Iragarkia
34. ALDIZKARIA - 2017ko otsailaren 17a
1. NAFARROAKO FORU KOMUNITATEA
1.2. AGINTARIAK ETA LANGILEAK
1.2.2. Oposizioak eta lehiaketak. Lan publikoaren eskaintza
27/2017 EBAZPENA, urtarrilaren 19koa, Funtzio Publikoko zuzendari nagusiak emana, Nafarroako Foru Komunitateko Administrazioaren eta haren erakunde autonomoen zerbitzuko suhiltzaileen 15 lanpostu huts lekualdatze lehiaketa bidez betetzeko deialdia onesten duena.
Lekualdatze lehiaketa honako arau hauei jarraikiz eginen da: abuztuaren 30eko 251/1993 Legegintzako Foru Dekretua, Nafarroako Administrazio Publikoen zerbitzuko Langileen Estatutuaren Testu Bategina onesten duena, lanpostuak betetzeko Erregelamendua, hura garatu eta betearazteko emana eta azaroaren 6ko 215/1985 Foru Dekretuaren bidez onetsia, ekainaren 15eko 55/2009 Foru Dekretua, Nafarroako Foru Komunitateko Administrazioko eta haren erakunde autonomoetako plantilla organikoan euskaraz jakitearen trataera arautzen duena, abuztuaren 12ko 130/1998 Foru Agindua, Lehendakaritza, Justizia eta Barneko kontseilariak emana, merezimenduen baremoei buruzkoa, aplikatu beharreko gainerako arauak eta honako oinarri hauek.
Horrenbestez, Nafarroako Foru Komunitateko Administrazioari buruzko abenduaren 3ko 15/2004 Foru Legearen bidez eta Nafarroako Foru Komunitateko Administrazioaren eta haren erakunde autonomoen organoetako langileen arloko eskudantziak zehazten dituen otsailaren 21eko 30/2005 Foru Dekretuaren bidez eskuratu ditudan ahalmenak erabiliz,
EBATZI DUT:
1. Nafarroako Foru Komunitateko Administrazioaren eta haren erakunde autonomoen zerbitzuko suhiltzaileen 15 lanpostu huts lekualdatze lehiaketa bidez betetzeko deialdia onestea. Hona hemen bete beharreko lanpostuak:
Lanpostu hutsen zerrenda:
a. Plantilla organikoan zenbaki hauek dituzten lanpostuak: 432, 10000, 10011, 10056, 10080, 10081, 10082, 10119, 10140, 10141, 10142, 10143.
b. Euskaraz jakin beharra duten lanpostuak (1. jakite maila), plantilla organikoan zenbaki hauek dituztenak: 10144, 10145, 10146.
2. Deialdiaren oinarriak eta eranskinak onestea eta Nafarroako Aldizkari Ofizialean argitara daitezela agintzea, behar diren ondorioak izan ditzaten.
3. Ebazpen hau epaimahaikideei igortzea, behar diren ondorioak izan ditzan.
Iruñean, 2017ko urtarrilaren 19an.–Barneko zuzendari nagusia, Agustín Gastaminza Oiz.
OINARRI ARAUTZAILEAK
1.–Xedea.
Aditzera ematen da suhiltzaileen 15 lanpostu huts lekualdatze lehiaketa bidez betetzeko deialdia egin dela, Barne Zuzendaritza Nagusiko Nafarroako Suhiltzaileen Zerbitzuari atxikitako zenbaiti suhiltzaile parketan aritzeko. Lanpostu horien destinoak lanpostu hutsak aukeratzeko ekitaldia baino lehen jakinaraziko dira.
Lanpostu hutsen zerrenda:
a. Plantilla organikoan zenbaki hauek dituzten lanpostuak: 432, 10000, 10011, 10056, 10080, 10081, 10082, 10119, 10140, 10141, 10142, 10143.
b. Euskaraz jakin beharra duten lanpostuak (1. jakite maila), plantilla organikoan zenbaki hauek dituztenak: 10144, 10145, 10146.
Deialdiaren 10. oinarrian aipatzen den lanpostu hutsak hautatzeko ekitaldian, lanpostu horien ordez beste batzuk eskaintzen ahalko dira, hain zuzen ere, organo eskudunek zerbitzuaren beharren arabera sartzen dituzten aldaketen ondorioz hutsik gelditzen direnak.
2.–Lanpostu hutsen kopurua handitzea.
2.1. Deialdi honetako lanpostuen kopurua handitzen ahalko da, epaimahaiak deialdia egin duen organoari lehiatzaileen zerrenda, lorturiko puntuen hurrenkeraren araberakoa, igortzen dion egunean hutsik dauden lanpostuak gehituz.
2.2. Lehiaketan beteko diren lanpostuak hauek izanen dira: deialdian bertan hasieratik eskainiak eta, hala badagokio, aurreko lerroaldeak aipatzen duen kopurua handitzearen ondoriozkoak, baita lehiaketan beste lanpostu bat lortzen duten izangaiek hutsik uzten dituztenak ere.
2.3. Aurrekoa gorabehera, izangaiek lekualdatze lehiaketan lanpostua lortuta hutsik uzten dituzten lanpostuak ez dira eskainiko, “iraungitzeko” lanpostuak baldin badira.
2.4. Izangairen batek lehiaketa honetan lanpostua lortu eta bere lanpostuaren izena deialdiko lanpostuarena ez bezalakoa baldin bada, eskuratutako lanpostuaren izena hartuko du lanpostu berriaz jabetzen den unetik. Era berean, lehiaketaren ondorioz hutsik gelditu eta, bidezko denean, berriz lehiatzaileei eskaintzen zaizkien lanpostuen izena aldatu eginen da.
3.–Betebeharrak.
3.1. Indarra duen araudian xedatutakoaren arabera, lekualdatze lehiaketa honetan parte hartu ahal izateko, honako betebehar hauek bete beharko dira eskaerak aurkezteko epearen azken egunean eta lanpostu hutsak aukeratu eta esleitutako lanpostuaz jabetu bitartean:
a) Nafarroako edozein administrazio publikotan funtzionario izatea, egoera administratiboa edozein dela ere.
b) Suhiltzaile edo suhiltzaile gidari lanpostu baterako izendatu izana.
c) Euskaraz 1. jakite maila eduki beharra ezarrita duen lanposturen bat eskuratu nahi izanez gero:
–B2 mailaren pareko titulua izatea edo Hizkuntza Eskola Ofizialeko 4 kurtso (2008an edo lehenago) edo Nafarroako Gobernuak antolatutako ikastaroetako 9 urrats gaindituta izatea.
–Edo izangaiak hizkuntza horretan beharrezkoa den maila duen erabakitzeko proba gainditzea. Proba hori egiteko interesa dutenek eskabidean adierazi beharko dute.
3.2. Zerbitzu, atal, bulego edo unitate parekaturen bateko burutzaren bat betetzen ari diren funtzionarioek zilegi izanen dute lekualdatze lehiaketa honetan parte hartzea, baldin eta deialdiko baldintzak betetzen badituzte. Prozedura honetan esleitutako lanpostuaz jabetzeak berarekin ekarriko du zerbitzuko zuzendari izateari edo ataleko nahiz bulegoko buru edo horiekin parekatutako unitateko buru izateari utzi beharra.
3.3. Borondatezko eszedentzian edo nahitaezko eszedentzian urtebete daramaten funtzionarioek zilegi izanen dute lehiaketan parte hartzea, baldin eta deialdiak eskatzen dituen baldintzak betetzen badituzte; horrela, berriz sartuko dira jarduneko zerbitzuan eta lanpostu bat behin betiko esleituko zaie.
4.–Ordainsariak.
Lekuz aldatzen diren langileek gaur egungo xedapenek esleitzen dizkieten ordainsariak jasoko dituzte.
5.–Eskabideak aurkezteko epea eta tokia.
5.1. Deialdian parte hartzeko eskabideak Nafarroako Gobernuko Erregistro Orokorrean (Karlos III.aren etorbidea 2, 31002 Iruña) edo Nafarroako Gobernuaren gainerako erregistro bulegoetako edozeinetan aurkeztuko dira (erregistroan zerrenda Nafarroako Gobernuaren web orrian ageri da, www.nafarroa.eus), edo, bestela, Administrazio Publikoen Administrazio Prozedura Erkideari buruzko urriaren 1eko 39/1992 Legearen 16.4. artikuluan adierazitako bideren bat erabiliz, deialdia Nafarroako Aldizkari Ofizialean argitaratu eta biharamunetik hamabost egun naturaleko epean.
Eskaera posta bulego batean aurkeztuz gero, gutun-azal ireki batean aurkeztuko da, postako langileek data eta zigilua jar diezazkioten eskabideari, ziurtatu aurretik.
Halaber, ekainaren 23ko 70/2008 Foru Dekretuan xedatutakoarekin bat, eskabidea telematika bidez aurkezten ahalko da, Nafarroako Foru Komunitateko Administrazioaren Erregistro Orokor Elektronikoan. Erregistro hori Nafarroako Gobernuaren Interneteko web atarian dago (www.nafarroa.eus). Kasu horretan, parte hartzeko berariazko eskabidea eta beharrezkoak diren gainerako agiriak aurkezteko, Erregistro Orokor Elektronikoan artxiboak eransteko aurreikusita dauden formatuetatik edozein erabil daiteke.
5.2. Eskabideak deialdiko eranskinean argitaratutako ereduaren araberakoak izanen dira, eta horietan izangaiek adierazi beharko dute eskatutako baldintza guztiak betetzen dituztela eskaerak aurkezteko epea bukatzen den egunerako. Eredua Interneten bidez lortzen ahal da, www.nafarroa.eus helbidean, bai argitaratzen deneko Aldizkari Ofizialetik abiatuta, bai Zerbitzuen Katalogoko Enplegu Publikoan dagoen deialdiaren aiputik abiatuta.
5.3. Eskabideari honako agiri hauek erantsi beharko zaizkio:
a) Deialdi honetan ezarritako baremoaren arabera alegatzen diren merezimendu guztien egiaztagiriak, baremoko puntuazio eskemari jarraikiz.
Merezimendu hauek ez dira aurkeztu behar:
–Administrazio Publikoetan egindako zerbitzuen egiaztapena, izangai bakoitzaren espedientean zuzenean sartuko baitira, eta epaimahaiaren esku jarri, baremazioa egin dezan.
Aski izanen da egiaztagirien kopia soilak aurkeztea, baina aurkeztutako datuak edo agiriak ez-zuzenak edo faltsuak badira, behar diren erantzukizun penal, zibil edo administratiboak eskatuko dira.
b) Euskaraz jakin beharra (1. jakite-maila) duten lanpostuetan sartu nahi dutenek egiaztatu beharko dute B2 mailari dagokion titulua daukatela, edo Hizkuntza Eskola Ofizialeko 4 ikasmaila (2008an edo lehenagotik) edo Nafarroako Gobernuak antolatutako ikastaroetan 9. urrats gainditu dituztela.
Euskara maila neurtzeko proba egin nahi dutenek eskabidean adierazi beharko dute.
5.4. Eskabideak aurkezteko epea luzaezina da.
6.–Onartuen behin-behineko zerrenda, erreklamazioak eta behin betiko zerrenda.
6.1. Eskaerak aurkezteko epea amaiturik, Barneko zuzendari nagusiak izangai onartu eta baztertuen behin-behineko zerrenda onetsiko du, eta Nafarroako Aldizkari Ofizialean argitara dadila aginduko, eta ohartaraziko du hurrengo bost egun naturaleko epean baztertuek erreklamazioak egiten ahalko dituztela, eta, akatsik baldin badago, haiek zuzendu.
6.2. Ezarritako epean eskaerarik aurkezten ez bada, Barneko zuzendari nagusiak lehiaketa bete gabe utzi dela deklaratzeko ebazpena emanen du. Ebazpen hori Nafarroako Aldizkari Ofizialean argitaratu beharko da.
6.3. Izangai bazterturik ez bada, zuzenean onetsiko da behin betiko zerrenda, eta Nafarroako Aldizkari Ofizialean argitaratuko.
6.4. Erreklamazioak egiteko epea bukatu eta haiek ebatzitakoan, Barneko zuzendari nagusiak ebazpena emanen du onartu eta baztertuen behin betiko zerrenda onesteko, eta Nafarroako Aldizkari Ofizialean argitaratzeko aginduko du.
7.–Epaimahaiko kideak.
7.1. Honako hauek osatuko dute lehiaketako epaimahaia:
–Epaimahaiburua: Carlos Orta González jauna, Nafarroako Suhiltzaileen Zerbitzuko suhiltzaile-ofiziala.
Ordezkoa: Pedro Zaro Loperena jauna, Suhiltzaileen Zerbitzuko suhiltzaile-ofizialordea.
–Epaimahaikideak:
1. Langileria Batzordearen ordezkari bat, batzordeak berak proposatua.
Ordezkoa: Langileria Batzordearen ordezkari bat, batzordeak berak proposatua.
2. Javier Moreno Zudaire jauna, administrazio publikoko teknikaria (arlo juridikoa), Barne Zuzendaritza Nagusiko Araubide Juridikoaren eta Langileriaren Zerbitzukoa, idazkari gisa ere arituko dena.
Ordezkoa: Begoña Martínez Barrado andrea, Barne Zuzendaritza Nagusiko Gai Administratiboak eta Langileria Kudeatzeko Ataleko burua.
7.2. Onartu eta baztertuen behin betiko zerrenda argitaratu ondoko bost eguneko epean eratuko da epaimahaia.
7.3. Epaimahaiak gehiengoz erabakiko ditu deialdiaren oinarriak aplikatzeko moduaz sortzen diren arazo guztiak.
7.4. Administrazio prozeduraren arauetan abstentziorako aurreikusitako arrazoiren bat gertatzen denean, epaimahaiko kideek parte hartzeari uko egin beharko diote, eta hori jakinarazi deialdia egin duen organoari. Izangaiek, halaber, zilegi dute epaimahaikideak errefusatzea, egoera horietako bat gertatzen denean.
8.–Merezimenduen kalifikazioa.
8.1. Deialdiaren 5.3 oinarrian xedatutakoarekin bat, merezimendu guztiak agiri bidez alegatu eta frogatuko ditu izangai bakoitzak lekualdatze lehiaketa honetan parte hartzeko eskabidea aurkeztean. Salbuespen bakarra administrazio publikoetan egindako zerbitzuak izanen dira, organo dei-egileak epaimahaiari zuzenean igorriko baitizkio horren frogagiriak.
8.2. Epaimahaiak azalpenak eta datu osagarriak eskatzen ahalko ditu lehiatzaileek alegatu eta frogatutako merezimenduen gainean.
8.3. Alegatu eta frogatutako merezimenduak deialdi honen II. eranskinean azaltzen den baremoari jarraikiz kalifikatu eta puntuatuko ditu epaimahaiak.
8.4. Epaimahaiak ezin izanen du inolaz ere kontuan hartu alegatu gabeko eta agirien bidez frogatu gabeko merezimendurik, ezta atal bakoitzeko baremoan aipatzen den gehieneko puntuazioa baino altuagorik eman ere.
8.5. Lehiatzaileen puntuazioan berdinketarik izaten bada, administrazio publikoen zerbitzuan antzinatasunik handiena dutenen alde joko da. Hala ere berdinduta segitzen badute, lehiatzaile adinez zaharrenari emanen zaio lehentasuna.
8.6. Merezimenduen kalifikazioa bukatu ondoren, epaimahaiak argitara emanen du Nafarroako Gobernuko iragarki oholean eta Nafarroako Gobernuaren web orrian (www.nafarroa.eus) izangai bakoitzak lortutako puntuazioa, eta bost egun balioduneko epea ezarriko du merezimenduen balorazioaren gainean eskubideko jotzen duten guztia alega dezaten.
9.–Izangaien zerrenda, erdietsitako puntuazioaren araberakoa.
Aurkeztutako erreklamazioak ebatzi ondoren, epaimahaiak behin betiko puntuazioak argitaratuko ditu Nafarroako Gobernuko iragarki oholean Nafaroako Gobenuaren web orrian (www.nafarroa.eus), eta izangaien zerrenda, lortutako puntuazioaren arabera ordenaturik, Barneko zuzendari nagusiari igorriko dio espediente osoarekin batera, bidezko ebazpena eman dezan hasierako lanpostuen kopurua handitzeari dagokionez.
10.–Lanpostu hutsak hautatzea.
10.1. Lanpostu hutsak aukeratzeko ekitaldirako deia Barneko zuzendari nagusiaren ebazpenaren bidez eginen da; Nafarroako Gobernuko iragarki oholean argitaratuko da, bai eta Interneten bidez ere, helbide honetan: www.nafarroa.eus, “Tramiteak”, “Administrazioko langileentzako zerbitzuak”, “Enplegu publikoa eta sustapena”, deialdiaren aipamena.
Parte-hartzaileek 10 egun balioduneko epea izanen dute eskaera telematikoki aurkezteko, lehen aipatutako helbideko estekaren bidez, eta nahi lituzketen lanpostu hutsak aukeratzeko.
Lehiaketan lotutako puntuazioen hurrenkerari jarraikiz esleituko dira lanpostu hutsak, eta esleipen horri ezin izanen zaio uko egin.
Eskaera ezarritako epean bidaltzen ez duten lehiatzaileek lehiaketaren xede diren lanpostu hutsak betetzeko eskubide guztiak galduko dituzte.
10.2. Lanpostuak betetzeko Erregelamenduan xedatutakoarekin bat, izangaiek ezin dute orain atxikita dauden zuzendaritza nagusi edo erakunde autonomo bereko lanpostu hutsik hautatu (zuzendaritza nagusi baten mende ez dagoen maila beheragoko unitate organiko bati atxikita badaude, debeku bera izanen dute), salbu eta lanpostu aldaketarekin udalerria, zentroa edo lanaldi arrunt edo partzialaren araubidea ere aldatzen bada.
11.–Esleipena eta lanpostuaren jabetza hartzea.
11.1. Barneko zuzendari nagusiak, ebazpen bidez, dagokien lanpostua esleituko die lehiatzaileei, eta hori Nafarroako Aldizkari Ofizialean argitara dadila aginduko du.
11.2. Lehiatzaileek esleipenari buruzko ebazpena jakinarazi eta hamar egun naturaleko epean jabetu beharko dute lanpostuaz, non eta deialdia egin duen organoak jabetza hartzeko beste data bat ezartzen ez duen ebazpen horretan.
12.–Aurkeztutako agiriak.
12.1. Izangaiek aurkezten dituzten agiriak berreskuratzen ahalko dituzte, halaxe berariaz eskatuz gero, betiere erreklamazio edo errekurtsorik jartzen ez bada. Agiriak berreskuratzeko eskaera hiru hilabeteko epean aurkezten ahalko da. Epe hori esleipenaren ebazpena Nafarroako Aldizkari Ofizialean argitaratu eta hiru hilabeteren buruan hasiko da.
12.2. Aurreko atalean ezarririko epea agiriak eraman gabe bukatzen bada, ulertuko da izangaiak uko egin diola agiriak eskuratzeari eta horretarako eskubidea galduko du eta agiriak suntsituko dira.
12.3. Erreklamazio edo errekurtsoren bat aurkezten baldin bada, aurkeztutako agiriak gorde eginen dira, ikuskatu eta aztertzeko. Agiriak berreskuratzen ahalko dira erreklamazioaren edo errekurtsoaren tramitazioak horretarako aukera ematen duenean.
13.–Errekurtsoak.
Epaimahaiak ematen dituen egintza eta ebazpenen kontra gora jotzeko errekurtsoa paratzen ahal da Barneko zuzendari nagusiari zuzendua, errekurtsoaren xede den egintza argitaratu edo jakinarazi eta biharamunetik hilabeteko epean.
Deialdiaren, bere oinarrien eta horiek aplikatzeko egintzen kontra, kalifikazio epaimahaiak hartutakoen kontra izan ezik, zilegi izanen da gora jotzeko errekurtsoa jartzea, Lehendakaritzako, Funtzio Publikoko, Barneko eta Justiziako kontseilariari zuzendua, hilabeteko epean, errekurritu nahi den egintza argitaratu edo jakinarazi eta biharamunetik hasita.
Hori guztia Nafarroako Foru Komunitateko Administrazioari buruzko abenduaren 3ko 15/2004 Foru Legearen 57. artikuluarekin bat eta Administrazio Publikoen Administrazio Prozedura Erkideari buruzko urriaren 1eko 39/2015 Legearen 121. eta 122. artikuluei jarraikiz.
I. ERANSKINA
Lekualdatze lehiaketan onartua izateko eskabidea (PDFa).
II. ERANSKINA
Merezimenduak baloratzeko baremoa
a) Administrazio publikoetan egindako zerbitzuak.
Administrazio publikoetan egindako zerbitzuak baloratzeko, puntu bat emanen da deialdia argitaratzen den egunean aitortua duen antzinatasun urte bakoitzeko.
Oharrak:
1. Urteen kopurua osoa ez bada, zerbitzuan egindako aldiari proportzioan dagokion puntuazioa emanen zaie izangaiei.
2. Honako a) atal honi dagokion puntuazioa gehienez ere 30 puntukoa izanen da.
3. Deialdia argitaratu ondoren egindako zerbitzuak ez dira baloratuko.
4. Funtzionarioa zerbitzu berezietan edo eszedentzia berezian egon bada, edo unitate organiko bateko buru edo zuzendari lanetan aritu bada, aldi horietako zerbitzuak kontatzeari begira, egoera horietan sartzean zeukan lanpostuan egin izan balitu bezala kontatuko dira.
b) Prestakuntza, irakaskuntza eta ikerketa:
1) Erakunde edo zentro publikoek eta unibertsitateek antolatutako prestakuntza jardueretan parte hartzea: 0,10 puntu emanen dira kreditu akademiko edo horren baliokide bakoitzeko (10 ikastordu), eta gehienez ere 7 puntu.
Oharrak:
1. Baloratu beharreko ikastaroetan, ikastorduen zatikiak proportzionalki banatuko dira.
2. Ikastorduen kopurua agertzen ez duten ziurtagiriei kreditu bateko balorazioa emanen zaie.
3. Ikasturte bateko iraupena agertzen duten ziurtagiriei 12 kredituko balorazioa emanen zaie.
4. Erakunde antolatzaileari buruzko beharkizunak betetzen ez badituzte ere, Administrazioak agindurik edo oniritzirik eginak diren prestakuntza ekintzetan parte hartzea puntuazio berarekin baloratuko da. Horien artean, espresuki, sindikatuek Administrazio Publikoetako Etengabeko Prestakuntzarako Itunen barrenean antolatuak sartuko dira.
5. Titulu akademiko bat eskuratzeko ikasketak, hala unibertsitatekoak nola unibertsitatez kanpokoak, ez dira atal honetan baloratuko.
2) Txostenak edo komunikazioak biltzarretan edo jardunaldietan aurkeztea, lan zientifiko edo ikerlan bekadunak edo sarituak egitea eta haiek aldizkari espezializatuetan argitaratzea: 2 puntu gehienez ere, epaimahaiak baloratu beharrekoak, kontuan izanik lana edo jarduera norberak edo taldeka egina den, bai eta biltzarra edo argitalpena tokikoa, eskualdekoa, herrialdekoa edo nazioartekoa den ere.
3) Sektore publikoaren esparruan prestakuntza jardueretan irakasle gisa parte hartzea eta/edo haiek antolatzea: puntu bat gehienez ere; epaimahaiak baloratu beharrekoak haien iraupenaren arabera.
Oharrak b) atal osorako:
1. Atal honetan aipatutako merezimenduak soilik baloratuko dira deialdiko lanpostuarekin zerikusia izanez gero.
2. Baremoaren b) atal honetako puntuazioa 10 puntukoa izanen da gehienez.
Puntuazio erantsia hizkuntzak jakiteagatik.
–Frantsesez, ingelesez edo alemanez jakiteagatik, Europar Batasuneko lan hizkuntzak diren aldetik, hizkuntza horietako bakoitzeko 2 puntu gehienez.
–Euskaraz jakiteagatik, destinoa eremu euskaldunean duten lanpostuetarako 4,6 puntu gehienez, plantilla organikoan euskaraz jakitea nahitaezkotzat hartu ez bada, eta destinoa eremu mistoan dutenetarako, berriz, 2,76 puntu gehienez, plantilla organikoan euskaraz jakitea nahitaezkotzat hartu ez bada.
Ondorio horietarako, hizkuntza eskola ofizial batek emandako gaitasun agiria edo ofizialki baliokidea den titulua edukiz gero, aurreko ataletan adierazi den gehieneko puntuazioa emanen da.
Euskarari dagokionez, EGA titulua edo beste titulu ofizial bat, Hizkuntzetarako Europako Erreferentzia Esparru Bateratuaren C1 mailaren baliokidea, izanez gero, aurreko artikuluetan euskaraz jakiteagatik adierazitako gehieneko balorazioa jasoko da.
Titulu hori izan ezean, Hizkuntzetarako Europako Erreferentzia Esparru Bateratuaren A1 maila izanez gero, gehienez eman daitekeen puntuazioaren 1/5 jasoko da; A2 maila izanez gero, 2/5; B1 izanez gero, 3/5; eta B2 izanez gero, 4/5. Titulu baliokideek balorazio bera izanen dute. Bestela, Nafarroako Gobernuak antolatutako ikastaroetan gainditutako urrats bakoitzarengatik gehieneko puntuazioaren 1/12 lortuko da.
Izangai bakoitzak lau hizkuntza horietan zenbat dakien baloratzeko, Nafarroako Administrazio Publikoaren Institutuak espresuki antolatutako azterketen emaitzak ere erabiltzen ahalko dira; azterketa horiek bost zailtasun maila dituzte, eta hizkuntza bakoitzari ematen ahal zaion gehieneko balorazioaren bostena emanen zaio maila bakoitzari.
Iragarkiaren kodea: F1701487
Sarbidea
Nafarroako Aldizkari Ofiziala
Paseo Pablo Sarasate, 38, 2.º izda.
31001 - Iruña
848 42 12 50
