198. ALDIZKARIA - 2017ko urriaren 13a

2. NAFARROAKO TOKI ADMINISTRAZIOA

2.1. OPOSIZIOAK ETA LEHIAKETAK. LAN PUBLIKOAREN ESKAINTZA

ZIZUR NAGUSIA

Deialdia, C mailako administrari-ofizialaren lanpostuan aldi baterako kontratuarekin aritzeko izangaien zerrenda bat osatzeko, Zizur Nagusiko Udalean sortzen diren beharrei erantzutearren

Zizur Nagusiko Udaleko Gobernu Batzarrak 2017ko irailaren 8an hartutako erabakiaren bitartez onetsi da deialdia, C mailako administrari-ofizialaren lanpostuan aldi baterako kontratuarekin aritzeko izangaien zerrenda bat osatzeko, Zizur Nagusiko Udalean sortzen diren beharrei erantzutearren.

Hautapen prozesua honako hauetan xedatutakoari jarraikiz eginen da: Nafarroako Administrazio Publikoen zerbitzuko Langileen Estatutuaren Testu Bategina, abuztuaren 30eko 251/1993 Legegintzako Foru Dekretuaren bidez onetsia, aipatutako estatutua garatu eta gauzatzeko Sarrera Erregelamendua, gainerako aplikazio arauak eta deialdi honen oinarriak.

OINARRIAK

1.–Deialdiaren xedea.

1.1. Deialdi honen xedea da oposizio bidez izangaien zerrenda bat osatzea, C mailako administrari-ofizialaren lanpostuan aldi baterako kontratuarekin aritzeko, Zizur Nagusiko Udalean sortzen diren beharrei erantzutearren.

1.2. Udal zerbitzu bakoitzean lanpostuari dagozkion eginkizunak Eginkizunen Eskuliburuan zehaztutakoak izanen dira.

1.3. Deialdi honen babesean osatutako zerrenda indarrean egonen da beste deialdi baten onespenetik sortzen denak ordezten duen arte, eta, halakorik ezean, gehienez ere 5 urteko epean, onetsi denetik hasita.

2.–Izangaiek bete beharreko baldintzak.

2.1. Oposizio honetara onartua izateko, eskabideak aurkezteko epea bukatzen den egunean, izangaiek ondoko baldintzak bete beharko dituzte:

2.1.1. Izangai guztien betebeharrak.

a) Espainiako nazionalitatea izatea edo Europar Batasuneko estaturen batekoa edo, Europar Batasunak izenpetu eta Espainiako Estatuak berretsitako nazioarteko itunen arabera, langileen joan-etorri askea aplikatzen den estaturen batekoa.

Orobat, parte har dezakete espainiarren eta Europar Batasuneko beste estatuetako herritarren ezkontideek, edo aipatu nazioarteko itunen aplikazio eremuan sartutako estatuetako herritarren ezkontideek, zuzenbidez bereizita ez badaude; halaber, haien ondorengoek eta ezkontidearenek, zuzenbidez bereizita ez badaude, 21 urtetik beherakoak badira, edo hortik gorakoak, haien kontura biziz gero.

b) Hamasei urte beteta izatea eta nahitaezko erretiroa hartzeko gehieneko adina gainditua ez izatea.

c) Eskaerak aurkezteko epea bukatzen den egunean Batxilergoko titulua, Bigarren Graduko Lanbide Heziketakoa edo horien titulu baliokide bat izatea edo hori eskuratzeko moduan egotea.

Atzerrian lortutako tituluak badira, homologazioaren frogagiria eduki beharko da.

d) Bete behar dituen eginkizunetan aritzeko adinako gaitasun fisiko eta psikikoa izatea.

e) Eginkizun publikoetan aritzeko ezgaitua edo gabetua ez egotea eta administrazio publikoren baten zerbitzutik bereizia ez izatea.

Espainiako nazionalitatea ez duten izangaiek frogatu beharko dute beren estatuko funtzio publikoan sartzea eragozten dien diziplina-zehapenik edo kondena penalik ez dutela.

2.2. Euskara maila nahitaezkoa duten lanpostuak.

Ordezkapena egiteko beharra sortzen den unean indarrean dagoen plantilla organikoaren arabera euskararen ezagutza nahitaezko duten lanpostuak, soilik nahitaezko maila hori egiaztatu duten pertsonekin betetzen ahalko dira.

Zentzu horretan, izangaiek euskararen ezagutza frogatuko dute hautapen prozesuan parte hartzeko eskabidea aurkezten duten unean.

Aipatutako titulua izan ezean, izangai horiek hizkuntza horretan behar bezalako maila duten zehazteko proba bat gainditu beharko dute. Gaitasun proba hori egin nahi dutenek prozesuan parte hartzeko eskabidean adierazi beharko dute, horretarako ezarritako tokian.

3.–Tasak, eskabideak eta epea, eta aurkeztu beharreko dokumentazioa.

3.1. Tasak.

Azterketa eskubideetarako tasak arautzen dituen ordenantza fiskalak ezarritakoaren arabera, 20 euroko tasa ordaindu behar da espedientea formalizatzeko eta azterketa eskubideetarako. Aipatu ordenantza 2014ko 236. Nafarroako Aldizkari Ofizialean argitaratu zen, abenduaren 2an.

3.1.1. Honako hauek ez dute tasarik ordaindu beharko:

Deialdia argitaratu baino hilabete lehenagotik gutxienez lan-eskatzaile gisa inskribaturik dauden pertsonak. Salbuespen hori aplikatzeko baldintza izanen da inskribaturik egon diren bitartean eskainitako inolako lan egokiri uko egin ez izana eta lanbide sustapen, prestakuntza edo eraldaketarako ekintzetan parte hartzeari uko egin ez izana, justifikaturiko kasuetan izan ezik, eta, horrez gainera, lanbide arteko gutxieneko soldatatik gorakoa den diru-sarrerarik ez izatea hilabetero.

3.1.2. Lan eskatzailea dela frogatzeko, Enplegu Bulegoak emandako ziurtagiria aurkeztu beharko du. Bertan, lan eskatzaile gisa inskribatu zeneko data agertuko da eta, orobat, adieraziko da inskribaturik egon den bitartean ez diola uko egin handik eskainitako inolako lan egokiri, ezta lanbide sustapen, prestakuntza edo eraldaketarako ekintzetan parte hartzeari ere, justifikatutako kasuetan izan ezik.

3.1.3. Interesdunaren adierazpen bidez frogatuko da ez duela lanbide arteko gutxieneko soldatatik gorako diru-sarrerarik hilean. Adierazpen eredua Udaleko Informazio Bulegoan eskuratzen ahalko da, edo, bestela, Internet bidez, www.zizurmayor.es helbidean.

3.1.4. Tasa horren ordainketa izenduna eta bana-banakoa da, eta diru-sarrera baten bidez eginen da, eskudirutan edo transferentziaren bidez, Zizur Nagusiko Udalak banku hauetan dituen kontuetan: La Caixa, 2100.5199.54.2200064878; Rural Kutxa, 3008.0066.81.0702518820, eta Euskadiko Kutxa, 3035.0200.87.2000790026. Horrelakoetan, ordainagirian datu hauek jarri beharko dira nahitaez:

–Izangaiaren izen-deiturak.

–NANa/IFZ.

–Ordainketa zein kontutan egiten den, haren zenbakia.

–Kontzeptua: Oposizioak.

–Deialdiaren xede den lanpostua.

3.1.5. Azterketa eskubideengatiko tasa ordaindu ez bada, izangaia baztertu eginen da.

3.2. Eskabideak eta epea.

Eskabideak deialdi honen I. eranskinean dagoen ereduari lotu behar zaizkio eta, haietan, izangaiek adierazi beharko dute eskatutako baldintza guztiak betetzen dituztela. Eskabide eredua Zizur Nagusiko Udalaren idazkaritzan eskuratu ahalko da, edo, bestela, INFOLOCAL 012 telefonoaren bidez ere, Nafarroa barrutik deituz gero, edo 948 217 012 telefonoa markatuz, Nafarroa kanpotik deituz gero; Internet bidez ere lortu ahalko da, www.zizurmayor.es helbidean, baita deialdia argitaratzen den Aldizkari Ofizialean ere.

Deialdian parte hartzeko eskabideak hura Nafarroako Aldizkari Ofizialean argitaratu eta, biharamunetik hasita, hamabost egun naturaleko epean aurkeztu beharko dira. Eskaerak aurkezteko epea luzaezina da.

Eskabidean atzematen diren akats materialak edo egitezkoak ofizioz edo interesdunak eskaturik zuzentzen ahalko dira, noiznahi ere.

Deialdian parte hartzeko eskabideak aurkeztu beharko dira Zizur Nagusiko Udaleko erregistro orokorrean (Erreniega parkea, zk.g., 31180 Zizur Nagusia) edo Administrazio Prozedura Erkideari buruzko urriaren 1eko 39/2015 Legearen 16. artikuluan ezarritako bideetako bat erabiliz. Horretarako, hamabost egun naturaleko epea izanen da, deialdi hau Nafarroako Aldizkari Ofizialean argitaratu eta biharamunetik hasita.

Eskaera posta bulego batean aurkeztuz gero, gutun-azal ireki batean aurkeztuko da, postako langileek data eta zigilua jar diezazkioten eskabideari, ziurtatu aurretik.

3.3. Eskabideari erantsi beharreko dokumentazioa.

3.3.1. Eskabideari, behar bezala bete ondotik, 2.1.1 atalean aipatutako agiri hauek erantsiko zaizkio:

a) Nortasun agiri nazionalaren kopia konpultsatua.

b) Batxilergoko tituluaren kopia konpultsatua, Bigarren Graduko Lanbide Heziketakoarena edo horien titulu baliokideren batena, edo hori eskuratzeko moduan egotea, eskabideak aurkezteko epea bukatzen den egunean.

c) Espedientea formalizatzeko eta azterketa eskubideetarako tasa ordaindu izanaren frogagiria.

3.3.2. Euskararen ezagutza egiaztatzea.

Euskarazko B2 jakite mailaren betebeharra duten lanpostuak hautatu nahi dituztenek, parte hartzeko eskabideaz gain, Hizkuntzen Europako Erreferentzia Esparru Bateratuaren B2 mailari dagokion euskara tituluaren fotokopia aurkeztu beharko dute, edo hizkuntza eskola ofizial batek luzatutako Euskararen Gaitasun Agiriarena edo ofizialki baliokidea den beste titulu batena.

Aipatutako titulua izan ezean, izangai horiek hizkuntza horretan behar bezalako maila duten zehazteko proba bat gainditu beharko dute. Gaitasun proba hori egin nahi dutenek prozesuan parte hartzeko eskabidean adierazi beharko dute, horretarako ezarritako tokian.

3.3.3. %33ko desgaitasuna edo handiagoa izanik parte hartzen dutenek horren berri eman beharko dute eskabidean; gainera, hura frogatzen duen dokumentazioa, organo eskudunak emana, erantsi beharko dute. Halaber, beharrezkotzat jotzen dituzten denbora edo baliabide egokitzapenak eskatzen ahalko dituzte. Kasu horretan, eskabidean adierazi beharko dute eta, gainera, aparteko orri batean, zer egokitzapen eskatzen duten.

%33ko desgaitasuna edo handiagoa duten izangai horiek aurkeztutako agiriak Pertsonen Autonomiarako eta Garapenerako Nafarroako Agentziara eramanen dira, probak egiteko denbora eta baliabide aldetik behar dituzten egokitzapenak zehazteko.

4.–Izangaien onarpena eta erreklamazioak.

4.1. Behin-behineko zerrendak.

Eskabideak aurkezteko epea bukatutakoan, Zizur Nagusiko Udaleko alkateak ebazpena emanen du, onartu eta baztertuen behin-behineko zerrenda onesteko, eta Udalaren iragarki oholean eta web-orrian argitara emateko aginduko du.

4.1.1. Izangai baztertuek, behin-behineko zerrenda argitaratu ondoko hiru egun baliodunen barrenean, erreklamazioak egiten ahalko dituzte eta, okerrik egin baldin badute, horiek zuzendu.

4.1.2. Izangai bazterturik ez bada, onartuen zerrendak behin betiko onetsiko dira zuzenean.

4.2. Behin betiko zerrendak.

4.2.1. Erreklamazioetarako edo zuzenketetarako epea burututakoan eta haiei erantzun ondotik, Zizur Nagusiko alkateak ebazpena emanen du onartu eta baztertuen behin betiko zerrenda onesteko, eta Udalaren iragarki oholean eta web-orrian argitaratzeko aginduko du.

4.2.2. Azterketa eskubideak ez dira itzuliko, izangaiei egotz dakiekeen arrazoiengatik baztertuak gelditzen direnean.

4.2.3. Eskabidean adierazten dutenek deialdiaren 3. oinarriko 3.3.2 atalean ezarritako euskara tituluetako bat dutela, zuzenketak egiteko epea iraganda ez badute frogatu, euskararen mailaketa proba egiteko deia jasoko dute.

Euskarazko berariazko probarako deia jaso eta atal honetan aipatzen diren behin betiko zerrendak argitaratu ondoren eta euskara probak hasi baino lehen, deialdiaren 3. oinarriko 3.3.2 atalean ezarritako titulua dutela frogatzen duten izangaiak euskara proba egitetik salbu geldituko dira. Titulua Zizur Nagusiko Udalean aurkeztu beharko da. Ohartuz gero aurkezten den titulua ez dela deialdiaren 3. oinarriko 3.3.2 atalean jasotakoa, interesdunari jakinaraziko zaio euskarazko berariazko proba egin beharra duela.

4.2.4. Izangai onartu eta baztertuen zerrendak argitaratzearekin ulertuko da interesdunei egin beharreko jakinarazpena egin dela, Administrazio Publikoen Administrazio Prozedura Erkideari buruzko urriaren 1eko 39/2015 Legearen 45. artikuluan ezarritakoarekin bat.

5.–Kalifikazio epaimahaia.

5.1. Hauexek izanen dira kalifikazio epaimahaiko kideak:

1.–Mahaiburua: Jon Gondán Cabrera, Zizur Nagusiko Udaleko alkatea.

–Ordezkoa: María Pilar García Castellano, Zizur Nagusiko Udaleko lehen alkateordea.

2.–Mahaikide-idazkaria: María Cristina Fabo Legarda, Zizur Nagusiko Udaleko idazkaria.

–Ordezkoa: Yolanda Azanza Ilzarbe, Zizur Nagusiko Udaleko kontu-hartzailea.

3.–Mahaikidea: María Isabel Abadía Sanz, APT-Zizur Nagusiko Udaleko Giza Baliabideen arduraduna.

–Ordezkoa: Margarita Hernández Baigorri, Zizur Nagusiko Udaleko administrari-ofiziala.

4.–Mahaikidea: María Dolores Zunzarren Iza, Zizur Nagusiko Udaleko administrari-ofiziala.

–Ordezkoa: María Begoña Oyaregui Beunza, Zizur Nagusiko Udaleko administrari-ofiziala.

5.–Mahaikidea: Francisco Javier Severiano Pecharromán, Zizur Nagusiko Udaleko funtzionarioen ordezkaria.

–Ordezkoa: Javier Aniceto Górriz Salamanca, Zizur Nagusiko Udaleko funtzionarioen ordezkaria.

5.2. Epaimahaia hautaprobak hasi baino lehen eratuko da.

5.3. Epaimahaia ezin izanen da eratu, ezta aritu ere, kideen gehiengo osoa bertan izan gabe.

5.4. Kide anitzeko organoaren eraketak eta jardunak balioa izateko, mahaiburuak eta mahaikide-idazkariak edo haien ordezkoek bertan egon beharko dute.

5.5. Epaimahaiko kideek ez dute parte hartuko, eta organo deitzaileari horren berri emanen diote, baldin eta Administrazio Publikoen Administrazio Prozedura Erkideari buruzko urriaren 1eko 39/2015 Legean parte ez hartzeko aipatzen diren egoeretakoren batean badaude.

5.6. Izangaiek, halaber, zilegi dute mahaikideak errefusatzea, egoera horietako bat gertatzen denean.

5.7. Epaimahaiak gehiengoz erabakiko ditu deialdiaren oinarriak ulertu eta aplikatzeko moduaren inguruan sortzen diren arazo guztiak.

5.8. Epaimahaiak aholkulari adituen laguntza izan dezake proba batzuetan nahiz guztietan. Aholkulari horiek beren espezialitate teknikoetan baizik ez dira ariko eta haietan bakarrik emanen diote laguntza epaimahaiari.

6.–Proba.

6.1. Oposizioa 2017ko azaroan hasiko da, gutxi gorabehera. Onartu eta baztertuen behin betiko zerrenda onesten duen ebazpenean berean zehaztuko da probak non, noiz eta zer ordutan hasiko diren.

6.2. Proba.

6.2.1. Hautapen prozesua proba teoriko-praktiko baten bidez eginen da. Proba horretan 90 galdera erantzun beharko dira ebazpen honen II. eranskinean ageri diren gaiei buruz. Erantzuteko zenbait aukera eskainiko dira, baina bakarra izanen da zuzena. Erantzun oker bakoitzak penalizazioa ekarriko du, hain zuzen ere erantzun zuzenaren balioaren herena.

6.2.2. Kalifikazio Epaimahaiak finkatuko du probaren gehieneko iraupena, ariketa hasi aurretik.

Proba hauek egiteko ez da inolako testurik erabiltzen ahalko, ezta kalkulagailurik edo bestelako materialik ere, mutur lodiko bolaluma urdina edo beltza ez bada.

6.2.3. Hautapen prozesuan 90 puntu eskuratzen ahalko dira gehienez, eta bazterturik geldituko dira proban gehieneko puntuazioaren %30 gutxienez lortzen ez duten izangaiak.

6.2.4. Probarako dei bakarra eginen da. Hartara nortasun agiri nazionala, pasaportea, gidabaimena edo epaimahaiak askiesten duen beste nortasun agiri bat aldean dutela agertu beharko dute parte-hartzaileek.

Nor diren frogatzen ez dutenak edo agertzen ez direnak baztertu eginen dira.

6.2.5. Proba zuzendu ondoan, epaimahaiak jendaurrean jarriko du, Zizur Nagusiko Udalaren iragarki oholean eta ariketa egin den tokian, hura gainditzen duten izangaien zerrenda, lortutako kalifikazioekin. Delako zerrendaren berri jakiteko Infolocalera dei daiteke, 012 telefonoaren bidez, Nafarroatik deituz gero, edo 948 217 012 telefonoa markatuz, Nafarroatik kanpo deituz gero; Internet bidez ere eskuratzen ahal da, www.zizurmayor.es helbidean.

6.2.6. Hautaprobak egiteko, desgaitasun aitortua dutenentzat beharrezkoak diren denbora eta baliabide egokitzapenak ezarriko dira, eskabidean azaltzen dutenaren arabera.

7.–Emaitzak.

7.1. Probaren kalifikazioa bukatu ondotik, epaimahaiak Zizur Nagusiko Udalaren iragarki-oholean eta bere web-orrian (www.zizurmayor.es) argitaratuko ditu lortutako puntuazioak, eta 3 egun balioduneko epea emanen du emaitzei buruzko alegazioak egiteko.

7.2. Behin alegazioetarako epea iraganik, eta horiek ebatzirik, parte-hartzaileen puntuazioetan berdinketarik izanez gero, epaimahaiak zozketa bakar bat eginen du hura hausteko. Berdindutako izangai guztien artean, bat ausaz hautatuko da. Berdinketa guztiak hurrenkera alfabetikoaren arabera deseginen dira, zozketa horretan hautatzen den izangaiaren abizenak eta izena abiapuntu harturik. Emaitzak Zizur Nagusiko Udalaren web-orrian eta iragarki-oholean jarriko dira jendaurrean.

7.3. Aurkezten diren alegazioak eta berdinketak ebatzirik, epaimahaiak Zizur Nagusiko Udalaren iragarki-oholean eta bere www.zizurmayor.es web-orrian argitaratuko du proba gainditzen duten pertsonen zerrenda, guztira lortutako puntuazioaren ordenan.

Halaber, epaimahaiak alkateari igorriko dio zerrenda, onets dezan, hautapen prozesuaren espediente osoarekin batera.

8.–C mailako administrari-ofizialen lanpostuetan aritzeko izangaien zerrendak.

8.1. Zerrenda onestea.

Hautapen prozesuaren espediente osoa jaso ondoren, Alkatetzaren ebazpen baten bidez, aldi baterako kontratatzeko izangaien zerrenda onetsiko da, eta hori Zizur Nagusiko Udalaren iragarki oholean argitaratuko da, baita Interneteko bere helbide honetan ere: www.zizurmayor.es

8.2. Deia.

Izangaiei dei egin eta, hala bada, kontratatzerakoan, arau hauetan ezarritakoari jarraituko zaio: Nafarroako Administrazio Publikoetako Langileen Estatutuaren Testu Bategina onesten duen abuztuaren 30eko 251/1993 Legegintzako Foru Dekretuaren 88. artikulua eta hurrengoak; deialdi honen oinarriak; Aldi baterako kontratazioa kudeatzeko arauak onesten dituen Lehendakaritza, Justizia eta Barneko kontseilariaren abenduaren 31ko 814/2010 Foru Agindua (2011ko 31. Nafarroako Aldizkari Ofiziala, otsailaren 15ekoa), udal akordio kolektiboetan jaso baitira, eta aplikatzekoak diren gainerako arauak.

Izangaiei lanerako deia egiten zaienean, aintzat hartuko da, orobat, Nafarroako Administrazio Publikoetako Langileen Estatutuaren Testu Bateginaren zazpigarren xedapen gehigarrian, 4. atalean, ezarritakoa, non Nafarroako administrazio publikoetan desgaitasunen bat duten pertsonek enplegua lortzeko moduaren xehetasunak arautzen baitira.

9.–Errekurtsoak.

9.1. Epaimahaiak ematen dituen egintza eta ebazpenen kontra gora jotzeko errekurtsoa paratzen ahal da Zizur Nagusiko Udaleko alkate udalburuari zuzenduta, errekurtsoaren xede den egintza argitaratu edo jakinarazi eta biharamunetik hilabeteko epean.

9.2. Deialdi honen oinarrien kontra edo hura aplikatzeko egintzen kontra, egintza horiek ez badira epaimahaiak eginak, errekurtso hauetakoren bat paratzen ahal da, hautara:

a) Berraztertzeko errekurtsoa, egintza egin duen organo berari zuzendua, hilabeteko epean, errekurritutako egintza argitaratu edo jakinarazi eta biharamunetik hasita.

b) Administrazioarekiko auzi-errekurtsoa, Administrazioarekiko Auzien Jurisdikzioko organo eskudunari zuzendua, Administrazioarekiko Auzien Jurisdikzioa arautzen duen uztailaren 13ko 29/1998 Legean xedatuari jarraikiz, bi hilabeteko epean, errekurritutako egintza jakinarazi edo argitaratu eta biharamunetik hasita.

c) Gora jotzeko errekurtsoa, Nafarroako Administrazio Auzitegiari zuzendua, hilabeteko epean, errekurritutako egintza edo erabakia jakinarazi edo argitaratu eta biharamunetik hasita.

9.3. Hori guztia Administrazio Publikoen Administrazio Prozedura Erkideari buruzko urriaren 1eko 39/2015 Legearen 121. eta 122. artikuluetan, eta Nafarroako Toki Administrazioari buruzko uztailaren 2ko 6/1990 Foru Legearen 333. artikuluan ezarritakoarekin bat.

Zizur Nagusian, 2017ko irailaren 29an.–Alkate udalburua, Jon Gondán Cabrera.

I. ERANSKINA

Aldi baterako kontrataziorako eskabidea. Hautaprobetan onartua izateko eskabidea (PDFa).

II. ERANSKINA

1. gaia.–6/1990 Foru Legea, Nafarroako Toki Administrazioari buruzkoa. Atariko titulua: Xedapen orokorrak I. Titulua: Nafarroako toki entitateen antolaketa eta administrazioa. Lehenbiziko kapitulua. Udalerriak. Xedapen orokorrak eta udal antolaketa.

2. gaia.–Estatuaren legedia orokorra, Nafarroako toki entitateei aplikatzekoa dena: 7/1985 Legea, apirilaren 2koa, Toki Araubidearen Oinarriak arautzen dituena, I. titulua: Xedapen orokorrak; II. titulua: Udala; V. titulua, I. kapitulua: Toki entitateen funtzionamenduaren araubidea.

3. gaia.–6/1990 Foru Legea, Nafarroako Toki Administrazioari buruzkoa. IX. titulua, I. kapitulua: Nafarroako Toki Administrazioko prozedura eta araubide juridikoa, xedapen orokorrak, erabakiak eta ebazpenak, erregelamenduak, ordenantzak eta bandoak.

4. gaia.–39/2015 Legea, urriaren 1ekoa, Administrazio Publikoen Administrazio Prozedura Erkideari buruzkoa. I. titulua. Prozeduretako interesdunak.

5. gaia.–39/2015 Legea, urriaren 1ekoa, Administrazio Publikoen Administrazio Prozedura Erkideari buruzkoa. II. titulua. Administrazio publikoen jarduera. Jarduketa arauak.

6. gaia.–39/2015 Legea, urriaren 1ekoa, Administrazio Publikoen Administrazio Prozedura Erkideari buruzkoa. III. titulua. Egintza administratiboak. Egintza administratiboen betebeharrak. Egintzen eraginkortasuna.

7. gaia.–39/2015 Legea, urriaren 1ekoa, Administrazio Publikoen Administrazio Prozedura Erkideari buruzkoa. IV. titulua. Administrazio prozeduren xedapen orokorrak. Bermeak. Prozeduraren abiaraztea, antolamendua, instrukzioa eta amaiera.

8. gaia.–Nafarroako Toki Ogasunei buruzko martxoaren 10eko 2/1995 Foru Legea. II. titulua: Udal zergak.

9. gaia.–251/1993 Legegintzako Foru Dekretua, abuztuaren 30ekoa, Nafarroako Administrazio Publikoen Zerbitzuko Langileen Estatutuaren Testu Bategina onesten duena. I. titulua: Xedapen orokorrak. II. titulua: Funtzionario publikoak. Hautapena. Funtzionario izaera eskuratzea eta galtzea. Mailak eta graduak.

10. gaia.–Windows 10 sistema eragilea: blokeo-pantaila; mahaigaina eta bere elementuak; “hasi” menua; tresna-barra; jakinarazpenen eremua; mahaigain anitzekin lan egitea; Start Screen; kontrol-panela; sistemaren informazioa aurkitzea; fitxategiak, karpetak eta liburutegiak; erabiltzaile kontuak kudeatzea; Windows 10 pertsonalizatzea.

11. gaia.–Word 2010 testu-prozesadorea: lan eremua; eragiketak dokumentuekin; testuarekin lan egitea; formatua; orrialdearen diseinua; taulak; irudiak; estiloak; loturak txertatu; goiburuak eta orri-oinak lantzea; edukien aurkibidea; ilustrazioak lantzea; korrespondentzia konbinatzea; eremuekin lan egitea; inprimaketaren konfigurazioa.

12. gaia.–Excel 2010 kalkulu-orria: lan eremua; eragiketak liburu eta orriekin; formatuak; eragiketak gelatxoekin eta gelatxo multzoekin; formulak; oinarrizko funtzioak eta aurreratuak; grafikoak; datuekin lan egitea excel-en; plantillak erabili eta sortzea; taula dinamikoak; inprimaketaren konfigurazioa.

13. gaia.–Access 2010 datu basea: Oinarrizko elementuak; taulak; kontsultak; inprimakiak; txostenak; kanpoko datuak estekatzea, inportatzea eta esportatzea.

14. gaia.–Interneti eta posta elektronikoari buruzko kontzeptu oinarrizkoak.

Oharra: Zein egunetan argitaratzen den deialdia Nafarroako Aldizkari Ofizialean, egun horretako legeriaren arabera eskatuko dira gai guztiak.

Iragarkiaren kodea: L1711360