Iragarkia

146. ALDIZKARIA - 2017ko uztailaren 31

1. NAFARROAKO FORU KOMUNITATEA

1.7. BESTELAKOAK

487E/2017 EBAZPENA, uztailaren 19koa, Turismo eta Merkataritzako zuzendari nagusiak emana, Iruñeko Alde Zaharra turismo ugariko eremutzat deklaratzen duena uztailaren 1aren eta abuztuaren 31ren arteko aldirako, bi egun horiek barne, merkataritzako ordutegien ondorioetarako.

Lehena.–Merkataritzako Ordutegiei buruzko abenduaren 21eko 1/2004 Legearen 5. artikuluak ordutegien araubide berezia duten establezimenduak ezartzen ditu; horren 1. idatz-zatian xedatutakoaren arabera, Estatu osoan turismo ugariko eremuetako establezimenduek, besteak beste, askatasun osoa dute jendaurreko egutegia eta ordutegia ezartzeko.

Bestaldetik, artikulu horren 4. idatz-zatiak xedatzen du ezen autonomia erkidegoek, aipatutako idatz-zatian ezarritakoaren ondorioetarako eta udalek proposatuta, beren lurraldean turismo ugariko eremuak zehaztuko dituztela. Udalerri osoan edo horren zati batean idatz-zati horretan ezarritako inguruabarretako bat gertatzen denean, turismo ugariko eremutzat hartuko da.

Halaber, idatz-zati horretan ezarritakoaren arabera, turismo ugariko eremutzat deklaratzeko proposamenean udal interesdunak denboraren edo lurraldearen aldetik mugaren bat sartzen badu, horren arrazoiak justifikatu beharko ditu, merkataritzako eta turismoko interesen arabera eta kontsumitzaileen mesedetan.

Artikulu horren 5. idatz-zatian ezarritakoaren arabera, 100.000 biztanletik gorako udalerrietan, aurreko urtean 600.000 ostatu-gau baino gehiago erregistratu baldin badira, turismo ugariko eremu bat deklaratuko da, gutxienez, 1/2004 Legean aurreikusitako irizpideak aplikatuta. Datu estatistiko horiek lortzeko, Estatistikako Institutu Nazionalaren argitalpenak eta Estatuko Portuenak erabiliko dira.

Horrez gain, idatz-zati horrek adierazten du ezen sei hilabeteko epean, datu horiek argitaratzen direnetik, aurreko paragrafoan adierazitako inguruabarrak hartzen dituen udalerri batean turismo ugariko eremu bat ere ez bada deklaratu, horrelako eremutzat udalerri osoa deklaratu dela ulertuko da, eta merkatariek askatasun osoa izanen dute urte osoan establezimenduak irekitzeko.

Bigarrena.–Estatistikako Institutu Nazionalak hotelen okupazioaren inkesta argitaratu zuen 2017ko urtarrilaren 23an. Horri jarraikiz, Iruñean 615.939 ostatu-gau erregistratu ziren 2016an.

Hirugarrena.–Iruñeko Udalak, 2017ko uztailaren 5ean, proposamen bat aurkeztu du Iruñeko Alde Zaharra turismo ugariko eremutzat deklaratzeko uztailaren 1aren eta abuztuaren 31ren arteko aldirako, bi egun horiek barne, lan arloko araudian eta lan hitzarmen kolektibo aplikagarrietan ezarritakoa betetzearen ondoriozko mugak galarazi gabe.

Laugarrena.–Turismoa eta Merkataritza Antolatu eta Sustatzeko Zerbitzuak proposamena aztertu du, eta uste du behar bezala justifikatuta dagoela turismo ugariko eremuaren mugapena, denboraren zein lurraldearen aldetik, eta, gainera, mugapen horrek premiaren eta proportzionaltasunaren printzipioak betetzen dituela; horregatik, Iruñeko Udalak egindako proposamenaren alde dago.

Horrenbestez, Garapen Ekonomikorako Departamentuaren egitura organikoa ezarri zuen urtarrilaren 11ko 1/2017 Foru Dekretuaren bidez eskuratu ditudan eskudantziak erabiliz,

EBATZI DUT:

1. Iruñeko Alde Zaharra turismo ugariko eremutzat deklaratzea uztailaren 1aren eta abuztuaren 31ren arteko aldirako, bi egun horiek barne, merkataritzaren ondorioetarako.

2. Ondorio horietarako, Iruñeko Alde Zaharreko kaleak zerrendatzen dira ebazpen honen eranskinean.

3. Ebazpen hau Iruñeko Udalari jakinaraztea.

4. Ebazpen hau eta dagokion eranskina Nafarroako Aldizkari Ofizialean argitaratzea.

5. Ebazpen hau balioduna izanen da ebazpena justifikatzen duten inguruabarrak eta ebazpena oinarritzen duen araudia indarrean dauden bitartean, lan arloko araudian eta lan hitzarmen kolektibo aplikagarrietan ezarritakoa betetzearen ondoriozko mugak galarazi gabe.

6. Adieraztea ebazpen honek ez duela administrazio bidea amaitzen, eta horren aurka gora jotzeko errekurtsoa jar daitekeela, Garapen Ekonomikorako kontseilariari zuzendua, argitaratu eta biharamunetik hilabeteko epean. Administrazio Publikoek administrazioarekiko auzi-errekurtsoa jartzen ahal dute, eskumena duen ordena jurisdikzionalari zuzendua, honako hau argitaratu eta biharamunetik hasita bi hilabeteko epean, horrek galarazi gabe Nafarroako Gobernuan aldez aurreko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan aurreikusitako moduan eta epeetan.

Iruñean, 2017ko uztailaren 19an.–Turismo eta Merkataritzako zuzendari nagusia, Maitena Ezkutari Artieda.

ERANSKINA

Iragarkiaren kodea: F1708888