2. NAFARROAKO TOKI ADMINISTRAZIOA
2.2. XEDAPEN ETA IRAGARKIAK, HERRIEN ARABERA ANTOLATUAK
LEITZA
Deialdia, taxi lizentzia esleitzeko
Leitzako Udalak 2017ko urriaren 31an egindako Batzarrean erabaki du Leitzako udal mugapean hiriko taxi baterako lizentzia bat lehiaketa bidez esleitzeko deialdia onestea.
Eskaintzak aurkezteko epea 20 egun naturalekoa izanen da, iragarkia Nafarroako Aldizkari Ofizialean argitaratu eta biharamunetik hasita.
Leitzan, 2017ko azaroaren 9an.–Alkatea, Mikel Zabaleta Aramendia.
TAXI ZERBITZUA ESKAINTZEKO BAIMENA ESLEITZEKO OINARRI ARAUTZAILEAK
1.–Xedea.
Oinarri arautzaile hauen xedea Leitzako udal mugapean hiriko taxi zerbitzua eskaintzeko lizentzia bat lehiaketa bidez esleitzea da, Taxiaren uztailaren 6ko 9/2005 Foru Legean jasotzen denaren arabera.
Zerbitzua osotasunean Leitzako udalerrian eskainiko da. Hiriarteko zerbitzua eskaini ahal izateko, lizentziaren titularrak dagokion baimena eskatu beharko du Nafarroako Gobernuan.
2.–Araubide juridikoa.
Ondoko araudiak jasotzen du deialdi honen xedeko lizentziari ezarriko zaion araubide juridikoa:
–Nafarroako Toki Administrazioari buruzko 6/1990 Foru Legea.
–Udalbatzetako Zerbitzuen Erregelamendua onesten duen 1955eko ekainaren 17ko Dekretua.
–Nafarroako Toki Entitateen Ondasunen Erregelamendua onesten duen 280/1990 Foru Dekretua.
–Taxiari buruzko 9/2005 Foru Legea eta hura aldatzen duen uztailaren 2ko 22/2013 Foru Legea.
–Leitzako Udalean taxi zerbitzua arautzen duen ordenantza, 2004ko apirilaren 19an 47. Nafarroako Aldizkari Ofizialean argitaratua.
Eta aipatutakoak garatu edo osatzen dituzten gainerako xedapenak.
3.–Taxi lizentziaren titular izateko lehiaketan parte hartzeko bete behar diren baldintzak.
1. Hauek dira lehiaketan parte hartzeko bete behar diren baldintzak:
a) Pertsona fisikoa izatea eta azken bi urteetan Leitzan erroldatua egotea, Leitzako udalerrian taxi zerbitzua arautzen duen Ordenantzak 11. artikuluan jasotzen duenaren arabera.
b) Espainiarra izatea edo Europar Batasuneko estatu batekoa nahiz atzerriko beste herrialde batekoa, baldin Espainiak haiekin sinatuta dituen nazioarteko akordio, tratatu edo itunetan xedatutakoaren arabera aipatu baldintza eskatzen ez bada; bestela, norbera garraioan aritzea babesteko adinako lan baimenak izan beharko dira, atzerritarrek Espainian dituzten eskubide eta askatasunen gaineko legerian xedatutakoaren arabera.
c) Beste taxi lizentziarik ez edukitzea.
d) Euskaraz jakitea. Hizkuntza eskola ofizial batek aitortutako tituluaren bidez egiaztatu beharko da edo baliokidea den beste titulazio bat aurkeztuz. Hori frogatzen duen titulurik izan ezean, euskara mailaren proba bat eginen da ezagutza hori frogatzeko.
e) Indarrean den legeriak ezarritako zerga, lan eta gizarte arloetako betebeharrak betetzea.
f) 600 euroko bermea jartzea.
4.–Eskaerak aurkezteko tokia eta epea.
1. Eskaerak Leitzako Udaleko Erregistro Orokorrean (Elbarren Kalea 1) aurkeztuko dira, arau hauek Nafarroako Aldizkari Ofizialean argitaratu eta biharamunetik hasita 20 egun naturaleko epean.
Proposamenak posta bidez ere bidali daitezke; horretarako, interesdunak posta bulegoan igorpena noiz egin duen egiaztatu beharko du gordekinaren bidez. Orobat eta epearen barrenean, proposamena bidali duela egiaztatu beharko dio kontratazio organoari, fax bidez (948 510 816). Eskakizun hauek bete ezean, ez da onartuko ezarritako epetik kanpo jasotzen den proposamenik.
Dena dela, proposamenak aurkezteko epea bukatu eta 4 egun natural igarota, ez da postaz igorritako proposamen bakar bat ere onartuko.
5.–Agiriak.
Eskaerak hiru gutun-azal itxitan aurkeztuko dira, idazkun honekin: “Taxi zerbitzua emateko lizentzia bat esleitzeko deialdia” eta izen-deiturak, NAN zenbakia eta eskaera egiten duen pertsonaren sinadura, baita gutun-azal bakoitzaren izenburua ere; honako hauek, hurrenez hurren:
–1. gutun-azala: administrazio agiriak.
–2. gutun-azala: dokumentazio teknikoa.
–3. gutun-azala: proposamen ekonomikoa.
1. “Administrazio agiriak” izeneko 1. gutun-azalean ondorengoa aurkeztu beharko da:
1.1. Eskaera egiten duenaren nortasun agiri nazionalaren fotokopia, indarrean dagoena.
1.2. Bermea: lizitatzaileek 600 euroko bermea aurkeztu beharko dute Leitzako Udalaren alde.
Berme gisa, Kontratu Publikoei buruzko ekainaren 9ko 6/2006 Foru Legearen 53. artikuluan ezarritakoarekin bat, banku-abala aurkeztu ahalko da, eskudirutan zuzenean Udalaren Kutxara ekarriz, Leitzako udalaren kontu zenbakira egindako banku transferentziaz, edo kauzio-aseguruaren kontratuaren bidez.
Berme horrek behin-behineko esleipena onetsi arte eskaintzari eusten zaiola bermatuko du.
Organo eskudunak lizentzia behin-behinekoz esleitu eta berehala itzuliko die bermea interesdunei; esleitu arte eskaintzari eusten ez dioten interesdunen bermea bahitu eginen da eta behin-behineko esleipen-hartzaileei atxiki.
Behin-behineko esleipen-hartzaileei atxikitako bermea bahitu eginen da baldin eta, lizentziaren behin-behineko esleipena jakinarazi eta 3 hilabeteko epean, eskatutako baldintzak betetzen direla frogatzen duen dokumentazioa aurkezten ez bada; bereziki, ibilgailuaren dokumentazioa, aseguruen kontratazioa, soldatapeko gidariarena (halakorik bada) eta lizentzia osorik ordaindu izanarena.
Lizentzia behin betiko esleitu ondoren itzuliko zaie atxikitako bermea esleipen-hartzaileei.
1.3. Ibilgailuak gidatzeko indarrean dagoen BPT baimenaren fotokopia.
1.4. Indarra dagoen araudian ezarritako zerga, lan eta gizarte arloetako betebeharrak betetzen dituela frogatzea.
–Nafarroako Gobernuko Ekonomia eta Ogasun Departamentuaren ziurtagiria eta, halaber, lizitatzaileak zerga betebeharrak dituen administrazio publikoetako organo eskudunen ziurtagiria, ordainketak eguneratuta dituela diotenak. Ziurtagiri horiek proposamenak aurkezteko epea bukatzen den eguna baino sei hilabete lehenagokoak edo berriagoak izanen dira.
–Gizarte Segurantzaren ziurtagiria, proposamenak aurkezteko epea bukatu baino, gehienez ere, sei hilabete lehenago emana. Ziurtagiri honek frogatuko du, langileak Gizarte Segurantzaren sisteman inskribatu, afiliatu edo haiei alta eman, behar diren kotizazio dokumentuak aurkeztu eta indarra duten xedapenetan agindutakoa Gizarte Segurantzari ordaindu izana (non lizitatzaileak ez duen nahitaez aplikazio eremuaren barrenean egon behar).
–Lizitatzailearen deklarazioa edo, bestela, ahalordedunarena edo ordezkariarena, non bere erantzukizunpean baieztatuko baita betebehar guztiak eguneratuta daudela Segurtasun arloan, laneko osasunean eta laneko arriskuen prebentzioan, indarra duten xedapenetan agindu bezala.
2. “Dokumentazio teknikoa” izeneko 2. gutun-azalean, 1. eranskineko ereduarekin bat, eskatzaileak aurkezten duen dokumentazioa sartuko da, proposamen ekonomikoa izan ezik, oinarri hauen 6. klausulan ezarritako irizpideen arabera baloratu eta puntua dadin.
3. “Proposamen ekonomikoa” izeneko 3. gutun-azalean, 2. eranskineko ereduarekin bat, eskaintza ekonomikoa aurkeztu beharko da.
6.–Esleitzeko irizpideak.
Lizentziak esleitzeko, irizpide hauek erabiliko dira, behar bezala haztatuak:
1. Ibilgailua ezinduak garraiatzeko egokitua izatea, gurpil-aulkiak jasotzeko plataformarekin: 15 puntu.
2. Edukiera handia: 10 puntu bitarte.
–9 lagunendako tokia, gidaria barne: 10 puntu.
–8 lagunendako tokia, gidaria barne: 8 puntu.
–6 lagunendako tokia, gidaria barne: 6 puntu.
3. Eskaintza ekonomikoa gehienez ere 5 punturekin baloratuko da. 600 euroko gutxieneko eskaintzari puntu bat emanen zaio; 300 euroko gehiagoko tarte bakoitzari puntu bat emanen zaio, edo zatikia.
4. Zerbitzuen eskaintza, 10 puntu.
Alderdi honetan gehienez ere 10 punturekin baloratzen da zerbitzua aldi berezi batzuetan emateko konpromisoa, hala nola gauaz, jaiegun eta asteburuetan, baita zerbitzua asteko zazpi egunetan ematea ere.
–Gauak, jaiegunak eta asteburuak: 5 puntu.
–Asteko 7 egunak: 5 puntu.
5. Esklusibotasuna: 10 puntu
10 puntuz baloratuko da taxi zerbitzua esklusibotasunean eskaintzea, alegia taxi lana bakarrik egitea lanordu osoz. Honi buruzko erantzukizunezko adierazpena aurkeztu beharko dute.
6. Alderdi teknologikoak, 2 puntu.
Tokiak aurkitzen eta nabigazioan laguntza ematen duten baliabide teknologikoak edukitzeari 2 puntu emanen zaizkio: GPS eta nabigatzailea.
7. Gutxiago kutsatzen duten erregai eta motorrak:
Gehienez ere 10 puntu emanez baloratuko da gutxiago kutsatzen duten erregai eta motorrak dituzten ibilgailuak izatea. Baremo honi jarraikiko zaio:
–A sailkapena*: 10 puntu.
–B sailkapena*: 7 puntu.
–C sailkapena*: 3 puntu.
(*) Espainiako Gobernuko Industria, Turismo eta Merkataritza Ministerioko Energiaren Dibertsifikazio eta Aurrezpenerako Institutuak (I.D.A.E.) prestaturiko datu basean oinarrituriko sailkapena http://coches.idae.es/.
Osoko puntuazioan berdinketa gertatzen bada, Leitzako Udalean taxi zerbitzua arautzen duen udal ordenantzaren 5.2 artikulua eta uztailaren 6ko 9/2005 Foru Legearen 5.5 artikulua betez, emakumea taxiaren sektorean sartzea ahalbidetzen duen eskaintzaren alde eginen da, hau da, emakume eskatzaileen alde. Berdinketak jarraituz gero, zozketa bidez erabakiko da.
7.–Kalifikazio Batzordea.
Agiriak kalifikatu eta proposamenak baloratuko dituen batzordea hurrengo hauek osatuko dute:
Mahaiburua: Mikel Zabaleta Aramendia.
Mahaiburu ordezkoa: Eneko Andueza Aramendia.
Epaimahaikidea: Julian Zabaleta Alduncin.
Ordezkoa: Josune Marzol Ormazabal.
Epaimahaikidea: Jose Miguel Goicoechea Zabaleta.
Ordezkoa: Silvestre Zubitur Goñi.
Idazkari-epaimahaikidea: Ane Zabaleta Baños.
Ordezkoa: Ioana Ijurco Risco.
8.–Agirien kalifikazioa.
Proposamenak aurkezteko epea bukatuta, Batzordeak, barne ekitaldian, lizitatzaileek 1. gutun-azalean aurkeztutako dokumentazio orokorra kalifikatuko du, kanpoko jenderik aurrean ez dela.
Udalaren iragarki oholean onartu eta baztertuen behin-behineko zerrenda argitaratuko da. Izangaiek erreklamazioak egiteko aukera izango dute, eta akatsak zuzendu, onartutako eskatzaileen behin-behineko zerrendan adieraziko den epean.
Eskatzaileen behin-behineko zerrendan zehazten den egunean Udalaren iragarki oholean argitara emanen da Leitzako udal mugapean hiriko taxi zerbitzua eskaintzeko lizentzia eskuratzeko izangai onartu eta baztertuen behin betiko zerrenda. Behin-behineko zerrendan bazterturik ez badago, behin-behineko zerrenda behin-betikoa bilakatu eta horrela adieraziko da.
Eskatzaileen behin-betiko zerrendan zehaztuko da gutun-azal ekonomikoak irekitzeko eguna, ordua eta tokia, baita 2. gutun-azalaren puntuazioa noiz irakurriko den ere.
Lizentzia eskuratzeko izangaiak ezagututa, barne ekitaldian, 2. gutun-azala ireki eta edukia aztertuko da, 6. oinarrian esleitzeko bildutako irizpideei jarraituz.
9.–Proposamenak irekitzeko tokia eta egun-orduak.
Batzordeak, behin-betiko zerrendan zehazten den egunean, orduan eta tokian eginen den ekitaldi publikoan, 2. gutun-azalaren edukiaren azterketan lortutako puntuazioaren berri emanen du, esleitzeko irizpideekin bat.
Ondoren, Batzordeko idazkariak 3. gutun-azala ireki eta irakurriko du.
Biharamunean, Udalaren iragarki oholean lehentasun ordenaren araberako puntuazio zerrenda emanen da argitara, lehiaketan den lizentzia eskuratzeko 10. oinarrian zehaztutako moduan.
10.–Lizentziaren esleipena.
1. Eskaintzak aztertuta, haietako bakoitzari lehentasun ordena esleituko zaio, guztira lortutako puntuazioarekin bat.
2. Organo eskudunak lizentziaren behin-behineko esleipena onetsiko du.
3. Behin-behineko esleipen-hartzaileek esleipena jakinarazi eta hiru hilabeteko epean, egiaztagiriak aurkeztu beharko ditu, lizentzia emateko eskatu zaizkion baldintzak betetzen dituela frogatzeko; eta bereziki:
–Zein ibilgailuri atxikiko zaion lizentzia, haren gaineko dokumentazioa. Aurkeztutako eskaintzarekin bat egin beharko du eta Taxiari buruzko Foru Legean eta arlo hau arautzen duen ordenantzan ezarritako ezaugarriak beteko ditu.
–Aseguruen kontratazioa eta, hala denean, kontratatutako gidariarena.
–Lizentziaren zenbateko osoa ordaintzea, aurkeztutako eskaintza ekonomikoarekin bat.
4. Behin-behineko esleipen-hartzaileak esleipena jakinarazi eta 3 hilabeteko epean, lizentzia eskuratzeko baldintzak betetzen dituela frogatzen duen dokumentazioa aurkezten ez badu, eta bereziki, ibilgailuarena, aseguruen kontratazioa eta, hala denean, soldatapeko gidariarena eta lizentziaren zenbateko osoa ordaindu izatearena, atxikitako bermea bahituko zaio eta lizentziak esleitzeko prozesutik baztertuko da. Horrela, lehentasun ordenaren arabera lizentziaren behin-behineko esleipen-hartzaile izan ez den lehendabiziko hautagaiak hartuko du haren tokia.
Prozedura hau dela eta, behin-behineko esleipen-hartzaileen zerrendan berronartutako hautagaiek lehen aldiko esleipen-hartzaileen baldintza berak izanen dituzte, baita 600 euroko bermea jarri beharra ere, behin-behineko esleipena jakinarazi eta astebeteko epean.
5. Dokumentazio hori aurkeztuta, Leitzako Udalbatzak behin betiko emanen dio taxi lizentzia esleipen-hartzaileari, eta Nafarroako Aldizkari Ofizialean argitaratuko da Leitzako udalerrian hiriko taxi zerbitzua eskaintzeko lizentziaren behin betiko esleipenaren hartzailea nor den.
11.–Lizentziaren titularraren betebeharrak.
Taxi lizentziaren esleipen-hartzaileak Taxiari buruzko 9/2005 Foru Legearen 6. artikuluan ezarritako baldintzak bete beharko ditu, taxi lizentziaren titular izateko.
Era berean, lehiaketan baloratu diren ezaugarri oro, 6. oinarrian zehaztutako irizpideekin bat, lizentziari atxikita mantendu beharko dira, hark indarrean jarraitzen duen bitartean.
12.–Jurisdikzioa eta errekurtsoak.
Lizentzia esleitzen duen organo eskudunak erabakiko du lehenik oinarri hauek aplikatu eta interpretatzean sor daitezkeen gorabehera guztiak. Haren ebazpenak Nafarroako Toki Administrazioari buruzko 6/90 Foru Legean eta 39/15 Legean ezarritakoarekin bat aurkaratzen ahal dira, eta Administrazioarekiko Auzien Jurisdikzioan errekurrituz gero, jurisdikzio horri buruzko legean ezarritakoarekin bat.
1. ERANSKINA
Dokumentazio teknikoa (PDF).
2. ERANSKINA
Proposamen ekonomikoaren eredua (PDF).
Iragarkiaren kodea: L1712952
