1. NAFARROAKO FORU KOMUNITATEA
1.7. BESTELAKOAK
ERABAKIA, Nafarroako Gobernuak 2017ko apirilaren 5ean hartua, Nafarroako Administrazio Publikoen montepioetako klase pasiboen pentsioak eguneratzen dituena 2017. urterako.
2017rako Nafarroako Aurrekontu Orokorrei buruzko abenduaren 28ko 24/2016 Foru Legearen 10. artikuluak ezartzen du 2017ko urtarrilaren 1etik aurrerako ondorioekin, Nafarroako administrazio publikoen montepioetako funtzionarioen klase pasiboen pentsioek, indarreko araudiaren arabera eguneratzeko eskubidea dutenek, pentsio publikoek urte horretan duten igoera bera izanen dutela. Igoera horretatik kanpo gelditzen dira alargun-pentsioak eta umezurtz-pentsioak, horien gaineko araudiak zehazten baitu lanbide arteko gutxieneko soldataren arabera eguneratuko direla.
Orobat, Nafarroako 2017rako Aurrekontu Orokorrei buruzko abenduaren 28ko 24/2016 Foru Legearen 11.3.a) artikuluan zehazten denez, eskubide pasiboetan eragina duten ordainsari kontzeptuen zenbatekoak 2017. urteari dagozkionak izanen dira, hau da, 1983. urtekoei geroko aurrekontuei buruzko foru legeek finkatutako igoerak aplikatu ondoren sortzen direnak.
Bestalde, Nafarroako Administrazio Publikoen montepioetako funtzionarioen eskubide pasiboen araubide iragankorrari buruzko martxoaren 5eko 10/2003 Foru Legearen 25.2 artikuluak ezartzen du pentsioen zenbatekoa urtero eguneratuko dela, Nafarroako Aurrekontu Orokorrei buruzko Foru Lege bakoitzean kasuan kasuko ekitaldi ekonomikorako ezartzen duen ehunekoaren arabera.
2017. urterako, pentsio publikoen igoera %0,25ekoa izanen da, abenduaren 30eko 746/2016 Errege Dekretuaren artikulu bakarraren arabera. Hain zuzen ere, 2017ko ekitaldian klase pasiboen pentsioen errebalorizazio eta osagarriei eta Gizarte Segurantzaren sistemako pentsioen eta beste gizarte-prestazio publiko batzuen errebalorizazioari buruzko errege dekretua da. Igoera horretatik kanpo daude gutxieneko alargun-pentsioak eta, kasu batzuetan, umezurtz-pentsioak, haien zenbatekoa lanbide arteko gutxieneko soldatarekin (LGSarekin) lotzen baitu foru araudi indardunak.
2017ko LGSren zenbatekoa (abenduaren 30eko 742/2016 Errege Dekretuan finkatua) ezin zaie aplikatu, autonomia erkidegoen eta toki administrazioko entitateen mailan, lanbide arteko gutxieneko soldata zenbait prestazioren zenbatekoa finkatzeko adierazle edo erreferentzia gisa ezartzen duten arauei (aipatu errege dekretuak indarra hartzen zuen egunean indarrean zeuden arauei), errege dekretu horrek ezarritako igoera berezia baita, salbu autonomia erkidegoek edo toki administrazioko entitateek kontrakoa ezartzen duen berariazko xedapena ematen badute. Hala ere, Nafarroako Gobernuak, abenduaren 30eko 742/2016 Errege Dekretuaren bigarren xedapen iragankorrean adierazitakoa kontuan hartuta, erabaki du 2017ko LGSa aplikatzea aipatu pentsioei.
Hortaz, bidezkoa da pentsioak eguneratzeko indizea eta gutxieneko erretiro-pentsioen, alargun-pentsioen eta umezurtz-pentsioen zenbatekoak zehaztea 2017. urterako, bai eta eskubide pasiboetan eragina duten ordainsari kontzeptuen zenbatekoak ere, behin aplikatu ondoren Nafarroako 2017rako Aurrekontu Orokorrei buruzko abenduaren 28ko 24/2016 Foru Legeak 2017. urtean sortzen diren erretiro eta pentsioetarako finkatzen duen igoera, martxoaren 5eko 10/2003 Foru Legearen aurreko sistemaren babesean dauden funtzionarioen eskubide pasiboen araubidean. Izan ere, martxoaren 5eko 10/2003 Foru Lege horren bidez, eskubide pasiboen araubide iragankor bat ezarri zen Nafarroako Administrazio Publikoen montepioetako funtzionarioentzat.
Horrenbestez, Nafarroako Gobernuak, Lehendakaritzako, Funtzio Publikoko, Barneko eta Justiziako kontseilariak proposatuta,
ERABAKI DU:
1. 2017ko urtarrilaren 1etik aurrerako ondorioekin, Nafarroako Administrazio Publikoen montepioetako langileen klase pasiboen pentsioek, eguneratzeko eskubidea dutenek, %0,25eko igoera izanen dute.
2. Eguneratze hori ez zaie aplikatuko jadanik aitortuak dauden edo etorkizunean aitortuko diren pentsioei, baldin eta berek bakarrik nahiz onuradun berak jasotzen dituen beste pentsio publiko batzuekin batera, pentsio publikoetarako urtean ezarritako gehieneko zenbatekoa gainditzen badute, hau da, 36.031,80 euro 2017. urtean.
3. Nafarroako Administrazio Publikoetako montepioen gutxieneko erretiro-pentsioa, indarreko araudiaren arabera gaurkotzeko eskubidea duena, 14.616,00 eurokoa izanen da 2017. urtean, urte osoko kopurua harturik.
4. Lanbide arteko gutxieneko soldataren zenbateko berria alargun-pentsioei eta, kasu batzuetan, umezurtz-pentsioei aplikatzea.
Beraz, gutxieneko alargun-pentsioak eta umezurtz-pentsioak 9.907,80 eurokoak izanen dira 2017. urtean, urte osoko kopurua harturik, 2017. urterako Nafarroako Aurrekontu Orokorrei buruzko abenduaren 28ko 24/2016 Foru Legearen 11.7 artikuluko bigarren lerroaldean umezurtz-pentsioei buruz ezarritako salbuespenarekin.
Aurreko lerroaldean xedatutakoa martxoaren 5eko 10/2003 Foru Legean ezarrita dagoen eskubide pasiboen sistemako umezurtz-pentsioei ere aplikatuko zaie, onuradunak aitarik ez amarik ez duten umezurtzak badira.
5. Martxoaren 5eko 10/2003 Foru Legearen babesetik aparte Nafarroako Foru Diputazioko Erretiro eta Pentsio Kutxan eta Nafarroako Udal Funtzionarioen Montepioetan sartuta dauden funtzionarioei dagokienez, haien eskubide pasiboetan eragina duten ordainsari kontzeptuen zenbatekoak honako hauek izanen dira 2017. urterako:
MAILA | SOLDATA | BIZITZA GAR. PLUSA |
1 | 13.064,16 | 9.648,11 |
2 | 10.747,20 | 9.153,23 |
3 | 9.567,35 | 8.901,59 |
4 | 9.093,42 | 8.800,74 |
5 | 8.693,79 | 8.715,61 |
6 | 8.325,61 | 8.636,79 |
7 | 7.976,66 | 8.760,20 |
8 | 7.733,43 | 9.033,26 |
9 | 7.381,33 | 8.957,98 |
10 | 7.174,02 | 8.749,73 |
11 | 6.987,40 | 8.640,58 |
12 | 6.586,58 | 8.403,92 |
13 | 6.313,27 | 8.269,95 |
14 | 5.814,62 | 8.015,51 |
15 | 5.355,45 | 7.648,54 |
16 | 5.075,43 | 7.483,64 |
17 | 4.612,61 | 7.319,07 |
6. 1981eko azaroaren 16ko Erabakian ezarritako araubide juridikoari loturiko osasun arloko udal langileen eskubide pasiboak kalkulatzeko kontuan izan behar diren ordainsari kontzeptuak ondoko hauek dira 2017. urterako, ezertan galarazi gabe Nafarroako Osasun Eskualdeei buruzko azaroaren 13ko 22/1985 Foru Legearen laugarren xedapen iragankorrean dauden kasuetarako aplikagarri gerta daitezkeen gainerako kontzeptuak:
a) Medikuak, farmazialariak eta albaitariak:
SOLDATA | FAKULTATIBOAREN LANPOSTUA |
8.162,70 | 5.334,50 |
b) Osasun laguntzaile teknikoak:
SOLDATA | FAKULTATIBOAREN LANPOSTUA |
4.717,73 | 4.267,94 |
7. Erabaki honek 2017ko urtarrilaren 1etik aurrera izanen ditu ondorio ekonomikoak, eta Nafarroako Aldizkari Ofizialean argitaratuko da, orok jakin dezan.
8. Erabaki hau igortzea Funtzio Publikoko Zuzendaritza Nagusiko Gizarte Prestazioen Zerbitzura igortzea, behar diren ondorioak izan ditzan.
Iruñean, 2017ko apirilaren 5ean.–Nafarroako Gobernuko kontseilari idazkaria, María José Beaumont Aristu.
Iragarkiaren kodea: F1704330
