31. ALDIZKARIA - 2017ko otsailaren 14a

1. NAFARROAKO FORU KOMUNITATEA

1.4. DIRU-LAGUNTZAK, LAGUNTZAK ETA BEKAK

51/2017 FORU AGINDUA, urtarrilaren 26koa, Eskubide Sozialetako kontseilariak emana, adingabeen babesaren esparruan aritzen diren irabazi-asmorik gabeko entitateentzako diru-laguntzen deialdia onesten duena eta 2017. urterako gastua baimentzen duena.

Gizarte Zerbitzuei buruzko abenduaren 14ko 15/2006 Foru Legeak aurreikusten dituen jarduketa-programen artean haurrari eta familiari lehen laguntza ematea agertzen da. Haurrentzako eta nerabeentzako sustapenari, laguntzari eta babesari buruzko abenduaren 5eko 15/2005 Foru Legeak, bestalde, ezartzen du Nafarroako Foru Komunitateko Administrazioaren eginkizunen artean adingabeak sustatzea eta babestea dagoela.

Horri dagokionez, ekainaren 5eko 7/2009 Foru Legeak, Foru Komunitateko zergadunek gizarte intereseko beste xede batzuetarako bideratzen duten tributuen %0,7 arautzen duenak, funts horien bidez lagundu beharreko taldeen artean babesik gabe dauden adingabeena jasotzen du.

Pertsonen Autonomiarako eta Garapenerako Nafarroako Agentziaren estatutuak onesten dituen irailaren 3ko 172/2015 Foru Dekretuak xedatzen du Familiaren eta Haur eta Nerabeentzako Arretaren Zuzendariordetzari dagokiola Haurrentzako eta Nerabeentzako Sustapenari, Laguntzari eta Babesari buruzko abenduaren 5eko 15/2005 Foru Legea bete eta gara dadila sustatzea.

Azkenik, Eskubide Sozialetako Departamentuaren egitura organikoa ezartzen duen abuztuaren 28ko 128/2015 Foru Dekretuaren 2.1 artikuluak Eskubide Sozialetako kontseilariari esleitzen dio aipatu departamentuaren aurrekontuen kontura emanen diren diru-laguntzen deialdia egiteko eskumena.

Espedientean Familiaren eta Adingabeen Zuzendariordetzaren proposamen txostena, txosten juridikoa, Nafarroako Gizarte Ongizatearen Kontseiluaren txostena eta kontu-hartzaile delegatuaren adostasuna jaso dira.

Horrenbestez, Nafarroako Gobernuari eta Lehendakariari buruzko abenduaren 3ko 14/2004 Foru Legeak, Diru-laguntzei buruzko azaroaren 9ko 11/2005 Foru Legeak eta Eskubide Sozialetako Departamentuaren egitura organikoa ezartzen duen abuztuaren 28ko 128/2015 Foru Dekretuak emandako eskudantziak erabiliz,

AGINDU DUT:

1. Nafarroako Foru Komunitatean adingabeen babesaren esparruan aritzen diren entitateentzako diru-laguntzen 2017ko deialdia onestea, foru agindu honen eranskinean azaltzen diren oinarrien arabera.

2. 119.696 euroko gastua baimentzen da, 2017ko gastuen aurrekontuko “PFEZaren %0,7ko funtsa, Adingabeen esparruko diru-laguntzen deialdia” izeneko 920008 93300 4819 231702 kontu-sailaren kargura.

3. Foru agindu hau eta deialdiaren oinarriak Nafarroako Aldizkari Ofizialean argitaratzea.

4. Deialdi honen eta bere oinarrien aurka gora jotzeko errekurtsoa jartzen ahal da, Nafarroako Gobernuari zuzendua, hilabeteko epean, Nafarroako Aldizkari Ofizialean argitaratu eta biharamunetik hasita.

5. Foru agindu hau Eskubide Sozialetako Departamentuko Idazkaritza Tekniko Nagusiko Ekonomia eta Aurrekontuak Kudeatzeko Atalari, Pertsonen Autonomiarako eta Garapenerako Nafarroako Agentziako Familiaren eta Adingabeen Zuzendariordetzari eta Diru-laguntzen Datu Base Nazionalari igortzea, behar diren ondorioak izan ditzan.

Iruñean, 2017ko urtarrilaren 26an.–Eskubide Sozialetako kontseilaria, Miguel Laparra Navarro.

1. ERANSKINA

Deialdiaren oinarri arautzaileak

1. Xedea eta helburuak.

Deialdi honen xedea da Nafarroako Foru Komunitateko adingabeen babesaren esparruan aritzen diren irabazi-asmorik gabeko entitateen funtzionamendurako eta jardueren sustapenerako diru-laguntzak emateko araubidea ezartzea 2017. urterako.

Diru-laguntza horien bidez bultzatu nahi da adingabeen babesaren eta babesgabetasun arriskuaren prebentzioaren arloan aritzen diren elkarteek eta gainerako entitateek programak eta ekintzak egin ditzatela talde horien arrisku egoerak gutxitu eta desagerrarazteko.

2. Diru-laguntza jaso dezaketen ekintzak.

1. Pertsonen Autonomiarako eta Garapenerako Nafarroako Agentziaren diru-laguntzak ekintza hauetarako izanen dira:

a) Abegi-familiak sentsibilizatzea, prestatzea eta laguntzea.

b) Familia adoptatzaileak sentsibilizatzea, prestatzea eta laguntzea.

c) Babesgabetasun arrisku arina/moderatua duten adingabeentzako esku-hartze terapeutikoak eta gizarte eta hezkuntza arlokoak, eta/edo babesgabetasun arriskua sor dezaketen egoerei aurrea hartzea helburu dutenak, zehazki, egoera horietan dauden adingabeen bizi baldintzak hobetzera (lehen, bigarren eta hirugarren mailako prebentzio programa eta ekintzak eginez) zuzendutako programak.

2. Haurren eta Nerabeen Sustapenari, Laguntzari eta Babesari buruzko abenduaren 5eko 15/2005 Foru Legearen arabera babesik gabeko egoeran ez dauden haur edo nerabeentzako programak edo ekintzak ez dira diruz lagunduko, ezta adingabeen babesgabetasun egoerei aurrea hartzea helburu ez dutenak ere.

3. Era berean ez dira lagungarritzat jotzen Agentziak deialdi hau argitaratzen den unean garatzen dituen ekintzak, ez eta Gizarte Zerbitzuen Zorroaren arabera eskaini behar dituenak ere, prestazio bermatuak izateagatik.

3. Diru-laguntzaren zenbatekoa eta laguntza-metaketa.

1. Entitateek deialdi honetako bigarren oinarriko lehen atalean adierazitako ekintzen barnean sartutako programa bakar baterako diru-laguntza jasotzen ahalko dute.

2. Hona hemen programa bakoitzerako aurreikusitako zenbatekoak guztira:

a) Abegi-familiak sentsibilizatu, prestatu eta laguntzeko: 20.000 euro.

b) Familia adoptatzaileak sentsibilizatu, prestatu eta laguntzeko: 20.000 euro.

c) Babesgabetasun arrisku arina/moderatua duten adingabeentzako esku-hartze terapeutikoak eta gizarte eta hezkuntza arlokoak, eta/edo babesgabetasun arriskua sor dezaketen egoerei aurrea hartzea helburu dutenak, zehazki, egoera horietan dauden adingabeen bizi baldintzak hobetzera zuzendutako programetarako (lehen, bigarren eta hirugarren mailako prebentzio programa eta ekintzak eginez): 79.690 euro.

3. Aurreko ataleko a) eta b) letretan aurreikusitako kasuan, diru-laguntzaren zenbatekoa ez da urtean 10.000 eurotik gorakoa izanen, programa bakoitzeko, eta c) letran aurreikusitako kasuan, 12.500 eurotik gorakoa, programa bakoitzeko.

4. Nolanahi ere, diru-laguntza emateko ezinbestekoa izanen da aurrekontuan horretarako krediturik izatea.

5. Diru-laguntzak emateko prozedura norgehiagokako araubideari jarraikiz tramitatuko da.

6. Programetako batean deialdia hutsik geratzen bada edo aurreikusitako aurrekontua agortzen ez bada, kreditu-geldikina aurrekontu nahikoa ez duten programen aurrekontua handitzeko erabiltzen ahalko da, programa bakoitzean aurreikusitako zenbatekoarekiko modu proportzionalean.

4. Diru-laguntza jaso dezaketen gastuak.

1. Diru-laguntza jaso dezaketen gastuak diru-laguntzaren xedeko jarduera garatzeko beharrezkoak direnak izanen dira. Zehazki, diru-laguntza jaso dezakete egin beharreko ekintzei lotutako gastuek eta ekintzak garatzen dituzten langileei lotutakoek.

2. Egin beharreko ekintzetan sartzen dira lokalen alokairua edo erabilera, haiek entitatearenak izan edo ez.

3. Langileen gastuaren atalean, entitateak ekintza gauzatzeko propio kontratatzen dituen langileen gastuak sartzen ahal dira, edo entitateko langileek beraiek ekintzan duten dedikazioaren araberako portzentaje bat; kasu horretan, zehatz-mehatz identifikatu beharko dira langile horiek.

4. Entitatearen lokalei edo langileei buruzko justifikazioak aurkeztuz gero, entitateak berariaz ziurtatu beharko du zer portzentajeko dedikazioa izan den diru-laguntzaren xedeko ekintzetan.

5. Lokalak edo izendatutako langileak Nafarroako Foru Komunitateko Administrazioak diruz laguntzen edo kontratatzen duen baliabide bati atxikita daudenean, ezin izanen da diru-laguntzarik eman gastu horretarako.

6. Diru-laguntza jaso dezaketen gastutzat joko dira hornitzaileei pagatzeko bideen ondoriozko interesak eta komisioak, betiere diru-laguntzaren xedeko jarduerari lotuta badaude.

7. Diru-laguntza jaso dezaketen gastuetan, eskuratze kostua inoiz ez da izanen merkatuko balioa baino handiagoa.

8. Benetan egindako gastutzat joko da diru-laguntza erregulatzen duten arauetan ezartzen den justifikazio epea bukatu baino lehen ordaindu dena.

5. Entitate eskatzaileek bete beharreko baldintzak.

1. Deialdi honetan aipatzen diren diru-laguntzak jaso ahal izateko, entitateek baldintza hauek bete beharko dituzte:

a) Legez eratutako pertsona juridikoa izatea eta bidezkoak diren erregistroetan inskribatuta egotea.

b) Diru-laguntza jasoko duen jarduera Nafarroako Foru Komunitatean egitea.

c) Irabazi-asmorik ez izatea.

d) Erakundearen xedea babesgabetasun arriskuan dauden adingabeekin edo babesgabetasuna prebenitzearekin lotutako jarduerak prestatzea dela espresuki agertzea estatutuetan.

e) Bere xedeak bete daitezen bermatzeko egitura, baliabide material eta langile nahikoa izatea, baita proposatutako helburuak lortzeko behar den gaitasun operatiboa ere.

f) Zerga arloko betebeharrak eguneratuta izatea, bai Gizarte Segurantzarekikoak, bai Nafarroako Foru Komunitateko Administrazioarekikoak edo haren erakunde autonomoekikoak, zorrak ordainduta.

g) Diru-laguntzen onuraduna izateko Diru-laguntzei buruzko Foru Legearen 13. artikuluko 2. eta 3. idatz-zatietan ezarritako gainerako debekurik ez urratzea.

2. Aipatutako betebehar horiek guztiak eskaerak aurkezteko epea bukatzen den egunean eta diru-laguntza jasotzen duen jarduerak irauten duen bitartean bete beharko dira.

6. Programa gauzatzeko epea.

Laguntzaren xede diren programak gauzatzeko epea urtebetekoa da (2017. urtean egin behar dira). Edozein egunetan hasten direla ere, diruz lagundutako jarduerek 2017ko abenduaren 1a baino lehen bukatuta egon behar dute.

7. Eskaerak noiz arte eta non aurkeztu:

Eskaerak Familiaren eta Adingabeen Zuzendariordetzaren Erregistroan aurkeztuko dira (Abejeras kalea, 9, Iruña), Eskubide Sozialetako Departamentuaren Erregistroan (González Tablas kalea 7, 31005 Iruña), Nafarroako Gobernuaren Erregistro Orokorrean edo Herri Administrazioen Araubide Juridikoari eta Administrazio Prozedura Erkideari buruzko Legearen 38.4 artikuluan aipatzen diren tokietako edozeinetan, 30 egun naturaleko epean, deialdia Nafarroako Aldizkari Ofizialean argitaratu eta biharamunetik hasita.

Posta bulegoen bitartez aurkezten diren eskabideek posta zerbitzuak arautzen dituen abenduaren 3ko 1829/1999 Errege Dekretuan aurreikusitako zehaztapenak bete beharko dituzte.

8. Dokumentazioa.

Eskaera egiteko eskabide orokorra aurkeztu beharko da, entitatea legez ordezkatzeko ahalmen nahikoa duen pertsonak sinatua, espresuki adierazita zein programatarako den. Horrekin batera, agiri hauek aurkeztuko dira:

a) Entitate eskatzaileari buruzko agiri orokorrak:

–Entitatearen estatutuak.

–Diru-laguntzaren eskabidea sinatzen duen pertsonaren ordezkaritza frogatzen duen agiria eta pertsona horren nortasun agiri nazionala.

–Kasuan kasuko inskripzioak bidezko diren erregistroetan egin direla frogatzen duten agiriak: Nafarroako Gobernuko Lehendakaritzako, Funtzio Publikoko, Barneko eta Justiziako Departamentuko Elkarteen Erregistroko inskripzioa, edo dagokion beste edozein inskripzio.

–Identifikazio fiskaleko txartela.

–Transferentzia bidez ordaintzeko eskaera.

–Erantzukizuneko aitorpena, entitatearen ordezkariak emana, agerrarazten duena ez entitateak, ez administratzaileek edo ordezkariek ez dutela diru-laguntzen onuradun izateko debekurik urratzen. Debeku horiek Diru-laguntzei buruzko Foru Legearen 13. artikuluko 2. eta 3. idatz-zatietan ageri dira.

–Entitateak Gizarte Segurantzarekiko zerga betebeharrak ordainduta dituela egiaztatzen duen ziurtagiria, edo Nafarroako Foru Komunitateko Administrazioarekin edo haren erakunde autonomoekin dituen zorrak ordainduta dituela; ziurtagiri hori eskaera aurkeztu eta, gehienez ere, bi hilabete lehenagokoa izanen da.

Diru-laguntzei buruzko Foru Legearen 13. artikuluko 8. idatz-zatian eta Nafarroako Foru Komunitateko Administrazioari buruzko Foru Legearen 9. artikuluko 4. idatz-zatian xedaturikoarekin bat, ziurtagiriak Foru Komunitateko Administrazioko organoek eman behar badituzte edo administrazio honek dagoeneko badauzkan datuak badira, ez da beharrezkoa izanen eskatzen diren agiriak aurkeztea. Kasu horietan, agirietan aldaketarik izan ez bada, berriz aurkeztu beharrean, entitatearen ordezkariaren aitorpen bat aurkez daiteke, inguruabar hori azaltzeko.

b) Diru-laguntza eskaeraren xede den programaren gaineko memoria teknikoa, programaren deskribapena eta ondoko datu hauek zehazturik:

–Helburuak.

–Zein giza-talderi zuzentzen zaizkion ekintzak.

–Eginen diren jardueren eta haien metodologiaren azalpena.

–Laguntza emanen zaien pertsonen kopuruaren kalkulua, eta ekintzen bidez lortu nahi diren emaitzen aipamena.

–Ekintza/Programa horretara bideratuko diren langileak eta baliabideak.

–Egutegia. Ekintzak diru-laguntza eskatzen den urte berean egin beharko dira.

–Ebaluazio sistema.

–Programaren/Ekintzaren justifikazioa.

–Eta programa baloratzeko interesgarriak izan daitezkeen gainerako gorabehera guztiak.

c) Dokumentazio ekonomikoa:

–Programako gastuen eta diru-sarreren guztirako aurrekontua, kontzeptuz kontzeptu xehakatua: egin beharreko ekintza zehatzak eta ekintza horiek eginen dituzten langileak.

–Kasu bakoitzean, zer beste baliabide dituen programa osoa finantzatzeko, kontuan hartuta diru-sarrerak, jaso daitekeen diru-laguntza barne, ezin direla programaren kostu osoa baino handiagoak izan.

–Kasu bakoitzean, diru-laguntza osorik aurreratzeko, zinpeko aitorpenaren bidez egindako justifikazio txosten bat, non frogatuko baita entitateak ez duela irabazi-asmorik, ezta behar adinako baliabiderik ere diruz laguntzen den jarduera behin-behinekoz finantzatzeko.

9. Antolamendua eta instrukzioa.

1. Deialdi honen ondorioetarako, Familiaren eta Adingabeen Zuzendariordetzako Adingabearen Babes eta Sustapenerako Atalari esleitu zaizkio diru-laguntzak emateko prozedura antolatu eta instruitzeko aurreikusitako eginkizunak. Oinarri hauetan instrukzio organoari egindako aipamenak atal horri egindakotzat hartuko dira.

Instrukzio organoak arlo juridikoko administrazio publikoko teknikari baten eta arlo ekonomikoko beste baten laguntza izaten ahalko du.

2. Eskaerak aipatu diren baldintzak betetzen ez baditu, entitate interesdunari errekerimendua eginen zaio gehienez 15 egun naturaleko epean okerra zuzendu dezan, eta ohartaraziko zaio, hala egin ezean, eskaera bertan behera utzi duela ulertuko dela, Administrazio Publikoen Administrazio Prozedura Erkideari buruzko urriaren 1eko 39/2015 Legeak eta Nafarroako Foru Komunitateko Administrazioari buruzko abenduaren 3ko 15/2004 Foru Legeak ezarritako moduan ebazpena eman ondotik.

3. Eskaeren balorazioa batzorde tekniko batek eginen du. Honako hauek osatuko dute batzorde hori: Familiaren eta Adingabeen zuzendariordeak, Adingabearen Babes eta Sustapenerako Ataleko buruak eta Adopzioaren eta Familia-harreraren Ataleko buruak.

4. Programak baloratu ondoren, instrukzio organoak ebazpen proposamena igorriko dio organo eskudunari.

10. Balorazioa.

1. Entitate eskatzaileek aurkezten dituzten programen balorazioa ondoren zehazten diren irizpideetan oinarrituko da. Behean aipatzen den atal bakoitzak, gainera, zenbait azpiatal izanen ditu, 1. eranskinean ezarritako irizpideei jarraikiz:

a) Entitate eskatzaileen balorazioa. 15 puntu gehienez, honela banaturik:

–Entitatearen helburuak, xedeari eta diruz laguntzen ahal diren ekintzei begira: 5 puntu gehienez.

–Haurraren eta nerabeen babesaren arloan aurretik duen esperientzia: 5 puntu gehienez.

–Azpiegiturak eta ekipamendua: 2 puntu gehienez.

–Kofinantzaketa: 2 puntu gehienez.

b) Programen balorazioa, 75 puntu gehienez, 8. oinarriaren b) letran eskatutako edukia kontuan hartuta. Zehazki:

–Proiektuaren koherentzia: 30 puntu gehienez.

–Ebaluazioaren analisia: 9 puntu gehienez.

–Giza baliabideen eta baliabide tekniko eta ekonomikoen analisia: 14 puntu gehienez.

–Proiektuaren osagarritasuna eta koordinazioa beste entitate batzuekin eta beste gizarte baliabide batzuekin: 8 puntu.

–Pertsona onuradunen parte-hartzearen analisia: 14 puntu gehienez.

c) Baloratu beharreko beste alderdi batzuk. 10 puntu gehienez, honela banaturik:

–Proiektuaren eraginkortasuna aurreko urteetan.

–Programa berritzailea: 4 puntu gehienez.

11. Diru-laguntzaren zenbatekoa zehaztea.

1. Eskaerak bereiz eta bere aldetik baloratuko dira, bere modalitatearen arabera (3. oinarrian adieraziak), 0tik 100 puntura arteko eskalan, II. eranskinean adierazitako irizpide objektiboak eta haien haztapena kontuan hartuta.

2. Diru-laguntza jaso ahal izateko, proiektuek, guztira, 50 puntu lortu behar dituzte gutxienez, eta 37 puntu hamargarren oinarriaren lehenbiziko ataleko b) letran aurreikusitako programaren balorazioan.

3. Diru-laguntzaren zenbatekoa eskatu eta onartzen den aurrekontuaren %100 adinakoa izanen da.

4. Diru-laguntzak emateko, ezarritako balorazio irizpideak aplikatzeak dakarren lehentasun ordenari jarraituko zaio, erabilgarri dagoen kreditua agortu arte.

5. Eskaera guztietarako behar adinako krediturik ez badago, ez da hainbanaketarik eginen.

6. Eskaeran aurkeztutako kalkulu ekonomikoa benetan justifikatutakoa bezalakoa ez bada, Diru-laguntzei buruzko Foru Legean aurreikusitakoaren arabera erregularizatu beharko da diru-laguntzaren zenbatekoa.

7. Balorazio positiboa lortzen duten eskaeren zenbateko guztiek aurrekontuetan horretarako dagoen kreditua gainditzen badute, lehentasun hurrenkera bat ezarriko da, balorazioan lorturiko puntuazioaren arabera, eta diru-laguntzak muga horretaraino banatuko dira. Prozedura horren arabera diru-laguntza eskuratzen ahal duen azken proiektuarentzat eskatutakoak gainditzen duenean hura finantzatzeko dagoen zenbatekoa, diru-laguntza ematea proposatuko da haren kontzesioa eraginkorra bada, eta horretarako 12. oinarriko 2. atalean aurreikusitako tramiteari jarraituko zaio.

12. Alegazioak aurkezteko tramitea.

1. Instrukzio organoak proposamen-txostena eman aurretik, interesdunei entzuteko tramitea egin daiteke, Herri Administrazioen Araubide Juridikoari eta Administrazio Prozedura Erkideari buruzko Legearen 84. artikuluari jarraikiz.

2. Diru-laguntzaren proposamenaren zenbatekoa aurkeztutako eskaeran ageri dena baino txikiagoa baldin bada, eta diru-laguntza ematea efizientea bada, instrukzio organoak eskaera berregiteko eskatzen ahalko du, konpromisoak eta baldintzak egokitu daitezen ematen ahal den diru-laguntzaren arabera, betiere hasierako xedea eta ezaugarriak errespetaturik. Aldatutako proiektu horren aurrekontua ez da txikiagoa izanen proposatutako diru-laguntzaren zenbatekoaren eta, halakorik badago, hasiera batean antzeko baldintzetan aurreikusitako kofinantzaketaren batura baino (eskaeran ageri den kofinantzaketa portzentaje bera mantenduko da).

13. Diru-laguntza emateko ebazpena.

1. Prozeduraren instrukzioa eginda eta ebazpen-proposamena igorri ondoren, Pertsonen Autonomiarako eta Garapenerako Nafarroako Agentziako zuzendari kudeatzaileari dagokio ebazpena ematea. Diru-laguntza emateko kontuan hartu diren baldintzak aldatuz gero, ebazpen hori aldatzea ekar dezake berarekin.

2. Ebazpena eman eta jakinarazteko epea hiru hilabetekoa izanen da, eskaerak aurkezteko epea bukatzen denetik hasita. Epe hori bukatuta, berariazko ebazpenik eman eta jakinarazi ez bada, eskaera ezetsi egin dela ulertuko da.

3. Ebazpenean, gutxienez, diru-laguntza jasotzen duten eskatzaileen zerrenda eta bakoitzari emandako diru-laguntzaren zenbatekoa jaso beharko dira, eta espresuki adieraziko da zein eskaerari esan zaion ezetz, halakorik baldin bada.

14. Diru-laguntzaren ordainketa.

Diru-laguntzei buruzko 11/2005 Foru Legearen 33. artikuluan ezarritakoari jarraikiz ordainduko da diru-laguntza, hau da, ordainketa bakar batean eta diru-laguntzak emateko ebazpenarekin batera, irabazi-asmorik gabeko entitateek edo horien federazio, konfederazio edo taldeek aski baliabiderik ez dutenean diruz lagundutako jarduera behin-behinekoz finantzatzeko, eta, betiere, hori behar bezala frogatzen badute.

Diru-laguntzaren ordainketa aurreratua egitea zilegi ez den kasuetan, diru-laguntza ordainduko da programa egin dela justifikatu ondoren 16. oinarrian adierazitakoari jarraikiz.

15. Jarraipena eta kontrola.

Instrukzio organoak jarduketen jarraipena, ebaluazioa eta kontrola eginen du, eta haien kalitateaz eta eraginkortasunaz arduratuko da. Horretarako, jarraipen eta kontrolerako beste jarduketa batzuk galarazi gabe, entitate onuradunak egindako jarduerei buruzko urtero memoria tekniko bat aurkeztu beharko du justifikazio ekonomikoarekin batera.

16. Entitate onuradunen betebeharrak.

Entitate onuradunek betebehar hauek izanen dituzte:

a) Diru-laguntza zein programa eta jardueratarako ematen den, horiek deialdiaren oinarrien arabera gauzatzea, ez baita zilegi diru hori beste helburu batzuetarako erabiltzea.

b) Jarduera egin dela eta diru-laguntza emateko edo erabiltzeko eskatutako baldintza guztiak bete direla justifikatzea, jarduera bukatu eta hilabeteko epean. Urriaren 31tik aurrera bukatzen diren jardueren kasuan, 2017ko abenduaren 31a baino lehen justifikatu beharko dira.

c) Laguntza ematen duen organoak eta indarra duen antolamendu juridikoaren arabera eskudun diren bestelako organoek egin beharreko egiaztapen lanak onartzea.

d) Lagundutako jarduera finantzatzeko eskatu edo lortutako bestelako diru-laguntza, laguntza, diru-sarrera edo baliabideen berri ematea diru-laguntza ematen duen organoari. Jakin bezain laster emanen da horren berri, eta, betiere, jasotako dirua zertan erabili den frogatu baino lehen.

e) Jasotako funtsen aplikazioari buruzko frogagiriak gordetzea, agiri elektronikoak barne, egiaztatze eta kontrol lanen xede diren bitartean.

f) Entitatearen izaera dela-eta kontabilitatean eskatzen ahal zaizkion betebeharrak betetzea.

g) Entitateak programaren diru-sarreren eta gastuen balantzea aurkeztuko du justifikaziorako eta, harekin batera, diruz lagundutako programari aplikatutako gastuen zerrenda bat, non zehaztuko baitira dokumentu zenbakia, kontzeptua, jaulkitzailea, hartzailea, jaulkipen-data eta ordainketaren data eta zenbatekoa.

Zerrenda horrekin batera frogagiriak aurkeztu beharko dira (fakturak edo antzeko froga-balioa duten dokumentuak); jatorrizkoak izan beharko dute, eta haien fotokopia bat erantsita aurkeztuko dira. Frogagiri guztietan (fakturak, banku-laburpenak, ordainagiriak, etab.) honako hauek agertuko dira: jaulkitzailea, hartzailea, data, kontzeptua, prezioa eta ordainketa-modua; eta ordainketa frogatzen duen dokumentua erantsita eduki behar dute.

h) Memoria teknikoa aurkeztea. Bertan, gutxienez, honako datu hauek bilduko dira:

–Entitatearen eta programaren identifikazioa.

–Lortutako helburuak.

–Parte hartu edo onura lortu duen giza taldea.

–Egindako jardueren azalpen laburra, honako hauek jasoz: edukiak, metodologia, bilakaera denboran eta beste erakundeekin izandako koordinazioa.

–Proiektua gauzatzean izandako zailtasunak.

–Proiektuaren balorazioa, ebaluaziorako ezarri ziren irizpideen araberakoa.

i) Familia, Gazteria, Kirol eta Gizarte Gaietako kontseilariak uztailaren 2an emandako 212/2010 Foru Aginduan ezarritako betebeharrak betetzea. Foru agindu horren bidez, Nafarroako Gobernuaren parte-hartzearen zabalkundea egiteko arauak ezarri ziren, gizarte zerbitzuen, garapenerako lankidetzaren, familiaren, haurren eta kontsumoaren arloetan diruz lagundutako edo kontratatutako zerbitzu eta zentroetan egiten diren programa, jarduera, inbertsio eta jarduketetarako.

j) Proiektua egiteko hornitzaileen kontrataziorako 12.000 euro baino gehiago behar baldin badira, diru-laguntzaren onuradunak behar den bezala frogatu beharko du hornitzailea efizientziaren eta ekonomiaren irizpideei jarraikiz hautatu dela.

Horretarako, entitateak aski izanen du proiektua egiteko hiru aurrekontu aurkeztea, hori egiterik dagoenean.

k) Diruz lagundutako jardueraren parte bat egiteko hirugarrenekin azpikontratazioa egin behar izanez gero, azpikontratazio horrek ez du emandako diruaren %25 baino gehiago hartuko.

l) Eskubide Sozialetako Departamentuaren baimena eskatu eta eskuratzea diruz lagundutako proiektuan funtsezko aldaketak egiteko, proiektua gauzatzea nabarmen aldatzen edo zailtzen duten inguruabarrak gertatzen direnean.

Funtsezko aldaketatzat jotzeko, helburuetan, emaitzetan, onura hartzen duen populazioan edo lurralde kokapenean eragina izan beharko du, edo, hasierako aurrekontuarekin alderaturik, diru-laguntza jaso dezakeen gastu bakoitzaren %5eko desbideratze ekonomikoa gertatu beharko da. Proiektua aldatzeko eskaeretan aldaketa edo zailtasun horren gainean behar adina arrazoi eman beharko dira, eta inguruabar horiek gertatu eta berehala jakinarazi beharko dira, betiere, diruz lagundutako proiektua gauzatzeko epea bukatu baino lehen. Diru-laguntza emateko kontuan hartutako baldintzen edozein aldaketak, administrazioak onartu ala ez, diru-laguntza emateko ebazpena aldarazten ahalko du, eta, hala badagokio, kasuan kasuko zenbatekoa itzuli beharko da.

Proiektua gauzatu bitartean gertatzen diren gainerako gorabehera eta aldaketa ez-funtsezkoak arrazoituta adieraziko zaizkio Nafarroako Gobernuari dagokion justifikazio txostenean, barnean dela Nafarroako Gobernutik kanpoko finantzabideak handitzeagatik guztirako kostua handitzea.

17. Itzulketak.

1. Hartutako zenbatekoa itzuli beharko da, osorik edo hein batean, ekintzak gauzatzen ez badira, diru-laguntza emateko ezarritako baldintzak ez badira betetzen, Diru-laguntzei buruzko Foru Legearen 35. artikuluan aipatzen diren zergatikoak gertatzen badira edo deialdi honetan berariaz aipatzen diren eginbeharrak ez badira betetzen.

Legez ezarritako kasuetan, gainera, bidezkoa izanen da diru-laguntza ordaindu zenetik itzuli beharraren gaineko ebazpena ematen den arte sortutako berandutze-interesak ordaintzeko eskatzea.

Dirua itzultzeko prozedurak goian aipatutako artikuluan xedatutakoari jarraituko dio, eta hasten denetik hamabi hilabeteko epean eman beharko da haren gaineko ebazpena. Dena dela, entitateak modu boluntarioan eskatzen ahalko du justifikatu gabeko diru-laguntzaren zenbatekoaren itzulketa. Horretarako, frogagiri bat aurkeztu beharko du erakusteko diru-sarrera bat egin dela Eskubide Sozialetako Departamentuaren alde, aldez aurretik ordaindutako zenbatekoaren eta justifikatutako zenbatekoaren arteko aldearen adinakoa. Kasu horretan, ez da berandutze-interesik aplikatuko, eta ulertuko da entitateak espresuki uko egiten diola itzultzen duen zenbatekoari.

Orobat, entitate onuradunak ia betebehar guztiak betetzen dituenean eta bere konpromisoak betetzeko jarrera garbia erakusten duenean, proportzionaltasun irizpideari jarraituz zehaztuko da itzuli beharreko zenbatekoa, diru-laguntza emateko ezarritako baldintzetatik zenbat eta noraino bete diren ikusita.

18. Diru-laguntzaren bateragarritasuna.

Foru agindu honetako diru-laguntzak bateragarriak izanen dira helburu bererako ematen diren bestelako diru-laguntzekin, betiere haien zenbatekoa, bakarrik edo beste diru-laguntza, laguntza, diru-sarrera edo baliabide bereki batzuekin baturik, onuradunak egin beharreko jardueraren kostua baino handiagoa ez bada.

Beste laguntza edo diru-sarrera batzuk lortzearen ondorioz diruz lagundutako proiektuaren edo programaren zenbatekoa gainditzen bada, soberakina Nafarroako Foru Administrazioari itzuli beharko zaio.

19. Gardentasuna.

1. Nafarroako Aurrekontu Orokorren kargurako diru-laguntzen onuradunen gardentasun betebeharrak arautzen dituen irailaren 11ko 59/2013 Foru Dekretuaren 2. artikuluan aipatzen diren entitateek Gardentasunari eta Gobernu Irekiari buruzko ekainaren 21eko 11/2012 Foru Legearen bederatzigarren xedapen gehigarrian ezarritako gardentasun betebeharrak bete beharko dituzte, Nafarroako Aurrekontu Orokorren kargurako diru-laguntzak jasotzen badituzte eta bi inguruabar hauek gertatzen badira:

a) Emandako diru-laguntza 20.000 eurotik gorakoa izatea urtean.

b) Emandako diru-laguntza entitate onuradunaren urteko negozio-zifraren edo aurrekontuaren %20tik gorakoa izatea.

Aurreko atalean ezarritako mugak gainditzen ote diren jakiteko, Nafarroako Foru Komunitateko Administrazioak edo haren erakunde publikoek urte naturalean emandako diru-laguntza guztien kopuruak batuko dira. Urte batean baino gehiagotan ordaintzen diren diru-laguntzen kasuan, aurrekontuko ekitaldi bakoitzean emandako kopurua hartuko da kontuan ondorio horietarako, ez guztizko batura. Erreferentziako negozio-zifra edo aurrekontua, urtekoa, honako hauen arteko txikiena izanen da:

a) Aurreko urteko negozio-zifra edo aurrekontu exekutatua.

b) Hala badagokio, negozio-zifra, edo diru-laguntza ematen den ekitaldian entitatearen organo eskudunak onartutako aurrekontua.

Aipatu diren inguruabarrak gertatzeagatik gardentasun betebeharrak dituzten entitate onuradunek jarraian adierazten den informazioa eman beharko dute:

a) Entitatearen gobernu, administrazio eta zuzendaritza organoen osaera.

b) Organo horiek osatzen dituzten kargudunen zerrenda.

c) Entitateak aurreko urtean kargudun bakoitzari ordaindutako ordainsari gordinak eta gainerako diru konpentsazioak, kontzeptuz kontzeptu. Sortu berriak diren entitateen kasuan, informazioa haien aurrekontuetan edo plan ekonomiko-finantzarioan jasotakoa izanen da.

d) Kargudun bakoitzaren dedikazio araubidea gobernuko, administrazioko eta zuzendaritzako eginkizunetarako.

e) Entitate onuradunaren urteko azken kontuen kopia bat.

Informazio hori entitate onuradunaren legezko ordezkariak sinatuta aurkeztuko da, Nafarroako Gobernuaren Erregistro Orokor Elektronikoaren bide telematikoak erabiliz, eta diru-laguntza kudeatzen duen administrazio unitateari bidaliko zaio. Eskabidearekin batera borondatez aurkeztu ez bada, informazioa bidaltzeko epea hilabetekoa izanen da, diru-laguntza ematen duen ebazpena jakinarazten edo argitaratzen den egunetik hasita, argitaratuz gero.

Informazio hori urtebetez egonen da aztergai Nafarroako Gobernu Irekiaren Atarian argitaratzen denetik hasita, eta gehienez 15 hilabetez utziko da bertan, informazioa kudeatzen duen organoan sartzen den egunetik hasita. Epe hori iraganik, informazioa argitaratzeko ardura duen unitateak ofizioz kenduko du. Hala egin ezean, entitate onuradunak kentzeko eskatzen ahalko du, eta gehienez ere hilabeteko epean kendu beharko da, eskaera egiten denetik hasita.

Entitateak gardentasun betebeharra bete behar ez badu, aurreikusitako inguruabarrak gertatzen ez direlako, horren gaineko aitorpena aurkeztu beharko du.

Entitateak ekitaldi berean diru-laguntza bat baino gehiago jasotzen badu, ez du informazioa errepikatu beharko diru-laguntza bakoitzerako, salbu eta hasieran eman zituen datuak aldatzen badira.

Onuradunak informazioa emateko betebeharrak ez betetzeak ekar ditzakeen zehapenak galarazi gabe, ez-betetze kasuetan, onartutako diru-laguntza ordaindu gabe utziko da, aurrerakinak barne, eta, hala badagokio, kobratutako zenbatekoak itzuli beharko dira, Diru-laguntzei buruzko azaroaren 9ko 11/2005 Foru Legearen 35.1.c) artikuluan ezarritakoari jarraikiz.

2. Gardentasunari eta Gobernu Irekiari buruzko ekainaren 21eko 11/2012 Foru Legearen 20. artikuluan xedatutakoarekin bat, Pertsonen Autonomiarako eta Garapenerako Nafarroako Agentziak, diru-laguntzak emateko jakinarazpena egin ondoko hilabetean, Nafarroako Gobernuaren Atarian argitaratuko duen zerrenda batean jarriko ditu diru-laguntzen onuradunak, laguntzen zenbatekoak eta araudi erregulatzailea.

20. Errekurtsoak.

1. Deialdiaren eta oinarrien kontra, gora jotzeko errekurtsoa jartzen ahal da, Nafarroako Gobernuari zuzendua, Nafarroako Aldizkari Ofizialean argitaratu eta biharamunetik hasita hilabeteko epean, Administrazio Publikoen Administrazio Prozedura Erkideari buruzko urriaren 1eko 39/2015 Legean eta Nafarroako Foru Komunitateko Administrazioari buruzko abenduaren 3ko 15/2004 Foru Legean ezarritakoari jarraikiz.

2. Foru agindu hau aplikatzeko egintzen aurka gora jotzeko errekurtsoa jartzen ahalko da Eskubide Sozialetako kontseilariari zuzendua, haiek jakinarazi edo Nafarroako Aldizkari Ofizialean argitaratu edo errekurritutako egintza jakinarazi eta biharamunetik hasita hilabeteko epean, Administrazio Publikoen Administrazio Prozedura Erkideari buruzko urriaren 1eko 39/2015 Legean eta Nafarroako Foru Komunitateko Administrazioari buruzko abenduaren 3ko 15/2004 Foru Legean ezarritakoari jarraikiz.

21. Aplikatu beharreko legeria.

Foru agindu honetan aurreikusita ez dagoen guztian Diru-laguntzei buruzko azaroaren 9ko 11/2005 Foru Legean eta aplikatu beharreko gainerako arauetan ezarritakoari jarraituko zaio.

II. ERANSKINA

Diru-laguntza proiektuak baloratzeko irizpideen proposamena, 2017

A.–Entitatearen balorazioa: 15 puntu gehienez

–Helburuak: 5 puntu gehienez:

  • 5 puntu: Deialdiaren helburua entitatearen estatutuen helburuen artean ageri da, zerrendako lehenengo edo bigarren tokian.
  • 3 puntu: Deialdiaren helburua zerrenda horretako hirugarren edo laugarren tokian agertzen da.
  • Puntu bat: Deialdiaren helburua zerrenda horretako laugarren tokitik haratago agertzen da.

–Esperientzia: 5 puntu gehienez:

  • (0,25 puntu egiaztatutako esperientzia urte bakoitzeko, edo entitatea erregistratu zen egunetik aurrerako urte bakoitzeko. 5 puntu gehienez).

–Azpiegiturak eta ekipamendua: 2 puntu gehienez.

  • 2 puntu: Lokal propioak ditu.
  • Puntu bat: Oinarrizko ekipamendua du.
  • 0 puntu: Lokal publikoak erregulartasunez erabiltzen ditu.

–Kofinantzaketa: 2 puntu gehienez:

  • 2 puntu: Nafarroako Gobernutik kanpoko ekarpena > %10.
  • Puntu bat: Nafarroako Gobernutik kanpoko ekarpena ≤ %10.
  • 0 puntu: Ez dago Nafarroako Gobernutik kanpoko ekarpenik.

–Bestelakoak: Puntu bat gehienez.

  • 0,5 puntu: Auditoretza soziala egiten dute edo kalitate sistema homologatua dute.
  • 0,5 puntu: Genero berdintasunerako plan bat ezarria dute.

B.–Programaren balorazioa: 75 puntu gehienez

Proiektuaren koherentzia: 30 puntu gehienez:

–Oinarria eta jarduteko eremua: 6 puntu gehienez:

  • 6 puntu: Guztiz koherentea da.
  • 3 puntu: Bi alderdietako batean bakarrik dago koherentzia.
  • 0 puntu: Inkoherentea da, edo oso gutxi zehaztuta dago.

–Helburuak: 6 puntu gehienez:

  • 6 puntu: Guztiz koherenteak dira, eta ongi zehaztuta daude:
  • 3 puntu: Inkoherenteak dira, edo oso gutxi zehaztuta daude:
  • 0 puntu: Ez dira bete.

–Jardueren deskribapena: 6 puntu gehienez.

  • 6 puntu: Zehatz deskribatuak.
  • 3 puntu: Hala-hola. Ez daude zehatz deskribatuta.
  • 0 puntu: Ez daude zehaztuak (aipatuak besterik ez):

–Espero ziren emaitzak: 5 puntu gehienez:

  • 5 puntu: Zehatz deskribatuak.
  • 3 puntu: Hala-hola. Ez daude zehatz deskribatuta.
  • 0 puntu: Ez dira bete.

–Jardueren egutegia: 6 puntu gehienez:

  • 6 puntu: Zehatz deskribatua.
  • 3 puntu: Hala-hola: Ez dago zehatz deskribatuta.
  • 0 puntu: Ez da bete.

Ebaluazioaren analisia: 9 puntu gehienez.

–Adierazleak: 3 puntu gehienez:

  • 3 puntu: Oso egokia.
  • 2 puntu: Egokia:
  • Puntu bat: Hala-hola:
  • 0 puntu: Desegokiak edo ez dago halakorik:

–Egiaztapen iturriak: 3 puntu gehienez:

  • 3 puntu: Oso egokia.
  • 2 puntu: Egokia.
  • Puntu bat: Hala-hola.
  • 0 puntu: Desegokiak edo ez dago halakorik.

–Ebaluazio eta jarraipen prozesu bat izatea: 3 puntu gehienez:

  • 3 puntu: Oso egokia.
  • 2 puntu: Egokia.
  • Puntu bat: Hala-hola.
  • 0 puntu. Desegokiak edo ez dago halakorik.

Giza baliabideen eta baliabide tekniko eta ekonomikoen analisia: 14 puntu gehienez:

–Giza baliabideen egokitasuna: 4 puntu gehienez (Profil teknikoen definizioa eta esleitutako eginkizunak baloratzen dira):

  • 4 puntu: Oso egokia.
  • 3 puntu: Egokia.
  • 2 puntu: Hala-hola.
  • 0 puntu: Desegokia.

–Boluntarioak: 3 puntu gehienez (Boluntariorik ba ote den, eta esleitu zaizkien eginkizunen azterketa):

  • 3 puntu: Oso egokia.
  • 2 puntu: Egokia:
  • Puntu bat. Hala-hola:
  • 0 puntu. Desegokia:

–Baliabide teknikoen egokitasuna: 3 puntu gehienez (materialak, lokalak, etab.):

  • 3 puntu: Oso egokia.
  • 2 puntu: Egokia.
  • Puntu bat: Hala-hola.
  • 0 puntu: Desegokiak edo ez dago halakorik.

–Aurrekontuaren xehakatze zuzena: 4 puntu gehienez:

  • 4 puntu: Oso egokia.
  • 3 puntu: Egokia.
  • 2 puntu: Hala-hola.
  • 0 puntu: Desegokia.

Proiektuaren osagarritasuna eta koordinazioa beste entitate batzuekin eta beste gizarte baliabide batzuekin: 8 puntu gehienez:

–Zerbitzu publikoekin (gizarte, osasun eta hezkuntza arlokoekin eta beste batzuekin) aldian aldiko koordinazioa egiteko egitura bat planteatzen du: 4 puntu gehienez:

  • 4 puntu: Oso egokia.
  • 3 puntu: Egokia.
  • 2 puntu: Hala-hola.
  • 0 puntu: Desegokia.

–Antzeko entitateekin aldian aldiko koordinazioa egiteko egitura bat planteatzen du: 4 puntu gehienez:

  • 4 puntu: Oso egokia.
  • 3 puntu: Egokia.
  • 2 puntu: Hala-hola.
  • 0 puntu: Desegokia.

–Nor bere aldetik aritzen da, edo ez da inolako koordinazio sistemarik aipatzen: 0 puntu.

Pertsona onuradunen parte-hartzearen analisia: 14 puntu gehienez:

–Profilaren analisia eta zenbatespen kuantitatiboa: 5,5 puntu gehienez:

  • 5,5 puntu: Oso egokia.
  • 3 puntu: Egokia.
  • 2 puntu: Hala-hola.
  • 0 puntu: Desegokia.

–Irisgarritasuna pertsonentzat: 5,5 puntu gehienez:

  • 5,5 puntu: Irisgarria jende ororentzat.
  • 2,5 puntu: Irisgarria kolektibo jakin batentzat bakarrik.
  • 0 puntu: Irisgarritasun arazo larriak ditu.

–Proiektuaren onuradun diren pertsonek parte hartzeko bideak izatea (akordio idatziak, gogobetetasun inkestak...): 3 puntu gehienez:

  • 3 puntu: Baditu.
  • 0 puntu: Ez ditu:

C.–Bestelakoak: 10 puntu gehienez

Proiektuaren eraginkortasuna aurreko urteetan: 6 puntu gehienez:

Azken urtea hartuko da erreferentzia gisa, espedientean jasotzen den memoriaren arabera. Memorian horrelako informaziorik agertzen ez bada, ez da punturik emanen.

Aurkeztutako proiektuak Familiaren eta Adingabeen Zuzendariordetzaren diru-laguntzarik ez badu, baina memorian alderdi horiek agertzen eta justifikatzen badira, aldez aurretik egin baitziren, baremoa hau berdintasun baldintzetan aplikatuko da.

–Lortutako helburuen arabera: 2 puntu gehienez:

  • 2 puntu: Planteatutako helburu guztiak lortu dira:
  • Puntu bat: Planteatutako helburuen %50 lortu da.
  • 0 puntu: Planteatutako helburu bat ere ez da lortu.

–Egindako jardueren arabera: 2 puntu gehienez:

  • 2 puntu: %95-%100.
  • 1,5 puntu: %75-%94.
  • Puntu bat: %50-%74.
  • 0,5 puntu: %30-%49.
  • 0 puntu: %0-%29.

–Xede-populazioaren arabera: 2 puntu gehienez:

  • 2 puntu: %95-%100.
  • 1,5 puntu: %75-%94.
  • Puntu bat: %50-%74.
  • 0,5 puntu: %30-%49.
  • 0 puntu: %0-%29.

Programa berritzailea: 4 puntu gehienez:

  • 4 puntu: Berritzailea da planteatutako helburu edo edukietan eta erabilitako metodologia eta baliabideetan.
  • 2 puntu: Berritzailea da proposatzen dituen helburu edo edukietan.
  • 2 puntu: Berritzailea da erabiltzen dituen metodologia eta baliabideetan.
  • Puntu bat: Alderdi berritzaile batzuk ditu helburu edo alderdi metodologiko batzuetan.
  • 0 puntu: Ez du inolako alderdi berritzailerik.

Iragarkiaren kodea: F1701287