1. NAFARROAKO FORU KOMUNITATEA
1.2. AGINTARIAK ETA LANGILEAK
1.2.1. Kargu-uzteak, izendapenak eta bestelako egoerak
198/2018 EBAZPENA, maiatzaren 7koa, Politika Ekonomiko eta Enpresarialaren eta Lanaren zuzendari nagusiak emana, hauteskunde arbitroen izendapena onesten duena.
Langileen Estatutuari buruzko martxoaren 24ko 1/1995 Legegintzako Errege Dekretuaren 76. artikuluak 1. apartatuan ezartzen du hauteskunde arloko aurkaratzeak artikulu horrexetan araututako arbitraje-prozedurari jarraikiz tramitatuko direla. 3. apartatuak eransten du arbitro lanetan arituko direla apartatu horretan araututako prozeduraren arabera izendatzen direnak, eta arbitroa edo arbitroak izendatuko d(ir)ela ordezkaritza handiena duten sindikatuek eta, kasuan kasuko probintzian, eremu funtzionalean edo enpresan, enpresa batzordeko kideen edo delegatuen %10 edo gehiago duten sindikatuek aho batez hartutako erabakiaren bidez.
2018ko apirilaren 18an, UGT, CCOO, ELA eta LAB sindikatuek, Nafarroako Foru Komunitatearen esparruko Hauteskunde Sindikalen Segimendu eta Kontrolerako Batzordeko kideak diren aldetik eta hauteskunde arbitroak izendatzeko legitimaturik dauden aldetik, agiri bat bidali dute Lan Zerbitzura, non proposatu baitute, Javier Ciriza jaunak eta Ana Belén Alonso andreak aurkeztutako dimisioa ikusirik, lau arbitro berri izendatzea eta Carlos Vivanco jauna berrestea.
Adierazitakoarekin bat, eta Nafarroako Foru Komunitateko Administrazioari buruzko abenduaren 3ko 15/2004 Foru Legearen 22. artikuluak ematen dizkidan eskudantziak erabiliz,
EBATZI DUT:
1. Amaia Irigoien Roitegui andrea, Miguel Mingo de Miguel jauna, Jesús Aguinaga Tellería jauna eta María Cristina Lasterra Sánchez andrea hauteskunde arbitro izendatzea, Erregistro, Gordailu eta Publizitate Bulego Publikoan hauteskunde arloan aurkeztutako erreklamazio eta inpugnazioen ondorioz tramitatzen diren arbitraje prozeduretan esku har dezaten, salbu eta arbitraje prozedura bateko alderdiak beste arbitro bat izendatzeko ados jartzen direnean.
2. Era berean, Carlos Miguel Vivanco Peñas jauna hauteskunde arbitro izendatzeko erabakia berrestea.
3. Agintaldiari (bost urtekoa), abstentzioei, arbitroak errekusatzeari eta baliabideak emateari dagokienez, Langileen Estatutuaren 76. artikuluan eta Enpresan Langileen Ordezkaritza Organoetarako Hauteskundeen Erregelamendua onesten duen irailaren 9ko 1884/1994 Errege Dekretuaren 33., 34. eta 35. artikuluetan xedatuari jarraituko zaio.
4. Ebazpen hau interesdunei eta aipatutako sindikatuei jakinaraztea, eta adieraztea ebazpenak ez duela administrazio bidea amaitzen eta haren aurka gora jotzeko errekurtsoa jartzen ahal dela, Garapen Ekonomikorako kontseilariari zuzendua, jakinarazi eta biharamunetik hilabeteko epean.
5. Ebazpen hau Garapen Ekonomikorako Departamentuko Lan arloko Erregistro Publikoen Bulegoari jakinaraztea eta Nafarroako Aldizkari Ofizialean argitaratzea orok haren berri izan dezan.
Iruñean, 2018ko maiatzaren 7an.–Politika Ekonomiko eta Enpresarialaren eta Lanaren zuzendari nagusia, Izaskun Goñi Razquin.
Iragarkiaren kodea: F1806112
