1. NAFARROAKO FORU KOMUNITATEA
1.2. AGINTARIAK ETA LANGILEAK
1.2.2. Oposizioak eta lehiaketak. Lan publikoaren eskaintza
2211/2017 EBAZPENA, azaroaren 22koa, Nafarroako Unibertsitate Publikoko Ikerketako errektoreordeak emana. Haren bidez, ikertzaileen lan kontratazioa egiteko hautaprobetarako deia egiten da honako ikerketa proiektu hau garatzeko: “RTA2015-00052-C02-02 y 0011-1365-2017-000113”, Frutagintza eta Mahastizaintza Aurreratua Ikerketa Taldearena.
2017ko azaroaren 21ean, Ikerketa Zerbitzuak ikertzaileak kontratatzeko hautaprobetarako deia egiteko eskatu zuen, proiektuko 1. motako lankide doktore gisa, Frutagintza eta Mahastizaintza Aurreratua Ikerketa Taldearen “RTA2015-00052-C02-02 y 0011-1365-2017-000113” ikerketa proiektua egiteko. Ikerketa proiektuaren ikertzaile nagusia Carlos Miranda Jiménez da, Unibertsitateko irakasle titularra eta Nekazaritzako Ekoizpen Sailari atxikia.
Langileen Kudeaketarako Ataleko buruaren proposamenez, zeinak Giza Baliabideen Zerbitzuko zuzendariaren oniritzia baitauka.
Nafarroako Unibertsitate Publikoko errektoreak, errektoretza taldearen egitura orokorra onetsi eta bere funtzioak zehazteko 2015eko ekainaren 24an eman zuen 1042/2015 Ebazpenaren bidez, eskuordetu dizkidan eskumenak erabiliz,
EBATZI DUT:
Lehena.–Hautaprobetarako deialdia egitea Frutagintza eta Mahastizaintza Aurreratua Ikerketa Taldearen “RTA2015-00052-C02-02 y 0011-1365-2017-000113” ikerketa proiektua garatzeko ikertzaileen lan kontratazioa egiteko.
Bigarrena.–Hautaproben deialdia arautuko duten oinarriak, ebazpen honekin batera doazenak, ebazpenaren parte gisa onestea.
Hirugarrena.–Hautapen Batzordeko kideei eta Ikerketa Zerbitzuko Zuzendaritzari ebazpen hau helaraztea.
Laugarrena.–Ebazpen hau Nafarroako Unibertsitate Publikoaren web orrialdean eta Nafarroako Aldizkari Ofizialean argitaratzeko agintzea.
Bosgarrena.–Ebazpen honek administrazio bidea agortzen du, Unibertsitateei buruzko 2001eko abenduaren 21eko 6/2001 Lege Organikoaren 6.4 artikuluak xedatzen duenaren arabera, eta zilegi da berraztertzeko errekurtsoa errektorearen aurrean, edo, bestela, zuzenean administrazioarekiko auzi-errekurtsoa Nafarroako Administrazioarekiko Auzietako Epaitegietan, hilabeteko epean lehenengo kasuan, eta bi hilabeteko epean bigarrenean, biak ere, ebazpena argitaratu eta biharamunetik kontatzen hasita.
Iruñean, 2017ko azaroaren 22an.–Ikerketako errektoreordea, Ramón Gonzalo García.
OINARRIAK
1.–Datu orokorrak.
–Deialdiaren xedea: deialdi honen xedea ikertzaileak hautatzea da, ondoren lan kontratazioa egiteko ikerketa proiektu hau garatzeko: Frutagintza eta Mahastizaintza Aurreratua Ikerketa Taldearen “RTA2015-00052-C02-02 y 0011-1365-2017-000113”.
–Maila profesionala: Proiektuko 1. motako lankide doktorea, batez ere ikerketa lanetan aritzeko.
–Egin beharreko eginkizunak: RTA2015-00052-C02-02 y 0011-13652017-000113 proiektuan biltzen direnak, batez ere ondorengo gai hauekin zerikusia dutenak:
–Madariondo eta sagarrondoaren landare-materialaren ezaugarritze genetikoa SSR markatzailearekin.
–RTA2015-00052-C02-02 proiektuan txertatutako madariondo-bildumetan dauden baliabide fitogenetikoen ezaugarritze morfologiko eta agronomikorako metodologia estandarizatu bat ezartzea.
–Sagarrondoetan interes agronomikoa daukaten karaktereei loturiko markatzaile molekularrak GWASen bidez identifikatzea.
–Kontserbazio estrategia bat ezartzea sagarrondo autoktono espainiarrerako.
–Zurin-presentzia kuantifikatzea mahatsaren laginetan, teknika molekularren eta NIRS tekniken bidez.
–Frutagintza eta Mahastizaintza Aurreratua Ikerketa Taldearentzat interesgarriak izan litezkeen beste ekintza batzuk, baliabide fitogenetikoen alorrean.
–Kontratu mota: Nafarroako Unibertsitate Publikoko Ikertzaileak Kontratatzeko Arautegian, Gobernu Kontseiluak 2017ko maiatzaren 3an hartu zuen Erabaki baten bidez onetsitakoan, ezarritakoarekin bat etorriz, Langileen Estatutuko 15. artikuluak ezarritako obra edo zerbitzu zehatzeko kontratu modalitatearen bidez egingo da kontratazioa.
–Iraupena: 24 hilabete, kontratua sinatzen denetik hasita.
Langileen Estatutuari buruzko Legearen Testu Bateginaren 15. artikulua garatzen duen 1998ko abenduaren 18ko 2720/1998 Errege Dekretuan xedatutakoarekin bat, iraupen hori orientatzekoa da, eta iraupena inolaz ere ez da izango proiektua indardun den denbora baino luzeagoa, eta betiere esleitutako diru kopuruak baldintzatuko du, eta, horrenbestez, ikerketa proiektuari lotzen zaion funtsa ez izatea kontratua iraungitzeko zioa izango da.
–Lanaldi-mota: lanaldi osoa.
–Ordainsariak: Nafarroako Unibertsitate Publikoko Ikertzaileak Kontratatzeko Arautegiak, 2017ko maiatzaren 3an Gobernu Kontseiluaren erabaki batez onetsitakoak, bere Eranskinean ezarritakoak.
Diru gehigarriak ordaintzeko aukera egongo da, proiektuan edo kontratuan ezarritako helburuak betez gero. Diru gehigarri horiek ordaintzeko, proiektuaren arduradunak ordainketa justifikatzen duen azken txosten bat egin beharko du, eta aurrekontuan diru kopuru nahikoa izan beharko da.
–Finantzaketa: Ikerketarako Estatuko Agentzia, Nafarroako Gobernua eta EGEF (FEDER) funtsak.
–Argitaratzeko tokia: deialdia Nafarroako Aldizkari Ofizialean argitaratzeaz gainera, deialdiarekin lotutako egintza eta ebazpen guztiak Nafarroako Unibertsitate Publikoaren webean argitaratuko dira.
2.–Parte hartzeko baldintzak.
2.1.–Hautaprobetan onartuak izateko, izangaiek baldintza hauek bete beharko dituzte:
a) Espainiako herritarra izatea edo Europar Batasuneko estaturen batekoa izatea edo, Europar Batasunak izenpetu eta Espainiar Estatuak berretsitako nazioarteko itunen arabera, langileen joan-etorri askea aplikatzekoa zaion estaturen batekoa.
Halaber, Espainiako, Europar Batasuneko estatuetako eta aipatu nazioarteko itunak aplikatzen diren eremuko estatuetako herritartasuna dutenen ezkontideek parte hartzeko aukera dute, betiere zuzenbidearen arabera bananduak ez badaude; herritartasuna duenaren ondorengoek eta haren ezkontidearen ondorengoek ere parte hartzeko aukera dute, zuzenbidearen arabera bananduak ez badaude, baldin eta 21 urtetik beherakoak badira edo, adin horretatik gorakoak izanda ere, gurasoen kontura bizi badira.
Espainian legezko bizilekua duten atzerritarrek administrazio publikoetako lan kontratupeko langile aritzeko aukera izango dute.
b) 18 urte baino gehiago izatea, eta erretiro adina betea ez izatea.
c) Doktorearen titulazio akademiko ofiziala.
Atzerrian erdietsitako titulazioak badira, izangaiak eskuan izan beharko du homologazioaren egiaztagiria, edo baliokidetzearena, hala badagokio. Betekizun hori ez zaie aplikatuko lanbide arautuen eremuan kualifikazio profesionalaren aitorpena daukaten izangaiei, Europako Erkidegoko Zuzenbidearen xedapenen babesean erdietsi dutenei.
d) Deialdiko xede diren lanpostuak betetzea galarazten duen gaixotasunik edo muga fisikorik edo psikikorik ez edukitzea.
e) Diziplinako espediente baten ondorioz edozein administrazio publikotako zerbitzutik baztertua ez izatea, eta eginkizun publikoak betetzeko ezgaitua ez egotea epai irmo baten bidez.
2.2.–Aurreko arauetan ezarri diren baldintzak eskaerak aurkezteko epea bukatzen denean bete beharko dira, eta kontratazioa egin arte beteko dira.
3.–Eskaerak.
Eskabideak aurkezteko epea 10 egun baliodun igaro ondoren bukatuko da, deialdi hau Nafarroako Aldizkari Ofizialean argitaratzen den egunaren biharamunetik kontatzen hasita.
Eskabide eredua esteka honetan dago:
http://www2.unavarra.es/gesadj/registroGeneral/instancias/recursos-humanos/contratacion-personal-investigador.pdf
Eskaerarekin batera agiri hauek aurkeztuko dituzte:
–Nortasun Agiri Nazionalaren, AIZ edo pasaportearen fotokopia.
–Deialdian eskatzen den tituluaren fotokopia.
–Ikasketa espedientearen fotokopia, batez besteko nota zehaztuta.
–Curriculum vitaea, egoki jotzen dituen merezimendu egiaztagiriekin batera.
Parte hartzeko eskabideak eta dokumentazioa Nafarroako Unibertsitate Publikoko Erregistro Orokorrean aurkeztu behar dira (Arrosadiko campusa, z./g., 31006 Iruñea / Tuterako campusa, Tarazona etorbidea, z./g., 31500 Tutera), edo Estatuaren Administrazio Orokorreko erregistroetan, Autonomia Erkidegoetako Administrazioetako eta Toki Administrazioa osatzen duten Erakundeetako erregistroetan, posta bulegoetan edo Espainiak atzerrian dituen kontsulatuetan edo ordezkaritza diplomatikoetan.
Eskaera posta bulego batean aurkeztuz gero, gutun azal irekian egingo da, posta zerbitzuko langileak, ziurtatu aurretik, data eta zigilua jar ditzan, eta ondoren egiaztatu eta bidali Nafarroako Unibertsitate Publikoaren Erregistrora.
Giza Baliabideen Zerbitzuak eskaerak behar bezala kudea ditzan, Nafarroako Unibertsitate Publikoko erregistroak aukeratzen ez dituzten eskatzaileek eskaeraren kopia eskaneatu bat bidali behar dute dagokion erregistroko sarrera-zigiluarekin recursos.humanos@unavarra.es helbide elektronikora.
4.–Izangaiak onartzea.
4.1.–Eskaerak aurkezteko epea bukatu eta gero, onartuen eta baztertuen behin-behineko zerrenda argitaratuko da.
Eskatzaileetako inor baztertzen ez bada, lehiaketa publikorako onartu diren izangaien behin betiko zerrenda argitaratuko da.
4.2.–Izangai baztertuek edo azaldu gabeek, behin-behineko zerrenda Nafarroako Aldizkari Ofizialean argitaratu eta hurrengo 5 egun balioduneko epean, zilegi dute erreklamazioa eta, akatsen bat badago, akatsak zuzentzea.
4.3.–Eskaerak aurkezteko epea bukatu eta gero, onartuen eta baztertuen behin betiko zerrenda argitaratuko da.
4.4.–Izangaiak hautaketa prozesuan onartuen zerrendan egoteak, edota 6.2 oinarriak aipatu hautaketa prozesua gainditu dutenen zerrendan egoteak ez du ekarriko inoiz ere unibertsitateak aitortzea betetzen dituztela deialdiko oinarrietan eskatu diren baldintza orokorrak edo bereziak. Kontratatzeko deitzen dituzten izangaiek ziurtatu eta egiaztatu beharko dituzte horiek, jatorrizko dokumentazioa aurkeztu beharko baitute kontratua sinatzen dutenean.
4.5.–Jatorrizko dokumentazioan aitortzen dena parte hartzeko eskaerarekin batera aurkeztutako dokumentazioan zehatz ez emateak, faltsutzeak edo ez emateak kontratua sinatzeko ezintasuna eta kontratazio zerrendatik baztertzea ekarriko du, interesdunak berak sinatutako ardura aitorpenarekin bat etorriz.
5.–Hautaketa prozesua.
Izangaien merezimenduak balioetsiko dira aurkeztutako dokumentazioarekin bat etorriz eta I. Eranskineko baremoaren arabera.
Izangaiek eskabideak aurkezteko epea bukatzean dituzten merezimenduak bakarrik balioetsiko dira, eta gero lortutakoak ez dira kontuan hartuko. Hautapen Batzordeak inola ere ez du onartuko izangaiek alegatu ez duten edo agirien bidez frogatu ez duten merezimendurik, eta ezin izango du atal bakoitzean adierazitako gehieneko puntuazioa baino handiagorik eman.
Adierazten diren merezimendu guztiak zuzenbidean baliozkoa den edozein baliabideren bidez frogatu behar dira.
Hautapen Batzordeko kide bakoitzak balioetsiko ditu izangaien merezimenduak. Azken puntuazioa izangai bakoitzari emandako puntuazioen batezbestekoa izango da.
6.–Hautaketa prozesuaren ebazpena.
6.1.–Izangaiek aurkeztutako merezimenduen balioespena amaitu eta gero, Hautapen Batzordeak Ikerketako errektoreordeari bidaliko dio hautaketa-prozesua gainditu duten izangaien zerrenda, lortutako puntuazioekin.
6.2.–Ikerketako errektoreordeak ebazpena emango du hautaketa-prozesua gainditu duten izangaien zerrenda onesteko, eta Nafarroako Unibertsitate Publikoaren web orrialdean argitaratuko da.
6.3.–Deialdi honetako kontratazio zerrenda argitaratu eta biharamunetik hasi eta proiektua amaitzen den arte egongo da indarrean.
7.–Hautapen batzordea.
Batzordeburua: Luis Gonzaga Santesteban García dk. jn., Nafarroako Unibertsitate Publikoko unibertsitateko irakasle titularra, Nekazaritzako Ekoizpen Sailari atxikia, Ikerketako errektorordeak eskuordetuta.
Idazkaria: Carlos Miranda Jiménez dk. jn., unibertsitateko irakasle titularra, Nekazaritzako Ekoizpen Sailari atxikia.
Batzordekidea: José Bernardo Royo Díez dk. jn., Unibertsitateko irakasle titularra, Nekazaritzako Ekoizpen Sailari atxikia.
Hautapen batzorde ordezkoa.
Batzordeburua: Silvia Arazuri Garín dk. and., Unibertsitateko irakasle titularra, Landa Ingeniaritza eta Proiektuen Sailari atxikia.
Idazkaria: Ainara López Maestresalas dk. and., irakasle laguntzaile doktorea, Landa Ingeniaritza eta Proiektuen Sailari atxikia.
Batzordekidea: Ignacio Irigoyen Iriarte dk. jn., kontratupeko irakasle doktorea, eta Nekazaritzako Ekoizpen Sailari atxikia.
Hautapen Batzordearen jarduerak, une oro, Herri Administrazioen Araubide Juridikoari eta Administrazio Prozedura Erkideari buruzko 2015eko urriaren 1eko 39/2015 Legeak eta Sektore Publikoaren Araubide Juridikoaren 2015eko urriaren 1eko 40/2015 Legeak ezartzen dutenaren arabera gauzatuko dira. Jakinarazpenak emateko eta bestelako gorabeheretarako, Hautapen Batzordearen egoitza Nafarroako Unibertsitate Publikoko Administrazio eta Kudeaketa eraikina izango da.
8.–Norberaren datuak babestea.
Norberaren Datuak Babesteari buruzko 1999ko abenduaren 13ko 15/1999 Lege Organikoak (DBLO) ezarritakoarekin bat etorriz, izangaiek emandako datuak Langileen fitxategian jasoko dira. Fitxategi horren helburua da Nafarroako Unibertsitate Publikoko langileen kudeaketa.
Kontratu hau finantzatzen duen erakundearen aurrean gastuak justifikatzeko, nominei, gizarte segurantzari buruzko datuak, edo kontratupekoak jasotzen dituen beste edozein ordainsariri buruzko datuak erakunde horri lagako zaizkio. Nolanahi ere, kontratua gauzatzen denean baimenduko da lagapen hori.
9.–Errekurtsoak.
Deialdi honen aurka, haren oinarrien aurka eta errektoreak harturiko izendapen erabakiaren aurka zilegi da errekurtso hauetako bat:
a) Aukerako berraztertze errekurtsoa errektorearen aurrean, hilabeteko epean, aurkatzen den egintza jakinarazten edo argitaratzen den egunaren biharamunetik kontatzen hasita.
b) Administrazioarekiko auzi errekurtsoa Nafarroako Justizia Auzitegi Gorenaren Administrazioarekiko Auzietako Salan, bi hilabeteko epean, aurkatzen den egintza jakinarazten edo argitaratzen den egunaren biharamunetik kontatzen hasita.
Hautapen Batzordeak deialdi hau aplikatzeko erabakitzen dituen gainerako egintzen aurka, zilegi da gorako errekurtsoa jartzea errektorearen aurrean, hilabeteko epean, ekitaldia edo erabakia jakinarazten edo argitaratzen den egunaren biharamunetik kontatzen hasita.
I. ERANSKINA
Erabiliko den eta/edo egingo diren probak
1. atala.–Ikasketa espedientea. Puntuak: 12.
Izangaiaren ikasketa-espedientea espedientearen batez besteko puntuazioari dagokion proportzioan balioetsiko da, gehienez ere 4 punturekin. Ateratzen den puntuazioa 3 faktorearekin biderkatuko da izangaiaren titulazioa Nekazaritza Ingeniaritza Teknikoa, Nekazaritza Ingeniaritza edo Nekazaritzako Elikagaien eta Landa Ingurunearen Ingeniaritza Gradua bada, eta 1 faktorearekin beste titulazio bat bada.
2. atala.–Ikerketa proiektuak. Puntuak: 18.
Deialdi honetan deskribatzen diren jarduerekin lotutako ikerketa-proiektuetan parte hartzeagatik: gehienez ere 6 puntu urte bakoitzeko, izandako harreman motaren arabera. Aldi laburragoei puntuazio proportzionala emango zaie.
3. atala.–Argitalpenak, biltzarretan parte hartzea eta atzerrian izandako doktoretza ondoko egonaldiak. Puntuak: 28.
Deialdi honetan deskribatzen diren jarduerekin loturiko gaiei buruzko argitalpenak gaiarekiko loturaren eta kalitatearen arabera balioetsiko dira, eta gehienez ere 3 punturekin bakoitza (Q1 = 3 puntu, Q2 = 2 puntu eta indexatutako gainerakoak = 0,5 puntu), gehienez ere 18 puntura arte.
Deialdi honetan deskribatzen diren gaiekin lotutako liburuak edo liburuetako kapituluak argitaratzeagatik, 2 puntu balioetsiko da liburuko edo liburuko kapituluko, gehienez ere 4 puntura arte.
Proiektuaren gaiarekin zerikusia duten biltzarretako komunikazioak: 0,5 puntu nazioarteko biltzarreko komunikazio bakoitzeko, deialdi honetan deskribatzen diren jarduerekiko loturaren arabera, eta 0,2 puntu nazioko biltzarreko komunikazio bakoitzeko, gehienez ere 4 puntura arte.
Doktoretza ondoko egonaldiak nazioarteko ikerketa zentroetan, hilabete baino gehiago irauten badute: 0,2 puntu hilabeteko, eta 2 puntu gehienez.
4. atala.–Banakako elkarrizketa. Puntuak: 12.
Aurreko ataletan gutxienez 36 puntu atera dituzten izangaiei egingo zaie soilik elkarrizketa. Elkarrizketaren xedea da balioestea noraino egokitzen diren izangaiak, eta zenbat dakiten, deialdi honetan garatu beharreko jarduerekin lotutako gaietan.
Hautaketa-prozesua gainditzeko eskatzen den gutxieneko puntuazioa 42 puntu da.
Hautaproben azken emaitzan gerta daitezkeen berdinketak 3. atalean puntuazio handiena atera dutenen alde ebatziko dira. Berdinketa badago, 2. atalean puntuazio handiena lortzen dutenen alde. Berdinketak jarraitzen badu, zozketaz erabakiko da.
Iragarkiaren kodea: F1713708