1. NAFARROAKO FORU KOMUNITATEA
1.7. BESTELAKOAK
1162/2018 EBAZPENA, ekainaren 19koa, Nafarroako Unibertsitate Publikoko errektoreak emana, zeinaren bidez agintzen baita argitaratzeko “Erabakia, Nafarroako Unibertsitate Publikoaren Administrazio eta Zerbitzuetako Langileen sarbide sistema ezartzen duena”, Gobernu Kontseiluak 2018ko ekainaren 19an hartutako erabaki baten bidez onetsia.
2003ko maiatzaren 12ko 110/2003 Foru Dekretuak onetsitako Unibertsitateko Estatutuetako 40. artikuluak ematen dizkidan ahalmenak erabiliz, agintzen dut argitaratzeko Gobernu Kontseiluaren 2018ko ekainaren 19ko Erabakia, Nafarroako Unibertsitate Publikoaren Administrazio eta Zerbitzuetako Langileen sarbide sistema ezartzen duena.
“Erabakia, Nafarroako Unibertsitate Publikoaren Administrazio eta Zerbitzuetako Langileen sarbide sistema ezartzen duena.
1994ko abenduaren 21ean, Nafarroako Unibertsitate Publikoko Gobernu Batzordeak Unibertsitateko funtzio publikora sartzeko sistema orokorra ezartzen zuen erabakia onetsi zuen, hain zuzen, administrazio eta zerbitzuetako langile funtzionarioen zenbait eskalatako lanpostuak hornitzeko deialdia arautuko zuen sistema. Erabaki horrek lehiaketa-oposizioa finkatu zuen Unibertsitateko funtzio publikora sartzeko sistema orokor gisa.
2003ko maiatzaren 12ko 110/2003 Foru Dekretuak Nafarroako Unibertsitate Publikoaren Estatutuak onetsi zituenetik, Nafarroako Foru Erkidegoko funtzio publikoari buruzko legeek agintzen dute administrazio eta zerbitzuetako langile funtzionarioengan, Unibertsitatearen esparruan ezarriko diren berezitasunak galarazi gabe (106.1 artikulua). Lege horietako bat da Nafarroako Administrazio Publikoetan Sartzeko Araudia, zeina 1985eko ekainaren 5eko 113/1985 Foru Dekretuan, Nafarroako Administrazio Publikoetan Sartzeko Erregelamendua onetsi zuen dekretuan, zehazten baita.
113/1985 Foru Dekretuaren 18.1 artikuluak xedatzen du Nafarroako Administrazio Publikoetan sartzeko hautaprobak oposizio sistemaren bidez egingo direla, baldin eta bete beharreko funtzioen izaera dela medio ez bada egokiagoa lehiaketa-oposizio sistema erabiltzea.
Nafarroako Justizia Auzitegi Nagusiak eman zuen bere iritzia (2005eko irailaren 29ko eta 2013ko azaroaren 20ko epaiak) NUPen araudi hori aplikatzeari dagokionez, eta irizpide hau finkatu zuen: Unibertsitateak ezin du baztertu 113/1985 Foru Dekretuaren 18. artikuluak xedatzen duen horretatik, eta oposizio sistema ez da izango Unibertsitatean sartzeko lehentasunezko sistema. Behar zen garaian, Administrazioarekiko Auzien Aretoak esan zuen Estatutuetako 106.1 artikulua honela interpretatu behar dela: unibertsitate-autonomia ez da erabatekoa, eta NUPek funtzio publikora sartzeko arauak ezartzen dituenean beti errespetatu behar du aplikatu beharreko araudia, hau da, Nafarroako Administrazio Publikoen Zerbitzuko Langileen Estatutua (1993ko abuztuaren 30eko 251/1993 Foru Dekretu Legegilea) eta 113/1985 Foru Dekretua, zeinak ezartzen baitu lehiaketa-oposizio bidez sartzeko sistema salbuespenezkoa dela, eta Administrazioak azaldu edo arrazoitu egin behar duela sistema hori zergatik aukeratu duen.
Aintzat harturik Nafarroako Justizia Auzitegi Nagusiak epai horietan ebatzi zuela Nafarroako Unibertsitate Publikoak ezin duela 1994ko abenduaren 21eko erabakia bere estatutuen gainetik jarri, eta, are gutxiago, Nafarroako Administrazio Publikoen Zerbitzuko Langileen Estatutuaren gainetik, bidezkoa da, batetik, erabaki berri bat onestea, non lehentasunezkotzat ezarriko baita oposizio sistema Nafarroako Unibertsitate Publikoko funtzio publikoan sartzeko sistema gisa, eta, bestetik, 1994ko abenduaren 21eko erabakia indargabetzea.
Horiek horrela, kudeatzaileak proposatuta eta Nafarroako Unibertsitate Publikoan ordezkaritza duten sindikatuei entzun eta gero, honako hau da bere kideek aurretik eztabaidatu eta gero, Gobernu Kontseiluak, 2018ko ekainaren 19an egindako bileran, hartu duen
ERABAKIA
Lehenengoa.–Nafarroako Unibertsitate Publikoko funtzio publikoan sartzeko hautaprobak oposizio sistema bidez egingo dira, baldin eta bete beharreko funtzioen izaera dela medio ez bada egokiagoa lehiaketa-oposizio sistema erabiltzea; hala balitz, azaldu edo arrazoitu egin behar da lehiaketa-oposizio sistema zergatik aukeratu den.
Administrazio eta Zerbitzuetako Langileen Batzordearekin negoziatuko da aldez aurretik Unibertsitatearen erabakiz lehiaketa-oposizio sistema zer lanpostutarako erabiliko den eta kasu horietan zer baremo aplikatuko den.
Bigarrena.–Oposizioa da proba bat edo gehiago egitea, izangaien gaitasuna eta trebetasuna zehazteko eta horien lehentasun hurrenkera finkatzeko.
Hirugarrena.–Lehiaketa-oposizioak bi fase izango ditu, hurrenez hurren: lehiaketa fasea eta oposizio fasea. Lehiaketa fasean, izangaiek argudiatu dituzten merezimenduak kalifikatu baino ez da egingo, deialdian ezarritako baremoaren arabera, eta balioespenak ezingo du izan gehieneko puntuazio osoaren % 30 baino handiagoa; oposizio fasean, berriz, aurreko idatz-zatian ezarritakoak aginduko du.
Laugarrena.–1994ko abenduaren 21eko erabakia, Nafarroako Unibertsitate Publikoko Gobernu Batzordeak onetsia, eta hura garatzen duen 1996ko apirilaren 2ko erabakia indargabetzea. Lehenak Unibertsitateko funtzio publikora sartzeko sistema orokorra ezartzen du, eta Administrazio eta Zerbitzuetako Langileen zenbait eskalatako funtzionario lanpostuak hornitzeko deialdia arautzen du.
Bosgarrena.–Gobernu Kontseiluak onetsi, eta biharamunean hartuko du indarra erabaki honek.
Seigarrena.–Erabaki hau kudeatzaileari eta Giza Baliabideen Zerbitzuari helaraztea.
Zazpigarrena.–Erabaki hau eta bere eranskina Nafarroako Unibertsitate Publikoaren webgunean eta Nafarroako Aldizkari Ofizialean argitaratzea.
Zortzigarrena.–Ebazpen honen aurka, zilegi da berraztertzeko errekurtsoa jartzea Nafarroako Administrazioarekiko Auzietako Epaitegietan, bi hilabeteko epean, Nafarroako Aldizkari Ofizialean argitaratzen den egunaren biharamunetik kontatzen hasita, Administrazioarekiko Auzi Eskumenari buruzko 1998ko uztailaren 13ko 29/1998 Legearen xedapenetan ezarritakoarekin bat.”
Iruñean, 2018ko ekainaren 19an.–Errektorea, Alfonso Carlosena.
Iragarkiaren kodea: F1808108
