112. ALDIZKARIA - 2018ko ekainaren 12a

1. NAFARROAKO FORU KOMUNITATEA

1.7. BESTELAKOAK

1049/2018 EBAZPENA, 2018ko maiatzaren 30ekoa, Nafarroako Unibertsitate Publikoko errektoreak emana, zeinaren bidez agintzen baita argitaratzeko “Erabakia, Nafarroako Unibertsitate Publikoko ikertzaileen eta prestakuntzan dauden ikertzaileen arteko irakaskuntza-lankidetza arautzen duen prozedura onesten duena”, Gobernu Kontseiluak 2018ko maiatzaren 30ean hartu zuen erabakiaren bidez onetsia.

2003ko maiatzaren 12ko 110/2003 Foru Dekretuak onetsitako Unibertsitateko Estatutuetako 40. artikuluak ematen dizkidan ahalmenak erabiliz, agintzen dut argitaratzeko 2018ko maiatzaren 30eko Gobernu Kontseiluak hartutako erabakia, Nafarroako Unibertsitate Publikoko ikertzaileen eta prestakuntzan dauden ikertzaileen arteko irakaskuntza-lankidetza arautzen duen prozedura onesten duena.

ERABAKIA, NAFARROAKO UNIBERTSITATE PUBLIKOKO IKERTZAILEEN LANKIDETZA ARAUTZEN DUEN PROZEDURA ONESTEN DUENA

Erabaki honen bidez, ikertzaileak irakaskuntza lankidetzan aritzeko baldintzak xedatzen dituen prozedura ezartzeko beharrari erantzun nahi zaio, 36/2009 Errege Dekretuan eta Nafarroako Unibertsitate Publikoko Ikertzaileak Kontratatzeko Arautegian, Gobernu Kontseiluaren 2017ko maiatzaren 3ko erabaki baten bidez onetsitakoan, ezarritakoarekin bat etorriz.

Prozedura hori finkatzea lagungarria izango da ikertzaileak irakaslanean has daitezen eta irakaskuntzaren eduki eta metodologietan presta daitezen, betiere Nafarroako Unibertsitate Publikoan ematen den irakaskuntzaren kalitatea bermatuz. Horren bidez lortu nahi da ikertzaileek ikerketa eta irakaskuntza arloko unibertsitateko prestakuntza osoa eskuratzea.

Horregatik guztiagatik, honako hau da Gobernu Kontseiluak, Ekonomia, Plangintza eta Irakasleen gaietarako errektoreordeak proposaturik, bere kideek aldez aurretik eztabaidatu eta gero, 2018ko maiatzaren 30ean egindako bileran, hartu duen

ERABAKIA:

Lehena.–Nafarroako Unibertsitate Publikoko Ikertzaileen Lankidetza arautzen duen Prozedura onestea. Erabaki honen eranskinean dago prozedura hori.

Bigarrena.–Ebazpen honen aurka, zilegi da berraztertzeko errekurtsoa jartzea Nafarroako Administrazioarekiko Auzietako Epaitegietan, bi hilabeteko epean, Nafarroako Aldizkari Ofizialean argitaratzen den egunaren biharamunetik kontatzen hasita, Administrazioarekiko Auzi Eskumenari buruzko 1998ko uztailaren 13ko 29/1998 Legearen xedapenetan ezarritakoarekin bat.

Iruñean, 2018ko maiatzaren 30ean.–Errektorea, Alfonso Carlosena.

NAFARROAKO UNIBERTSITATE PUBLIKOKO IKERTZAILEEN IRAKASKUNTZA LANKIDETZA ARAUTZEN DUEN PROZEDURA

Bai 2009ko apirilaren 20ko 36/2009 Foru Dekretuak, Nafarroako Unibertsitate Publikoko kontratupeko irakasle eta ikertzaileen araubidea arautzen duenak, bai Nafarroako Unibertsitate Publikoko ikertzaileak kontratatzeko arautegiak, Gobernu Kontseiluak 2017ko maiatzaren 3an onetsitakoak, ezartzen dute ikertzaileek irakaslanean laguntzeko aukera, gehieneko arduraldi batzuen barruan, orotariko araudiak ezarritakoarekin bat etorriz.

Hori dela-eta komenigarritzat hartzen da prozedura bat ezartzea irakaskuntza-jarduera horiek langile horiei esleitzeko ikasketa ofizialetan, ezarritako mugen barruan. Prozedura honen bidez, ikertzaileak irakaslanean jardutea sustatu nahi da, irakaskuntzaren eduki eta metodologietan presta daitezen, beti ere Nafarroako Unibertsitate Publikoan ematen den irakaskuntzaren kalitatea bermatuz. Horren bidez lortu nahi da ikertzaileek ikerketa eta irakaskuntza arloko unibertsitateko prestakuntza osoa eskuratzea.

1. artikulua. Xedea

Erabaki honen xedea da ikertzaileen irakaskuntza lankidetza garatzeko baldintzak zehazten dituen prozedura ezartzea, 36/2009 Errege Dekretuan eta Nafarroako Unibertsitate Publikoko ikertzaileak kontratatzeko arautegian, Gobernu Kontseiluaren 2017ko maiatzaren 3ko erabakiaren bidez onetsitakoan, ezarritakoarekin bat etorriz.

Irakaskuntza lankidetza ez da nahastuko pertsona interesdunak kontratuaren bidez egin behar duen ikerketa-jarduerarekin, eta ez du kontratuen ikerketa eta, hala badagokio, prestakuntza xedea indargabetuko.

2. artikulua. Aplikatzeko eremua

1. Prozedura hau Nafarroako Unibertsitate Publikoko kontratupeko ikertzaile guztiei aplikatuko zaie.

2. Irakaskuntza lankidetza administrazio-baimen akademiko bat da, Nafarroako Unibertsitate Publikoak kontratatutako langileek beharrezkoa dutena irakaslanean lankidetzan jarduteko gradu, master eta doktoretzako titulazioetan.

3. Irakaskuntza emango da Unibertsitateko Irakaskidegoetako kide baten edo kontratupeko irakasle doktore finko edo behin-behineko baten tutoretza eta ardurapean.

4. Kontratupeko ikertzaileak aukera izango du irakaskuntza lankidetza eskatzeko, eta gehieneko lankidetza orduen kopurua haren kontratuan edo, subsidiarioki, araudi aplikagarrian ezarritakoa izango da.

5. Lankidetza graduko irakasgaietan egingo da. Horrez gainera, doktore titulazioa edukitzea baldintza gisa ezartzen duten kontratuak dituzten ikertzaileek aukera izango dute master eta doktoretzan irakaskuntza emateko.

6. Irakaskuntza lankidetza borondatezkoa izango da, kontratatzeko deialdian nahitaezkotzat jotzen den kasuetan izan ezik.

7. Irakaskuntza lankidetza duten ikertzaileak ez dira irakasgaien edo gaien arduradun koordinatzaile izango. Kalifikazio epaimahaietako kide ere ez dira izango, eta ez dituzte aktak sinatuko.

Irakaskuntza lankidetza hori irakasgai baten irakaskuntza mandatuaren % 50ekoa izango da gehienez ere, eta kontratuan edo, subsidiarioki, araudi aplikagarrian ezarritako gehieneko ordu kopurua errespetatu beharko du.

8. Irakaskuntza lankidetza duten ikertzaileek egindako irakaskuntza-jarduera IAPen modu nominalean eta banaka egotziko zaio egiten duen pertsonari.

Langile horien irakaskuntza gaitasuna IAPen jasoko da, baina ez sailari edo arloari buruzko datuak ateratzeko.

9. Irakaskuntza jardueretan parte-hartzeak ez du ordainsari gehigarririk jasotzeko edo lanaldia aldatzeko eskubiderik emango.

3. artikulua. Prozedura.

1. Ikertzaileek aukera izango dute irakaskuntza lankidetza eskatzeko berariaz onetsitako dokumentua aurkeztuz, eta dokumentu horrek hauen sinadura izan behar du: eskaera egin duen ikertzailearena, irakaskuntza lankidetzaren irakasle arduradunarena, laguntzaren arduradunarena eta irakaskuntza emango den saileko arduradunarena.

Saileko Kontseiluak eskaera baietsi edo ezetsiko du, eta ezesten badu, erantzuna arrazoitu beharko du. Behin onetsi ondoren, dagokion Administrazio Laguntza Emateko Unitateak inprimaki sinatua igorriko dio irakasleen gaietan eskumena duen errektoreordetzari, eta honek dagokion irakaskuntza lankidetza baimenduko du edo ez, eta, beharrezkoa bada, dagokion ziurtagiria egingo du. Ezezkoa ematen bada, ezezkoa emateko erabakia behar bezala arrazoituta jakinaraziko da.

2. Zilegi izango da irakaskuntza lankidetzak seihileko edo ikasturte baterako ematea, eta aldi bererako luzatzeko aukera egongo da, beti ere kontratuaren iraupena baino luzeagoa ez bada.

Lankidetzak berritzeko eskaerak egiteko, 1. puntuan aipatutako irakasle arduradunak inprimaki arautu indarduna aurkeztuko du, eskatzaileak, laguntzaren edo kontratuaren irakasle arduradunak eta irakaskuntza lankidetzaren irakasle arduradunak sinatuta.

Berritzeko eskaerak ez ditu Saileko Kontseiluak onetsi behar, baina haien berri eman behar zaio Sailari. Dagokion Saileko Kontseiluaren zuzendariak baimendu ondoren, administrazio-zerbitzuek irakasleen gaietan eskumena duen errektoreordetzari jakinaraziko diote.

3. Irakaskuntza lankidetza amaituko da ikertzailea lotzen duen kontratua amaitzen denean.

Kontratua ikasturte baten seihilekoaren amaiera baino lehenago amaitzen bada, irakaskuntza lankidetza berritzeko baimena ematea zilegi izango da bakarrik kontratua amaitzeko geratzen den denbora tartea seihilekoaren erdia baino handiagoa bada.

4. Irakasleen gaietan eskumena duen errektoreordetzak, dagokion sailak aldez aurretik txostena eginda, aukera izango du irakaskuntza lankidetza bertan behera uzteko, eta irakaskuntza behar bezala garatuko dela bermatuko du.

Lehen azken xedapena.–Gaikuntza.

Irakasleen gaietan eskumena duen errektoreordea gaitzen da prozedura hau garatzeko eta aplikatzeko behar diren ebazpenak eman ditzan.

Bigarren azken xedapena.–Indarra hartzea.

Gobernu Kontseiluak onetsi, eta biharamunean hartuko du indarra prozedura honek.

ANEXO

Irakaslanean laguntzeko eskaera ikertzaileentzat (PDF).

Iragarkiaren kodea: F1807288