Iragarkia
232. ALDIZKARIA - 2017ko abenduaren 1a
1. NAFARROAKO FORU KOMUNITATEA
1.4. DIRU-LAGUNTZAK, LAGUNTZAK ETA BEKAK
59E/2017 FORU AGINDUA, azaroaren 15koa, Gizarte Politiketako kontseilariak emana, enplegu sozial babestuari laguntzeko xedearekin toki entitateei diru-laguntzak emateko 2018. urteko deialdia onesten duena.
Gizarte Zerbitzuei buruzko abenduaren 14ko 15/2006 Foru Legearen helburuen artean honako hauek daude: pertsona guztien bizi kalitatea hobetzea eta, gizartearen, ekonomiaren, politikaren, lan munduaren, kulturaren eta hezkuntzaren arloetan, haien normalizazio, partaidetza eta integrazioa sustatzea, pertsonen eta gizataldeen bizikidetzaren alde egitea, kohesio soziala eta elkartasuna sustatzea, eta pertsonen eta taldeen bazterketa egoerei aurrea hartu eta haietaz arduratzea.
Arauen garapen horren bukaera gisa, ekainaren 17ko 69/2008 Foru Dekretuaren bidez onetsitako Gizarte Zerbitzuen Zorroan, gizarteratzearen arloan bermatuta ez dauden prestazioen atalean, enplegu sozial babesturako proiektuen garapena jaso zen.
Orobat, Europar Batasunaren 2014-2020ko kohesio politikak zeregin nagusia jokatuko du eragile gisa inbertsio, hazkuntza eta enplegurako kide diren estatuetan. Bereziki, Europako Gizarte Funtsa enplegua sortu eta hobetzera, giza kapitalaren hezkuntzara eta hobekuntzara eta beharrik handiena duen jendea gizartean eta lanean integratzera bideratzen den tresna da. Helburu horiekin bat, Europako Gizarte Funtsak Nafarroako Foru Komunitateari 2014tik 2020ra emanen dizkion 20 milioi euro ingurutik, 4 bat milioi euro enplegu sozial babestuko ekintzetarako programatzea erabaki da kohesio politikaren esparruan; horrela, proiektu horietarako sostengua indartuko da Europar Batasunetik heldu diren finantza baliabide berriak txertatuz. Beraz, enplegu sozial babestua 2014-2020 programa operatiboaren 9. helburu tematikoan (Gizarteratzearen sustapena eta pobreziaren eta edozein bereizkeriaren kontrako borroka) dago sartua.
Abenduaren 14ko 15/2006 Foru Legearen aurreikuspenek eta Europako Gizarte Funtsaren finantzaketak ezarritako helburuek bat egin behar dute Diru-laguntzei buruzko azaroaren 9ko 11/2005 Foru Legearenekin. Lege horretan ezarrita dago onura publikoko edo gizarte intereseko jarduerak sustatzeko Nafarroako Aurrekontu Orokorren kargura ematen diren diru-laguntzei dagokien araubide juridiko orokorra. Diru-laguntzak eman baino lehen, organo eskudunak haien oinarri arautzaileak ezarri eta argitaratu beharko ditu, halako jarduerak egiten dituztenek eta diru-laguntza jasotzeko moduan daudenek aukera izan dezaten diru-laguntza eskuratzeko.
Oinarri arautzaile hauen helburua da toki entitateetan enplegu sozial babestuko proiektuak garatzeko diru-laguntzak emateko prozedura ezartzea. Enplegu sozial babestuko proiektuen funtsa da bazterketa sozialeko egoeran dauden pertsonak eta lanpostu normalizatuak eskuratzeko arazoak dituztenak lanerako kontratatzea, laneratzeko aukerak hobe ditzaten, gizarteratzeko eta laneratzeko trebetasunetan eta lanbideko arteetan prestatuz eta interes orokorreko jarduera batean arituz.
Eskubide Sozialetako Departamentuari dagokio Nafarroako Foru Komunitateko Administrazioari gizarte gaien arloan esleitu zaizkion eskumenak erabiltzea, departamentu horren egitura organikoa ezarri zuen abuztuaren 28ko 128/2015 Foru Dekretuaren 1. artikuluan xedatuaren arabera.
Horrenbestez, Nafarroako Gobernuari eta Lehendakariari buruzko abenduaren 3ko 14/2004 Foru Legeak eta Eskubide Sozialetako Departamentuaren egitura organikoa ezartzen duen abuztuaren 28ko 128/2015 Foru Dekretuak emandako ahalmenak erabiliz,
AGINDU DUT:
1. Toki entitateei enplegu sozial babestuko programarako diru-laguntzak emateko oinarri arautzaileak onestea (foru agindu honen I. eta II. eranskinetan jasoak) eta baita deialdia ere.
2. 6.000.000,00 euroko gastua baimentzea, 2017ko aurrekontuan 2016ko gastuen aurrekontuko “Enplegu sozial babestua. PO EGF 2014-2020” (PEP: E-14/000106-01) izeneko 900003-91600-4609-231602 partidaren baliokidea izanen den partidaren kargura, horretarako kreditu nahikoa eta egokia badago.
3. Eskaerak aurkezteko epea 20 egun naturalekoa izanen da, deialdi hau argitaratu eta biharamunetik kontatzen hasita.
4. Foru agindu hau igortzea Gizarteratzeko eta Babes Sozialerako Zuzendaritza Nagusiko Oinarrizko Laguntzaren eta Gizarteratze-lanaren Zerbitzuari, Aurrekontuak Kudeatzeko Atalaren Kontabilitate Zentroari, eta departamentuko Idazkaritza Tekniko Nagusiko Administrazio Aferetarako Bulegoari, baita Nafarroako Gobernuaren Diru-laguntzen Datu Baseari ere, behar diren ondorioak izan ditzan.
5. Foru agindu hau eta eranskinak Nafarroako Aldizkari Ofizialean argitaratzea.
6. Deialdi honen kontra administrazioarekiko auzi-errekurtsoa jartzen ahal dute toki entitateek, Nafarroako Justizia Auzitegi Nagusiko Administrazioarekiko Auzien Salari zuzendua, jakinarazten denetik bi hilabeteko epean, deusetan galarazi gabe aurretik errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean.
Iruñean, 2017ko azaroaren 15ean.–Eskubide Sozialetako kontseilaria, Miguel Laparra Navarro.
I. ERANSKINA
Oinarri arautzaileak, toki entitateei enplegu sozial babestuko proiektuetarako diru-laguntzak emateko
Lehena.–Xedea, jarduketa eremua eta helburua.
1. Oinarri hauen xedea da toki entitateei diru-laguntzak emateko araubide bat ezartzea, Nafarroako Foru Komunitatean gauzatuko dituzten enplegu sozial babestuko programak laguntzeko asmoz.
2. Diru-laguntza horien bidez, toki entitateek sustatutako interes orokorreko eta irabazi asmorik gabeko proiektuak finantzatuko dira, zertarako eta, bazterketa sozialeko egoeran dauden pertsonak aldi baterako kontrata ditzaten; zehazki, lan munduan eta gizartean txertatzeko aukerak hobetuko dizkien gizarteratze ibilbide bat egiteko gizarte akonpainamendua behar duten pertsonak.
Bigarrena.–Entitate eskatzaileen eta kontratatutako pertsonen betebeharrak.
1. Nafarroako toki entitateek eskuratzen ahal dituzte deialdi honetan aurreikusitako diru-laguntzak.
2. Proiektuak egiteko kontratatzen diren pertsonek honako hauek bete beharko dituzte:
a) Lan egiteko adina izatea.
b) Diru-laguntza honen babesean guztira emandako hilabeteen %90, gutxienez, programan kontratatzen diren unean errenta bermatua jasotzen duen unitate bateko kideei egindako kontratuak izan behar dira.
c) Guztira emandako hilabeteen %10, gehienez, errenta bermatua jasotzen ez duten pertsonei egindako kontratuak izan daitezke, betiere bazterketa sozialeko egoeran badaude eta gizarte akonpainamendua behar badute bere gizarteratze ibilbidea egiteko. Azkeneko kasu horretan, dagokion oinarrizko gizarte zerbitzuaren txostenaren bidez frogatu beharko da bazterketa egoera. Txostena organo kudeatzaileari igorriko zaio, kontratatu aurretik baimena eman dezan. Portzentaje hori handiagoa izaten ahal da udalerri horretan ez badago errenta bermatua jasotzen duen inor.
d) Kontratazio hilabeteen %50, gutxienez, emakumeei egindako kontratuak izanen dira, salbu eta frogatzen bada errenta bermatuaren emakumezko titularrik edo onuradunik ez dagoela.
e) Kontratatuek aurreko 3 urteetan ez pilatzea lanpostu batean 18 hilabeteko epea baino luzeagoa enplegu sozial babestuko programak diruz lagundutako kontratu batekin, salbu eta ondorengo egoeraren bat gertatzen bada:
–Esku-hartze sozial planifikatuak eta egutegiaren arabera antolatuak programan denbora gehiagoz egoteko eskatzen badu, alfabetatzen, gako-gaitasunak lantzen edo 1. eta 2. mailako lanbide ziurtagiria ateratzeko prozesuan ari direlako.
–Ez dadila egon kontratatu daitekeen inor, horretarako baldintza guztiak betetzen dituena.
Bi kasuetan beharrezkoa izanen da hori frogatzen duen txostena, Oinarrizko Gizarte Zerbitzuak emana.
Hirugarrena.–Proiektuetan bete beharrekoak.
1. Kontratazioari buruz:
a) Entitate eskatzaileek ezin izanen dute enplegu sozial babestuko proiektu bat baino gehiago aurkeztu. Proiekturen bat beste toki entitateekin batera aurkeztu duten entitateek ezin izanen dute bakarka beste proiekturik aurkeztu.
b) Proiektuek gutxienez 6 hilabeteko iraupena izanen dute, eta 2018ko urtarrilaren 1etik abenduaren 31ra bitarte gauzatu beharko dira. Langileak egun desberdinetan has daitezke lanean, lanean hastea egokituz laneratzeko eta gizarteratzeko daukaten ibilbidera.
c) Lan kontratuak aldi batekoak izanen dira, eta indarra duten legeetan baimendutako aldi bateko edozein kontratazio mota erabiltzen ahalko da. Langile bakoitzarentzat izanen duen iraupena zehazteko orduan, kontuan hartuko da kontratuak bide ematea aurrerago lana lortzeko behar diren ohiturak eta kualifikazioa bereganatzeko.
d) Lanaldiaren iraupena aldakorra izan daiteke, kontratatzen den langile bakoitzaren beharretara egokitzeko; gutxienez hiru ordukoa izanen da, eta lanaldi osokoa gehienez (astean 30 ordutik aurrera). Laneko denboran sartuta dago proiektuan aurreikusitako jarduera guztiak betetzeko erabiltzen dena.
2. Egin beharreko lanei buruzkoak:
a) Bete beharreko lanek errentagarritasuna izanen dute helburu, hau da, langileek lana lortzeko dituzten aukerak hobetzea, eta, beraz, jardueren bitartez, kasuan kasuko jarduketa eremuan atzematen diren enplegu-sorguneen araberako kualifikazioa emanen zaie langileei. Egin beharreko jarduera parte hartzen duten toki entitateen eskumen eremuaren barrenean garatuko da.
b) Garrantzi berezia emanen zaio emakumeek lana aurkitzeko aukerak hobetuko dituzten ekintzen diseinuari.
3. Sostenguari buruz:
a) Oinarrizko Gizarte Zerbitzuan kasuaz arduratzen den profesionalak aukeratuko ditu proiektuen parte-hartzaileak gizarte zerbitzu horretan arreta jaso dutenen artetik, baloratu ondoren baliabidea nola egokitzen den haien premietara eta laneratzeko eta gizarteratzeko daukaten ibilbidean zein puntutan dauden.
b) Parte-hartzaileei emanen zaien sostengua agertuko da proiektuetan, baita sostengu hori nork emanen duten eta profesional horien eginkizunak ere.
c) Sostengua, funtsean, hau da: lan eta prestakuntza jardueren helburuak eta lan plangintza bat finkatzea parte-hartzaile bakoitzarentzat, bai eta haren eguneroko funtzionamenduaren jarraipen indibiduala bertaratzeari, puntualtasunari eta produktibitateari dagokienez ere.
d) Orobat, proiektuek jarduerak izan behar dituzte taldearen kohesioa bultzatzeko, ager daitezkeen gatazkak konpontzeko eta parte-hartzaileen trebetasun pertsonalak eta sozialak sustatzeko.
4. Prestakuntza jarduerei buruz:
a) Hauek izanen dira prestakuntza jardueren xedeak:
–Kontratuaren xedeko lanak egiteko ezagutzak eta trebetasunak eskuratzea.
–Prestakuntza maila edo lanbide gaitasunak lan merkatuko eskakizunetara egokitzea.
–Norberaren egonkortasuna, bizikidetza orekatua, gizarteratzea eta gizartean parte-hartzea bultzatzeko behar diren elementuak eskuratzea.
b) Prestakuntza jarduerek kontratuko denbora osoaren %15 eginen dute gehienez.
Laugarrena.–Bateragarritasuna.
1. Oinarri arautzaile hauetan aurreikusitako diru-laguntzak bateragarriak dira jarduera garatzeko lortzen ahal diren beste batzuekin, horiek beste administrazio publiko batzuetatik, beste erakunde publiko edo pribatu batzuetatik edo partikularretatik etorri, Espainiakoak edo nazioartekoak izan.
2. Hala ere, emandako zenbatekoak, bakarrik edo beste diru-laguntza, laguntza, diru-sarrera edo baliabide bereki batzuekin baturik, ez du behin ere gaindituko entitate onuradunak egin beharreko jardueraren kostua.
3. Aurrekoa gorabehera, oinarri hauen ondorioetarako, honako hau hartuko da kofinantzaketa gisa: entitate onuradunak berak oinarri arautzaile hauen 5. oinarrian adierazten denaren arabera diruz laguntzen ahal diren kontzeptuetarako bere borondatez jartzen duen kopurua. Toki entitateak eskaeran adierazten duen kofinantzaketaren ehunekoa berdina izanen da laguntza eman ondoren ere. Xedapen honek ez du eraginik Europako Gizarte Funtsaren kofinantzaketan.
Bosgarrena.–Diruz laguntzen ahal diren gastuak.
1. Enplegu sozial babestuko proiektuak egiteko diru-laguntzetan gehienez ere kontzeptu eta zenbateko hauek sartuko dira:
a) Diru-laguntzak lanpostuen arabera: Lanbidearteko Gutxieneko Soldataren %140 gehienez ekitaldi bakoitzean. Hileko lanaldi osoko soldataren ordainsaria, aparteko bi sariren hainbanaketa eta gizarte segurantza daude kontzeptu horren barruan. Zenbateko horretatik gorako kopuru guzti-guztiak entitate eskatzaileek osorik hartuko dituzte beren gain.
b) Diru-laguntzak sustapeneko jarduera osagarrietarako eta laguntzako langileak kontratatzeko: lanpostuengatik ematen den diru-laguntzaren % 30 gehienez. Laguntzako langileentzako diru-laguntza kalkulatzeko, Nafarroako Gobernuko langileen soldata-kostuen taula aplikatuko da. Hor sartzen da laguntzako langileen kilometro-ordainaren gastua.
c) Diru-laguntza prestakuntza jarduerengatik: lanpostuengatik ematen den diru-laguntzaren zenbateko osoaren %15 gehienez. Hor sartzen dira prestakuntza jarduera egiteko behar diren materialak eta hornigaiak, kilometro-ordaina, prestakuntza ikastaroak egitea eta zerbitzu profesionalen kontratazioa.
2. Ez dira inola ere diruz lagungarritzat hartuko ekipamendu eta ondasun inbentariagarriak, protokoloko eta luxuzko gastuak eta amortizazioak.
Seigarrena.–Eskaerak aurkeztea.
Entitate sustatzaileek 20 egun naturaleko epean aurkeztu beharko dute eskaera, deialdia Nafarroako Aldizkari Ofizialean argitaratu eta biharamunetik hasita.
Entitate interesdunaren legezko ordezkariak sinatu beharko ditu eskaera horiek.
Eskaerak lehentasunez Nafarroako Gobernuko Erregistro Orokor Elektronikoan aurkeztuko dira, Gizarteratzeko eta Babes Sozialerako Zuzendaritza Nagusiaren Erregistroan (González Tablas, 7, 31005 Iruña) edo Administrazio Publikoen Administrazio Prozedura Erkideari buruzko urriaren 1eko 39/2015 Legearen 16.4 artikuluan aurreikusitako tokietan. Gainera, eskabidea Nafarroako Gobernuarenak ez diren beste erregistro ofizial batzuetan aurkezten bada, aurkezpen horren berri eman beharko diote unitate kudeatzaileari, mezu elektronikoa bidaliz sincluss@navarra.es helbidera aurkezpenaren egunean berean.
Posta bulegoen bitartez aurkezten diren eskabideek posta zerbitzuak arautzen dituen abenduaren 3ko 1829/1999 Errege Dekretuan aurreikusitako zehaztapenak bete beharko dituzte. Entitate eskatzaileek sincluss@navarra.es helbidera egun berean mezu elektronikoa bidaliz iragarriko dute eskabidea bidali dela. Bi baldintza horiek bete ezean, dokumentazioa ez da onartuko, betiere eskaera aurkezteko ezarritako epetik kanpo jasotzen bada.
Zazpigarrena.–Aurkeztu beharreko dokumentazioa.
Eskaerarekin batera, dokumentazio hau aurkeztu beharko da:
a) Entitate sustatzaileak egin gogo duen proiektua, horretarako prestatutako ereduarekin bat. Eredua Gizarteratzeko eta Babes Sozialerako Zuzendaritza Nagusiko bulego nagusietan (González Tablas kalea, 7) eta erakunde beraren web-orrian (www.nafarroa.eus) eskuratzen ahalko da.
b) Enplegu sozial babestuko proiektuan aurretik parte hartu gabeko entitate sustatzaileak direnean, transferentzia bidez ordaintzeko eskaera ere erantsi beharko dute.
Zortzigarrena.–Antolatu, instruitu eta ebazteko prozedura.
1. Norgehiagokako araubidea erabiliko da diru-laguntzak emateko, Diru-laguntzei buruzko Foru Legearen 17.1. artikuluan aurreikusitako moduan.
2. Gizarteratzeko eta Babes Sozialerako Zuzendaritza Nagusiak tramitatuko ditu eskaerak, eta, instrukzio organo gisa, Oinarrizko Laguntzaren eta Gizarteratze-lanaren Zerbitzua arituko da. Horrexek egiaztatuko du diru-laguntzak hartzeko betebeharrak betetzen diren, eta eskaerak baloratuko ditu ofizioz, oinarri hauen arabera.
3. Diru-laguntzei buruzko azaroaren 9ko 11/2005 Foru Legearen 19.3 artikuluan ezarritakoarekin bat, ondotik aipatzen diren kasuetan toki entitate interesdunari eskatuko zaio hamar egun balioduneko epean hutsegiteak zuzendu edo aginduzko agiriak aurkez ditzala, eta ohartaraziko zaio hori egin ezean eskaera bertan behera uzten duela ulertuko dela, espedientea artxibatzeko ebazpena eman ondoren, Administrazio Publikoen Administrazio Prozedura Erkideari buruzko urriaren 1eko 39/2015 Legearen 21. artikuluan aurreikusita dagoenari jarraikiz. Eskakizun hori kasu hauetan eginen da:
a) Eskaeran identifikazio daturik ez agertzea, dela eskatutako diru-laguntzari dagozkionak, dela entitate eskatzaileari buruzkoak.
b) Aurrekontua aldatu beharra dakarten arazoak (akats aritmetikoak, okerreko datuak, oso errealistak ez diren kostuak edo hautagarriak ez diren beste kostu batzuk). Horren ondorioz, gauzak argitzeko eskatzen ahalko da, eta instrukzio organoak aldaketak edo murrizketak ezartzen ahalko ditu akats edo datu zehaztugabe horiei aurre egiteko.
c) Administrazio Publikoen Administrazio Prozedura Erkideari buruzko urriaren 1eko 39/2015 Legearen 66. artikuluan ezarritako kasuetako edozein.
Gainerako kasu guztietan, eta, bereziki, baloratzeko aurkezten den dokumentazioari lotutako kasu guztietan, ez da zuzentzeko aukerarik izanen.
Bederatzigarrena.–Eskaeren balorazioa eta diru-laguntzaren zenbatekoa nola finkatuko den.
1. Deialdi honen gastuei aurre egiteko zenbatekoa 6.000.000,00 eurokoa da, 2018ko aurrekontuan 2017ko gastuen aurrekontuko “Enplegu sozial babestua. PO EGF 2014-2020” (PEP: E-14/000106-01) izeneko 900003-91600-4609-231602 partidaren baliokidea izanen den partidaren kargura, horretarako kreditu nahikoa eta egokia badago.
2. Eskaerak 0tik 90 puntura arteko eskala baten arabera baloratuko dira, II. eranskinean adierazitako irizpide objektiboak eta haien haztapena kontuan hartuta.
3. Diru-laguntzarako eskaera aintzat hartua izateko, proiektuak gutxienez ere 45 puntu lortu beharko ditu.
4. Diru-laguntza eskatzen den unean 2018ko lanbidearteko gutxieneko soldata ezezaguna izanen denez, eskatutako zenbateko osoa zehazteko, instrukzio organoak ofizioz aldatuko du lanpostuen kontzeptuari lotutako zenbatekoa, urte horretan indarrean egonen den LGSra egokitzeko.
5. Aldeko balorazioa hartzen duten proiektuetarako eskatutako guztirako diru kopurua helburu honetarako bideratutako aurrekontu-kreditua baino handiagoa ez bada, eskatutako diru guztia emanen da. Bestela, diru kopurua murriztuz joanen da irizpide hauek erabiliz, harik eta aurrekontuaren kontu-saila agortu arte:
–Gutxieneko esleipena parte hartzen duten pertsonak 6 hilabetez kontratatzeko izanen da.
–Eman beharreko zenbatekoa kalkulatzeko, toki entitate bakoitzak aurkeztutako banakako moduluen batezbestekoa eginen da; horrek erreferentzia egiten dio kontratazio hilabete batek duen kostuari, eta kalkulatzen da eskatutako kopuru osoa proposatutako kontratazio hilabeteekin zatituta. Eskatzaile guztien banakako moduluen batezbestekoa ezarri ondoren, dagoen partida (6.000.000,00 euro) modulu horrekin zatituko da, kalkulatzeko zenbat diren deialdiarekin teorian guztira egin daitezkeen kontratazio hilabeteak.
–Hilabete horien %50 honela banatuko da: %50 populazioaren gaineko irizpidea aintzat hartuta, bere erreferentziazko lurralde eremuko biztanle kopuruaren arabera, eta beste gainerako %50a berdinki banatuko da, ondokoen arabera:
- Inguru horretako langabeen 2017ko urteko batezbestekoa.
- Inguru horretako txirotasun larriaren tasa. Txirotasun larriak kaltetutako pertsona kopurua. (Azken datu ofizialak).
- 2017an errenta bermatua jaso duten familia-unitateen kopurua.
–Irizpide hori aplikatu ondoren, toki entitate bakoitzari dagokion hilabete kopurua bere banakako moduluarekin biderkatuko da, entitate eskatzaile bakoitzari banatu beharreko kopurua lortzeko. Lehen banaketa horretan emanen den gutxieneko laguntza 4 hilabetekoa izanen da.
–%50aren lehen banaketa hori egin ondoren, gainerako kopurua proportzionalki banatuko da ondorengo eragiketa honen arabera (hiruko erregela zuzena):
X = | A x B |
C |
Azalpena:
X=banatu beharreko zenbatekoa.
A=emandako zenbatekoa aurreko banaketaren arabera bider proiektu bakoitzean (lortutako puntuak-45).
B=partidan dagoen soberakina aurreko banaketa aplikatu ondoren.
C=An lortutako zenbateko guztien batura.
Hamargarrena.–Alegazioen tramitea.
1. Instrukzio organoak proposamen-txostena eman aurretik, interesdunei entzuteko tramitea egin daiteke, Administrazio Publikoen Administrazio Prozedura Erkideari buruzko urriaren 1eko 39/2015 Legearen 82. artikuluari jarraikiz.
Zilegi izanen da proposatutako diru-laguntzaren kopurua aurretik jakinaraztea, kontzeptuz kontzeptu, aurreikusitako kofinantzaketari gehitu beharrekoa, horrelakorik badago, modu homogeneoan (eskaeran ageri den kofinantzaketaren ehuneko bera mantenduko da).
Proposatutako kopurua jakinarazi ondoren, entitateren batek diru-laguntzari uko egiten badio, gelditzen den diru kopurua bederatzigarren oinarrian ezarritakoaren arabera onetsitako gainerako proiektuen artean banatuko da.
Hamaikagarrena.–Prozeduraren ebazpena.
1. Prozedura instruiturik eta aurkeztutako eskaerak ebazteko proposamena egin ondoren, Gizarteratzeko eta Babes Sozialerako zuzendari nagusiari dagokio ebazpena ematea, Diru-laguntzei buruzko azaroaren 9ko 11/2005 Foru Legearen bidez eta Eskubide Sozialetako Departamentuaren egitura organikoa ezartzen duen abuztuaren 28ko 128/2015 Foru Dekretuaren bidez esleitutako ahalmenen ondorioz.
2. Ebazpen horretan honako hauek agertuko dira: diru-laguntzak zer eskatzaileri esleitzen zaizkion, laguntzen helburua, onartutako aurrekontua, emandako zenbatekoa, eskaeraren arabera gauzatu beharreko konfinantzaketaren ehunekoa, eta laguntzak ordaintzeko eta justifikatzeko modua eta epea, bai eta gainerako eskaerak ezesteko arrazoiak ere bai, Diru-laguntzei buruzko arazoaren 9ko 11/2005 Foru Legearen 21. artikuluan xedatu bezala.
3. Eskaerak aurkezteko epea amaitu eta lau hilabeteko epean ebazpen espresik jakinarazten ez bada, ukatu direla ulertuko da, deusetan galarazi gabe Administrazioak ebazteko duen beharkizuna.
Hamabigarrena.–Jakinarazpena eta argitalpena.
Deialdiaren ebazpena administrazio prozedura arautzen duen legedian ezarri bezala jakinaraziko zaie entitate interesdunei, eta Nafarroako Atarian argitaratuko da.
Horrez gain, Enpleguko eta Gizarte Segurantzako Ministerioak Europako Gizarte Funtsa Administratzeko Unitatearen web orrian (http://www.empleo.gob.es/uafse/eu/index.html) aldian behin argitaratuko du laguntza hauen entitate onuradunen zerrenda, EGFk kofinantzatzen dituenez, Nafarroari esleitutako egitura funtsei gardentasuna eta publizitatea ematearren.
Diru-laguntzak jasotzearekin batera, entitate onuradunek beren izena eta jasotzen dituzten zenbatekoak argitaratu beharreko zerrendetan agertzea onartzen dute.
Hamahirugarrena.–Diru-laguntzaren ordainketa.
1. Oro har, Diru-laguntzei buruzko Foru Legearen 32. artikuluan ezarritakoari jarraikiz ordainduko dira diru-laguntzak, jarduera egin dela justifikatu ondoren 14. oinarrian adierazi bezala. Ordainketa partzialak onartzen badira, ordainketa proportzionalak izanen dira, gastuak justifikatu ahala.
2. Organo deitzaileak ordainketa aurreratua egin dezake, azaroaren 9ko 11/2005 Foru Legearen 33. artikuluan ezarri bezala, betiere justifikatzen bada funtsak aldez aurretik behar direla diru-laguntzaren helburuak betetzeko. Horretarako, funts horniduraren beharra frogatzen duen dokumentazioa aurkeztu beharko du entitateak, honako hauek erantsita: likideziaren behar iragankor hori frogatzen duen txostena, ordezkariaren ziurtagiri bat, entitatearen izenean dauden banku kontuak agertzen dituena, bankuko kontuetako uneko saldoak agertzen dituen bankuko ziurtagiri bat –banku elektroniko bidez lortutakoak ere onartuko dira–, eta diruzaintzako fluxuen hileroko aurreikuspen bat, kobrantzak, ordainketak, maileguak eta abar zehazten dituena, edo diru-laguntzaren xedeak betetzeko funtsak behar direla frogatzen duen beste edozein ziurtagiri.
3. Ordainketa aurreratua egitea bidezkoa den kasuetan, honela jokatuko da:
a) Ematen den diru-laguntza 150.000 eurokoa edo txikiagoa baldin bada, ordainketa bakarrean ordainduko da dena, aurrerakin gisa, diru-laguntza emateko ebazpenarekin batera.
b) Esleitzen den diru-laguntza 60.000,00 eurotik gorakoa bada, honela ordainduko da: esleitutako zenbateko osoaren %50 ebazpena sinatzearekin batera, eta beste %50a aurrerakin horren eta, baldin badago, kofinantzaketaren frogagiriekin batera.
4. Nolanahi ere, ordaintzeko azken txostena 2018ko azaroaren 15a baino lehen aurkeztu beharko da, eta onartutako diru-laguntzaren %100 likidatzeko aski izanen da azken justifikazio horretan proiektuan parte hartzen duten langile guztien lan kontratuak aurkeztea. Justifikazio gisa lan kontratuak aurkeztea bakar-bakarrik onartuko da azaroan aurkezten diren justifikazioetan.
5. Hala ordainketa aurreratuak nola aurreko puntuaren arabera egiten direnak hurrengo oinarrian ezarritakoari jarraikiz justifikatu beharko dira.
Hamalaugarrena.–Diru-laguntzaren justifikazioa.
1. Entitate onuradunek diruz lagundutako programaren gauzatzeari buruzko txosten teknikoa eta ekonomikoa aurkeztu beharko dute, inprimaki ofizialean. Eredua Oinarrizko Laguntzaren eta Gizarteratze-lanaren Zerbitzuan eskura daiteke, edo Nafarroako Atarian (www.navarra.es/AyudasyBecas).
2. Txosten partzialak eta azkenekoak justifikazio kontuaren itxura izanen du, eta elementu hauetaz osatuko da:
a) Tarteko ordainketak egiteko txosten partziala:
a.1) Diruz lagundu zaion programa nola garatzen ari den azaltzen duen txosten labur bat, horretarako ezarritako ereduari jarraikiz egina. Tarteko txosten horiek aurkezturik ere, programaren azken txostena aurkeztu beharko da hura bukatutakoan.
Oinarrizko Laguntzaren eta Gizarteratze-lanaren Zerbitzuak proiektuaren bilakaerari buruzko txosten bat aurkezteko eskatzen ahalko du, ekitaldiko edozein unetan, diruz lagundutako jarduerak zenbateraino gauzatu diren azalduko duena.
a.2) Idazkariak edo entitatearen fede publikoa duen pertsonak luzatutako ziurtagiria, emandako diru-laguntzaren gastu osoari eta entitatearen ekarpen ekonomikoari buruzkoa, honako hauekin batera:
–Proiektuan parte hartzen duten eta kontratatu diren pertsonen zerrenda, eredu normalizatuaren arabera prestatua.
–Joan-etorrietarako kontzeptu gisa diruz lagundutako proiektuari aplikatutako gastuen zerrenda, hala proiektuko parte-hartzaileenak, nola laguntzarako langileenak eta obra-lekuko begiraleenak.
–Prestakuntza atalari dagozkion gastuen zerrenda, eta, orobat, entitateak proiektuari edo proiektuaren kofinantzaketari egotzi nahi dizkion beste gastu batzuena.
–Parte hartzen duten pertsonen lan kontratuak, hamahirugarren oinarriaren 4. puntuan ezarritako baldintza betetzen dela justifikatzeko, betiere azken ordainketa egiteko justifikazio bide hori aukeratzen bada.
b) Azken txostena, eredu ofizialaren araberakoa, proiektua bukatu ondoan:
b.1) Proiektuaren exekuzioari buruzko txosten teknikoa, eredu ofizialaren arabera prestatua, gutxienez honako atal hauek jasoko dituena, aurkeztutako proiektuan adierazitakoarekin bat:
–Lortutako helburuen zehaztapena.
–Lortutako emaitzak.
–Egindako jarduerak.
–Egindako jarduerak egiaztatzeko iturriak.
b.2) Proiektuaren diru-sarreren eta gastuen balantzea, kontzeptuen arabera sailkaturik.
b.3) Diruz lagundutako proiektuaren justifikazio ekonomikoa, oinarri honen aurreko paragrafoetan hurrengo ordainketak egiteko ezarritako baldintza beretan.
b.4) Beste edozein dokumentazio grafiko nahiz idatzizko, borondatez eman nahi dena, diruz lagundutako proiektuaren gauzatzearen edo martxa onaren berri emateko.
3. Egozten diren gastu guztietarako, behar diren gastu eta ordainketa frogagiriak aurkeztu beharko dira kontrol organoak egiazta ditzan. Organo horrek lagin bat berrikustea erabaki dezake. Frogagiri horiek fakturak izanen dira, edo, horrelakorik ezean, banku-laburpenak eta ordainagiriak, datu hauek jasoko dituztenak: jaulkitzailea, hartzailea, data, kontzeptua, prezioa eta ordaintzeko modua. Langileen gastuak 2.a.2) puntuan aipatutako ziurtagiriekin bakarrik justifikatuko dira.
4. Entitatea behartua dago aurreko puntuan zehaztutako gastu guztien frogagiriak bost urtez gordetzera (gastuen frogagiriak, ordainagiriak, fakturak, banku-laburpenak, etab.), baita sinatutako kontratuak ere, bai proiektuan parte hartzen duten langileenak, bai laguntzarako langileenak eta obra-lekuko begiraleenak, dokumentazio hori berrikusi beharra gertatzen den kasuetarako.
5. Jarduerak diru-laguntzaz gain funts berekiekin edo beste diru-laguntza edo baliabide batzuekin ere finantzatu badira, funts horien zenbatekoa, jatorria eta jardueretan izan duten aplikazioa frogatu beharko dira, eta ziurtatu proiekturako hartutako finantzazioak ez duela proiektuaren guztirako gastuaren %100 gainditzen. Toki entitateko idazkari lanak egiten dituenak ziurtatu beharko du hori.
Diru-laguntzaren azken ordainketarako eskubidea ematen duen azken txosten partziala aurkezteko azken eguna 2018ko azaroaren 15a izanen da.
6. Azken txostena, beranduenez, 2019ko otsailaren 10ean aurkeztu beharko da, egun hori barne.
7. Justifikatzen den gastua ez bada iristen aurreratutako edo kontura ordaindutako guztizko zenbatekora, frogagiri bat aurkeztu beharko da erakusteko diru-sarrera bat egin dela Eskubide Sozialetako Departamentuaren alde, aurreratutako edo kontura ordaindutako zenbatekoaren eta justifikatutako zenbatekoaren arteko aldea adinakoa, deusetan galarazi gabe diru-laguntzaren espedientea ixten duen ebazpenean ezartzen dena. Diru-sarrera horren bidez entitateak adieraziko du itzuli duen zenbatekoari uko egiten diola.
Entitate onuradunak organo kudeatzaileari eskatuko dion ordainketa-gutunaren bidez eginen da diru-sarrera.
Hamabosgarrena.–Hornitzaileen kontratazioa eta azpikontratazioa.
1. Oinarri arautzaile hauen ondorioetarako, proiektuaren prestakuntza jardueretan baino ez da onartuko azpikontratazioa, betiere lanpostuengatik ematen den diru-laguntzaren %15 gainditu gabe. Azpikontratazio gisa hartuko da hirugarrenekin hitzartzea diru-laguntzaren xedeko jardueraren exekuzio partziala. Entitate onuradunak berak egiten badu diru-laguntza jasotzen duen jarduera, horretarako behar diren gastuen kontratazioa kontzeptu honetatik kanpo geldituko da.
Kontratu Publikoei buruzko ekainaren 9ko 6/2006 Foru Legearen 9. artikuluan ezarritako portzentajeekin eta zehaztapenekin bat, azpikontratazioa egitean, gehien batean desgaitasuna duten langileek edo bazterketa egoeran daudenek osatutako enpresei edo entitateei emanen diete lehentasuna entitate onuradunek, betiere entitate horiek egin ditzaketen prestazio edo jarduerak badira, nolakoak diren ikusita.
Entitate onuradunak ez badu lehentasun hori aplikatzen, justifikatu beharko du diru-laguntza kudeatzen duen zerbitzuan.
2. Hornitzaileak kontratatzea. Toki entitate onuradunek Kontratu Publikoei buruzko ekainaren 9ko 6/2006 Foru Legeak arlo horretan ezartzen dizkieten betebeharrak betetzen dituztela frogatu beharko dute.
Hamaseigarrena.–Entitate onuradunen betebeharrak.
Toki entitateak honako hauetara daude behartuta:
a) Diru-laguntza ematea eragin duten proiektua eta jarduerak eskaeraren eta ebazpenean onetsitako aurrekontuaren arabera gauzatzea, baita oinarri arautzaile hauen baldintzen eta betebehar formal eta materialen arabera ere, eta dirua zer helburutarako ematen den, hartarako baino ez erabiltzea. Gauzatze horrek, betiere, proiektua osatzen duten jarduerak kudeatu eta gidatzea hartzen du bere baitan, baita beharrezkoak diren baliabideak jartzea ere.
b) Oinarri arautzaileotan aipatzen diren frogagiriak, tartekoak eta azkenekoak, aurkeztea.
c) Proiektuen zabalkundea eta publizitatea egitean, diruz lagundutako entitateek diru-laguntza nork eman dien adierazi beharko dute, Familia, Gazteria, Kirol eta Gizarte Gaietako kontseilariak uztailaren 2an emandako 212/2010 Foru Aginduan ezarritakoarekin bat, bai eta Europako Gizarte Funtsaren kofinantzaketa ere. Gainera, foru agindu horren 2. artikuluaren baldintza orokorrak eta 4.1.b) artikuluaren berariazko baldintzak bete beharko dituzte.
d) Laguntza ematen duen organoak eta indarra duen antolamendu juridikoaren arabera eskudun diren bestelako organoek egin beharreko egiaztapen lanak onartzea.
e) Entitatearen izaera dela-eta kontabilitatean eskatzen ahal zaizkion betebeharrak betetzea.
f) Oinarrizko Laguntzaren eta Gizarteratze-lanaren Zerbitzuari jakinaraztea proiektuari esleitutako laguntzako langileen eta lantegiko monitoreen artean egiten diren aldaketa guztiak, eta, bereziki, laneko bajak. Baja kasuetan, langileak hilabeteko epean ordeztu beharko dira, diru-laguntza ematean aintzat hartutako langile horien gastuak osatzeko behar den lanaldi portzentajerako kontratatuz.
g) Proiektuak, kontratatutako langileei dagokienez, berarekin dakartzan lan arloko betebeharrak betetzea.
h) Deialdi honetan eta aplikatzekoa den legedian ezarritako kasuetan, harturiko funtsak itzultzea.
i) Diruz lagundutako jarduera finantzatzeko eskatutako eta/edo lortutako bestelako laguntza, diru-sarrera edo baliabideen berri ematea diru-laguntza eman duen organoari. Jakin bezain laster emanen da horren berri, eta, betiere, jasotako funtsak zertan erabili diren frogatu baino lehen.
j) Diru-laguntzei buruzko Foru Legeak onuradunei ezartzen dizkien gainerako eginbeharrak betetzea.
k) Parte-hartzaileen kontratuak igortzea Gizarteratze Atalera, haiek kontratatu eta 15 eguneko epean.
l) Diru-laguntza eman eta haren zenbatekoa finkatzeko aintzat hartutako edozein baldintza aldatzeko, entitate onuradunek Gizarteratzeko eta Babes Sozialerako Zuzendaritza Nagusiaren baimena eskatu eta eduki beharko dute.
Salbuespen gisa, proiektua gauzatzea eragozten edo zailtzen duten gorabeherak agertuz gero, diru-laguntzak jasotzen dituzten entitateek zilegi izanen dute diru-laguntza jasotzen duen proiektuaren edukia aldatzeko eskatzea, bai eta hura egiteko modua eta epeak ere.
Programa aldatzeko eskaeretan aldaketa edo zailtasun horren inguruko behar adina arrazoi eman beharko dira eta inguruabar horiek gertatu eta berehala adierazi beharko dira, betiere, diruz lagundutako proiektua egiteko epea bukatu baino lehen.
Diru-laguntza emateko kontuan hartutako baldintzetan edozer aldatuz gero, administrazioak onartu ala ez, diru-laguntza emateko ebazpena aldatzen ahalko da, edo, hala badagokio, kasuan kasuko zenbatekoa itzuli beharko da.
Hamazazpigarrena.–Gardentasun betebeharra.
Nafarroako Aurrekontu Orokorren kargurako diru-laguntzen onuradunen gardentasunerako betebeharrak arautzen dituen 59/2013 Foru Dekretuaren 2. artikuluan jasotako entitateak behartuta daude betetzera Gardentasunari eta Gobernu Irekiari buruzko ekainaren 21eko 11/2012 Foru Legearen bederatzigarren xedapen gehigarrian ezarritako gardentasun baldintzak, Nafarroako Aurrekontu Orokorren kargurako diru-laguntzak jasotzen baditu eta bi inguruabar hauek gertatzen badira:
a) Emandako diru-laguntzaren zenbatekoak 20.000 euro gainditzea urtean.
b) Emandako zenbatekoak entitate onuradunaren negozio-zifraren edo urteko aurrekontuaren %20 gainditzea.
Aurreko atalean ezarritako mugak gainditzen ote diren jakiteko, Nafarroako Foru Komunitateko Administrazioak edo haren erakunde publikoek urte naturalean emandako diru-laguntza guztien kopuruak batuko dira. Urte batean baino gehiagotan ordaintzen diren diru-laguntzen kasuan, aurrekontuko ekitaldi bakoitzean emandako kopurua hartuko da kontuan ondorio horietarako, ez guztizko batura. Erreferentziako urteko negozio-zifra edo aurrekontua honako hauetako txikiena izanen da:
a) Aurreko urteko negozio-zifra edo aurrekontu gauzatua.
b) Hala bada, diru-laguntza ematen den ekitaldian entitatearen organo eskudunak onartutako negozio-zifra edo aurrekontua.
Aipatu diren inguruabarrak gertatzeagatik gardentasun betebeharra duten entitate onuradunek jarraian adierazten den informazioa eman beharko dute, diru-laguntzak jasotzen badituzte:
a) Entitatearen gobernu, administrazio eta zuzendaritza organoen osaera.
b) Organo horiek osatzen dituzten kargudunen zerrenda.
c) Entitateak aurreko urtean kargudun bakoitzari ordaindutako ordainsari gordinak eta gainerako diru konpentsazioak, kontzeptuz kontzeptu. Sortu berriak diren entitateen kasuan, informazioa haien aurrekontuetan edo plan ekonomiko-finantzarioan jasotakoa izanen da.
d) Kargudun bakoitzaren lanaldi mota gobernuko, administrazioko eta zuzendaritzako eginkizunetan.
e) Entitate onuradunaren urteko azken kontuen kopia bat.
Informazio hori entitate onuradunaren legezko ordezkariak sinatuta aurkeztuko da, Nafarroako Gobernuaren Erregistro Orokor Elektronikoaren bide telematikoak erabiliz, eta diru-laguntza kudeatzen duen administrazio unitateari bidaliko zaio. Informazioa bidaltzeko epea hilabetekoa izanen da, diru-laguntza ematen duen ebazpena jakinarazten edo, kasua bada, argitaratzen den egunetik hasita.
Informazio hori urtebetez egonen da aztergai Nafarroako Gobernu Irekiaren Atarian argitaratzen denetik hasita, eta gehienez 15 hilabetez utziko da bertan, informazioa kudeatzen duen organoan sartzen den egunetik hasita. Epe hori iraganik, informazioa argitaratzeko ardura duen unitateak ofizioz kenduko du. Hala egin ezean, entitate onuradunak kentzeko eskatzen ahalko du, eta gehienez ere hilabeteko epean kendu beharko da, eskaera egiten denetik hasita.
Entitateak gardentasun betebeharra bete behar ez badu, aurreikusitako inguruabarrak gertatzen ez direlako, horren gaineko aitorpena aurkeztu beharko du.
Entitateak ekitaldi berean diru-laguntza bat baino gehiago jasotzen badu, ez du informazioa errepikatu beharko diru-laguntza bakoitzerako, salbu eta hasieran eman zituen datuak aldatzen badira.
Onuradunak informazioa emateko betebeharrak ez betetzeak ekar ditzakeen zehapenak ukatu gabe, betetzen ez badira onartutako diru-laguntza ordaindu gabe utziko da, eta zenbatekorik kobratu bada, itzuli beharko da, eta aurrerakinak ere bai, Diru-laguntzei buruzko Foru Legearen 35.1.c) artikuluan ezarritakoari jarraikiz.
Hemezortzigarrena.–Betebeharrak ez betetzea.
1. Hartutako zenbatekoa itzuli beharko da, osorik edo partez, proiektua gauzatzen ez bada, diru-laguntza emateko ezarritako baldintzak betetzen ez badira, Diru-laguntzei buruzko Foru Legearen 35. artikuluan aipatzen diren zergatikoak gertatzen badira edo oinarri hauetan berariaz aipatzen diren betebeharrak betetzen ez badira. Legez ezarritako kasuetan, gainera, bidezkoa izanen da diru-laguntza ordaindu zenetik itzuli beharraren gaineko ebazpena ematen den arte sortutako berandutze-interesak ordaintzeko eskatzea.
Dirua itzultzea eskatzeko prozedurak aipatutako artikuluan xedatutakoari jarraituko dio, eta hasten denetik hamabi hilabeteko epean ebatzi beharko da.
2. Entitate onuradunak ia betebehar guztiak betetzen dituenean eta bere konpromisoak betetzeko jarrera garbia erakusten duenean, proportzionaltasun irizpideari jarraituz zehaztuko da itzuli beharreko zenbatekoa, diru-laguntza emateko ezarritako baldintzetatik zenbat eta noraino bete diren ikusita.
3. Ez-betetzeetan maila desberdinak egonen dira, honako hauen arabera:
–Esku-hartzea noraino bete den, arlo teknikoari eta aurrekontuari dagokienez.
–Zenbat aldaketa egin diren, eta nolakoak, aurretik baimen administratiboa izan gabe.
–Txostenak epetik kanpo aurkezten direnean, zenbat egun iragan diren.
4. Aurreko ataletan xedatutakoa gorabehera, arau-hauste eta zehapenei dagokienez, azaroaren 9ko 11/2005 Foru Legearen 42. artikuluan eta hurrengoetan xedatutakoari jarraikiko zaio, edo, bestela, Nafarroako Foru Komunitateko Administrazioari buruzko abenduaren 3ko 15/2004 Foru Legearen V. tituluan xedatutakoari. Itzulketa eskatzeko prozedura 12 hilabeteko epean ebatziko da, hasten denetik kontatuta.
Hemeretzigarrena.–Bidezko diren administrazio errekurtsoak.
Oinarrien kontra eta berariazko eta ustezko ebazpenaren kontra, administrazioarekiko auzi-errekurtsoa jartzen ahal dute toki entitateek, Nafarroako Justizia Auzitegi Nagusiko Administrazioarekiko Auzien Salari zuzendua, jakinarazten denetik bi hilabeteko epean, deusetan galarazi gabe aurretik errekerimendua egin ahal izatea, Administrazioarekiko Auziak arautzen duen uztailaren 13ko 29/1998 Legearen 44. artikuluan ezarritako moduan eta epean.
Hogeigarrena.–Aplikatu beharreko arauak.
Oinarri arautzaile hauetan espresuki aurrekusirik dagoenaz gain, Diru-laguntzei buruzko azaroaren 9ko 11/2005 Foru Legearen eta gizartetik bazterturik dauden pertsonei zuzendutako gizarteratze eta laneratze programak garatzeko laguntza ekonomikoak arautu zituen azaroaren 9ko 11/2005 Foru Legearen xedapenak dira aplikatzekoak, haiei aurka egiten ez dieten heinean.
Hogeitabatgarrena.–Europar Batasuneko Egitura Funtsen kofinantzaketa.
Diru-laguntza hauek Europako Gizarte Funtsaren %50eko finantzaketa izaten ahal dute, Nafarroako 2014-2020 EGF programa operatiboaren bitartez.
Horren ondorioz, laguntza horien onuradun diren enpresak aldi berean Europar Batasunaren aurrekontuetatik heldu den finantzazioaren onuradun ere izanen dira, eta, horregatik, honako hau aplikatuko zaie:
a) Diru-laguntza hartzeak berarekin ekarriko du honako hauek egiten dituzten kontrolen menpe jartzea onartzen dutela, baita kontrol horietan laguntzea ere, kasua bada: Nafarroako Gobernua, Enplegu eta Gizarte Segurantzako Ministerioa, Europako Batzordea edo Nafarroako, Espainiako edo Europar Batasuneko kontroleko eta fiskalizazioko edozein organo.
b) Eragiketen frogagiriak 3 urtez gorde beharko dituzte Enplegu eta Gizarte Segurantzako Ministerioak Europako Batzordeari kontuak, eragiketaren gastuak barne, aurkeztu eta hurrengo abenduaren 31tik aurrera.
II. ERANSKINA
Eskaerak baloratzeko irizpide objektiboak
1. Erakundeen ahalmena (50 puntu).
a) Udalen inplikazioa eta eskualdean duen zabalkundea (3 puntu gehienez).
b) Finantzaketan laguntzeko konpromisoa (20 puntu gehienez).
c) programaren ondoren kontratatzeko edo laneratzea errazteko konpromisoa (3 puntu gehienez).
d) Entitatearen gaitasun operatiboa: aurreko urteko aurrekontuen exekuzioa eta aurkeztutako proiektuaren betetze maila. (22 puntu gehienez).
Baloratu beharreko alderdiak:
–Exekuzio ekonomikoa. Aurreko urteko aurrekontuen exekuzioa (2 puntu gehienez).
–Aurreikusitako prestakuntza. Mota eta zenbat denbora eskaini zaion (10 puntu gehienez).
–Emakumeak kontratatzea. Aurreikusitako eta egindako kontratuen kopurua (2,5 puntu gehienez).
–Osasun Mentaletik bideratutako pertsonak, hango jarraipenarekin, aurreikusiak eta kontratatuak (2,5 puntu gehienez).
–Bi urte baino gehiagoz gizarteratze-errenta edo errenta bermatua jasotzen ari diren pertsonak, aurreikusiak eta kontratatuak (5 puntu gehienez).
2. Proiektuaren kalitate teknikoa (15 puntu).
a) Proiektuaren barne-koherentzia: helburuen azterketa, jarduerak, espero diren emaitzak, adierazleak, egiatatzeko bitartekoak, ebaluazioa. (5 puntu gehienez).
b) Prestakuntzarako proposamenaren analisia. Aurreikusitako prestakuntza mota eta eskainiko zaizkion orduen portzentajea (5 puntu gehienez).
c) Gizarteratzeko eta Laneratzeko Taldeekin eta eskualdean dauden garapenerako agentziekin eta baliabideekin nola koordinatzen den. (2 puntu gehienez).
d) Segimendurako tresnak eta egiaztatze-bideak (3 puntu gehienez).
3. Jarduketarako lehentasunak eta kontratatzen diren pertsonen zaurgarritasunaren profilak (25 puntu).
a) Bi urtez edo gehiagoz etenik gabe gizarteratze-errenta edo errenta bermatua jasotzen ari diren familia-unitateak (5 puntu gehienez).
b) Osasun Mentaletik bideratutako edo tratamenduan dauden pertsonak eta koordinazioa Osasun Mentalarekin (5 puntu gehienez).
c) Emakumezkoen kontratazio portzentajea >50% (5 puntu gehienez).
d) Jarduketa bereziko eskualdea izatea maiatzaren 17ko 33/2010 Foru Dekretuaren arabera, horren bidez Nafarroako gizarte zerbitzuen zonifikazioa ezarri baitzen (10 puntu).
Iragarkiaren kodea: F1713429
Sarbidea
Nafarroako Aldizkari Ofiziala
Paseo Pablo Sarasate, 38, 2.º izda.
31001 - Iruña
848 42 12 50
