39. ALDIZKARIA - 2017ko otsailaren 24a

1. NAFARROAKO FORU KOMUNITATEA

1.7. BESTELAKOAK

23E/2017 EBAZPENA, urtarrilaren 30ekoa, Ekonomia Zirkularraren eta Uraren Zerbitzuko zuzendariak emana, hiri hondakinen tratamendurako planta baten eta hondakin ez-arriskutsuen hondakindegi baten instalazioaren Ingurumen baimen integratua ofizioz aldatzen duena, Carcarko udal mugapean. Instalazioaren titularra Servicios de Montejurra SA da.

Instalazio horrek badu Ingurumen baimen integratua, Ingurumeneko zuzendari nagusiaren urriaren 29ko 2125/2004 Ebazpenaren bidez emana, gero Ingurumenaren eta Uraren zuzendari nagusiaren ekainaren 21eko 521/2013 Ebazpenaren bidez eguneratua.

2016ko irailaren 27an titularrak ingurumen baimen integratuan dauden baldintzak aldatzeko eskatu du. Zehazki, honako hauek:

1. Hondakin berriak gehitzea instalazioan kudeatzeko baimenduta dauden hondakinen zerrendan eta hondakin ekoiztuen zerrendan.

2. Konposta fintzeko lerroari dagokion 1. zenbakiko isurketa fokuan kontrola egiteko beharra kentzea.

3. Hondakinak itxitako hondakindegian (iragazgaiztu gabeko eremu batean) botatzeko baimena.

4. Hondakinen tenperaturaren kontrola kentzea hondakindegiko sarreran.

5. Kudeatutako hondakinetan, gai organikoaren frakzioa ezaugarritzeko maiztasuna murriztea.

6. Zenbait hondakinen beheko berotze-ahalmenaren ezaugarritzea atzeratzea, Nafarroako Hondakinak Kudeatzeko Planak halako hondakinen balorizazio energetikoa aurreikusten duen bitartean.

Ingurumen Ekonomia Zirkularraren eta Uraren Zerbitzuak, aurkeztutako eskaera aztertuta, ondorioztatu du onargarria dela lehen aldaketa; izan ere, eskatzen dena bat dator instalazioak ingurumen aldetik eduki beharreko funtzionamendu egokiarekin eta eskura dauden teknika onenen aplikazioarekin.

Halaber, eskatu den bigarren aldaketa partez da onargarria; hartara, bidezkoa da kanpoko kontrolari eustea soilik saiakuntza laborategi baimendu baten bidez, ingurumen baimen integratuan ezarritako maiztasunarekin bat.

Baina eskatu diren gainerako lau aldaketak ez dira onargarriak arrazoi hauengatik:

–Hirugarrena, itxitako hondakindegiaren eremuak iragazgaizteko neurririk ez duelako. Hori ezinbesteko eskakizuna da, Hondakinak hondakindegietan bilduz deuseztatzea arautzen duen abenduaren 27ko 1481/2001 Errege Dekretuak ezarria.

–Laugarrena, abenduaren 27ko 1481/2001 Errege Dekretuak, bere II. eranskinean, zehazten duelako hondakinen karga bakoitza begiz ikuskatu beharra dagoela, gutxienez hondakindegiak deskargatu aurretik eta ondoren, eta, besteak beste, hondakinen tenperatura hartu behar dela.

–Bosgarrena, jasota ez dagoelako gai organikoaren frakzioaren ezaugarritzeak aurkeztu direla, ingurumen baimen integratuan ezarritakoarekin bat. Laburpen bat baino ez da aurkeztu, eta horrek ez du beharrezko informazioa ematen. Halaber, ez dago justifikatuta eskatzen den maiztasunarekin ezaugarritu dela. Hori dela eta, ez da bidezkoa ezaugarritzeko maiztasuna murriztea, hori justifikatzeko daturik ez dagoen bitartean.

–Eta, seigarrena, baloratu behar delako, hondakinak kudeatzeko hierarkiarekin bat, hondakinen balorizazio energetikoa egin daitekeen, hondakindegian kudeatu aurreko aukera gisa.

Bestalde, bidezkoa da instalazioaren baimenak egokitzea, instalazioan egiten diren prozesuekin bat. Horrek esan nahi du transferentzia-biltegi gisa hondakin ez-arriskutsuak kudeatzeko baimena eransten dela eta instalazioko gasolio biltontziaren edukieraren balorea zuzentzen dela.

Kasu honetan, Ingurumena Babesteko Esku-hartzeari buruzko martxoaren 22ko 4/2005 Foru Legea garatzen duen Erregelamenduaren 27. artikuluko d) letran aurreikusitako inguruabarrak gertatzen direla iritzi da, eta, horrenbestez, bidezko da Ingurumen baimen integratuan ezarritako baldintzak ofizioz aldatzea, Ingurumena Babesteko Esku-hartzeari buruzko martxoaren 22ko 4/2005 Foru Legea garatzen duen Erregelamenduaren 28. artikuluan aurreikusitako administrazio prozedurarekin bat, eta ez da bidezkotzat jo aldaketa-espediente hau jendaurrean jartzea.

Ebazpen proposamenaren tramitazio prozesuan entzutea eman zaio instalazioaren titularrari hogeita hamar egunez, eta ez du proposamenaren aurkako alegaziorik aurkeztu.

Adierazitakoarekin bat, eta Ingurumeneko eta Lurraldearen Antolamenduko zuzendari nagusiak urriaren 4an emandako 760/2016 Ebazpenaren bidez eskuordetu dizkidaten eskumenak erabiliz,

EBATZI DUT:

Lehena.–Carcarko udal mugapean, hiri hondakinen tratamendurako planta baten eta hondakin ez-arriskutsuen hondakindegi baten instalazio baten Ingurumen baimen integratua ofizioz aldatzea, ebazpen honen eranskinean zehaztutako aldaketen arabera. Hortaz, instalazioak eta jarduerak berak instalazioari Ingurumen baimen integratua emateko administrazio espedienteetan ezarritako baldintzak bete beharko dituzte, eta, horiez gainera, ebazpen honen eranskinean adierazitako baldintzak eta neurriak. Instalazioaren titularra Servicios de Montejurra SA da.

Bigarrena.–Hondakin ez-arriskutsuen kudeatzailearen baimena mantentzea instalazioari, Nafarroako Foru Komunitateko Hondakinen Ekoizpenaren eta Kudeaketaren Erregistroan, 15G04066008322013 erregistro zenbakiarekin. Halaber, hondakin arriskutsuen kudeatzailearen baimena ematea biltegi gisa, eta Nafarroako Foru Komunitateko Hondakinen Ekoizpenaren eta Kudeaketaren Erregistroan inskribatzea, 15G05066008322016 erregistro zenbakiarekin. Kudeatzen ahal dituen hondakinak eta hondakin horiek tratatzeko gauzatzen ahal dituen eragiketak ebazpen honen I. eranskinean ageri dira. Halaber, titularrak hondakinen kudeaketan izandako edozein aldaketa jakinarazi beharko dio Nafarroako Gobernuko Ekonomia Zirkularraren eta Uraren Zerbitzuari. Baimenak zortzi urteko indarraldia izanen du, eta automatikoki berrituko da beste horrenbeste urteko aldietarako, Hondakin eta Lurzoru Kutsatuei buruzko uztailaren 28ko 22/2011 Legearen 27.8 artikulua aplikatuz (Hondakinak tratatzeko eragiketen baimena). Sozietatearen helbidea dagoen autonomia erkidegoan ingurumen arloan eskumena duen organoak III. eranskinean adierazitako tratamenduak egiteko baimendutako entitate batek ustiatuko du instalazioa, uztailaren 28ko 22/2011 Legearen 27.2 artikuluan ezarritakoarekin bat.

Hirugarrena.–Ebazpen honetan bildu diren baldintzak ez betetzeak berarekin dakar ingurumeneko diziplina neurriak hartzea, hain zuzen ere, Kutsaduraren Prebentzio eta Kontrol Integratuei buruzko uztailaren 1eko 16/2002 Legearen IV. tituluan jasotakoak, galarazi gabe sektoreko legerian ezarritakoa, aplikatzekoa izaten segituko baitu, eta, horren osagarri, Ingurumena Babesteko Esku-hartzeari buruzko martxoaren 22ko 4/2005 Foru Legearen VI. tituluan ezarritako zehapen araubidea.

Laugarrena.–Ebazpen hau Nafarroako Aldizkari Ofizialean argitaratzea.

Bosgarrena.–Ebazpen honek ez du administrazio bidea amaitzen, eta interesdunek, administrazio publikoek izan ezik, gora jotzeko errekurtsoa jar dezakete haren aurka, Landa Garapeneko, Ingurumeneko eta Toki Administrazioko Departamentuko kontseilariari zuzendua, hilabeteko epean. Administrazio publikoek zilegi dute administrazioarekiko auzi-errekurtsoa jartzea, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean. Horrek ez du galarazten Nafarroako Gobernuan aldez aurreko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean. Epeak ebazpen hau jakinarazi eta biharamunetik hasita kontatuko dira.

Seigarrena.–Ebazpen hau Servicios de Montejurra SAri, Carcarko Udalari eta Barne Zuzendaritza Nagusiko Babes Zibilerako Zerbitzuari igortzea, behar diren ondorioak izan ditzan.

Iruñean, 2017ko urtarrilaren 30ean.–Ekonomia Zirkularraren eta Uraren Zerbitzuko zuzendaria, César Pérez Martín.

Oharra: ebazpen honetan aipatzen diren eranskinak interesdunen eskura egonen dira Ingurumeneko eta Lurraldearen Antolamenduko Zuzendaritza Nagusiaren bulegoetan (González Tablas kalea, 9, behea, Iruña), Ingurumen Kalitatearen eta Klima Aldaketaren Zerbitzuan eta Nafarroako Gobernuaren webgunean: http://www.navarra.es/home_es/Temas/Medio+Ambiente/Evaluacion+ambiental/Autorizaciones+ambientales/.

Iragarkiaren kodea: F1701320