189. ALDIZKARIA - 2017ko irailaren 29a

1. NAFARROAKO FORU KOMUNITATEA

1.7. BESTELAKOAK

123/2017 EBAZPENA, irailaren 11koa, Industriaren, Energiaren eta Berrikuntzaren zuzendari nagusiak emana. Honen bidez aldatzen da Cortesko “El Valle-Valdenavarro” parke eolikoaren aurretiazko administrazio baimena, eraikitzeko baimen administratiboa eta haren onura publikoaren deklarazioa.

Enpresako zuzendari nagusiaren azaroaren 23ko 2696/2010 Ebazpenaren bidez, administrazio baimena eman zen 31,5 MW-eko “El Valle I+D 1. fasea” parke eolirako, eta Enpresaren eta Berrikuntzaren zuzendari nagusiaren apirilaren 20ko 872DGE/2012 Ebazpenaren bidez, berriz, 18 MW-eko “El Valle I+D 2. fasea” parkerako administrazio baimena eman zen.

Enpresaren eta Berrikuntzaren zuzendari nagusiaren apirilaren 20ko 872DGE/2012 Ebazpenaren bidez, administrazio baimena eman zen Cortesko udal-mugartean 13,5 MW-eko “Valdenavarro” parke eolikoa gauzatzeko.

Enpresaren eta Berrikuntzaren zuzendari nagusiaren ekainaren 4ko 1212/2012 eta 1213/2012 Ebazpenen bidez, Valdenavarro parke eoliko esperimentalaren (SCE01098) eta El Valle I+D parke eoliko esperimentalaren proiektua (SCE01099) onetsi eta haien onura publikoaren deklarazioa egin zen.

Ingurumeneko eta Lurraldearen Antolamenduko zuzendari nagusiaren irailaren 23ko 1120E/2016 Ebazpenaren bidez, “G10X Nafarroan” izeneko udalez gaindiko proiektu sektoriala aldatzeko espedientea onetsi zen, Valdenavarro eta El Valle parke eolikoetako haize-sorgailuaren modelo aldaketari buruzkoa baita.

Gamesa Energía SA Unipersonal-ek 2017ko apirilaren 7an proiektu bategina aurkeztu dio Energiaren, Meatzaritzaren eta Industria Segurtasunaren Zerbitzuari, El Valle parke eolikoaren (SCE01099) proiektuko eranskin gisa hartua izan dadin. Horrela, 46,2 MW-eko potentzia totala izatera pasako da (3,3 MW-eko 14 posizio) eta “El Valle-Valdenavarro parke eolikoa” izendapena izango du.

Jatorrizko proiektuarekiko dauden aldaketak jarraian laburbiltzen dira:

–G132 haize-sorgailu modelo berria, G128 haize-sorgailua ordezkatuz.

–AG03 haize-sorgailuaren koordenatuak aldatu dira:

  • Jatorrizko koordenatuak: X: 627031, Y: 4645338.
  • Koordenatu berria: X: 626970, Y: 4645372

–Parkearen obra zibila (zimentazioa, plataformak eta bideak), G132 haize-sorgailu modeloaren zehaztapen berrietara egokitu da.

–Parkearen tentsio ertaineko sarea birkalkulatu egin da galera elektrikoak optimizatzeko, eta, ondorioz, 20 KW-etik 30era aldatu da.

–Ukitutako ondasun eta eskubideen zerrenda aldatu da.

Gamesa Energía SA Unipersonal-en eskaera jendaurrean paratu da, iragarkia Diario de Navarran eta 2017ko 83. Nafarroako Aldizkari Ofizialean jarriz, biak ere maiatzaren 2an. Hori guztia abenduaren 1eko 1955/2000 Errege dekretuko 125. eta 144. artikuluetan ezarritakoari jarraikiz, argindarra garraiatu, banatu, merkaturatu eta hornitzeko jarduerak eta instalazioak baimentzeko prozedura arautzen dituena. Halaber, iragarkia Cortesko Udalaren ediktu oholean argitaratu da. Ez da alegaziorik jaso horren inguruan.

Gamesa Energía SA Unipersonal-en eskaera Enagas SA-ri, Nekazaritzako Azpiegituren Zerbitzuari eta Cortesko Udalari helarazi zaie, abenduaren 1eko 1955/2000 Errege Dekretuaren 127., 131., 144. eta 146. artikuluetan ezarritakoari jarraikiz.

Enagas SA-k baldintza agiria eman du 2017ko maiatzaren 23an, eta Gamesa Energía SA Unipersonal-ek oniritzia eman dio 2017ko ekainaren 9ko dokumentuan.

Nekazaritzako Azpiegituren Zerbitzuak txostenak eman ditu 2017ko maiatzaren 2an eta ekainaren 9an, egungo ureztalurrei eta Nafarroako Foru Komunitateko Ureztatze Planari dakarkiena ekonomikoki baloratzeko. Gamesa Energía SA Unipersonal-ek adierazi baldintza agiriei oniritzia eman die, 2017ko uztailaren 3ko dokumenturen bidez.

Cortesko Udalak eskatutako baimenari oniritzia adierazi dio 2017ko abuztuaren 3an.

Adierazitakoarekin bat, eta Nafarroako Foru Komunitateko Administrazioari buruzko abenduaren 3ko 15/2004 Foru Legearen 22. artikuluak ematen dizkidan eskudantziak erabiliz,

EBATZI DUT:

1. Gamesa Energía SA Unipersonal-i aurretiazko administrazio baimena ematea, aipatu instalazioan aldaketak egin ditzan.

2. Zehazki, instalazio horren onura publikoa deklaratzea, Sektore Elektrikoari buruzko abenduaren 26ko 24/2013 Legearen 54., 55. eta 56. artikuluetan, eta hori garatzen duen abenduaren 1eko 1955/2000 Errege Dekretuaren 148. eta 149. artikuluetan aurreikusitako ondorioetarako.

3. Instalazio hori egiteko aurkeztutako proiektu bategina, José Antonio Gil Embid jauna industria ingeniari teknikoak sinatua, onestea. Hogeita hamasei hilabete eman zaizkio obrak burutzeko.

4. Gamesa Energía SA Unipersonal enpresari onuradun izaera aitortzea desjabetze espedientean.

5. Instalazioak aurkeztutako proiektuari jarraikiz gauzatu beharko dira, eta bat etorri beharko dute Goi tentsioko instalazio elektrikoen baldintza teknikoei eta segurtasun bermeei buruzko erregelamendua onesten duen maiatzaren 9ko 337/2014 Errege Dekretuan eta Goi tentsioko linea elektrikoen baldintza teknikoei eta segurtasun bermeei buruzko erregelamendua onesten duen otsailaren 15eko 223/2008 Errege Dekretuan xedatutakoarekin.

6. Behin proiektua gauzaturik, eskatzaileak zerbitzuan jartzearen akta eskatu beharko du. Eskaera horri erantsiko zaizkio aipatutako araudian ezarritako agiriak eta obra bukaerako ziurtagiria, teknikari eskudun batek sinatua.

7. Administrazio baimena eta proiektuaren onespena emanda ere, instalazioa gauzatzeko beharrezkoak diren kontzesio, lizentzia eta baimen guztiak, publikoak nahiz pribatuak, lortu beharko ditu instalazioaren eskatzaileak, aplikatzekoak diren beste xedapen batzuekin bat.

8. Ebazpen hau igortzea Energiaren, Meatzaritzaren eta Industria Segurtasunaren Zerbitzura eta Nekazaritzako Azpiegituren Zerbitzura, behar diren ondorioak izan ditzan.

9. Ebazpen hau Nafarroako Aldizkari Ofizialean argitaratzea, orok jakin dezan.

10. Ebazpen hau Gamesa Energía SA Unipersonal-i, Enagas SA-ri eta ukitutako ondasun eta eskubideen titularrei jakinaraztea, eta ohartaraztea ebazpenak ez duela administrazio bidea amaitzen eta haren aurka gora jotzeko errekurtsoa jartzen ahal dela, Garapen Ekonomikorako kontseilariari zuzendua, jakinarazpena egin eta biharamunetik hilabeteko epean. Hartan espediente zenbakia adierazi beharko da.

11. Cortesko Udalari Ebazpen hau jakinaraztea, adieraziz zilegi duela administrazioarekiko auzi-errekurtsoa jartzea, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean. Horrek ez du galarazten Nafarroako Gobernuan aldez aurreko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean.

Iruñean, 2017ko irailaren 11n.–Industriaren, Energiaren eta Berrikuntzaren zuzendari nagusia, Yolanda Blanco Rodríguez.

Iragarkiaren kodea: F1710692