Iragarkia
158. ALDIZKARIA - 2018ko abuztuaren 16a
1. NAFARROAKO FORU KOMUNITATEA
1.7. BESTELAKOAK
1323/2018 EBAZPENA, 2018ko ekainaren 29koa, Nafarroako Unibertsitate Publikoko errektoreak emana, Nafarroako Unibertsitate Publikoaren “Batxilergoko IX. Eztabaida Lehiaketa” egiteko deialdia onetsi eta dagokion gastua baimentzen duena.
Nafarroako Unibertsitate Publikoak kultura sustatzeko eta bultzatzeko garatutako politikaren barnean, eta Nafarroako Unibertsitate Publikoak eta Nafarroako Parlamentuak sinatutako lankidetza-hitzarmenaren emaitza gisa, Unibertsitate Proiekziorako eta Erakundeekiko Harremanetarako Errektoreordetzak Nafarroako Unibertsitate Publikoaren “Batxilergoko IX. Eztabaida Lehiaketa”rako deialdia egitea proposatu du. Lehiaketan Nafarroako Foru Komunitatean batxilergo ikasketak ematen dituzten ikastetxeek hartuko dute parte.
Unibertsitatearen Aholkularitza Juridikoak egindako txostena ikusirik.
Ekonomia Gaietarako Zerbitzuko zuzendariak egindako txostena ikusirik.
Kontu-hartzailetzak aldeko fiskalizazioa eginda.
Unibertsitate Proiekziorako eta Erakundeekiko Harremanetarako errektoreordeak proposaturik.
Nafarroako Unibertsitate Publikoko Estatutuetako 40. artikuluaren babesean eman zaizkidan eskumenak erabiliz,
EBATZI DUT:
Lehena.–Ebazpen honek sortzen duen gastua baimentzea. Gastua 2.750 eurokoa da, eta 2018ko gastu aurrekontuaren 30.5200.3065/0610/141.00 partidatik hartuko dira epaimahaikideei ordaintzeko.
Bigarrena.–”Batxilergoko IX. Eztabaida Lehiaketa” egiteko deialdia, I. eranskinean biltzen diren oinarriak eta II. eranskinean biltzen den lehiaketa arautegia onestea.
Hirugarrena.–Ebazpen hau Unibertsitate Proiekziorako eta Erakundeekiko Harremanetarako errektoreordeari, kontu-hartzaileari eta Kontabilitate Atalari jakinaraztea.
Laugarrena.–Deialdia Nafarroako Unibertsitate Publikoaren baliabide elektronikoetan eta Nafarroako Aldizkari Ofizialean argitaratzea.
Bosgarrena.–Ebazpen honen aurka zilegi da aukerako berraztertzeko errekurtsoa aurkeztea Nafarroako Unibertsitate Publikoko errektorearen aurrean, hilabeteko epean, edo, bestela, administrazioarekiko auzi-errekurtsoa maila bereko Nafarroako Auzitegietan, bi hilabeteko epean, ebazpen hau argitaratu edo jakinarazten den egunaren biharamunetik kontatzen hasita.
Iruñean, 2018ko ekainaren 29an.–Errektorea, Alfonso Carlosena.
I. ERANSKINA
Batxilergoko IX. Eztabaida Lehiaketarako deialdiaren oinarriak (2018-2019 ikasturtea)
Lehena.–Deialdiaren xedea.
Deialdi honen xedea da Batxilergoko IX. Eztabaida Lehiaketaren sariak emateko prozedura arautzea, publizitate, objektibotasun eta lehiakortasun printzipioen arabera, eta, halaber, Lehiaketaren Arautegia finkatzea (II. eranskina).
Bigarrena.–Noiz egingo den.
“Batxilergoko IX. Eztabaida Lehiaketa” Nafarroako Unibertsitate Publikoan egingo da, 2018ko urriaren 26an eta 27an. Unibertsitate Proiekziorako eta Erakundeekiko Harremanetarako errektoreordearen esku dago eztabaidetarako beste toki batzuk ezartzea.
Hirugarrena.–Izen-ematea eta lehiaketako hizkuntza.
1. Parte hartu nahi duten ikastetxeek izena emateko inprimakia bete behar dute 2018ko irailaren 27ko 14:30ak baino lehen. Inprimakia helbide honetan dago:
http://www.unavarra.es/cultura/debate-universitario/torneo-bachillerato
2. NUPek, gehienez ere, gaztelaniaz lehiatuko diren 16 ikastetxe eta euskaraz lehiatuko diren 4 ikastetxe onartuko ditu. Ikastetxeak izen-ematearen hurrenkeraren arabera aukeratuko dira. Izena emandako ikastetxe guztietatik, guztira 4k izango dute aukera beren artean euskaraz lehiatzeko. Euskaraz lehiatzeko izena emandako 3 edo 4 ikastetxeren talde bat osatzen ez bada, postu horiek gaztelaniaz egingo den lehiaketari gehituko zaizkio.
3. Izen-ematearen bidez, parte-hartzaileek berariaz NUPen esku uzten dituzte IX. BEL egin bitartean antolatzaileek eginen dituzten bideo eta argazkien irudi-eskubideak.
Urriaren 19an eta 20an aldez aurretiko prestakuntza-saio bat edo batzuk eginen dira, parte hartuko duten taldeei lehiaketari buruz dauzkaten zalantza guztiak argitzeko.
Laugarrena.–Konfidentzialtasuna.
Parte-hartzaileen datuak fitxategi automatizatu batean sartuko dira. Deialdia kudeatzea da fitxategi horren helburu bakarra.
Bosgarrena.–Oinarrien onarpena.
“Batxilergoko IX. Eztabaida Lehiaketa” izenekoan parte hartzeak oinarriak ezagutu eta onartzea dakar berekin.
Seigarrena.–Argitalpena.
Oinarri hauek Nafarroako Aldizkari Ofizialean eta Nafarroako Unibertsitate Publikoaren bitarteko elektronikoetan argitaratuko dira.
Zazpigarrena.–Errekurtsoak.
Deialdi honen eta haren oinarrien aurka, eta deialdi honen ondorioz sariak behin betikoz emateari buruzko ebazpenaren aurka zilegi da aukerako berraztertze-errekurtsoa aurkeztea, Nafarroako Unibertsitate Publikoko errektorearen aurrean, hilabeteko epean, edo administrazioarekiko auzi-errekurtsoa maila bereko Nafarroako Auzitegietan, bi hilabeteko epean. Epeok dagokion argitalpena egin eta biharamunetik aurrera hasiko dira kontatzen.
II. ERANSKINA
IX. BELen arautegia
I. TITULUA
Aplikazio-eremua
1. artikulua.
Nafarroako Unibertsitate Publikoko Batxilergoko IX. Eztabaida Lehiaketan aplikatuko da arautegi hau.
2. artikulua.
Arautegi honek zehatz-mehatz arautu gabeko lehiaketaren alderdi zehatzak “Batxilergoko IX. Lehiaketako deialdiaren oinarriak” izeneko dokumentuan jasoko dira.
3. artikulua.
Nafarroako Unibertsitate Publikoko Batxilergoko IX. Eztabaida Lehiaketan parte hartzeak berekin dakar arautegi hau ontzat ematea eta bere arauei men egitea.
II. TITULUA
Parte hartzeko baldintzak
4. artikulua.
Batxilergoko ikasketak gaztelaniaz eta euskaraz ematen dituzten eta Nafarroan dauden ikastetxeek edukiko dute “Batxilergoko IX. Eztabaida Lehiaketa” egiteko deialdian (2018-2019 ikasturtekoan) parte hartzeko aukera. Ikastetxe bakoitzak talde bakar batekin hartuko du parte. Ikastetxean 2018-2019 ikasturtean Batxilergoko 2. ikasmaila egiten ari diren ikasleek osatuko dituzte taldeak.
III. TITULUA
Gaia eta data
5. artikulua.
Antolatzaileek 2018ko urriaren 5ean jakinaraziko dute zein izango den lehiaketako eztabaidarako gaia web-orrialde honetan: http://www.unavarra.es/cultura/debate-universitario/torneo-bachillerato.
6. artikulua.
2018ko urriaren 26a eta 27a izango dira Nafarroako Unibertsitate Publikoaren "Batxilergoko IX. Eztabaida Lehiaketa" egiteko egunak.
IV. TITULUA
Antolamendua
7. artikulua. Lehiaketaren Zuzendaritza.
1. Osaera: lagun bakarreko erakundea da, eta Miren Sarasibar Iriarte irakasleari dagokio.
2. Eginkizunak: arautegi hau behar bezala bete dadin zaintzea, arautegia ez betetzeagatik edo jokabide desegoki batengatik izan daitezkeen zehapenak jakinaraztea Eztabaida Ligan parte hartzen dutenei, eta arautegi honetan jasotzen diren zehapenak aplikatzea.
3. Funtzionamendu-araubidea: lehiaketaren Zuzendaritzak bere eskumenekoak diren erabakiak hartuko ditu, Lehiaketa Batzordeari txostenak eskatu beharrik gabe, eta erabakien aurka aurkezten zaizkion erreklamazioak ebatziko ditu Batzordeak.
8. artikulua. Lehiaketa Batzordea.
1. Osaera: bertan dauden epaileek osatzen dute, eta lehiaketaren Zuzendaritza da Batzordearen burua, zeinak kalitateko botoa edukiko baitu berdinketa izanez gero.
2. Eginkizunak: arautegi hau behar bezala bete dadin zaintzea, lehiaketari buruz aurkezten zaizkion erreklamazioak ebaztea, aretoko arbitroak ezartzen dituen zehapenen aplikazioari buruzko auziak eta lehiaketako gorabeherei buruzko erreklamazioak ebaztea, arautegi hau interpretatzea eta arautegi honetan arautu gabeko edozein auzi konpontzea.
3. Funtzionamendu-araubidea: erabakiak gehiengoz hartuko dira, bozketaren emaitzak jendaurrean jarri gabe, eta Lehiaketa Batzordea osatzen duten pertsona guztiek sinatutako akta batean jasoko dira. Erabakien aurka ez da zilegi apelazioa.
9. artikulua. Epaimahaia.
1. Osaera: gutxienez ere bi epailek eta epaile nagusi batek osatuko dute, eta, edonola ere, kopurua bakoitia izango da. Antolatzaileek gonbidatuak eta unibertsitate komunitateko kideak izan daitezke. Areto bakoitzean epaimahai bat egongo da. Epaimahaiak elkarren artean independenteak izango dira. Epaimahaikideek ez dute loturarik eduki behar balioesten dituzten taldeekin. Batxilergoko Eztabaida Lehiaketa honetako eta aurreko lehiaketako ezein prestatzaile ez da epaile izango prestatu dituen taldeak lehiatzen direnean.
2. Eginkizunak: bere eginkizun nagusia eztabaidak balioestea da, orokorrean, eta parte-hartzeak eta interpelazioak, bereziki, baita puntualtasuna eta arautegi honetan jasotzen diren itemak ere. Aretoko arbitroak jakinaraziko du talderen batek edo talderen bateko kideak ez dituela eztabaida egiteko arauak bete, baita aretoan gertatu den eta arbitroak ezagutu ez duen edozein irregulartasun ere.
3. Funtzionamendu-araubidea: epaimahaiaren erabakiak, zeinaren kide kopurua bakoitia izango baita beti, gehiengoz hartuko dira. Epaimahaikide bakoitzak bere erabakiaren berri emanen du Epailearen Aktan, eta organoaren erabakia Eztabaidaren Aktan jasoko da. Epaile bakoitzaren aktak bere izenik gabe argitaratuko dira.
10. artikulua. Aretoko arbitrajea.
1. Osaera: eztabaidak egiteko aretoetan arbitro lanetan aritzen direnek osatuko dute.
2. Eginkizunak: taldeen bertaratzea eta puntualtasuna kontrolatzea, aretoak egoki funtzionatzen duela egiaztatzea, kronometroa erabiltzea mintzaldietan, zehapenak ezartzeko proposamenak egitea epaimahaiari eztabaidetan arauak ez betetzeagatik eta zehapenak jakinaraztea, bai eta talde parte-hartzaileren batek edo taldekideren batek eztabaida garatzeko arauak ez dituela bete adieraztea eta aretoan gertatu arren epaimahaiak ezagutzen ez duen edozein irregulartasun nabarmentzea ere.
3. Funtzionamendu-araubidea: aretoko epaile aritzen denak bakarrik hartuko ditu erabakiak, eta zigortzeko modukotzat hartzen duen egintza eragin duen mintzaldia bukatu eta berehala jakinaraziko du, ozen, behar den publizitatea emateko. Berehalakotasun hori ezinezkoa bada, zilegi izango da eztabaidaren amaieran jakinaraztea. Bere erabakien aurka zilegi da errekurtsoak aurkeztea Lehiaketa Batzordearen aurrean.
V. TITULUA
Dokumentazio ofiziala
11. artikulua.
Epailearen akta: epaimahaikide bakoitzak elkarren aurka ari diren taldeei ematen dizkien kalifikazioak bilduko ditu dokumentu honek. Egiten duen epaileak sinatu beharko du, eta arautegi honen III. eranskineko ereduari jarraitu beharko dio.
12. artikulua.
Eztabaidaren akta: epaimahaiaren azken erabakia biltzen duen dokumentua da, eta talde bakoitzari, norgehiagoka aritu denean, aplikatu zaizkion zehapenak eta gehitu behar diren oharrak ere jasotzen ditu. Epaile nagusiak eta aretoko arbitroak sinatu behar dute dokumentua. Dokumentu honetako IV. eranskineko ereduari jarraitu beharko dio.
13. artikulua.
Lehiaketaren akta: dokumentu honetan sailkapena jasotzen da. Lehiaketaren Zuzendaritzak egin behar du, eta organo horren izenpea edukiko du. Dokumentu honetako V. eranskineko ereduari jarraituko dio.
14. artikulua.
Lehiaketa Batzordearen akta: Lehiaketa Batzordeari aurkeztu zaizkion erreklamazioei buruz hartu duen erabakia jasoko du dokumentu honek. Batzordekideek egin eta sinatuko dute, eta erreklamazioa daukan orria erantsiko zaio. Lehiaketa Batzordearen aktak arautegi honetako VI. eranskineko ereduari jarraituko dio.
15. artikulua.
Lehiaketa koadroa: lehiaketa dela-eta izango den zozketaren eguna, ordua, tokia, eta zein talde lehiatuko diren elkarrekin bilduko ditu dokumentu honek, bai eta sailkapen-aldiei eta finalei dagozkien datu horiek ere. Argitaratu eginen da, eta, behar izanez gero, berariaz jakinaraziko da.
VI. TITULUA
Taldeak
16. artikulua.
Gutxienez hiru kide eta gehienez bost kide edukiko ditu talde bakoitzak. Kideetako bat kapitaina izango da. Bere taldea ordezkatuko du arbitroen eta epaimahaiaren aurrean, eta hitz egiteko txandetan mintzatzeko eta epaimahaiari kexak aurkezteko modua izango du. Ezein parte hartzailea ezin da egon talde batean baino gehiagotan lehiaketan zehar.
17. artikulua.
Talde bakoitzak 2 hizlari izendatuko ditu gutxienez ere, eta zozketan suertatu zaien jarreraren alde mintzatuko dira, txanda eskemaren arabera. Eztabaidak irauten duen bitartean, taldekideek ezin izango dute beren artean hitz egin edo keinurik egin elkarri; oharren bidez hitz eginen dute, ez bestela. Gogoan izan aukera dagoela taldekide bakoitzak hurrenez hurrengo eztabaidetan izango duen egitekoa aldatzeko.
VII. TITULUA
Eztabaidaren garapena
18. artikulua.
Eztabaidak hasi baino minutu batzuk lehenago egingo da taldeen lehiaketa koadroa zehazteko zozketa. Eztabaida jarraian zehazten diren faseetan eta hurrenkeran egingo da.
1. Taldeen aurkezpena aretoan: eztabaidatu behar duten taldeak erabaki diren orduetan azaldu beharko dira eztabaida egiteko aretoan, eta bertaratu direla jakinaraziko diote aretoko arbitroari. Eztabaida bakoitza hasteko orduak lehiaketa koadroan argitaratzen direnak izango dira. Eztabaida hasteko orduan, bi taldeak aurkeztu direla eta puntual iritsi direla baieztatuko da.
2. Eztabaidaren aurkezpena: epaile nagusiak gaia, epaimahaikideak, taldeak eta haien kideak aurkeztuko ditu labur; lehiaketaren Zuzendaritzak egoki deritzona jakinaraziko du; eta talde bakoitzaren kapitainari deituko dio jarreren zozketa egiteko.
3. Jarreren zozketa: talde bakoitzaren kapitainek jarreren zozketan parte hartuko dute. Jarrera zoriz esleituko dela bermatuko duen sistema baten bidez egingo da zozketa. Emaitza zein den, taldeak kokapen bat edo beste izango du aretoan, halako eran non Aldeko Taldea epaimahaiaren ezkerretara esertzen baita beti eta Aurkako Taldea eskuinetara.
4. Eztabaidaren prestakuntza: zozketaren ondoren, taldeek 4 minutu edukiko dituzte eztabaida prestatzeko.
5. Mintzaldien jakinarazpena: talde bakoitzak idatziz jakinaraziko dio aretoko arbitroari, horretarako ematen den euskarrian, taldeko zein kidek parte hartuko duten eztabaidan, parte hartzeko txandetan. Taldekideen esleipenean profil hauek zehaztu behar dira: kapitaina, hizlariak eta ikertzaileak. Zilegi izango da eginkizun guztiak aldatzea eztabaida bakoitzean; ez, ordea, eztabaidatzen ari direnean.
6. Eztabaidaren kronometrajea: aretoko arbitroa kronometratzen hasiko da kapitaina edo hizlaria mintzatzen hasten den unean, eta ez du kronometroa geldituko hark bere hitzaldia bukatu arte. Txanda bakoitzak aldez aurretik finkatuta dagoen iraupen jarraitu hau izango du:
a. Sarrera: 4 minutu.
b. Lehen gezurtatzea: 5 minutu.
c. Bigarren gezurtatzea: 5 minutu.
d. Ondorioa: 3 minutu.
7. Materialak eta zerbitzuak: nolanahi ere, taldeek beharrezkotzat jotzen duten materiala erabili ahal izango dute beren jarrera defendatzeko, betiere baldin eta lehiaketaren funtzionamendu egokiari traba egiten ez badio, eta dauden instalazioekin bateragarria bada. Hertsiki debekatuta dago komunikazio-sistema elektroniko edo telematikoak erabiltzea eztabaidan.
8. Mintzaldiak: txanda bakoitzean taldekide batek baino ez du izango hitz egiteko aukera: kapitaina, hizlaria. Mintzaldia txanda koadro honen arabera egingo dute:
a. Sarrera. Aldeko taldea.
b. Sarrera. Aurkako taldea.
c. Lehen gezurtatzea. Aldeko taldea.
d. Lehen gezurtatzea. Aurkako taldea.
e. Bigarren gezurtatzea. Aldeko taldea.
f. Bigarren gezurtatzea. Aurkako taldea.
g. Ondorioa. Aurkako taldea.
h. Ondorioa. Aldeko taldea.
9. Interpelazioak: ez da zilegi izango interpelazioak egitea ez sarreretan, ez ondorioetan, ez gezurtatzeen lehen eta azken minutuan, etenik gabeko denboratzat hartzen baitira. Mintzatzen ari ez diren taldekideek eskua altxatzeko aukera izango dute aurkako taldearen kapitainari edo hizlariari hitza eskatzeko, galdera edo baieztapen bat egiteko asmoz. Gehienez ere 15 segundo izango ditu interpelazio bakoitzeko, eta denbora tarte hori txandaren iraupenari dagokio. Babestutako minutuetan eskua altxatzen bada, zehapena jarriko da automatikoki. Hitz egiteko txanda ez duen taldekide bat, galdera bat egin zain dagoela, denbora azken minutuan sartzera doala konturatzen bada, eskua jaitsi beharko du babestutako minutuan sartzean, eta ez zaio zehapenik jarriko. Hizlari batek hitza ematea erabakitzen badu babestutako minutua hasi baino segundo batzuk lehenago, galdetzen duen pertsonak, gehienez ere, 15 segundo ditu galdera egiteko, zehatua izan gabe.
10. Erreklamazioak: epaimahaiak, zuzeneko interpelazioan, edo taldeko kapitainak, eskua altxatuz aretoko arbitroari hitza eskatzeko, aukera izango dute parte-hartzaileei eskatzeko egiazta ditzaten beren hitz egiteko txandetan eta interpelazioetan eman dituzten datuak. Errekerimendu hori aurkeztuko da dagokion datua aipatu den mintzaldia amaitu eta gero, edo, bestela, eztabaida bukatu eta ondorengo 10 minutuetan. Erreklamazioa egin eta gero, erantzun behar duen taldeak 10 minutu edukiko ditu datua egiazkoa dela frogatzeko epaimahaiaren aurrean.
11. Epaimahaia deliberatzeko bilduko da: epaimahaiak ate itxian deliberatuko du eztabaida bukatu eta gero, horretarako ezarria den denboran. Epaimahaikideek deliberazio akta bana egingo dute modu autonomo eta independentean, eta arbitroari emango diote. Arbitroak puntuazioak batu, eta epaile kopuruaren arteko batezbestekoa egingo du. Gero, zehapenak jasoko ditu halakorik badago, eta egindako eztabaidaren azken emaitza jakinaraziko dio liga antolatzeko eta euskarri informatikoan datuak iraultzeko ardura duen talde teknikoari. Aktak eta emaitzen sailkapena jendaurrekoak izango dira. Bete dituen epailearen izenik gabe kontsultatu ahal dira aktak, eta kontsultatzeko artxibatuko dira.
Epaile gehienen botoa jaso duen taldeak irabaziko du eztabaida. Lehen eta bigarren itzulietako sailkapenerako, irabazitako eztabaida kopuruan berdinketa badago, aipatu itzulian egindako eztabaidetan talde bakoitzak lortutako puntuen irizpidea aplikatuko da.
12. Emaitzen jakinarazpena: epaimahaiaren deliberazioaren ondoren, epaimahaiaren emaitza orokorra argitaratuko da eztabaidaren aktan.
VIII. TITULUA
Zehapenak
19. artikulua.
Abisuak.
1. Eztabaida batean abisu bat egiten bazaio taldeari, horrek 0,5 puntu kenduko dizkio eztabaida hartan izan duen batez besteko azken kalifikaziotik. Honako ekintza hauek direla-eta zilegi da abisuak egitea:
a. Mintzatzeko ezarri den denbora baino geroago bukatzea mintzaldia: 5etik gora segundo geroago.
b. Mintzatzeko ezarri den denbora baino lehenago bukatzea mintzaldia: 15 eta 30 segundo bitarte lehenago.
c. Interpelazioak egitea babestutako denboran, edo 16 segundo baino gehiago eta gehienez ere 25 segundo irauten duten interpelazioak egitea.
d. Taldekideek beren artean hitz egitea.
2. Aretoko arbitro aritzen den pertsonari dagokio zehapenaren aplikazioa zehaztea, eta zehapena eta hura eragin duen ekintza jasotzea eztabaidaren aktan.
20. artikulua.
Hutsegite arinak.
1. Eztabaida batean hutsegite arin bat egiten bada, horrek 1,5 puntu kenduko dizkio eztabaida hartan izan duen batez besteko azken kalifikaziotik. Honako ekintza hauek dira hutsegite arinak:
a. Ezarritako ordua baino gehienez ere 5 minutuko atzerapenez agertzea talde osoa edo ezarritako taldekideen gutxieneko kopurua.
b. Hizlariari etetea interpelazioak eginez hitz egiteko txandan egon ez arren.
c. Interpelazioak 25 segundotik gora luzatzea, eta gehienez 45 segundoz.
d. Mintzatzeko ezarri den denbora baino lehenago bukatzea: 31 segundo eta minutu bat bitarte lehenago.
2. Aretoko arbitro aritzen den pertsonari dagokio zehapenaren aplikazioa zehaztea, eta zehapena eta hura eragin duen ekintza jasotzea eztabaidaren aktan.
21. artikulua.
Hutsegite larriak.
1. Eztabaida batean hutsegite larri bat egiten bada, horrek 3 puntu kenduko dizkio eztabaida hartan izan duen batez besteko azken kalifikaziotik. Honako ekintza hauek dira hutsegite larriak:
a. 5 minututik 15 minutura bitarteko atzerapenez agertzea talde osoa edo ezarritako taldekideen gutxieneko kopurua.
b. Talde baten izenean bakarrik hizlari batek esku hartzea.
c. Mintzatzeko ezarri den denbora baino minutu bat lehenago bukatzea.
d. Interpelazioak 45 segundotik gora luzatzea.
e. Eztabaida garaian jarrera desegokia izatea aurkako taldearekin, epaimahaiarekin, ikus-entzuleekin edo antolakuntzako kideekin. Hitz iraingarriak erabiltzea mintzaldian edo interpelazioan, kontuan hartu gabe nori zuzentzen zaizkion.
2. Aretoko arbitro aritzen den pertsonari eta lehiaketaren Zuzendaritzari dagokie zehapenaren aplikazioa zehaztea, eta zehapena eta hura eragin duen ekintza jasotzea eztabaidaren aktan.
22. artikulua.
Kanporaketak.
1. Parte hartzen ari den talde bat kanporatzen bada, taldea eztabaidatik behin betiko kanporatua geratuko da. Ekintza hauengatik izan daitezke kanporatuak:
a. 15 minutu baino gehiagoko atzerapenez agertzea talde osoa edo ezarritako taldekideen gutxieneko kopurua. Kasu honetan, aurkeztu den taldea izango da eztabaidaren irabazlea, aurkako taldea ez agertzeagatik.
b. Lehiaketan behin eta berriz jarrera desegokiak izatea edo hitz eta keinu oldarkorrak erabiltzea, alde batera utzita nori zuzenduta dauden.
2. Aretoko arbitroari dagokio zehazpena behin-behinean ezartzea eta lehiaketaren Zuzendaritzari jakinaraztea, Zuzendaritza baita organo eskuduna kanporatzea betearazteko, zehapen hori berresteko edo ezesteko xedearekin.
3. Lehiaketaren Zuzendaritzak kaltetuei jakinaraziko dizkie zehapenei buruzko erabakiak, bai eta ordezkatzen duten taldeari ere, beren arduradunen edo ordezkarien bidez, nahiz idatziz, nahiz ahoz, egokiena den moduan.
4. Taldeei ezartzen zaizkien zehapenak behar den eztabaidaren aktan jasoko dira.
IX. TITULUA
Erreklamazioak
23. artikulua.
Erreklamazioak idatziz edo ahoz, eta idatzizko berrespenarekin, beharrezkoa bada, bidaliko zaizkio erabakia hartu duen organoaren nagusi hierarkikoari. Lehiaketa Batzordeari zuzentzen zaizkion erreklamazioak idatziz egin beharko dira, arautegi honetako 5. eranskinean ezartzen den ereduaren arabera aurkezteko.
24. artikulua.
Erreklamazioaren edukia lehiaketako alderdi orokorren bat denean, lehiaketaren Zuzendaritzari bidaliko zaizkio, eta hark Lehiaketa Batzordeko bilerarako deialdia eginen du, beharrezkoa bada.
X. TITULUA
Puntuazio sistema eta berdinketa hausteko sistema
25. artikulua.
Honako “Itemen zerrenda” honetan dauden itemak jasoko ditu puntuazio sistemak. Item bakoitzak bere ponderazioa edukiko du, eztabaidan balioesten duenaren garrantziaren arabera. Hau izango da puntuazio sistema:
1. Zure ustez nor den eztabaidaren irabazlea: 10 puntu.
2. Sarrera onena: 3 puntu.
3. Lehen gezurtatze onena: 3 puntu.
4. Bigarren gezurtatze onena: 3 puntu.
5. Ondorio onena: 3 puntu.
6. Inprobisazioa, argumentuaren kalitatea eta ebidentzien erabilgarritasuna eta zorroztasuna: 3 puntu.
7. Adieraziaren ordena, argitasuna, interesa eta erraztasuna: 2 puntu.
8. Taldearen jarrera: 2 puntu.
9. Adierazkortasuna, ikusizko kontaktua eta naturaltasuna: 2 puntu.
10. Espazioaren, kanpo baliabideen eta aurkakoaren menderakuntza: 2 puntu.
11. Hitzaldiari egokitutako hizkera, arintasuna eta erantzunak ematea: 2 puntu.
26. artikulua.
Taldeak item bakoitzean lortzen dituen puntuak batuz lortuko da epaileak ematen duen puntuazio orokorra. Epaileak, balioespenaren ondoren, puntuaziorik altuena daukan taldea irabazle aldarrikatuko du.
27. artikulua.
Kalkulu honen arabera puntu gehien lortzen dituen taldea izango da irabazlea: lehenik, epaimahaiak talde bakoitzari eman dizkion puntuak batu behar dira. Emaitza zati eztabaidaren epaile kopurua egingo da gero, eta lortzen den zenbakiari kenduko zaizkio taldeei ezarri zaizkien zehapenen baliokide diren puntuak.
28. artikulua.
Aurkako taldea bertaratu ez delako edo kanporatu dutelako aurkaririk ez duen taldea izango da eztabaidaren irabazlea.
29. artikulua.
Sailkapena honako irizpide hauen arabera eta ezartzen den ordenan zehaztuko da:
1. Eztabaida erlatibo irabazien kopuru handiena.
2. Erdietsi diren puntu erlatiboen kopuru handiena.
3. Aldeko epaileen kopuru erlatibo handiena.
4. Puntu galduen kopuru txikiena (abisuak + arinak + larriak).
5. Irabazle gertatzea aurrez aurrekoan.
6. Lehiaketa Batzordearen erabaki arrazoitua.
III. ERANSKINA
IV. ERANSKINA
V. ERANSKINA
VI. ERANSKINA
Lehiaketa Batzordearen ebazpena.
VII. ERANSKINA
Eskabidea Lehiaketa Batzordeari.
Deskargatu beharreko artxiboak PDF formatuan daude.
Iragarkiaren kodea: F1810229
Sarbidea
Nafarroako Aldizkari Ofiziala
Paseo Pablo Sarasate, 38, 2.º izda.
31001 - Iruña
848 42 12 50
