Iragarkia
137. ALDIZKARIA - 2018ko uztailaren 17a
1. NAFARROAKO FORU KOMUNITATEA
1.7. BESTELAKOAK
315/2018 EBAZPENA, ekainaren 21ekoa, Hezkuntzako zuzendari nagusiak emana, Lanbide Heziketako teknikari eta goi mailako teknikari tituluak lortzeko probetarako deialdia egiten duena.
Lanbide Kualifikazioei eta Lanbide Heziketari buruzko ekainaren 19ko 5/2002 Lege Organikoak 1.2 artikuluan ezartzen du funts publikoekin eusten den prestakuntzaren eskaintzak bizitza osoko prestakuntza bultzatuko duela, espektatiba eta egoera pertsonal eta profesional desberdinei egokituta.
Hezkuntzari buruzko maiatzaren 3ko 2/2006 Lege Organikoak, 69.4 artikuluan, eskumena ematen die hezkuntza administrazioei Lanbide Heziketako tituluak lortzeko probak antolatzeko aldian behin, betiere 40. artikuluan ezarritako helburuak betetzen direla frogatuz gero.
Hezkuntza sistemako Lanbide Heziketaren antolamendu orokorra ezartzen duen uztailaren 29ko 1147/2011 Errege Dekretuak 36. artikuluan xedatzen du hezkuntza administrazioei dagokiela proba horiek aldian behin antolatzea, eta, beren eskumenen esparruan, haien deialdia egitea gutxienez urtean behin, eta, orobat, zehaztea zein diren proba horien xedeko heziketa zikloetako lanbide moduluak, noiz den matrikulazio epea, zein egunetan eta zein ikastetxetan eginen diren eta zein izanen diren proben edukiei dagozkien curriculumak. Era berean, 37. artikuluan zehazten du zein diren probetan parte hartzeko baldintzak eta adinari buruzko betebeharrak.
Hezkuntzako kontseilariak ekainaren 27an emandako 76/2016 Foru Aginduak Lanbide Heziketako titulu ofizialak lortzeko proben deialdiak egiteko baldintza orokorrak ezarri zituen. Proba horiek lanbide eremu profesional zehatz batean prestakuntza handia izan eta laguntzarik gabe ikasketak euren kabuz planifikatzeko gai diren pertsonentzat dira batez ere. Aurretik Hezkuntza Departamenduak deialdiak egin ditu 2014-2015, 2015-2016 eta 2016-2017 ikasturteetan. Hori Hezkuntza Departamentuak egindako apustua izan da, Lanbide Heziketako tituluetarako sarbidea bizitza osoan zehar izateko aukera sustatzeko.
Arau-esparru berri horrek deialdi orokorrak ezartzeko aukera aurreikusten du, interesaturik egon daitezkeen pertsona guztientzat, eta baita berariazko deialdiak ere, eremu edo kolektibo jakin batzuentzat, Hezkuntza Departamentuaren iritziz arreta berezia behar duen egoeraren bat baldin badago. Era berean, ezartzen du Hezkuntza Zuzendaritza Nagusiari dagokiola proben deialdiak egitea, eta zehaztea horren xedeko heziketa zikloak, izena ematea eta matrikulari buruzko alderdiak, eta probak zein egunetan eta zein ikastetxe publikotan eginen diren.
Hezkuntzako zuzendari nagusiaren azaroaren 22ko 566/2017 Ebazpenaren bidez onetsitako proba libreen berariazko deialdiaren aurka jarritako gora jotzeko errekurtsoa onartu denez (deialdi haren bidez Lanbide Heziketako teknikari eta goi mailako teknikari tituluak lortzeko probak deitu ziren 2017-2018 ikasturterako), bidezkoa da probetarako deialdi orokor bat egitea aipatu ebazpenean berariazko deialdi baten bidez eskainitako Lanbide Heziketako zikloen tituluak lortzeko.
Ikusita gora jotzeko errekurtsoak ukitzen dituen ziklo horietan Lanbide Heziketaren Zerbitzuak Lanbide Heziketako teknikari eta goi mailako teknikari tituluak lortzeko proba libreen deialdi orokorraren alde emandako txostena, baita proba horiek Nafarroako Foru Komunitatean egiteko arauak ere, Nafarroako Foru Komunitateko Administrazioari buruzko abenduaren 3ko 15/2004 Foru Legearen 22.1.d) artikuluaren bidez esleitutako ahalmenak erabiliz,
EBATZI DUT:
1. Lanbide Heziketako teknikari tituluak lortzeko proben deialdi orokor bat onestea, ebazpen honen eranskinetako oinarrietan xedatuarekin bat.
2. Ebazpen hau eta eranskinak argitaratzea Nafarroako Aldizkari Ofizialean.
3. Ebazpen hau eta eranskinak igortzea Hezkuntzako Ikuskapen Zerbitzuari, Lanbide Heziketaren Zerbitzuari; Lanbide Gaitasunak Garatzeko Zerbitzuari eta Orientaziorako, Enplegua Sustatzeko eta Enpresentzako Zerbitzuetarako Zerbitzuari (biak Nafar Lansare-Nafarroako Enplegu Zerbitzukoak), Lanbide Heziketaren Plangintza, Antolamendu eta Garapenerako Atalari, Lurralde Antolaketarako eta Agentzien Koordinaziorako Atalari, Lanbide Gaitasunak Egiaztatzeko eta Iturrondo Zentroaren Atalari, Ikastetxeetako Informazioa Kudeatzeko Bulegoari, Eskolatze Bulegoari eta Argibide eta Agiri Bulegoari, behar diren ondorioak izan ditzaten.
4. Ebazpen honen aurka gora jotzeko errekurtsoa jartzen ahalko da, Hezkuntzako kontseilariari zuzendua, hilabeteko epean, Nafarroako Aldizkari Ofizialean argitaratu eta biharamunetik hasita.
Iruñean, 2018ko ekainaren 21ean.–Hezkuntzako zuzendari nagusia, Roberto Pérez Elorza.
1. ERANSKINA
Lanbide Heziketako tituluak lortzeko
proba libreen deialdi orokorraren oinarriak
Xedea.
1. Ebazpen honen xedea Nafarroan teknikari tituluak lortzeko probetarako deialdi orokor bat egitea da, ekainaren 27ko 76/2016 Foru Aginduaren 1. eranskinaren 2. oinarrian ezarritakoa garatzeko.
Deialdi orokorra interesaturik egon daitezkeen pertsona guztientzat da, betiere eranskin honetako 13. oinarrian izena emateko ezarritako baldintzak betetzen badituzte.
2. Ebazpen honen II. eranskinean hau ezarri da:
–Deialdi horretako probak zer titulu eta modulutarako diren eta horien zerrenda.
–Lanbide modulu bakoitzeko eskainitako ikaspostu kopurua.
–Probetako zentro aztertzaileak.
3. Teknikari tituluak lortzeko inskripzio, onarpen eta matrikulatze prozesuaren egutegia, eta baita probetarako deialdiaren egutegia ere, ebazpen honen 3. eranskinean jasotzen dira.
Proben helburua eta ondorioak.
4. Lanbide Heziketako teknikari tituluak lortzeko proben helburua da egiaztatzea izangaiek maiatzaren 3ko 2/2006 Lege Organikoaren 40. artikuluan ezarritako helburuak eskuratu dituztela, hezkuntzaren kalitatea hobetzeko abenduaren 9ko 8/2013 Lege Organikoaren testuaren arabera.
5. Nafarroako Foru Komunitatean deialdiko titulu bakoitzerako ezarritako curriculumari buruzkoak izanen dira proben edukiak.
6. Lanbide moduluen arabera eginen da ebaluazioa.
7. Ebazpen honen bidez deitutako probetan gainditzen diren moduluak ondorio guztietarako emanen dira gainditutzat Lanbide Heziketako tituluak zuzenean lortzeko egiten diren hurrengo deialdietarako edo Lanbide Heziketako ikasketak eskaintzaren edozein modalitatetan egiteko.
8. Proba hauek ez dute deialdirik agortzen uztailaren 29ko 1147/2011 Errege Dekretuaren 51.4 artikuluan ezarritako ondorioetarako.
9. Lanbide Heziketako teknikari titulua lortzeko, Nafarroako curriculumaren arabera dagokion heziketa zikloko lanbide modulu guztiak gainditu beharko dira, uztailaren 29ko 1147/2011 Errege Dekretuaren 52.1 artikuluan xedatutakoaren arabera.
Prozeduren bateraezintasuna.
10. Prozeduren bateraezintasuna arautua dago ekainaren 27ko 76/2016 Foru Aginduaren 1. eranskinaren 4. oinarrian.
11. Teknikari titulua lortzeko probetan matrikulatzeak eta aldi berean aipatutako 4. oinarrian adierazitako egoeraren batean egoteak ofizioz ekarriko du dagokion moduluan egindako matrikula deuseztatzea, bai eta haietan atera daitezkeen emaitza akademikoak ere.
12. Nafarroako Gobernuaren tramiteen katalogoko “Lanbide Heziketako tituluak lortzeko proba libreak” izeneko tramiteen fitxan ageri da lanbide gaitasunak ebaluatu eta egiaztatzeko prozeduretan parte hartzeari dagokion bateraezintasunari buruzko informazioa. Tramiteen fitxa hori helbide honetan dago:
Izena emateko baldintzak. Deialdi orokorra.
13. Ebazpen honen bidez deitutako teknikari tituluak lortzeko deialdi orokorreko probetan izena emateko, baldintza orokor hauek bete beharko dira:
a) 18 urte izatea, eta gainera.
b) Ondoko titulu edo ziurtagirietako bat izatea:
–Derrigorrezko Bigarren Hezkuntzako graduatu titulua.
–Oinarrizko Lanbide titulua.
–Batxilergo titulua.
–Unibertsitateko tituluren bat.
–Teknikari edo goi mailako teknikari titulu bat.
–Ondorio akademikoetarako aurreko horietakoren baten baliokide diren beste ikasketa edo prestakuntza ikastaro batzuk gainditu izanaren ziurtagiria.
–Batxilergoko irakasgai guztiak gainditu izanaren ziurtagiria.
–Ikastetxe publikoetan edo hezkuntza administrazioak baimendutako ikastetxe pribatuetan erdi mailako heziketa zikloetara sartzeko berariazko prestakuntza ikastaroa gainditu izanaren ziurtagiria.
–Hasierako lanbide kualifikazioko programa bateko nahitaezko moduluak gainditu izanaren frogagiria.
–Erdi edo goi mailako heziketa zikloetan sartzeko proba gainditu izanaren ziurtagiria.
–Unibertsitatean 25 urtetik gorakoak sartzeko proba gainditu izanaren ziurtagiria.
Izen ematea.
14. Ziklo bakar bateko eta zentro bakar bateko lanbide moduluen arabera egin beharko da izena emateko eskaera.
Inskripzioa honela egiten ahalko da:
–Aurrez aurre: zer ziklo hautatzen den, hartarako azterketa egiten duen zentroan.
–Telematika bidez, online (ziurtagiri digital balioduna, NAN elektronikoa edo NANa + PINa izan beharko da horretarako), helbide honetan dagoen “Lanbide Heziketako tituluak lortzeko proba libreak” izeneko tramiteen fitxatik:
15. Hezkuntzako zuzendari nagusiaren azaroaren 22ko 566/2017 Ebazpenaren bidez onetsitako proba libreen berariazko deialdian (Hezkuntzako kontseilariaren maiatzaren 11ko 95E/2018 Foru Aginduaren bidez baliogabetua) izena emateko eskaera egin dutenek ez dute eskaera berri bat aurkeztu beharrik izanen ebazpen honen bidez deitutako proba libreen berariazko deialdian parte hartzeko; edonola ere, agiri berriak aurkezteko eskubidea izanen dute, proba libreen berariazko deialdi honetan izena emateko eskabideak aurkezteko ezarritako azken data bitarte. Pertsona horiek modulu berrietan (566/2017 Ebazpenak ezarritako epean aurkeztu zuten eskabidean ez aipatutakoak) inskribatu nahi badute, eskabide berri bat aurkeztu beharko dute.
16. Izangai bakoitzak izena emateko eskabide bakar bat aurkeztuko du, Nafarroako Gobernuaren tramiteen katalogoko “Lanbide Heziketako tituluak lortzeko proba libreak” izeneko tramiteen fitxako ereduei egokitua.
Pertsona batek eskabide bat baino gehiago aurkezten baditu, horietako bakar bat ere ez da kontuan hartuko, eta deialdi honetan araututako onarpen prozeduratik kanpo geldituko da.
17. Gehienez ere 1.000 irakastordura iritsiko da inskripzioaren xedeko eskaera osatzen duten lanbide moduluen kopurua. Irakastordu horiek gainditzen dituen modulu kopurua eskatuz gero, zentroak inskripzioaren eskaeran adierazitako ordenaren araberako inskripzioa eginen du lanbide moduluetan, curriculumeko gehieneko ordu kopurura iritsi arte.
Zer lanbide modulu egiaztatzeko eskaera egin gogo den, haiek ez dira izena emateko eskaeran adierazi beharko.
18. Lantokiko Prestakuntza moduluan izena eman dezakete soilik modulu hau egiteko moduan dauden ikasleek, hau da, soilik zikloko gainerako moduluak gainditu dituzten horiek; gainera, Nafarroan 2016-2017 ikasturteari zegokion titulua lortzeko proben deialdian gaindituak izan behar dute.
Ez dira inola ere onartuko Lantokiko Prestakuntza moduluko inskripzioak, baldin eta pertsona horiek aipatutako baldintzak betetzen ez badituzte.
19. Aukeratu den zentroan bertaratuta egiten den izena emateko eskaera haren administrazio bulegoetan aurkeztuko da, ebazpen honen 3. eranskinean azaltzen den deialdiaren egutegian ezarritako epean.
20. Erizaintzako zainketa lagungarriak izeneko erdi mailako heziketa zikloari dagozkion moduluetan inskribatuz gero:
–Proba libreen aurreko deialdietan Nafarroan moduluak gainditu, egiaztatu edo/eta baliozkotu zituzten pertsonek, zein zentrotan gainditu, egiaztatu edo baliozkotu zituzten modulu horiek, hartan aurkeztu beharko dute inskribatzeko eskaera.
–2015-2016 ikasturtean, zentro batean baino gehiagotan proba libreen deialdian moduluak gainditu, egiaztatu edo/eta baliozkotu zituzten pertsonek, zein zentrotan gainditu, egiaztatu edo baliozkotu zituzten modulu horiek, haietako batean aurkeztu beharko dute izena emateko eskaera.
21. Halaber, Administrazio Publikoen Administrazio Prozedura Erkideari buruzko 39/2015 Legearen 16.4 artikuluak aipatzen dituen egoitzetako edozein erabiltzen ahalko da eskaerak aurkezteko. Eskubide hori erabiliz, eskaera posta bidez igortzen bada, gutun-azal irekian aurkeztuko da, Posta Zerbitzuko funtzionarioak data eta zigilua jar ditzan gutuna ziurtatu baino lehen.
22. Eranskin honen 13. oinarrian aipatzen diren izena emateko baldintza guztiak eskaerak aurkezteko epea bukatzen den egunean bete beharko dira. Halaber, baremazioaren ondorioetarako aurkezten den dokumentazioa bat etorriko da deialdi honetan eskabideak aurkezteko ezarritako azken egunean frogatzen ahal diren egoerekin.
Era berean, Lantokiko Prestakuntza moduluko inskripzioa eskatzeko, frogatu beharko da eranskin honen 18. oinarrian ezarritako baldintzak betetzen direla.
23. Izena emateko eskaerarekin batera aurkeztu beharko da eranskin honen 26. eta 27. oinarrietan ezarritako onarpen taldeei dagokien dokumentazioa.
23.1. Lehenengo taldea:
a) Nortasun agiri nazionalaren fotokopia, pasaportearena, nortasuna frogatzen duen bidaia agiri batena, bisarena edo atzerritarren identifikazio txartelarena.
b) Izena emateko eskaera hartzen duen zentroak jaso beharko du gainditu, egiaztatu edo/eta baliozkotutako moduluen batez besteko notari buruzko informazioa.
23.2. Bigarren multzoa:
a) Nortasun agiri nazionalaren fotokopia, pasaportearena, nortasuna frogatzen duen bidaia agiri batena, bisarena edo atzerritarren identifikazio txartelarena.
b) Zikloan sartzeko titulua edo prestakuntza akademikoa egiaztatzen duen ziurtagiriaren fotokopia, batez besteko nota adierazita.
c) Zer ziklotan inskribatzeko eskatzen den, haren moduluak gainditu izana frogatzen duen ziurtagiri akademikoaren fotokopia, kasu hori bada.
d) Zer modulutan inskribatzeko eskatzen den, haren tituluko gaitasun unitateak ofizialki frogatzen dituen dokumentuaren fotokopia, kasu hori bada.
23.3. Hirugarren taldea:
a) Nortasun agiri nazionalaren fotokopia, pasaportearena, nortasuna frogatzen duen bidaia agiri batena, bisarena edo atzerritarren identifikazio txartelarena.
b) Zikloan sartzeko titulua edo prestakuntza akademikoa egiaztatzen duen ziurtagiriaren fotokopia, batez besteko nota adierazita.
c) Lan-esperientziaren egiaztagiria, dokumentu hauek aurkeztuta:
c.1) Soldatapeko langileen eta langile autonomoen edo beren gain ari direnen kasuan:
–Lan-esperientzia zer enpresa edo erakundetan eskuratu duen, haren ziurtagiria, datu hauek berariaz adierazita: kontratuaren iraupena, egindako jarduera eta zenbat denbora egin duen lan horretan. Beren gain ari diren langileen kasuan, zergapekoen zentsuan gutxienez urtebeteko antzinatasuna duela dioen ziurtagiria eskatuko da, baita interesdunak jarduera ohikoenei buruz egindako aitorpena ere.
–Gizarte Segurantzako Diruzaintza Orokorraren edo Lan Mutualitatearen ziurtagiria, non enpresa, lanbide kategoria, kotizazio taldea eta kontratazioaldia adieraziko baitira, edo, betiere, Langile Autonomoen Araubide Berezian izandako kotizazioaldia, edo, bestela, zuzenbidearen araberakoa den beste edozein frogabide.
c.2) Boluntario gisa, bekadun gisa edo antzeko modu batean lan egin dutenen kasuan:
–Zerbitzuak zer erakundetan egin diren, hark emandako ziurtagiria, berariaz adierazita honako hauek urte natural bakoitzerako: egindako jarduerak eta eginkizunak, zer urtetan egin diren eta horietan guztira sartutako ordu kopurua.
23.4. Laugarren taldea:
a) Nortasun agiri nazionalaren fotokopia, pasaportearena, nortasuna frogatzen duen bidaia agiri batena, bisarena edo atzerritarren identifikazio txartelarena.
b) Zikloan sartzeko titulua edo prestakuntza akademikoa egiaztatzen duen ziurtagiriaren fotokopia, batez besteko nota adierazita.
23.5. Lau taldeetako bakoitzean, desgaitasunen bat izatea edo goi mailako edo errendimendu handiko kirolari izatea edo hezkuntza laguntzako berariazko premia izatea frogatzen duen dokumentazioa.
24. Hezkuntza Departamentuak egiaztatzen ahalko du inskribatutakoek aurkeztutako datuak edo/eta dokumentuak benetakoak diren edo ez. Haietan faltsutasunik badela egiaztatuz gero, deialditik kanpo geldituko da eta, hartan kalifikaziorik lortu bada, deuseztatuko da.
Ikaspostuak erreserbatzea.
25. Modulu bakoitzean, erreserba hauek eginen dira eskaintzen diren 40 ikaspostuko:
–2 ikaspostu, desgaitasunen bat dutenentzat.
–2 ikaspostu, goi mailako edo errendimendu handiko kirolarientzat, goi mailako eta errendimendu handiko kirolariei buruzko uztailaren 13ko 971/2007 Errege Dekretuan aurreikusitakoaren arabera.
–2 ikaspostu, hezkuntza laguntzako berariazko premiak dituztela frogatzen duten pertsonentzat, ikasteko nahasmenduak eta arreta eskasiagatiko eta hiperaktibitateagatiko nahasmenduak izateagatik.
Modulu bakoitzean desgaitasunak dituzten bi lagun baino gehiago, edo errendimendu handiko bi kirolari baino gehiago, edo ikasteko nahasmenduen eta arreta eskasiagatiko eta hiperaktibitateagatiko nahasmenduen ondoriozko hezkuntza laguntzako berariazko premiak dituzten bi lagun baino gehiago izanez gero, eranskin honen 26. eta 27. oinarrietan ezarritako onarpen irizpideen arabera prestatutako lehentasun zerrendako lehen biei esleituko zaizkie plazak.
Ikasle berezi horientzat gordetako ikaspostuak betetzen ez badira, eskaintza orokorrekoei gehituko zaizkie.
Onartzeko irizpideak.
26. Ondoko irizpideei jarraituz ordenatuko da deialdi honen xede diren heziketa zikloetako moduluetan inskribatzeko eskatzen duten ikasleen lehentasunezko zerrenda:
–Lehenbizikoa: Lanbide Heziketako teknikari titulua eta goi mailako teknikari titulua lortzearren, moduluen proba libreak egiteko, aurreko ikasturteetako deialdietan Nafarroan matrikulatuta egon eta lanbide moduluren bat gainditu, egiaztatu edo baliozkotzen dutenak.
–Bigarrena: beste autonomia erkidego batzuetako proba libreen deialdien bidez edo beste prestakuntza modalitate batzuen bidez, tituluko gaitasun unitateren bat dutela edo tituluaren lanbide moduluak gainditu izana frogatzen dutenak.
–Hirugarrena: enpresa, elkarte edo erakunde batean, lanaldi osoko lan batean egonda, urtebeteko gutxieneko lan-esperientzia frogatzen dutenak.
Lan-esperientzia zehazteko, horrek zerikusia izan beharko du, LOGSEko zikloen kasuan, gaitasun orokorrarekin, gaitasun unitateekin, heziketa zikloaren errealizazioekin eta errealizazio irizpideekin; eta LOEko zikloen kasuan, gaitasun orokorrarekin, lanbide gaitasunekin, gaitasun pertsonal eta sozialekin, kualifikazioekin eta heziketa zikloko Lanbide Kualifikazioen Katalogo Nazionaleko gaitasun unitateekin.
Lan-esperientziaren balorazioa eta, aurreko paragrafoan adierazitakoari jarraikiz, esperientziak zikloarekin duen harremanaren edo harremanik ezaren balorazioa ikastetxe bakoitzeko Ebaluazio Batzordeari dagokio, ziklo bakoitzerako.
–Laugarrena: Aurreko hiru taldeetako bakar batean ez daudenak.
27. Hurrengo lehentasun irizpideak kontuan izanda ezarriko da lehentasun zerrenda, aipatu lau taldeetako bakoitzerako:
a) Lehenengo taldea:
–Gaindituta, egiaztatuta edo/eta baliozkotuta dauden modulu kopuruaren arabera, handienetik txikienerako hurrenkeran.
–Gainditu, egiaztatu edo/eta baliozkotu diren moduluen kopurua berdina izanez gero, gainditu, egiaztatu edo/baliozkotu diren moduluen batez besteko notaren arabera, bi zifra hamartar adierazita, handienetik txikienera.
–Puntu-berdinketa hausten ez bada, Nafarroako Eskolatze Batzorde Nagusian, 2017-2018 ikasturteko onarpen prozeduraren barruan, egindako zozketaren emaitza aplikatuz ebatziko da.
b) Bigarren taldea:
–Egiaztatzen diren gaitasun unitateen eta gainditu, egiaztatu eta baliozkotzen diren lanbide moduluen kopuruaren arabera, gaitasun unitateen eta lanbide moduluen kopuru handienetik txikienera. Zenbatzearen ondorioetarako, balio berekotzat jotzen dira modulua eta gaitasun unitatea.
–Gaitasun unitate egiaztatuen eta lanbide modulu gainditu, egiaztatu eta baliozkotuen kopurua berdina izanez gero, sartzeko alegatzen den baldintzaren batez besteko notaren arabera, bi zifra hamartar adierazita, handienetik txikienera. Batez besteko nota kalkulaturik ez dutenak, nor bere taldeko azken tokira pasatuko dira.
–Puntu-berdinketa hausten ez bada, Nafarroako Eskolatze Batzorde Nagusian, 2017-2018 ikasturteko onarpen prozeduraren barruan, egindako zozketaren emaitza aplikatuz ebatziko da.
c) Hirugarren taldea:
–Alegatzen den sarrera-baldintzaren batez besteko notaren arabera, bi zifra hamartar adierazita, handienetik txikienera. Batez besteko nota kalkulaturik ez dutenak, nor bere taldeko azken tokira pasatuko dira.
–Berdinketa badago, Nafarroako Eskolatze Batzorde Nagusian, 2017-2018 ikasturteko onarpen prozeduraren barruan, egindako zozketaren emaitza aplikatuz ebatziko da.
d) Laugarren taldea:
–Alegatzen den sarrera-baldintzaren batez besteko notaren arabera, bi zifra hamartar adierazita, handienetik txikienera. Batez besteko nota kalkulaturik ez dutenak, nor bere taldeko azken tokira pasatuko dira.
–Berdinketa badago, Nafarroako Eskolatze Batzorde Nagusian, 2017-2018 ikasturteko onarpen prozeduraren barruan, egindako zozketaren emaitza aplikatuz ebatziko da.
Onartuen behin-behineko eta behin betiko zerrendak.
28. Ebazpen honen 3. eranskinean jasotako egutegian adierazten den egunean, zentro aztertzaileko zuzendaritzak bertako iragarki oholean eta haren web-orrian argitaratuko du onartzen direnen behin-behineko zerrenda, lanbide modulu bakoitzerako.
29. Onartzen direnen behin-behineko zerrenda horren aurka, erreklamazioa igortzen ahalko zaio zentroko zuzendariari, ebazpen honen 3. eranskinean adierazitako egunetan.
30. Zentro aztertzaileko zuzendaritzak, ebazpen honen 3. eranskinean adierazitako egunean, onartzen direnen behin betiko zerrenda argitaratuko du zentroko iragarki oholean eta haren web-orrian, lanbide modulu bakoitzerako.
31. Eskatutako lanbide moduluren batean onartzen ez diren lehendabiziko hogei eskatzaileak itxaron zerrendan geldituko dira, ebazpen honen xedeko proba libreen deialdian, aurretik ezarritako irizpideen arabera sailkaturik. Onartuak izan daitezke, ikaspostu hutsik egonez gero moduluren batean, onartutako ikasleren baten baja izan delako.
32. Ikasle bat lanbide modulu batean onartu dela ulertuko da hala agertzen denean onartutako ikasleen behin betiko zerrendan, edo azterketa egin dion zentroak plaza esleitzen dionean matrikulazio epea bukatuta plaza hutsik izateagatik.
Matrikulazioa.
33. Ebazpen honen 3. eranskinean adierazitako egunetan egin beharko da matrikula onartua izan den moduluetan, eta dokumentazio hau aurkeztu beharko da:
–Lanbide Heziketako teknikari titulua edo goi mailako teknikari titulua lortzeko moduluen araberako proba libreetako tasa gisa erabakitako diru kopurua Nafarroako Foru Komunitateko Administrazioaren diru-bilketa kontuan sartu izanaren gordekina.
–Familia ugariaren titulua izanez gero, horren fotokopia.
–Beharrezko egokitzapen motaren eskaera, desgaitasuna dutela frogatu dutenen kasuan.
–Beharrezko egokitzapen motaren eskaera, hezkuntza laguntzako berariazko premiak dituztela frogatu dutenen kasuan, ikasteko nahasmenduak eta arreta eskasiagatiko eta hiperaktibitateagatiko nahasmenduak izateagatik.
34. Matrikula egiteak ebaluazio deialdi bakar baterako eskubidea emanen du, ebazpen honen bidez deitutako modulu bakoitzeko.
35. Nafarroako Foru Komunitateko Administrazioaren eta haren erakunde autonomoen tasei eta prezio publikoei buruzko martxoaren 27ko 7/2001 Foru Legearen 99. artikuluan xedatutakoari jarraituz (lege hori Tributu arloko Neurriei buruzko abenduaren 24ko 28/2014 Foru Legearen bidez aldatu zen, abenduaren 30eko 1621/2005 Errege Dekretuari dagokionez, zeinaren bidez Familia Ugariak Babesteko azaroaren 18ko 40/2003 Legearen Erregelamendua onetsi zen), honako hauek dira Lanbide Heziketako teknikari titulua edo goi mailako teknikari titulua lortzeko proba libreetan matrikulatzeko tasak, modulu bakoitzeko:
–Tarifa arrunta: 10 euro.
–1. kategoriako familia ugariko kideak (kategoria orokorra): 5 euro.
–2. kategoriako familia ugariko kideak (kategoria berezia): doan.
36. Lanbide Heziketako teknikari titulua edo goi mailako teknikari titulua lortzeko, modulukako proba libreetako matrikulazio tasa ordaintzeko, Internet bitartez bete beharko da dagokion ordainketa-gutunaren inprimakia, Nafarroako Gobernuaren tramiteen katalogoko “Lanbide Heziketako tituluak lortzeko proba libreak” izeneko tramiteen fitxan, zeina helbide honetan baitago:
Ordainketa-gutuna bete ondoren, eta aipatu fitxan dauden jarraibideekin bat, eskatzaileak ordainketa egiten ahalko du, pagatzeko bi modu hauetako baten bidez:
a) Diru-sarrera banku-erakunde laguntzaile batean.
b) Ordainketa telematikoa banku-txartel baten bidez.
Tasaren kuota inskripzioan ezarritako epean ez pagatzea edo osorik ez pagatzea baztertzeko arrazoia izanen da; orobat, bazterturik geldituko da tasa ordaintzetik erabat salbuetsita egoteko edo tasaren hobaria izateko behar diren agirietako bat aurkezten ez bada edo agiri horietan faltsukeriaren bat atzematen bada.
37. Bateraezinak dira proba hauetako matrikula eta beste prozedura batzuk, ekainaren 27ko 76/2016 Foru Aginduaren 1. eranskinaren 4. oinarrian arautzen den moduan. Ez bada betetzen, deialdi honetako matrikula eta bertan lortzen diren emaitza akademikoak deuseztatuko dira, matrikularen tasa itzultzeko eskubiderik sortu gabe.
38. Izena emateko eskaeran desgaitasunen bat dutela frogatu duten izangaiek probak egiteko zer egokitzapen mota jotzen duten beharrezkotzat adierazi beharko dute matrikula egiten duten unean.
39. Ikasteko nahasmenduen eta arreta eskasiagatiko eta hiperaktibitateagatiko nahasmenduen ondoriozko hezkuntza laguntzako berariazko premiak frogatu dituzten izangaiek, matrikula egiteko unean, probetarako egokitzapenak adierazi beharko dituzte; horiek Hezkuntzako kontseilariaren ekainaren 18ko 65/2012 Foru Aginduaren 5.7 artikuluan ezarritakoaren arabera gauzatuko dira.
40. Bi kasuetan, egokitzapen horiengatik ez dira tituluaren gaitasun orokorrean eragina duten ikasketaren helburuak edo emaitzak kenduko.
Matrikula-tasa itzultzea.
41. Deialdi honek finkatutako epeetan izena eman duen interesdunak eskaturik, tasa itzultzea bidezko izanen da, bakar-bakarrik, bitan ordaindu bada edo behar baino gehiago ordaindu bada.
42. Izena eman duten eta Hezkuntzako zuzendari nagusiaren azaroaren 22ko 566/2017 Ebazpenaren ondoriozko matrikula egin duten pertsonek tasak itzultzea eskatzen ahalko dute, bakar-bakarrik izena emateko eskaera baliogabetzen badute deialdi honi dagokion izena emateko epean.
Halaber, onartuak izateko prozesu berriaren ondorioz, ordaindutako modulu guztietan ikaspostua lortzen ez badute, dagozkion tasak itzultzea eskatzen ahalko dute.
43. Tasa itzultzeko eskaeretan, interesdunek Nafarroako Gobernuaren tramiteen katalogoko “Lanbide Heziketako tituluak lortzeko proba libreak” izeneko tramiteen fitxan dagoen eredua erabiltzen ahalko dute.
Hezkuntza Departamentuaren erregistroan aurkeztuko da tasa itzultzeko eskaera, Lanbide Heziketaren Zerbitzuko Lanbide Heziketaren Plangintza, Antolamendu eta Garapenerako Atalari zuzendua. Eskabidearekin batera, bertan aipatzen den dokumentazioa aurkeztu beharko da nahitaez.
Gainditutako moduluak baliozkotzeko eta egiaztatuak izateko prozedura.
44. Azaroaren 7ko ECD/2159/2014 Aginduaren 3. artikuluko 9. apartatuan (urriaren 26ko ECD/1055/2017 Aginduak emandako testuaren arabera) ezarritakoarekin bat, ezin dira eskatu lanbide moduluen baliozkotzeak Lanbide Heziketako teknikari titulua eta goi mailako teknikari titulua lortzeko proben deialdi honetan.
45. Ebazpen honen bidez probarako deialdia duten lanbide moduluetan matrikulaturik daudenek lanbide moduluak egiaztatzeko eskatzen ahalko dute, indarreko araudian ezarritakoaren arabera.
46. Gainditutako moduluak egiaztatzea prozesu akademiko eta administratibo bat da, zeinaren bidez, ikasleek eskatuta, erabakitzen baita ikasleak matrikulatua dagoen heziketa zikloko modulu bat edo gehiago ez dituela egin behar aurretik egindako beste batzuen berdin-berdinak direlako eta horien azken kalifikazioa positiboa izan delako, hau da, 5 edo gehiago.
Moduluak egiaztatuz gero, ondorio hau izanen du: gainditutako moduluen kalifikazioa ikaslearen ikasketa-espedientera aldatuko da.
47. Hauxe da moduluak egiaztatzeko eskabideari erantsi beharko zaion dokumentazioa: gainditu diren moduluak jasotzen dituen ziurtagiri akademikoaren fotokopia.
48. Azterketa egiten duten zentroek beharrezko informazioa eta orientazioa emanen diete moduluak egiaztatzeko eskatzen dutenei.
Proben nondik norakoari buruzko informazio saioa.
49. Ebazpen honen 3. eranskinean ezarritako egutegian aipatzen diren egunetan, deialdi honen xedeko heziketa ziklo bakoitzeko Ebaluazio Batzordeak informazio saioa eginen du zentro aztertzaileetan, berak ezartzen duen ordutegian, matrikulatuta daudenentzat.
50. Saio horretan proben alderdi hauei buruzko informazioa eta orientazioa emanen da:
–Ikasketaren emaitzak edo amaierako gaitasunak, bai eta proben xedeko lanbide moduluei dagozkien ebaluazio irizpideei buruzkoak ere.
–Ebaluazio sistema.
–Ebaluaziorako proba motak.
–Lanbide modulu bakoitzeko probak egiteko egutegia.
–Probekin zerikusia duten beste alderdi batzuk.
–Izangaien zalantzak argitzea proben nondik norakoari buruz.
Proben prestaketa, egitura eta edukia.
51. Izendatzen diren ebaluazio batzordeek prestatuko dituzte deialdi honen xedeko lanbide modulu bakoitzerako probak; teoriko-praktikoak izan beharko dute.
52. Erizaintzako zainketa lagungarrien erdi mailako heziketa zikloko moduluei dagokienez, Koordinazio Batzordeak edo/eta horretarako izendatutako aholkulariek prestatuko dituzte probak.
53. Edukiak Nafarroako Foru Komunitatean indarra duten heziketa zikloetako curriculumei eta haien lanbide gaitasunei buruzkoak izanen dira. Probek eduki teorikoak eta praktikoak izanen dituzte, halakoak non kasuan kasuko ebaluazio irizpideen bidez agerian gelditzen ahal baita ikasleek behar diren ikaskuntza emaitzak edo trebetasunak lortu dituztela, eta, hala dagokionean, lanbide moduluari lotutako gaitasunak.
54. Beren ezaugarriengatik eta bereizgarritasunarengatik beharrezkotzat jotzen den lanbide moduluetan, Ebaluazio Batzordeak hainbat zatitan antolatzen ahalko du proba, eta zehaztu, hala erabakiz gero, aurreko zatia gainditu beharko dela hurrengoa egiteko. Inguruabar horren berri emanen zaie matrikulatuta dauden ikasleei.
55. Probak egiteko aurreikusitako egutegia ebazpen honen 3. eranskinean finkatutakoa da; hura irailean berretsiko da, tramiteen fitxaren bidez izena emateko epea hasi baino lehen. Proba bat zenbait zatitan egiten bada, adierazitako data probaren lehen zatiari dagokio. Probak egiteko orientabideak, ebaluazio irizpideak eta kalifikazioa jendaurrean jarriko dira zentro bakoitzeko iragarki oholean eta web-orrian, ebazpen honen 3. eranskinean adierazitako egunetan.
Probak egitea.
56. Ebazpen honen bidez araututako deialdiari dagozkion probak eginen dira deialdi honen xedeko modulu bakoitzerako, ebazpen honen 3. eranskinean ezarritako egutegiaren arabera.
57. Ebaluazio Batzordeak azterketaren xedeko lanbide moduluen probak egiteko egutegia prestatuko du.
Halako eran prestatuko da egutegia non modulu bakoitzean irakaslanean aritzen diren irakasleen lanbide moduluen ariketak ez baitira finkatuko irakasle horien irakastorduetan. Orobat, ahaleginak eginen dira, jarduera horiek direla eta, zentroko gainerako ikasleei trabarik ez egiteko.
58. Probetan matrikulatuta daudenek nortasun agiri nazionala, pasaportea edo legez onartua den beste edozein dokumentu, identitatea behar adina frogatzen duena, eraman beharko dute.
Ebaluazio Batzordeak.
59. Ekainaren 27ko 76/2016 Foru Aginduaren eranskinaren 8. oinarrian ezartzen den moduan, hezkuntza ziklo eta zentro bakoitzerako ebaluazio batzorde bat eratuko da; Lanbide Heziketaren Zerbitzuko zuzendariak izendatuko ditu.
Ebaluazio Batzordeak aholkularien laguntza eska dezake beharrezkoa iruditzen zaionean. Lanbide Heziketaren Zerbitzuko zuzendariak izendatuko ditu aholkulari horiek.
60. Gainera, Erizaintzako zainketa lagungarrien heziketa ziklorako, koordinazio batzorde bat eratuko da, Hezkuntzako zuzendari nagusiak izendatua Lanbide Heziketaren Zerbitzuak proposaturik, kide hauek izanen dituena: batzordeburu bat eta hiru batzordekide.
Batzordeburua, Lanbide Heziketaren Plangintza, Antolamendu eta Garapenerako Ataleko kide bat izanen da. Hiru batzordekideak kidego hauetakoak izanen dira: katedradunak, Bigarren Hezkuntzako irakasleak, edo Lanbide Heziketako irakasle teknikoak, Erizaintzako zainketa lagungarrien zikloetan irakasteko gaitasuna duen espezialitateren batean; hiru zentro aztertzaileetako bakoitzetik bat. Idazkari lanetan gazteena ariko da.
Era berean, Koordinazio Batzordeak aholkularien laguntza eska dezake beharrezkoa iruditzen zaionean. Lanbide Heziketaren Zerbitzuko zuzendariak izendatuko ditu aholkulari horiek, helburu honekin: deialdi honen xedeko lanbide modulu bakoitza irakasle arduradun bakar bati esleitzeko.
61. Koordinazio Batzordeak, ekainaren 27ko 76/2016 Foru Aginduaren eranskinaren 8. oinarrian aipatzen diren eginkizunez gain, honakoak ere izanen ditu:
–Eranskin honen 78. eta 79. oinarrietan aipatzen diren aholkularitza eta informazio lana egitea.
–Txostenak egitea, lanbide moduluak baliozkotzeko eta egiaztatzeko eskaerei buruz.
–Eranskin honen 49. eta 50. oinarrietan aipatu informazio saioa antolatu eta garatzea.
Erizaintzako zainketa lagungarriak izeneko zikloko moduluetako probei dagokienez, horietan Koordinazio Batzordearen eskumena da probak egitea.
62. Erizaintzako zainketa lagungarriak izeneko zikloko Koordinazio Batzordeak eginkizun hauek izanen ditu:
–Probak prestatzea, deialdi honetan eta Lanbide Heziketaren Zerbitzutik jaso daitezkeen orientabideetan zehaztutako irizpideen arabera.
–Hiru zentro aztertzaileetan aplikatuko diren kalifikazio irizpideak ezartzea.
–Proben antolaketa eta kudeaketa koordinatzea hiru zentro aztertzaileetan.
–Lanbide Heziketaren Zerbitzuko Zuzendaritzak, helburuak behar bezala betetzeko, esleitzen dion beste edozein, betiere bere jarduketa eremuaren barrenean.
63. Lanbide Heziketaren Zerbitzuko zuzendariak izendatuko ditu Lanbide Heziketako teknikari titulua edo goi mailako teknikari titulua lortzeko probetan parte hartzen duten aholkulariak.
Aholkularien eginkizunak hauek izanen dira, oro har:
–Probak egiteko prozesua zaindu eta kontrolatzea.
–Probak zuzentzen eta kalifikatzen laguntzea.
–Proben kudeaketa prozesuan laguntzea.
–Proben kalifikazioen aurka aurkezten diren erreklamazioak ebazten laguntzea.
–Lanbide modulu baten probaren arduradun diren aholkularien kasuan: probak prestatzea, Ebaluazio Batzordeak edo Koordinazio Batzordeak, zer dagokion, adierazitako irizpideen arabera betiere.
64. Ebaluazio Batzordeetako eta Erizaintzako zainketa lagungarriak izeneko zikloko Koordinazio Batzordeko kideak Hezkuntzako zuzendari nagusiaren ebazpen baten bidez izendatuko dira.
Lanbide Heziketaren Zerbitzuko zuzendariak izendatuko ditu aholkulariak.
65. Ebaluazio Batzordeetako eta Erizaintzako zainketa lagungarriak izeneko zikloko Koordinazio Batzordeko kide izatea eta aholkulari izendatua izatea derrigorrezkoa da.
66. Ebaluazio Batzordeetako eta Erizaintzako zainketa lagungarriak izeneko zikloko Koordinazio Batzordeko kideen eta aholkularien lanak Unibertsitatez Kanpoko Irakaskuntza Hobetzeko Neurriei buruzko uztailaren 2ko 26/2002 Foru Legearen 12.2 artikuluan ezarritakoekin parekatuko dira, eta ezartzen diren konpentsazio ekonomikoak jasotzeko eskubidea sortuko dute, ezartzen den prozedurari jarraikiz.
Horretarako, pertsona horiek diru konpentsazioak jasoko dituzte, Hezkuntzako zuzendari nagusiaren martxoaren 22ko 84/2016 Ebazpenean ezarritakoaren arabera. Ebazpen horren bidez ezartzen dira proba libreetako eta hezkuntza sistemako Lanbide Heziketako ikasketetan eta arte plastikoetako lanbide ikasketetan sartzeko probetako ebaluazio batzordeetako eta koordinazio batzordeko kideek jaso beharreko konpentsazioak, bai eta araubide bereziko kirol ikasketen probetakoak ere, Nafarroan.
Kalifikazioen ebaluazioa, erregistroa eta argitalpena.
67. Probak ebaluatzeko erreferentziak honako hauek izanen dira: lanbide modulu bakoitzeko gaitasunak, ikaskuntzaren emaitzak eta ebaluazio irizpideak, bai eta nola egiten den eta egiteko ezartzen diren irizpideak ere.
68. Lanbide modulu bakoitzeko ebaluazioaren zehaztapena eta, zein den kasua, heziketa zikloaren azken kalifikazioa apirilaren 8ko 52/2009 Foru Aginduaren 17. artikuluan ezarritako moduan eginen dira.
69. Lortutako kalifikazioen erregistroa apirilaren 8ko 52/2009 Foru Aginduaren 27. eta 28. artikuluetan xedatu bezala eginen da, foru agindu horretan finkatutako ebaluazio dokumentuetan.
70. Zentro aztertzaileko iragarki oholean kalifikazioak argitaratzea izanen da kalifikazioak jakinarazteko modu ofiziala.
71. Kalifikazioak proba bateko zati batenak direnean, eta hurrengo zatia egiteko eskatzen bada aurreko zatia gainditua izatea, modu berean argitaratuko dira kalifikazioak, hurrengo ariketa egin baino bost egun baliodun lehenago.
Kalifikazioen gaineko erreklamazioak.
72. Maiatzaren 21eko 49/2013 Foru Aginduan eta apirilaren 8ko 52/2009 Foru Aginduan ezarritako prozeduraren arabera eginen dira kalifikazioen gaineko erreklamazioak. Lehenbizikoaren bidez, Nafarroako Foru Komunitateko ikastetxeetan ematen diren unibertsitateaz kanpoko irakaskuntzetako ikasleak ebaluatzeko prozesuan erreklamazioak egiteko sistema ezarri zen. Eta bigarrenaren bidez, Nafarroako Foru Komunitateko hezkuntza sistemako lanbide heziketako ikasleen ebaluazioa, titulazioa eta ikasketen ziurtapena arautu ziren.
Dokumentazio akademikoa.
73. Teknikari eta goi mailako teknikari tituluak lortzeko probak egiteko ikasleak matrikulatzen dituzten zentroek ikasketa-espedientea irekiko diote ikasle bakoitzari.
74. Ebaluazioko dokumentuak eta ikasketen ziurtagiriak apirilaren 8ko 52/2009 Foru Aginduaren VIII. kapituluan ezarritakoak izanen dira.
Titulazioa.
75. Deialdiaren xedeko probak bukatuta, heziketa ziklo jakin bateko lanbide modulu guztiak gainditzen dituztenek dagokien titulua eskatzen ahalko dute, apirilaren 8ko 52/2009 Foru Aginduaren IX. kapituluan ezarri bezala.
Lantokiko Prestakuntza izeneko modulua.
76. Lantokiko Prestakuntza izeneko modulua modu presentzialean egin beharko da, titulu bakoitzaren Nafarroako curriculumeko gainerako moduluak gainditu ondoren.
Ekainaren 27ko 76/2016 Foru Aginduaren eranskinaren 15.2 oinarrian ezarritakoaren arabera, Lantokiko Prestakuntza izeneko moduluan, inskripzio orokorrerako deialdi honetan adierazitako datetan, baldintza hauek betetzen dituztenek soilik eman dezakete izena: hasteko, zikloko gainerako moduluak gaindituak izan behar dira, eta, gainera, horietako azkenak Nafarroan 2016-2017 ikasturteari zegozkion titulua lortzeko proben deialdian gaindituak izan behar dute.
Ez dira inola ere onartuko Lantokiko Prestakuntza izeneko moduluko inskripzioak, baldin eta pertsona horiek aipatutako baldintzak betetzen ez badituzte.
77. Era berean, norbait deialdi honen xedeko moduluetan matrikulatua egon, eta, ebazpen honen bidez deitutako moduluen azken kalifikazioak argitaratu ondoren, prestakuntza zikloko modulu guztiak gainditu baditu Lantokiko Prestakuntza izeneko modulua izan ezik, aukera hauetako bat egin beharko du:
a) Lantokiko Prestakuntza izeneko moduluaren salbuespen eskaera egin ahal izateko lan-esperientzia badu, 2019ko urtarrilean eta otsailean eskatzen ahalko du, zentro bakoitzak zehaztutako datetan, apirilaren 2ko 45/2009 Foru Aginduan xedatutakoarekin bat.
–Salbuespen eskaeraren aldeko ebazpena ematen bada, pertsona horrek matrikula egin beharko du 2019ko urtarrilean edo otsailean Lantokiko Prestakuntza izeneko moduluan zentro bakoitzak zehaztutako datetan, titulua lortu ahal izateko.
–Salbuespen eskaeraren aurkako ebazpena ematen bada edo zati batean bakarrik onartzen bada, eta, beraz, dagokion Lantokiko Prestakuntza aldia egin behar badu, pertsona horrek 2019ko urtarrilean edo otsailean 2018-2019 ikasturteko Lantokiko Prestakuntza izeneko moduluan izena eman eta matrikulatu beharko du, aipatu modulua egin ahal izateko eta, ondorioz, “gai” kalifikazioa lortu eta titulua lortu ahal izateko.
b) Lan-esperientziarik ez badu, pertsona horrek 2019ko urtarrilean edo otsailean 2018-2019 ikasturteko Lantokiko Prestakuntza izeneko moduluan izena eman eta matrikulatu beharko du, aipatu modulua egin ahal izateko eta, ondorioz, “gai” kalifikazioa lortu eta titulua lortu ahal izateko.
Izangaientzako orientazioa.
78. Zentro aztertzaileek beharrezko neurriak hartuko dituzte, deialdi honen xedeko teknikari tituluak lortzeko probetan zentro horretan inskribatu nahi dutenek bermatua izan dezaten Ebaluazio Batzordearen aldetik informazio eta orientazio egokia jasotzeko aukera, bai erreklamatzeko epe eta prozesuei dagokienez, bai deialdi honen xedeko teknikari tituluak lortzeko probak garatzeko bestelako inguruabar batzuei buruz.
79. Zentro aztertzaileetako Zuzendaritzak bermatuko ditu arreta eta orientazio horiek; dagokion ebaluazio batzorde bakoitzaren ardura izanen da hori, eta zentro aztertzaileko orientazio departamentuko langileek laguntza ematen ahalko diote.
Informazioaren tratamendua.
80. Zentro aztertzaileek EDUCA aplikazioa erabiliko dute matrikulatuta dauden ikasleen datu pertsonal eta akademiko guztiak grabatu, prozesatu eta tratatzeko. Orobat, Hezkuntza Zuzendaritza Nagusiaren eskura jarriko dute aipatu aplikaziotik zuzenean lortu ezin den informazio osagarria.
81. Prozedura tramitatzean datu pertsonalekin egiten den edozein tratamendutan, Datu Pertsonalak Babesteari buruzko abenduaren 13ko 15/1999 Lege Organikoan xedatutakoa bete beharko da.
2. ERANSKINA
Lanbide Heziketako teknikari tituluak lortzeko
proben deialdia duten heziketa zikloak
1.–Deialdi orokorra.
1.1. Hezkuntza Sistemaren Antolamendu Orokorrari buruzko (LOGSE) urriaren 3ko 1/1990 Lege Organikoaren ondoriozko titulua: Erizaintzako Zainketa Lagungarriak.
a) Lanbide arloa: Osasuna. Gradua: Ertaina.
b) Nafarroako curriculuma: Martxoaren 18ko 153/1996 Foru Dekretua (1996ko maiatzaren 31ko Nafarroako Aldizkari Ofiziala).
c) Ikaspostu kopurua, modulu eta zentro bakoitzeko: 40 ikaspostu gehienez, oro har.
d) Zentro aztertzaileak (inskribatzeko eta probak egiteko zentroak):
–IB. Nafarroako Lanbide Eskola Tekniko Sanitarioa. Irunlarrea 3 (Nafarroako Ospitalearen esparrua), 31008 Iruña. Telefonoa: 848 431060.
- http://escuelasanitaria.educacion.navarra.es/web/.
- escuela.sanitaria@educacion.navarra.es
–IB. Lizarrako Politeknikoa. San Pol, 8, 31200 Lizarra. Telefonoa: 948 550412.
- http://politecnicoestella.educacion.navarra.es/web/index.php/es/.
- politecnicoestella@educacion.navarra.es
–IBP. ETI. Tarazonako etorbidea, z.g., 31500 Tutera. Telefonoa: 848 430140.
- https://eti-paginaweb.blogspot.com/.
- cipeti@educacion.navarra.es
e) Zikloaren modulu hauetarako deitzen dira proba libreak:
MODULUAREN IZENA | CURRICULUMEKO ORDUAK |
Administrazio eragiketak eta osasun arloko dokumentazioa | 64 |
Erizaintzako oinarrizko teknikak | 480 |
Ospitaleko higienea eta materialaren garbiketa | 128 |
Pazientearentzako laguntza psikologikoa eta osasunaren sustapena | 65 |
Laguntza odontologikoaren/estomatologikoaren teknikak | 96 |
Lantaldeko harremanak | 64 |
Lanerako prestakuntza eta orientazioa | 64 |
1.2. Hezkuntzari buruzko maiatzaren 3ko 2/2006 Lege Organikoaren (LOE) ondoriozko titulua. Osasun Larrialdiak.
a) Lanbide arloa: Osasuna. Gradua: Ertaina.
b) Nafarroako curriculuma: Maiatzaren 4ko 43/2009 Foru Dekretua (2009ko abuztuaren 21eko Nafarroako Aldizkari Ofiziala - 2013ko irailaren 26ko akats zuzenketa).
c) Ikaspostu kopurua, modulu eta zentro bakoitzeko: 40 ikaspostu gehienez, oro har.
d) Zentro aztertzailea (inskribatzeko eta probak egiteko zentroa):
–IB. Nafarroako Lanbide Eskola Tekniko Sanitarioa. Irunlarrea, 3 (Nafarroako Ospitalearen esparrua), 31008 Iruña. Telefonoa: 848 431060.
- http://escuelasanitaria.educacion.navarra.es/web/.
- escuela.sanitaria@educacion.navarra.es
e) Zikloaren modulu hauetarako deitzen dira proba libreak:
KODEA | MODULUAREN IZENA | CURRICULUMEKO ORDUAK |
0061 | Oinarrizko patologia eta anatomofisiologia | 120 |
0063 | Enpresa eta ekimena | 60 |
0053 | Osasun logistika larrialdietan | 180 |
0059 | Larrialdi planak eta aurreikus daitezkeen arriskuetarako baliabideak | 110 |
0060 | Telelarrialdia | 70 |
0062 | Lanerako prestakuntza eta orientazioa | 90 |
1.3. Hezkuntzari buruzko maiatzaren 3ko 2/2006 Lege Organikoaren (LOE) ondoriozko titulua. Mendekotasun egoeran dauden pertsonentzako arreta.
a) Lanbide arloa: Gizarte eta Kultura Zerbitzuak eta Komunitatearentzako Zerbitzuak. Gradua: Ertaina.
b) Nafarroako curriculuma: Abuztuaren 1eko 82/2012 Foru Dekretua (2012ko abenduaren 27ko Nafarroako Aldizkari Ofiziala)
c) Ikaspostu kopurua, modulu eta zentro bakoitzeko: 40 ikaspostu gehienez, oro har.
d) Zentro aztertzailea (inskribatzeko eta probak egiteko zentroa):
–IB. Hezitzaile Eskola. Kale Nagusia, 65 (Ezpeleta Jauregia), 31001 Iruña. Telefonoa: 848 430970.
- http://escuelaeducadores.educacion.navarra.es/.
- escuela.educadores@educacion.navarra.es
e) Zikloaren modulu hauetarako deitzen dira proba libreak:
KODEA | MODULUAREN IZENA | CURRICULUMEKO ORDUAK |
0211 | Gizarte trebetasunak | 190 |
0212 | Mendekotasun egoeran dauden pertsonen ezaugarriak eta beharrak | 190 |
0020 | Lehen sorospenak | 60 |
0831 | Telelaguntza | 70 |
0218 | Laneko prestakuntza eta orientabidea. | 70 |
0219 | Enpresa eta ekimena | 70 |
NA17 | Laguntza-harremana | 140 |
3. ERANSKINA
Ebazpen honen bidez deitutako Lanbide Heziketako Teknikari tituluak lortzeko proba libreetarako deialdiaren egutegia
JARDUKETA | DATAK |
Izena emateko eskaerak aurkezteko epea | 2018ko urriaren 3tik 9era |
Onartuen behin-behineko zerrenda argitaratzea | 2018ko urriaren 17a |
Behin-behineko zerrendari erreklamazioak egiteko epea | 2018ko urriaren 18tik 22ra, biak barne |
Onartuen behin betiko zerrenda argitaratzea | 2018ko urriaren 24a |
Matrikulazio epea (eta, zein den kasua, egokitzapenak, moduluen baliozkotzeak eta moduluen onarpena eskatzekoa) | 2018 urriaren 25etik 31ra |
Proben garapenari buruzko informazio saioa (zentro bakoitzak argitaratzen duen egutegiaren arabera) | 2018ko azaroaren 5etik 9ra |
Proben garapenari loturiko informazioa argitaratzea (zentro bakoitzak zehazten duen egutegiaren arabera) | 2018ko azaroaren 5etik 9ra |
Probak egitea (aurreikusitako datak) | Datak ondoko tauletan ikusi |
Erizaintzako zainketa lagungarriak:
MODULUA | PROBAREN DATA |
Erizaintzako oinarrizko teknikak | 2018ko azaroaren 14a |
Pazientearentzako laguntza psikologikoa eta osasunaren sustapena | 2018ko azaroaren 27a |
Administrazio eragiketak eta osasun arloko dokumentazioa | 2018ko abenduaren 12a |
Lanerako prestakuntza eta orientazioa | 2018ko abenduaren 19a |
Lantaldeko harremanak | 2019ko urtarrilaren 9a |
Ospitaleko higienea eta materialaren garbiketa | 2019ko urtarrilaren 16a |
Laguntza odontologikoaren/estomatologikoaren teknikak | 2019ko urtarrilaren 23a |
Probak egiteko datak irailean berretsiko dira (izena emateko epea hasi baino lehen). | |
Mendekotasun egoeran dauden pertsonentzako laguntza:
KODEA | MODULUA | PROBAREN DATA |
0211 | Gizarte trebetasunak | 2018ko azaroaren 14a |
0212 | Mendekotasun egoeran dauden pertsonen ezaugarriak eta beharrak | 2018ko azaroaren 21a |
0020 | Lehen sorospenak | 2018ko azaroaren 27a |
0831 | Telelaguntza | 2018ko abenduaren 12a |
0218 | Laneko prestakuntza eta orientabideak | 2018ko abenduaren 19a |
0219 | Enpresa eta ekimena | 2019ko urtarrilaren 9a |
NA17 | Laguntza-harremana | 2019ko urtarrilaren 16a |
Probak egiteko datak irailean berretsiko dira (izena emateko epea hasi baino lehen). | ||
Osasun-larrialdiak:
KODEA | MODULUA | PROBAREN DATA |
0061 | Oinarrizko patologia eta anatomofisiologia | 2018ko azaroaren 14a |
0063 | Enpresa eta ekimena | 2018ko azaroaren 21a |
0053 | Osasun logistika larrialdietan | 2018ko azaroaren 27a |
0059 | Larrialdi planak eta aurreikus daitezkeen arriskuetarako baliabideak | 2018ko abenduaren 19a |
0060 | Telelarrialdia | 2019ko urtarrilaren 9a |
0062 | Lanerako prestakuntza eta orientazioa | 2019ko urtarrilaren 16a |
Probak egiteko datak irailean berretsiko dira (izena emateko epea hasi baino lehen). | ||
Iragarkiaren kodea: F1808267
Sarbidea
Nafarroako Aldizkari Ofiziala
Paseo Pablo Sarasate, 38, 2.º izda.
31001 - Iruña
848 42 12 50
