2. NAFARROAKO TOKI ADMINISTRAZIOA
2.2. XEDAPEN ETA IRAGARKIAK, HERRIEN ARABERA ANTOLATUAK
NOAIN (ELORTZIBAR)
Noain Elortzibarko Udalaren Plan Estrategikoa, garapen bidean dauden herrialdeekin lankidetza proiektuak gauzatzeko diru-laguntzak eman ahal izateko. Planaren aldaketa espedientearen onespena
Noain Elortzibarko Udalak, 2016ko abenduaren 22an egindako osoko bilkuran, aho batez onetsi zuen Plan Estrategiko honen aldaketa: garapen bidean dauden herrialdeekin lankidetza proiektuak gauzatzeko diru-laguntzak eman ahal izateko plana.
Erabakia argitara ematen da Nafarroako Aldizkari Ofizialean, Diru-laguntzei buruzko azaroaren 17ko 38/2003 Lege Orokorraren 8. artikuluan eta Nafarroako Toki Administrazioari buruzko uztailaren 2ko 6/1990 Foru Legearen 221.2 artikuluan ezarritakoa aplikatuz.
Noain Elortzibarren, 2016ko abenduaren 23an.–Alkate udalburua, José Ignacio Erro Lacunza.
PLAN ESTRATEGIKOA, GARAPEN BIDEAN DAUDEN HERRIALDEEKIN LANKIDETZA PROIEKTUAK GAUZATZEKO DIRU-LAGUNTZAK EMAN AHAL IZATEKO.
PLANAREN ALDAKETA ESPEDIENTEA
A) Planaren xedea.
Noain Elortzibarko Udalak, 1998. urtean, Hirugarren Munduarekiko lankidetza proiektuetarako laguntzak arautzen dituen ordenantza (21. ordenantza) onetsi zuen (behin betiko onetsi zen 1998ko otsailaren 3ko osoko bilkuran, eta 1998ko 26. Nafarroako Aldizkari Ofizialean, martxoaren 2an, argitaratu); haren aldaketa behin betiko onetsi zen 2012ko martxoaren 7ko osoko bilkuran, eta 2012ko 69. Nafarroako Aldizkari Ofizialean, apirilaren 12an, argitaratu).
Ordenantza horrek indarra hartuz geroztik, Udalak diru-laguntzen deialdia egiten du urtero, Nazio Batuen gomendioei jarraikiz, herrien garapenerako nazioarteko lankidetza bultzatzearren. Udalak urteko aurrekontuan diru kopuru bat jartzen du laguntza horietarako, horrela “garapen bidean” dauden herrialdeetan gauzatuko diren proiektuak kofinantzatzeko. Proiektu horien helburua izanen da pobreziari aurka egitea eta tokian tokiko giza garapena sustatzea hainbat arlotan: hezkuntza, prestakuntza, osasuna, etxebizitza, giza eskubideen defentsa, garapen ekonomikoa edo azpiegiturak herrietako edo hirietako komunitateei on egiteko, betiere komunitate horiek eta horien ordezkariek zuzeneko parte hartzea dutelarik proposatu, kudeatu eta gauzatzean eta, orobat, arreta berezia ematen dietelarik ingurumenaren gaineko eraginari eta baliabide naturalen erabilera jasangarriari.
Garapen bidean dauden herrialde eta lurraldetzat joko dira eta, beraz, deialdi honetako funtsak jaso ahalko dituzte, Garapenerako Laguntza Ofizialaren (GLO) onuradunak diren herrialdeen zerrendan sartutakoak, ELGA-Ekonomiako Lankidetza eta Garapenerako Antolakundearen mendeko Garapenerako Laguntza Batzordeak (GLB) ezartzen baitu.
Orobat, lankidetza proiektu horiekin batera herritarrak sentikor bihurrarazteko programa bat abiatuko da, Noain Elortzibarren garatuko dena, komunitatearen parte-hartzea bultzatu eta Iparraldearen eta Hegoaldearen arteko hartu-emanen inguruan jarrera kritikoak eta gogoetak sustatzen dituena.
Lehenetsiko diren jarduketa eremuak izanen dira oinarrizko beharrak asetzera bideratutako proiektuak, eta halakotzat jotzen dira:
–Ur arazketa eta saneamendua: urez hornitzeko sistemak eta oinarrizko saneamenduaren zerbitzuak eta azpiegiturak.
–Hezkuntza: lehen mailako hezkuntza eta eskolaurrea denei zabaltzea, hezkuntzaren azpiegiturak hobetzea, helduak alfabetatzea eta hezitzaileak trebatzea.
–Oinarrizko osasuna: osasuna bere osotasunean hartzen duten ekintzak; haurren heriotza tasa murrizteko programak; sexu eta ugaltze osasuna hobetzeko programak. Bai aurrea hartzeko fasean bai eritasunak artatzerakoan.
–Etxebizitza: kostu txikiko eraikuntzak, gizartetik baztertuak dauden sektoreen integraziorako.
2016. urteko zenbatekoa, jarduera hauetarako, 35.000,00 eurokoa da (Inbertsio proiektuak).
2014ko urtarrilaren 15eko osoko bilkuran, Noain Elortzibarko Udalaren diru-laguntzen ordenantza orokorra (40.a) onetsi zen (2014ko 39. Nafarroako Aldizkari Ofiziala, otsailaren 26koa). Ordenantza hori osagarria izanen da deialdi honetan, eta 3. zenbakian zehazten du beharrezkoa dela Plan Estrategiko bat ezartzea diru-laguntza horietarako.
B) Laguntzen helburuak.
Noain Elortzibarko Udalak, laguntza hauen bidez, aurrekontuaren arabera ahal duen heinean, lagundu egin nahi du Milurtekoko Garapen Helburuak lor daitezen, esparru hauetan:
1. helburua: muturreko pobrezia eta gosetea desagerraraztea.
–Erdira jaistea, 1990. eta 2015. urteen artean, gosea jasaten duten pertsonen proportzioa.
–Erdira jaistea, 1990. eta 2015. urteen artean, eguneko dolar bat baino gutxiagoko diru-sarrerak dituzten pertsonen proportzioa.
–Denendako enplegu bete produktiboa eta lan duina lortzea, emakumeak eta gazteak barne, eta haurren lana erabat arbuiatzea.
2. helburua: denendako lehen hezkuntza lortzea.
–Ziurtatzea toki guztietako haurrak, berdintasunean, lehen hezkuntzako ziklo oso bat bukatzeko gai izanen direla 2015. urtean.
3. helburua: generoen arteko berdintasuna eta emakumeen autonomia sustatzea.
–Generoen arteko desberdintasunak deuseztatzea lehen eta bigarren hezkuntzan, ahal dela 2005. urterako, eta hezkuntzako maila guztietan 2015. urtea bukatu baino lehen.
4. helburua: haurren hilkortasuna murriztea.
–Bi heren murriztea, 1990. eta 2015. urteen artean, bost urtetik beherako haurren hilkortasuna.
5. helburua: amen osasuna hobetzea.
–Hiru laurden murriztea, 1990. eta 2015. urteen artean, amen hilkortasuna.
–Denak ugalketako osasunera iritsi ahal izatea.
6. helburua: GIB-HIESari, paludismoari eta beste gaixotasun batzuei aurre egitea.
–GIB-HIESaren hedapena gelditu izana eta murrizten hasi izana 2015ean.
–GIB-HIESerako tratamendua behar duten guztiek eskura izatea 2010erako.
–Malariaren eta beste gaixotasun larri batzuen eragina gelditu izana eta murrizten hasi izana 2015ean.
7. helburua: ingurumenaren iraunkortasuna bermatzea.
–Garapen jasangarriaren printzipioak txertatzea politika eta programa nazionaletan, eta ingurumeneko baliabideen galera murriztea.
–Aniztasun biologikoaren galera nabarmen murriztu izana eta geldotu izana 2010ean.
–Erdira jaistea, 2015erako, edateko ura eta saneamenduko oinarrizko zerbitzuak modu jasangarrian eskuratzerik ez dituzten pertsonen proportzioa.
–2020rako nabarmen hobetzea baztertutako auzoetako gutxienez ere 100 milioi bizilagunen bizitza.
8. helburua: garapenerako mundu elkartea sustatzea.
–Oraindik ere gehiago garatzea merkataritzako eta finantzetako sistema irekia, arauetan oinarritua, aurreikus daitekeena eta bereizkeriarik gabea.
–Garapen gutxiko herrialdeen behar bereziei erantzutea.
–Garapen bidean dauden kostalderik gabeko herrialdeen eta garapen bidean dauden uharte estatu txikien behar bereziei erantzutea (garapen bidean dauden uharte estatu txikien garapen jasangarrirako Ekintza Programaren bidez eta Batzar Orokorraren hogeita bigarren bilkuraldi bereziko emaitzen arabera).
–Osotasunean aurre egitea garapen bidean dauden herrialdeen zorraren arazoei, nazioko eta nazioarteko neurriak hartuz zorra epe luzera jasangarria izan dadin.
–Farmazia enpresekin lankidetzan arituz, funtsezko botikak eskuragarri izaten laguntzea garapen bidean dauden herrialdeetan, betiere arrazoizko prezioak jarriz.
–Sektore pribatuarekin lankidetzan arituz, teknologia berrien onurak eskuragarri jartzea, batez ere informazioaren eta komunikazioen teknologiak.
Inolako eperik ez duen helburu bakarra zortzigarrena da; horrek askorentzat esan nahi du jada betetzen egon beharko luketela.
C) Lortzeko behar den epea.
Nazio Batuen 2014ko txostenak Milurtekoko Garapen Helburuak lortzera bideratutako aurrerapen berrienak aztertu zituen. Txosten horretan berresten da Milurtekoko Garapen Helburuek onura handiak ekarri dituztela jendearen bizitzarako. Munduko probezia erdira jaitsi da 2015a (ezarritako data) baino bost urte lehenago. Garapen bidean dauden herrialdeetako haurren %90ak lehen hezkuntza jasotzen du orain, eta murriztu egin dira neska eta mutikoen matrikulazioetako desberdintasunak. Halaber, nabarmen aurreratu da paludismoaren eta tuberkulosiaren kontrako borrokan, eta hobekuntzak lortu dira osasunari dagozkion adierazle guztietan. Azken bi hamarkadetan, ia erdira jaitsi da haur bat 5 urte bete baino lehen hiltzeko probabilitatea. Horrek esan nahi du egunero 17.000 haur salbatzen direla, gutxi gorabehera. Era berean, edateko uraren iturri hobetuak eskuragarri ez zituztenen portzentajea erdira jaisteko helburua bete zen.
Gobernu nazionalen, nazioarteko komunitatearen, gizarte zibilaren eta sektore pribatuaren ahalegin koordinatuek mundu guztiko herriendako esperantza eta aukerak berpiztea sustatu dute. Dena dela, oraindik ere asko dago egiteko aurrerapen horiek bizkortzeari begira. Ekintza ausart eta berariazkoak behar dira oraindik ere eskasia eta desberdintasun nabarmenak dauden tokietan.
Horregatik, eta gure herrialdean krisi ekonomikoa izan arren, Udalak epe bat ezarri du, gutxienez ere 5 urtekoa, hau da, 2014-2018 aldirako, garapen bidean dauden herrialdeekin lankidetza proiektuak garatzeko diru-laguntzak eman ahal izateko Plan Estrategikorako. Epe hori luzatzerik izanen da, Udalak zehazten dituen epeetarako.
D) Aurreikus daitezkeen kostuak.
Noain Elortzibarko Udalak, egoerak uzten badio, diru kopuru bat jarriko du urtero aurrekontu orokorretan, horren bidez diru-laguntzak emateko garapen bidean dauden herrialdeekin lankidetza proiektuak gauzatzeko, Plan Estrategiko honen arabera.
Noain Elortzibarko Udalaren 2016. urterako aurrekontu orokor eta bakarrean 35.000,00 euroko diru-izendapena dago, “Hirugarren Mundurako dir., inbertsioak, %0,7” izeneko 0-2391-7820000 kontu-sailaren kargura.
–Emandako diru-laguntzekin materialen, horniduren, ekipamenduen eta ekoizpenerako bestelako aktiboen erosketa eta garraioa ordaintzen ahalko da, betiere proiektua garatuko den herrialde edo eskualde berean eginez gero.
–Salbuespen gisa, lurrak edo ondasun higiezinak erosteko erabiltzen ahalko da diru-laguntza; baina, betiere, legezko egoeraren berri ematen duten eta benetan erosten ahal direla frogatzen duten agiriak aurkeztea izanen da baldintza. Gainera, proiektua zein tokitan egiten den, bertako jendea ordezkatzen duen erakunde batena izanen da ondasun horien titulartasuna. Azken baldintza hori eraikin berriak egiteko proiektuen kasuan ere aplikatuko da.
–Erbesteratutako lankide boluntarioen gastuak diru-laguntzen bidez ordaintzen ahalko dira, egoki denean; baina horretarako, diruz lagundutako proiektuaren xedearekin lotuta daudela frogatu beharko da. Kontzeptu honi gehienez dagokion zenbatekoa, hala egokitzen denean, urte bakoitzean ezartzen den portzentajea izanen da. Erbesteratutako langileen gastutzat jotzen dira langile mota horrek sortzen dituenak (nominak, bidaiak, ostatuak, mantenua eta abar).
–Zeharkako gastuak (administratiboak eta kudeaketakoak), horietarako diru-laguntza lortu denean, ez dira urte bakoitzean deialdian horretarako ezartzen den portzentajetik gorakoak izanen, eta entitate onuradunak Nafarroan duen egoitzari buruzkoak izanen dira.
–Diru-laguntzekin ordaintzen ahalko dira finantzatutako proiektuari buruz sentsibilizatzeko jarduera berariazkoen kostuak, zuzeneko gastuen kontu-sailaren barnean eta urte bakoitzean deialdian ezartzen den portzentajera bitarte, eta betiere Noain Elortzibarren egiten badira eta hasieratik zehazki aurkeztuak izan badira. Ez dira atal honetan sartuko entitate onuradunaren zabalkunderako eta sentsibilizaziorako jarduera orokorrak.
Dena den, emandako diru-laguntzen zenbatekoak ez du inoiz gaindituko –beste erakunde edo entitate pribatu zein publikoen diru-laguntzekin edo laguntzekin batuta– egin beharreko proiektuaren kostu osoa.
Deialdi honetako diru-laguntza bateragarria da edozein administrazio, erakunde edo pertsonak xede berarekin emandako beste diru-laguntza batzuk hartzearekin, baina diru-laguntzen zenbatekoa ez da inoiz izanen diruz lagundutako jardueraren kostua baino handiagoa.
E) Finantzabideak.
Noain Elortzibarko Udalak, egoerak uzten badio, diru kopuru bat jarriko du urtero, xede hauetarako, ekitaldi bakoitzeko aurrekontu orokor eta bakarrean, eta beste xede bati lotuta ez dauden diru-sarrera arrunten eta kapitalekoen bidez finantzatuko da.
Planeko aurreko puntuan azaldu den moduan, Noain Elortzibarko Udalak 2016ko aurrekontu orokor eta bakarrean bi kontu-sail ditu diru-laguntza hauek finantzatzeko:
–“Hirugarren Mundurako dir., inbertsioak” izeneko 0-2391-7820000 kontu-saila, 35.000,00 eurokoa.
a) Laguntzak emateko beharrezkoak diren tresnak.
Plan Estrategikoak, garapen bidean dauden herrialdeekin lankidetza proiektuak gauzatzeko diru-laguntzak emateko tresna gisa, honako hauek izanen ditu:
–Hirugarren Munduarekiko lankidetza proiektuetarako laguntzak arautzen dituen ordenantza (21. ordenantza). Behin betiko onetsi zen 1998ko otsailaren 3ko osoko bilkuran, eta 1998ko 26. Nafarroako Aldizkari Ofizialean, martxoaren 2an, argitaratu); haren aldaketa behin betiko onetsi zen 2012ko martxoaren 7ko osoko bilkuran, eta 2012ko 69. Nafarroako Aldizkari Ofizialean, apirilaren 12an, argitaratu).
–Noain Elortzibarko Udalaren diru-laguntzak arautzen dituen ordenantza orokorra (40. ordenantza). Behin betiko onetsi zen 2014ko urtarrilaren 15eko osoko bilkuran, eta 2014ko 39. Nafarroako Aldizkari Ofizialean, otsailaren 26an, argitaratu); 21. ordenantzaren osagarri.
–38/2003 Lege Orokorra, azaroaren 17koa, diru-laguntzei buruzkoa.
–6/1990 Foru Legea, uztailaren 2koa, Nafarroako Toki Administrazioari buruzkoa.
–30/1992 Legea, azaroaren 26koa, Herri Administrazioen Araubide Juridikoari eta Administrazio Prozedura Erkideari buruzkoa.
b) Tramitazioa.
Noain Elortzibarko Udalak deialdi publikoaren bidez eman ditu orain arte garapen bidean dauden herrialdeekin lankidetza proiektuak gauzatzeko diru-laguntzak. Behar besteko giza baliabiderik ez dagoenez norgehiagokako araubidean, deialdi publikoaren bidez, egiten jarraitzeko, Udalaren 2016ko aurrekontuan kontsignazio izenduna sartu da, 2016ko abenduaren 13ko osoko bilkuran zeudenek aho batez onetsirik; Alkatetzak 2016ko abenduaren 19an emandako ebazpenaren bidez onetsi zen aurrekontuko aldaketa, erabaki hari jarraikiz.
Aurrekontuan zehaztutako GKEei diru-laguntza emateko irizpidea hau da: Noain Elortzibarko udalerriarekin duten lotura zuzena eta/edo lehendik ere horiekin lankidetzan aritu izana.
Diru-laguntza eskatzeko Udalak ezartzen dituen baldintzak bete beharko dituzte eskatzaileek, eta baldintza horiek frogatzeko beharrezkoak diren agiriak aurkeztu.
Prozedura ebazteko organo eskuduna Noain Elortzibarko Udaleko Alkatetza da, eta instrukzio organoa, berriz, Idazkaritza alorra.
Ez-betetzeak izaten badira edo diru-laguntzak osorik edo partzialki itzuli behar badira, Diru-laguntzei buruzko azaroaren 17ko 38/2003 Legean xedatutakoa aplikatuko da.
Esleipen-hartzaileak ezartzen den epean frogatu beharko du diru-laguntzaren xedea.
Iragarkiaren kodea: L1614858