Iragarkia

66. ALDIZKARIA - 2017ko apirilaren 4a

1. NAFARROAKO FORU KOMUNITATEA

1.1. XEDAPEN OROKORRAK

1.1.2. Foru Dekretuak

8/2017 FORU DEKRETUA, otsailaren 15ekoa, “Lokizko mendilerroa” izeneko Batasunaren Garrantzizko Lekua Kontserbazio Bereziko Eremu izendatu, haren kudeaketa plana onetsi eta “Basaura” natura-erreserba (RN-15) erabili eta kudeatzeko plan zuzentzailea eguneratzen duena.

ZIOEN AZALPENA

Lokizko mendilerroa izeneko gunea Nafarroako erdialdearen mendebaldean dago, eta Allingo, Ameskoabarrengo, Antzingo, Aranatxeko, Eulateko, Lanako, Larragoako eta Metautengo udal mugapeak, 26, 28, 36, 37, 39, 40, 41, 42, 45, 85, 103 fazeriak eta Lokizko mendilerroa hartzen ditu bere baitan. Gune horretan badira Nafarroako aniztasun biologikoaren adierazgarri diren habitat naturalak eta basa flora eta fauna; horietako batzuk galzorian daude beren banaketa naturaleko eremuan, edo haien banaketa naturaleko eremua murritza da, bai habitat eta espezie horiek atzera egiten ari direlako, bai berez dutelako eremu murritza. Horregatik, eremu batzuk hautatu behar dira, non bermatuko baita habitat natural eta basa espezie horiek epe luzean iraunen dutela, kudeaketa aktibo eta prebentiborako sistema eraginkor eta eragingarrien bidez.

Habitat natural edo espezie horietako batzuk sarturik daude Kontseiluak 1992ko maiatzaren 21ean emandako Habitat naturalak eta basa fauna eta flora kontserbatzeari buruzko 92/43/EEE Zuzentarauan, edo Basa hegaztiak kontserbatzeari buruzko Europako Parlamentuaren eta Kontseiluaren azaroaren 30eko 2009/147/EE Zuzentarauan. Horrenbestez, balio handia dute ez bakarrik Foru Komunitatean, baita Europar Batasunean ere. Bi zuzentarau horiek dira Europar Batasunak naturaren kontserbazioaren arloan duen tresna nagusia. Horretarako, lekuen sare ekologiko bat sortu zen, Natura 2000 Sarea, non Batasunaren interesekotzat hartu diren basa florako eta faunako espezie eta habitat natural guztien adierazgarriak lehengoratu edo egoki kontserbatu behar baitira.

92/43/EEE Zuzentaraua abenduaren 7ko 1997/1995 Errege Dekretuaren bidez sartu zen Espainiako ordenamendu juridikoan.

Zuzentarauak irizpide zientifiko batzuk eta egutegi bat ezarri zituen Natura 2000 Sarea eratzeko. 4. artikuluaren arabera, Europar Batasuneko estatuek lekuen zerrenda bat proposatu behar diote Batzordeari, eta adierazi behar dituzte leku bakoitzean dauden habitat natural motak eta Batasunaren intereseko espezieak.

Nafarroako Foru Komunitateko Administrazioak, Gobernuak 2000ko maiatzaren 15ean hartutako Erabakiaren bidez, Kontserbazio Bereziko Eremu izendatzen ahal diren lekuen zerrenda behin-behinekoz onetsi zuen, gero Natura 2000 Europako sare ekologikoan sar zitezen. Horien artean, “Lokizko mendilerroa” izeneko ES2200020 gunea dago.

Batasunaren Garrantzizko Leku gisa onetsirik, Europar Batasuneko estatuak ahalik eta lasterren deklaratu behar du Kontserbazio Bereziko Eremu, gehienez ere sei urteko epean. Horretarako, kudeaketa plan baten bidez, behar diren kontserbazio neurriak ezarri behar dira Batasunaren Garrantzizko Leku izatearen arrazoi diren habitat naturalak eta espezieen populazioak kontserbazio egoera onean mantentzeko, edo egoera onera berriz ekartzeko.

2004ko abenduaren 7ko 2004/813/EE Erabakiaren bidez, Europako Batzordeak eskualde biogeografiko atlantikoaren barreneko Batasunaren Garrantzizko Lekuen zerrenda onetsi zuen, eta 2006ko uztailaren 19ko 2006/613/EE Erabakiaren bidez, berriz, eskualde biogeografiko mediterraneoaren barreneko Batasunaren Garrantzizko Lekuen zerrenda. Horrenbestez, Europako zuzentaraua aplikatzearen ondorioetarako, kontserbazio bereziko eremu izendatuko dira leku horiek.

“Lokizko mendilerroa” gunerako Kudeaketa Plana Europar Batasuneko araudiaren betebeharrekin bat prestatu da, eta, hortaz, bertan jaso dira leku horretan dauden habitat eta taxonen eskakizun ekologikoei dagozkien ekintza, neurri eta jarraibideak, aipatutako 92/43/EEE Zuzentarauan biltzen direnak.

Uztailaren 6ko 230/1998 Foru Dekretuaren bidez, “Basaura” natura-erreserba (RN-15) erabili eta kudeatzeko plan zuzentzailea onetsi zen, besteak beste. Natura Sareko gunea kudeatzeko plana prestatzeko prozesuan, ikusi da plan zuzentzaile hori eguneratu behar dela. 230/1998 Foru Dekretuak 2. artikuluan ezartzen badu ere erabili eta kudeatzeko plan zuzentzaileen indarraldia mugagabea izanen dela, Nafarroako naturguneei buruzko ekainaren 17ko 9/1996 Foru Legearen 20.2 artikuluan adierazten denez, erabili eta kudeatzeko plan zuzentzaileetako arauek izanen dute indarraldi mugagabea, eta halaxe ezarri da kudeaketa plan honetan, foru dekretu honen azken xedapenetako lehenarekin bat.

Horiek horrela, Landa Garapeneko, Ingurumeneko eta Toki Administrazioko kontseilariak proposaturik, eta Nafarroako Gobernuak 2017ko urtarrilaren 15eko bilkuran hartutako Erabakiarekin bat,

DEKRETATU DUT:

1. artikulua. Xedea.

Foru dekretu honen xedea hauxe da:

1. ES2200022 Batasunaren Garrantzizko Lekua, “Lokizko mendilerroa” izenekoa, Kontserbazio Bereziko Eremu izendatzea.

2. ES2200022 Kontserbazio Bereziko Eremuaren kudeaketa plana onestea. Foru dekretu honi erantsi zaio.

3. “Basaura” natura-erreserba (RN-15) erabili eta kudeatzeko plan zuzentzailea eguneratzea, ES2200022 Kontserbazio Bereziko Eremuaren barrenean baitago, hango kudeaketa planarekin bat.

2. artikulua. Planaren aplikazio eremua eta lurralde mugaketa.

“Lokizko mendilerroa” izeneko gunea Nafarroako erdialde-mendebaldean dago, eta, Lokizko mendilerroaz gainera, inguruko lur zerrenda zabal bat ere hartzen du, Ameskoetakoak, Allinibarkoak eta Lana Ibarrekoak, guztira 13.145,69 ha.

Ekialdetik mendebalderantz, lekua Allinibartik Arabako mugaraino doa, eta iparraldetik hegoalderantz, Ameskoetatik Ega ibairaino.

Foru dekretu honek onetsitako planaren aplikazio eremuaren mugaketa ofiziala planean berean jaso den kartografiak ezarri du.

3. artikulua. Gidaritza Batzordea.

1. Gidaritza batzorde bat sortzen da “Lokizko mendilerroa” gunearen kontserbazioa kudeatzeko kontsultarako eta partaidetzarako organoa izateko asmoz. Kudeaketa Planaren aplikazio esparruko eragileek eta Nafarroako Foru Komunitateko Administrazioko ordezkariek osatuko dute.

2. Gidaritza Batzordeak eginkizun hauek izanen ditu:

a) Kudeaketa planean jasotako neurriak bete daitezela sustatzea. Aurreikusitako egutegia betetzen saiatuko da eta planaren neurriak aplikatzeko ahalmena duten eskualdeko eragile guztien lankidetza eta koordinazioa bultzatuko du.

b) Planaren lan-programa dauden aukeretara egokitzea, Planaren neurriak ahalik eta errazen eta modurik eraginkorrenean aplikatzen direla errazteko.

c) Proposamenak egitea Planean ezarritako ekintzak eraginkorragoak izan daitezen, aurreikusitako helburuak betetzeari begira.

d) Foru Komunitateko Administrazioari jakinaraztea Kudeaketa Planaren garapena baldintza dezaketen ekintzak edo mehatxuak.

e) Planaren betetze-maila aldian behin ebaluatzea, eta entitate, administrazio eta organo eskudunei eskatzea neurriak garatzeko behar diren konpromisoak bete ditzatela.

f) Natur baliabideen azterketa eta ikerketa bultzatzea, baita gizarteak baliabide horiek ezagut ditzala eta haiekin goza dadila ere, betiere haien balioekiko errespetua eta ingurumen hezkuntza sustatuz.

XEDAPEN GEHIGARRIAK

Lehenbiziko xedapen gehigarria.–Landa Garapeneko, Ingurumeneko eta Toki Administrazioko kontseilaria gaitzea.

Landa Garapeneko, Ingurumeneko eta Toki Administrazioko kontseilariari ahalmena ematen zaio behar diren tramiteak egin ditzan foru dekretu hau eta, bidezkoa bada, plana aplikatzeko behar den kostu ekonomikoaren kalkuluak Europako Batzordeari igortzeko, Habitat naturalak eta basa fauna eta flora kontserbatzeari buruzko maiatzaren 21eko Kontseiluaren 92/43/EEE Zuzentarauaren 8. artikuluan aurreikusitako ondorioetarako.

Bigarren xedapen gehigarria.–Lotutako araudia.

“Basaura” natura-erreserbari dagokionez (RN-15), oso-osorik BGLan sartutako espazioa baita, Nafarroako Naturguneei buruzko ekainaren 17ko 9/1996 Foru Legean eta Nafarroako natura-erreserbak erabili eta kudeatzeko plan zuzentzaileak onesten dituen uztailaren 6ko 230/1998 Foru Dekretuaren I. eranskinean ezarritakoaren arabera arautuko da.

XEDAPEN INDARGABETZAILEA

Xedapen indargabetzaile bakarra.–”Basaura” natura-erreserba erabili eta kudeatzeko plan zuzentzailea (230/1998 Foru Dekretuan ezarria) partez indargabetzea.

Nafarroako natura-erreserbak erabili eta kudeatzeko plan zuzentzaileak onesten dituen uztailaren 6ko 230/1998 Foru Dekretuaren II. eranskinean ezarritakoa indargabetzen da, Basaurako natura-erreserbari dagokionez.

AZKEN XEDAPENAK

Azken xedapenetan lehena.–Kudeaketa Planaren indarraldia.

1. Hauxe da foru dekretu honen bidez onesten den Kudeaketa Planaren indarraldia:

a) Mugagabea, gako-elementuei, azken helburuei, arauei eta jarraibideei dagokienez.

b) 10 urtekoa, espero diren emaitzei eta jarduketei (neurriak) dagokienez. Epe hori bukatutakoan, plana berrikusiko da.

2. Hala ere, Landa Garapeneko, Ingurumeneko eta Toki Administrazioko Departamentuak uste baldin badu planean aurreikusirik ez zegoen funtsezko gorabeheraren bat gertatu dela, gunearen balioen zainketan eragina izan dezakeena, plana berraztertzen edo aldatzen ahalko da.

3. Kudeaketa Plana ukitzen ahal duen edozein aldaketa edo berrikuspen foru dekretu bidez onetsi beharko da.

Azken xedapenetan bigarrena.–Beste plan batzuekiko erlazioa.

1. Foru dekretu honek onesten duen plana bat etorriko da aniztasun biologikoaren kontserbazioari buruz ezartzen diren maila goragoko planekin, eta, zehazki, Nafarroako Naturagune Babestuen Sarean jarduteko ildo orokorrak finkatzeko onesten direnekin.

2. Dena dela, Nafarroako Naturaguneei buruzko ekainaren 17ko 9/1996 Foru Legearen 7. artikuluan xedatutakoaren arabera, kudeaketa plan honetako zehaztapenak zuzenean aplikatu beharrekoak dira, eta tokiko entitateen hirigintzako udal planeamenduan sartuko dira, planeamendua egitean edo berraztertzen denean. Hori horrela, oraingo lurralde antolamendurako edo antolamendu fisikorako tresnak, kudeaketa plan honen aurkakoak badira, egokitu beharko dira, lehenbizikoz aldatzen edo berrikusten direnean.

Azken xedapenetan hirugarrena.–Garatzeko gaikuntza.

Landa Garapeneko, Ingurumeneko eta Toki Administrazioko kontseilariari ahalmena ematen zaio foru dekretu hau garatzeko eta betearazteko behar diren xedapen guztiak eman ditzan.

Azken xedapenetan laugarrena.–Indarra hartzea.

Foru dekretu honek Nafarroako Aldizkari Ofizialean argitaratu eta biharamunean hartuko du indarra.

Iruñean, 2017ko otsailaren 15ean.–Nafarroako Gobernuko lehendakaria, Uxue Barkos Berruezo.–Garapeneko, Ingurumeneko eta Toki Administrazioko kontseilaria, Isabel Elizalde Arretxea.

ERANSKINA

“Lokizko mendilerroa” ES2200022 kontserbazio bereziko eremua
eta Basaura natura-erreserba (RN-15) kudeatzeko plana

AURKIBIDEA

I.–Planaren helburua.

II.–Kontserbatu beharreko balio naturalak.

III.–Planaren azken helburuak.

IV.–Planaren aplikazioaren ondorioz espero diren emaitzak.

V.–Araudia.

VI.–Kudeaketarako jarraibide edo orientazioak.

VII.–Jarduketak.

VIII.–Kudeaketa planaren finantzaketa.

IX.–Mugak.

X.–Jarraipen-programa.

XI.–Mugaketa-mapa eta barnean dauden entitateak.

XII.–Kontserbazioaren xede diren objektuen eta ezarritako arauen, jarraibideen eta neurrien arteko egokitasuna.

I.–Planaren helburua.

Plan honen helburua da behar diren neurri aktiboak eta prebentzio neurriak ezartzea hurrengo atalean adieraziko diren habitat naturalak, espezieak, prozesu ekologikoak eta osagai natural eta kulturalak kontserbazio egoera onean mantentzeko edo egoera onera berriz ekartzeko (kasua zein den).

Kudeaketa plan honen arabera hartzen diren neurrien azken helburua da gunearen osotasun ekologikoa bermatzea eta Nafarroako Natura 2000 Sareari koherentzia ematen laguntzea. Kontserbazio Bereziko Eremua ukitzen ahal duen beste edozein plan, programa edo proiektuk bat etorri beharko du helburu horrekin.

Hala ere, plan honen bidez hartzen diren neurriek eta haren ondoriozkoek kontuan hartuko dituzte betebehar ekonomiko, sozial eta kulturalak, eta, ahal den neurrian, saiatuko dira bateragarri egiten gaur egungo erabilera eta aprobetxamenduak eta gizartearen eskari berriek ekar ditzaketenak, hala nola, aisialdia, ingurumen hezkuntza edo ikerkuntza. Era berean, eremu hau babesteko arrazoi diren balioak galtzea ekar dezaketen eraldaketak saihestuko dira.

II.–Kontserbatu beharreko balio naturalak.

Landare formazio naturalek eta erdinaturalek lekuaren ia azalera osoa okupatzen dute. Landare formazio horien %75etik gora Batasunaren intereseko habitat gisa hartzen dira; 19 mota desberdin daude, eta horietarik 3 lehentasunezkoak dira.

Basoei dagokienez, nabarmentzekoak dira karraskadiak (Quercus ilex eta Quercus rotundifolia espezieenak), hariztiak (Quercus faginea espezieenak), pagadi kaltzikolak eta haginen baso mediterraneoak (Taxus baccata), batasunaren intereseko habitatak baitira. Haritz ilaundunen basoak Batasunaren intereseko habitat gisa hartuak ez badaude ere, azalera handia hartzen dute, eta, gainera, tamaina handiko zuhaitz zahar asko dituzte, Batasunaren intereseko intsektu saproxilikoen espezie batzuentzat funtsezko habitat direnak.

Basoei loturiko fauna katalogatuko espezie ugariei dagokienez, aipatu beharrekoak dira mehatxatuak dauden bi pizido espezie: okil ertaina (Dendrocopos medius) eta okil beltza (Dryocopus martius). Aipatzekoak dira, orobat, mehatxatuak dauden zenbait koleoptero saproxiliko, konparazio batera, Osmoderma eremita, Lucanus cervus, Cerambyx cerdo eta Rosalia alpina espezieetakoak. Ekotono basotsuei lotutako beste ornogabe katalogatu bat Euphrydyas aurinia tximeleta da.

Gune irekietako landare-komunitateei dagokienez, Lokizek Batasunaren intereseko larre eta sastrakadiak kontserbatzen ditu, nekazaritzako eta abeltzaintzako erabilera tradizionalei lotuak. Aipagarriak dira zuhaitz eiteko sastrakadi batzuk (Juniperus spp.), txilardi lehor europarrak eta txilardi oromediterraneo endemikoak, otaberarekin nahasten direnak. Batasunaren intereseko larreen artean, badira larre alpetar eta subalpetar karetsuak, larre lehor erdi-naturalak eta sastraka-fazieak substratu karetsuen gainean (Festuco-Brometalia), gramineoen zona subestepikoak eta urtekoak (Thero-Brachypodietea) eta belar altuen larre heze mediterraneoak (Molinion-Holoschoenion).

Lokizko larre eta sastrakadiak nabarmentzen dira Nafarroako intereseko florako eta/edo flora mehatxatuko espezie asko dituztelako: Narcissus asturiensis, Teucrium pyrenaicum subsp. guarensis, Genista eliassennenii eta Lomelosia graminifolia.

Ugari dira, halaber, giro horiei lotutako ekotonoak edo espazio irekiak erabiltzen dituzten hegazti katalogatuak. Horien artean aipagarrienak dira mirotz zuria (Circus cyaneus), pirripioa (Lullula arborea), etze-txinboa (Sylvia undata), antzandobi arrunta (Lanius collurio) eta berdantza miarritza (Emberiza hortulana).

Allin ibarreko eta Lana ibarreko harkaizti handietan Batasunaren intereseko zenbait habitat daude, konparazio batera, Buxus sempervirensen formazio egonkor xerotermofiloak aldapa harkaiztsuetan (Berberidion p.p.), Alysso-Sedion albi delakoaren belardi karetsu karstiko edo basofiloak, harkaitz-malda kaltzikolak landare kasmofitikoekin eta luizi mediterranear mendebaldekoak eta termofiloak.

Harkaiztietako habitatak oso interesgarriak dira ikuspuntu botanikotik, izan ere, zenbait taxon interesgarri edo endemiko agertzen dira, esate baterako, Anemone pavoniana, Cochlearia aragonensis eta Teucrium montanum. Habita hauetan lepidoptero mehatxatu bat ere kokatzen da, hots, Parnassius apollo izenekoa.

Bai Allin ibarreko malkarretan bai Lana ibarrekoetan, hegazti harkaiztarren komunitate handi samarra dago. Honatx aipagarrienak: ugatza (Gypaetus barbatus), sai zuria (Neophron percnopterus), sai arrea (Gyps fulvus), arrano beltza (Aquila chrysaëtos), Bonelli arranoa (Hieraaetus fasciatus), belatz handia (Falco peregrinus), hontz handia (Bubo bubo) eta belatxinga mokogorria (Pyrrhocorax pyrrhocorax).

Lokizen saguzar espezie asko aurkitzen ahal dira; nabarmentzekoa da Schreibers saguzarra (Miniopterus schreibersii), espezie honetako Nafarroako koloniarik handiena kontserbazio bereziko eremu honetan baitago.

KBE honetan idoi txiki ugari daude, eta, alde horretatik, garrantzi handikoa da herpetologiaren ikuspuntutik. Nafarroan dauden hamasei anfibio espezieetatik hamaika Lokizen aurkitzen ahal dira. Horien artean, honako hauek dira aipagarriak, arraroak direlako edo mehatxatuak daudelako: gailurretako uhandrea (Triturus alpestris), endemikoa baita kantauri aldean, eta zuhaitz-igel arrunta (Hyla arborea), Batasunaren intereseko espeziea baita.

Jarraian, kontserbazioaren xede diren eremuko objektu guztiei buruzko informazioa jasotzen da (habitat motak eta Batasunaren intereseko espezieak, Datuen Inprimaki Normalizatuan bilduak daudenak), taula moduan. Gainera, faunako eta florako beste espezie batzuk ere adierazten dira, inprimaki berean jasoak.

Kontserbazio Bereziko Eremu (KBE) honetan aurkitzen diren 92/43/EEE Zuzentarauko habitat motak, eta KBEaren ebaluazioa, horien arabera:

–2009/147/EE Zuzentarauaren 4. artikulua aplikatzekoa duten KBEko espezieak, 92/43/EEE Zuzentarauaren II. eranskinean agertzen direnak, eta BGLaren ebaluazioa, horien arabera:

–Faunako eta florako beste espezie batzuk:

Aurreko balioak kontuan hartuta, habitat batzuk eta KBE honetan dauden edo egon litezkeen flora eta faunako espezie batzuk hautatu dira, lurraldearen adierazgarri diren balio natural guztiak ordezkatzen dituztenak. Habitat eta espezie horiei “gako-elementu” esaten zaie. Izan ere, KBEaren kontserbazio “aktiboa” oinarritzeko ardatz nagusi gisa erabiltzen dira. Hori horrela, gako-elementu guzti-guztietarako proposatutako helburuetatik abiaturik, gaur egungo kontserbazio egoera baldintzatzen duten faktoreak aztertu ondoren, arau, kudeaketako jarraibide eta jarduketa batzuk proposatu dira, KBE osoaren balio naturalak mantentzeko eta hobetzeko aukera ematen dutenak.

Hona hemen KBEa kudeatzeko “gako-elementuak”:

1.–Baso autoktonoak.

2.–Sastrakadiak, larreak eta hezeguneetako habitatak.

3.–Harkaiztiak, hartxingadiak eta leizeak.

4.–Osmoderma eremita eta beste intsektu saproxiliko batzuk.

5.–Anfibioak.

6.–Okil ertaina eta okil beltza.

7.–Hegazti harkaiztarrak.

8.–Saguzarrak.

Gainera, lan arlo hau zehaztu da:

A.–Erabilera publikoa.

III.–Planaren azken helburuak.

Kudeaketak, aurreko atalean aipatutako gako-elementu guztiak kontserbazio egoera onera ahalik eta lasterren eramateko, bilatu behar dituen xede edo helmugak dira azken helburuak.

1.–Baso autoktonoak.

1.1. Azken helburua: Baso autoktonoek kontserbazio egoera ona izan dezaten bermatzea.

2.–Sastrakadiak, larreak eta hezeguneetako habitatak.

2.1. Azken helburua: sastrakadi, larre eta hezeguneetako habitaten kontserbazio egoera ona bermatzea.

3.–Harkaiztiak, hartxingadiak eta leizeak.

3.1. Azken helburua: harkaiztietako, hartxingadietako eta leizeetako habitatak kontserbatzea.

4.–Osmoderma eremita eta beste intsektu saproxiliko batzuk.

4.1. Azken helburua: habitatak ornogabe saproxiliko mehatxatuen espezieak hartzeko duen ahalmena hobetzea.

5.–Anfibioak.

5.1. Azken helburua: anfibioen komunitatearen kontserbazioa bermatzea.

6.–Okil ertaina eta okil beltza.

6.1. Azken helburua: habitatak okil ertaina eta okil beltza hartzeko duen ahalmena handitzea.

7.–Hegazti harkaiztarrak.

7.1. Azken helburua: hegazti harkaiztarrak bertan bizitzeko behar diren habitat-baldintzak bermatzea.

8.–Saguzarrak.

8.1. Azken helburua: habitatak saguzarren espezieak hartzeko duen ahalmena hobetzea.

A.–Erabilera publikoa.

A.1. Azken helburua: erabilera publikoa eta Lekuaren balio naturalen kontserbazioa bateratzea.

IV.–Planaren aplikazioaren ondorioz espero diren emaitzak.

Gerta liteke ezinezkoa izatea planaren azken helburuak edo helmugak lortzea haren indarraldiaren bitartean, arrazoi ekologiko, sozial edo ekonomikoengatik. Horregatik, indarra duen bitartean planaren aplikazioaren ondorioz espero diren emaitzak zehazten dira. Emaitza horiek proposatu diren azken helburuak lortzen lagundu behar dute. Hona hemen, bada, espero diren emaitzak gako-elementuekin eta azken helburuekin egindako numerazioaren arabera:

1.–Baso autoktonoak.

1.1. Helburu operatiboa: baso autoktonoen gaur egungo azalerak kontserbatzea.

1.2. Helburu operatiboa: zuhaitz-masen dibertsitate espaziala eta egitura hobetzea.

1.3. Helburu operatiboa: zuhaitz helduen kontserbazioa bermatzea.

1.4. Helburu operatiboa: baso autoktonoei loturiko intereseko fauna eta flora espezie batzuk hobeki ezagutu eta kontserbatzea.

2.–Sastrakadiak, larreak eta hezeguneetako habitatak.

2.1. Helburu operatiboa: Hezeguneetako habitatak, sastrakadiak eta larreak egoki erabiltzea, kontserbazioa helburu.

2.2. Helburu operatiboa: sastrakadiei, larreei eta hezeguneei lotutako intereseko flora eta fauna espezieen gaineko ezagutza eta haien kontserbazioa hobetzea.

3.–Harkaiztiak, hartxingadiak eta leizeak.

3.1. Helburu operatiboa: harkaizti, hartxingadi eta leizeei lotutako habitaten eta espezieen gaineko ukipenak saihestea.

3.2. Helburu operatiboa: harkaizti, hantxingadi eta leizeen ezaugarri diren landare komunitateak eta flora eta fauna espezieak ezagutzea.

4.–Osmoderma eremita eta beste intsektu saproxiliko batzuk.

4.1. Helburu operatiboa: ornogabe saproxilikoen espezie mehatxatuen kontserbazio egoera ezagutzea.

4.2. Helburu operatiboa: ornogabe saproxilikoen espezie mehatxatuentzat habitat egokia izanen dela bermatzea.

5.–Anfibioak.

5.1. Helburu operatiboa: anfibioen espezieen banaketa eta kontserbazio egoera ezagutzea.

5.2. Helburu operatiboa: anfibioentzat habitat egokia izanen dela bermatzea.

6.–Okil ertaina eta okil beltza.

6.1. Helburu operatiboa: okil ertainen eta okil beltzen kopurua eta banaketa ezagutzea.

6.2. Helburu operatiboa: Okil ertainaren eta okil beltzaren habitatean kalitate egokia bermatzea.

7.–Hegazti harkaiztarrak.

7.1. Helburu operatiboa: hegazti harkaiztarren populazioak nola eboluzionatu duen jakitea.

7.2. Helburu operatiboa: hegazti harkaiztarrentzat behar den eskaintza trofikoa mantentzea.

7.3. Helburu operatiboa: hegazti harkaiztarrentzako arrisku-faktoreak gutxitu eta ezabatzea.

8.–Saguzarrak

8.1. Helburu operatiboa: hobeki ezagutzea saguzarren banaketa eta ugaritasuna.

8.2. Helburu operatiboa: saguzarren habitatak hobetzea.

A.–Erabilera publikoa.

A.1.1. Helburu operatiboa: Lekuan egiten diren erabilera publikoko jarduerak arautzea.

A.1.2. Helburu operatiboa: Informazio eta sentsibilizazio ekintzak egitea Lekuaren balio ekologikoei buruz.

V.–Araudia.

–Araudi orokorra:

1. Oihan-zoruan egiteko aurreikusten den edozein jarduketa otsailaren 21eko 3/2007 Foru Legeak aldatutako Nafarroako Oihan Ondarea Babestu eta Garatzeari buruzko abenduaren 31ko 13/1990 Foru Legearen bidez arautuko da.

2. Ingurumena Babesteko Esku-hartzeari buruzko martxoaren 22ko 4/2005 Foru Legearen eta Ingurumen ebaluazioari buruzko abenduaren 9ko 21/2013 Legearen menpe egonen dira beren eranskinetako batean ageri diren titulartasun publiko nahiz pribatuko plan, programa, proiektu eta jarduerak, haiek sortu, abian jarri edo gauzatzearen ondorioz ingurumenaren baldintzak aldatzen ahal dituztenak, edo ingurumenari, pertsonen osasunari edo segurtasunari eta haien ondasunei kalteren bat eragiten ahal dietenak.

3. Ematen diren baimen guztietan bermatuko da Basa Fauna eta haren Habitatak Babestu eta Kudeatzeari buruzko martxoaren 5eko 2/1993 Foru Legean ezarritakoa betetzen dela eta ez direla ukitzen Batasunaren intereseko animalia eta landare espezieak, ez haien habitatak, ezta Kontserbazio Bereziko Eremua kontserbatzeko garrantzi handia duten paisaiako elementuak ere.

4. Ematen den edozein baimenak bermatuko du Nafarroako Naturguneei buruzko ekainaren 17ko 9/1996 Foru Legean eta Nafarroako natura-erreserbak erabili eta kudeatzeko plan zuzentzaileak onesten dituen uztailaren 6ko 230/1998 Foru Dekretuan ezarritakoa betetzen dela.

5. Ematen diren baimen guztietan bermatuko da honako arau hauetan ezarritakoa beteko dela: batetik, Natur Ondareari eta Biodibertsitateari buruzko abenduaren 13ko 42/2007 Legea, eta bestetik, otsailaren 4ko 139/2011 Errege Dekretua, babes bereziko araubidea duten basa espezieen zerrenda eta espezie mehatxatuen Espainiako katalogoa garatzekoa.

6. Urei buruzko Legearen Testu Bategina onetsi zuen uztailaren 20ko 1/2001 Legegintzako Errege Dekretuan ezarritakoa aplikatu beharko da, baita obra hidraulikoen arloko zerbitzuak Estatuko Administraziotik Nafarroako Foru Komunitatera eskualdatzeko azaroaren 18ko 1391/1988 Errege Dekretuan ezarritakoa ere.

7. Aplikatuko dira, orobat, Hondakinak hondakindegietan bilduz deuseztatzea arautzen duen martxoaren 28ko 23/2011 Foru Dekretua eta Hondakin eta Lurzoru Kutsatuei buruzko uztailaren 20ko 22/2011 Legea, baita martxoaren 28ko 23/2011 Foru Dekretua ere, Nafarroako Foru Komunitatearen lurralde eremuan eraikuntzako eta eraispenetako hondakinen produkzioa eta kudeaketa arautzen dituena.

–Berariazko araudia:

1.–Habitatak, flora eta fauna.

1.1. Lekuaren habitatak ukitzen dituzten erabilera eta jarduketetan, haien kontserbazioa bermatzeko behar diren baldintzak jaso beharko dira, salbu eta tartean giza-osasunari eta segurtasun publikoari lotutako arrazoiak badaude.

1.2. Debeku da urak kutsatzeko edo Lekua degradatzeko arriskua ekar dezaketen hondakin solidoak, obra-hondakinak edo substantziak uztea ibaian.

1.3. Intereseko flora mehatxatua duten lekuneetan egiten diren erabilera eta jarduketetan, haien kontserbazioa bermatzeko behar diren baldintzak sartu beharko dira.

1.4. 92/43/EEE Zuzentarauan dauden eta kontserbazio egoera onean dauden larreek eta sastrakadiek hartutako eremuetan ez da luberritzerik edo ereiterik eginen.

1.5. Aireko azpiegituren proiekturik ez da baimenduko, bereziki haize-sorgailuak eta goi tentsioko lineak jartzekoak hegaztientzat interesekoak diren malkarretan.

1.6. Abereentzako idoi berriak eraikitzeko eta lehendik daudenak hobetzeko proiektuek anfibioen kontserbazioa bermatzeko neurriak bilduko dituzte, baita basa faunako espezieak itotzea eragozteko neurriak ere.

1.7. Saguzarrak dituzten lekuneak ukitzen dituzten erabilera eta jarduketetan, haien kontserbazioa bermatzeko behar diren baldintzak jaso beharko dira, salbu eta tartean giza-osasunari eta segurtasun publikoari lotutako arrazoiak badaude.

1.8. Faunaren eta floraren aldetik interes handikoak izanik kontserbazio egoera onean dauden harkaiztietan egiten diren erabileretan eta jarduketetan, behar diren baldintzak bete beharko dira haien kontserbazioa bermatzeko.

1.9. Leku horretako harkaiztietan eskaladako bide berriak irekitzeko edo ekipamendu berria jartzeko, Basaurako natura-erreserban izan ezik, beharrezkoa izanen da ingurumenaren arloan eskumena duen departamentuaren baimena edukitzea.

2.–Basaurako natura-erreserba (RN-15).

2.1. Ehiza jarduerak kasuan kasuko ehiza antolatzeko planean arautuko dira. Nolanahi ere, natura-erreserba honetako malkarretan, abenduaren 31tik aurrera, debekatuta egonen da ehizaldiak egitea malkarretik 100 metrotik beherako tartean, haren goiko aldetik neurtuta.

2.2. Basoen kudeaketaren helburua izanen da Lekuaren berezko habitat naturalak eta erdi naturalak kontserbatu eta hobetzea, 92/43 EEE Zuzentarauarekin bat.

2.3. Egurraren aprobetxamendua eta artzaintza baimenduko dira Lekua kontserbatzeko helburuekin bateragarriak diren heinean.

2.4. Kirol jarduerak debekatuta daude, bereziki eskalada eta arroila-jaitsierak.

2.5. Jarduera didaktikoak egokiturik eta behar bezala seinaleztaturik dauden bideetatik eginen dira.

2.6. 230/1998 Foru Dekretuaren I. eranskinean ezarritakoa gorabehera, lagun egiteko animaliak sartzen ahalko dira baldin eta gehienez metro bateko uhal sendo edo kate batekin lotuta baldin badaude. Animalia horiek ez diete inolako eragozpenik sortuko ez pertsonei, ez natura-erreserbako faunari. Animalia horien edukitzaileek beren maskotek utzitako gorozkiak bildu beharko dituzte.

2.7. Aurrekoa gorabehera, debeku da lagun egiteko animaliarik sartzea natura-erreserba honen barrenean dagoen Basaulako leizean.

Habitatei, florari eta faunari buruzko berariazko araudiaren 1. ataleko 1.1. arautik 1.8.era bitartekoetan ezarritakoa aplikatuko da.

VI.–Kudeaketarako jarraibide edo orientazioak.

Kudeaketarako jarraibide edo orientazio hauek gomendio gisa hartu behar dira, eta aplikatu beharrekoak izanen dira, kontrakoa justifikatzen duen arrazoi oinarriturik ez badago.

1. Basoberritzeko proiektuetan sustatuko da bertako eta, ahal den neurrian, jatorriko eskualde bereko espezieak erabiltzea.

2. Haritzerako izan daitezkeen eremuetan, basogintza-neurriak aplikatuko dira pagoaren aurrean haritza lehenesteko.

3. Oraingo soilguneak ez dira basoberrituko, non ez dagoen horren aldeko ingurumen txostenik.

4. Birsortzeko mozketak egin diren unadetan edo, azken mozketa egin ondoren, espero zen berezko birsorkuntza gertatu ez denetan soilgune berriak sortzea lehenetsiko da.

5. Basoetan, lurrean edo zutik dagoen zur hila errespetatuko da.

6. Pagadien azken mozketan, gutxienez 8-10 zuhaitz heldu kontserbatuko dira hektarea bakoitzeko, mendian duten ziklo biologikoa buka dezaten. Zuhaitz horiek ingurumen arloko irizpideei jarraikiz aukeratuko dira.

7. Bigarren mailako espezieak errespetatuko dira, eta haiek bizirik irauteko ahaleginak eginen dira. Bigarren mailako zuhaitz espezie horiek baldin badaude birsortzeko mozketak egin behar diren eremuetan, behar diren neurriak hartuko dira espezie horiek mendian irauteko eta haien berezko birsorkuntza bermatzeko, espezie bakoitzaren behar ekologikoekin bat datozen jarduketen bidez.

8. Basolanetan eta beste edozein jardueretan, zuhaitz-masetako bazterren inguruko zuhaixkak errespetatuko dira. Posible ez denean, jarduketa bukatutakoan lehengoratuko dira.

9. Interes ekologikoa duten zuhaitzek irautea bermatuko da (zuhaitz zaharrak eta lepatuak).

10. 92/43/EEE Zuzentarauan adierazitako habitatak dituzten eremuak ongarritzeko eta/edo medeatzeko lanetan, tratatu beharreko eremuak, osagaiak eta erabiliko den dosia zehaztuko dira. Nolanahi ere, bermatu beharko da landaretza naturala ez dela ukituko, ezta lurzoruaren eta uren ezaugarriak ere. Gainera, proiektu jakin batek, iraganean gauzatu diren jarduketei dagokienez, izan dezakeen metatze efektua aintzat hartu eta aztertuko da.

11. Belar-sastrakak garbituko dira halako moduan non ondoriozko paisaia-egitura izanen baita larreen eta sastraken mosaiko heterogeneo eta orekatu bat. Gainera, mosaiko gisako egitura hori faboratzearren, belar-sastrakak garbitu ondoren, eremuaren %15, gutxienez, zuhaitzek, zuhaixkek edo sastrakek okupatuko dute.

12. %50etik gorako maldetan, ez da belar-sastrakarik garbituko larreak hobetzeko. Gainera, jarraibide hori aldatzen ahalko da, eta murritzaileago bihurtu eremu ahuletan.

13. Belar-sastrakak garbitu beharreko eremuetan, babestu beharreko elementu ekologiko interesgarriak mugatuko dira.

14. Belar-sastrakak garbitu beharreko eremuetan, 2 metrotik gorako zuhaixka-formazioak eta zuhaitz eiteko espezieak kontserbatuko dira, baita horien inguruko zuhaixka-zerrenda ere, ahal den neurrian basotxo txikiak sortuz.

15. Belar-sastrakak garbitu beharreko eremuetan, ahaleginak eginen dira lurra eraldatzeko.

16. Ehiza Antolatzeko Planean, Lekuaren barreneko natura-erreserbaren eremua ehiza erreserba edo babeslekutzat hartuko da.

17. Abuztutik ekainera, Rosalia alpinaren ugalketa garaian, ahal dela enbor pilaketek ahalik eta gutxien iraunen dute lursailetan, espezieak bertan arrautzarik ez jartzeko.

18. Idoiak babesteko itxiturak paratzean, zerrenda zabalak izanen dira barneko aldean (10 eta 30 metro zabal artekoak), eta, ahal delarik, larreen eta sastraken gradienteak eta harri eta arroka pilaketak izanen dituzte.

19. Idoien inguruan, 250 metroko babes zerrenda batean, aurreneurri zorrotzak hartuko dira ingurunea ukitzen duen edozein jarduketa motari ekin aurretik (egur parkeak, bidezidorrak, sastrakak garbitzeko lanak, etab.).

20. Hezeguneen egitura ukitzen duten jarduketak (garbiketak, dragatzeak, sakontzeak, tamaina aldaketak) agorraldian eginen dira (uda akaberatik udazkenaren erdialdera), anfibioei ukipenik txikiena eragiteko.

21. Anfibioentzako idoi berriak sortzeko proiektuen eraikuntza diseinuetan, kontuan hartuko da espezie horiek bizi eta ugaltzeko ingurumen baldintza egokiak sortzea, eta, horretarako, gutxienez, honako hauek beteko dira: ontziaren egitura irregularra eta sakonera txikikoa izatea, ur bazter etzanekin, babeslekuak jartzea (harkaitzak, enborrak, etab.) eta, ahal dela, material organikoak erabiltzea irazgaizte-lanetarako.

22. Suteei aurre egiteko edo abereentzako idoi berriak eraikitzeko proiektuetan, baita orain daudenak hobetzekoetan ere, ezpondetako bat bederen etzana izanen da, faunak barrenetik ihes egin ahal izateko.

23. Okil ertaina eta okil beltza hazteko eremuak barne hartzen dituzten zuhaiztietan ez da basolanik eginen otsailaren 15etik ekainaren 15era bitarteko aldi kritikoan, baldin eta makineria erabiltzen eta zarata ateratzen badute,

24. Lokizen eraginpeko eremuan, ugatzarentzako elikadura osagarriko gune berariazko bat behintzat bermatuko da.

25. Ustez pozoiturik hil diren animaliak atzemanez gero, Nafarroako Gobernuak animalia pozoituentzat ezarri duen jarduketa protokoloari jarraituko zaio.

26. Itxiturak egitean, ixteko tipologia bateragarria izanen da fauna espezieen kontserbazioarekin.

27. Bordak egin eta konpontzeko proiektuetan, neurriak hartuko dira saguzarren kontserbaziorako.

VII.–Jarduketak.

Plan honek indarra duen eperako, jarduketa hauek ezarri dira:

1.–Zuhaiztiei lotutako neurriak.

1.1. Lekuaren mugaketa berrian sartutako habitaten eremu berrien inbentarioa eta kartografia egitea.

1.2. Haginak dituzten eremuak lokalizatu eta mugatzea eta hagin horien kontserbazio egoera ebaluatzea.

1.3. Lekuan hagina kontserbatzeko proiektu pilotu bat gauzatzea, El Raso del Aguín izeneko parajeko hagin basotik eta mendilerroan sakabanatuak dauden hagin multzoetatik abiatuta.

1.4. Galbarra ibaiko haltzadia lehengoratzeko proiektu bat gauzatzea.

1.5. Karraskadien egitura eta dibertsitate espaziala hobetzeko proiektu pilotu bat gauzatzea.

1.6. Karraskadiak eta hariztiak hobetzeko, oihan plangintzarako tresnetan proposatuta dauden basolanekin jarraitzea.

1.7. Lekuko baso-masaren barnean soilguneak mantentzeko neurriak ezartzea.

1.8. Galdioko hariztian belar-sastrakak garbitzea aldian behin, zuhaixka-landareak kontrolatzeko.

1.9. Harizti helduen kontserbazio egoera ebaluatzea eta haiek kontserbatzeko neurriak ezartzea.

1.10. Zuhaitz helduak eta lepatuak kontserbatu eta hobetzeko jarduketak egitea.

2.–Larre eta sastrakadiei lotutako neurriak.

2.1. Larre eta sastrakadiak kontserbatzeko plana prestatzea habitat horiek ageri diren eremu nagusietan.

2.2. Nekazaritza bultzatzen duten jarduketak egitea, larre eta sastrakadiak kontserbatzeko planaren arabera.

2.3. Nekazaritzako Elikagaien Teknologien eta Azpiegituren Institutuarekin eta NNPEK-Nafarroako Nekazaritzako Produkzio Ekologikoaren Kontseiluarekin elkarlanean, entitate titularren eta abeltzainen artean sustatzea larreak “produkzio ekologikoko eremutzat” jotzea, interesa duten ekoizleek lur horiek erabili ahal izatea bermatzeko.

2.4. Larreen azalera handitzea, plan honen indarraldia bitartean belar-sastrakak garbituz gutxienez 50 ha-tan, batez ere ezpeldietan.

2.5. Belar-sastrakak garbitzeko jarduketak ebaluatzea, baita aparteko larre eta sastrakadien kontserbazioan duten eragina ere.

2.6. Hezeguneetako habitaten inbentario zehatza, batez ere sahastiena eta idoiei lotutako habitatena.

3.–Faunari lotutako neurriak.

3.1. Euphydryas auriniaren presentzia eta kopurua zehazteko laginketak egitea.

3.2. Miru gorriaren zentsuak aldian behin egitea.

3.3. Coenagrion mercurialearen presentzia eta kopurua zehazteko prospekzioak egitea.

3.4. Larreei eta sastrakadiei lotutako hegaztien komunitateak aldian behin monitorizatzea, hala nola, antzandobi arrunta, landa-txirta, pirripioa, etze-txinboa eta berdantza miarritza.

3.5. Parnassius apolloren presentzia eta kontserbazio egoera zehazteko laginketak egitea.

3.6. Intsektu saproxiliko mehatxatuen kontserbazio egoera finkatzea eta espezie horientzako monitorizazio programa bat abian jartzea.

3.7. Galdioko harizti helduan Osmoderma eremitaren populazioa aldian behin monitorizatzea.

3.8. Lekuan dauden anfibioen kontserbazio egoera finkatzea eta haren kontserbaziorako gako-eremuak identifikatzea.

3.9. Anfibioen populazioak monitorizatzeko programa bat martxan jartzea.

3.10. Hezeguneen inbentarioa eta karakterizazioa egitea, anfibioen aterpe izateko duten ahalmenaren arabera.

3.11. Idoi eta uharka ez-funtzionalak berreskuratzea, eta anfibioentzako hezegune berriak ezartzea, batez ere gailurretako uhandrearentzat, haren kontserbazioa faboratzen duten eraikuntza tekniken bidez.

3.12. Karraska-masa handien barnean hezegune txikien sare bat osatzea.

3.13. Anfibioen kontserbaziorako idoi garrantzitsuenak ixtea eta haien ondoan abereentzako askak instalatzea.

3.14. Iragazgaizte plastikoa duten idoietan faunarentzako ihesbideak instalatzea.

3.15. Okil ertainaren eta okil beltzaren errolda egitea eta haien kontserbaziorako interesgarriak diren eremuak ezartzea.

3.16. Okil ertainen eta okil beltzen populazioak monitorizatzeko programa bat martxan jartzea.

3.17. Lekuan bertan eta inguruetan ugatza monitorizatzeko urtero egiten diren lanei jarraipena ematea.

3.18. Lekuan bertan eta inguruetan sai arrea, arrano beltza, sai zuria eta belatz handia monitorizatzeko lanei jarraipena ematea.

3.19. Sai zuriaren lurraldeak zehazteko erroldak egitea aldian behin, eta horien produktibitatea kalkulatzea.

3.20. Lekuko eta inguruko abeltzaintza instalazioetarako deribazio elektrikoen diagnostikoa egitea, hegaztientzako arriskuaren arabera, eta behar izanez gero, haiek zuzentzea.

3.21. Lekuan eta inguruan hegaztientzat arriskutsuak diren linea elektrikoak zuzentzen segitzea.

3.22. Basoetako/Zuhaitzetako saguzarren egungo egoeraren diagnostikoa egitea, espezie bakoitzarentzako habitata hautatzea eta eremu interesgarrienak eta babesleku garrantzitsuenak identifikatzea.

3.23. Prospekzioak egitea bordetan eta aterpeetan leizeetako saguzarren koloniarik ote dagoen jakiteko.

3.24. Aldian behin monitorizatzea bai ezagutzen diren leizeetako saguzarren koloniak, baita hemendik aurrera aurkitzen direnak ere.

3.25. Basoetako saguzarrentzako aterpe-kutxak instalatzea.

4.–Florari lotutako neurriak.

4.1. Prospekzioak egitea Orchis italicaren presentzia eremua eta populazioak zehazteko eta Narcissus gr. pseudonarcissus ote dagoen konfirmatzeko.

4.2. Prospekzioak egitea sastrakadien eta larreen habitatei lotutako flora espezie interesgarri eta mehatxatuen banaketa eremua ezagutzeko.

4.3. Harkaiztietako eta hartxingadietako habitatei loturiko floraren azterlan zehatza egitea.

5.–Erabilera publikoari lotutako neurriak.

5.1. Malkarretan eta haien inguruetan egiten diren kirol eta aisialdiko jarduerek Lekuko hegazti harkaiztarren kontserbazioan duten eraginari buruzko azterketa bat egitea, eta jarduera horiek BGLko harkaiztietan arautzea, espezie horien kontserbazioarekin bateragarriak izan daitezen, batez ere, habia egiteko aldi kritikoetan.

5.2. Lekuaren balioei buruzko materialak prestatzea, gizartea sentsibilizatzeko asmoz zabal daitezen.

6.–Basaurako natura-erreserba (RN-15).

6.1. Jendea Basaulako leizean sartzeko arauak ezartzea, natura-erreserba honetan kokatzen baita, baimena duten pertsonak baizik sar ez daitezen. Baimen horiek emateko orduan, kontuan hartuko da saguzarrak ugaltzeko eta negua igarotzeko aldi kritikoak.

6.2. Saguzarren kontserbazioari eta Basaulako leizean sartzeko arauei buruzko informazio eta sentsibilizazio neurriak hartzea.

Kudeaketa plan honen Jarduketak izeneko VII. ataleko 3.18, 3.20, 3.21, 3.22, 3.24, 4.3 eta 5.1 neurriak aplikatu beharko dira.

VIII.–Kudeaketa planaren finantzaketa.

Landa Garapeneko, Ingurumeneko eta Toki Administrazioko Departamentuak honako hauek hartuko ditu bere gain:

–Gunearen kontserbazio egoera ona bermatzen duten mantentze eta lehengoratze proiektuak gauzatzeko behar diren diru zenbatekoak.

–Ekipamenduak eta kudeaketaren egitura mantentzeko behar diren diru zenbatekoak.

–Erabilerak eta jarduerak mugatzearen ondoriozko kalte-ordainak ordaintzeko behar diren kontu-sailak.

–Plana gauzatzeko eta haren helburuak lortzeko behar diren bestelako kontu-sailak.

Hori guztia ordainduko da horretarako kreditu egokia baldin badago. Beraz, behar diren konpromisoak hartuko dira unean-unean aurrekontuan dagoen diruaren arabera.

Nafarroako Gobernuko departamentuek beren politika sektorialak ingurumenean integratzeko sustatzen dituzten jarduketek, baita toki entitateek sustatzen dituzten ekintzek eta ekarpen pribatuekin edo Europar Batasunaren ekarpenekin egiten direnek ere, laguntzen ahal dute plan hau garatzen.

KBEa ongi kontserbatzen laguntzen duten jarduketek Landa Garapeneko, Ingurumeneko eta Toki Administrazioko Departamentuaren finantzaketa osoa izan dezakete, betiere diru-laguntzen arloko araudiak ezartzen duen esparruaren barrenean. Inguruko biziguneen garapen sozioekonomikoa sustatzeko asmoz, departamentu honen menpeko beste edozein laguntzatan, ahal denean, lehentasuna emanen zaie, guneen kontserbazioarekin bateragarriak izanik, Kontserbazio Bereziko Eremu honen barnean proposatzen diren jarduketei. Gainera, laguntzaren portzentajea handiagoa izanen da, eremu horretatik kanpo edo beste edozein naturagunetatik kanpo proposatzen diren beste jarduketa batzuekin alderatuta. Halaber, Landa Garapeneko, Ingurumeneko eta Toki Administrazioko Departamentua aurrekontuetatik kanpoko funtsak aplikatzen saiatuko da, baldin haien helburua plan honetan aurreikusitako ekintzen bat garatzea bada.

IX.–Mugak.

Nafarroako Naturaguneei buruzko ekainaren 17ko 9/96 Foru Legearen 28. artikuluan xedatu bezala ordainduko dira erabilerak eta jarduerak mugatzearen ondoriozko kalte-ordainak. Hala ere, bestelako ordainak ere hitzartzen ahalko dira, hala nola laguntzak, diru-laguntzak, zerbitzuak ematea edo bestelako sustapenak.

X.–Jarraipen programa.

Jarraipena egiteko programa bat ezartzen da, plana ongi gauzatzen dela eta haren helburuak lortzen direla bermatzeko. Programa horrek objektiboki egiaztatzen ahal den adierazle bat izanen du, gutxienez, helburu bakoitzerako.

Urtero, programa horren emaitzen eta, oro har, planaren gauzatze-mailaren berri emanen zaio Gidaritza Batzordeari.

Lortutako emaitzei erreparatuta ikusten bada espero ziren emaitzen aldean desbiderapenak gertatu direla edo emaitzak ezin izanen direla lortu aurreikusitako epean, kudeaketaren eragingarritasuna eta eraginkortasuna hobetzeko behar diren neurri guztiak eransten ahalko zaizkio planari.

XI.–Mugaketa-mapa eta barnean dauden entitateak.

Deskargatu mapa(PDFa).

XII.–Kontserbazioaren xede diren objektuen eta ezarritako arauen, jarraibideen eta neurrien arteko egokitasuna.

Atal honetan, KBEa kudeatzeko gako-elementuen definizioak, planaren azken helburuak, planaren aplikaziotik espero diren emaitzak (helburu operatiboak) eta aurreikusitako jarduketak (neurriak) jaso dira, taula moduan, leku honetan kontserbazioaren xede den elementu bakoitzarentzat.

Taulan agertzen diren siglek hau esan nahi dute:

EC: gako-elementua.

OF: azken helburua.

OO: helburu operatiboa.

N: araua.

D: jarraibidea.

M: neurria.