1. NAFARROAKO FORU KOMUNITATEA
1.7. BESTELAKOAK
522/2017 EBAZPENA, azaroaren 6koa, Hezkuntzako zuzendari nagusiak emana, Nafarroako Gobernuaren Euskararen Gaitasun Agiria (EGA) eskuratzeko azterketen 2018ko deialdiak onesten dituena, eta azterketa egiteko eskubideengatik ordaindu beharreko tarifa ezartzen duena.
Abenduaren 15eko 463/1998 Foru Aginduan ezartzen da Hezkuntza Departamentuak azterketaren lege esparrua zehaztuko duela eta probak beren gain hartuko dituzten organo eskudunak eratuko dituela.
Nafarroako Foru Komunitateko Administrazioari buruzko abenduaren 3ko 15/2004 Foru Legearen 22.1.d) artikuluak ematen dizkidan ahalmenak erabiliz,
EBATZI DUT:
1. Nafarroako Gobernuaren Euskararen Gaitasun Agiria (EGA) eskuratzeko 2018ko deialdietako azterketetarako deia egitea.
2. Deialdi honen oinarriak, ebazpen honen eranskinean zehaztutakoak, onestea. Era berean, azterketa egiteko eskubideengatik 26 euroko tarifa ezartzea deialdi bakoitzerako.
3. Nafarroako Gobernuaren Euskararen Gaitasun Agiriaren (EGA) Batzorde Ofiziala eratu eta honako eginkizun hauek esleitzea:
–EGA agiria eskuratzeko probak antolatu, diseinatu eta gainbegiratzea.
–Proben prestatzaileak hautatzea.
–Erreklamazioei eman beharreko erantzuna koordinatzea.
–Probak ebaluatzeko eta zuzentzeko irizpideak ezarri eta Epaimahaiak irizpide horiek aplikatzen dituela begiratzea.
4. Ondoko hauek izendatzea Nafarroako Gobernuaren Euskararen Gaitasun Agiriaren (EGA) Batzorde Ofizialeko kide, 2018ko deialdietarako:
–Hasier Morrás Aranoa jauna, batzordeburu.
–M.ª Amparo Antoñana Ábalos andrea.
–Miren Garbiñe Basurto Luzuriaga andrea.
–Eneritz González Fernández andrea.
–Ander Irizar Apaolaza jauna.
–Miren Oyanguren Castañeira andrea.
–Fernando Rey Escalera jauna.
–Saioa Zamakola Iartza andrea.
–Leire Zabaltza Alemán andrea, Batzordeko idazkari.
5. Nafarroako Gobernuaren Euskararen Gaitasun Agiriaren (EGA) Epaimahai Ofiziala eratzea 2018ko deialdietarako, eta haren gain uztea probak egin eta zuzentzeko lan teknikoak, laneko batzordeetan parte hartzea eta Batzorde Ofizialak esleitutako eginkizun oro egitea. Eginkizun horiek oro Batzorde Ofizialak koordinatuko ditu.
6. Ondoko hauek izendatzea Nafarroako Gobernuaren Euskararen Gaitasun Agiriaren (EGA) Epaimahai Ofizialeko kide:
–Leire Zabaltza Alemán andrea, epaimahaiburu.
–Miren Garbiñe Basurto Luzuriaga andrea, idazkari.
–Pedro Aguirre Sarasola jauna.
–M.ª Amparo Antoñana Abalos andrea.
–Ainara Arangoa Mariezcurrena andrea.
–Manuel Fontalba Romero jauna.
–Patxi Flores Lazkoz jauna.
–Eneritz González Fernández andrea.
–Amaia Irazusta Zarra andrea.
–José Luis Irigoien Paternain jauna.
–Ander Irizar Apaolaza jauna.
–Adelaida Kintana Lopez-Goikoetxea andrea.
–Luis Marcelo Los Arcos Pérez jauna.
–Margarita Macho Aguillo andrea.
–Jose Ramón Olano Etxabe jauna.
–Yolanda Olasagarre Mendinueta andrea.
–Miren Oyanguren Castañeira andrea.
–Pascual Recalde Irigoyen jauna.
–Fernando Rey Escalera jauna.
–Orreaga Urroz Goicoechea.
–Mikel Vilches Plaza jauna.
–Saioa Zamakola Iartza andrea.
7. Nafarroako Gobernuko Hezkuntza Departamentuko Eleaniztasunaren eta Arte Ikasketen Zerbitzuak bere gain hartuko ditu matrikulatzeko eta kontrolatzeko lanak, tituluak luzatzea proposatzekoak eta, orobat, gai horietan eskudunak diren beste erakunde ofizial batzuekin izan beharreko harreman instituzionalak.
8. 2018ko deialdietako azterketak bukaturik, Epaimahaiak probak gainditu dituztenen eta ez dituztenen zerrenden aktak igorriko ditu Eleaniztasunaren eta Arte Ikasketen Zerbitzura. Hezkuntzako zuzendari nagusiak, ebazpen baten bidez, baimena emanen du probak gainditu dituztenei Nafarroako Gobernuaren Euskararen Gaitasun Agiria (EGA) luzatzeko. Agiri horiek Hezkuntzako kontseilari andreak sinatuko ditu.
9. Ebazpen hau eta eranskina Nafarroako Aldizkari Ofizialean argitaratzea.
10. Ebazpen hau eta dagokion eranskina igortzea Eleaniztasunaren eta Arte Ikasketen Zerbitzura, Euskara Atalera, EGAren Bulegora, Euskararen Irakaskuntzarako Baliabide Zentrora, Giza Baliabideen Zerbitzura, Idazkaritza Tekniko Nagusira, eta goian aipatu Batzordeko eta Epaimahaiko kideei, behar diren ondorioak izan ditzaten.
11. Ebazpen honen aurka gora jotzeko errekurtsoa paratzen ahal da, Hezkuntza Departamentuko kontseilariari zuzendua, ebazpen hau argitaratu eta biharamunetik hasita hilabeteko epean.
Iruñean, 2017ko azaroaren 6a.–Hezkuntzako zuzendari nagusia, Roberto Pérez Elorza.
ERANSKINA
Deialdiaren oinarriak
1. oinarria. Baldintzak.
a) Azterketetan parte hartzeko, 16 urte beterik izan beharko dira 2017ko abenduaren 31rako.
b) Ez dute matrikularik egiten ahalko 2018ko deialdi berean beste erakunderen batean EGA agiria eskuratzeko matrikula egiten dutenek.
c) Desgaitasunen bat duten pertsonek azterketak egiteko neurri bereziak jartzeko eska dezakete. Eskaera izena emateko orrian adierazi beharko da, eta hori frogatzeko agiriaren kopia konpultsatua aurkeztu beharko du, organo eskudunak emana. Batzorde Ofizialak beharrezkoak diren egokitzapenak ezarriko ditu, eta uneoro bermatuko du ez dela murrizturik geldituko azterketan frogatu beharreko gaitasun maila.
2. oinarria. Azterketaren egitura.
Azterketak hiru proba ditu:
1. Atariko Proba.
Test erako 80 galdera (80 puntu), ondorengo gaitasun eta jakintzak ebaluatzeko:
–Hizkuntza baliabideen erabilera. Bi ariketa izanen ditu, hizkuntzaren erabileraren zuzentasuna eta egokitasuna neurtzeko:
a) 40 itemeko testa, aukera anitzekoa (a-b-c-d). 40 puntu.
b) 10 itemeko cloze testa, aukera anitzekoa (a-b-c). 10 puntu.
–Ahozkoaren ulermena. Grabatutako testuen gaineko zenbait ataza dira. Grabazioak bi aldiz entzunen dira. Atazak zenbait motatakoak izan daitezke: aukera anitzeko itemak, ahozko testuak adierazpenekin lotzea..
–Idatziaren ulermena. Testu idatzien gaineko zenbait ataza dira. Atazak zenbait motatakoak izan daitezke: aukera anitzeko itemak; testu idatzietako zatiak adierazpen laburrekin lotzea; paragrafoak adierazpen luzeekin osatzea; hutsuneak osatzea, erantzuteko emandako aukeretako bat hautatuz.
Atariko Probak 2 ordu eta 30 minutuko iraupena du.
2. Proba Idatzia. Bi ataza ditu:
–1. idazlana: erreklamazio, eskaera edo kexa bat egiteko gutun formala edota gutun pertsonala, lagunarteko erregistroan. 180 hitz, gutxienez. Aukeran emandako bi gaietatik bat hautatu beharko da.
–2. idazlana: argudio edo azalpen testua, 250 hitzekoa, gutxienez. Aukeran emandako bi gaietatik bat hautatu beharko da.
Proba Idatziak 2 orduko iraupena du.
3. Ahozko Proba. Bi ataza ditu:
–Gai bat ahoz azaltzea, testu batetik abiaturik. Azterketari bakoitzak 5 minutu izanen ditu testu hori ahoz azaltzeko. Aurretik 30 minutu izanen ditu prestatzeko.
–Solasaldia: bakarkako azalpenak bukaturik, azterketariek bat-bateko iritzi-trukea eginen dute azalpen horien gainean. Bigarren zati hau 10 minutukoa izanen da.
Ahozko Proba, salbuespenak salbuespen, binaka eginen da.
3. oinarria. Proben balorazioa.
a) Atariko Proban 80 puntu atera daitezke, gehienez. Proba hori gainditzeko ebaketa-nota logit unitatean oinarritutako neurri sistema baten bidez zehaztuko da. Azterketariak lortutako puntuazioa zenbaki eskala batean emanen da, eta logitetan lortutako puntuazioaren baliokidea izanen da.
b) Proba Idatziko atazetako kalifikazioetan alderdi hauek hartuko dira kontuan: a) genero diskurtsiboari egokitzea; b) diskurtsoaren antolaketa; c) hizkuntzaren aberastasuna eta zehaztasuna; d) zuzentasuna. Atazetako bakoitzak 10 puntu balioko du gehienez ere, eta amaierako puntuazioa bi ataza horietan lortutako puntuazioen batura izanen da. Proba gainditzeko 10 puntu atera behar dira gutxienez. Amaierako kalifikazioa zenbakiz eta Gai edo Ez Gai jarriz adieraziko da.
c) Ahozko Probako atazetako kalifikazioetan alderdi hauek hartuko dira kontuan: a) egokitasuna; b) jariotasuna; c) diskurtsoaren antolaketa; d) hizkuntzaren aberastasuna eta zehaztasuna; e) zuzentasuna; f) elkarreragina.
Atazetako bakoitzak 10 puntu balioko du gehienez ere, eta amaierako puntuazioa bi ataza horietan lortutako puntuazioen batura izanen da. Proba gainditzeko 10 puntu atera behar dira gutxienez. Amaierako kalifikazioa zenbakiz eta Gai edo Ez Gai jarriz adieraziko da.
d) EGA agiria eskuratzeko, deialdi bakoitzeko azterketetako hiru probak (Atarikoa, Idatzia eta Ahozkoa) nahitaez eta jarraian gainditu beharko dira. Aipatutako probak baztergarriak izanen dira, eta deialdi batetik bestera ez da notarik gordeko.
4. oinarria. Agiriak eta matrikula egiteko epeak.
a) Lehen deialdirako matrikula egiteko epea azaroan eta/edo abenduan izanen da. Data zehatzak www.navarra.es eta www.ega.navarra.es webguneetan argitaratuko dira.
b) Era berean, bigarren deialdirako matrikula egiteko epea ekainean eta/edo uztailean izanen da. Data zehatzak www.navarra.es eta www.ega.navarra.es webguneetan argitaratuko dira.
c) Deialdi bakoitzean, interesdunek honako agiri hauek aurkeztu beharko dituzte (behar bezala bete ondoren) Hezkuntza Departamentuko Erregistroan, Nafarroako Gobernuko Erregistro Orokorrean edo Herri Administrazioen Araubide Juridikoaren eta Administrazio Prozedura Erkidearen azaroaren 26ko 30/1992 Legearen 38.4 artikuluan aurrez ikusitako edozein tokitan, urriaren 1eko 39/2015 Legearen xedapen indargabetzaile bakarraren arabera:
–Eskabide orokorra.
–Matrikula inprimakia.
–Familia ugariaren agiriaren edo Familia Liburuaren fotokopia (bidezkoa denean), argi irakurtzeko modukoa.
–Azterketa egiteko eskubideengatik ordaindu beharrekoa Nafarroako Foru Komunitateko Administrazioaren Diru-bilketa Kontuan sartu izanaren gordekina (bidezkoa denean).
–Legeen arabera desgaitasunen bat dutela frogatzeko agiriaren kopia konpultsatua, organo eskudunak emana.
d) Azterketa egiteko eskubideak.
–Azterketa egiteko eskubideengatik 26 euro ordaindu beharko dira deialdi bakoitzean.
–1. kategoriako familia ugariko kide izanez gero, 13 euro ordaindu beharko da, eta 2. kategoriako familia ugariko kide izanez gero, matrikula doan izanen da. Bi kasuetan deskontuak 22 urte bete arte balioko du, hots, matrikula egiten den egunean 21 urte edo gutxiago badute. Deskontua 25 urte bete arte luza daiteke, azterketaria bere adinaren eta titulazioaren araberako ikasketak egiten ari bada. Hala denean, ikasketa horiek egiaztatzeko, ziurtagiria edo matrikula ofizialaren agiria eta matrikula ordaindu izanaren frogagiria aurkeztu beharko ditu.
–Behin izena eman ondoren, hautagaiak ez eskubiderik izanen du matrikularen zenbatekoa itzul dakion, ez bada ezohiko arrazoi bategatik, eta betiere egiaztagiria aurkeztuta.
e) Lehen deialdian onartu eta baztertuen behin-behineko zerrendak eta behin betikoak 2018ko urtarrilean eta/edo otsailean argitaratuko dira. Era berean, bigarren deialdian onartu eta baztertuen behin-behineko zerrendak eta behin betikoak abuztuan eta/edo irailean argitaratuko dira.
f) Bi deialdietan onartu eta baztertuen behin-behineko zerrenden aurkako erreklamazioetarako epeak behin-behineko zerrendetan emanen dira ezagutzera. Data zehatzak www.navarra.es eta www.ega.navarra.es webguneetan argitaratuko dira 2018ko urtarrilean eta otsailean, 1. Deialdiaren kasuan, eta abuztuan eta irailean, 2. deialdian.
g) Bi deialdietako onartu eta baztertuen behin betiko zerrendak erreklamazio epeen ondoren argitaratuko dira, eta epe horiek gorago aipatu diren onartuen eta baztertuen behin-behineko zerrendekin batera emanen dira ezagutzera. Data zehatzak www.navarra.es eta www.ega.navarra.es webguneetan argitaratuko dira.
h) Probak egin ahal izateko, azterketariek NANa edo agiri baliokideren bat aurkeztu beharko dute.
5. oinarria. Azterketak egiteko eta emaitzak jendaurrean jartzeko egun-orduak.
a) Proba guztiak egiteko ezartzen diren egunak finkoak dira azterketari guztientzat, eta ezin izanen dira aldatu. Lehen deialdiko lehen azterketa (Atariko Proba) 2017ko otsailean eginen da. Era berean, bigarren deialdiko lehen azterketa 2017ko irailean eginen da. Bi deialdietako onartuen eta baztertuen behin-behineko zerrendak argitaratzeaz batera adieraziko dira data, ordua eta tokia.
Data zehatzak www.navarra.es eta www.ega.navarra.es webguneetan argitaratuko dira.
Geroago, proben emaitzekin batera, Epaimahaiak jakinaraziko du gainerako probak noiz eta non eginen diren.
b) Egon litezkeen erreklamazioak idatziz aurkeztuko dira, Herri Administrazioen Araubide Juridikoaren eta Administrazio Prozedura Erkidearen azaroaren 26ko 30/1992 Legearen 38.4 artikuluan aurrez ikusitako edozein tokitan, urriaren 1eko 39/2015 legearen xedapen indargabetzaile bakarraren arabera, EGA azterketaren hiru aldietako edozeinetako kalifikazioak jendaurrean jarri eta biharamunetik hasita bi egun balioduneko epean. EGAren Batzorde Ofizialak erreklamazioak ebatziko ditu.
c) Azterketak ikusteko saioak EGA azterketak dituen proba guztiak bukatutakoan eta behin betiko kalifikazioak eta emaitzei egindako erreklamazioen berri argitaratutakoan izanen dira, eta saio hauek ez dute inolaz ere eraginik izanen behin betiko emaitzetan. Azterketaria bakarrik agertuko da, NANa edo agiri baliokidea aldean duela.
d) Azterketak ikusteko saioetan berrikusiko den material bakarra azterketariak emandako erantzunak izanen dira, inoiz ez epaimahaiak azterketa egunetan azterketariei jarritako atazak. Horren arabera, Atariko Probari dagokionez, azterketariak bere erantzun-orria bakarrik ikusi ahal izanen du, txantiloi ofizialaren arabera zuzendu dena. Proba Idatziaren kasuan, bere idazlanak, eta Ahozko Proban, bere ahozko ekoizpena gordetzeko egin zaion grabazioa.
e) Proba bakoitza bukatutakoan, azterketariari informazio orri bat emanen zaio, bertan proba bakoitzari dagokion informazio garrantzitsua ageri dena: behin-behineko kalifikazioen argitaratze-data, behin betiko kalifikazioen argitaratze-data, erreklamazio-prozedura eta azterketak ikusteko prozedura.
6. oinarria. Ahozko azterketa grabatzea.
Oro har, ahozko proba guztiak grabatuko dira.
7. oinarria. Agiria luzatzeko eskubideak.
Nafarroako Gobernuaren Euskararen Gaitasun Agiria (EGA) lortzeko probak gainditzen dituzten azterketariek, agiria jaso baino lehen, agiri hori luzatzeko tarifa Nafarroako Foru Komunitateko Administrazioaren Diru-bilketa Kontuan ordaindu izanaren gordekina aurkeztu beharko dute Hizkuntzen eta Arte Ikasketen Zerbitzuan.
Tarifa hori foru lege batean ezarriko da, hots, zenbait zerga aldatu eta beste tributu-neurri batzuk hartzeari buruzkoan, agiria emateko unean indarra duen hartan.
Era berean, agiri berri bat eskatzen bada, dela aurrekoa galdu delako, dela azterketariaren datuak aldatu direlako, foru lege horretan ezarritako tarifa ordaindu beharko da.
Iragarkiaren kodea: F1713044
