Iragarkia
67. ALDIZKARIA - 2017ko apirilaren 5a
1. NAFARROAKO FORU KOMUNITATEA
1.4. DIRU-LAGUNTZAK, LAGUNTZAK ETA BEKAK
399/2017 EBAZPENA, martxoaren 23koa, Landa Garapeneko, Nekazaritzako eta Abeltzaintzako zuzendari nagusiak emana, eskoletan fruta jateko planaren bigarren aldian (2016-2017 ikasturteko zortzi astetan) Nafarroako Foru Komunitateko ikastetxeetan frutak eta barazkiak banatzeko diru-laguntzen oinarri arautzaileak eta deialdia onesten dituena.
Nekazaritzako produktuen merkatuen antolamendu bateratua sortu eta 922/72 (EE), 234/79 (EE), 1037/2001 (EB) eta 1234/2007 (EB) erregelamenduak indarrik gabe uzten dituen Europako Parlamentuaren eta Kontseiluaren abenduaren 17ko 1308/2013 (EB) Erregelamenduaren 23. artikuluak fruta eskoletan jateko plan bat ezartzen du.
Batzordearen 2016/247 (EB) Erregelamendu Delegatuak Europako Parlamentuaren eta Kontseiluaren 1308/2013 (EB) Erregelamendua osatzen du Europar Batasuneko laguntzari dagokionez fruta eta barazkien sektoreetako produktuak, fruta eta barazki eraldatuak eta platanoa banatzeko, eskoletan frutak eta barazkiak jateko programaren barrenean; 2016/247 (EB) Erregelamendu Delegatu horren 2.3 artikuluak ezartzen du programan parte hartu nahi duten Europar Batasuneko estatuek beren estrategiaren berri eman beharko diotela Batzordeari.
Batzordearen 2015eko abenduaren 17ko 2016/248 (EB) Erregelamendu Betearazlearen 2.1 artikuluak Europako Parlamentuaren eta Kontseiluaren 1308/2013 (EB) Erregelamendua garatzeko arauak ezartzen ditu Europar Batasuneko laguntzari dagokionez fruta eta barazkien sektoreetako produktuak, fruta eta barazki eraldatuak eta platanoa banatzeko, eskoletan frutak eta barazkiak jateko programaren barrenean; bestetik, laguntzaren esleipena finkatzen du, eta Europar Batasuneko estatuen estrategian gutxienez ere egon behar duten elementuak zehazten ditu.
Nekazaritza eta Arrantza, Elikadura eta Ingurumena Ministerioak (MAPAMA) estrategia nazional bat prestatu du eta Batzordeari jakinarazi dio. Plana aplikatzeko maila administratibo egokiena autonomia erkidegoena da, izan ere nekazaritzako, osasuneko eta hezkuntzako eskumenak autonomia erkidegoei transferituta daude eta, beraz, Nafarroako Foru Komunitateari dagokio eskoletan fruta jateko plana 2016-2017 ikasturtean aplikatzea. Hala ere, nazioko agintaritza eskudunak koordinaziorako esparru bateratu eta adostua ezarriko du.
Osasun Departamentuak eta Hezkuntza Departamentuak parte hartu dute Nafarroako Foru Komunitateko eskoletan frutak eta barazkiak banatzeko plana prestatzeko lanean, eta bai eskolak bai planean parte hartuko duten haurren adina hautatu dituzte. Eskoletan fruta jateko plana aplikatzearen kostua Europar Batasunak (%75) eta Nafarroako Foru Komunitateak (%25) kofinantzatuko dute.
Landa Garapeneko, Ingurumeneko eta Toki Administrazioko Departamentuak 35.010,00 euroko aurrekontua aurreikusi du eskoletan fruta banatzeko planaren bigarren aldirako 2016-2017 ikasturtean.
Ebazpen honi Diru-laguntzei buruzko azaroaren 9ko 11/2005 Foru Legea aplikatuko zaio.
Horrenbestez, Nafarroako Foru Komunitateko Administrazioari buruzko abenduaren 3ko 15/2004 Foru Legearen 22. artikuluak eta Landa Garapeneko, Ingurumeneko eta Toki Administrazioko Departamentuaren egitura organikoa ezartzen duen irailaren 21eko 78/2016 Foru Dekretuak ematen dizkidaten eskumenak erabiliz,
EBATZI DUT:
1. Eskoletan fruta jateko planaren bigarren aldian (2016-2017 ikasturteko zortzi astetan) Nafarroako Foru Komunitateko ikastetxeetan frutak eta barazkiak banatzeko diru-laguntzen oinarri arautzaileak eta deialdia onestea.
2. Deialdiaren oinarri arautzaileak, ebazpen honen I. eranskinean dauden moduan, onestea, bai eta II. eranskinetik V.era bitarte ere, deialdiaren parte baitira.
3. Deialdi honetarako gastua baimentzea, hau da, 35.010,00 euro, 2017ko gastuen aurrekontuko “Eskola-umeei fruta emateko programa” izeneko 710001-71230-4700-414209 partidaren kargura.
4. Oinarri arautzaileak eta deialdia Diru-laguntzen Datu Base Nazionalean (BDNS) erregistratzea.
5. Ebazpen hau eta eranskinak Nafarroako Aldizkari Ofizialean argitaratzea.
6. Ebazpen honen aurka gora jotzeko errekurtsoa jar daiteke, Nafarroako Gobernuko Landa Garapeneko, Ingurumeneko eta Toki Administrazioko kontseilariari zuzendua, argitaratu eta biharamunetik hasi eta hilabeteko epean.
Iruñean, 2017ko martxoaren 23an.–Landa Garapeneko, Nekazaritzako eta Abeltzaintzako zuzendari nagusia, Ignacio Gil Jordán.
ESKOLETAN FRUTA JATEKO PLANAREN BIGARREN ALDIAN (2016-2017 IKASTURTEKO ZORTZI ASTETAN) NAFARROAKO FORU KOMUNITATEKO ESKOLETAN FRUTA BANATZEARI DIRU-LAGUNTZAK EMATEKO DEIALDIAREN
OINARRI ARAUTZAILEAK
Lehena.–Xedea eta aplikazio eremua.
Ebazpen honen xedea da ezartzea eskoletan fruta jateko planaren oinarri arautzaileak eta onestea eskoletan fruta jateko planaren bigarren aldirako (2016-2017 ikasturteko zortzi astetan) Nafarroako Foru Komunitateko ikastetxeetan frutak banatzeko laguntzen deialdia.
Eskoletan fruta jateko plana aplikatzearen kostua Europar Batasunak (%75) eta Nafarroako Foru Komunitateak (%25) kofinantzatuko dute. Landa Garapeneko, Ingurumeneko eta Toki Administrazioko Departamentuak 35.010,00 euroko aurrekontua aurreikusi du 2016-2017 ikasturtean eskoletan fruta banatzeko planaren bigarren aldirako.
Bigarrena.–Diruz laguntzen ahal diren jarduerak eta gastuak.
1. Eskoletan fruta banatzeko bete behar diren baldintzak honako hauek dira:
a) Produktuak astean behin banatuko dira, ikasleek, guztira, 24 anoa fruta, barazki eta/edo zuku har dezaten 8 irakas-astetan, baldintza hauetan:
–Anoen %20 gutxienez ere produktu ekologikoak izanen dira.
–Astean hiru ano banatuko dira, fruta, barazki eta/edo zuku har dezaten.
–Asteko anoetako gutxienez ere bi zatitu gabeko aleak izanen dira.
–Ale bakoitza 150 bat gramokoa izanen da. Anoetan produktu bat baino gehiago izanez gero, hornitzaileak banakako anoen identifikazioa emanen du. Produktua azal eta guzti jan badaiteke, garbituta eta azal eta guzti jateko beharrezkoak diren baldintza higieniko-sanitarioak betez aurkeztuko da.
–Fruta zukuak izanez gero, anoa 150 mililitro edo gramo ingurukoa izanen da. Fruta zukutzat jotzen dira urriaren 11ko 781/2013 Errege Dekretuan ezarritako definizio eta ezaugarriekin bat heldu direnak. Dekretu horren bidez, fruta-zukuak eta gizakien elikadurarako beste antzeko produktu batzuk egiteari buruzko arauak eta haien osaerari, etiketatzeari, aurkezteari eta publizitateari buruzko arauak ezarri ziren. Zukuak ez du azukre erantsirik, koipe erantsirik, gatz erantsirik edo edulkoratzaile erantsirik izanen.
b) Banatzen diren produktuak kalitate handikoak izanen dira beti, eta jateko behar bezain onduak egon beharko dute. Produktuak ez dira inoiz ere lurzoruaren gainean bilduta edukiko.
c) Hornitzaile baimenduek ikasturteko 8 irakas-astetan banatuko dituzte produktuak, 2017ko apiril eta ekain artean, ikastetxearekin adostutako moduan. Beharrezkoa bada, eskoletan fruta eta barazkiak jateko planaren segimendu batzorde mistoak aldatzen ahalko ditu banaketaren asteak.
d) Produktua banatzen den unean berean jan behar bada, banaketa ez da bazkariaren unean eginen.
e) Ikastetxeko koordinatzaileak atzera bota ditzake produktuak kalitate urrikoak direnean, eta horren berri Landa Garapeneko, Ingurumeneko eta Toki Administrazioko Departamentuari emanen dio. Hornitzaileak eskatzen zaion baldintza hori ez betetzeagatik ez den beste arrazoi batengatik produktuak atzera botatzen badira, banatutzat joko dira entregatu diren kopuruak kontatzeko orduan.
f) Horniketa Haur Hezkuntzako 2. zikloko (3-6 urte) 11.582 ikaslerentzat eginen da, Hezkuntza Departamentuak planean parte hartzeko hautatutako 139 eskoletakoak, bai eta Lehen Hezkuntzako 1. zikloko (6-9 urte) 1.101 ikasle ingururentzat ere, Nafarroako batez bestekotik gorako obesitate tasa duten eskualdeetako ikastetxetakoak. Eskola unitarioetan eta hezkuntza bereziko ikastetxeetan, bestelako adin tarteak ezar daitezke. Informazio hori guztia II. eranskinean zehazten da.
g) Planari atxikitako ikastetxeetako ikasleek bakarrik kontsumituko dituzte produktuak eskola eremuan, eta ezin izanen dira erabili eskolako bazkariak prestatzeko.
h) Planari buruzko informazio publikoa Landa Garapeneko, Ingurumeneko eta Toki Administrazioko Departamentuari, Osasun Departamentuari eta Hezkuntza Departamentuari dagokie, ez beste inori, segimendu batzorde mistoaren bidez.
2. Hauek dira diruz laguntzen ahal diren kostuak, balio erantsiaren gaineko zerga kontuan hartu gabe:
a) Nafarroako Foru Komunitateko eskoletan, fruta jateko planaren barrenean, haurrei banatzen zaizkien fruta eta barazkien, eta barazki eraldatuen eta platano produktuen kostuak, ekipamenduen erosketa, alokairu edo errentamendu finantzarioaren kostuak barne, Nafarroako Foru Komunitateko eskoletan fruta jateko planean aurreikusita badaude.
b) Horri lotutako hurrengo kostuak, hots, Nafarroako Foru Komunitateko eskoletan fruta jateko planaren aplikazioarekin lotura zuzena dutenak; honako hauek, alegia:
–Jarraipen eta ebaluazio kostuak, Nafarroako Foru Komunitateko eskoletan fruta jateko planarekin lotura zuzena dutena.
–Programaren publizitate kostuak, jendeari informazioa ematea zuzeneko helburua dutenak; honako hauek sartzen dira:
- 2016/247 (EB) Erregelamendu Delegatuaren 10. artikukuan aipatzen den kartelaren kostua.
- Hedabideekin, komunikazio elektronikoekin, kazeten bidez eta antzeko komunikabideekin egindako informazio kanpainen kostuak.
- Jendeari programari buruzko informazioa emateko diren informazio saioen, hitzaldien, mintegien eta lantegien kostua, bai eta antzeko ekitaldiena ere.
- Informazio eta sustapeneko materialaren kostua, hala nola gutunak, eskuorriak, liburuxkak, publizitateko gauak eta antzekoak.
–2016/247 (EB) Erregelamendu Delegatuaren 2. artikuluko 2. atalean aipatzen diren lagun egiteko neurrien kostuak.
3. Eskoletan fruta jateko planaren produktuak garraiatzeko kostuak eta banatzeko kostuak bereizita fakturatzen badira, kostu horiek produktuen kostuen %3koak izanen dira, gehienez ere.
4. Publizitate kostuak eta lagun egiteko neurrienak ezin izanen dira finantzatu Europar Batasuneko beste laguntza programa batzuen bidez.
5. Balio erantsiaren gaineko zergak (BEZa) eta langileen gastuek ezin izanen dute Europar Batasunaren laguntzarik jaso, azken horiek Europar Batasuneko estatuaren funtsen kargura finantzatzen badira.
6. Diru-laguntza jaso dezaketen publizitate kostuen guztirakoa ezin izanen da Europar Batasunak Nafarroako Foru Komunitateari urtean egindako behin betiko esleipenaren %5 baino handiagoa izan.
7. Ekipamenduen erosketa, alokairu edo errentamendu finantzarioaren kostuak eta jarraipen eta ebaluazio kostuak Europar Batasunak Nafarroako Foru Komunitateari emandako laguntzaren %10ekoa izanen dira, gehienez ere.
8. Lagun egiteko neurrien guztirakoa ezin izanen da Europar Batasunak Nafarroako Foru Komunitateari egindako behin betiko esleipenaren %15 baino handiagoa izan.
Hirugarrena.–Eskoletan fruta eta barazkiak jateko planaren segimendu batzorde mistoa.
1. Eskoletan fruta eta barazkiak jateko planaren segimendu batzorde mistoa eratzen da. Batzordeburua Nekazaritza Zerbitzuko zuzendaria izanen da, edo hark eskuordetzen duena, eta batzordekideak ordezkari hauek:
a) Landa Garapeneko, Ingurumeneko eta Toki Administrazioko Departamentuaren aldetik, Merkatuen Erregulaziorako Ataleko burua eta Merkatuen Erregulazioaren eta Berariazko Laguntzen Bulegoko burua (idazkari lanetan arituko dena).
b) Hezkuntza Departamentuaren aldetik, Prestakuntza Ataleko burua eta Prestakuntza Programen Bulegoko burua.
c) Osasun Departamentuko Nafarroako Osasun Publikoaren eta Lan Osasunaren Institutuaren aldetik, Osasun Sustapenaren Ataleko burua eta atal horretako teknikari bat.
Edonola ere, batzordeak berariazko gaiei buruzko adituei parte har dezaten eskatzen ahalko die.
2. Batzordeak eskoletan fruta eta barazkiak jateko plana behar bezala gara dadin zaintzea izanen du helburu. Horretarako, eginkizun hauek izanen ditu, besteak beste:
a) Planaren jarraibide orokorrak ezartzea.
b) Planaren estrategiari lotutako datuak prestatu eta berrikustea, Nekazaritza eta Arrantza, Elikadura eta Ingurumena Ministeriora (MAPAMA) bidaltzeko.
c) Jardueren jarraipena egitea eta, hala badagokio, araudiak eskatzen dituen txostenak eta ebaluazioak egitea.
d) Egokitzapenen edo aldaketa edo gorabeheren berri ematea.
e) Planeko hornitzaile baimendua izateko eskaerak ebaluatzea.
f) Planari buruzko informazio publikoa proposatzea.
Laugarrena.–Onuradunak eta betebeharrak.
1. Eskoletan fruta jateko planaren bigarren aldian (2016-2017 ikasturteko zortzi astetan) Nafarroako Foru Komunitateko ikastetxeetan frutak eta barazkiak banatzeko baimenduta dauden hornitzaileak diru-laguntza hauen onuradun izanen dira.
2. Onuraduna izateko, entitateak Diru-laguntzei buruzko azaroaren 9ko 11/2005 Foru Legearen 13. artikuluan ezartzen diren baldintzak bete beharko ditu, ebazpen honen III. eranskinean biltzen den moduan.
Bosgarrena.–Hornitzaile gisa baimentzeko prozedura eta eskabidearekin batera aurkeztu behar diren agiriak.
1. Laguntza hauek hornitzaile baimendu gisa eskuratzeko interesa dutenek eskaera aurkeztu beharko diote Landa Garapeneko, Ingurumeneko eta Toki Administrazioko Departamentuari; baliabide telematikoak erabiliz egin beharko da Erregistro Orokor Elektronikoan Nafarroako Gobernuaren Interneteko Atariaren bitartez, Administrazio Publikoen Administrazio Prozedura Erkideari buruzko urriaren 1eko 39/2015 Legearen 16. artikuluaren arabera.
2. Ebazpen hau Nafarroako Aldizkari Ofizialean argitaratu eta hurrengo 7 egun baliodunekoa izanen da eskaerak aurkezteko epea.
3. Eskaerak Landa Garapeneko, Ingurumeneko eta Toki Administrazioko Departamentuko Nekazaritza Zerbitzuari zuzenduko zaizkio, eta ebazpen honen III. eranskinean ageri den informazioa behintzat azaldu beharko dute. Eskabideak Nafarroako Gobernuaren Interneteko atariko zerbitzuen katalogoan eskuratzen ahal dira (www.nafarroa.eus).
4. Eskabidearekin batera dokumentu hauek aurkeztuko dira:
–Ibilgailuen titulartasuna frogatzen duten dokumentuak.
–2016-2017 ikasturteko bigarren aldirako banaketa planaren proposamena, ondokoak zehaztuta:
- Banaketaren egutegia.
- Horniketaren ezaugarriak, bigarren oinarriaren 1. puntuko baldintzekin bat.
- Planean aurreikusten denaren arabera banatuko diren produktuen laburpena, honako hauek adieraziz: produktu mota, kalitatea, barietatea, jatorria edo nondik heldu diren, kalitatearen ziurtagiria eta aurkezteko modua.
- Horniketa egiteko dauzkan baliabide materialak eta giza baliabideak, xeheki adierazita.
- Proposamenaren zenbatekoa, guztira.
Seigarrena.–Diru-laguntza emateko modua, lehentasunak eta irizpide objektiboak.
1. Deialdi honen xedeko diru-laguntzak norgehiagokako prozeduraren bidez emanen dira, eta lehenetsiko da Nafarroan, Nafarroako Foru Komunitateko ekoizleek eta nekazaritzako elkarteetakoek egindako fruta eta barazkiak banatzea.
2. Hornitzaile baimendu gisa aritzeko baimena emanen zaio baremo honen arabera puntuazio handiena lortzen duen eskatzaileari:
a) Plan proposamen merkeena (2 puntu, gehienez). Proposamen merkeenari emanen zaio gehieneko puntuazioa. Gainerako proposamenak modu zuzenki proportzionalean baloratuko dira, baja portzentaje handienaren arabera; era horretan, 0 puntu emanen zaie deialdiaren zenbatekoan inolako bajarik ez duten eskaintzei. Balorazioak egiteko unean, bi zifra hamartar hartuko dira kontuan puntuazioa emateko.
b) Produktu kopurua, 5 fruta eta/edo barazki mota gutxienez (2 puntu, gehienez). Gehieneko puntuazioa emanen zaio fruta espezie gehien dituen proposamenari. Gainerako proposamenak modu zuzenki proportzionalean baloratuko dira, espezie portzentaje handienaren arabera; era horretan, 0 puntu emanen zaie 5 espezie baino gehiago aurkezten ez duten eskaintzei. Balorazioak egiteko unean, bi zifra hamartar hartuko dira kontuan puntuazioa emateko.
c) Fruta eta barazki ekoizleen erakunde onartua izatea (2 puntu).
d) Egoitza soziala Nafarroan izatea (puntu bat).
e) Produktuak bere ibilgailuekin banatzea (puntu bat, gehienez). Puntuazioa esleitzeko, bere ibilgailuen proportzioa hartuko da kontuan, produktuen banaketan guztira erabiliko diren ibilgailuekin alderatuta.
f) Barazkiak izatea banatu beharreko produktuen artean (puntu bat).
g) Banatu beharreko produktuetatik fruta eta/edo barazki ekologikoen 5 ano baino gehiago izatea (puntu bat, gehienez). Gehieneko puntuazioa emanen zaio produktu ekologikoen portzentaje handiena duen proposamenari. Gainerako proposamenak modu zuzenki proportzionalean baloratuko dira, produktu ekologikoen portzentaje handienaren arabera; era horretan, 0 puntu emanen zaie 5 ano baino gehiago egiten ez duten proposamenei banatu beharreko fruta edo/eta barazki ekologikoetan. Balorazioak egiteko unean, bi zifra hamartar hartuko dira kontuan puntuazioa emateko.
Zazpigarrena.–Deialdiaren antolamendua, instrukzioa eta ebazpena.
1. Eskaerak harturik, laugarren eta bosgarren oinarrietan ezarritako baldintzak eta dokumentuak jasotzen dituzten egiaztatuko da. Agiri guztiak ez badaude, gehienez ere 10 egun naturaleko epean osatu ditzala eskatuko zaio interesdunari, eta adieraziko zaio, hala egin ezean, eskaerari uko egiten diola ondorioztatuko dela eta espedientea artxibatu eginen dela. Halaxe jakinaraziko zaio.
2. Eskoletan fruta eta barazkiak jateko planaren segimendu batzorde mistoak eskaerak ebaluatu ondoren, Nekazaritza Zerbitzuak ebazpen proposamena eginen du.
Berdinketa izanez gero, hezkuntza eta osasun ikuspegitik kalitate handienekoa, osatuena eta askotarikoena den planari dagokion banaketa planaren proposamenari esleituko zaio. Horrez gain, beste ezaugarri batzuk hartuko dira kontuan, besteak beste: produktuen jatorria, kalitatea eta aurkezteko modua.
3. Landa Garapeneko, Nekazaritzako eta Abeltzaintzako zuzendari nagusiak ebazpen arrazoitua emanen du interesduna eskoletan fruta jateko planaren bigarren aldian (2016-2017 ikasturteko zortzi astetan) hornitzaile baimendu gisa onartzeari buruz deialdi honetan baimendu den gehieneko zenbatekorako, eta espresuki jakinaraziko da zein eskaera ezetsi diren.
4. Prozeduraren gainean ebazteko epea 15 egunekoa izanen da, eskaerak osorik aurkezten direnetik hasita. Epea ebazpenik espresuki eman gabe bukatzen bada, ezetsitzat joko dira eskaerak.
Zortzigarrena.–Laguntza eskatzailearen konpromisoak.
Hornitzaile baimendua izateko, hurrengo ataletan zehaztutakoari buruzko konpromiso idatzia hartu beharko du eskatzaileak:
a) Hornitzaile hautatua izateko proposamenean agertzen den bezala egitea banaketa. Aldaketaren bat egin baino lehen, administrazioari jakinarazi beharko zaio, eta horrek baimendu.
b) Eskoletan fruta jateko programa dela medio Europar Batasunak finantzatzen dituen produktuak prest egonen direla bermatzea, laguntzaren xede diren ikastetxeetako ikasleek kontsumitzeko.
c) Jarraipen eta ebaluaziorako, publizitaterako edo lagun egiteko neurrietarako ematen den laguntza programaren helburuekin bat erabiltzea.
d) Oker ordaindutako laguntzen zenbatekoa itzultzea, baldin eta egiaztatzen bada produktuak ez zaizkiela eman planari atxikitako ikastetxeetako haurrei, edo Nafarroako Foru Komunitateko eskoletan fruta jateko planaren barruan diruz laguntzekoak ez diren produktuetarako ordaindu bada laguntza.
e) Lagun egiteko neurrietarako oker ordaindutako laguntza itzultzea, neurri horiek modu egokian aplikatu ez direla egiaztatuz gero.
f) Frogagiriak agintari eskudunei ematea, eskatzen dituztenean.
g) Nafarroako Gobernuko Landa Garapeneko, Ingurumeneko eta Toki Administrazioko Departamentuak, Hezkuntza Departamentuak edo Osasun Departamentuak ezarritako edozein kontrol neurri onartzea, bereziki erregistroak egiaztatzeari eta ikuskatze fisikoari dagokienez.
h) Ikastetxeen izen eta helbideen erregistroa izatea, bai eta ikastetxe horiei banatutako produktuena eta kopuruena ere.
Bederatzigarrena.–Laguntzaren onuradunaren betebeharrak.
Onuradunak betebehar hauek izanen ditu:
a) Landa Garapeneko, Ingurumeneko eta Toki Administrazioko Departamentuari erakustea beharkizunak eta baldintzak betetzen dituela, hornitzaile baimendua izateko aurkeztutako proposamenarekin bat; orobat, hari frogatzea diru-laguntza emateko arrazoi izan den jarduera egin duela, eta helburua bete dela.
b) Landa Garapeneko, Ingurumeneko eta Toki Administrazioko Departamentuak, Hezkuntza Departamentuak edo Osasun Departamentuak egin beharreko egiaztatze lanak onartzea, baita Nafarroako nahiz Europar Batasuneko kontrol organo eskudunek egiten ahal dituzten egiaztapenak eta finantza kontrolak ere, eta jarduketa horietan eskatzen zaizkien argibide guztiak ematea.
c) Jasotako funtsen aplikazioari buruzko frogagiriak gordetzea, agiri elektronikoak barne, egiaztatze eta kontrol lanen xede diren bitartean.
d) Gutxienez ere A-3 neurriko kartel bat (zentimetro bateko letrekin edo handiagoekin) ematea planari lotutako ikastetxeei, haiek ageriko toki batean eta sarrera nagusian jar dezaten. Kartel horrek Europar Batasunaren eta Nafarroaren ikurrak izanen ditu, “Europar Batasuneko eskoletan frutak eta barazkiak jateko plana” titulua duela, eta esaldi hau gutxienez: “Gure ikastetxeak eskoletan frutak eta barazkiak jateko Europar Batasunaren programan parte hartzen du, Europar Batasunak eta Nafarroako Gobernuak diruz lagundurik”. Kartelak Europar Batasunaren eta Nafarroako Gobernuaren ikurrak izanen ditu.
e) Orobat, banatu den fruta kopurua frogatzen duen agiriaren kopia bat utzi beharko da ikastetxeetan, fruta eta kartel hartzaileak baitira, zer produktu noiz banatu den, eta emandako informazio kartela adierazita.
Hamargarrena.–Ordaintzeko eskaera, eta diru-laguntzaren helburua lortu dela frogatzeko modua.
1. Eskoletan fruta jateko planaren bigarren aldian (2016-2017 ikasturteko zortzi astetan) hornitzaile baimendua izanen da laguntzaren eskatzailea. Eskaerak Landa Garapeneko, Ingurumeneko eta Toki Administrazioko Departamentuko Nekazaritza Zerbitzuari zuzenduko zaizkio, eta ebazpen honen III. eranskinean ageri den informazioa behintzat azaldu beharko dute.
2. Ordaintzeko eskaera bat aurkeztuko da horniketa hilabete bakoitzerako.
3. Laguntza eskaerak hiru hilabeteko epean aurkeztu beharko dira, haien aldia bukatzen denetik aurrera. Eskaera bakoitzak, gutxienez, IV. eranskinean agertzen den informazioa bilduko du, eta zein banaketa aldiri buruzkoak diren, hari dagozkion frogagiriak erantsiko zaizkio.
4. Laguntza eskaerarekin batera, produktuak, haien kopurua, aurkezpen-formatuak eta ikasturtean sortu diren oharrak edo gorabeherak aurkeztuko dira, hornitutako ikastetxe bakoitzaren arabera sailkatuta.
5. Laguntzaren eskabidean adierazitako zenbatekoak frogagirien bidez justifikatu beharko dira, banatutako produktu bakoitzaren prezioa zein bere aldetik haietan adierazita.
6. Batez besteko kostua, gehienez, 0,48 eurokoa izanen da, anoako, eskoletan fruta jateko planaren lehen aldirako (2016-2017 ikasturteko lau astetan) eskaera guztiak kontuan hartuta. Kostu hauetarako guztietarako kontuan hartuko da eskoletan fruta jateko planaren %25 Nafarroako Foru Komunitateak ordaintzen duela, eta %75 Europar Batasunak.
7. Komunikazio kostuei dagokienez, ikastetxeetara eramaten den eskoletan fruta jateko planaren kartel iragarlea ez da, ikastetxe bakoitzerako, 5,50 euro baino garestiagoa izanen. Kostu horiek Europar Batasunak (%75) eta Nafarroako Foru Komunitateak (%25) kofinantzatuko dituzte.
Hamaikagarrena.–Ordaintzeko modua eta epeak.
1. Landa Garapeneko, Nekazaritzako eta Abeltzaintzako zuzendari nagusiak ordainduko du laguntza hiru hilabeteko epean, eskaera behar bezala beteta eta baliozkoa aurkeztu eta biharamunetik hasita.
Laguntza eskaera aurkezteko ezarritako epea gehienez ere 60 egunez gainditzen bada, laguntza ordaindu eginen da, baina ondoren adierazten den moduan murriztuta:
–%5, epea egun batetik 30 egun arte gaindituta.
–%10, epea 31 egunetatik 60 egun arte gaindituta.
Epea 60 egunez baino gehiago gaindituz gero, beste %1 gehiago murriztuko da laguntza egun bakoitzeko, gelditzen den saldoaren gainean kalkulatuta.
Hamabigarrena.–Diru-laguntzaren bateragarritasuna.
Diru-laguntza bateraezina da jarduera bererako jasotzen ahal diren beste diru-laguntzekin.
Hamahirugarrena.–Kontrolak eta zehapenak.
1. Kontrol administratiboak eta tokian bertakoak eginen dira, Batzordearen abenduaren 17ko 2016/248 (EB) Erregelamenduaren 7. eta 8. artikuluetan ezarritakoa kontuan hartuta. Kontrolak egiten ahalko dituzte bai Landa Garapeneko, Ingurumeneko eta Toki Administrazioko Departamentuko langileek, bai Hezkuntza Departamentukoek, bai Osasun Departamentukoek.
Laguntza eskaera guztiei kontrol administratiboak eginen zaizkie eta, bereziki, diruz lagundutako kostuen frogagiriak egiaztatuko dira. Kontrol administratiboak tokian berean egindako ikuskapen fisikoekin osatuko dira.
2. Laguntza eskatzaile baimendu batek ez baditu Batzordearen 2016/247 (EB) Erregelamendu Delegatuan ezarritako betebeharrak betetzen, agintari eskudunak bertan behera utziko du eskatzailearen baimena hilabetetik hamabi hilabetera, edo errebokatu eginen du, zein den arau-haustearen larritasuna eta proportzionaltasun printzipioarekin bat. Neurri horiek ez zaizkie 1306/2013 (EB) Erregelamenduaren 64. artikuluko 2. idatz-zatiko a)tik d)ra bitarteko letretan aurreikusitako kasuei aplikatuko, ez eta arau-haustea garrantzi gutxikoa denean ere. Eskatzaileak eskatuta eta errebokatzeko arrazoiak kontuan hartu badira, agintari eskudunak berriz indartzen ahalko du eskatzailearen baimena, errebokatzeko arrazoiak desagertu eta, gutxienez ere, hamabi hilabete iragan ondoren.
3. Oker ordaindutako zenbatekoak berreskuratzeko, 809/2014 (EB) Erregelamendu Betearazlearen 7. artikulua aplikatuko da, mutatis mutandis.
4. Begi bistako akatsengatik ez bestelakoengatik ordainketa irregularrak egin diren kasuan eta eskatzaileari egozten ahal zaion iruzur edo axolagabekeria larria dagoen kasuan, eskatzaileak, bidegabeki jasotako diru-kopuruak itzultzeaz gain, hasiera batean ordaindutako zenbatekoaren eta eskatzaileak jasotzeko eskubidea duen zenbatekoaren arteko diferentzia ordainduko du, 2016/247 (EB) Erregelamendu Delegatuaren 9. artikuluaren arabera.
5. Nafarroako Aurrekontu Orokorren kargura emandako diru-laguntzaren zatiaren araubide juridiko orokorraren erregulazioari dagokionez, Diru-laguntzei buruzko azaroaren 9ko 11/2005 Foru Legea aplikatuko da. Lege hori Europar Batasuneko funtsen kontura finantzatutako diru-laguntzei zuzenean aplikatzen zaizkien arauen osagarri izanen da.
Ebazpen honetan eskatutako betebeharrak eta hartutako konpromisoak bete ezean, diru-laguntza itzuli egin beharko da eta, bidezkoa denean, behar diren zehapenak jarriko dira.
Diru-itzulketa, arau-hauste eta zehapenen arloan, Diru-laguntzei buruzko azaroaren 9ko 11/2005 Foru Legearen 35., 42. eta 43. artikuluetan xedatutakoari jarraituko zaio.
Hamalaugarrena.–Onuradunek dituzten gardentasun betebeharrak.
1. Onuradunen datuak argitaratu eginen dira Nekazaritzako politika bateratuaren finantzaketari, kudeaketari eta jarraipenari buruzko Europako Parlamentuaren eta Kontseiluaren abenduaren 17ko 1306/2013 (EB) Erregelamenduaren 111. artikuluari jarraikiz. Batzordeko eta Estatuetako auditoretza eta ikerketa organismoek tratatu ditzakete aipatu datuak, Batasunaren finantza interesak babestearren.
2. Nafarroako Aurrekontu Orokorren kargurako diru-laguntzen onuradunen gardentasun betebeharrak arautzen dituen 59/2013 Foru Dekretuaren 2. artikuluan aipatzen diren entitateek Gardentasunari eta Gobernu Irekiari buruzko ekainaren 21eko 11/2012 Foru Legearen bederatzigarren xedapen gehigarrian ezarritako gardentasun betebeharrak bete beharko dituzte, Nafarroako Aurrekontu Orokorren kargurako diru-laguntzak jasotzen badituzte eta bi inguruabar hauek gertatzen badira:
a) Emandako diru-laguntzaren zenbatekoak 20.000 euro gainditzea urtean.
b) Emandako diru-laguntza entitate onuradunaren urteko negozio-zifraren edo aurrekontuaren %20tik gorakoa izatea.
Aurreko idatz-zatian ezarritako mugak gainditzen ote diren jakiteko, Nafarroako Foru Komunitateko Administrazioak edo haren erakunde publikoek urte naturalean emandako diru-laguntza guztien kopuruak batuko dira.
Urte batean baino gehiagotan ordaintzen diren diru-laguntzen kasuan, aurrekontuko ekitaldi bakoitzean emandako kopurua hartuko da kontuan ondorio horietarako, ez guztizko batura. Erreferentziako negozio-zifra edo aurrekontua, urtekoa, honako hauen arteko txikiena izanen da:
a) Aurreko urteko negozio-zifra edo aurrekontu exekutatua.
b) Hala bada, diru-laguntza ematen duenean entitatearen organo eskudunak onartutako negozio-zifra edo aurrekontua.
Aipatu diren inguruabarrak gertatzeagatik gardentasun betebeharrak dituzten entitate onuradunek jarraian adierazten den informazioa eman beharko dute:
a) Entitatearen gobernu, administrazio eta zuzendaritza organoen osaera.
b) Organo horiek osatzen dituzten kargudunen zerrenda.
c) Entitateak aurreko urtean kargudun bakoitzari ordaindutako ordainsari gordinak eta gainerako diru konpentsazioak, kontzeptuz kontzeptu. Sortu berriak diren entitateen kasuan, informazioa haien aurrekontuetan edo plan ekonomiko-finantzarioan jasotakoa izanen da.
d) Kargudun bakoitzak gobernuko, administrazioko eta zuzendaritzako eginkizunetan duen dedikazioaren araubidea.
e) Entitate onuradunaren urteko azken kontuen kopia bat.
Informazio hori entitate onuradunaren legezko ordezkariak sinatuta aurkeztuko da, Nafarroako Gobernuaren Erregistro Orokor Elektronikoan, bide telematikoak erabiliz, eta diru-laguntza kudeatzen duen administrazio unitateari bidaliko zaio. Informazioa bidaltzeko epea hilabetekoa izanen da, diru-laguntza ematen duen ebazpena jakinarazten edo, hala bada, argitaratzen den egunetik hasita.
Informazio hori urtebetez egonen da aztergai Nafarroako Gobernu Irekiaren Atarian argitaratzen denetik hasita, eta gehienez 15 hilabetez utziko da bertan, informazioa kudeatzen duen organoan sartzen den egunetik hasita. Epe hori iraganik, informazioa argitaratzeko ardura duen unitateak ofizioz kenduko du. Hala egin ezean, entitate onuradunak kentzeko eskatzen ahalko du, eta gehienez ere hilabeteko epean kendu beharko da, eskaera egiten denetik hasita.
Entitateak gardentasun betebeharra bete behar ez badu, aurreikusitako inguruabarrak gertatzen ez direlako, horren gaineko aitorpena aurkeztu beharko du.
Entitateak ekitaldi berean diru-laguntza bat baino gehiago jasotzen badu, ez du informazioa errepikatu beharko diru-laguntza bakoitzerako, salbu eta hasieran eman zituen datuak aldatzen badira.
Onuradunak informazioa emateko betebeharrak ez betetzeak ekar ditzakeen zehapenak ukatu gabe, betetzen ez badira onartutako diru-laguntza ordaindu gabe utziko da, eta zenbatekorik kobratu bada, itzuli beharko da, eta aurrerakinak ere bai, Diru-laguntzei buruzko Foru Legearen 35.1.c) artikuluan ezarritakoari jarraikiz.
II. ERANSKINA
Planaren bigarren aldian (2016-2017 ikasturteko zortzi astetan)
parte hartzen duten ikastetxeen zerrenda.
IKASTETXEAREN IZENA | HERRIA | IKASLEAK | MOTA (1) |
Abartzuzako HLHIP | Abartzuza | 14 | H |
San Babil HLHIP | Ablitas | 94 | H+L |
Zelandi HLHIP Altsasu | Altsasu | 222 | H+L |
Sagrado Corazón ikastetxea | Altsasu | 54 | H+L |
Iñigo Aritza ikastola | Altsasu | 120 | H+L |
Amaiurko HLHIP | Amaiur | 8 | H |
Antzingo San Fausto HLHIP | Antzin | 20 | H |
Virgen de la Cerca HLHIP | Andosilla | 62 | H |
Añorbeko HLHIP | Añorbe | 16 | H |
San Miguel HLHIP | Agoitz | 93 | H |
Arantzako HLHIP | Arantza | 38 | H+L |
Arbizuko HLHIP | Arbizu | 42 | H |
Nazabal HLHIP | Areso | 24 | EU |
Sancho Ramírez HLHIP | Arguedas | 68 | H |
Arizkungo HLHIP | Arizkun | 13 | H |
Arraiozko HLHIP | Arraioz | 22 | H |
La Balsa HLHIP | Arroitz | 16 | EU |
Urraca Reina HLHIP | Artaxoa | 30 | H |
Mater Dei | Aiegi | 140 | H |
Francisco Arbeloa HLHIP | Azagra | 125 | H |
Azpilkuetako Eskola | Azpilkueta | 7 | EU |
Alaitz HLHIP | Barañain | 66 | H |
Sahats IP | Barañain | 70 | H |
Santa Luisa De Marillac | Barañain | 149 | H |
Martín Azpilcueta IP | Barasoain | 19 | H |
Beintza-Labaien IP | Beintza-Labaien | 8 | EU |
Beireko HLHIP | Beire | 10 | H |
Labiaga ikastola | Bera | 46 | H |
Ricardo Baroja HLHIP | Bera | 110 | H+L |
Sagrado Corazón ikastetxea | Bera | 47 | H+L |
Mendialdea I HLHIP | Berriozar | 160 | H |
Mendialdea II HLHIP | Berriozar | 118 | H |
Araxes HLHIP | Betelu | 22 | H |
Santa Ana HLHIP | Buñuel | 80 | H+L |
Hilarión Eslava HLHIP | Burlata | 116 | H |
Ermitaberri HLHIP | Burlata | 83 | H |
Teresa Bertran de Lis HLHIP | Cadreita | 53 | H |
Virgen del Soto HLHIP | Caparroso | 107 | H |
Virgen de Gracia HLHIP | Cárcar | 19 | H |
Francisco Javier Sáenz de Oiza HLHIP | Kaseda | 17 | H |
José Luis Arrese HLHIP | Corella | 240 | H |
Virgen de Nievas HLHIP | Deikaztelu | 12 | H |
Baztan ikastola | Elizondo | 63 | H |
Elizondo HLHIP | Elizondo | 65 | H |
Erratzuko HLHIP | Erratzu | 12 | H |
San Esteban HLHIP | Erroibar | 8 | U |
Santa Ana | Lizarra | 90 | H |
Remontival HLHIP | Lizarra | 250 | H |
San Donato HLHIP | Etxarri Aranatz | 70 | H |
Doña Alvara Alvarez HLHIP | Faltzes | 62 | H |
Virgen del Rosario IP | Fontellas | 32 | H+L |
Elías Terés HLHIP | Funes | 80 | H |
Andrés Narbarte Xalto HLHIP | Goizueta | 33 | H+L |
Virgen Blanca HLHIP | Uharte | 246 | H |
Isterria Hezkuntza Bereziko Zentroa | Ibero | 45 | HB |
Iruritako HLHIP | Irurita | 15 | H |
Atakondoa HLHIP | Irurtzun | 123 | H |
Pulunpa Eskola | Ituren | 26 | H |
Ohianzabal HLHIP | Jauntsarats | 26 | H |
Lakuntzako HLHIP | Lakuntza | 39 | H |
San Miguel HLHIP | Larraga | 70 | H |
Irurita Gotzaina | Larraintzar | 67 | H |
Erleta HLHIP | Leitza | 173 | H+L |
Ibarberri IP | Lekunberri | 91 | H |
Doña Blanca de Navarra HLHIP | Lerín | 40 | H |
Lekaroz IP | Lekaroz | 5 | H |
Irain HLHIP | Lesaka | 78 | H+L |
Lezaungo HLHIP | Lezaun | 10 | H |
Angel Martínez Baigorri HLHIP | Lodosa | 118 | H+L |
La Milagrosa | Lodosa | 119 | H+L |
Ibaialde ikastola | Lodosa | 26 | H+L |
Santa María HLHIP | Los Arcos | 35 | H |
San Juan HLHIP | Irunberri | 55 | H |
San Bartolomé HLHIP | Martzilla | 86 | H |
Santa Ana HLHIP | Mélida | 15 | U |
San Francisco Javier | Mendabia | 78 | H |
Nuestra Señora del Patrocinio HLHIP | Milagro | 115 | H |
San Benito HLHIP | Miranda Arga | 25 | H |
Honorio de Galilea HLHIP | Monteagudo | 30 | H+L |
Raimundo Lanas IP | Murillo el Fruto | 12 | U |
San Pedro | Mutiloa | 200 | H |
Arotzenea HLHIP | Narbarte | 25 | H |
Domingo Bados HLHIP | Olazti | 121 | H+L |
Oronoz Mugairiko HLHIP | Oronoz Mugairi | 19 | H |
San Salvador HLHIP | Oteitza | 20 | H |
Bernart Etxepare IP | Iruñea | 158 | H |
Buztintxuri IP | Iruñea | 334 | H |
Cardenal Larraona | Iruñea | 163 | H |
San Francisco HLHIP | Iruñea | 135 | H |
García Galdeano HLHIP | Iruñea | 45 | H |
Nicasio de Landa HLHIP | Iruñea | 15 | H |
Rochapea HLHIP | Iruñea | 119 | H |
Andrés Muñoz Garde HBIP | Iruñea | 76 | HB |
Iturrama HLHIP | Iruñea | 64 | H |
San Jorge HLHIP | Iruñea | 264 | H+L |
El Molino | Iruñea | 22 | HB |
Esclavas del Sagrado Corazón ikastetxea | Iruñea | 140 | H |
Hegoalde ikastola | Iruñea | 99 | H |
Amaiur Ikastola | Iruñea | 136 | H |
Jaso ikastola | Iruñea | 153 | H |
José M.ª de Huarte HLHIP | Iruñea | 99 | H |
Mendigoiti | Iruñea | 74 | H |
Patxi Larrainzar IP | Iruñea | 169 | H |
Sanduzelai IP | Iruñea | 54 | H |
Santa Catalina Labouré ikastetxea | Iruñea | 70 | H |
Paderborn-Víctor Pradera HLHIP | Iruñea | 92 | H |
Bernart Etxepare IP | Iruñea | 157 | H |
Pitillasko HLHIP | Pitillas | 17 | U |
Garesko HLHIP | Gares | 120 | H |
Ximénez de Rada HLHIP | Arrada | 25 | H |
San Bartolomé HLHIP | Ribaforada | 183 | H+L |
Saldiasko Eskola Publikoa | Saldias | 7 | U |
Alfonso X el Sabio HLHIP | San Adrián | 220 | H |
Zangozako ikastola | Zangoza | 38 | H |
Santakarako Nuestra Señora de La Asunción | Santakara | 13 | H |
San Miguel HLHIP | Doneztebe | 83 | H |
Hermanas Uriz Pi IP | Eguesibar | 263 | H |
Joakin Lizarraga IP | Eguesibar | 368 | H |
Virgen de Nievas | Sesma | 41 | H+L |
Sunbillako HLHIP | Sunbilla | 25 | H |
Marqués de la Real Defensa HLHIP | Tafalla | 97 | H |
Garcés de Los Fayos ikastola | Tafalla | 74 | H |
Compañía de María | Tutera | 280 | H |
Monte San Julián HLHIP | Tutera | 240 | H+L |
Torre Monreal HBIP | Tutera | 57 | HB |
Huertas Mayores HLHIP | Tutera | 145 | H |
Elvira España HLHIP | Tutera | 180 | H |
San Miguel HLHIP | Uharte Arakil | 33 | H |
Urdiaingo HLHIP | Urdiain | 15 | H |
Urrotz-Hiriko IP | Urrotz-Hiria | 45 | U |
Félix Zapatero HLHIP | Valtierra | 55 | H |
Ricardo Campano HLHIP | Viana | 165 | H+L |
Erentzun ikastola | Viana | 45 | H+L |
El Castellar HLHIP | Alesbes | 116 | H |
San Veremundo HLHIP | Villatuerta | 30 | H |
Atargi HLHIP | Atarrabia | 110 | H |
Catalina de Foix HLHIP | Zizur Nagusia | 125 | H |
Erreniega HLHIP | Zizur Nagusia | 115 | H |
Zugarramurdiko HLHIP | Zugarramurdi | 17 | H |
Hezkuntza Departamentuak ikasleen kopurua eman eta ikastetxeekin egiaztatu du, 2016-2017 ikasturteko matrikulazio datuen arabera.
(1) H = Haur Hezkuntza; H+L = Haur Hezkuntza eta Lehen Hezkuntzako 1. zikloa; EU = Eskola Unitarioa; HB = Hezkuntza Berezia.
III. ERANSKINA
Laguntza eskatzaileak baimentzeko eskaeraren gutxieneko edukia.
IV. ERANSKINA
Laguntza eskaeraren gutxieneko edukia.
V. ERANSKINA
Gardentasunari buruzko betebeharraren gaineko aitorpena.
Deskargatu beharreko artxiboak PDF formatuan daude.
Iragarkiaren kodea: F1703740
Sarbidea
Nafarroako Aldizkari Ofiziala
Paseo Pablo Sarasate, 38, 2.º izda.
31001 - Iruña
848 42 12 50
