1. NAFARROAKO FORU KOMUNITATEA
1.7. BESTELAKOAK
287E/2017 EBAZPENA, urriaren 23koa, Ekonomia Zirkularraren eta Uraren Zerbitzuko zuzendariak emana, Andosillako udal-mugartean animalien azpiproduktuak eraldatzeko instalazio baten Ingurumen baimen integratua ofizioz aldatzen duena, ebazpen honen eranskinean zehaztatutako aldaketekin bat; horren ondorioz, instalazioak eta jarduerak berak instalazio horren Ingurumen baimen integratua eman, eguneratu eta aldatzeko lehendik tramitatutako espedienteetan ezarritako baldintzak bete beharko dituzte, eta, horiez gainera, ebazpen honen eranskinetan jasotako baldintzak eta neurriak. Instalazioaren titularra Industrias Grasas Marin-Navarra SL da.
Instalazio horrek badu Ingurumen baimen integratua, Ingurumenaren eta Uraren zuzendari nagusiaren azaroaren 8ko 2251/2007 Ebazpenaren bidez emana, gero Ingurumenaren eta Uraren zuzendari nagusiaren uztailaren 2ko 284E/2014 Ebazpenaren bidez eguneratua eta Ekonomia Zirkularraren eta Uraren Zerbitzuko zuzendari nagusiaren abenduaren 23ko 407E/2016 Ebazpenaren bidez aldatua.
Instalazioak galdaketa prozesuaren emisioak tratatzeko sistema bat du (1. fokua): gasen garbigailua eta ikatz aktiboko iragazki bat, usain txarreko emisioak, konposatu organikoek eta sufre murriztuko konposatuek osatuak, gutxitzeko.
Edozein instalazioren ingurumen baimen integratuan emisioetarako ezarritako gehieneko balioek bat etorri behar dute instalazioan emisioak gutxitzeko aplikatzen diren teknika erabilgarri onenen eraginkortasun mailarekin. Ekonomia Zirkularraren eta Uraren Zerbitzuak instalazio honen emisioen gehieneko balioen analisia egin du, eta ondorioa da 1. fokuan COT parametroaren gehieneko balioa galdaketako prozesuaren emisioen tratamendurako sistemak eman dezakeen ingurumen emaitza baino askoz altuagoa dela.
Beraz, 1. fokuan COT parametroaren gehieneko balioa ofizioz aldatu beharra dago, galdaketako prozesuaren emisioen tratamendurako sistemaren eraginkortasun mailara egokitzeko, eta horrela, sistema horren funtzionamendu egokiaren kontrola ahalbidetzeko.
Era berean, usain txarreko gaien emisioen prebentzioa osatzeko, sufre murriztuko konposatuen emisioa kontrolatzeko parametro bat gehitu behar da. Horregatik, 1. fokuan hidrogeno sulfuroaren (H2S) parametrorako emisioen gehieneko balioa ezarri behar da.
Azkenik, bidezkoa da ingurumen baimen integratuan azterketa olfatometriko bat egiteko aukera sartzea, Landa Garapeneko, Ingurumeneko eta Toki Administrazioko Departamentuaren iritziz beharrezkoa baldin bada gantzak urtzeko prozesuaren emisioek eragindako ukipena ebaluatzea, betiere justifikatzen badu.
Kasu honetan, Ingurumena Babesteko Esku-hartzeari buruzko martxoaren 22ko 4/2005 Foru Legea garatzen duen Erregelamenduaren 27. artikuluko e) letran aurreikusitako inguruabarrak gertatzen direla iritzi da, eta, horrenbestez, bidezko da Ingurumen baimen integratuan ezarritako baldintzak ofizioz aldatzea, Ingurumena Babesteko Esku-hartzeari buruzko martxoaren 22ko 4/2005 Foru Legea garatzen duen Erregelamenduaren 28. artikuluan aurreikusitako administrazio prozedurarekin bat, eta ez da bidezkotzat jo aldaketa-espediente hau jendaurrean jartzea.
Ebazpenaren proposamena instalazioaren titularrari entzunaldia emateko tramitean egon da hogeita hamar egunez, eta ez du proposamenaren aurkako alegaziorik aurkeztu.
Adierazitakoarekin bat, eta Ingurumeneko eta Lurraldearen Antolamenduko zuzendari nagusiak urriaren 4an emandako 760/2016 Ebazpenaren bidez eskuordetuak ditudan eskumenak erabiliz,
EBATZI DUT:
Lehena.–Andosillako udal-mugartean animalien azpiproduktuak eraldatzeko instalazio baten Ingurumen baimen integratua ofizioz aldatzea, ebazpen honen eranskinean zehaztutako aldaketen arabera. Hortaz, instalazioak eta jarduerak berak instalazioari Ingurumen baimen integratua eman, eguneratu eta aldatzeko lehendik tramitatutako administrazio espedienteetan ezarritako baldintzak bete beharko dituzte, eta, horiez gainera, ebazpen honen eranskinean adierazitako baldintzak eta neurriak. Instalazioaren titularra Industrias Grasas Marin-Navarra SL da.
Bigarrena.–Ebazpen honetan bildu diren baldintzak ez betetzeak berarekin dakar ingurumeneko diziplina neurriak hartzea, hain zuzen ere, Kutsaduraren prebentzio eta kontrol integratuari buruzko Legearen testu bategina onesten duen abenduaren 16ko 1/2016 Legegintzako Errege Dekretuaren IV. tituluan jasotakoak, ezertan galarazi gabe sektoreko legerian ezarritakoa, aplikagarri izaten segituko baitu, eta, horren osagarri, Ingurumena Babesteko Esku-hartzeari buruzko martxoaren 22ko 4/2005 Foru Legearen VI. tituluan ezarritako zehapen araubidean jasotakoak.
Hirugarrena.–Ebazpen hau Nafarroako Aldizkari Ofizialean argitaratzea.
Laugarrena.–Ebazpen honek ez du administrazio bidea amaitzen, eta interesa dutenek, administrazio publikoek izan ezik, gora jotzeko errekurtsoa jar dezakete, Landa Garapeneko, Ingurumeneko eta Toki Administrazioko kontseilariari zuzendua, hilabeteko epean. Administrazio publikoek administrazioarekiko auzi-errekurtsoa jarri ahalko dute, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean. Horrek ez du galarazten Nafarroako Gobernuari aurretiazko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean. Epeak ebazpen hau jakinarazi eta biharamunetik hasita kontatuko dira.
Bosgarrena.–Ebazpen hau Industrias Grasas Marin-Navarra SLri eta Andosillako Udalari igortzea, behar diren ondorioak izan ditzan.
Iruñean, 2017ko urriaren 23an.–Ekonomia Zirkularraren eta Uraren Zerbitzuko zuzendaria, César Pérez Martín.
Oharra: ebazpen honetan aipatzen diren eranskinak interesdunen eskura egonen dira Ingurumeneko eta Lurraldearen Antolamenduko Zuzendaritza Nagusiaren bulegoetan (González Tablas kalea, 9, behea, Iruña), Ingurumen Kalitatearen eta Klima Aldaketaren Zerbitzuan, eta Nafarroako Gobernuaren web-orrian: http://www.navarra.es/home_es/Temas/Medio+Ambiente/Evaluacion+ambiental/Autorizaciones+ambientales/
Iragarkiaren kodea: F1712257
