145. ALDIZKARIA - 2018ko uztailaren 27a

2. NAFARROAKO TOKI ADMINISTRAZIOA

2.2. XEDAPEN ETA IRAGARKIAK, HERRIEN ARABERA ANTOLATUAK

OLTZA ZENDEA

Oltza Zendeako eta Berriozarko Udalen arteko hitzarmena,
aldi baterako langileen deialdiak kudeatzeko

Iragarki honen bidez aditzera ematen da Oltza Zendeako Udalaren eta Berriozarko Udalaren arteko hitzarmena, bi udalen osoko bilkurek onetsia, aldi baterako langileen deialdiak kudeatzeko baldintzak arautzeko; Sektore Publikoaren Araubide Juridikoari buruzko urriaren 1eko 40/2015 Legean ezarritakora egokitzen da hitzarmena.

Oltza Zendean, 2018ko ekainaren 28an.–Alkateak, Moisés Garjón Villanueva eta Raúl Maiza González.

UDALEN ARTEKO HITZARMENA, ALDI BATERAKO LANGILEEN DEIALDIAK KUDEATZEKO

Batzarturik:

Alde batetik, Moisés Garjón Villanueva, Oltza Zendeako Udaleko alkate udalburua, P3119300F IFZ duen Oltza Zendeako Udalaren izenean eta hura ordezkatuz, 2018ko maiatzaren 31ko osoko bilkuran hartutako erabakiaren bidez emandako baimenaren babesean ari dena.

Bestetik, Raúl Maiza González, Berriozarko alkate udalburua, P3119400D IFZ duen Berriozarko Udalaren izenean eta hura ordezkatuz, 2018ko maiatzaren 30eko osoko bilkuran hartutako erabakiaren bidez emandako baimenaren babesean ari dena.

Alderdiek udalen arteko hitzarmen hau izenpetzeko legezko ahalmen nahikoa aitortzen diote elkarri. Hitzarmenaren helburua da aldi baterako langileen deialdiak sortu eta kudeatzea udal bakoitzeko lanpostuak betetzeko. Horrenbestez,

ADIERAZTEN DUTE:

I.–Berriozarko eta Oltza Zendeako Udalek lankidetzarako esparru-hitzarmen hau sinatzen dute aldi baterako langileen zerrendak sortzeko deialdiak egiteko eta gero zerrenda horiek kudeatzeko, gaurtik aurrera aipatu udaletan eta haien erakunde autonomoetan sortzen diren beharrei aldi baterako erantzutearren.

II.–Hitzarmen hau egiten da honako arau hauetan aurreikusten denaren babesean: Nafarroako Toki Administrazioari buruzko uztailaren 2ko 6/1990 Foru Legearen 70.1 artikulua; Administrazio Publikoen Administrazio Prozedura Erkideari buruzko urriaren 1eko 39/2015 Legearen 86. artikulua; Sektore Publikoaren Araubide Juridikoari buruzko urriaren 1eko 40/2015 Legearen 47. artikulua eta hurrengoak; Toki Araubidearen Oinarriak arautzen dituen apirilaren 2ko 7/1985 Legearen 21., 22. eta 57. artikuluak; eta aplikagarri diren gainerakoak.

ESTIPULAZIOAK

Lehena.–Hitzarmenaren xedea.

Hitzarmen hau sinatzen duten udalek hautaproben deialdiak eginen dituzte aldi baterako lanpostuak betetzeko, eta deialdi bakarra izanen da lanpostu bakoitzerako. Deialdi bakoitzean prestalanak, eskaeren bilketa eta hautaprobak eginen dira.

Bigarrena.– Alderdien betebeharrak:

1.–Zerrendei dagokienez udalek planteatzen dituzten beharrak kontuan harturik, lanpostu hauen deialdiak eginen dira:

–Administrari-ofiziala.

–Zerbitzu anitzetako enplegatua-lorezaina.

2.–Aurrekoa gorabehera, hitzarmen honen indarraldian beste lanpostu batzuen deialdiak egiten ahalko dira, udalen beharren arabera, jarraipen batzordeak txostena egin eta udalek onetsi ondoren.

3.–Nolanahi ere, langileak deialdiaren bidez hautatuko dira, eta berdintasun, merezimendu, gaitasun eta publizitate printzipioak bermatuko dira.

Deialdi bakoitzean kasuan kasuko udalak formalizatuko du epaimahaia, eta bi udaletako edozein langile izan daiteke epaimahaikide titular edo ordezko.

4.–Deialdiek udal bakoitzaren hizkuntza eskakizunak bermatu beharko dituzte. Orobat, gizonen eta emakumeen arteko tratu eta aukera berdintasuna bermatu beharko dute, eta sexuan oinarritutako zuzeneko edo zeharkako diskriminazioa saihestuko da.

Nolanahi ere, hitzarmena sinatu duten udalek adostu beharko dute deialdiaren edukia.

5.–Azterketaren deialdi motaren arabera, deialdia egiten duen entitateak gastu batzuk izanen ditu, deialdian parte hartzen dutenek pagatutako tarifekin osorik edo partez finantzatuko direnak. Eskura dauden baliabideak optimizatuko dira gastua ahalik eta gehien txikiagotzeko.

Deialdi batean sortutako gastuak handiagoak badira berak eragindako diru-sarrerak baino, toki entitate interesdun guztiek ordainduko dute defizita, bakoitzaren biztanle kopuruaren heinean. Entitate bakoitzaren biztanleria zenbatzeko, Nafarroako kontzejuen populazio datuak ofizial deklaratzen dituen foru aginduan (Nafarroako Aldizkari Ofizialean argitaratutakoen artean, berrienean) jasotako datu ofizialak hartuko dira kontuan.

Hirugarrena.–Zerrenden kudeaketa:

Hautaprobak gainditzen dituztenak sartuko dira izangaien zerrendetan, lortutako puntuazioaren hurrenkeran, toki entitateetako lanpostuetan hutsik gelditzen direnak aldi baterako betetzeko.

Aldi baterako kontratatzeko prozesua honela kudeatuko da:

3.1. Izangaien zerrendak onesteko irizpide orokorrak.

3.1.1. Hitzarmen hau sinatzen duten udalek aldi baterako kontratatzeko izangaien zerrenda bakoitza kudeatuko dute, era berean eta modu autonomoan, eta zerrenda bakoitzaren kudeaketan sortzen diren gorabehera eta erreklamazio guztiez arduratuko dira.

Hau da, zerrenda eratu ondoren, Berriozarko Udalak eta Oltza Zendeako Udalak nork bere aldetik kudeatuko dute.

3.1.2. Hautapen prozesu bat amaitzen denean, zerrenda mota guztiak bereiziko dira, euskararen ezagutzak izangaien hurrenkeran duen eragina azaltzeko, honako hauen arabera: udal bakoitzaren plantilla organikoa, aldi baterako bete nahi diren lanpostuen ezaugarriak, eta entitate bakoitzaren hizkuntza-eremua.

3.1.3. Hautapen prozesutik ateratzen den zerrenda bakoitzak indarrik eta ondoriorik gabe uzten du aldi baterako kontratatzeko izangaien beste edozein zerrenda, udalen kasuan kasuko lanposturako. Hala ere, subsidiarioa izanen da udaletan funtzionario edo lan-kontratadun finko sartzeko deialdietan probak gainditu arren lanposturik lortzen ez dutenen zerrenden aurrean.

3.1.4. Izangaiei dei egiterakoan, kontuan hartuko da Nafarroako Administrazio Publikoen zerbitzuko Langileen Estatutua, abuztuaren 30eko 251/1993 Legegintzako Foru Dekretuak onetsia, desgaitasuna duten pertsonek enplegu publikoa lortzeari dagokionez. Kasuan kasuko zereginak eta eginkizunak betetzeko bateragarritasuna frogatzen duten agiriak egiaztatzeari dagokionez, aldi baterako kontratazioa eginen duen entitate eskatzaileari dagokio.

3.2. Dei egiteko sistema.

3.2.1. Dei egiteko arau orokorrak.

Langileak kontratatzeko beharrak betetzeko, izangaiei banakako deiak eginen zaizkie, kasuan kasuko zerrendako izangaien hurrenkeraren arabera eta lanpostuaren eskakizunak kontuan hartuta.

Errazago aurkitu ahal izateko, izangaiek harremanetarako telefono bat bederen jakinarazi beharko dute. Horrez gainera, harremanetarako beste telefono batzuk edo helbide elektroniko bat eman ditzakete. Informazio hori etengabe eguneratua eduki beharko dute.

Kontratua eskaintzeko deiak izangaiek emandako zenbakietara eginen dira, zerrendako hurrenkerari jarraikiz. Deiaren emaitza jasoko da, hauetako bat adierazita: “interesatzen zaio”, “ez zaio interesatzen”, “ez du erantzun”.

Betiere, azkar eginen dira banakako deiak, kontratazio premiak lehenbailehen bete daitezen. Bi egunean hiru dei, bederen, eginen dira kontratua eskaintzen zaion izangaiak emandako telefonora.

Lehenbiziko deian ezin bada izangaiarekin harremanetan jarri, SMS bat eta/edo posta elektroniko bat igorriko zaio horren berri emateko.

Izangai batekin harremanetan jartzerik ez bada, zerrendan hurrengoa denari deituko zaio, harik eta eskaintzen diren lanpostu guztiak bete arte.

Sei hilabeteko epean behin ere aurkitu ez den izangaia “ez deitzeko moduan” agertuko da zerrendan.

Kontratazioa presakoa bada (eta halakoa izanen da lanpostuan 24 orduko epean hasi behar denean) eta, aurreikuspenen arabera, kontratuaren iraupena 3 hilabetetik beherakoa, harekin harremanetan jarrita lanean berehala hastea onartzen duen lehenengo izangaiari eskainiko zaio, gorago ezarritakoa bete behar izan gabe.

3.2.2. Administrazio araubideko kontratazioa.

Aldi baterako langileak administrazio araubidean kontratatzeko, irailaren 28ko 68/2009 Foru Dekretuan ezarritako araubide juridikoari jarraituko zaio. Dekretu horrek Nafarroako Administrazio Publikoetan langileak administrazio araubidean kontratatzeko arauak ezartzen ditu. Dei egiteko, hitzarmen honetan aurreikusitako sistema aplikatuko da 68/2009 Foru Dekretuari aurka egiten ez dion orotan.

3.2.3. Araubide orokorraren salbuespenak.

a) Berriozarko eta Oltza Zendeako Udalekin aldi baterako lotua dagoen pertsonak indarreko kontratuari uko egiten ahal dio kontratua hobetzeko beste bat eskaintzen baldin bazaio, betiere kontratatua dagoen eremu berekoa baldin bada, kasuan kasuko zerrendan badago eta kasu hau gertatzen bada:

–Kontratu labur bat izatea indarrean eta kontratu luze bat eskaintzen bazaio (kontratua laburtzat hartuko da aurreikusitako iraupena 6 hilabetetik beherakoa bada, eta luzetzat hortik gorakoa bada).

b) Izangai bat dagoeneko lanpostu batean ari bada ordezte kontratu batekin eta kontratua bukatzen denetik 20 egun iragan baino lehen sortzen bada lanpostu bera aldi baterako betetzeko premia, kontratua izangai berari eskainiko zaio, betiere dei egiten zaion mementoan baldintza hauek betetzen badira:

–Dei egiten den mementoan indarra duen zerrenda batean egotea izangaia.

–Aurreko kontratuaren bukaeraren arrazoia ez izatea hari uko egin izana.

–Aurreko kontratuaren bukaeraren arrazoia ez izatea zerrendatik ateratzeko horietako bat.

c) Izangai batek lanaldi partzialeko kontratua daukanean, premia bat sortzen bada eta lanpostu hori betetzen ahal badu, berari eskainiko zaio premia hori lanaldiaren %100 bete arte, betiere kontratazio berriaren ondorioz hartu behar dituen ordu guztiak ordura arte esleituta zituenekin bateragarriak badira. Langile batzuek baldin badute lanaldi partzialeko kontratua, dagokionari eskainiko zaio, aldi baterako kontratatzeko zerrenda indarduneko hurrenkerari zorrotz jarraikiz.

3.2.4. Kontratatzeko eskaintzari uko egitea.

Izangairen batek eskaini zaion lanpostuari uko egiten baldin badio, zerrenda horren azken tokira pasatuko da, honako egoera hauetakoren batean dagoela frogatu ezean, kasu horretan daukan lekua mantenduko baitu:

–Amatasun, aitatasun, adopzio edo harreragatik lizentzia izatea.

–Aldi baterako ezintasuna izatea.

–Lan kontratu bat indarrean izatea.

–6 urte baino gutxiagoko semea edo alaba zaindu beharrean egotea. Arrazoi honengatik kontratuari uko egiten diotenek ezin dute “deitzeko moduan” azaldu gutxienez hilabete bat iragan arte, uko egin dutenetik hasita.

–Zaindu behar izatea bigarren gradura arteko odol edo ezkontza bidezko ahaide bat, adina, istripua edo eritasuna dela-kausa bere burua ezin gobernatu duena. Arrazoi honengatik kontratuari uko egiten diotenek ezin dute “deitzeko moduan” azaldu gutxienez hilabete bat iragan arte, uko egin dutenetik hasita.

–Izangaia ezkondu berria edo, Bikote egonkorrentzako berdintasun juridikoari buruzko uztailaren 3ko 6/2000 Legearen arabera, parekatutako egoeran sartu berria izatea, eskainitako kontratuaren hasiera eguna bikotea eratu ondoko edo eratu aurreko hamabost egun naturalean bada.

Kasu horietan izangaia “ez deitzeko moduan” agertuko da aldi baterako kontratatzeko izangaien zerrendan, harik eta izangaiak berak “deitzeko moduan” agertzea eskatzen duen arte, alegatutako inguruabarra desagertu delako. “Deitzeko moduan” dagoela adierazten duen unean agiri bidez eta modu sinesgarrian frogatu beharko du kontratua eskaini zitzaion unean alegatu zuen egoera.

3.2.5. Zerrendako azken tokira pasatzea.

Zerrendako azken tokira pasatuko dira honelakoren bat egiten dutenak:

a) Dei egin eta lanpostua onartu ondotik, kontratua ez sinatzea, izangaiari egotzi beharreko arrazoi batengatik.

b) Sinatutako kontratuari uko egitea.

3.2.6. Zerrendetatik baztertzea.

Izangaiak honako kasuetan geratuko dira deia ekarri duen zerrendatik kanpo:

a) Kontratua probaldian hutsaldu izana zuzendaritzak txosten arrazoitua eman ondoren.

b) Lantokitik ateratzea bidezko arrazoirik izan gabe eta zuzendaritzari jakinarazi gabe.

c) Kontratua amaitzea gerora sortutako arrazoiak direla kausa, hain zuzen, kontratatutako langilea lanpostuko eginkizunak behar bezala betetzeko edo hartan egoki aritzeko gauza ez izateagatik, behar adinako errendimendurik eza nabarmentzen bada lanpostuko eginkizunak eraginkortasunez egiteko, edo lanpostuaren edukian gertatutako aldaketak direla medio, betiere interesdunari entzutea eman eta Langile Batzordeak edo langileen delegatuek bere txostena egin ondoan.

Aldian behin, Alkatetzaren ebazpen bidez, artikulu honetan ezarritako arrazoiengatik baztertutako izangaien zerrenda onetsiko da. Hitzarmena sinatu duten udalen web orrian eta/edo egoitza elektronikoan argitaratuko da ebazpen hori.

Laugarrena.–Hitzarmenaren indarraldia.

Hitzarmen honen indarraldia lau urtekoa izanen da, eta beste lau urtez luzatzen ahalko da. Luzapena aho batez adostuko dute bi alderdiek, noiznahi eta ezarritako epea bukatu aurretik.

Orobat, alderdiek hitzarmena hutsaltzea erabakitzen ahalko dute noiznahi.

Bosgarrena.–Hitzarmena eta alderdietako konpromisoak betetzearen jarraipen, zaintza eta kontrol mekanismoak.

Hitzarmena eta izenpetzaileek hartutako konpromisoak betetzearen jarraipen, zaintza eta kontrola egiteko, izenpetu dutenen ordezkaritza parekidea izango duen batzorde bat eratuko da.

Kide hauek osatuko dute batzordea:

–Oltza Zendeako Udaleko bi ordezkari.

–Berriozarko Udaleko bi ordezkari.

Batzorde horretan parte hartu ahalko dute, ahotsarekin baina botorik gabe, bi udaletako lege aholkulariek, ekonomikoek edo teknikoek, baita ordezkari sindikalek ere.

Batzordeko burutza Berriozarko Udalari dagokio eta Sektore Publikoaren Araubide Juridikoari buruzko urriaren 1eko 40/2015 Legearen 19.2 artikuluan ezarritako eginkizunak beteko ditu, bere botoarekin berdinketak ebaztea izan ezik.

Jarraipen batzordeak ebatziko ditu hitzarmen hau interpretatu eta betetzeko moduari buruz sortzen ahal diren eztabaidak.

Seigarrena.–Hitzarmena hutsaltzea.

Hitzarmen hau hutsalduko da xede dituen jarduketak betetzean edo hutsaltzeko arrazoietako bat gertatzen denean.

Honako hauek dira suntsitzeko arrazoiak:

a) Hitzarmenaren indarraldia igarotzea haren luzapena adostua izan gabe.

b) Sinatzaile guztiek hala adostea.

c) Sinatzaileetako batek hartutako betebehar eta konpromisoak ez betetzea.

Betetzen ez badira, alderdi batek errekerimendu bat jakinarazten ahalko dio bete ez duenari, ez-betetzat jotzen dituen betebeharrak edo konpromisoak epe jakin batean bete ditzan. Errekerimendu hori jakinaraziko zaio hitzarmenaren konpromisoak betetzearen jarraipen, zaintza eta kontrol mekanismoaren arduradunari eta izenpetu duten gainerako alderdiei.

Errekerimenduan adierazitako epea igaro ondoren jarraitzen badu bete gabe, errekerimendua egin zuen aldeak alderdi sinatzaileei jakinaraziko die hutsaltzeko arrazoia bere horretan dagoela eta hitzarmena hutsaldutzat joko da. Hitzarmena arrazoi horregatik suntsitzeak sorrarazitako kalteen ordaina eragin ahalko du.

d) Hitzarmenaren deuseztasuna aitortzen duen epai judiziala.

e) Aurreko horietatik desberdina den legeetan ezarritako beste edozein.

Zazpigarrena.–Hitzarmenaren izaera.

Hitzarmen honek administrazio izaera du eta Sektore Publikoaren Araubide Juridikoari buruzko urriaren 1eko 40/2015 Legearen atariko tituluan ezarritakoaren babesean izenpetzen da.

Hitzarmenaren aplikazioaren ondoriozko jarduketek alderdien artean sortzen dituzten auziak, jarraipen batzordean konpondu ezin direnak, administrazioarekiko auzien gaineko jurisdikzioak ebatziko ditu, jurisdikzio hori arautzen duen Legean xedatutakoari jarraikiz.

Hori guztia, ezertan ukatu gabe Nafarroako toki entitateen egintza eta erabakien inpugnazioari dagokionez indarreko legedian ezartzen diren berezitasunak.

Eta adostasunaren adierazgarri, alderdi egilesleek agiri honen hiru ale sinatu dituzte hasieran aipatzen diren egun-tokietan.

Iragarkiaren kodea: L1808557