198. ALDIZKARIA - 2017ko urriaren 13a

1. NAFARROAKO FORU KOMUNITATEA

1.4. DIRU-LAGUNTZAK, LAGUNTZAK ETA BEKAK

848/2017 EBAZPENA, urriaren 9koa, Unibertsitateen eta Hezkuntza Baliabideen zuzendari nagusiak emana, unibertsitateko ikasketak eta derrigorrezko ikasketen ondoko unibertsitatez kanpoko ikasketak egiten dituzten ikasleendako beken deialdi orokorra onesten duena, 2017-2018 ikasturterako.

Nafarroako Gobernuak irailaren 20an hartutako erabakiaren bidez, baimena eman zitzaion Unibertsitateen eta Hezkuntza Baliabideen zuzendari nagusiari unibertsitateko ikasketak eta derrigorrezko ikasketen ondoko unibertsitatez kanpoko ikasketak egiten dituzten ikasleendako beken deialdi orokorra onesteko, 2017-2018 ikasturterako. Deialdiak 4.334.104,00 euroko zenbatekoa du.

Ikusirik, Departamentu honetako Baliabide Ekonomikoen Zerbitzuko zuzendariak 2017-2018 ikasturteko beketarako deialdi orokorrari dagokionez aurkeztutako txostena.

Nafarroako Foru Komunitateko Administrazioari buruzko abenduaren 3ko 15/2004 Foru Legearen 22.1 d) artikuluak ematen dizkidan ahalmenak erabiliz,

EBATZI DUT:

1. Unibertsitateko ikasketak eta derrigorrezko ikasketen ondoko unibertsitatez kanpoko ikasketak egiten dituzten ikasleendako beken deialdi orokorra onestea, 2017-2018 ikasturterako. Ebazpen honen eranskin bakarrean ageri da testua.

2. Deialdi honen gastua 4.334.104,00 eurokoa izanen da eta finantzatuko da 2018ko gastuen aurrekontuan 2017ko gastuen aurrekontuko 410002 41140 4800 323100 kontu-sailaren baliokide sortuko den kontu-sailaren kargura, betiere kreditu egokia eta nahikoa badago. Kontu-sail horren izena “Erdi eta Goi Mailako Ikasketetarako Bekak eta Laguntzak” da.

3. Ebazpen hau eta eranskina igortzea Ogasuneko eta Finantza Politikako Departamentuak Hezkuntza Departamentuan duen kontu-hartzaile delegatuari, Unibertsitateen Zerbitzuari, Lanbide Heziketaren Zerbitzuari, Hezkuntzako Ikuskapen Zerbitzuari, Antolamenduaren, Orientazioaren eta Aukera Berdintasunaren Zerbitzuari, Ebaluazioaren, Kalitatearen, Prestakuntzaren eta Bizikidetzaren Zerbitzuari, Baliabide Ekonomikoen Zerbitzuari, Ikastetxeen, Finantzaketaren eta Ikasketetarako Laguntzen Atalari eta Kudeaketa Ekonomikoaren Bulegoari, behar diren ondorioak izan ditzaten.

4. Deialdi hau eta eranskina Nafarroako Aldizkari Ofizialean argitara daitezela agintzea.

Iruñean, 2017ko urriaren 9an.–Unibertsitateen eta Hezkuntza Baliabideen zuzendari nagusia, Nekane Oroz Bretón.

ERANSKINA

Derrigorrezko ikasketen ondoko unibertsitatez kanpoko ikasketak eta unibertsitateko ikasketak egiten dituzten ikasleendako beka eta laguntza deialdi orokorra, 2017-2018 ikasturterako. Deialdia ondorengo oinarriek erregulatuko dute, eta horiek nahitaez bete beharko dira

1. oinarria.–Deialdiaren xedea.

1.1. Nafarroako Gobernuak ikasketetarako ematen dituen beka eta laguntzak Hezkuntza, Kultura eta Kirol Ministerioak edo Eusko Jaurlaritzak dei egindakoen osagarri dira.

1.2. Nafarroako Parlamentuak 2018. urterako aurrekontuan ezartzen duen kreditua izanen da deialdi honen muga, deialdi honen bidez araututako beka eta laguntzak onartu eta ordaintzeko. Hori horrela, ematen diren beka guztiak ordaintzeko aurrekontu krediturik aski ez badago, familiaren per capita errenta erabilgarriaren arabera ordainduko dira, txikienetik handienerako ordenan, kreditua bukatu arte. Kreditu ezagatik ordaindu ezin diren eskaerak ukatutzat hartuko dira.

2. oinarria.–Deialdian sartzen diren ikasketak.

2.1. Deialdi honetan sartzen diren beka edo laguntzak ondoko ikasketa hauetarako eman daitezke:

A.–Espainiako unibertsitate sistemako unibertsitate ikasketak, zentro espainiarretan egiten direnak, lurralde nazional osoan baliodunak:

–Europako Goi Mailako Hezkuntzaren Esparruari egokitutako unibertsitate ikasketak, graduko eta masterreko titulu ofizialak lortzeko direnak.

–Unibertsitate ikasketak, titulu ofizial hauek lortzeko direnak: lizentziaduna, ingeniaria, arkitektoa, diplomaduna, irakaslea, ingeniari teknikoa eta arkitekto teknikoa.

–Unibertsitatean sartzeko 25 urtetik gorakoendako eta 45 urtetik gorakoendako prestakuntza ikastaroa, UHUNek emana.

–Heziketa osagarria, master tituluan sartzeko edo hura eskuratzeko eta gradu titulua eskuratzeko kreditu osagarriak lortzeko, edo lizentziako ikasketa ofizialetan segitzeko (gradura egokitzeko ikastaroak).

B.–Espainiako hezkuntza sistemako derrigorrezko irakaskuntzaren ondoko ikasketak eta goi mailakoak, unibertsitatetik kanpokoak, lurralde nazional osoan baliodunak.

–Lanbide Lantegiak eta Oinarrizko Lanbide Heziketa.

–Erdi eta goi mailako heziketa zikloak.

–Batxilergoa.

–Kirol ikasketak.

–Arte irakaskuntza profesionalak.

–Goi mailako Arte Ikasketak.

–Goi mailako Erlijio ikasketak.

–Hizkuntza eskola ofizialetan egindako hizkuntza ikasketak.

2.2. Honelakoetan ez da laguntzarik emanen.

a) Ez da bekarik edo laguntzarik emanen maila bereko bigarren titulazioa eskuratzeko, edo goi mailako heziketa zikloko lehen ikasmaila egiteko, baldin eta inor unibertsitate ikasketen lehen ikasmailan bekaduna izan bada, ezta ikasketak aldatzeko ere, mailetan edo ikasmailetan gora egiten ez bada, salbu eta Batxilergoko 2. ikasmaila gainditu ondoren goi mailako heziketa zikloak ikasten hasten direnak.

b) Ikasketa hauetarako ez da ez bekarik ez laguntzarik emanen: unibertsitateko hirugarren zikloa edo doktoregoa, espezializazio ikasketak, karrera bukaerako lana edo proiektua, unibertsitateetako berezko tituluak, Haur Hezkuntza, Lehen Hezkuntza edo Derrigorrezko Bigarren Hezkuntza.

c) Ikasleei ez zaie irakaskuntzarako bekarik emanen ikasten ari badira Lanbide Heziketa, Batxilergoa edo erdi mailako beste ikasketa bat titulartasun publikoa duten ikastetxeetan, ikastetxe pribatu itunduetan edo erabat diruz lagundukoetan eta Nafarroako Gobernuaren diru-laguntza berariazkoa duten ikastetxeetan.

d) Hizkuntza Eskola Ofizialetako ikasketetan, ikasketa osagarriak direnez, laguntzak bakar-bakarrik irakaskuntza edo matrikula kontzeptuengatik emanen dira.

e) Orobat, ez da bekarako aukerarik izanen atzerriko unibertsitate sistemetako titulazioei dagozkien unibertsitate ikasketak egiteko.

3. oinarria.–Ikasketak zein ikastetxetan egin beharko diren.

3.1. Beka edo laguntza eskatzen duten ikasleek beren ikasketak Espainiako ikastetxe publiko nahiz pribatuetan egin beharko dituzte, Hezkuntza, Kultura eta Kirol Ministerioak edo behar den autonomia erkidegoak aitortu eta baimenduetan.

3.2. 2017-2018ko ikasturtean lehen mailan matrikulatzen diren ikasleek ez dituzte jasoko beka edo laguntzak, baldin eta ikastetxe publiko, itundu edo diruz lagundutako batean edota familiaren etxetik hurbil egoteagatik aipatu beka edo laguntzen beharrik ez duen ikastetxe batean ikasketak egiteko aukera izanik besteren batean matrikulatzen badira, salbu eta Nafarroako Unibertsitatean lehen ikasmailan hasten diren ikasketei dagokienez 9.4.1.1.b) oinarrian jasotzen den kasuan, baita oso inguruabar bereziak gertatzen direnetan, interesdunak agiri bidez frogatzen baditu eta Beken Batzordeak baloratu.

3.3. Edonola ere, unibertsitatez kanpoko ikasketetarako beka eta laguntzek martxoaren 13ko 150/1996 Foru Dekretuan ezarritakoa bete beharko dute. Dekretu horrek Nafarroako Foru Komunitateko ikastetxeen sarea berrantolatzeko arauak eman zituen martxoaren 13ko 69/1995 Foru Dekretua aldatu zuen.

3.4. Zehazki, Foru Komunitatetik kanpoko ikastetxe batean matrikulatzen den ikasleari kasu hauetan bakarrik ematen ahal zaio beka edo laguntza:

a) Nafarroako Unibertsitate Publikoan beka edo laguntzaren xede diren ikasketak egiteko tokia eskatu, baina eman ez bazaio, titulazioa edozein dela ere.

b) Ikaslea matrikulatu den ikastetxea hurbilago baldin badago bere etxetik Foru Komunitatean kokatuta daudenak baino.

c) Kasuan kasuko ikasketak ez badira eskaintzen Nafarroako Unibertsitate Publikoan.

d) Euskaraz ematen diren ikasketak badira eta Foru Komunitatean eskaintzen ez direnak.

3.5. Kasu guztietan, Nafarroako Foru Komunitatetik kanpoko ikastetxeetan egiten diren goi mailako ikasketetarako, kontzeptu bakoitzean ez da zenbateko handiagoko beka edo laguntzarik emanen baldin eta Foru Komunitateko ikastetxe batean eginez gero baino garestiago ateratzen bada.

4. oinarria.–Onuradunak, eta eskatzaileak eta familia unitateko gainontzeko kideek bete beharreko baldintza orokorrak.

4.1. Honako hauek izanen dira ikasteko beka edo laguntzen eskatzaile eta balizko onuradun, kasu guztietan:

a) Gurasoak edo legezko tutoreak, honako hauek eginiko ikasketengatik:

–30 urtetik beherako seme-alabek (2016ko abenduaren 31n).

–30 urtetik goitiko seme-alabengatik (2016ko abenduaren 31n), %33ko edo hortik goitiko desgaitasuna badute.

Betiere seme-alabak haiekin bizi badira eta beste familia unitate bat osatu ez badute.

b) Beren izenean, aurreko a) letran sartzen ez direnak.

4.2. Eskatzaileak edozein egoera zibil duela ere, familiatik aparte eta bere kontu bizi dela alegatzen badu, modu sinesgarrian frogatu beharko du aparte bizitzeko baliabide ekonomiko aski dituela, eta bizitegiaren titulartasuna edo alokairua ere bai. Etxebizitza hori ikasturtean zehar ikaslearen bizileku dena izan beharko da, deialdi honen ondorio guztietarako. Udalak emandako erroldatze eta bizikidetza ziurtagiria, 2016. urteari dagokiona, aurkeztu beharko du.

Beren kontu bizi diren ikasleek ez dute bizitegirako laguntzarako eskubiderik.

Eskaera zehatz-mehatz aztertuko da, eskatzailearen eta familia unitatean kontuan hartzen ahal diren gainerako kideen errenta eta benetako egoera egiaztatuz, baita behar dituen baliabide ekonomikoak irabazi-asmorik gabe ematen dizkionaren dohaintzak ere. Kontu horiek 2016ko abenduaren 31ko datarekin aski frogatzen ez badira, eskaera ukatu eginen da.

4.3. Eskatzaileak eta familia unitatean kontuan hartzen ahal diren gainerako kideek baldintza hauek bete beharko dituzte:

A. Nafarroan erroldatua egon eta bertan bizitzea 2016. urtean eta gaur egun ere (eskaera aurkezteko epea bukatzen den unean).

B. 2016. urtean Nafarroako P.F.E.Z.ren zergadun izatea, errenta aitortzera behartua badago.

Ikasleak bere zerga betebeharrak eguneraturik izan behar ditu Foru Komunitateko Administrazioarekin.

4.4. Familia unitatean kontuan hartzen ahal den kideren batek 2017ko urriaren 31n aurreko ikasturteetako beka edo laguntzen zenbatekoak itzultzeke baditu, ez da beka edo laguntzarik emanen.

4.5. Beka edo laguntza norendako eskatzen den, ikasle horrek deialdian aipatutako ikasketak adierazi diren ikastetxeetan egin behar ditu.

4.6. Nahitaezko baldintza da, horretarako betebeharrak betetzen badira, 2017-2018 ikasturterako beka eskatu izana Hezkuntza, Kultura eta Kirol Ministerioari edo Eusko Jaurlaritzari. Hezkuntza, Kultura eta Kirol Ministerioak edo Eusko Jaurlaritzak ez badute beka eman, Hezkuntza Departamentuak ere ez du emanen ukapena arrazoi hauetariko batengatik izan bada:

a) Deialdi horietan agiriak aurkezteko epeak ez betetzea.

b) Eskabideko oinarrizko datuak ez betetzea edo lehiaketa erabaki ahal izateko beharrezkoa diren agiriak, eskatu bazaio ere, ez aurkeztea.

c) Baztertua izateagatik.

Galdatutako betebehar akademikoak ez betetzeagatik eskatu ez bada, horren egiaztagiriak aurkeztu beharko dira. Bestela, beka automatikoki ukatuko da.

Hezkuntza, Kultura eta Kirol Ministerioko eta Eusko Jaurlaritzako deialdiak ebazteko, haietan zehazten diren oinarri arautzaileak aplikatzen dira eta, bereziki, errenta zehazteko haien zerga araubidea erabiltzen dela.

4.7. Ezin da ikasturte berean beste ikasketa batzuetarako beste bekarik eskatu.

4.8. Finantzabidearen helburua zein den, horrexetarako izan behar da beka edo laguntza: ikasgelara joateko, azterketetara aurkezteko eta laguntzaren xedeko gastuak ordaintzeko, halakorik bada.

4.9. Ikaslea bera ez bada, onuraduna izaten ahalko da, Diru-laguntzei buruzko azaroaren 9ko 11/2005 Foru Legearen 13.2 e) artikuluan ezartzen diren baldintzak bete gabe ere.

5. oinarria.–Ematen diren beka edo laguntza motak.

5.1. Deialdi honetako beka edo laguntzen xedea izanen da premia duten familiei laguntza ematea, familiako kideen ikasketa gastuen zati bat ordaintzeko.

5.2. Beka edo laguntzak honako kontzeptu hauetarako eskatzen ahalko dira:

–Irakaskuntza edo matrikula.

–Hiriarteko garraioa.

–Jantokia.

–Bizitokia.

–Laguntza berezia (kasu bakanetan bakarrik, ikus 9.4.7 oinarria).

–Espediente akademikoa (ikus 9.4.8 oinarria).

Garraiorako, jantokirako eta bizitegirako beka edo laguntzen ondorioetarako, familiaren etxetzat har daiteke ikastetxetik hurbilen dagoena, legezko helbidea ez bada ere.

Zehazki, deialdiko beka eta laguntzen ondorioetarako, familiaren etxetzat hartuko da familia unitateko edozein kidek ikastetxetik hurbilen duena, haren titularra bada.

Bizitegirako laguntza bateraezina da garraioari eta jantokiari dagozkienekin, baita Nafarroako Gobernuak antolatutako unibertsitateko garraioari dagokionarekin ere. Garraiorako eta jantokirako laguntzak bateraezinak dira bizitegirako zeinahi laguntza eskaerarekin.

Garraiorako eta jantokirako laguntzen zenbatekoen batura ezin da bizitegirako laguntzaren zenbatekoa baino handiagoa izan; salbuespenez, 9.4.2 oinarriaren bigarren lerroaldean sartzen diren ikasleei ematen zaien zenbatekoa muga horren %10eraino handitzen ahalko da.

6. oinarria.–2.1.B oinarrian sarturik dauden ikasketetarako baldintza akademikoak, salbu eta goi mailako arte ikasketak eta goi mailako erlijio ikasketak.

6.1. Unibertsitatez kanpoko ikasketetarako beka edo laguntza lortzeko ezinbestekoa da eskatzaileak 2017-2018 ikasturterako ikasmailaz edo mailaz igotzea, indarra duten ikasketa planen arabera.

Ikasketa hauen lehen ikasmailaren kasuan, ikasmaila horretan matrikulatuta egoteko baldintzak betetzea.

Irakasgai edo lanbide moduluren bat gainditu ez arren, ikasmailaz igotzea onartzen duten unibertsitatez kanpoko ikasketetako ikasmailetan arituz gero, beka emanen da, baldin eta irakasgai bat edo lanbide modulu bat baino gehiago gainditu gabe uzten ez bada.

Irakasgairen bat edo modulu profesionalen bat gainditu gabe edukiz gero eta aurreko arauek ikasleari beka edo laguntza lortzeko bide ematen badiote, haren zenbatekoa %70era gutxituko da eskubidea sortzen duten kontzeptu guztietan, eskatzailearen per capita errenta tartearen arabera.

6.2. Ikasmaila errepikatzen ari diren ikasleei ez zaie bekarik emanen.

6.3. Ikasleek ikasmaila osoei dagozkien irakastorduen matrikula egin beharko dute, kasu bakoitzean indarra duen ikasketa planaren arabera, salbu eta Urrutiko Batxilergoaren ikasketa ofizialetako ikasleek, aurrez lehen ikasmaila osoan matrikulaturik egon badira eta, beraz, irakasgai solteetako matrikula egin badezakete. Beka erdietsi ahal izateko, gutxienik lau irakasgaitan matrikulatu beharko dute, eta horiek osorik gainditu.

6.4. Ikasturteren bat ikasketarik egin gabe iragan baldin bada, 2016-2017 ikasturterako adierazten diren baldintzak ikasleak egindako azken ikasturtean betetzea eskatuko da.

6.5. Bekadun gisa osoki edo partzialki egindako ikasketen kasuan, ezin izanen da beka edo laguntzarik lortu ikasketak aldatu badira, aldaketa horrek hezkuntza prozesuan ikasturte bat edo gehiago galtzea baldin badakar, 2.2 oinarrian xedatutakoa izan ezik.

7. oinarria.–Baldintza akademikoak, 2.1.A oinarrian sarturik dauden ikasketetarako, eta goi mailako arte ikasketetarako eta goi mailako erlijio ikasketetarako.

7.1. Beka zein ikasketetarako eskatzen duten, horien aurreko ikasketen titulu baten jabe direla frogatu behar dute lehen ikasmailarako beken eskatzaileek, sarbidea izan ahal izateko.

Master ofizialetako ikasketetako lehenbiziko mailarako beka eskatzen dutenek frogatu beharko dute 6,50 puntuko batez besteko nota dutela masterra egiteko aukera ematen dioten unibertsitate ikasketetako espediente akademikoan. Masterrak lanbide arautu batean jarduteko gaitzen badu, batez besteko nota 6,00 puntukoa izanen da. Horretarako, irakaskuntza teknikoetako ikasketen batez besteko notak 1,17 koefizientearekin biderkatuko dira.

Masterra egiteko aukera bigarren ziklokoak bakarrik diren titulazioak gainditzeari esker lortu bada, batez bestekoa kalkulatzeko, aurretik egindako lehen zikloko kalifikazioak ere hartuko dira kontuan.

Zenbakizko kalifikaziorik ez dagoenean, arau hauek aplikatuko dira masterrean sarbide izateko batez besteko nota kalkulatzeko:

a) Kalifikazioak baremo honen arabera kontatuko dira:

Ohorezko matrikula (bikain eta aipamena) = 10 puntu.

Bikain (9-10 puntu) = 9 puntu.

Oso ongi (7-8,9) = 7,5 puntu.

Nahikoa edo gai (5-6,9) = 5,5 puntu.

Irakasgaien arabera antolaturiko ikasketa planak izanez gero, batez besteko nota kalkulatuko da guztira lorturiko puntuak irakasgai guztien artean zatituz.

Kredituen arabera antolatutako ikasketa planen kasuan, irakasgai bakoitzari aurreko baremoa aplikatu eta gero lortzen den puntuazioa haztatuko da irakasgaiaren kreditu kopurua kontuan hartuta, formula honi jarraikiz:

B = (P x IKK) / EKK

B = Irakasgai bakoitzean lortutako notaren haztapenaren balioa.

P = Irakasgai bakoitzaren puntuazioa, aurreko puntuko baremoa kontuan hartuta.

IKK = Irakasgaiaren kreditu kopurua.

EKK = Eginiko kreditu kopurua, ebazpen honen arabera kontuan hartzen ahal dena.

Formula horren aplikazioaren ondoriozko balioak batu eginen dira. Horren emaitza izanen da azken batez bestekoa.

b) Baliozkotu, egokitu eta parekatutako irakasgai edo kredituak emanen dira abiapuntuko ikastetxean lortutako kalifikazioari dagozkion puntuetan. Kalifikazio hori ez dagoenean nahikotzat joko da (5,5 puntu).

c) Kalifikaziorik ez daukaten irakasgai eta kreditu aitortuak ez dira espedientean sartuko.

d) Atzerriko unibertsitateetatik datozen espedienteen batez besteko nota kalkulatzeko, Espainiako hamartar sistemara egokituko da, irakasgaiz irakasgai, kontuan hartuz jatorrizko kalifikazioan gainditzeko behar den gutxieneko nota eta gehieneko nota eta horren arabera Espainiako hamartar kalifikazioko sisteman dagokiena.

e) Masterreko lehenbiziko maila egin behar duten ikasleen batez bestekoaren ziurtagiriak egitean, unibertsitateek irailaren 5eko 1125/2003 Errege Dekretua hartu beharko dute kontuan. Dekretu horrek ezartzen ditu kredituen Europako sistema eta kalifikazioen sistema, lurralde nazional osoan balio duten unibertsitateko titulazio ofizialetan.

7.2. Bigarren ikasmailarako beka eskatzen dutenek honako hauek frogatu beharko dituzte:

a) Graduetarako: Ingeniaritza eta Arkitektura ikasketetan, ekain eta iraileko deialdien artean 2016-2017ko ikasturtean matrikulatutako kreditu guztien %70 gutxienik gainditzea, eta gainerakorako %80 gutxienik gainditzea.

Kasu guztietan, deialdiren batean ikasleak azterketa egiteari uko egiten badio, irakasgai horiek gainditu gabeko irakasgaitzat hartuko dira.

b) Masterretarako: lehenbiziko ikasmailan matrikulatutako kreditu guztiak gainditu dituztela frogatu beharko dute.

7.3. Beka lortu ahal izateko, eskatzaileek 2017-2018 ikasturtean 60 kreditutan matrikulatuta egon beharko dute, hau da, denbora osoko ikasketetan aritu beharko dute.

Ikasketa planak modu homogeneoan egituratzen ez direnean 60 kredituko ikasmailetan, 2017-2018 ikasturtean ikasleak matrikulatu beharko du, gutxienik, ikasketa plana osatzen duten kredituen kopuruan, alde batera utzita hautapen libreko irakasgaien kredituak. Betiere, urte kopuru horrek bat etorri behar du Unibertsitate ikasketa ofizialen antolamendua ezartzen duen urriaren 29ko 1393/2007 Errege Dekretuan ezarritakoarekin (260. Estatuko Aldizkari Ofiziala, urriaren 30ekoa).

Matrikulan aldaketarik egin edo hura zabalduz gero, dokumentu bidez frogatu beharko da Hezkuntza Departamentuko Baliabide Ekonomikoen Zerbitzuan (Bekak, beheko solairuan).

7.4. Hala ere, ikasturte batean 30etik gorako eta 60tik beherako kreditutan matrikulatuta dauden ikasleek ere jaso dezakete beka. Deialdi honen ondorioetarako, egoera honi matrikula partziala erranen zaio, eta arau hauek aplikatuko dira:

–Matrikula partziala aukeratzen dutenek, eskura dituzten kreditu guztietan matrikulatu ez badira, matrikularako eta garraiorako laguntza jaso dezakete bakarrik.

–Gainera, kreditu horiek lauhileko/seihileko bakar batean egiten badira, bekaren zenbatekoa ondokoa izanen da: garraio kontzeptua badagokio, haren %50, gehi matrikula kontzeptua (kasu honetan ez da aplikatuko %50eko murrizketa).

–Hurrengo ikasturtean beka mantentzeko, matrikulatutako kreditu guztiak gainditu beharko dituzte.

7.5. Matrikula seihilekoa edo lauhilekoa duten ikasketa planen kasuan, beka lortu ahal izateko, aurreko atalean ezarritako kreditu kopuruaren %50ean matrikulatu beharko dute ikasleek. Hala ere, hurrengo lauhilekoan edo seihilekoan matrikula osatu beharko dute, 3. puntuan adierazitako kreditu kopurura iristeko. Matrikulan aldaketarik egin edo hura zabalduz gero, dokumentu bidez frogatu beharko da Hezkuntza Departamentuko Baliabide Ekonomikoen Zerbitzuan (Bekak, beheko solairuan).

7.6. Gutxieneko kreditu kopuruan baino gehiagotan matrikulaturik badago, denak hartuko dira kontuan ebazpen honetan ezarritako baldintza akademikoak baloratzeko.

Hori deusetan ukatu gabe, baloratu eta aintzat hartzen ahalko da ikaslearen aprobetxamendu akademiko aparta, kasuan kasuko ikasketa planak ezarritako urte kopurua baino denbora laburragoan egiten baditu bere ikasketak.

7.7. Ikasketa planek edo unibertsitateko araudiak mugatzen badute ikaslea matrikula daitekeen kredituen kopurua, ikasleak beka lor dezake baldin eta ahal duen irakasgai edo kreditu guztietan matrikulatzen bada, aurreko puntuetan aipatutako gutxieneko kopurura iristen ez bada ere. Egoera hori agiri bidez frogatu beharko da.

7.8. Ikasleak 2017-2018 ikasturtean matrikulaturik egon behar duen irakasgai edo kredituen gutxieneko kopurua, aurreko ataletan finkatutakoa, ez zaie karrerako azken ikasmaila egiten ari direnei eskatuko, karrera bukatzeko falta zaizkien kredituengatik, aurreko ikasmailako edo ikasmailetako aprobetxamendu akademiko hobea dela kausa matrikulatutako gutxieneko irakasgai edo kreditu kopuru hori ez badute. Horregatik ez bada, 2017-2018 ikasturtean matrikulaturiko irakasgai edo kredituek izan beharko dute gutxienez ere beka lortzeko oro har behar direnen %50.

7.9. Aurreko ataletan aipatutako gutxieneko horietan ez dira inola ere sartuko espezialitate desberdinetako irakasgaiak, ez kasuan kasuko titulua eskuratzeko behar den kreditu kopurua gainditzen duten irakasgaien kredituak, ez eta irakasgai edo kreditu aitortuak, baliozkotuak, egokituak, transferituak edo antzekoak ere.

7.10. Ikasketa planak zenbat ikasmaila dituen, horrenbeste deialditan baizik ez da beka lortzen ahalko, salbu eta unibertsitateko graduko ikasleek, deialdi bat gehiagotan egiten ahalko baitute. Urte gehigarri horretan bekaren zenbatekoa legokionaren %50ekoa izanen da, matrikula kontzeptuagatik emanen den beka izan ezik, kasu horretan bere errenta mailaren arabera legokionaren %100ekoa izanen baita. Master ofizialen ikasketen kasuan, ulertuko da 60 kreditu baino gehiagoko eta 120 kreditu baino gutxiagoko ikasketa planek urte eta erdi dirautela. Kasu horretan, bigarren urteko bekaren zenbatekoa deialdian xedatutakoari jarraikiz bidezko izanen zatekeenaren %50 izanen da, matrikularako beka izan ezik, hori bere errenta mailaren arabera egokituko litzaiokeenaren %100 izanen baita.

7.11. UHUNek hogeita bost urtetik goitikoak unibertsitatera sartzeko antolatzen duen prestakuntza ikastaroa egiten duten ikasleek urte bakarrean izaten ahalko dute ikastaro horretarako beka.

7.12. Presentziala ez beste modalitate bateko graduko ikasketak egiten dituztenek matrikularako laguntza eskuratzen ahalko dute. Hurrengo ikasturtean beka mantentzeko, matrikulatutako kreditu guztiak gainditu beharko dituzte, edo oinarri honetan oro har ezarritako ehunekoa, ikasmaila osoko matrikula egin bada.

7.13. UHUNen egiten diren gradu eta/edo master ikasketetan, ikasleek 30 kreditutan matrikulatu beharko dute gutxienez. Hurrengo ikasturtean beka jaso nahi izanez gero, kreditu guztiak gainditu beharko dituzte. Egoera hau ez da matrikula partzialtzat hartuko. Ikasmaila osoko matrikula egin bada, oinarri honetan oro har ezarritako ehunekoa gainditu beharko da hurrengo ikasturtean beka mantentzeko.

7.14. Beka edo ikasketarako laguntza lortzen duten goi mailako ikasleei, 2016-2017 ikasturtetik irakasgai edo kredituren bat gainditu gabe gelditu bazaie matrikulatuta zeudenetarik, eta betiere denbora osoko ikasleak badira (ikus 7.3 oinarria), bakarrik %70 ordainduko zaie eskubidea duten kontzeptu guztietan, eskatzailearen errentaren tartearen arabera.

7.15. %65eko edo hortik gorako desgaitasun legez aitortua duten ikasleek beren irakastorduen kopurua %50era arte murrizten ahalko dute, eta artikulu honetako aurreko ataletan ezarritako gutxienekoak hein berean murriztuko dira. Beka berritzen ahalko dute matrikulatuta dituzten kredituen %50 gainditzen badute.

%65eko edo hortik gorako desgaitasun legez aitortua izan eta eskola orduen kopurua murriztea erabaki duten bekadunek kasuan kasuko ikasketa planak ezarritako iraupena baino bi urte gehiagotan lortzen ahalko dute beka, Ingeniaritza edo Arkitekturako ikasketen kasuan izan ezik, horietan epe hori lau urtekoa izanen baita.

Ikasleak ez badu matrikula murriztua egiteko eskubidea erabiltzen eta oro har ezarritako kreditu kopuru osoan matrikulatzen bada, dagozkion beken zenbatekoak %50 handituko dira, matrikula kontzeptuagatik ematen denarena izan ezik.

Ikasle hauek matrikula murriztua aukeratzen badute, ez zaie aplikatuko matrikula partzialaren kasuetan ezartzen den zenbatekoen muga.

7.16. Titulazio bikoitzak ikasten ari direnendako, bi titulazioak jakintza arlo berekoak ez badira, beka lortzeko behar den errendimendu akademikoa izanen da eskakizun akademiko txikiena duen arlorako ezarritakoa.

Ikasketa planaren ikasmailak zenbat, horrenbeste urtetan eskuratzen ahalko da beka. Hala ere, titulazio bat (edo biak) Arkitektura eta Ingeniaritza/Ikasketa teknikoak arlokoa bada, urte bat gehiago izaten ahalko da beka.

8. oinarria.–Betebehar ekonomikoak.

Honako hauek dira eskatzen diren betebehar ekonomikoak:

8.1. Ikasketarako beka edo laguntza hartu ahal izateko, familiaren errenta erabilgarriaren eta familiaren ondarearen atalasea hartuko da kontuan, deialdiaren 8. eta 9. oinarrietan xedatu bezala.

8.2. Familiaren errenta erabilgarria.

a) Familia unitatea zer den.

Bekarako, familia unitateko kide hauek hartuko dira kontuan: ikaslea, haren aita eta haren ama edo, bidezko bada, tutorea edo ikasle adingabea zaindu eta babesten duen pertsona, eta senide ezkongabeak, 2016ko abenduaren 31n 30 urtetik beherakoak badira eta egun horretan familiaren etxean bizi baziren, edo zaharragoak, legez %33ko edo hortik gorako legezko desgaitasun aitortua badute.

Gurasoak bereiziak edo dibortziatuak badira, beka norendako eskatzen den, ikasle horrekin bizi ez dena, aita edo ama, ez da kontuan hartzen ahal den kidetzat hartuko.

Alargunak edo dibortziatuak berriz ezkonduz gero, ezkontide berria familia unitateko kidetzat hartuko da ondorio guztietarako. Bikote egonkorra eratuz gero berdin jokatuko da.

Seme-alabak zaintzeko araubidea zaintza partekatua delarik, kontuan hartzen ahal diren kideak izanen dira beka eskuratu behar duen ikaslearen aita eta ama, eta elkarrekin izan dituzten seme-alabak, aurrekoen bizitoki berean bizi direla frogatzen badute dagokion udal ziurtagiriaren bidez.

Beka eskuratu behar duen ikaslea harreran dagoen adingabea bada, aurreko paragrafoetan xedatu dena aplikatuko zaio harrerako familiari.

Adinez nagusia bada, familia unitatean integratu gabetzat hartuko da ondorio horietarako.

Ikaslea ezkondua bada edo bikote egonkorra eratu badu, familia unitatea eurek osatuko dute, bai eta aipatu diren adinaren, bizikidetasunaren eta desgaitasunaren gaineko baldintzak betetzen dituzten seme-alaba ezkongabeek ere, horrelakorik badute. Kasu horretan, eskatzailea bere kontu bizi dela ulertuko da, eta 4.1.b) eta 4.2 oinarriak aplikatuko dira.

Deialdi honen ondorioetarako familia unitatean kontuan hartzen ahal diren kideek 4.6 oinarrian aipatzen den eskaeran sarturik egon behar dute, bertan eskatzen diren baldintzak betez gero.

b) Familia unitateko kide bakoitzaren banakako errenta nola kalkulatu.

Kontuan hartzen ahal diren familia unitateko kideen kasuan, 2016ko PFEZren aitorpena aurkezteko betebeharra badute, hau hartuko da banakako errentatzat:

–Zerga-oinarriaren zati orokorra.

–Ken ezkontidearen alde konpentsazio pentsioagatik ordaindutako kantitateak eta elikatzeko urteko sariak, biak ere epailearen erabakiz ezarriak, eta bikotekide egonkorraren alde ordaindutako kantitate legez galdagarriak.

–Gehi zerga-oinarriaren aurrezkiaren zati berezia, kenduta 2012tik 2015era bitarteko ondareko irabazi eta galeren saldo garbi negatibo guztiak eta aurrezkiaren zerga-oinarrian sartu beharreko 2012tik 2015era bitarteko kapital higigarriaren etekinen saldo garbi negatiboa.

Gehi PFEZaren ondorioetarako salbuetsitzat (*) jotzen diren gainerako errenta eskuratuak, hala nola baliaezintasun iraunkor absolutuko pentsioak edo baliaezintasun handikoak, kalte-ordainak, loteria sariak, aitak edo amak seme-alaben mantenurako ematen dituen urteko sariak, kontuan hartu gabe jasotako ikasketa beka edo laguntzak.

Ondorio praktikoetarako, banakako errenta kalkulatuko da 2016ko ekitaldiko pertsona fisikoen errentaren gaineko zergari dagozkion laukitxoekin eragiketa hauek eginez:

507. laukia - 511. laukia - 822. laukia + 8808. laukia - 8020. laukia - 8100. laukia + 8810. laukia - 8800. laukia - 8830. laukia + 529. laukia (*) Arestian aipatutako errenta salbuetsiak ez dira kontuan hartuko haien batura, familia unitateko kide guztiak kontuan izanda, ez bada 10.000 eurora iristen.

PFEZaren aitorpena egitera beharturik ez dauden familia unitateko kideen kasuan, bakoitzaren errenta honela kalkulatuko da: 2016. urtean eskuratutako diru-sarrera gordinen batura, edozein dela ere beren iturria, barnean sarturik ondasun higiezinak alokatzeagatik jasotako errentak eta enpresa, lanbide eta nekazaritza jardueren ondoriozko etekin garbiak. Ateratzen den zenbatekotik besteren konturako langileen Gizarte Segurantzako kotizazioak kendu beharko dira.

c) Familiaren errenta erabilgarriaren kalkulua.

Familiaren errenta erabilgarritzat hartuko da eskatzailearen eta haren ezkontidearen banakako errentak gehi familia unitateko beste kideen banakako errenten %50, aurreko b) letran adierazi bezala kalkulaturik. Guztira ateratzen den zenbatekoari familia unitatean kontuan hartzen ahal diren kideen 2016ko ekitaldiko pertsona fisikoen errentaren gaineko zergako aitorpenetako aurretiazko kuota diferentziala (578 laukia) kenduko zaio.

8.3. Familiaren errenta erabilgarriaren kenkariak.

Bekaren ondorioetarako familiaren errenta erabilgarria arestian ezarri denaren arabera kalkulaturik, errenta horretatik kontzeptu hauei dagozkien zenbatekoak kentzen ahalko dira:

A.–Familia ugaria:

–Orokorra. Familia unitatean kontuan hartzen ahal den seme edo alaba bakoitzeko, 654 euro.

–Berezia. Familia unitatean kontuan hartzen ahal den seme edo alaba bakoitzeko, 874 euro.

Familia ugariak dira halakoak direnak eta titulu ofizialaren bidez frogatzen dutenak, Familia Ugariak Babesteko azaroaren 18ko 40/2003 Legean ezarritakoaren arabera.

B.–Familia unitateko kideren baten desgaitasun aitortua:

–2.078 euro, %33ko edo hortik goitiko desgaitasun aitortua duen kide bakoitzarengatik.

–3.325 euro, %66ko edo hortik goitiko desgaitasun aitortua duen kide bakoitzarengatik.

C.–Unibertsitateko ikasketak direla eta etxetik kanpo bizi diren bi anai-arreba edo gehiago daudenean:

–1.296 euro egoera horretan dagoen seme edo alaba bakoitzarengatik.

8.4. Alde batera utzita aitzineko zenbakietan xedatutakoaren arabera kalkulatutako familiaren errenta, 2017-2018 ikasturterako beka ukatu eginen da baldin eta gainditzen badira familiaren ondarea adierazten duten atalase hauek:

a) Familia unitateko kide konputagarrien hiri finken katastroko balioen baturak, Nafarroako Foru Komunitateko etxebizitza baten katastroko balioa kenduta, halakorik bada, ezin izanen du gainditu 108.966 euroko kantitatea.

b) Familia unitateko kide konputagarrien landalurreko finken katastroko balioen baturak ezin izanen du gainditu 16.675 euroko kantitatea kide konputagarri bakoitzeko.

c) Kontuan hartzen ahal diren familia unitateko kideen kapital higigarriaren errendimenduen saldo positiboa gehi ondareko irabazi eta galeren saldo positiboaren arteko batura, etxebizitza erosteko edo birgaitzeko jasotako diru-laguntzak kenduta, ezin izanen da izan 2.159 eurotik gorakoa (2016ko ekitaldiko pertsona fisikoen errentaren gaineko zergari dagozkion laukiak: 8810 laukia + 8808 laukia - 708 laukia).

Ondarearen adierazgarri diren elementu horiek 2016ko abenduaren 31n duten balioaren arabera kontatuko dira, Pertsona Fisikoen Errentaren gaineko Zergari buruzko araudian xedatutakoarekin bat.

Era berean, beka ukatuko da egiaztatzen bada familia unitatean kontuan hartzen ahal diren kideen diru-sarrera hauen baturak 449.746 euroko zenbatekoa gainditzen duela, balio erantsiaren gaineko zerga alde batera utzita:

a) Jarduera ekonomikoen ondoriozko diru-sarrerak, zuzeneko zenbatespenaren bidez edo zenbatespen objektiboaren bidez zehaztuak.

b) Nortasun juridikorik gabeko entitateen edo bestelako entitate juridikoen bidez garatutako jarduera ekonomikoetan familiako kide konputagarri guztiek ehuneko berrogeita hamarreko edo hortik gorako partaidetza izateagatik dituzten diru-sarrerak, behin jardueren guztizko diru-sarrerei jarduera horietako partaidetzaren ehunekoa aplikatu ondoren.

Aurreko lerroaldeetan ageri diren elementuen balioaren konputuaren ondorioetarako, familiako edozein kide konputagarrirenak diren elementuen balioaren %50 kenduko da, eusle nagusienak izan ezik.

8.5. Nafarroako Foru Komunitatean zerga arloan aplikagarria den araudiak agintzen duenari men eginen zaio honako kontzeptu hauei dagokienez: oinarri orokorra, berezia, zerga-oinarria, likidazio-oinarria, konpentsazioak, murriztapenak, errenta salbuetsiak, pentsio planak, gizarte aurreikuspeneko sistema alternatiboak, gizarte aurreikuspeneko mutualitateak, atxikipenak, PFEZren konturako ordainketak, aurretiazko kuota diferentziala eta PFEZren aitorpena egin beharra.

Ogasuneko eta Finantza Politikako Departamentuak egindako PFEZaren likidazio behin-behineko edo behin betikorik bada, hori erabiliko da familiaren per capita errenta zehazteko.

8.6. Baldin eta 2016. urteari buruz aitortutako inguruabar ekonomikoak beka edo laguntza aurkezteko datan modu egiaztagarrian eta larrian urritu badira, familia unitateko kide errenta-hartzaileren bat hil delako edo lanerako desgaitasunaren edo langabeziaren egoerara iragan delako, eskatzaileak espresuki adieraziko du eskaeran eta egoera hori frogatzen duten agiriak erantsi beharko dizkio nahitaez, baita 2017. urteko PFEZaren aitorpenaren kopia osoa ere, hura egiten den unean.

Berdin jokatuko da inguruabar ekonomikoen aldaketa gertatzen baldin bada beka eskaera aurkezteko epea bukatu ondoren eta 2017ko abenduaren 31 baino lehen (data horren ondotik gertatzen diren aldaketak ez dira kontuan hartuko ikasturte honetarako); halakoetan, interesdunak eskabide bat aurkeztu beharko du, Baliabide Ekonomikoen Zerbitzuari zuzendua (Bekak, beheko solairua), Hezkuntza Departamentuko Erregistro Orokorrean. (San Domingo aldapa, z.g., 31001 Iruña).

Behin 12. oinarrian berrikuspen eta erreklamazioetarako aipatutako epea amaitutakoan, ez da onartuko 2016. urtearekin alderatuta diru-sarrerak larri urritu direla frogatzeko beste dokumentaziorik.

8.7. Eskatzailea ikaslea bera bada eta bere kargura ahaiderik badu (guraso eta/edo senideak), horiek elementu zatitzaile izanen dira, betiere egoera hori agiri bidez frogatzen baldin badu, eta bere karguko ahaideen diru-sarrerak batu eginen dira errenta kalkulatzeko.

8.8. Edozein errenta-iturri ezkutatzen bada, eskatutako laguntza ukatuko da.

Era berean, Hezkuntza Departamentuko organo eskudunek beka ukatu edo baliogabetu dezakete, baldin eta ikuskapen eta kontrol bidez aurkitzen badute familia unitate batek justifikatzen dituen diru-sarrerak objektiboki beren gastu mailaren oso azpitik daudela, ez badituzte bizitzeko dituzten baliabideak frogatzen.

Bekarako eskaera aurkezteak berarekin dakar Hezkuntza Departamentuari baimena ematea ondareari eta errentei buruz behar dituen datuak Ogasuneko eta Finantza Politikako Departamentuaren bidez eskatzeko eta lortzeko, betiere bekaren ondorioetarako.

9. oinarria.–Beka eta laguntzak hartzea eta haien zenbatekoa.

9.1. Hezkuntza Departamentuak ikasle batengatik beka edo laguntzaren bat ematen badu, eta Hezkuntza, Kultura eta Kirol Ministerioak edo Eusko Jaurlaritzak ere ikasle horri ematen badio edo matrikula ordaintzetik salbuesten badu, Nafarroako Gobernutik bi zenbateko horien guztirako absolutuen arteko aldea bakarrik jasotzeko eskubidea izanen du, aparteko beka eta espediente akademikokoa izan ezik, Nafarroako Gobernuarena beste entitateak emandakoa baino handiagoa baldin bada betiere.

Alde hori kalkulatzeko beste xederik gabe, berdintzat joko dira Hezkuntza, Kultura eta Kirol Ministerioak irakaskuntzagatik ematen duen bekaren zenbatekoa eta Hezkuntza Departamentuarenarena, Nafarroako Unibertsitatean matrikulaturiko ikasleen kasuan izan ezik.

Bien arteko aldea zero bada edo Hezkuntza Departamentuarena txikiagoa bada, nahitaez hautatuko da beste entitateak emandako beka edo laguntza. Alde horren kalkuluan kanpoan geldituko dira Laguntza Berezia eta, halakorik bada, espediente akademikokoa, Departamentuak ematen duena.

9.2. Edozein kontzeptu dela-eta, matrikulak merkeago edo doan ateratzen badira, onura horiek deskontatuko dira irakaskuntza kontzeptuagatik emandako laguntzaren zenbatekotik, salbu eta Nafarroako Unibertsitateko prezioen suspertze planean egiten den deskontua eta familia ugarikoa izateagatik edo ohorezko matrikula ateratzeagatik egiten diren murrizketak.

Nolanahi ere, irakaskuntza kontzeptuagatik emandako zenbatekoa ezin izanen da matrikularen benetako kostua baino handiagoa izan.

9.3. Beka edo laguntzaren zenbatekoa zehazteko, eskuarki, eskaerak familiaren errenta erabilgarriaren arabera ordenatuko dira, 8. oinarrian ezarritakoari jarraikiz kalkulatu ondoren, tarte hauek eginez:

KIDE KOP.

1. TARTEA

EUROAK

2. TARTEA

EUROAK

3. TARTEA

EUROAK

4. TARTEA

EUROAK

1

7.072

9.264

11.035

13.777

2

14.144

18.528

22.069

27.554

3

21.216

27.792

33.104

41.331

4

28.288

37.056

44.138

55.108

5

35.360

46.320

55.173

68.885

6

42.432

55.584

66.207

82.662

7

49.504

64.848

77.245

96.437

8

56.576

74.112

88.283

110.213

Hortik gorako kide bakoitzeko

5.840

7.649

9.110

11.375

9.4. Beka edo laguntzen zenbatekoa honako hau izanen da irakaskuntza kontzeptuen eta mailen arabera:

9.4.1. Irakaskuntzarako beka edo laguntzak.

Irakaskuntza kontzeptuari dagokionez, irizpide hau aplikatuko da zenbatekoa kalkulatzeko:

Hezkuntza, Kultura eta Kirol Ministerioaren prezio akademikotzat hartuko da uztailaren 15eko 726/2017 Errege Dekretuko hirugarren xedapen gehigarrietako 1. eta 2. ataletan xedatutakoaren arabera zehaztutako zenbatekoa. Errege Dekretu horrek ezartzen ditu 2017-2018 ikasturterako errentaren eta familia ondarearen tarteak eta beken eta ikasketetarako laguntzen zenbatekoak eta hein batean aldatzen du beka eta ikasketetarako laguntza pertsonalizatuen araubidea ezartzen duen abenduaren 21eko 1721/2007 Errege Dekretua.

Hezkuntza Departamentuaren prezio akademikotzat joko da Unibertsitateen eta Hezkuntza Baliabideen zuzendari nagusiak uztailaren 3an emandako 577/2017 Ebazpenaren bidez ezarritakoa. Ebazpen horrek Nafarroako Unibertsitate Publikoan titulu ofizialak eskuratzeko zerbitzu akademikoengatik eta gainerako eskubideengatik 2017-2018 ikasturtean ordaindu beharreko prezio publikoak finkatzen ditu.

9.4.1.1. Unibertsitate ikasketak eta goi mailako Arte ikasketak.

a) Unibertsitate ikasketak Nafarroako Unibertsitatean egiten direnean eta 2017-2018 ikasturtean lehen ikasmailari ekiten dioten ikasleak baldin badira, errenta tarteen arabera hauek izanen dira beka edo laguntzak:

–1. tartea: ikasketa berak ikastetxe publiko batean egiteko Hezkuntza, Kultura eta Kirol Ministerioak duen prezio akademikoa, halako 4.

–2. tartea: ikasketa berak ikastetxe publiko batean egiteko Hezkuntza, Kultura eta Kirol Ministerioak duen prezio akademikoa, halako 2,7.

–3. tartea: ikasketa berak ikastetxe publiko batean egiteko Hezkuntza, Kultura eta Kirol Ministerioak duen prezio akademikoa, halako 1,5.

–4. tartea: ikasketa berak ikastetxe publiko batean egiteko Hezkuntza, Kultura eta Kirol Ministerioak duen prezio akademikoa, halako 1,3.

Laguntza horiek emanen dira baldin eta Nafarroako Unibertsitate Publikoak ez baditu ikasketa horiek ematen edo, bestela, nahiz eta Nafarroako Unibertsitate Publikoak ere eman, ikasleek bertan ikasteko posturik lortu ez dutela egiaztatzen badute.

b) Unibertsitate ikasketak aurreko a) letran aipatzen direnetan ez beste goi mailako ikasketetako ikastetxe publiko edo pribatuetan egiten badira, edo unibertsitate ikasketak Nafarroako Unibertsitatean 2017-2018 ikasturtean lehen ikasmailan hasten badira, eskatzaileak NUPen matrikulatzeko betebeharrak betetzen dituenean, baita eskatzaileak bere ikasketei beste unibertsitate batean ekin eta 2017-2018 ikasturtean Nafarroako Unibertsitatean matrikulatzen denean, bekak Hezkuntza Departamentuaren prezio akademikoaren %100, %80, %60 eta %50 izanen dira 1., 2., 3. eta 4. errenta tarteen kasuan.

c) Erregimen iragankorra, aplikatzen ahal zaiona beren ikasketak 2016ko urriaren 31 baino lehenago Nafarroako Unibertsitatean hasi eta ikasketa horietan beretan segitzen dutenei. Halakoetan, errenta tarteen arabera hauek izanen dira beka edo laguntzak:

–1. tartea: ikasketa berak ikastetxe publiko batean egiteko Hezkuntza, Kultura eta Kirol Ministerioak duen prezio akademikoa, halako 4,8.

–2. tartea: ikasketa berak ikastetxe publiko batean egiteko Hezkuntza, Kultura eta Kirol Ministerioak duen prezio akademikoa, halako 3,5.

–3. tartea: ikasketa berak ikastetxe publiko batean egiteko Hezkuntza, Kultura eta Kirol Ministerioak duen prezio akademikoa, halako 2,5.

–4. tartea: ikasketa berak ikastetxe publiko batean egiteko Hezkuntza, Kultura eta Kirol Ministerioak duen prezio akademikoa, halako 1,5.

d) Unibertsitatez kanpoko goi mailako ikasketak aurreko ataletan aipatzen direnetan ez beste goi mailako ikasketetako ikastetxe publiko edo pribatuetan egiten badira, bekak Hezkuntza Departamentuaren prezio akademikoaren %100, %80, %60 eta %50 izanen dira 1., 2., 3. eta 4. errenta tarteen kasuan.

Aurreko paragrafoetako prezioen zenbatekoa kalkulatzeko ez dira kontuan hartuko bigarren aldiko edo hurrengo aldietako kreditu edo irakasgaien matrikulak, ezta administrazio zerbitzuetako tasa hauek ere: espedientea irekitzea ikasketak hasteagatik, lekualdaketak, nortasun txartelak ematea, baliozkotzeak, egokitzapenak etab.

9.4.1.2. Derrigorrezkoen ondoko gainerako ikasketak.

2017-2018 ikasturtean Nafarroako ikastetxe itunduetan goi mailako heziketa zikloak egiten dituzten ikasleendako irakaskuntzako laguntzak izanen dira Nafarroako Aurrekontu Orokorretan 2017ko ekitaldirako ezarri diren eta 2018ko ekitaldirako ezarriko diren hileroko kuoten %100, %80, %60 eta %50, hurrenez hurren, 1., 2., 3. eta 4. errenta tarteetan.

Derrigorrezko ikasketen ondotik egiten diren unibertsitatez kanpoko gainerako ikasketetako edo goi mailako heziketa zikloetako ikasleentzat, aurreko kasuan sartuak ez daudenentzat, diru-laguntzarik jasotzen ez duten edo itundu gabe dauden ikastetxe pribatuetan arituz gero, beken zenbatekoa 581,00 euro, 464,80 euro, 348,60 euro eta 290,00 euro izanen da 1., 2., 3. eta 4. errenta tarteetan, hurrenez hurren.

Hezkuntza Departamentuaren mendeko ikastetxeetan derrigorrezkoak ez diren ikasketak egiten dituzten ikasleendako irakaskuntza laguntzak izanen dira Hezkuntzako kontseilariaren maiatzaren 16ko 56/2017 Foru Aginduan ezarritakoak, betiere ikasketa horiek deialdi honetako 2. oinarrian sarturik badaude. Zenbatekoak matrikularen %100, %80, %60 eta %50 izanen dira, hurrenez hurren, 1., 2., 3. eta 4. errenta tarteetan.

Derrigorrezkoak ez diren ikasketak Nafarroako Foru Komunitatetik kanpoko ikastetxe publikoetan egiten dituzten ikasleentzako irakaskuntza laguntzak matrikularen zenbatekoaren %100, %80, %60 eta %50 izanen dira, hurrenez hurren, 1., 2., 3. eta 4. errenta tarteetan.

Zenbateko horiek doitzen ahalko dira eskola orduen kopuruaren arabera.

9.4.2. Garraiorako beka edo laguntzak.

Garraiorako laguntzak eman daitezke familiaren bizilekutik ikastetxearen herrira 5 km edo gehiago badira eta astean gutxienez 4 bidaia (bi joateko eta bi etortzeko) egiten badira.

Diruz lagundutako edo doako garraioa edo Nafarroako Gobernuak antolatutako unibertsitateko garraioa erabiltzen dutenek ez dute zerbitzu horretako bidaiari dagokion laguntzarik jasoko.

Garraioaren kostua kalkulatzeko, herrien arteko distantzia (km) bider astean egin beharreko bidaia kopurua (joan-etorriak) eginen da. Eta gero, hortik ateratzen dena bider 2,8 eginen da.

Pirinio aldeko ikasleen kasuan (Erronkaribar, Zaraitzu, Erroibar eta Aezkoa ibarretakoak, eta Luzaide, Auritz eta Orreaga udalerrietakoak) biderkadura hori eta 3,1 koefizientea biderkatuko dira.

Aurreko formulan kalkulatutako kostuaren ehuneko jakin bat ordainduko da, familiaren errenta erabilgarriaren tartearen arabera.

1. TARTEA

2. TARTEA

3. TARTEA

4. TARTEA

%100

%80

%60

%50

2017-2018 ikasturtean erdi edo goi mailako heziketa ziklo baten azken ikasmailan ari diren ikasleek laguntza horri dagokion %35 soilik lortzen ahalko dute ikasmaila horretan lantokietako prestakuntzako praktikak besterik ez badira.

Zenbateko horiek doitzen ahalko dira eskola orduen kopuruaren arabera.

9.4.3. Jantokirako beka edo laguntzak.

Jantokirako bekak edo laguntzak emanen dira, ikasleak astean bi egunetan edo gehiagotan, eskola ordutegia dela kausa, etxetik kanpo bazkaldu behar badu eta jantokiak diru-laguntzarik hartzen ez badu, eta ikastetxea dagoen herritik familiaren etxea dagoen herrira gutxienez 5 km-ko tartea badago.

1. TARTEA

EUROAK

2. TARTEA

EUROAK

3. TARTEA

EUROAK

4. TARTEA

EUROAK

Zenbatekoa astean, janariagatik

180

144

108

90

Zenbateko horiek doitzen ahalko dira eskola orduen kopuruaren arabera. Etxetik kanpo jan beharra agiri bidez frogatu beharko da (eskola ordutegiak, praktiketakoak, etab.).

9.4.4. Bizitegirako beka edo laguntzak.

Bizitegirako laguntza emateko, eskatzaileak ikasketa presentzialak egin behar ditu, eta frogatu familiaren etxetik kanpo bizi behar duela ikasturte bitartean, familiaren etxearen eta ikastetxearen arteko distantziagatik, garraiobideen eskasiarengatik eta eskolen orduak aldatzeko aukera ezagatik.

1. TARTEA

EUROAK

2. TARTEA

EUROAK

3. TARTEA

EUROAK

4. TARTEA

EUROAK

2.342

1.874

1.405

1.171

2017-2018 ikasturtean erdi edo goi mailako heziketa ziklo baten azken ikasmailan ari diren ikasleek bizitegirako laguntzari dagokion %35 soilik eskuratzen ahalko dute ikasmaila horretan lantokietako prestakuntza besterik ez bada.

Zenbateko horiek doitzen ahalko dira eskola orduen kopuruaren arabera.

Laguntza hau jasotzeko, eskatzaileak alokairu edo bizitegi kontratua aurkeztu beharko du.

9.4.5. Presentziala ez beste modalitate bateko ikasketak.

UHUNeko ikasleek eta modalitate presentzialaz bestelako ikasketetako ikasleek ez dute eskubiderik izanen bizitegirako edo jantokirako laguntzarik hartzeko.

9.4.6. Ikasketetarako laguntzak emanen dira kasu hauetakoren bat gertatzen bada:

–Ekintza terrorista baten ondorioz ikaslearentzat berarentzat edo bere gurasoentzat, tutoreentzat edo zaintzaileentzat kalte pertsonalak eratorri badira, Terrorismoaren Biktimei Laguntzeari buruzko apirilaren 28ko 9/2010 Foru Legean ezarritakoarekin bat.

–Beren kideren bat genero indarkeriaren biktima izan dela aitortua duten familia unitateak, Emakumeen kontrako indarkeriari aurre egiteko 14/2015 Foru Legeari jarraikiz.

–Batxilergoko bigarren ikasmailan ohorezko matrikula lortu duten ikasleek graduko lehen ikasmailako matrikularako laguntza jasotzen ahalko dute, baldin eta haien familia unitateek bizitegiari eta tributazioari dagokienez deialdiak ezarritako baldintzak betetzen badituzte eta ikasturte honetan ez badute Nafarroako Gobernuaren edo Hezkuntza, Kultura eta Kirol Ministerioaren bekarik eskuratu eta, horrez gain, ez badute ohorezko matrikulagatik kenkaririk izan unibertsitate graduko lehen ikasmailako matrikulan, deialdi honek ezartzen dituen gainerako baldintzak betetzen ez badituzte ere. Laguntza horren zenbatekoa izanen da Unibertsitateen eta Hezkuntza Baliabideen zuzendari nagusiak uztailaren 3an eman 577/2017 Ebazpenean ezarritako prezio akademikoa bezainbatekoa, eta berariaz eskatu beharko da, egoera berezia adieraziz.

9.4.7. Laguntza berezia.

Behar ekonomiko larria aitortu eta frogatzen duten familia unitateek bakarrik izanen dute horretarako aukera.

Laguntza berezia jasotzeko eskubidea izateko beharrezkoak izanen dira, deialdi honetako baldintza orokorrez gain (6., 7. eta 11. oinarriak), jarraian aipatzen diren 1. eta 2. zenbakietako baldintzak betetzea, baita 3. zenbakiko bat edo bat ere:

1. Familiaren per capita errenta erabilgarria 4.260 eurotik beherakoa izatea.

2. Laguntza eskatzen duen ikaslea 2002ko urtarrilaren 1a baino lehen jaioa izatea, Oinarrizko Lanbide Heziketako ikasketetarako izan ezik.

3. Familia multzo hauetako batean egotea:

a) Errenta hartzaile nagusia 2016an gutxienez 10 hilabetez langabezian izan duten familiak.

b) Batere gurasorik gabeko umezurtzak.

c) Aita edo ama ezkongabeen edo dibortziatu edo legez bereizitako ezkontidearen seme-alabak, diru-sarrera bakarra kasu bakoitzean mantenu-sariengatik sortutako pentsioak direnean.

d) Gurasoek edo ikasleak berak legez kalifikatutako desgaitasunen bat dutenean (%33koa edo handiagoa).

e) Errenta jasotzaile nagusia pentsioduna duten familiak.

f) Familiak 2016an gizarteratze-errenta eskuratzen zuenean.

Betiere, laguntza eman aitzin benetako egoera sozioekonomikoa zehatz-mehatz aztertuko da, eta aurreko baldintzak frogatzen dituzten agiriekin batera, txosten sozial bat aurkeztu beharko da, gizarte langile batek prestatua (txosten hori ez da beharrezkoa izanen gizarteratze-errentaren hartzaile direnendako).

Laguntza berezi gisara, zenbateko hauek emanen dira:

–Unibertsitate ikasketetako ikasleentzat: 1.800 euro gehienez.

–Goi mailako heziketa zikloetako ikasleendako: gehienez ere 1.325 euro.

–Deialdi honetan sartzen diren gainerako ikasleendako: gehienez ere 950 euro.

9.4.8. Laguntza espediente akademikoagatik, 2017-2018 ikasturtean graduko unibertsitate ikasketei ekiten dieten ikasleendako.

9.4.8.1. Espediente akademikoagatik laguntza emanen da ikasleen ahalegina saritzeko, baldin eta unibertsitatean sartzeko nota 8,50 puntukoa atera badute (formula honen arabera kalkulatua: 0,6 BBN + 0,4 USBE) eta ikasten ari badira Europako Goi Mailako Hezkuntzaren Esparruari egokitutako unibertsitate ikasketak, graduko titulu ofizialak lortzeko direnak, edo unibertsitate ikasketak, titulu ofizial hauek lortzeko direnak: lizentziaduna, ingeniaria, arkitektoa, diplomaduna, irakaslea, ingeniari teknikoa eta arkitekto teknikoa. (BBN= Batxilergoko batez besteko nota, eta USBE= Unibertsitatean sartzeko Batxilergoaren ebaluazioa).

9.4.8.2. Unibertsitatean sartzeko probaren bidez sartzen ez direnek 8,5 puntu edo hortik goitikoa izan beharko dute sarbidea eman dien nota.

Osagai horren zenbatekoa 400 euro izanen da 1. tarterako, 300 euro 2. tarterako eta 200 euro 3. eta 4. tarteetarako.

9.4.9. Beka edo laguntzaren kontzeptu guztiak baturik, guztira ordainduko den kopurua ezin izanen da lanbidearteko gutxieneko soldata (gaur egun 9.907,80 euro) baino handiagoa izan, ikasleari eman zaizkion laguntza guztien baturak kopuru hori gainditzen badu ere.

9.4.10. Edozein kontzepturengatik emandako zenbatekoa ez da izanen haren kostua baino handiagoa.

10. oinarria.–Ematea eta ukatzea.

10.1. Unibertsitateen eta Hezkuntza Baliabideen zuzendari nagusiak emanen du beka eta laguntzen eskaerei buruzko behin-behineko ebazpena, bai eta behin betikoa ere, Baliabide Ekonomikoen Zerbitzuak proposatuta.

10.2. Beka edo laguntzaren kontzesioa eskatzailearen alde eginen da legezko ondorio guztietarako.

10.3. Hezkuntza Departamentuak noiznahi agintzen ahal du laguntza ematean oinarri izan ziren eskaera espedienteak berrikusteko, horietan ezarritako datuak egiazkoak ote diren ziurtatzeko.

10.4. Ikuskapen prozesuan laguntzeari uko egiten dioten onuradunek edo eskatutako informazioa eta dokumentazioa aurkezten ez dutenek besterik gabe galduko dute onuradun izaera eta itzuli egin beharko dute jasotako bekaren edo laguntzaren diru-zenbatekoa.

10.5. Ikasketa, ekonomia edo inguruabarrei buruzko datuak ezkutatu edo faltsutuz gero, emandako laguntzak bertan behera utzi eta atzera itzuli beharra agintzen ahalko da.

11. oinarria.–Aurkeztu beharreko agiriak eta epeak. Datuak bildu eta lagatzea.

2017-2018 ikasturterako beka edo laguntzak eskatzeko, www.navarra.es web orrian dagoen eskabide eredua bete beharko da (online eskaera). Kredentzial hauen identifikazioak ematen du hartarako sarbidea: NANa + Nafarroako Ogasuneko PINa edo, bestela, erabiltzaile-ziurtagiria (ziurtagiri digitala edo NAN elektronikoa).

Bekarako eskaera aurkezteak berarekin dakar hezkuntza administrazioei baimena ematea beste administrazio publiko batzuei edo edozein erakunderi (INE, IMSERSO, INSS...) informazioa eskatzeko, beka eskaera ebazteko beharrezkoak diren identifikazio datuak, inguruabar pertsonal, akademiko eta familia inguruko guztiak eta, orobat, errenta eta ondareari buruzko datuak ezarri, ezagutu eta egiazta ditzaten.

Inprimaki horietan jarritako datu pertsonalak, eta bekak edo laguntzak emateko eskatzen diren gainerako agiriak, Hezkuntza Departamentuko Baliabide Ekonomikoen Zerbitzuaren ardurapeko fitxategi automatizatu batean sartuko dira.

Aipatu unitate organikoak edozein unetan erabil ditzake fitxategi horretako datuak, egiazkoak ote diren baieztatzeko.

Hezkuntza Departamentuak familia unitatean kontuan hartzen ahal diren kideen datu ekonomiko-finantzarioak eskura ditzake Ogasuneko eta Finantza Politikako Departamentutik, paperean eta euskarri informatikoan hartzeko moduko igorpen elektronikoaren bidez, beka eta laguntzen deialdi orokorreko 4. eta 8. oinarrietan aipatzen diren baldintza ekonomikoen gaineko informazioa osatzeko, hots: diru-sarrerak, errentak, inbertsioak, ondareko ondasunak, sorospenak, onurak, pentsio planak, zerga betebeharrak eta beste.

Hezkuntza Departamentuak ahalmena du eman eta ukatu diren beka eta laguntzen zenbateko eta kontzeptuei buruzko datuak eta eskatzaileen identifikazio eta ikasketei buruzkoak lagatzeko Hezkuntza, Kultura eta Kirol Ministerioari, udalei eta ikastetxeei, eta bankuko datuak, orobat, beka edo laguntza kobratzeko eskatzaileak hautatutako finantza entitateei.

Behin beterik eta igorririk ezarritako prozedura telematikoaren bidez, beka eskaera aurkezturik eta sinaturik geldituko da, ondorio guztietarako, eta ez da beharrezkoa izanen eskaera eredu (pdf fitxategia) papereratzea, ezta inon ere fisikoki aurkeztea ere.

Ez dira kontuan hartuko ezarritako aurkezpen prozesua osatzen ez duten eskaerak, bide telematikoaz beterik egonda ere.

Orobat, beka paper euskarrian aurkeztu ahal izanen da, Herri Administrazioen Araubide Juridikoaren eta Administrazio Prozedura Erkidearen urriaren 1eko 39/2015 Legearen 16.4 artikuluan adierazitako edozein bide erabilita. Eskabidea posta bulego batean aurkezten bada, gutun-azal ireki batean aurkeztuko da, postako langileek eskabideari data eta zigilua jarri diezazkioten, ziurtatu eta Hezkuntza Departamentuko Erregistrora igorri baino lehen.

Eskaera hilabeteko epean aurkeztuko da, deialdi hau Nafarroako Aldizkari Ofizialean argitaratu eta biharamunetik hasita.

Eskaeran eskaneaturik erantsiko dira, behar bezalako kalitatearekin, ondoko dokumentuen jatorrizkoak:

a) Baliaezintasun pentsioaren, langabezia sariaren eta PFEZtik salbuetsiutako beste diru-sarrera batzuen frogagiriak, horiek guztiak 2016. urteari dagozkionak.

b) Familia unitateak PFEZaren aitorpena egin ez badu, legez horretara beharturik ez dagoelako, honako hauek erantsi beharko dizkio eskabideari:

–Erroldatze eta bizikidetza ziurtagiria, 2016. urteari dagokiona, udalak luzatua.

–Besteren konturako langileen edo pentsiodunen kasuan, 2016. urtean izandako diru-sarreren frogagiria.

–Enpresaburu edo profesional liberalen kasuan, 2016. urtean izandako diru-sarrera gordinen aitorpena.

c) Onuraduna Diru-laguntzei buruzko azaroaren 9ko 11/2005 Foru Legearen 13. artikuluan onuradun izateko 2.c atalean ez bezala ezarritako ezein debekutan ez dagoela dioen aitorpena.

e) Kenkarien frogagiri eguneratuak (desgaitasuna...).

8.3.c puntuan sartutako kenkarien kasuan, hartan aipatzen diren matrikulak.

e) C1, C2 edo C3 ziurtagiri akademikoak, bekaren onuradun izan behar duen ikasleak Nafarroatik kanpoko ikastetxe batean ikasten duelarik.

f) Etxetik kanpoko jantoki zerbitzuaren beharraren egiaztagiria (eskola ordutegiak, praktiketakoak eta abar).

g) Alokairu edo bizitegi kontratuaren frogagiria.

h) Familia ugaria izanez gero, hori egiaztatzen duen titulu ofiziala.

i) Bidezkotzat hartzen diren dokumentu eta ziurtagiri guztiak.

j) Nafarroako Unibertsitateko lehen ikasmailan matrikulaturik daudenek, Nafarroako Unibertsitate Publikoan plazari lortu ez izanaren egiaztagiria.

Eskaera aurkeztuko da bertan adierazitako datu, ziurtagiri eta gainerako dokumentuak goitik behera behar bezala bete ondoren.

Eskatzaileen ardura ez diren inguruabarrengatik inprimakietan ezin direnean eskatutako ziurtagiriak agerrarazi, agiri eta ziurtagirien eskaerak erantsi beharko dituzte.

Deialdiaren barnean sartzen ez diren ikasketa edo ikastetxeetarako eskaerak ez dira onartuko, ez eta 2. oinarrian espresuki baztertzen diren kasuei buruzkoak ere.

Eskatzaileak eskaera aurkezteak esan nahi du bere erantzukizunpean honako hau adierazten duela:

a) Onartzen dituela deialdiaren oinarriak, hartarako eskatzen baitu beka.

b) Eskaerarekin batera aurkeztutako datu guztien jatorrizko frogagiri guztiak dauzkala, eta horiek ere aurkeztuko dituela horretarako errekerimendua egiten bazaio.

c) Jakinaren gainean dagoela, deklaratutako inguruabarretan zerbait zuzena ez bada, egia ez bada, edo ezkutatu bada, beka ukatuko zaiola edo itzuli beharko duela.

d) Jakin badakiela deialdi hau osagarria dela Hezkuntza, Kultura eta Kirol Ministerioaren deialdiaren eta Eusko Jaurlaritzarenaren aldera, eta edozein administrazio edo entitate publiko nahiz pribatutatik beste beka bat eskuratuz gero, horren berri eman beharko diola Nafarroako Gobernuko Hezkuntza Departamentuko Baliabide Ekonomikoen Zerbitzuari (Bekak, beheko solairua).

e) Onespena ematen diola komunikazioak modu telematikoan eskuratzeari, horretarako eskaeran adierazi duen posta elektronikoaren bidez.

f) Eskatzailea dela bekaren ordainketa eskuratzeko adierazitako kontu korrontearen titularra edo titularkidea.

g) Hezkuntza Departamentuari baimena ematen diola jendaurrean jartzeko bekadunen zerrendak, haien datu identifikagarriak eta emandako laguntzen zenbatekoak zehaztuta, diru-laguntzei buruzko oinarrietan eta datu pertsonalen babesari buruzko arauetan ezarritakoarekin bat.

12. oinarria.–Ebazpena eta erreklamazioak.

12.1. Espedientearen instrukzioa egiteko organo arduraduna Baliabide Ekonomikoen Zerbitzua da.

12.2. Onartu eta ukatzen diren beka eta laguntzen behin-behineko zerrenda Unibertsitateen eta Hezkuntza Baliabideen zuzendari nagusiaren ebazpenaren bidez onetsiko da, Baliabide Ekonomikoen Zerbitzuak proposatuta.

12.3. Behin-behineko zerrenda horrekin bat heldu ez diren eskatzaileek espedienteak berrikus ditzala eskatzen ahalko diote Hezkuntza Departamentuko Baliabide Ekonomikoen Zerbitzuari (Bekak, beheko solairua). Horretarako hilabeteko epea izanen da, ebazpena Nafarroako Aldizkari Ofizialean argitaratu eta biharamunetik aitzina.

Zerbitzu horrek, hala berean, ofizioz berrikusten ahalko ditu espedienteak, deialdian aurreikusitakoaren aurkako arau-hausterik edo akatsik baldin bada.

12.4. Baliabide Ekonomikoen Zerbitzuak proposatuko du aldaketei buruzko behin betiko ebazpena, Beken Batzordearekin kontsultatu ondoren.

Batzorde horrek proposatzen ahalko du, deialdiko baldintza guztiak ez bete arren, batzordearen ustez beka edo laguntza jasotzeko merezimendu aski dituzten ikasleei ere bekak ematea, merezimendu horiek behar bezala justifikatuz gero, 3.2 oinarrian zehaztu den bezala.

Beken batzordeak kide hauek izanen ditu:

–Batzordeburua: Unibertsitateen eta Hezkuntza Baliabideen zuzendari nagusia.

–Buruordea: Baliabide Ekonomikoen Zerbitzuko zuzendaria.

–Epaimahaikideak: Unibertsitateen Ataleko burua.

–Nafarroako Foru Komunitateko Hezkuntzako Goi Ikuskaritzaren Arloko zuzendaria.

–Ikastetxeen, Finantzaketaren eta Ikasketetarako Laguntzen Ataleko burua.

–Azterlan Ekonomikoen Ataleko ordezkari bat.

–Hezkuntzako ikuskatzaile bat.

–Ogasuneko eta Finantza Politikako Departamentuko ogasun ikuskatzaile, kudeatzaile edo teknikari bat.

–Unibertsitatez kanpoko mailetako ikasleen bi guraso.

–Unibertsitate mailako bi ikasle, bata Nafarroako Unibertsitate Publikokoa eta bestea Nafarroako Unibertsitatekoa.

–Unibertsitateetako bi ordezkari, bata Nafarroako Unibertsitate Publikokoa eta bestea Nafarroako Unibertsitatekoa.

–Idazkaria: Hezkuntza Departamentuko APT bat (arlo juridikoa).

12.5. Unibertsitateen eta Hezkuntza Baliabideen zuzendari nagusiaren ebazpen baten bidez eta Baliabide Ekonomikoen Zerbitzuak proposatuta, onetsiko da eman eta ukatzen diren beka eta laguntzen zerrenda, baldin eta ofizio bidezko berrikuspenak, edo interesdunak hala eskatutakoak, behin-behineko ebazpenean aldaketak ekarri baditu.

12.6. Emandako eta ukatutako beka eta laguntzen zerrenda zuzendua behin betikoa bilakatuko da lehen aipatutako ebazpena Nafarroako Aldizkari Ofizialean argitaratzen den egunean berean. Halaber, epe berean behin betikoak bilakatuko dira behin-behinean emanak ziren gainerako laguntza eta bekak, aipatutako zuzenketen zerrendan agertzen ez direnak.

12.7. Onartu eta ukatzen diren beken behin-behineko eta behin betiko zerrendak jendaurrean jarriko dira Nafarroako Gobernuaren barnean onespenaren ebazpenean aipatzen diren administrazio bulegoetako iragarki oholetan.

13. oinarria.–Beka edo laguntzen ordainketa.

13.1. Hezkuntza Departamentuari beka edo laguntza eskatu ahal izateko aurretik Hezkuntza, Kultura eta Kirol Ministerioari edo Eusko Jaurlaritzari eskatu behar diotenek Departamentuko Baliabide Ekonomikoen Zerbitzuan (Bekak, beheko solairua, San Domingo kalea, z.g., 31001 Iruña) aurkeztu beharko dute erakunde horren bekaren onarpenaren edo ukapenaren behin betiko jakinarazpena, 2018ko urriaren 31 baino lehen aurkeztu ere. Jakinarazpen hori aurkezten ez bada, beka ukatu eginen da. Nafarroako ikastetxeetan ikasten duten ikasleek ez dute aurkeztu behar izanen.

13.2. Eskatzailearen aldeko beka edo laguntzen ordainketa eskaeran azaltzen den banku, aurrezki kutxa edo kreditu kooperatibaren bidez eginen zaio eskatzaileari.

13.3. Ebazpen honen bidez deitutako ikasketetarako beka edo laguntzen onuradunak beharturik daude beka edo laguntza eman den xederako erabiltzera, hots, matrikula egiteko, klasera joateko, azterketetara aurkezteko eta, gastuak, zeinetarako ematen baita laguntza, ordaintzeko.

Horren ondorioetarako, beka edo laguntza eman zaion helburuetarako ez duela erabili ondorioztatuko da ondoko kasuren bat gertatzen bada:

a) Unibertsitatez kanpoko ikasketak:

1. 2017-2018 ikasturtea bukatu baino lehen, ikastetxean baja hartzea.

2. Eskola ordu guztietatik %80ra edo gehiagora ez joatea, eskolatzetik salbuetsita egon ezean.

3. Ikastetxeak emandako zerbitzuak ez ordaintzea, beka zerbitzu horiek finantzatzeko eman bazen.

4. Matrikulaturiko irakasgai edo kredituen %50 ez gainditzea, ez deialdi arruntean ez berezian.

Beka zer kontzeptutarako eman zaion, horiek guztiak itzuli beharko ditu 1., 2. eta 4. puntuetan deskribatu bezalako inguruabarretan erori denak. Ordaindu gabeko zerbitzuei dagozkien kontzeptuak itzuli beharko ditu 3. puntuan deskribatu bezalako egoeran baizik erori ez denak.

b) Unibertsitatez kanpoko ikasketak:

1. Matrikula baliogabetzea.

2. Beka zer ikasmailatarako eman zaion eta hartan zer kreditutan matrikulatu den, orokorrean gutxienez ere horien %50 ez gainditzea. Zientzien eta ikasketa teknikoen alorretan ehuneko hori %40koa izanen da.

Ehuneko hori kalkulatzeko aparte utziko dira kreditu baliozkotuak, aitortuak, egokituak, transferituak edo gisakoak.

3. Ikastetxeak emandako zerbitzuak ez ordaintzea, beka zerbitzu horiek finantzatzeko eman bazen.

1. kasuan, beka zer kontzeptutarako eman zaion, horiek guztiak itzuli beharko ditu.

2. kasuan, beka zer kontzeptutarako eman zaion, horiek guztiak itzuli beharko ditu, matrikularako beka izan ezik.

3. kasuan, ordaindu gabeko zerbitzuei dagozkien kontzeptuak itzuli beharko ditu.

Ikastetxeetako idazkaritzek 2018ko urria baino lehen jakinarazi beharko diote Hezkuntza Departamentuari zein ikasle dauden 13.3 atalean aipatutako egoeretako batean.

Ikaslea ikasturtean zehar hilen balitz, beka edo laguntza oso-osorik kobratzeko eskubidea izanen luke.

14. oinarria.–Laguntzak galtzea.

Bekadunek edozein momentutan galtzen ahal dute emandako laguntza, Administrazioaren egintza arrazoitu baten bitartez, bidezko instantzien aitzineko ekintzak galarazi gabe, deialdi honetako oinarriek aipatzen dituzten inguruabarrak frogatzeko espedientea ireki ondoren. Espediente hori Hezkuntza Departamentuak ireki eta ebatziko du.

Espediente baten ondorioz laguntza ezeztatuz gero, jasotako dirua itzuli beharko da, baztertu gabe eskatzaileak edota laguntza jaso duen ikasleak hartu ahal izan dituen erantzukizun administratibo, zibil eta penalak.

15. oinarria.–Errekurtsoak.

Deialdi honen eta oinarrien aurka gora jotzeko errekurtsoa paratzen ahal da, Hezkuntzako kontseilariari zuzendua, hilabeteko epean, Nafarroako Aldizkari Ofizialean argitaratu eta biharamunean hasita.

Bekak eta laguntzak emateko edo ukatzeko behin betiko ebazpenaren aurka gora jotzeko errekurtsoa aurkezten ahal da, Hezkuntzako kontseilariari zuzendua, ebazpena eta haren eranskinak Nafarroako Aldizkari Ofizialean eta Hezkuntza Departamentuko iragarki oholean argitaratu eta biharamunetik hasita hilabeteko epean.

Iragarkiaren kodea: F1711677