39. ALDIZKARIA - 2017ko otsailaren 24a

1. NAFARROAKO FORU KOMUNITATEA

1.7. BESTELAKOAK

403/2017 EBAZPENA, otsailaren 2koa, Hezkuntza Departamentuko Giza Baliabideen Zerbitzuko zuzendariak emana. Honen bidez zehazten da aldi baterako kontratuarekin irakasle lanpostuak betetzeko borondatez parte hartzeko deien prozedura, Hezkuntzako kontseilariaren apirilaren 29ko 55/2016 Foru Aginduari jarraikiz.

Otsailaren 23ko 276/2007 Errege Dekretuak onetsi zuen Hezkuntzari buruzko maiatzaren 3ko 2/2006 Lege Organikoan aipatzen diren irakasle-kidegoetako espezialitate berrietan sartzeko eta eskuratzeko erregelamendua, eta arautu zuen lege horren hamazazpigarren xedapen iragankorrean adierazten den sarrerako araubide iragankorra.

Hezkuntza Departamentuak, errege dekretu horretan araututako sistema iragankorra bukaturik, bertan aurreikusitako sistema arrunta aplikatzen duen lehen hautapen prozedura deitu ondoren, Hezkuntzako kontseilariaren apirilaren 29ko 55/2016 Foru Aginduak onetsi zituen izangaien zerrendak kudeatzeko arauak, Hezkuntza Departamentuaren zerbitzuko irakasleen lanpostuak aldi baterako kontratazioaren bidez betetzeko.

Foru agindu horren 12. artikuluak ezartzen du Giza Baliabideen Zerbitzuak zehaztuko duela zer prozedura erabiliko den izangaiei dei egiteko, sortzen diren kontratazio beharrei erantzuteko; deialdi orokorra Hezkuntza Departamentuaren web orrian argitaratuko da.

Orobat, borondatez parte hartzeko deialdiak egiteko aukera ezartzen du, irakasle lanpostuak betetzeko. Giza Baliabideen Zerbitzuko zuzendariaren irailaren 2ko 1779/2009 eta irailaren 27ko 2657/2010 ebazpenen bidez zehaztu zen prozedura deialdi hauetarako, kontuan izanik oso zaila dela hainbat lanpostu huts betetzea, baita irakasleen ordezpenak betetzea ere, betiere Hezkuntzako kontseilariaren maiatzaren 8ko 60/2009 Foru Aginduan ezarritako esparruaren barnean. Foru agindu hark arautzen zuen lehendik kontratazioaren kudeaketa.

Hezkuntzako kontseilariaren apirilaren 29ko 55/2016 Foru Aginduak ez zuen berritasunik eragin borondatez parte hartzeko deialdietarako; nolanahi ere, komeni denez foru aginduaren artikuluei aipamena egitea, egoki da zehaztea eta jendaurrean jartzea zer prozedura izanen den borondatez parte hartzeko deialdietarako, irakasleen lanpostuak betetzeko aldi baterako kontratazioaren bidez, Hezkuntzako kontseilariaren apirilaren 29ko 55/2016 Foru Aginduari jarraikiz.

Hori horrela, Hezkuntza Departamentuko Unibertsitateen eta Hezkuntza Baliabideen zuzendari nagusiak abuztuaren 13an emandako 1/2015 Ebazpenaren bidez eskuordetutako ahalmenak erabiliz,

EBATZI DUT:

1. Aldi baterako kontratuarekin irakasle lanpostuak betetzeko borondatez parte hartzeko deien prozedura zehaztea, Hezkuntzako kontseilariaren apirilaren 29ko 55/2016 Foru Aginduari jarraikiz.

2. Prozedura honen bitartez beteko diren lanpostuak Hezkuntza Departamentuak zehaztuko ditu, kontuan hartuz telefono deien bidez betetzeko zailtasuna eta/edo destinoko ikastetxeetan izan daitezkeen egoera bereziak.

Hori horrela, irakasle lanpostuak betetzeko zerrendetan dauden izangaiei dagokie egiten diren deiak kontsultatzea, kontuan hartu gabe zein kontratazio zerrendatan dauden edo haietan zein postutan dauden, prozedura honen bidez eskaintzen diren lanpostuak aldi baterako betetzen parte hartu ahal izateko.

3. Prozedura honetan parte hartzen ahalko dute bai eskaintzen diren lanpostuen kidego, espezialitate eta hizkuntza bereko irakasle gisa aldi baterako kontratatzeko izangaien zerrendetan dauden izangaiek, baita zerrenda horietan ez dauden beste izangai batzuek ere.

Prozedura hau eratu da, dei hauen ondorioetarako, borondatez eskatu beharreko lanpostutzat hartzen direnak betetzeko. Horrela, aurreko paragrafoan aipatutako zerrendetan dauden izangaiek parte hartuko dute, bakar-bakarrik, eskainitako lanpostuetako bat betetzeko interesik badute. Horrenbestez, prozedura honetan parte hartzen ez duten izangaiek zerrendetan duten toki berean segituko dute eta beste lanpostu batzuk eskaintzen segituko zaie.

Behar den kidego, espezialitate eta hizkuntzako kontratazio zerrendetako izangai bakar batek ere ez badu borondatez parte hartzen, lanpostuak zerrenda horietan ez dauden beste izangai batzuei eskaintzen ahalko zaizkie, prozeduran parte hartu baldin badute eta kontraturen bat esleitzeko eskatu baldin badute.

4. Hezkuntza Departamentuko web orriaren bitartez iragarriko dira (www.educacion.navarra.es) lanpostuak betetzeko prozedura honetan parte hartzeko izangaientzako deia, eskaintzen diren lanpostuak eta eskaerak aurkezteko epea.

Oro har, deialdiak ostiraletan eginen dira. Deialdian kidego, espezialitate eta hizkuntza guztietako kontratuak eskainiko dira, eskaintzen diren lanpostuen esleipena egin behar den ordena berean.

5. Eskaintzen diren lanpostuetan interesa duten izangaiek eginen dute eskaera. Horretarako, deialdi bakoitzean erantsiko den inprimakia bete beharko dute, eta posta elektronikoaren bidez kasuan-kasuan adierazten den helbidera bidali. Izangairen batek inprimakia ongi betetzen ez badu, bere eskaera ez da kontuan hartuko.

Izangaiek eskaera bat aurkeztu beharko dute parte hartzen duten kidego, espezialitate eta hizkuntza bakoitzeko. Izangaiak lanpostu baterako eskaera egin dezake, edo lanpostu batzuetarako edo espezialitate eta hizkuntza horretan eskainitako guztietarako. Eskaeran lanposturik aipatzen ez badu, ulertuko da dagozkion espezialitatean eta hizkuntzan eskainitako lanpostu guztietan hartzen duela parte, argitaraturik ageri den ordena berean.

Deialdian espezializazioak esleitzeko adierazten den ordenari jarraikiz eta ebazpen honen seigarren atalean izangaien arteko lehentasun ordena finkatzeko ezarrita dagoen ordenari jarraikiz, izangai bati kontratu bat esleitzen zaionetik, ez zaizkio kontatuko egin dituen gainerako kontratazio eskaerak.

Tramiterako bakarrik onartuko dira deian zehazten den epearen barruan jasotzen diren eskaerak.

Kontuan harturik prozedura honen bitartez borondatez eskatu beharreko lanpostutzat hartutakoak eskainiko direla bakarrik, espezialitate eta hizkuntza bakoitzari dagozkien zerrendetan dauden izangaiak ez daude eskaera aurkeztera behartuta. Ez badute ezer aurkezten, ulertuko da ez dutela lanpostu horietarako eskaerarik egiten.

Espezialitate eta hizkuntza bakoitzerako eskaera bakar bat aurkeztuko da. Hortaz, espezialitate eta hizkuntza berean eskaera bat baino gehiago aurkezten badira, azken eskaerak aurrekoak deuseztatuko ditu.

6. Eskaerak aurkezteko epea bukatuta, Giza Baliabideen Zerbitzuak eskainitako lanpostuak esleituko ditu, irizpide hauen arabera:

Lehenbiziko kontratuak kidego, espezialitate eta hizkuntza horietako zerrendetan dauden izangaiei eskainiko zaizkie, zerrendetan duten ordenari jarraikiz eta izangai bakoitzak eskatutako lanpostuen arabera.

Kidego, espezialitate edo hizkuntza bateko zerrendan kontratu bat eskaini eta izangairik ez badago, lanpostu hutsa edo ordezkapena antzeko espezialitate bateko zerrendan dauden izangaiei esleituko zaie, eskaera egin badute, eta zerrenda horretan duten ordenaren arabera. Antzeko zerrendak zeintzuk diren eta haiek erabiltzeko ordena Giza Baliabideen Zerbitzuak finkatuko ditu.

Aurreko irizpideen arabera kontratua esleitzerik ez badago, Giza Baliabideen Zerbitzuak, zerrendetan ez egon arren, kontratatuak izateko eskaera egin duten izangaiei esleituko die, baldin eta kidego, espezialitate eta hizkuntza horretan kontratatuak izateko zerrendetan sartzeko eskatutako baldintza guztiak betetzen badituzte. Horretarako, eskaera egiteko mezu elektronikoen ordenari segituko zaio. Horrelako kasuetan, kontratuaren esleipena kontratazio bereziaren bidez eginen da, Hezkuntzako kontseilariaren apirilaren 29ko 55/2016 Foru Aginduaren 7. artikuluan xedatutakoari jarraikiz.

Betiere, Giza Baliabideen Zerbitzua lanpostu bat esleitzen zaien izangaiekin jarriko da harremanetan, lanpostu horretan sartu ahal izateko. Kontratu bat esleitu behar zaion izangaiarekin harremanetan jartzeko saio bat eginda, ezinezkoa baldin bada harekin kontaktatzea, kontratua hurrengo izangaiari esleituko zaio, harekin harremanetan jartzea lortuz gero, betiere idatz-zati honetan ezarritako lehentasun ordenari jarraikiz.

Lanpostuen esleipena Hezkuntza Departamentuko web orrian argitaratuko da: www.educacion.navarra.es.

7. Borondatezko prozedura honetan parte hartzeko eskaera aurkeztuz interesa azaltzen duten izangaiek eskatutako lanpostuari uko egiten badiote edo kontratua sinatzen ez badute, uko egin duteneko irakasleen kidegoko kontratazio zerrenda guztietatik baztertuak izanen dira eta ikasturte osoan libre ez balira bezala agertuko dira gainerako irakasleen kidegoetako izangai zerrenda guztietan.

8. Beharrezkoa denean, ebazpen honetan araututako prozeduretan borondatez parte hartzeko deiak egiten hasiko dira iraileko hirugarren astetik aurrera, maisu-maistren lanpostuak aldi baterako betetzeko kasuetarako, eta urritik aurrera, gainerako irakasleen kidegoetako kontratazioetarako.

9. Indarrik gabe uztea irailaren 2ko 1779/2009 eta irailaren 27ko 2657/2010 ebazpenak, Hezkuntza Departamentuko Giza Baliabideen Zerbitzuko zuzendariarenak.

10. Ebazpen hau argitaratzea Hezkuntza Departamentuko Argibide eta Agiri Bulegoan eta interneteko www.educacion.navarra.es helbidean.

11. Ebazpen hau Nafarroako Aldizkari Ofizialean argitaratzea.

12. Ebazpen honen kontra gora jotzeko errekurtsoa jartzen ahal da, Lehendakaritzako, Funtzio Publikoko, Barneko eta Justiziako kontseilariari zuzendua, hilabeteko epean, argitaratu eta biharamunetik aitzina.

Iruñean, 2017ko otsailaren 2an.–Giza Baliabideen Zerbitzuko zuzendaria, Miren Itziar Aragüés Cemboráin.

Iragarkiaren kodea: F1701513