagarren arauan ezarritako prozedurarekin bat, Funtzio Publikoaren Zuzendaritza Nagusiak aldi baterako kontratazioak egiteko izangaien zerrenda bat osatuko du, deialdiko azken-aurreko ariketa gainditu eta Administrazio Erroko zerrenda hautatu duten izangaiekin.
10._Aldi baterako kontratuetarako izangaien zerrendak osatzeko prozedura.
10.1. Epaimahaiaren espedientea jasota, Funtzio Publikoaren zuzendari nagusiaren ebazpen baten bidez, hautaprobak gaindituta ere lanposturik gabe gelditu diren izangaiei eta deialdian ezarritako azken-aurreko ariketa gainditu eta Administrazio Erroko kontratazio zerrenda aukeratu dutenei hamar egun balioduneko epea emanen zaie, ebazpena argitaratu eta biharamunetik hasita, ondoko dokumentazio hau aurkezteko:
a) Deialdiko 2. arauan eskatzen den tituluaren fotokopia konpultsatua, lortzeko eskubideak pagatu direla frogatzen duen gordekinarena edo, hala bada, sartzeko prozesuan parte hartzeko eskabideak aurkezteko epean titulua eskuratzeko moduan egoten dela frogatzen duen ziurtagiria.
b) B motako ibilgailuak gidatzeko baimenaren kopia konpultsatua.
Ebazpen hori Nafarroako ALDIZKARI OFIZIALean argitaratuko da, eta ukitutako langileen zerrendak Zizur Nagusiko Udalaren iragarki oholean (Erreniega parkea, zk.g.).
Eskatzen diren agiriak aipatu epean aurkezten ez dituztenak (aski justifikatutako ezinbesteko kasuetan izan ezik) eta eskatutako baldintzak betetzen ez dituztenak ez dira sartuko aldi baterako kontratuetarako izangaien zerrendan, eta deialdian parte hartzeagatiko eskubide guztiak galduko dituzte, betiere, parte hartzeko eskabidea faltsutzeagatik legokiekeen erantzukizuna deusetan ukatu gabe.
10.2. Sarrera prozedurako eskabideak aurkezteko epea bukatzen den egunerako bete beharko dira baldintzak, eta hautaprobek dirauteino eta kontratazioaldiak iraun bitarte bete beharko dira.
10.3. Dokumentazioa aurkezteko epea bukaturik, alkate udalburuaren ebazpen baten bidez, aldi baterako kontratuetarako izangaien zerrenda hauek onetsiko dira, kasua bada, eta Zizur Nagusiko Udalaren iragarki oholean paratuko (Erreniega parkea, zk.g.):
_Probak gainditu bai baina lanposturik lortu ez duten izangaien zerrenda.
_Deialdiko azkenaurreko ariketa gainditu, lanposturik gabe gelditu eta kontratazio zerrendetan sartzea aukeratu duten izangaien zerrenda.
10.4. Hauxe izanen da aldi baterako kontratazioen zerrendaren ordena: oposizioa gainditu bai baina lanposturik lortu ez dutenen kasuan, hautapen prozesuan lortutako puntuazioaren arabera; gainerako izangaien kasuan, gainditutako ariketetan lortutako puntuazioen batura. Berdinketarik dagoenean nor nagusitzen den erabakitzeko, deialdi honetan kasu horietarako ezarritako irizpideak hartuko dira kontuan.
11._Errekurtsoak.
Epaimahaiaren egintzen aurka, gora jotzeko errekurtsoa paratzen ahalko da, deialdia egin duen udal organoari zuzendua, hilabeteko epean, errekurritutako egintza edo erabakia jakinarazten denetik aitzina.
Deialdi honen, bere oinarrien eta berau aplikatzeko egintzen aurka, hautara, ondoko errekurtsoetako bat aurkez daiteke:
a) Berraztertzeko errekurtsoa, egintzaren organo egileari berari zuzendua, hilabeteko epean, jakinarazi edo argitaratu eta biharamunetik aitzina.
b) Administrazioarekiko auzi-errekurtsoa, Iruñeko Administrazioarekiko Auzien Epaitegiari zuzendua, bi hilabeteko epean, errekurtsoa paratzen zaion egintza edo erabakia jakinarazi edo argitaratu eta biharamunetik hasita.
c) Gora jotzeko errekurtsoa, Nafarroako Administrazio Auzitegiari zuzendua, hilabeteko epean, errekurritutako egintza edo erabakia argitaratu edo jakinarazten denetik aitzina.
Zizur Nagusian, 2007ko otsailaren 2an._Alkate udalburua, Luis María Iriarte Larumbe.
I. ERANSKINA
Eskabidea
Izena: ....................., adinez nagusia. Nortasun Agiri Nazionala: .......................... (edo balio bereko beste agiriren bat) Sorteguna: ........................ Sorterria: ....................... (...................) Nazionalitatea: ..................... Egungo helbidea: ........... (................) Karrika: ............... Posta kodea: .......... Telefonoa: ................. Laneko telefonoa: ...............
Honako hau azaltzen dut:
Iruñeko Udaleko Administrazioaren zerbitzuko .............. izateko ......... lanpostu ....................bidez betetzeko deialdian parte hartzeko onar nazatela eskatzen dudala, behean aipatzen den txandan (deialdia ...... Nafarroako ALDIZKARI OFIZIALean argitaratu zen, ...............(e)an).
f Txanda irekia
f Igoera txanda*
Hautaprobak gainditzen ez baditut, lanpostuak behin-behinekoz betetzeko aukeraz baliatu nahi dudala, honako esparruetako batean:
(*) (Alorretako bat besterik ezin da hautatu).
Ez dudala karguan aritzea galarazten didan eritasunik edo akats fisikorik nahiz psikikorik.
Indarra duten xedapenetan ezarritako ezintasunik ez dudala.
Ez naizela diziplinako espediente bidez ezein administrazio publikoren zerbitzutik kanpo utzia izan eta ez nautela eginkizun publikoak betetzeko gaitasunik gabe utzi.
Deialdian eskatzen den titulazioaren jabe naizela.
Azterketa eskubideak ordaindu ditudala deialdian ezarritako moduan eta horren gordekina erantsi dudala, edo erantsitako agirien bidez frogatzen dudala tasa ordaintzetik salbuetsita nagoela.
Eskabideak aurkezteko epearen azken egunean beharkizun guztiak betetzen ditudala.
f Ezgaitasuna dudala eta, beraz, behar ditudan egokitzapenak eskatzen ditudala, haietarako arrazoiak adierazita. (Bertze orri batean azaldu behar dira eskatzen diren egokitzapenak eta haietarako arrazoiak).
f Ezgaitasuna frogatzen duen agiria aurkezten dudala, erakunde eskudun batek emana.
Horrenbestez,
Eskabide hau ontzat hartu eta aipatu deialdian onartua izatea eskatzen dut.
Zizur Nagusian, .....(e)ko .....aren ......(e)an
(Sinadura)
(*) Bidezkoa bada.
II. ERANSKINA
.1. gaia._Gaitasun burokratikoa eta administratiboa.
1.1._Sailkapen eta antolamendu alfabetikoa.
1.2._Oinarrizko aginduen ulermena.
1.3._Idatzizko aginduak.
1.4._Kalkuluko aginduak.
1.5._Arreta, ulermena eta nekeari aurre egiteko gaitasuna.
.2. gaia._Gaitasun numerikoa.
2.1._Osoko zenbakiak.
2.2._Zenbaki hamartarrak.
2.3._Zatikizko zenbakiak.
2.4._Kalkulua.
2.5._Problemak.
2.6._Proportzioak.
2.7._Ekuazioen kalkulua.
2.8._Sistema metriko hamartarra.
.3. gaia._Hizkuntz gaitasuna.
3.1._Sinonimoak eta antonimoak.
3.2._Definizioak.
3.3._Gaizki ordenatuta dauden esaldiak.
3.4._Osatu gabeko esaldiak.
3.5._Alfabetoaren hurrenkeran ordenatzea.
3.6._Harremanik ez duten hitzak.
3.7._Hizkuntz jarioa.
3.8._Arrazonamendu linguistikoa.
.4. gaia._Ortografia.
4.1._Letra larrien erabilera.
4.2._Puntuazio zeinuak.
4.3._Hitzei azentua paratzea.
4.4._Preposizioen erabilera.
4.5._Letren erabilera:
4.5.1._B/V/W, B/P letren erabilera.
4.5.2._C/K/Q, C/S/Z letren erabilera.
4.5.3._D, Z letren erabilera.
4.5.4._G, J letren erabilera.
4.5.5._H letraren erabilera.
4.5.6._I, Y, LL letren erabilera.
4.5.7._M, N, Ñ letren erabilera.
4.5.8._R letraren erabilera.
4.5.9._S, X letren erabilera.
4.6._Erabilera bereziak.
4.7._Aditz batzuen erabilera okerrak.
III. ERANSKINA
.1. gaia._Lorezaintzako kontserbazio lanak.
1.1._Soropiletako eta zelaietako kontserbazio lanak.
1.1.1._Ureztaketa. Mota.
1.1.2._Soropila segatzea.
1.1.3._Eskarifikatzea.
1.1.4._Aireatzeak.
1.1.5._Profilaketak.
1.1.6._Berrereintza. Zohien bidez berritzea.
1.2._Zuhaitzak eta zuhaixkak kontserbatzeko lanak.
1.2.1._Ureztaketa. Mota.
1.2.2._Zuloak egitea eta jorratzea.
1.2.3._Inausketak.
1.2.4._Zurkaitza paratzea. Oinarriak eta teknikak.
1.3._Landare loredunak eta landare erraboildunak kontserbatzeko lanak.
1.3.1._Ureztaketa. Mota.
1.3.2._Substratua ematea.
1.3.3._Lurra prestatzea.
1.3.4._Garbitzea eta kentzea.
1.4._Barruko landareak kontserbatzeko lanak.
1.4.1._Ureztaketa. Mota.
Eguzkiaren azpian egotea, tenperatura eta hezetasuna.
1.5._Ordena eta garbitasuna kontserbazio lanetan.
.2. gaia._Sortze eta ordezkatze lanak lorezaintzan.
2.1._Soropila ordezkatzea eta ereitea.
2.1.1._Helburua.
2.1.2._Berrereintza motak.
2.1.3._Horiek egiteko sasoia.
2.1.4._Drainadurak. Drainadura motak.
2.2._Zuhaitzak, zuhaixkak eta landare loredunak ordezkatzea.
2.2.1._Zuhaitzak.
2.2.2._Urteroko landareak.
2.2.2._Biurteko landareak.
2.2.4._Landare erraboildunak.
2.2.5._Landare bizikorrak.
2.2.6._Lurra prestatzea. Drainadurak. Drainadura motak.
2.2.7._Landaketa motak.
2.2.8._Landaketa markoa eta espezieak aukeratzea.
2.2.9._Geotestilak eta "Mulch" (erabiltzea eta jartzea).
2.3._Barruko landareak ordezkatzea.
2.3.1._Urteroko landareak.
2.3.2._Biurteko landareak.
2.3.3._Landare erraboildunak.
2.3.4._Landare bizikorrak.
2.3.5._Landaketa motak.
2.3.6._Drainadurak. Drainadura motak.
2.3.7._Espezieak aukeratzea.
2.4._Ordena eta garbitasuna sortze eta ordezkatze lanetan.
.3. gaia._Inausketa lanak.
3.1._Zuhaitzak inaustea.
3.1.1._Inausi beharra espezie bakoitzean.
3.1.2._Inausketaren oinarriak.
3.1.3._Helburuak.
3.1.4._Inausketa motak.
3.1.5._Sasoia eta maiztasuna.
3.1.6._Langileak eta lanabesak.
3.1.7._Mozketak egiteko modua.
3.2._Zuhaixkak, azpi-zuhaixkak eta heskaiak inaustea.
3.2.1._Inausi beharra espezie bakoitzean.
3.2.2._Kontuan izan beharreko alderdiak.
3.2.3._Inausketa motak.
3.2.4._Inausketaren oinarriak.
3.2.5._Inausketa egiteko sasoia.
3.2.5._Inausketako kasu partikularrak.
.4. gaia._Izurriteak eta gaixotasunak lorezaintzan.
4.1._Lorezaintzako landareen izurrite eta gaixotasun nagusiak.
4.1.1._Sintomatologia.
4.1.2._Identifikazioa.
4.2._Lorezaintzan erabilitako kontrol eta borroka metodoak.
.5. gaia._Ureztaketa sarea kontserbatzeko lanak.
5.1._Iturgintzari buruz jakin beharreko oinarrizko ezagupenak.
5.1.1._Lanabesak, tresnak, makinak.
5.1.2._Materia nagusiak.
5.1.3._Material lagungarriak.
5.1.4._Arriskuen prebentzioa.
5.2._Ureztaketa instalazioaren mantentze prebentiboa.
5.2.1._Aspertsoreak, difusoreak, tantakako sistema eta uholdeak.
5.2.2._Ukondo, t-ak, pasoko giltza eta moztekoa.
5.2.3._Balbula elektrikoak.
5.2.4._Iragazkiak.
5.2.5._Euriko sentsore.
.6. gaia._Ibilgailuen eta makinen eta bitarteko lagungarrien lehen mailako mantentzea eta erabilpena, lorezaintzan. Tresnak zorroztea eta prest jartzea.
6.1._Lehen mailako erabilpena.
6.1.1._Ibilgailuak.
6.1.1.1._Traktoreak.
6.1.1.2._Soropila mozteko traktorea.
6.1.1.3._Kamioia.
6.1.1.4._Dunperra.
6.1.2._Inplementuak.
6.1.2.1._Zuloak egiteko makina.
6.1.2.2._Berrelikatzeko makinak.
6.1.2.3._Ongarritzeko makinak...
6.1.3._Motorezko makinak.
6.1.3.1._Soropila mozteko makina.
6.1.3.2._Sasiak garbitzeko makinak.
6.1.3.3._Motozerrak.
6.1.3.4._Eskaiak mozteko makinak.
6.1.3.5._Aiztur pneumatikoak...
6.1.4._Bitarteko lagungarriak.
6.1.4.1._Esku eskailera.
6.1.4.2._Aldamioak.
6.1.4.3._Saskiak.
6.2._Segurtasun neurriak, ibilgailuen eta makinen erabileran eta mantentzean.
6.3._Lorezaintzan erabiltzen diren tresnak zorroztea eta prest jartzea. Segurtasun neurriak.
6.4._Ibilgailuak, makinak eta tresnak garbitzea.
.7. gaia._Azpiegiturak lorategi zonetan eta egon lekuetan. Ezagutza orokorrak.
7.1._Hormigoia eta bere osagaiak.
7.2._Zola jarraituak zola ez jarraituak, kanpoko aldeetarako.
7.2.1._Berrelikatzeak.
7.2.2._Jorraketa mekanikoak edo kimikoak.
7.3._Hiriko instalazioak.
7.3.1._Sare elektrikoa eta telefonia sarea.
7.3.2._Ur hotzaren sarea.
7.3.3._Saneamendu sarea.
7.3.4._Argiteria.
7.3.5._Gas sarea.
7.4._Berdegunetako garbitasuna. Eskuz egiten diren lanak eta makinaz egiten direnak.
7.5._Lan-arriskuen prebentzioa eta segurtasuna eta osasuna lorezaintzako lanetan.
.8. gaia._Zizur Nagusiko berdeguneak.
8.1._Kanpoko lorezaintza. Lorategiak eta parke publikoak. Beste berdegune batzuk.
8.2._Zizur Nagusiko lorategi eta parke nagusiak. Zizur Nagusiko kaleen zerrenda.
Iragarkiaren kodea: L0702007
Sarbidea
Nafarroako Aldizkari Ofiziala
Paseo Pablo Sarasate, 38, 2.º izda.
31001 - Iruña
848 42 12 50
