240. ALDIZKARIA - 2017ko abenduaren 18a

1. NAFARROAKO FORU KOMUNITATEA

1.1. XEDAPEN OROKORRAK

1.1.3. Foru Aginduak

101/2017 FORU AGINDUA, azaroaren 9koa, Hezkuntzako kontseilariak emana, Hezkuntzako kontseilariaren abuztuaren 27ko 79/2012 Foru Agindua aldatzen duena; foru agindu horren bidez ezarri ziren oinarriak Hezkuntza Departamentuaren eta toki entitateen artean lankidetza hitzarmenak izenpetzeko, Haur Hezkuntzako lehen zikloko udal titulartasuneko ikastetxeen kudeaketa finantzatzeko asmoz.

Helburu izanik udalek beren eragin eremuan zerbitzua ematearen ondorioz izaten dituzten gastuak zuzentzea, eta komeni denez Hezkuntza Departamentuaren eta toki entitateen arteko lankidetza hitzarmenen oinarriak ezartzen dituzten arauetako zenbait eguneratzea, betiere Haur Hezkuntzako lehen zikloko udal titulartasuneko ikastetxeen kudeaketa finantzatzeari buruz ari garelarik, gomendatzen da Hezkuntzako kontseilariaren abuztuaren 27ko 79/2012 Foru Agindua aldatzea. Foru agindu horren bidez ezarri ziren oinarriak Hezkuntza Departamentuaren eta toki entitateen artean lankidetza hitzarmenak izenpetzeko, Haur Hezkuntzako lehen zikloko udal titulartasuneko ikastetxeen kudeaketa finantzatzeko asmoz.

Horrenbestez, Hezkuntza Departamentuak erabaki du Hezkuntzako kontseilariaren abuztuaren 27ko 79/2012 Foru Agindua aldatzea, zeinak oinarriak ezartzen baititu Hezkuntza Departamentuaren eta toki entitateen artean lankidetza hitzarmenak izenpetzeko, Haur Hezkuntzako lehen zikloko udal titulartasuneko ikastetxeen kudeaketa finantzatzeko asmoz.

Nafarroako Gobernuari eta Lehendakariari buruzko abenduaren 3ko 14/2004 Foru Legearen 41.1. g) artikuluan emandako ahalmenak erabiliz,

AGINDU DUT:

1. artikulua. Hezkuntzako kontseilariak abuztuaren 27an emandako 79/2012 Foru Aginduaren 2. artikuluaren 3. apartatua aldatzen da, eta honela idatzita agertuko da:

“3. Hezkuntza Departamentuaren eta diru-laguntza jasotzen duten ikastetxeen titularrak diren toki entitateen arteko lankidetza hitzarmenen bidez gauzatuko dira diru-laguntzak, foru agindu honetan ezarritako oinarri eta baldintzei jarraituz. Lankidetza hitzarmen horiek dagokion urteko abenduaren 31 baino lehen sinatuko dira oro har.”

2. artikulua. Hezkuntzako kontseilariak abuztuaren 27an emandako 79/2012 Foru Aginduaren 3. artikuluaren 2. eta 3. apartatuak kentzen dira.

3. artikulua. Hezkuntzako kontseilariak abuztuaren 27an emandako 79/2012 Foru Aginduaren 4. artikuluaren 1. apartatua aldatzen da, eta honela idatzita agertuko da:

“1. Foru agindu honen eranskinean jasotako moduluetan oinarrituta ezarriko da finantzaketa. Kudeaketa mota alde batera utzita, zerbitzuaren entitate titularrak bermatu beharko du finantzatutako unitateen arabera ezarritako urteko moduluan langileriarentzat sartzen den aurrekontuetako partida helburu horretarako erabiliko dela oso-osorik, lankidetza hitzarmenetan ezartzen denari jarraikiz.”

4. artikulua. Hezkuntzako kontseilariak abuztuaren 27an emandako 79/2012 Foru Aginduaren 4. artikuluaren 3. apartatua aldatzen da, eta honela idatzita agertuko da:

“3. Toki entitatearen ekarpena urteko modulu aplikagarriaren %25era artekoa izaten ahal da. Baldin eta udalek unitate bakarra badute eta haur kopurua ez bada unitate diruz lagungarria eratzeko behar adinakoa, urteko modulu aplikagarriaren %15era arteko ekarpena egin beharko dute. Era berean eta oro har, Foru Komunitateko Administrazioak bere gain hartzen ez dituen gastu guztien kargu eginen dira toki entitateak, gastu horiek hauek direnean:

a) Urteko modulutik gorako kostuen igoera.

b) Dagokion araudian oro har ezarritako eskolatze tarifetatik gora egiten diren murrizketak.

c) Ratioen murrizketa, martxoaren 26ko 28/2007 Errege Dekretuan ezarritakoen aldean, non ez den toki faltagatik foru agindu honek indarra hartzen duenean eraikita dauden ikastetxeetan, toki entitateek hala erabakitzen dutenean; kasu horretan, gehieneko tarifaren kostua hartuko dute beren gain eskaintzen ez diren ikaspostu bakoitzeko. Ratioen murrizketa hori Hezkuntza Departamentuari jakinarazi beharko zaio, behar den plangintza zehazteko.

d) Ikasturte hasieran, toki entitateak aurkezten dituen datuen arabera, egindako plangintzako aurreikuspenen eta benetan justifikatzen denaren arteko desbideraketak erregularizatzeko prozesuaren ondoriozko desorekak.”

5. artikulua. Hezkuntzako kontseilariak abuztuaren 27an emandako 79/2012 Foru Aginduaren 4. artikuluaren 6.b) apartatua aldatzen da, eta honela idatzita agertuko da:

b) Ikasturtea hasi ondoren, bularreko haurrentzako unitateak irekitzea (0-1 urte).”

6. artikulua. Hezkuntzako kontseilariak abuztuaren 27an emandako 79/2012 Foru Aginduaren 7. artikulua aldatzen da, eta honela idatzita agertuko da:

7. artikulua. Ordaintzeko epeak.

Hezkuntza Departamentuak transferitu beharreko diru kopuru guztia 2 epetan ordainduko da. Lehenengo ordainketa, ikasturte osoari dagokion diru-laguntzaren %80koa gehienez, ikasturtea hasi eta hurrengo urteko lehen hiruhilekoan eginen da, behin hitzarmenak izenpetutakoan. Bigarrena, gainerako %20a, urte horretan berean ordainduko da, amaitutako ikasturtean izan diren diru-sarreren eta gastuen justifikazioa toki entitateak igorri ondoren. Justifikazio hori aurkezteko mugaeguna urtean urteko irailaren 1a izanen da.”

Azken xedapena.–Indarra hartzea.

Foru agindu honek Nafarroako Aldizkari Ofizialean argitaratu eta biharamunean hartuko du indarra.

Iruñean, 2017ko azaroaren 9an.–Hezkuntzako kontseilaria, María Solana Arana.

Iragarkiaren kodea: F1712973