1. NAFARROAKO FORU KOMUNITATEA
1.7. BESTELAKOAK
485/2017 EBAZPENA, irailaren 14koa, Lehendakaritzako eta Gobernu Irekiko zuzendari nagusiak emana, Estatuko Administrazio Orokorraren eta Nafarroako Foru Komunitatearen arteko Lankidetza Batzordearen Erabakia, 2017-2019 aldirako toki inbertsioen plana arautzen duen abenduaren 13ko 18/2016 Foru Legearen gainekoa, Nafarroako Aldizkari Ofizialean argitaratzea xedatzen duena.
Aintzat hartuz Konstituzio Auzitegiari buruzko urriaren 3ko 2/1979 Lege Organikoaren 33. artikulua, urtarrilaren 7ko 1/2000 Lege Organikoak aldatu zuena,
EBATZI DUT:
Estatuko Administrazio Orokorraren eta Nafarroako Foru Komunitatearen arteko Lankidetza Batzordearen 2017ko uztailaren 27ko Erabakia, ebazpen honi eranskin gisa gehitua, Nafarroako Aldizkari Ofizialean argitara dadila xedatzea.
Iruñean, 2017ko irailaren 14an.–Edurne Eginoa Antxo, Lehendakaritzako eta Gobernu Irekiko zuzendari nagusia.
ERANSKINA
Estatuko Administrazio Orokorraren eta Nafarroako Foru Komunitatearen arteko Lankidetza Batzordearen Erabakia,
2017-2019 aldirako toki inbertsioen plana arautzen duen abenduaren 13ko 18/2016 Foru Legearen gainean
Estatuko Administrazio Orokorraren eta Nafarroako Foru Komunitatearen arteko Lankidetza Batzordeak erabaki hau hartu du:
1. Estatuko Administrazio Orokorraren eta Nafarroako Foru Komunitatearen arteko Lankidetza Batzordearen Erabakian, lantalde bat eratu beharra aurreikusi zen, 2017-2019 aldirako toki inbertsioen plana arautzen duen abenduaren 13ko 18/2016 Foru Legearen 31. artikuluari eta bigarren xedapen gehigarriari buruz, eskumenak direla-eta sortutako desadostasunak aztertu, eta konponbidea proposa zezan; aurreikuspen hori beteta, eta lantaldean izandako aldez aurreko negoziazioen ondorioz, bi alderdien iritziz konponduta daude desadostasun horiek, konpromiso hauetan oinarrituta:
a) Bi aldeak bat datoz esateko 31. artikulua honela ulertu behar dela: indarreko legeriarekin bat, aurrekontuaren likidazioa diruzaintzako gerakin negatiboarekin egiten denean, toki entitateak ez badu gastua murriztu edo kreditua hitzartu legeria horretan aurreikusitako moduan, hurrengo ekitaldiko aurrekontua hasierako superabitarekin onetsi beharko da, eta superabit hori sortutako defizita baino handiagoa izan beharko da.
b) Bigarren xedapen gehigarriari dagokionez, aldeak bat datoz honetan: martxoaren 5eko 2/2004 Legegintzako Errege Dekretuaren bidez onetsitako Toki Ogasunak arautzen dituen Legearen testu bateginaren hamaseigarren xedapen gehigarrian xedatutakoarekin bat ulertu behar da lehen apartatua, Aurrekontu Orekari eta Finantza Egonkortasunari buruzko apirilaren 27ko 2/2012 Lege Organikoaren hirugarren xedapen gehigarrian eta Toki Administrazioaren Arrazionalizazioari eta Jasangarritasunari buruzko abenduaren 27ko 27/2013 Legearen bigarren xedapen gehigarrian aurreikusitakoarekin bateragarria den aldetik.
Xedapen horren bigarren apartatuari dagokionez, Nafarroako Gobernuak konpromisoa hartzen du aginduaren erregelamenduzko garapenean honakoa zehatz jasotzeko: apartatu horretan xedatutakoak ez du ukatzen aurrekontu egonkortasunari buruzko indarreko araudian jasotako irizpideen arabera dagozkion kalkulua eta ondorioak aplikatzea.
2. Bi alderdiak ados jarri direnez, bat datoz adieraztean konpondutzat jotzen dituztela erabaki honetan jasotako xedapenen gainean agertutako desadostasunak, eta, beraz, amaitutzat ematen dute eztabaida.
3. Erabaki hau Konstituzio Auzitegiari jakinaraztea, Konstituzio Auzitegiari buruzko 2/1979 Lege Organikoaren 33.2. artikuluan aurreikusitako ondorioetarako, eta Erabaki hau Estatuko Aldizkari Ofizialean eta Nafarroako Aldizkari Ofizialean argitaratzea.
Iragarkiaren kodea: F1710852