50. ALDIZKARIA - 2017ko martxoaren 13a

1. NAFARROAKO FORU KOMUNITATEA

1.7. BESTELAKOAK

494/2017 EBAZPENA, otsailaren 24koa, Nafarroako Unibertsitate Publikoko errektoreak emana. Haren bidez agintzen da argitaratzeko 2016ko otsailaren 23ko Gobernu Kontseiluak onetsi zuen “Erabakia, Batxilergoaren Ebaluazioa Unibertsitatean Sartzeko probako irakasgaiak haztatzeko parametroak onesten dituena, 2017/2018 ikasturtetik aurrera unibertsitateko graduko ikasketa ofizialetan onartua izateko”.

Maiatzaren 12ko 110/2003 Foru Dekretuak onetsitako Unibertsitateko Estatutuetako 40. artikuluak ematen dizkidan ahalmenak erabiliz, 2017ko otsailaren 23an Gobernu Kontseiluak hartu zuen erabakia argitaratzeko agintzen dut. Erabaki horren bidez onetsi ziren “Batxilergoaren Ebaluazioa Unibertsitatean Sartzeko probako irakasgaiak haztatzeko parametroak, 2017/2018 ikasturtetik aurrera unibertsitateko graduko ikasketa ofizialetan onartua izateko”.

ERABAKIA, BATXILERGOAREN EBALUAZIOA UNIBERTSITATEAN SARTZEKO PROBAKO IRAKASGAIAK HAZTATZEKO PARAMETROAK ONESTEN DITUENA, 2017/2018 IKASTURTETIK AURRERA UNIBERTSITATEKO GRADUKO IKASKETA OFIZIALETAN ONARTUA IZATEKO

Abenduaren 9ko 5/2016 Errege Lege Dekretuak aldatzen duen hezkuntzaren kalitatea hobetzeko abenduaren 9ko 8/2013 Lege Organikoaren bosgarren azken xedapenak bere hirugarren idatz-zatian ezartzen du unibertsitate-ikasketak egin nahi dituzten ikasleek egin beharko duten Batxilergoaren Ebaluazioa Unibertsitatean Sartzeko proba.

Aipatu Errege Lege Dekretuaren argitaratzea atzeratu denez, ezin izan da bete unibertsitateko gradu-ikasketa ofizialetan sartzeko prozeduren oinarrizko araudia ezartzen duen ekainaren 6ko 412/2014 Errege Dekretuaren 4. artikuluaren 7. idatz-zatian ezarritakoa, hots, urtebete lehenago argitaratzea unibertsitateko graduko ikasketa ofizialetan onartua izateko aplikatuko diren prozedurak, horien edukia, funtzionamendu-arauak eta datak, balioespen- eta haztatze-irizpideak eta baremoak, bai eta ikaspostuak esleitzeko lehentasunezko ordena ezartzeko aplikatuko diren arauak ere.

Batxilergoaren Ebaluazioa Unibertsitatean Sartzeko proba berriak aurreko hezkuntza-sistemako batxilergoan existitzen ez ziren irakasgai haztagarriak ditu; hortaz, beharrezkoa da horiek onestea eta argitaratzea, 2017/2018 ikasturteko ikasleen onarpen-prozesuan aplikatu ahal izateko.

Azaldutako guztiarengatik, honako hau da, Ikasleen gaietarako, Enplegurako eta Ekintzailetzarako errektoreordeak proposatuta, bere kideek aurretik eztabaidatuta, Gobernu Kontseiluak 2017ko otsailaren 23an egindako ohiko bileran hartu duen,

ERABAKIA:

Lehena.–Eranskinean adierazitako haztatze-parametroen balioak onestea. Batxilergoaren Ebaluazioa Unibertsitatean Sartzeko probako irakasgaiei dagozkien parametro horiek haztagarriak izango dira Nafarroako Unibertsitate Publikoan ematen diren graduko ikasketa ofizialetan onartua izateko, aipatu ikasketa ofizial horietan onartua izateko nota kalkulatzeko.

Bigarrena.–Erabaki honen bidez onetsi diren haztatze-parametroak aplikatzekoak izango dira aipatu graduko ikasketa ofizialetan onartuak izateko, 2017/2018 ikasturtetik aurrera.

Hirugarrena.–Erabaki hau helaraztea Ikasleen gaietarako, Enplegurako eta Ekintzailetzarako Errektoreordetzara, Irakaskuntzako Errektoreordetzara, Irakaskuntza Zerbitzura eta Sarbidea, Bekak eta Tituluak Atalera.

Laugarrena.–Nafarroako Aldizkari Ofizialean argitaratu eta biharamunean hartuko du indarra erabaki honek.

Iruñean, 2017ko otsailaren 24an.–Errektorea, Alfonso Carlosena.

ERANSKINA

Batxilergoaren Ebaluazioa Unibertsitatean Sartzeko proban gainditutako irakasgaiak haztatzeko parametroak, Nafarroako Unibertsitate Publikoak ematen dituen Graduko ikasketa ofizialetan onartua izateko notak kalkulatzeko (PDFa).

Iragarkiaren kodea: F1702568