195. ALDIZKARIA - 2018ko urriaren 8a

2. NAFARROAKO TOKI ADMINISTRAZIOA

2.1. OPOSIZIOAK ETA LEHIAKETAK. LAN PUBLIKOAREN ESKAINTZA

LERIN

Deialdia, zerbitzu anitzetako enplegatu lanpostuan aldi baterako kontratuarekin aritzeko izangaien zerrenda hautaproben bidez eratzeko

1.–Arau orokorrak.

1.1. Deialdi publiko honen xedea da izangaien zerrenda bat osatzea Leringo Udalaren zerbitzuko zerbitzu anitzetako enplegatu izateko lanpostua aldi baterako kontratuarekin betetzeko, Udalean sortzen diren beharrei erantzun beharrez.

1.2. Lanpostuak D mailako lansariak izango ditu, uztailaren 4ko 158/1984 Foru Dekretuaren bidez onetsitako Ordainsariei buruzko Behin-behineko Erregelamenduan eta Leringo Udalari aplikatu beharreko gainerako xedapenetan ezarritakoari jarraikiz.

1.3. Lanaldi mota zerbitzuaren beharretara egokituko da une oro; administrazio organo eskudunek noiznahi aldatzen ahalko dute, zerbitzuaren beharrek hala eskatzen dutenean.

1.4. Eginkizunak:

Mantentze-lan orokorren eta obren lantaldearen berezko jarduketekin ikusteko duten zerbitzu anitzetako lanak, baita udal instalazioetako berezko jarduketekin ikusteko dutenak ere, haiek egoki funtziona dezaten begiratu eta haien artatze eta mantentze-lanak eramatea; hona hemen haietako batzuk, aipatze hutsez, eta bestelakoak baztertu gabe, besteak beste:

–Udal bulego, instalazio eta biltegietako igeltserotza lanak oro har, eta horien mantentze-lanak; bai eta iturgintza, elektrizitate, pintura eta zurgintza lan txikiak ere.

–Hiri barneko altzarien instalazioa eta mantentze-lanak: posteak, seinaleak, farolak, bankuak, iturriak, etab.

–Jai eta ekitaldi publikoetan hiri barneko altzarien eta tresnen garraioa eta ezarpena: karpa, agertokiak, hesiak eta gainerako tresnak.

–Lorezaintza lanak: landatzea zuhaitzak, hesiak eta landareak, eta horien ongarritzea eta tratamendu fitosanitarioa egitea, zuhaitzak eta zuhaixkak inaustea, lorategiak atontzea eta belarra moztea.

–Garbiketa lanak: erratza pasatzea, zakarrontziak hustutzea, sakanak garbitzea.

–Komunikazioak eta deialdiak banatzea, jakinarazpenak eskura ematea, iragarkiak, bandoak eta udal publizitatea jartzea.

–Herri-lurraren kudeaketa egitea.

–Udaleko beste zerbitzu batzuei laguntzea, hala eskatzen zaionean, eta kanpoko zerbitzuekin koordinatzea, langile espezializatuak behar direnean.

–Edozein eratako udal zerbitzuak ematea, eta hala Alkatetzak nola organo delegatuek haren esku uzten duten beste edozein zeregin; guztiak ere bere eskumen, maila eta kategoriaren barnean.

1.5. Erantzukizunak:

–Laneko arriskuen prebentzio arauak betetzea.

–Zerbitzuaren hobekuntza sustatzea eta hartan laguntzea eta, hartara, hobekuntzarako lagungarri izan daitezkeen ekintza eta aldaketak proposatzea.

–Lana antolatzea, ezarritako xedeak beteko direla bermatu beharrez.

–Dagokion lan esparruko ordena zehatza mantentzea eta, hartara, eskura jarritako baliabideak egoera onean eta erabiltzeko maneran edukitzen ahalegintzea.

–Segurtasun eta higiene arauak betetzea, lan bakoitzean erabiltzen diren babes ekipo egokiak behar bezala baliatuta.

–Udalaren azpiegitura, egoitza eta ekipamenduetan ikusten diren akats, matxura eta hausturen berri ematea dagokionari aldiro eta garaiz, eta zerbitzuen hobekuntza bultzatzea eta hartan laguntzea eta, hartara, hobekuntzarako lagungarri izan daitezkeen ekintza eta aldaketak proposatzea.

–Lanerako ezarritako arau, prozedura eta zehaztapen guztiak ezagutu eta aplikatzea.

2.–Betebeharrak.

2.1. Parte hartu nahi dutenek, eskabideak aurkezteko epea bukatzen den egunean, honako baldintza hauek bete beharko dituzte:

a) Espainiako nazionalitatea izatea edo Europar Batasuneko estaturen batekoa edo, Europar Batasunak izenpetu eta Espainiako Estatuak berretsitako nazioarteko tratatuen arabera, langileen joan-etorri askea aplikatzen den estaturen batekoa.

Parte har dezakete, era berean, espainiarren eta Europar Batasuneko beste estatuetako herritarren ezkontideek, edo aipatutako nazioarteko tratatuen aplikazio eremuan sartutako estatuetako herritarren ezkontideek, zuzenbidez bereizita ez badaude; halaber, haien ondorengoek eta ezkontidearenek, zuzenbidez bereizita ez badaude, 21 urtetik beherakoak badira edo, hortik gorakoak izanez gero, haien kontura bizi badira.

b) Hamasei urte beteak izatea eta, hala behar bada, erretiroa nahitaez hartzeko gehieneko adina gainditua ez izatea.

c) Eskaerak aurkezteko epea bukatzen den egunean, DBHko Graduatuaren titulua, Eskola Graduatuen titulua, Erdi Mailako Lanbide Heziketakoa edo horien baliokide bat izatea, edo titulu hori eskuratzeko eskubideak ordaindu izanaren gordekina.

Atzerrian lortutako tituluak badira, homologazioaren frogagiria eduki beharko da.

d) Bete behar diren eginkizunetan aritzeko behar den gaitasun fisiko eta psikikoa izatea.

e) Dagozkion eginkizun publikoak betetzeko desgaiturik edo bazterturik ez egotea eta administrazio publikoren bateko zerbitzutik bereizia ez izatea.

f) B motako gidabaimena.

Espainiako nazionalitatea izan gabe parte hartu nahi dutenek zinpeko aitorpena edo hitzematea aurkeztu beharko dute, adierazteko ez dutela diziplina-zehapenik edo kondena penalik beren estatuko funtzio publikoan sartzea galarazten dienik.

2.2. Oinarri honen 2.1.c) eta f) apartatuetan eskatzen diren titulazio betebeharrak agiri bidez frogatu beharko dira, deialdi honen 8.4 atalean ezarritakoarekin bat.

2.3. Oinarri honetako betekizun guztiak eskabideak aurkezteko epea bukatzen den egunerako bete beharko dira (salbu 2.1. f) apartatuan adierazitakoa; hori kontratazio egunerako bete beharko da), baita hautapen prozedurak eta kontratazioak iraun bitartean ere.

3.–Eskabideak.

3.1. Deialdian parte hartu ahal izateko eskabideak aurkeztu behar dira Leringo Udalaren erregistro orokorrean, Udaletxe plaza 1ean, jendea hartzeko orduetan, 9:00 eta 14:00ak bitartean, deialdi honetako eranskineko ereduarekin bat etorriz.

3.2. Eskabidearekin batera honako agiri hauek aurkeztuko dira:

–NANaren fotokopia konpultsatua.

–DBHko graduatuaren tituluaren fotokopia konpultsatua, edo Eskola graduatuen tituluarena, erdi mailako Lanbide Heziketako tituluarena edo horien baliokide den batena, edo titulu hori eskuratzeko eskubideak ordaindu izanaren gordekina, eskabideak aurkezteko epea bukatzen den egunerako.

–B1 motako ibilgailuak gidatzeko baimenaren fotokopia.

–Lehiaketaldiko baremaziorako dokumentazioa, beharrezkoa bada, II. eranskinaren arabera.

3.3. Eskabideak aurkezteko epea 15 egun naturalekoa izango da, deialdia Nafarroako Aldizkari Ofizialean argitaratu eta biharamunetik hasita.

3.4. Baldin agiriak aurkezten badira Administrazio Publikoen Administrazio Prozedura Erkideari buruzko urriaren 1eko 39/2015 Legeak baimendutako beste bide baten bidez, izangaiak posta elektronikoz jakinarazi beharko dio Udalari, eskabideak aurkezteko epean (ayuntamiento@lerin.es).

4.–Izangaien onarpena.

4.1. Behin-behineko zerrendak.

Eskabideak aurkezteko epea bukatu ondoren, Leringo Udaleko alkateak ebazpena emango du izangai onartuen eta baztertuen behin-behineko zerrenda onetsiz. Halaber, aginduko du iragarki-taulan eta www.lerin.es Leringo Udalaren web-orria argitaratzeko eta izangaiei hiru eguneko epea emango die erreklamazioak egin ahal ditzaten eta, halakorik bada, egin izan dituzten akatsak zuzentzeko.

Izangai bazterturik ez badago, zuzenean onetsiko da onartuen behin betiko zerrenda.

4.2. Behin betiko zerrendak.

Erreklamazioetarako epea bukatutakoan eta haiei erantzun ondotik, alkateak ebazpena emango du, onartu eta baztertuen behin betiko zerrenda onesteko, eta aginduko du www.lerin.es Udalaren web-orrian eta iragarki oholean argitaratzeko. Ebazpen horretan berean zehaztuko da probak non, noiz eta zer ordutan hasiko diren.

4.3. Onartuen zerrendan agertzea ez da aski deialdian eskatutako betebeharrak betetzen direla aitortzeko. Izangaiek aurkeztutako dokumentazioa edo Udalak bere eskuetan daukana aztertuta, eskatutako baldintzetako bat betetzen ez dutela ohartuz gero, interesdunek deialdian parte hartzeagatik dituzten eskubide guztiak galduko dituzte.

4.4. Izangai onartu eta baztertuen zerrendak argitaratzearekin ulertuko da interesdunei egin beharreko jakinarazpena egin dela, Administrazio Publikoen Administrazio Prozedura Erkideari buruzko urriaren 1eko 39/2015 Legearen 40. artikuluan ezarritakoarekin bat.

5.–Kalifikazio epaimahaia.

5.1. Hauek izango dira kalifikazio epaimahaiko kideak:

Epaimahaiburua: M.ª Consuelo Ochoa Resano, Leringo Udaleko alkate udalburua.

Ordezkoa: José Justo López, Leringo Udaleko zinegotzia.

Epaimahaikidea: Tomás Urmeneta Fernández, Leringo Udaleko udal arkitekto aholkularia.

Ordezkoa: Paloma Lacasa Mayor, arkitektoa.

Epaimahaikidea: Jesús Yanguas Lacabe, Leringo Udaleko obra arduraduna.

Ordezkoa: Martín José Lacalle, Deikazteluko Udaleko zerbitzu anitzetakoa.

Epaimahaikidea: Carolina Ábrego Jiménez, arkitekto teknikoa.

Ordezkoa: Olga Ábrego Jiménez, topografiako ingeniari teknikoa.

Idazkari mahaikidea: Cristina Munárriz Colomo, Leringo Udaleko idazkaria.

Ordezkoa: Flor Laparte, Andosillako Udaleko idazkaria.

5.2. Hautaprobak hasi aurretik eratu beharko da epaimahaia; aholkulari espezialistak hartzen ahalko ditu probarako, eta horiek beren espezialitate teknikoetan baizik ez dira ariko, eta haietan bakarrik emango diete laguntza epaimahaikoei.

5.3. Epaimahaia ezin da eratu eta ezin du jardun, gutxienez ez badira bertaratu beren kideen gehiengo osoa, Sektore Publikoaren Araubide Juridikoari buruzko urriaren 1eko 40/2015 Legean ezarritakoari jarraikiz. Organo kolegiatu horren osaerak balio dezan, bertan mahaiburuak eta idazkariak egon behar dute edo, hala ez bada, haien ordezkoek.

5.4. Epaimahaiko kideek parte hartzeari uko egin beharko diote, eta organo deitzaileari horren berri eman, baldin eta Sektore Publikoaren Araubide Juridikoari buruzko urriaren 1eko 40/2015 Legean abstentziorako aipatzen diren egoeretako batean badaude. Izangaiek, halaber, zilegi dute epaimahaikideak errekusatzea, egoera horietako bat gertatzen denean.

5.5. Epaimahaia aldatzen bada, epaimahaikideek beraiek uko egiteko edo haiek errekusatzeko legez ezarritako kasuak direla-eta, aditzera emango da, izangai onartu eta baztertuen zerrendekin batera.

5.6. Epaimahaiak gehiengoz ebatziko ditu deialdiko oinarrien interpretazio eta aplikazioari buruz sortzen diren arazoak.

6.–Proben nondik norakoa.

Hautapen prozesuak bi fase edukiko ditu. Fase teoriko praktiko bat eta merezimendu-lehiaketako fase bat.

6.1. Fase teoriko praktikoa.

Bi proben bidez egingo da, bata teorikoa izango da, eta bestea praktikoa.

–Proba teorikoa: Aukera anitzeko 30 galderako sorta bati erantzun beharko zaio, erantzun zuzena bakarra izanik, deialdiko III. eranskineko gai zerrendako gaiei buruz.

  • Erantzun zuzen bakoitzak puntu 1 balioko du.
  • 30 puntu gehienez.

–Proba praktikoa: proba praktiko batzuk egingo dira, arlo hauetakoak: makineria, igeltserotza, pintura, mantentze-lan orokorrak, obra txiki edo ertainetako makineria maneiatzea, edota bestelako edozein, betiere deialdi honetako 1. oinarrian aipatzen diren eginkizun edo zerbitzuetakoak. Epaimahaiak zehaztuko du ariketa horretako probak egun bakarrean edo gehiagotan egingo diren, bai eta zenbat denbora iraungo duten ere, haien edukiaren arabera.

  • 60 puntu gehienez.

Probetarako dei bakarra egingo da. Parte-hartzaileek aldean eraman beharko dute nortasun agiri nazionala, pasaportea edo gidabaimena. Agirien bidez nor diren frogatzen ez dutenak edo agertzen ez direnak baztertuta geldituko dira.

Hautaprobak egiteko, desgaitasun aitorturen bat dutenentzat bidezkoak diren denbora eta baliabide egokitzapenak jarriko dira, eskabidean azaldutakoaren arabera.

6.2. Lehiaketaldia.

Lehiaketa soilik baloratuko zaie proba teoriko-praktikoari esleitutako guztizko puntuazioaren %30 gutxienez lortzen duten pertsonei.

Epaimahaiak izangaiek alegatutako merezimenduak, behar bezala frogatuak, baloratuko ditu, II. eranskineko baremoaren arabera. Epaimahaiak noiznahi eska ditzake izangaiek alegatutako merezimenduen gaineko argibideak zein datu osagarriak.

Merezimendu guztiak agiri bidez eta egiaztatzeko moduan frogatu behar dituzte izangaiek, oposizio-lehiaketan parte hartzeko eskabidea aurkeztean, jatorrizko agiriak edo behar bezala konpultsatuak erabiliz horretarako. Horrela egin ezean, ez dira kontuan hartuko.

Epaimahaiak ezin izango du, inola ere, aurkeztu gabeko edo agirien bidez frogatu gabeko merezimendurik kontuan hartu.

Fase honek gehienez ere 10 puntuko balorazioa izango du.

7.–Proben emaitzak.

Oposizioaldiko ariketak eta merezimenduak baloratu ondoren, behin-behineko emaitzak argitaratuko dira Leringo Udaleko web-orrian eta iragarki-taulan, eta 3 egun balioduneko epea irekiko da erreklamazioak aurkezteko.

Parte-hartzaileen artean berdinketarik gertatuz gero, epaimahaiak ebatziko du, kontuan izanik proba praktikoko zatian zein den puntuaziorik handiena. Berdinketak jarraitzen badu, zozketa bakar baten bidez erabakiko da, zeina kalifikazio epaimahaiak egingo baitu. Berdindutako izangai guztien artean, bat ausaz hautatuko da. Berdinketa guztiak hurrenkera alfabetikoari jarraikiz desegingo dira, abiapuntu harturik zozketa horretan hautatzen den izangaiaren abizenak eta izena. Zozketaren emaitzak web-orrian (deialdiaren aipuan) eta iragarki-oholean argitaratuko dira.

Alegazioen epea bukaturik, epaimahaiak iragarki-taulan eta web-orrian jarriko du probak gainditzen dituzten izangaien zerrenda, guztira lortzen duten puntuazioaren ordenaren arabera.

Aldi baterako kontratatzeko izangaien zerrendan sartuko dira 30 puntu gutxienez lortzen duten izangaiak.

Gainditu duten izangaien zerrenda, lortutako puntuazioaren hurrenkeran, onetsiko da Alkatetzaren ebazpen baten bidez eta argitaratu egingo da Leringo Udaleko web-orrian eta iragarki-taulan.

8.–Aldi baterako kontrataziorako dei egitea.

8.1. Gainditu duten izangaiei Leringo Udalean gertatzen diren beharren arabera egingo zaie dei, deialdi honetan ezarritakoari eta aplikatzekoak diren gainerako arauei jarraituz.

8.2. Lokalizaturik egon daitezen, izangaiek harremanetarako telefono bat eta helbide elektroniko bat jakinarazi behar dituzte gutxienez, eta informazio hori uneoro eguneraturik eduki beharko dute.

Lanpostu baterako aldi baterako kontratazioa egin behar denean, une horretan zerrendako lehenbiziko lekuan dagoen izangaiari deituko zaio. Izangai bakoitza lokalizatzeko bi saiakera egingo dira telefonoz bi lanegun jarraitutan, eta dei horren frogak jasoko dira, alegia, eguna, ordua eta inguruabarrak. Telefonozko harremana izateko lehenbiziko saiakerarekin batera, posta elektroniko bat bidaliko da izangaiak emandako helbide elektronikora. Mezu elektroniko hori bidaltzen denetik egun bateko epean erantzunik lortzen ez bada, eta telefonoz hitz egiterik ere ez bada, zerrendako hurrengoari deituko zaio.

Izangai batekin harremanetan jartzerik ez bada, zerrendan duen lehentasunari eutsiko dio eta zerrendan hurrengoa denari deituko zaio, harik eta eskaintzen den lanpostua bete arte.

8.3. Harremanetan jarri, eta kontrataziorako eskaintza bat eginik, izangaiak ez badu erantzuten edo uko egiten badio, zerrendako azkeneko postura igaroko da, salbu frogatzen badu honako arrazoi justifikatuetako batengatik uko egiteko kasu batean dagoela:

–Aldi baterako ezintasuna.

–Amatasun edo aitatasun baimena.

–Hiru urtez azpiko haurra edo hiru urtez azpiko adingabea harrera iraunkorrean edo adoptatua zaindu behar izatea.

–Bigarren gradura arteko odol edo ezkontza bidezko ahaide bat, adina, istripua edo eritasuna dela kausa bere burua ezin gobernatu duena zaindu behar izatea.

–Ezkontza edo parekatutako egoera, baldin eskainitako kontratazio administratiboaren hasiera eguna hura eratu ondoko edo aurreko hamabost egun naturalean bada.

–Kontratazioren bat indarrean izatea, dela administrazio araubidekoa edo lan araubidekoa.

–Desgaitasunen bat behar bezala onartua izatea eta desgaitasunaren ezaugarriak bateraezinak izatea eskaintzen zaion lanpostuaren ezaugarriekin.

Aipatu egoeretako batean dauden izangaiek 7 egun naturaleko epea izango dute, errefusatu duten lanpostua eskaintzen zaien egunetik, agiri bidez justifikatzeko. Hala bada, zerrendan zuten toki berean jarraituko dute. Kontratazio eskaintzari uko egiteko arrazoi justifikatua frogatzen duen dokumentazioa epe barrenean aurkezten ez bada, izangaia zerrendako azkeneko tokira igaroko da.

Uko egiteko arrazoi justifikatua dagoenean, idatziz adierazi beharko dute noiz dauden berriz lanerako prest, uko egitea ekarri zuen egoera bukatzen den egunetik hasita. Jakinarazpen hori egiten ez den bitartean, ez zaie lanposturik eskainiko.

8.4. Deia jasotzen duten izangaiek aurkeztu beharko dituzte titulua eta B1 motako gidabaimena dituztela frogatzeko agiriak, honako hauen fotokopia konpultsatua aurkeztuz, eskabideak aurkezteko epea bukatzen den egunean: DBHko graduatuaren titulua, Eskola graduatuen titulua, erdi mailako Lanbide Heziketakoa, edo titulu hori eskuratzeko eskubideak ordaindu izanaren gordekina. Gidabaimenaren kasuan, kontratuaren eguna izango da aurkezteko epea.

Eskatutako baldintzak betetzen ez dituzten pertsonak hautapen prozesutik baztertuko dira.

8.5. Ondoko kasuetako batean izangaiak zerrendatik baztertuta geldituko dira:

–Kontratazio eskaintza onartuta dagoela, kontratua ez sinatzea, izangaiari egozten ahal zaion arrazoiagatik.

–Sinatutako kontratuari uko egitea, salbu horren arrazoia baldin bada beste kontratu bat sinatu dela beste entitate publiko edo pribatu batekin. Agiri bidez eta modu fede-emailean frogatu beharko da hori, ukoaren formalizaziotik 7 egun naturaleko epean. Kasu honetan, izangaia zerrendako azkeneko tokira igaroko da.

–Lanpostua bertan behera uztea.

Probaldia ez gainditzea, kontratuan halakorik jaso den kasuetan.

9.–Errekurtsoak.

Deialdi honen, oinarrien eta aplikatzeko egintzen aurka errekurtso hauetako bat aurkez daiteke, hautara:

a) Berraztertzeko errekurtsoa, egintza burutu duen organo berari zuzendua, hilabeteko epean, hura jakinarazi edo argitaratu eta biharamunetik hasita.

b) Administrazioarekiko auzi-errekurtsoa, Administrazioarekiko Auzien Iruñeko Epaitegiari zuzendua, bi hilabeteko epean, errekurtsoaren xedeko egintza edo erabakia jakinarazi edo argitaratu eta biharamunetik hasita.

c) Gora jotzeko errekurtsoa, Nafarroako Administrazio Auzitegiari zuzendua, hilabeteko epean, errekurritutako egintza edo erabakia argitaratu edo jakinarazten denetik hasita.

Lerinen, 2018ko irailaren 18an.–Alkatea, M.ª Consuelo Ochoa Resano.

I. ERANSKINA

Eskabidea (PDFa).

II. ERANSKINA

Merezimenduen balioespena

1. Titulazio akademikoa (3 puntu gehienez):

–Erdi mailako heziketa zikloa, ondoko espezialitateetako batean (puntu 1):

  • Nekazaritza.
  • Natur Ingurunearen Aprobetxamendua eta Kontserbazioa.
  • Lorezaintzako eta Loradendako Teknikaria.
  • Eraikuntza eta Obra Zibila.
  • Eraikuntzako Teknikaria.
  • Barneko Obretako, Dekorazioko eta Zaharberritzeko Obretako Teknikaria.
  • Elektrizitatea eta Elektronika.
  • Instalazio Elektriko eta Automatikoetako Teknikaria.
  • Energia eta Ura.
  • Sareetako eta Edateko Uren Araztegiko Teknikaria.
  • Instalazioa eta Mantentze-lanak.
  • Elektromekanikako Mantentze-Lanetako Teknikaria.

–Goi mailako heziketa zikloa, ondoko espezialitateetako batean (2 puntu):

  • Nekazaritza.
  • Basoa eta Natur Ingurunea Kudeatzeko Goi Mailako Teknikaria.
  • Paisajismoko eta Landa Inguruneko Goi Mailako Teknikaria.
  • Eraikuntza eta Obra Zibila.
  • Eraikuntza Lanetako Kontroleko eta Antolaketako Goi Mailako Teknikaria.
  • Elektrizitatea eta Elektronika.
  • Elektronikako Mantentze-Lanetako Goi-Mailako Teknikaria.
  • Energia eta Ura.
  • Uraren Kudeaketako Goi Mailako Teknikaria.

–Era berean, baliozkoak izango dira 1990eko urriaren 3ko Hezkuntza Sistemaren Antolamendu Orokorrerako Legetik oraindik egokitu ez diren titulazio baliokideak.

2. Hobekuntza ikastaroak, lanpostuarekin lotutako gaietan (3 puntu gehienez).

Behar bezala frogatu beharko dira jatorrizko tituluaren edo fotokopia konpultsatuaren bidez. Puntuazioak honela banatuko dira:

20 ordu edo hortik gorako ikastaro bakoitzagatik: 0,50 puntu.

Bereziki apartatu honetan baloratuko da:

–Laneko arriskuen prebentzioaren oinarrizko edo goi mailako titulua: 1 puntu.

–Manitú eta igogailu-plataformei buruzko ikastaroa: 1 puntu.

3. Laneko eskarmentua (4 puntu gehienez).

–Administrazio publiko baterako zerbitzu anitzetako enplegatu lanetan eginiko urte bakoitzeko: puntu bat, edo behar den frakzioa, lanean aritutako hilabeteen arabera.

–Enpresa pribatuetan pintore, lorezain edo igeltsero lanetan eginiko urte bakoitzeko: puntu bat, edo behar den frakzioa, lanean aritutako hilabeteen arabera.

Dokumentu bidez frogatu behar da, administrazio publikoetan edo enpresa pribatuetan emandako denborari buruzko frogagiriaren fotokopia konpultsatua eta lan bizitzaren ziurtagiria aurkeztuz.

III. ERANSKINA

Zerbitzu anitzetako enplegatu lanposturako gai zerrenda

1. gaia.–Leringo udalerria: kaleen eta auzoen izenak, mendiena, alderdiena, ibaiena, etxolena, udaleko araudia.

2. gaia.–Leringo Udala. Konposizioa. Kideak hautatzea. Osoko Bilkura eta alkatea. Batzordeak. Udal organoen funtzionamendua. Leringo Udalaren zerbitzuko langileak.

3. gaia.–Laneko segurtasun eta higienearen gaineko arauen eta oztopo arkitektonikoen gaineko arauen oinarrizko ezagutzak.

4. gaia.–Soldaduraren ezagutza eta doitze makineriaren oinarrizko maneiuarena.

5. gaia.–Igeltserotzako kontzeptu orokorrak. Erremintak. Materialak. Zolatzea eta alikatatzea. Enkofratuak eta murruak zutitzea.

6. gaia.–Oinarrizko argi-zirkuituak: etengailuak, kommutadoreak, entxufe-oinak, lanparak, pitzarazgailuak eta erreaktantziak.

7. gaia.–Iturgintzako eta berokuntzako instalazioen mantentze-lanak: tresna sanitarioak, txorrotak, zisternak, sifoiak, berokuntza zirkuituak, zirkuituak betetzea eta purgatzea, galdara-gelak eta haien osagai bereziak.

8. gaia.–Eskema elektrikoen eta iturgintzakoen ezagutza.

9. gaia.–Pintura. Motak, produktuak, erremintak eta aplikazioa.

Iragarkiaren kodea: L1811654